Հ Ա Մ Ա Ձ Ա Յ Ն Ա Գ Ի Ր
Բնակչությանը Անկախ Պետությունների Համագործակցության մասնակից պետությունների տարածքում արտադրվող դեղամիջոցներով, վակցինաներով և այլ իմունակենսաբանական պատրաստուկներով, բժշկական նշանակության առարկաներով և բժշկական տեխնիկայով ապահովելու մասին
Սույն Համաձայնագրի մասնակից պետությունները, այսուհետ` մասնակից պետություններ,
ղեկավարվելով «Բնակչության առողջության պահպանության բնագավառում համագործակցության մասին» 1992 թվականի հունիսի 26-ի Համաձայնագրով,
հատուկ նշանակություն տալով բնակչությանը Համագործակցության մասնակից պետություններում արտադրվող դեղամիջոցներով, վակցինաներով և այլ իմունակենսաբանական պատրաստուկներով, բժշկական նշանակության առարկաներով և բժշկական տեխնիկայով ապահովելու մասին,
համաձայնեցին ներքոհիշյալի մասին.
Հ ո դ վ ա ծ 1
Մասնակից պետությունները օժանդակություն կցուցաբերեն բժշկական արտադրանք թողարկող, դեղատնային ծառայության և բժշկական տեխնիկայի ձեռնարկություններին դեղամիջոցներով, վակցինաներով և այլ իմունակենսաբանական պատրաստուկներով, բժշկական նշանակության առարկաներով և բժշկական տեխնիկայով ապահովելու գործում` սեփական պետական կարիքների համար և միջկառավարական համաձայնագրերով:
Հ ո դ վ ա ծ 2
Մասնակից պետությունները պայմանավորվեցին ստեղծել դեղամիջոցների, վակցինաների և այլ իմունակենսաբանական պատրաստուկների, բժշկական նշանակության առարկաների և բժշկական տեխնիկայի արտադրության ու փոխադարձ մատակարարման բնագավառում համագործակցության միջպետական համակարգ:
Հ ո դ վ ա ծ 3
Մասնակից պետությունները կհանձնարարեն առողջապահության բնագավառում համագործակցության գծով Անկախ Պետությունների Համագործակցության Խորհրդին, համաձայնեցնելով Համագործակցության մասնակից պետությունների շահագրգիռ նախարարությունների և գերատեսչությունների հետ, երկամսյա ժամկետում պատրաստել կոնկրետ առաջարկություններ միջպետական համակարգի գործունեության մեխանիզմի վերաբերյալ:
Հ ո դ վ ա ծ 4
Մասնակից պետությունները կօժանդակեն մատակարարվող դեղամիջոցների, վակցինաների և այլ իմունակենսաբանական պատրաստուկների, բժշկական նշանակության առարկաների և բժշկական տեխնիկայի համար փոխադարձ վճարումների իրականացմանը առաջնահերթ կարգով, անկախ նրանց միջև վճարային հաշվեկշռի վիճակից, հաշվի չառնելով սույն Համաձայնագրի մասնակից պետությունների միջև վճարային հաշվեկշռի կարգավորման միջոցով դեղամիջոցների, բժշկական նշանակության այլ առարկաների և բժշկական տեխնիկայի համար վճարումները:
Հ ո դ վ ա ծ 5
Մասնակից պետությունները կհանձնարարեն համապատասխան նախարարություններին` նախատեսելու արտոնյալ նպատակային վարկերի և բյուջետային նպաստների հատկացում բժշկական արտադրանք թողարկող, դեղատնային ծառայության և բժշկական տեխնիկայի համակարգի ձեռնարկությունների շրջանառու միջոցների համալրման նպատակով` անկախ դրանց գերատեսչական պատկանելությունից:
Հ ո դ վ ա ծ 6
Մասնակից պետությունները բժշկական արտադրանք թողարկող, դեղատնային ծառայության և բժշկական տեխնիկայի համակարգի ձեռնարկությունների տեխնիկական վերազինման արագացման, դեղամիջոցների, բժշկական նշանակության առարկաների և բժշկական տեխնիկայի գների նվազեցման, դրանց թողարկման մեծացման, բնակչության սոցիալական պաշտպանության նպատակով, միաժամանակ անհրաժեշտ միջոցներ կձեռնարկեն արտահանման և ներմուծման մաքսային տուրքեր վճարելուց և հավելյալ արժեքից հարկեր գանձելուց ազատելու համար‚
արտահանվող դեղամիջոցների, վակցինաների և այլ իմունակենսաբանական պատրաստուկների, բժշկական նշանակության առարկաների և բժշկական տեխնիկայի համար,
այդ նպատակների համար ներմուծվող հումքի, նյութերի և տեխնոլոգիական սարքավորման, ներառյալ ապրանքափոխանակման (բարտերային) գործողությունների համար:
Հ ո դ վ ա ծ 7
Մասնակից պետությունները կհանձնարարեն առողջապահության նախարարություններին տալ (Ուկրաինայի համապատասխան գերատեսչությանը) դեղամիջոցների, վակցինաների և այլ իմունակենսաբանական պատրաստուկների, բժշկական նշանակության առարկաների և բժշկական տեխնիկայի արտահանման և ներմուծման համար թույլտվություններ (լիցենզիաներ)` դրանց տրամադրման մեխանիզմի պարզեցման նպատակով:
Հ ո դ վ ա ծ 8
Մասնակից պետությունները բժշկական արտադրանք թողարկող, դեղատնային ծառայության և բժշկական տեխնիկայի համակարգի ձեռնարկությունների զարգացմանը խթանելու նպատակով իրենց օրենսդիր մարմիններին առաջարկություններ կներկայացնեն դեղամիջոցների, վակցինաների և այլ իմունակենսաբանական պատրաստուկների, բժշկական նշանակության առարկաների և բժշկական տեխնիկայի իրացումից ստացվող եկամտահարկի դրույքաչափի 50% նվազեցման մասին:
Հ ո դ վ ա ծ 9
Սույն Համաձայնագիրը բաց է դրա նպատակները և սկզբունքները լիովին կիսող այլ պետությունների կողմից միանալու համար:
Հ ո դ վ ա ծ 10
Յուրաքանչյուր մասնակից պետություն իրավունք ունի դուրս գալու սույն Համաձայնագրից` ենթադրվող դուրս գալուց առնվազն վեց ամիս առաջ իր որոշման մասին գրավոր Բելառուսի Հանրապետության կառավարությանը ծանուցելու միջոցով:
Հ ո դ վ ա ծ 11
Սույն Համաձայնագիրը կարող է փոփոխվել կամ լրացվել միայն Համագործակցության մասնակից պետությունների փոխադարձ պայմանավորվածությամբ:
Հ ո դ վ ա ծ 12
Սույն Համաձայնագիրը ենթակա է վավերացման կամ հաստատման, մասնակից պետությունների օրենսդրական ընթացակարգերին համապատասխան, և ուժի մեջ է մտնում ավանդապահին երրորդ վավերագիրը կամ հաստատման մասին ծանուցումը ի պահ հանձնելուց հետո:
Կատարված է Աշգաբադ քաղաքում 1993 թվականի դեկտեմբերի 24-ին, մեկ բնօրինակով` ռուսերեն:
Բնօրինակը պահվում է Բելառուսի Հանրապետության կառավարության արխիվում, որը սույն Համաձայնագիրը ստորագրած պետություններին կուղարկի դրա հաստատված պատճենները:
*Համաձայնագիրը Հայաստանի Հանրապետության համար ուժի մեջ է մտել 1995 թվականի մարտի 9-ից: