«Գրանցված է»
ՀՀ արդարադատության
նախարարության կողմից
29 մարտի 2006 թ.
Պետական գրանցման թիվ 10206088

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԱՐԴԱՐԱԴԱՏՈՒԹՅԱՆ ՆԱԽԱՐԱՐ

Հ Ր Ա Մ Ա Ն

Ղեկավարվելով «Դատական ակտերի հարկադիր կատարումն ապահովող ծառայության մասին» Հայաստանի Հանրապետության օրենքի 19-րդ հոդվածի 2-րդ մասով.

 Հրամայում եմ՝

Հաստատել հարկադիր կատարողի նկատմամբ ծառայողական քննության նշանակման և անցկացման կարգը  (հավելված N 1-ը կցվում է)։

Դ. Հարությունյան

1. Սույն կարգով սահմանվում է հարկադիր կատարողի նկատմամբ ծառայողական քննության նշանակման և անցկացման կարգը:

2. Ծառայողական քննությունը օրենքով և սույն կարգով սահմանված դեպքերում և կարգով հարկադիր կատարողի պարտականությունների կատարմանն ու նրա գործունեությանն առնչվող հարցերի քննությունն է:

3. Ծառայողական քննությունը նշանակում է Հայաստանի Հանրապետության արդարադատության նախարարը՝ հարկադիր կատարման ծառայության վերահսկողության և օրենսդրության կատարելագործման վարչության (այսուհետ՝ վարչություն) պետի միջնորդության հիման վրա, կամ Հայաստանի Հանրապետության դատական ակտերի  գլխավոր հարկադիր կատարողը։

4. Ծառայողական քննություն կարող է նշանակվել նաև մամուլում կամ զանգվածային լրատվության մյուս միջոցներով հրապարակված քննադատության, ինչպես նաև կազմակերպությունների, քաղաքացիների դիմումների և բողոքների հիման վրա՝ Հայաստանի Հանրապետության արդարադատության նախարարի կամ Հայաստանի Հանրապետության  դատական ակտերի  գլխավոր հարկադիր կատարողի կողմից:

5. Հարկադիր կատարման ծառայության մեկ կառուցվածքային ստորաբաժանումում նախատեսվող կամ սկսված ծառայողական քննության իրականացումը Հայաստանի Հանրապետության արդարադատության նախարարի կողմից կարող է հանձնարարվել մյուս կառուցվածքային ստորաբաժանմանը:

6. Հարկադիր կատարողը, որի նկատմամբ անցկացվում է ծառայողական քննություն, իրավունք ունի ներկայացնելու հիմնավորումներ, հարուցելու միջնորդություններ, ծանոթանալ  ծառայողական քննության նյութերին:

7. Հարկադիր կատարողը պարտավոր է ժամանակին ներկայանալ ծառայողական քննությունն իրականացնող ծառայողի կանչով, տալ գրավոր բացատրություններ:

8. Ծառայողական քննություն իրականացնող ծառայողը անհրաժեշտության դեպքում կարող է տեղեկատվություն ստանալ և բացատրություն վերցնել (ձև N 1)  ծառայողական քննության հետ առնչվող այլ անձանցից:

9. Ծառայողական քննություն իրականացնող ծառայողը ուսումնասիրում է գործին վերաբերող փաստաթղթերը, տեղեկանքները ու այլ նյութերը, անհրաժեշտության դեպքում` պատճենահանում դրանք:

10. Վարչության կողմից իրականացված ծառայողական քննության արդյունքները վարչության պետը 5-օրյա ժամկետում ներկայացնում է Հայաստանի Հանրապետության արդարադատության նախարարին:

11. Կենտրոնական մարմնի կողմից իրականացված ծառայողական քննության արդյունքները ներկայացվում են Հայաստանի Հանրապետության դատական ակտերի գլխավոր հարկադիր կատարողին: Ծառայողական քննության արդյունքներով «Դատական ակտերի հարկադիր կատարումն ապահովող ծառայության մասին» Հայաստանի Հանրապետության օրենքի 35-րդ հոդվածի 1-ին մասի 3-րդ, 4-րդ և 5-րդ կետերով նախատեսված կարգապահական տույժերը կիրառելու անհրաժեշտության դեպքում՝ 5-օրյա ժամկետում համապատասխան առաջարկությունը Հայաստանի Հանրապետության դատական ակտերի գլխավոր հարկադիր կատարողի կողմից ներկայացվում է Հայաստանի Հանրապետության արդարադատության նախարարին:

12. Ներկայացված առաջարկությունների հիման վրա Հայաստանի Հանրապետության արդարադատության նախարարը կայացնում է  համապատասխան որոշում:

13. Ծառայողական քննության կատարման ժամկետը սահմանվում է մինչև երեսուն օր: Ծառայողական քննությունն իրականացնող ծառայողի առաջարկությամբ նախաձեռնողի կողմից ծառայողական քննության կատարման ժամկետը, կապված լրացուցիչ ուսումնասիրությունների կամ այլ հանգամանքների հետ, կարող է երկարաձգվել մինչև տասնհինգ օր:

14. Ծառայողական քննության արդյունքների հիման վրա ընդունված որոշումը կարող է բողոքարկվել դատական կարգով: