ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 նոյեմբերի 1994 թվականի N 529

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ՆԱԽԿԻՆ ԽՍՀՄ ՀԵՂԻՆԱԿԱՅԻՆ ՎԿԱՅԱԳՐԵՐՈՎ ՊԱՇՏՊԱՆՎՈՂ ԳՅՈՒՏԵՐԻ ԵՎ ՆԱԽԿԻՆ ԽՍՀՄ ՎԿԱՅԱԳՐԵՐՈՎ ՊԱՇՏՊԱՆՎՈՂ ԱՐԴՅՈՒՆԱԲԵՐԱԿԱՆ ՆՄՈՒՇՆԵՐԻ ՕԳՏԱԳՈՐԾՄԱՆ ԵՎ ԴՐԱՆՑ ՀԵՂԻՆԱԿՆԵՐԻ ՎԱՐՁԱՏՐՈՒԹՅԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

Ի կատարումն Հայաստանի Հանրապետության Գերագույն խորհրդի 1993 թվականի հուլիսի 20-ի «Արտոնագրերի մասին» Հայաստանի Հանրապետության օրենքը կիրարկելու մասին» որոշման 2-րդ կետի և 10-րդ կետի «գ» ենթակետի, ինչպես նաև արդյունաբերական սեփականության օբյեկտների օգտագործումը խթանելու նպատակով Հայաստանի Հանրապետության կառավարությունը որոշում է`

Հաստատել Հայաստանի Հանրապետության տարածքում գործող նախկին ԽՍՀՄ հեղինակային վկայագրերով պաշտպանվող գյուտերի և նախկին ԽՍՀՄ վկայագրերով պաշտպանվող արդյունաբերական նմուշների օգտագործման և դրանց հեղինակների վարձատրության կարգը (կցվում է):

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ՆԱԽԿԻՆ ԽՍՀՄ ՀԵՂԻՆԱԿԱՅԻՆ ՎԿԱՅԱԳՐԵՐՈՎ ՊԱՇՏՊԱՆՎՈՂ ԳՅՈՒՏԵՐԻ ԵՎ ՆԱԽԿԻՆ ԽՍՀՄ ՎԿԱՅԱԳՐԵՐՈՎ ՊԱՇՏՊԱՆՎՈՂ ԱՐԴՅՈՒՆԱԲԵՐԱԿԱՆ ՆՄՈՒՇՆԵՐԻ ՕԳՏԱԳՈՐԾՄԱՆ ԵՎ ԴՐԱՆՑ ՀԵՂԻՆԱԿՆԵՐԻ ՎԱՐՁԱՏՐՈՒԹՅԱՆ

1. Ձեռնարկությունները, հիմնարկները և կազմակերպությունները (անկախ սեփականության ձևից), ինչպես նաև անհատ ձեռներեցները (այսուհետև` տնտեսավարող սուբյեկտները) կարող են առանց հատուկ թույլտվության Հայաստանի Հանրապետության տարածքում օգտագործել նախկին ԽՍՀՄ հեղինակային վկայագրերով պաշտպանվող գյուտերը և նախկին ԽՍՀՄ վկայագրերով պաշտպանվող արդյունաբերական նմուշները:

2. Յուրաքանչյուր տնտեսավարող սուբյեկտ գյուտերը և արդյունաբերական նմուշները (այսուհետև` արդյունաբերական սեփականության օբյեկտներ), դրանց առաջնության թվականից համապատասխանաբար 20 և 15-ամյա ժամկետներում սույն կարգի 1-ին կետին համապատասխան օգտագործելու դեպքում, պարտավոր է օգտագործման պահից սկսած 6-ամսյա ժամկետում այդ մասին տեղեկացնել Հայաստանի Հանրապետության կամ այլ պետության, որի հետ կնքված է համապատասխան համաձայնագիր, տարածքում բնակվող արդյունաբերական սեփականության տվյալ օբյեկտի հեղինակին (հեղինակներին), նշելով նաև նրա (նրանց) հետ վարձատրման մասին պայմանագիր կնքելու իր պատրաստականության մասին: Նշված ժամկետը խախտելու դեպքում տնտեսավարող սուբյեկտը հեղինակին (հեղինակներին) վճարում է տույժ` յուրաքանչյուր ժամկետանց օրվա համար վճարման պահին Հայաստանի Հանրապետությունում սահմանված նվազագույն աշխատավարձի 0,5 տոկոսի չափով (անկախ հեղինակների թվից):

3. Արդյունաբերական սեփականության օբյեկտի օգտագործման համար հեղինակի (հեղինակների) վարձատրությունը կատարվում է յուրաքանչյուր տնտեսավարող սուբյեկտի կողմից պայմանագրային հիմունքներով:

Պայմանագրում վարձատրության ժամկետների բացակայության դեպքում այն կատարվում է արդյունաբերական սեփականության օբյեկտի օգտագործման պայմանագրով գումարի ստացման դեպքում` այն ստանալու օրվանից երկամսյա ժամկետում:

4. Արդյունաբերական սեփականության յուրաքանչյուր օբյեկտի օգտագործման համար հեղինակին (հեղինակներին) հասանելիք գումարի նվազագույն չափը (անկախ հեղինակների թվից) սահմանվում է տվյալ օբյեկտի օգտագործումից ստացվող ամենամյա շահույթի 15 տոկոսից ոչ պակաս, իսկ լիցենզային պայմանագրով գումարի ստացման դեպքում` տվյալ արդյունաբերական սեփականության օբյեկտին համապատասխան մասի 20 տոկոսից ոչ պակաս:

Շահույթ չառաջացնող արդյունաբերական սեփականության օբյեկտի օգտագործման դեպքում տնտեսավարող սուբյեկտի և հեղինակի (հեղինակների) միջև կնքվող պայմանագրում նշվում է նաև վարձատրության չափը և կարգը` տվյալ օբյեկտի օգտագործման ծավալը հետագա տարիներին աճելու դեպքում:

5. Արդյունաբերական սեփականության օբյեկտի օգտագործման համար հեղինակին (հեղինակներին) սույն կարգի 3-րդ կետով սահմանված ժամկետներում չվերադարձնելու դեպքում տնտեսավարող սուբյեկտը հեղինակին (հեղինակներին) վճարում է տույժ` յուրաքանչյուր ժամկետանց օրվա համար չվճարված գումարի 0,1 տոկոսի չափով (անկախ հեղինակների թվից):

6. Հեղինակների վարձատրության կապակցությամբ ծագած վեճերը լուծվում են Հայաստանի Հանրապետության օրենսդրությամբ սահմանված դատական կարգով:

7. Եթե արդյունաբերական սեփականության օբյեկտի օգտագործումն սկսվել է մինչև սույն կարգի կիրարկումը, ապա օգտագործման համար հեղինակի (հեղինակների) վարձատրությունը կատարվում է տվյալ օբյեկտի օգտագործումն սկսելու պահին գործող օրենսդրությանը համապատասխան, հաշվի առնելով Հայաստանի Հանրապետության օրենսդրությամբ սահմանված նվազագույն աշխատավարձի փոփոխությունները: Մինչև սույն կարգի կիրարկման պահը հեղինակի (հեղինակների) վճարած գումարի վերահաշվարկ չի կատարվում:

8. Եթե Հայաստանի Հանրապետությունում սույն կարգի 1-ին կետին համապատասխան օգտագործված գյուտերի կամ արդյունաբերական նմուշների հեղինակները ժամանակին չեն վարձատրվել Հայաստանի Հանրապետության նախարարությունների, պետական վարչությունների, գերատեսչությունների կողմից, ապա վարձատրությունը կատարվում է տվյալ արդյունաբերական սեփականության օբյեկտն օգտագործող յուրաքանչյուր տնտեսավարող սուբյեկտի կողմից, սույն կարգի 7-րդ կետին համապատասխան:

9. Սույն կարգին համապատասխան օգտագործված արդյունաբերական սեփականության օբյեկտների հեղինակները, որոնք հանդիսանում են այլ պետությունների քաղաքացիներ կամ այդ պետություններում մշտապես բնակվող քաղաքացիություն չունեցող անձինք, վարձատրվում են փոխադարձության սկզբունքով` Հայաստանի Հանրապետության միջազգային պայմանագրերին (համաձայնագրերին) համապատասխան: