«Գրանցված է»
ՀՀ արդարադատության
նախարարության կողմից
5 փետրվարի 2003 թ.
Պետական գրանցման թիվ 32003041

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ ՔԱՂԱՔԱՑԻԱԿԱՆ ԱՎԻԱՑԻԱՅԻ ԳԼԽԱՎՈՐ ՎԱՐՉՈՒԹՅՈՒՆ

10 հունվարի 2003 թ. ք. Երևան

N 3-Ն

Հ Ր Ա Մ Ա Ն

ՉՎԱՑՈՒՑԱԿԻ ԵՆԹԱԿԱ ՕԴԱՅԻՆ ՀԱՂՈՐԴԱԿՑՈՒԹՅՈՒՆՆԵՐԻ ԻՐԱԿԱՆԱՑՄԱՆ ԹՈՒՅԼՏՎՈՒԹՅՈՒՆՆԵՐԻ ՏՐՄԱՆ ՄՐՑՈՒԹԱՅԻՆ ԿԱՐԳԻ ՊԱՀԱՆՋՆԵՐԻ ԵՎ ՊԱՅՄԱՆՆԵՐԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության օդային փոխադրումների շուկայի համամասնական զարգացման և միջազգային պահանջներին համապատասխան ավիափոխադրումների իրականացման, ինչպես նաև օդային տրանսպորտի բնագավառում մենաշնորհի բացառման նպատակով.

Հրամայում եմ`

1. Հաստատել.

ա) «Չվացուցակի ենթակա օդային հաղորդակցությունների իրականացման թույլտվությունների տրման մրցութային կարգի պահանջների և պայմանների կանոնակարգ»-ը` համաձայն N 1 հավելվածի.

բ) Չվացուցակի ենթակա օդային հաղորդակցությունների իրականացման թույլտվությունների տրման մրցույթին մասնակցելու համար ներկայացվող հայտի ձևը` համաձայն N 2 հավելվածի.

գ) Չվացուցակի ենթակա օդային հաղորդակցությունների իրականացման միջազգային օդային ուղու շահագործման թույլտվության ձևը` համաձայն N 2 հավելվածի:

2. Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության լիցենզավորման հանձնաժողովին.

- կանոնավոր օդային հաղորդակցությունների թույլտվությունների տրման գործընթացը կազմակերպել սույն կանոնակարգի համաձայն:

3. Սույն հրամանի կատարման հսկողությունը վերապահում եմ ինձ:

Գլխավոր վարչության պետ՝

Ս. Մարգարյան

Հավելված N 1 ՀՀ կառավարությանն առընթեր քաղաքացիական ավիացիայի գլխավոր վարչության 2003 թվականի հունվարի 10-ի N 3-Ն հրամանի

Կ Ա Ն Ո Ն Ա Կ Ա Ր Գ

ՉՎԱՑՈՒՑԱԿԻ ԵՆԹԱԿԱ ՕԴԱՅԻՆ ՀԱՂՈՐԴԱԿՑՈՒԹՅՈՒՆՆԵՐԻ ԻՐԱԿԱՆԱՑՄԱՆ ԹՈՒՅԼՏՎՈՒԹՅՈՒՆՆԵՐԻ ՏՐՄԱՆ ՄՐՑՈՒԹԱՅԻՆ ԿԱՐԳԻ ՊԱՀԱՆՋՆԵՐԻ ԵՎ ՊԱՅՄԱՆՆԵՐԻ

1. ԸՆԴՀԱՆՈՒՐ ԴՐՈՒՅԹՆԵՐ

1. Չվացուցակի ենթակա օդային հաղորդակցությունների իրականացման թույլտվությունները տրվում են՝ «Ավիացիայի մասին» Հայաստանի Հանրապետության օրենքի 48-րդ հոդվածի 3-րդ կետի համաձայն:

2. Չվացուցակի ենթակա օդային հաղորդակցությունների իրականացման թույլտվությունները մրցութային կարգով տալու նպատակն է՝

- միջազգային չափանիշներին համապատասխան թռիչքների անվտանգութան ապահովումը,

- ավիափոխադրումների շուկայի համամասնական զարգացման և ուղևորների սպասարկման միջազգային պահանջների ապահովումը,

- ուղևորային և բեռնային ավիափոխադրումների իրականացման լավագույն պայմանների ստեղծումը,

- չվերթերի իրականացման կանոնավորության ապահովումը և սպասարկման որակի բարձրացումը,

- ավիափոխադրողների համար հավասար պայմանների ստեղծումը, ավիափոխադրումների շուկայի կարգավորումը և մենաշնորհի բացառումը,

- օդանավ շահագործողների հնարավորություններին և չվերթերի առանձնահատկություններին համապատասխան ավիափոխադրումների շուկայի բաշխման և վերահսկողության իրականացումը,

- Հայաստանի Հանրապետությունում գրանցված ավիափոխադրողների գործունեության զարգացումը և դրան նպաստումը:

3. Օդային հաղորդակցությունների իրականացման թույլտվությունները տրվում են մինչև 2 (երկու) տարի գործողության ժամկետով:

4. Մրցույթին կարող են մասնակցել Հայաստանի Հանրապետությունում գրանցված, Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության (այսուհետև՝ գլխավոր վարչություն) կողմից տրված և գործող օդանավ շահագործողի սերտիֆիկատ և ավիափոխադրողի սերտիֆիկատ (մասնագիր), Քաղաքացիական ավիացիայի միջազգային կազմակերպության (ԻԿԱՕ) եռանիշ կոդ, Ավիացիոն տրանսպորտի միջազգային գործակալության (ԻԱՏԱ) կոդ և չվացուցակի ենթակա օդային տրանսպորտի գործունեության լիցենզիա ունեցող օդանավ շահագործողները:

5. Մրցույթի մասին զանգվածային լրատվամիջոցներով գլխավոր վարչության կողմից հայտարարություն տրվում է՝

- օդային փոխադրումների իրականացման վերաբերյալ միջկառավարական համաձայնագրերով նախատեսվող երթուղիների իրականացման անհրաժեշտության կամ չշահագործվող երթուղիների առկայության դեպքում,

- ամառային կամ ձմեռային չվացուցակի հաստատելուց առաջ, տվյալ կանոնակարգով նախատեսվող ժամկետներում,

- տվյալ չվերթը իրականացնող օդանավ շահագործողի կողմից սպասարկման համար անհրաժեշտ պայմանները չբավարարելու կամ այլ պատճառներով միջազգային նորմերին համապատասխան չվերթի իրականացումը չապահովելու դեպքում:

6. Մրցույթի մասին հայտարարություն տրվում է ամառային, ձմեռային չվացուցակի հաստատումից ոչ պակաս, քան 4 (չորս) ամիս առաջ:

7. Մրցույթի մասին տրվող հայտարարության մեջ նշվում են՝

ա) մրցույթի ներկայացված օդային հաղորդակցության ուղղությունները (երթուղիները),

բ) նախատեսվող երթուղու իրականացման շաբաթական նվազագույն հաճախականությունը,

գ) լրացուցիչ տեղեկություններ ստանալու աղբյուրը (հեռախոսահամար, ֆաքս, էլեկտրոնային փոստ):

8. Մրցույթն անցկացվում է հրապարակային կարգով:

II. ՉՎԱՑՈՒՑԱԿԻ ԵՆԹԱԿԱ ՕԴԱՅԻՆ ՀԱՂՈՐԴԱԿՑՈՒԹՅՈՒՆՆԵՐԻ ԻՐԱԿԱՆԱՑՄԱՆ ԹՈՒՅԼՏՎՈՒԹՅՈՒՆՆԵՐԻ ՏՐՄԱՆ ՄՐՑՈՒՅԹԻՆ ՄԱՍՆԱԿՑԵԼՈՒ ՀԱՄԱՐ ՆԵՐԿԱՅԱՑՎՈՂ ՀԱՅՏ

9. Չվացուցակի ենթակա օդային հաղորդակցությունների իրականացման թույլտվություն ստանալու մրցույթին մասնակցելու համար ներկայացվում է գրավոր հայտ (Հավելված¹ 2) կից ներկայացնելով հետևյալ տեղեկությունները՝

- օդանավ շահագործողի կողմից շահագործվող օդանավերի տիպերը, քանակը, որոնցով նախատեսվում են իրականացնել չվերթերը և տեխնիկական կամ այլ պատճառներով դրանց փոխարինելու համար առկա պահուստային օդանավերի վերաբերյալ տեղեկատվություն,

- տվյալ չվերթի իրականացման համար օդանավերի միջազգային պահանջներին համապատասխանող տեխնիկական անհրաժեշտ սարքավորումների առկայության և տեխնիկական սպասարկման վերաբերյալ տեղեկանք,

- օդանավերում ուղևորների սպասարկման ստանդարտնորի, ինչպես նաև առաջարկվող այլ սպասարկումների մասին տեղեկություններ,

- տեղեկություններ հայտավորված միջազգային օդային ուղու շահագործման ֆինանսական ապահովվածության մասին,

- միջազգային օդային ուղու շահագործման ծրագիր՝ համապատասխան տեխնիկատնտեսական հիմնավորումով և չվացուցակի նախագծով,

- օդանավ շահագործողի ավիացիոն անվտանգության ծրագիր, եթե տվյալ երթուղու համար կան առանձնահատուկ պահանջներ,

- օդանավերի, անձնակազմերի, ուղևորների, ուղեբեռի և երրորդ անձանց հանդեպ պատասխանատվության ապահովագրությունն հաստատող փաստաթղթեր, որոնք բավարար են օդանավերի շահագործման ընթացքում հնարավոր վնասի փոխհատուցման համար,

- տեղեկություններ ավիատոմսերի վաճառքի ցանցի վերաբերյալ:

10. Վերը նշված պարտադիր տեղեկություններից բացի, օդանավ շահագործողները կարող են ներկայացնել նաև այլ տեղեկություններ, որոնք ըստ հայտատուի կարող են կարևոր լինել և նպաստել միջազգային օդային ուղու շահագործման թույլտվություն ստանալու գործընթացին:

III. ՄՐՑՈՒՅԹԻ ԸՆԹԱՑԱԿԱՐԳԸ

11. Հայտերի քննարկումը, մրցույթի արդյունքների ամփոփումը և որոշումների ընդունումն իրականացնում է գլխավոր վարչության պետի հրամանով ստեղծված, «Լիցենզավորման մասին» Հայաստանի Հանրապետության օրենքի համապատասխան դրույթների համաձայն գործող հանձնաժողովը:

12. Հայտերի ընդունման և քննարկումների նախապատրաստական աշխատանքներն իրականացնում է գլխավոր վարչության համապատասխան բաժինը, գլխավոր վարչության պետի հրամանի համաձայն:

13. Հայտերի ընդունման, քննարկման, մերժման, ինչպես նաև միջազգային օդային ուղու շահագործման թույլտվության հատկացման, դրանց կասեցման և այլ գործընթացներն իրականացվում են «Լիցենզավորման մասին» Հայաստանի Հանրապետության օրենքի դրույթներին համապատասխան:

14. Հանձնաժողովը մրցույթին մասնակցելու հայտը, անհրաժեշտ փաստաթղթերը և մրցութային առաջարկը ընդունում է մրցույթի մասին տեղեկատվությունը հրապարակելու օրվանից սկսած 25 (քսանհինգ) օրվա ընթացքում, առձեռն՝ ստացականով:

15. Հայտը, անհրաժեշտ փաստաթղթերը և մրցույթի առաջարկը ընդունելիս, դրանցում առկա թերությունների մասին հայտնում է դիմողին, այդ մասին նշում կատարելով ստացականում:

16. Հայտը և մրցութային առաջարկի օրինակները դիմողի ներկայությամբ ծրարվում են և կնքվում գլխավոր վարչության և դիմողի կնիքներով: Մրցութային առաջարկը ծրարելիս արգելվում է ծանոթանալ նրա բովանդակությանը:

17. Մրցույթի մասնակից է համարվում այն իրավաբանական անձը, որը ժամանակին և սահմանված կարգով ներկայացրել է հայտ, անհրաժեշտ փաստաթղթեր և մրցութային առաջարկ: Դիմողը մրցույթի մասնակից չի համարվում, եթե փաստաթղթերում առկա թերությունները չեն շտկվել ստացականը ստանալուն հաջորդող հինգ օրվա ընթացքում:

18. Հանձնաժողովը հայտերը քննարկում է զանգվածային լրատվամիջոցներով մրցույթ հայտարարելուց հետո 30 (երեսուն)-ից 40 (քառասուն)-րդ օրերի ընթացքում, դռնբաց նիստում, քննարկման օրվա, ժամի և վայրի մասին գրավոր ծանուցելով մասնակցին:

19. Նիստին չներկայացած մասնակցի հայտը քննության չի առնվում:

20. Մասնակիցների մրցութային առաջարկների հրապարակումից և դրանք հայտատուի կողմից ներկայացնելուց հետո, լիցեզավորման հանձնաժողովի անդամներին ժամանակ է տրվում առաջարկների ուսումնասիրության, անհրաժեշտ մասնագիտական խորհրդատվության համար:

21. Ըստ հայտերը քննարկելու հաջորդականության իրականացվում է վարկանիշային հինգ բալանոց սանդղակով բաց քվեարկություն:

22. Քվեարկության արդյունքում հաղթող է ճանաչվում առավել բալեր հավաքած օդանավ շահագործողը: Հավասար բալերի դեպքում լիցենզավորման հանձնաժողովի նախագահն ունի վճռորոշ ձայնի իրավունք:

IV. ՄՐՑՈՒՅԹԻ ԱՐԴՅՈՒՆՔՆԵՐԻ ԱՄՓՈՓՈՒՄԸ

23. Մրցույթի արդյունքների ամփոփման արդյունքում, հաղթող օդանավ շահագործողին տրվում է միջազգային օդային ուղու շահագործման թույլտվություն (Հավելված¹ 3):

24. Չվացուցակի ենթակա օդային հաղորդակցության թույլտվություն ստացած օդանավ շահագործողը հանդիսանում է Հայաստանի Հանրապետության կողմից տվյալ երթուղին շահագործող նշանակված ավիափոխադրող, ինչի մասին հաղորդվում է տվյալ երկրի ավիացիայի բնագավառի պետական կառավարման մարմնին Հայաստանի Հանրապետության արտաքին գործերի նախարարության միջոցով:

25. Միջազգային օդային ուղու շահագործման թույլտվություն ստացած օդանավ շահագործողը իրավունք է ստանում նաև տվյալ ուղղությամբ իրականացնել լրացուցիչ և ոչ կանոնավոր (չարտերային) չվերթեր, ստանալով համապատասխան երկրի թույլտվությունը, «Ավիացիայի մասին» Հայաստանի Հանրապետության օրենքի համաձայն:

26. Հատկացված թույլտվությունները գործողության մեջ մտնելու օրվանից 1 (մեկ)-ամսյա ժամկետում տվյալ թույլտվությամբ նախատեսվող չվերթը չկատարելու դեպքում, այն ճանաչվում է անվավեր և հայտարարվում է տվյալ ավիաերթուղու շահագործման նոր մրցույթ, գլխավոր վարչության կողմից նախատեսված ժամկետներում:

Հավելված N 2 ՀՀ կառավարությանն առընթեր քաղաքացիական ավիացիայի գլխավոր վարչության 2003 թվականի հունվարի 10-ի N 3-Ն հրամանի   Հայաստանի Հանրապետության կառավարությանն առընթեր Քաղաքացիական ավիացիայի գլխավոր վարչության պետ պարոն ____________________ին _______________________ ից (Օդանավ շահագործողի անվանումը)

Հ Ա Յ Տ   ______________________________________________ հիման վրա գործող, (Կանոնադրություն) թիվ _________________օդանավ շահագործողի և ավիափոխադրողի սերտիֆիկատի (Համարները և տրման ամսաթվերը) (մասնագրի) ունեցող _______________________________ օդանավ շահագործողը (Օդանավ շահագործողի անվանումը) ներկայացնում է հայտ մասնակցելու ________________________________օդային (Երթուղին, միջանկյալ կետերը) հաղորդակցության երթուղու շահագործման թույլտվություն ստանալու մրցույթին: Ավիափոխադրումը կատարվելու է__________________________տիպի օդանավերով, (Նշվում է օդանավերի տիպերը) ուղևորներին տրամադրելով՝ ________________________________________: (Սպասարկումներ և ծառայություններ) Թռիչքների կատարման նվազագույն շաբաթական հաճախականությունները՝ - ձմեռային շրջանում շաբաթական ___________ չվերթ, - ամառային շրջանում շաբաթական ___________ չվերթ:

Տրված օդային ուղու շահագործման ընթացքում օդանավ շահագործողը պարտավորվում է կատարել թռիչքների անվտանգության վերաբերյալ Հայաստանի Հանրապետության օրենսդրությամբ և միջազգային պայմանագրերով նախատեսված պահանջները, ուղևորների և բեռնային փոխադրումների սահմանված կարգով սպասարկումը, երաշխավորում է ուղևորների նկատմամբ ունեցած պարտավորությունների կատարումը:

Հավելված N 3 ՀՀ կառավարությանն առընթեր քաղաքացիական ավիացիայի գլխավոր վարչության 2003 թվականի հունվարի 10-ի N 3-Ն հրամանի

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՔԱՂԱՔԱՑԻԱԿԱՆ ԱՎԻԱՑԻԱՅԻ ԳԼԽԱՎՈՐ ՎԱՐՉՈՒԹՅՈՒՆ

REPUBLIC OF ARMENIA

GENERAL DEPARTMENT OF CIVIL AVIATION

_________________________________________________

ՄԻՋԱԶԳԱՅԻՆ ՕԴԱՅԻՆ ՈՒՂՈՒ ՇԱՀԱԳՈՐԾՄԱՆ ԹՈՒՅԼՏՎՈՒԹՅՈՒՆ

PERMISSION FOR OPERATION OF INTERNATIONAL AIR ROUTE

R           N 000/00

Ավիաընկերություն՝ Aircompany: Գտնվելու վայրը՝ Location: Երթուղի՝ Route:

Ավիաընկերության անվանումը Name of Airline __________________ __________________ __________________ __________________

Կետեր և միջանկյալ կետեր՝ Points and intermediate points: Թռիչքի տեսակը՝ Flight type: Օդանավերի տիպերը՝ Aircraft types: Փոխադրումների տեսակը՝ Type of conveyance: Թույլտվության գործողության ժամկետը՝ Permission validity: Հաճախականությունը՝ Frequency: Տրման ամսաթիվը՝ Date of issue:

__________________ __________________ Կանոնավոր Regular __________________ __________________ __________________ __________________ __________________ __________________ Շաբաթական _____ չվերթ ______ flights per week __________________ __________________

ՍՈՒՅՆ ԹՈՒՅԼՏՎՈՒԹՅՈՒՆԸ ՈՒԺԻ ՄԵՋ Է ՇԱՀԱԳՈՐԾՈՂԻ ՍԵՐՏԻՖԻԿԱՏԻ, ԱՎԻԱՓՈԽԱԴՐՈՂԻ ՍԵՐՏԻՖԻԿԱՏԻ (ՄԱՍՆԱԳԻՐ), ՀԱՏՈՒԿ ԴՐՈՒՅԹՆԵՐԻ ԵՎ ՉՎԱՑՈՒՑԱԿԻ ԵՆԹԱԿԱ ՕԴԱՅԻՆ ՏՐԱՆՍՊՈՐՏԻ ԳՈՐԾՈՒՆԵՈՒԹՅԱՆ ԼԻՑԵՆԶԻԱՅԻ ԱՌԿԱՅՈՒԹՅԱՆ ԴԵՊՔՈՒՄ: THIS PERMISSION IS VALID UPON THE AVAILABILITY OF THE AIR OPERATOR CERTIFICATE, AIR CARRIER CERTIFICATE (ANNEX), SPECIAL SUPPLEMENTARY REGULATIONS ON OPERATIONS AND LICENSE FOR SCHEDULED FLIGHTS.

ԳԼԽԱՎՈՐ ՎԱՐՉՈՒԹՅԱՆ ՊԵՏ	_______________ (Ստորագրություն)	.................................
DIRECTOR GENERAL	_______________   (Signature) Կ.Տ. Seal	.................................