ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

17 հոկտեմբերի 1993 թվականի N 524

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԱՊԱՍՏԱՆԱԾ ՓԱԽՍՏԱԿԱՆՆԵՐԻՆ «ՓԱԽՍՏԱԿԱՆԻ ԸՆՏԱՆԻՔԻ ՎԿԱՅԱԿԱՆ» ՏԱԼՈՒ ՄԱՍԻՆ

Հայաստանի Հանրապետությունում ապաստանած փախստականների հիմնահարցերի լուծման, մարդասիրական օգնության գծով աշխատանքների համակարգման, փախստականների թվաքանակի և բնակության վայրի վերջնական ճշգրտման, ինչպես նաև նրանց փաստաթղթերի հաշվառման գործում անհրաժեշտ կարգ ու կանոնի հաստատման նպատակով Հայաստանի Հանրապետության կառավարությունը որոշում է`

1. Հայաստանի Հանրապետության փախստականների հարցերի պետական վարչությանը`

ա) 1993 թվականի նոյեմբերի 1-ից Հայաստանի Հանրապետությունում սկսել փախստականներին նախկինում տրված սկզբնական հաշվառման փաստաթղթերի փոխարեն նոր նմուշի միասնական «Փախստականի ընտանիքի վկայական» տալու աշխատանքները:

Սահմանել, որ վկայականի ձևը հաստատվում է Հայաստանի Հանրապետության փախստականների հարցերի պետական վարչության կողմից.

բ) վարչությանը կից ստեղծել Հայաստանի Հանրապետության տարածքում ապաստանած փախստականներին «Փախստականի ընտանիքի վկայական» տալու աշխատանքները համակարգող կենտրոնական հանձնաժողով:

2. Պատգամավորների քաղաքային ու շրջանային խորհուրդների գործադիր կոմիտեներին`

ա) ստեղծել քաղաքի (շրջանի) տարածքում բնակություն հաստատած փախստականների փաստաթղթերի փոխանակման և միասնական վկայական տալու քաղաքային (շրջանային) ժամանակավոր հանձնաժողով` գործկոմի նախագահի տեղակալի նախագահությամբ.

բ) հանձնաժողովում ընդգրկել քաղաքային (շրջանային) խորհուրդների գործադիր կոմիտեների ապարատի փախստականների հարցերով պատասխանատու հաստիքային աշխատողների, ներքին գործերի նախարարության քաղաքային (շրջանային) մարմինների անձնագրային բաժինների ներկայացուցիչների և այլ հիմնարկ-ձեռնարկությունների փորձառու պաշտոնատար անձանց: Այդ աշխատանքներում ներգրավված անձանց ազատել հիմնական աշխատանքային պարտականություններից` պահպանելով նրանց աշխատավայրում ունեցած միջին աշխատավարձը.

գ) «Փախստականի ընտանիքի վկայական» տալու աշխատանքները ժամանակին կատարելու նպատակով հանձնաժողովների համար ստեղծել աշխատանքային անհրաժեշտ պայմաններ (աշխատասենյակ, հեռախոսային կապ, տրանսպորտ և այլն):

3. Հաստատել Հայաստանի Հանրապետությունում ապաստանած փախստականներին «Փախստականի ընտանիքի վկայական» տալու կարգը և գրաֆիկը (կցվում են):

4. Հայաստանի Հանրապետության փախստականների հարցերի պետական վարչությանը, պատգամավորների քաղաքային (շրջանային) խորհուրդների գործադիր կոմիտեներին` փախստականներին «Փախստականի ընտանիքի վկայական» տալու աշխատանքները կատարել սույն որոշմամբ հաստատված կարգին և գրաֆիկին համապատասխան:

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՊԱՍՏԱՆԱԾ ՓԱԽՍՏԱԿԱՆՆԵՐԻՆ «ՓԱԽՍՏԱԿԱՆԻ ԸՆՏԱՆԻՔԻ ՎԿԱՅԱԿԱՆ» ՏԱԼՈՒ

1. Հայաստանի Հանրապետությունում ապաստանած փախստականներին «Փախստականի ընտանիքի վկայական» տալու աշխատանքներն իրականացվում են երկու փուլով`

առաջին փուլում Հայաստանի Հանրապետության փախստականների հարցերի պետական վարչության կողմից հաստատված «Փախստականների ընտանիքի վկայական» տրվում է Հայաստանի Հանրապետությունում մշտական գրանցում չունեցող և ժամանակավոր կացարաններում ապրող, ինչպես նաև բարեկամների և ծանոթների բնակարաններում առանց բնակտարածությունից օգտվելու իրավունքի գրանցված փախստականներին:

Երկրորդ փուլում «Փախստականի ընտանիքի վկայական» տրվում է Հայաստանում մշտական գրանցում ունեցող փախստականներին:

2. Փախստականներին վկայական տալու աշխատանքներն իրականացվում են պատգամավորների շրջանային (քաղաքային) խորհուրդների գործադիր կոմիտեներում ստեղծվող հանձնաժողովների միջոցով:

3. Վկայական ստանալու համար փախստականները հանձնաժողովին պետք է ներկայացնեն`

տեղեկանք փաստացի բնակության վայրից.

փախստականներին 1988 թվականին տրված հաշվառման թերթիկը,

փախստականի ընտանիքի քարտը, փախստականի վկայականը.

ընտանիքի բոլոր չափահաս անդամների անձնագրերը, անչափահասների ծննդյան վկայականները.

տնամերձ հողամաս ստացած փախստականները`

տեղեկանք տվյալ շրջանային խորհրդի գործադիր կոմիտեից հողամաս ստանալու մասին.

բնակարանային-շինարարական կոոպերատիվներում ընդգրկված փախստականները` տեղեկանք բնակարանային-շինարարական կոոպերատիվի անդամության մասին.

պետական բնակելի ֆոնդից բնակարան ստանալու հերթացուցակներում ընդգրկված փախստականները` տեղեկանք բնակարանի հերթում գտնվելու մասին.

դպրոցում, բարձրագույն և միջնակարգ-մասնագիտական ուսումնական հաստատություններում սովորող փախստականները ներկայացնում են տեղեկանք սովորելու վայրից.

տեղեկանք աշխատանքի վայրից կամ զբաղվածության կենտրոնի կողմից գործազրկության մասին.

տեղեկանք կենսաթոշակներ և նպաստներ ստանալու մասին` հաստատված պատգամավորների շրջանային (քաղաքային) խորհուրդների գործկոմների սոցիալական ապահովության բաժինների կողմից:

4. Անձնագրերը (ծննդյան վկայականները) կորցրած փախստականներին վկայական տրվում է սահմանված կարգով` միայն նոր անձնագիր (ծննդյան վկայականներ) ստանալուց հետո:

5. Շրջանային (քաղաքային) հանձնաժողովները սահմանված ժամկետում ներկայացված փաստաթղթերի (տեղեկանքների) հիման վրա փախստականներին տալիս են Հայաստանի Հանրապետության փախստականների հարցերի պետական վարչության կողմից հաստատված ձևի «Փախստականի ընտանիքի վկայական», որը հանձնվում է ընտանիքի գլխավորին:

Ընտանիքի անդամների թվաքանակի, նրանց սոցիալական կազմի և այլ փոփոխություններ կատարվում են փախստականների վերահաշվառման նախկինում լրացված և արխիվ ուղարկված հարցաթերթերում:

Նոր վկայական տալու վերաբերյալ հատուկ նշումներ են կատարվում նաև չափահաս փախստականների գործող անձնագրերում, իսկ անչափահասների` ծննդյան վկայականներում:

6. Փախստականներին նոր վկայականներ հանձնելու ժամանակ հանձնաժողովի կողմից նրանցից հետ են վերցվում 1988 թվականի նմուշի «Հաշվառման թերթիկները», «Փախստականի ընտանիքի քարտը» և «Փախստականի վկայականը», որոնք կցվում են նրանց հարցաթերթիկներին:

7. Փախստականների մասին, վկայական հանձնելուց հետո, ունեցած տեղեկությունները «Որոնում» ԻՏԿ-ում մտցվում են համակարգիչների մեջ և ամրակցվում:

8. Փախստականի ընտանիքի վկայականը համարվում է խիստ հաշվառման փաստաթուղթ:

Փոխանակման ժամանակ փչացված վկայականները շրջանային (քաղաքային) հանձնաժողովների կողմից հատուկ ակտով խոտանվում են և դրանց փոխարեն լրացվում են նորերը: Խոտանված վկայականները հատուկ արձանագրությամբ ներկայացվում են Հայաստանի Հանրապետության փախստականների հարցերի պետական վարչությանը, կից ստեղծված կենտրոնական հանձնաժողովին, որի կողմից դրանք ճանաչվում են անվավեր և ոչնչացվում:

9. «Հաշվառման թերթիկները», «Փախստականների ընտանիքի քարտը» և «Փախստականի վկայականը» համարվում են անվավեր` տվյալ շրջանում (քաղաքում) «Փախստականի ընտանիքի վկայական» տալու օրվանից:

10. Այն փախստականները, որոնք սահմանված ժամկետում իրենց բնակության վայրում չեն կարողացել փոխանակել փաստաթղթերը և ստանալ «Փախստականի ընտանիքի վկայական» պետք է դիմեն Հայաստանի Հանրապետության փախստականների հարցերի պետական վարչության փախստականների փոխանակման կենտրոնական հանձնաժողովին: