040.0532.25.08.99

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
25 oգոստոսի 1999 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 օգոստոսի 1999 թվականի N 532

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱԿՐԹԱԿԱՆ ԴՊՐՈՑՆԵՐՈՒՄ ԵՎ ՄԻՋԻՆ ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ՆԱԽԱԶՈՐԱԿՈՉԱՅԻՆ ՊԱՏՐԱՍՏՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Զինապարտության մասին» Հայաստանի Հանրապետության օրենքի 8 հոդվածին համապատասխան` Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության հանրակրթական դպրոցներում և միջին մասնագիտական ուսումնական հաստատություններում նախազորակոչային պատրաստության կարգը (կցվում է):

2. Հայաստանի Հանրապետության կրթության և գիտության նախարարությանը, Հայաստանի Հանրապետության պաշտպանության նախարարությանը` մինչև 1999/2000 ուսումնական տարվա սկիզբը համատեղ հաստատել Հայաստանի Հանրապետության հանրակրթական դպրոցներում և միջին մասնագիտական ուսումնական հաստատություններում նախազորակոչային պատրաստության կանոնադրությունը, ուսումնական ծրագրերը, մեթոդական և այլ փաստաթղթերը, զինղեկների պատրաստման, վերապատրաստման և ատեստավորման կարգը, նրանց մասնագիտական որակավորման բարձրացման դասընթացների ուսումնական պլան-ծրագրերը, «Նախնական զինվորական պատրաստություն» առարկայի ուսուցման և սովորողների ռազմահայրենասիրական դաստիարակության հրահանգը:

3. Սույն որոշումն ուժի մեջ է մտնում 1999 թվականի օգոստոսի 25-ից:

Կ Ա Ր Գ

Հայաստանի Հանրապետության հանրակրթական դպրոցներում եվ միջին մասնագիտական ուսումնական հաստատություններում նախազորակոչային պատրաստության

1. Հայաստանի Հանրապետության հանրակրթական դպրոցներում և միջին մասնագիտական ուսումնական հաստատություններում (այսուհետև` ուսումնական հաստատություններ) (անկախ կազմակերպական-իրավական ձևից) նախազորակոչային պատրաստությունը (այսուհետև` ՆԶՊ) կազմակերպվում է «Զինապարտության մասին» Հայաստանի Հանրապետության օրենքին, այլ իրավական ակտերին, ինչպես նաև սույն կարգին համապատասխան երիտասարդությանը Հայաստանի Հանրապետության զինված ուժերում ծառայությանը նախապատրաստելու նպատակով:

2. Ուսումնական հաստատություններում ՆԶՊ-ն իրականացվում է «Նախնական զինվորական պատրաստություն» առարկայի ուսուցման և ռազմահայրենասիրական դաստիարակության միջոցով:

3. Հայաստանի Հանրապետության կրթության և գիտության նախարարությունն ու Հայաստանի Հանրապետության պաշտպանության նախարարությունը, համագործակցելով Հայաստանի Հանրապետության ֆինանսների նախարարության, Հայաստանի Հանրապետության էկոնոմիկայի նախարարության, Հայաստանի Հանրապետության առողջապահության նախարարության, Հայաստանի Հանրապետության մշակույթի, երիտասարդության հարցերի և սպորտի նախարարության, Հայաստանի Հանրապետության կառավարությանն առընթեր արտակարգ իրավիճակների վարչության, այլ շահագրգիռ գերատեսչությունների և կազմակերպությունների հետ, հաստատում են Հայաստանի Հանրապետության հանրակրթական դպրոցներում և միջին մասնագիտական ուսումնական հաստատություններում նախազորակոչային պատրաստության կանոնադրությունը, ուսումնական ծրագրերը, մեթոդական և այլ փաստաթղթերը:

4. ՆԶՊ-ի ընդհանուր ղեկավարումն իրականացնում է Հայաստանի Հանրապետության կրթության և գիտության նախարարությունը` համագործակցելով Հայաստանի Հանրապետության պաշտպանության նախարարության հետ:

5. Հայաստանի Հանրապետության կրթության և գիտության նախարարությունը`

ա) վերահսկում է «Նախնական զինվորական պատրաստություն» առարկայի ուսուցումը և սովորողների ռազմահայրենասիրական դաստիարակությունը.

բ) կազմակերպում է «Նախնական զինվորական պատրաստություն» առարկայի վերաբերյալ ուսումնադիտողական նյութերի մշակումը, հրատարակումը.

գ) Հայաստանի Հանրապետության պաշտպանության նախարարության հետ համատեղ ուսումնասիրում, ընդհանրացնում և տարածում է ՆԶՊ-ի անցկացման ու սովորողների ռազմահայրենասիրական դաստիարակության դրական փորձը, նյութական և բարոյական խրախուսանքի արժանացնում լավագույն ուսումնական հաստատությունները և աշխատողներին.

դ) մասնակցում է զինղեկների որակավորման բարձրացման աշխատանքներին, անցկացնում նրանց` որպես մանկավարժների ատեստավորումը.

ե) Հայաստանի Հանրապետության պաշտպանության նախարարության հետ համատեղ հաստատում է զինղեկների պատրաստման, վերապատրաստման և ատեստավորման կարգը, մասնագիտական որակավորման բարձրացման դասընթացների ուսումնական պլան-ծրագրերը.

զ) Հայաստանի Հանրապետության պաշտպանության նախարարության հետ համատեղ կազմակերպում է ռազմահայրենասիրական խաղերի անցկացումը.

է) շահագրգիռ նախարարությունների հետ համատեղ ուսումնական հաստատություններում անցկացնում է գիտագործնական համաժողովներ, դասախոսություններ.

ը) իրականացնում է Հայաստանի Հանրապետության օրենսդրությամբ սահմանված այլ լիազորություններ:

6. Հայաստանի Հանրապետության պաշտպանության նախարարությունը`

ա) աջակցում է ուսումնական հաստատությունների` զորամասերի և զինվորական ուսումնական հաստատությունների հետ կապերի ամրապնդմանը, սովորողների հետ դաշտային պարապմունքների (հավաքներ) անցկացմանը.

բ) կայազորների պետերի, զորամասերի հրամանատարների, զինվորական ուսումնական հաստատությունների պետերի, կրթական և այլ շահագրգիռ մարմինների հետ համատեղ սովորողների համար կազմակերպում է մարտական փամփուշտներով հրաձգություն, ռազմահայրենասիրական խաղեր, մրցումներ, այլ միջոցառումներ.

գ) ներկայացնում է զինղեկների թեկնածուների ցուցակներ, որոնց թվից ուսումնական հաստատությունների պահանջարկի համաձայն սահմանված կարգով նշանակվում են զինղեկներ.

դ) ուսումնական հաստատությանը կցում է զորամաս կամ զինվորական ուսումնական հաստատություն, որը`

մշտական օգնություն է ցույց տալիս ՆԶՊ-ի և ռազմահայրենասիրական դաստիարակության կազմակերպման գործում.

կազմակերպում է սովորողների այցելություններ զորամաս, զինվորական ուսումնական հաստատություն, բաց դռների օրեր, հանդիպումներ մարտական գործողությունների մասնակիցների, մարտական պատրաստության գերազանցիկների հետ.

սովորողներին ծանոթացնում է ռազմական տեխնիկական, զինծառայողների կյանքին ու կենցաղին.

պարապմունքների համար տրամադրում է հրաձգարաններ, ինքնաձիգ հրազեն, փամփուշտներ, այլ անհրաժեշտ միջոցներ.

սովորողներ հետ գործնական պարապմունքներ անցկացնելու նպատակով առանձնացնում է սպաների, ենթասպաների և սերժանտների.

օգնություն է ցույց տալիս զինկոմիսարիատներին` զինղեկների հետ ցուցադրական պարապմունքներ անցկացնելու համար.

օժանդակում է ուսումնական հաստատությունների ՆԶՊ-ի ուսումնական ու նյութատեխնիկական բազայի հարստացմանը:

7. Հայաստանի Հանրապետության առողջապահության նախարարությունը`

ա) կազմակերպում և իրականացնում է զինղեկների վերապատրաստումն ու որակավորման բարձրացումը բժշկական գիտելիքների մասով.

բ) Հայաստանի Հանրապետության կրթության և գիտության նախարարության հետ համատեղ վերահսկում է ուսումնական հաստատություններում բժշկական գիտելիքների հիմունքների ուսուցման որակը:

8. Հայաստանի Հանրապետության ներքին գործերի նախարարությունն իրականացնում է ուսումնական հաստատություններում զենքի պահպանման սենյակների ազդանշանային համակարգի սպասարկումը:

9. Հայաստանի Հանրապետության կառավարությանն առընթեր արտակարգ իրավիճակների վարչությունը`

ա) Հայաստանի Հանրապետության կրթության և գիտության նախարարության ու Հայաստանի Հանրապետության առողջապահության նախարարության, շահագրգիռ կազմակերպությունների հետ համատեղ մշակում է քաղաքացիական պաշտպանությանը և արտակարգ իրավիճակներին առնչվող հիմնահարցերի ու բժշկական գիտելիքների հիմունքների մասին «Նախնական զինվորական պատրաստություն» առարկայի ծրագրի բաժինը, դասագրքեր, ձեռնարկներ.

բ) կազմում է քաղաքացիական պաշտպանության և բուժսանիտարական պատրաստության գույքի ցուցակը, հագեցվածության նորմերը.

գ) հրատարակում է ՆԶՊ-ի քաղաքացիական պաշտպանության բաժնին վերաբերող գրքույկներ, այլ հանրամատչելի գրականություն, պատրաստում է դիաֆիլմեր, տեսաֆիլմեր, պլակատներ, այլ ուսումնական պարագաներ.

դ) գործնական պարապմունքների կազմակերպման նպատակով հատկացնում է ապաստարաններ, հակաճառագայթային թաքստոցներ.

ե) կազմակերպում և իրականացնում է զինղեկների վերապատրաստում` քաղաքացիական պաշտպանության և արտակարգ իրավիճակների հիմնահարցերի գծով:

10. Հայաստանի Հանրապետության մարզպետները (Երևանի քաղաքապետը) ապահովում են ուսումնական հաստատությունների` ՆԶՊ-ի ծրագրով նախատեսված շինությունների կառուցումը, շահագործումը, պահպանման միջոցների հատկացումը:

11. Համայնքների ղեկավարներն իրենց իրավասությունների սահմաններում աջակցում են ՆԶՊ-ի իրականացմանը: