ԵՎՐԱՍԻԱԿԱՆ ՏՆՏԵՍԱԿԱՆ ՀԱՄԱՅՆՔ

ՄԱՔՍԱՅԻՆ ՄԻՈՒԹՅԱՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

 9 դեկտեմբերի 2011 թվականի N 875

Փոփոխող փաստաթղթերի ցանկ (Եվրասիական տնտեսական հանձնաժողովի կոլեգիայի 2012 թվականի օգոստոսի 16-ի N 125, 2012 թվականի դեկտեմբերի 4-ի N 251, 2013 թվականի հունիսի 25-ի N 140, 2014 թվականի սեպտեմբերի 23-ի N 175, 2014 թվականի դեկտեմբերի 2-ի N 214, 2014 թվականի դեկտեմբերի 2-ի N 215, 2015 թվականի փետրվարի 3-ի N 9 որոշումների խմբագրությամբ)

«Բելառուսի Հանրապետությունում, Ղազախստանի Հանրապետությունում և Ռուսաստանի Դաշնությունում տեխնիկական կարգավորման միասնական սկզբունքների և կանոնների մասին» 2010 թվականի նոյեմբերի 18-ի համաձայնագրի 13-րդ հոդվածին համապատասխան՝ Մաքսային միության հանձնաժողովը (այսուհետ՝ Հանձնաժողով) որոշեց.

1. Ընդունել «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգը (ՄՄ ՏԿ 016/2011) (կցվում է)։

2. Հաստատել`

2.1. Ստանդարտների ցանկը, որոնց կամավոր հիմունքով կիրառման արդյունքում ապահովվում է «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգի (ՄՄ ՏԿ 016/2011) պահանջների պահպանումը (կցվում է).

2.2. Ստանդարտների ցանկը, որոնք պարունակում են «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգի (ՄՄ ՏԿ 016/2011) պահանջները կիրառելու և կատարելու ու արտադրանքի համապատասխանության գնահատում (հավաստում) իրականացնելու համար անհրաժեշտ՝ հետազոտությունների (փորձարկումների) և չափումների կանոններ ու մեթոդներ, այդ թվում՝ նմուշառման կանոններ (կցվում է)։

3. Սահմանել՝

3.1. «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգը (այսուհետ՝ Տեխնիկական կանոնակարգ) ուժի մեջ է մտնում 2013 թվականի փետրվարի 15-ից.

3.2. Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ սահմանված պարտադիր պահանջներին համապատասխանության գնահատման (հավաստման) մասին փաստաթղթերը, որոնք Տեխնիկական կանոնակարգի տեխնիկական կարգավորման օբյեկտ հանդիսացող արտադրանքի առնչությամբ (այսուհետ՝ արտադրանք) տրամադրվել կամ ընդունվել են մինչև Տեխնիկական կանոնակարգն ուժի մեջ մտնելու օրը, վավեր են մինչև դրանց գործողության ժամկետի ավարտը, սակայն 2015 թվականի մարտի 15-ից ոչ ուշ։ Նշված փաստաթղթերը, որոնք տրամադրվել կամ ընդունվել են մինչև սույն որոշման պաշտոնական հրապարակման օրը, վավեր են մինչև դրանց գործողության ժամկետի ավարտը։

Տեխնիկական կանոնակարգն ուժի մեջ մտնելու օրվանից սկսած Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ ավելի վաղ սահմանված պարտադիր պահանջներին արտադրանքի համապատասխանության գնահատման (հավաստման) մասին փաստաթղթերի տրամադրումը կամ ընդունումը չի թույլատրվում.

3.3. մինչև 2015 թվականի մարտի 15-ը թույլատրվում է Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ ավելի վաղ սահմանված պարտադիր պահանջներին համապատասխան արտադրանքի արտադրությունը և շրջանառության մեջ բացթողումը՝ նշված պարտադիր պահանջներին արտադրանքի համապատասխանության գնահատման (հավաստման) մասին այն փաստաթղթերի առկայության դեպքում, որոնք տրամադրվել կամ ընդունվել են մինչև Տեխնիկական կանոնակարգն ուժի մեջ մտնելու օրը։

Նշված արտադրանքը մակնշվում է համապատասխանության ազգային նշանով (շուկայում շրջանառության նշանով)՝ Մաքսային միության անդամ պետության օրենսդրությանը կամ Հանձնաժողովի 2010 թվականի սեպտեմբերի 20-ի N 386 որոշմանը համապատասխան։

Այդպիսի արտադրանքի մակնշումը Մաքսային միության անդամ պետությունների շուկայում արտադրանքի շրջանառության միասնական նշանով չի թույլատրվում.

3.3.1. մինչև 2013 թվականի նոյեմբերի 15-ը թույլատրվում են Մաքսային միության մաքսային տարածքում այն արտադրանքի արտադրությունն ու շրջանառության մեջ բացթողումը, որը մինչև Տեխնիկական կանոնակարգն ուժի մեջ մտնելու օրը ենթակա չի եղել Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ սահմանված պարտադիր պահանջներին համապատասխանության գնահատման (հավաստման)՝ առանց համապատասխանության պարտադիր գնահատման (հավաստման) մասին փաստաթղթերի և առանց համապատասխանության ազգային նշանով (շուկայում շրջանառության նշանով) մակնշման

(3.3.1. ենթակետն ավելացվել է Եվրասիական տնտեսական հանձնաժողովի կոլեգիայի 2012 թվականի դեկտեմբերի 4-ի N 251 որոշմամբ)

3.4. սույն որոշման 3.2 ենթակետում նշված համապատասխանության գնահատման (հավաստման) մասին փաստաթղթերի գործողության ժամկետում շրջանառության մեջ բաց թողնված արտադրանքի, ինչպես նաև սույն որոշման 3.3․1 ենթակետում նշված արտադրանքի շրջանառությունը թույլատրվում է արտադրանքի՝ Մաքսային միության անդամ պետության օրենսդրությանը համապատասխան սահմանված ծառայության ժամկետի ընթացքում։

(Եվրասիական տնտեսական հանձնաժողովի կոլեգիայի 2012 թվականի դեկտեմբերի 4-ի N 251 որոշման խմբագրությամբ)

4. Հանձնաժողովի քարտուղարությանը՝ Կողմերի հետ համատեղ նախապատրաստել Տեխնիկական կանոնակարգի իրագործման համար անհրաժեշտ միջոցառումների պլանի նախագիծ և սույն որոշումն ուժի մեջ մտնելու օրվանից եռամսյա ժամկետում սահմանված կարգով այն ներկայացնել Հանձնաժողովի հաստատմանը։

5. Ռուսական կողմին՝ ստանդարտների կիրառման արդյունքների մոնիթորինգի հիման վրա Կողմերի մասնակցությամբ ապահովել սույն որոշման 2-րդ կետում նշված ստանդարտների ցանկերի թարմացման վերաբերյալ առաջարկություններ նախապատրաստելը և Տեխնիկական կանոնակարգն ուժի մեջ մտնելու օրվանից՝ տարին առնվազն մեկ անգամ, դրանք Հանձնաժողովի քարտուղարություն ներկայացնելը՝ Հանձնաժողովի կողմից սահմանված կարգով հաստատման համար։

6. Կողմերին՝

6.1. մինչև Տեխնիկական կանոնակարգն ուժի մեջ մտնելու օրը սահմանել Տեխնիկական կանոնակարգի պահանջների պահպանման նկատմամբ պետական հսկողություն (վերահսկողություն) իրականացնելու համար պատասխանատու՝ պետական հսկողության (վերահսկողության) մարմինները և Հանձնաժողովին տեղեկացնել դրա մասին.

6.2. Տեխնիկական կանոնակարգն ուժի մեջ մտնելու օրվանից ապահովել Տեխնիկական կանոնակարգի պահանջների պահպանման նկատմամբ պետական հսկողության (վերահսկողության) իրականացումը՝ հաշվի առնելով սույն որոշման 3.2-3.4 ենթակետերը։

7. Սույն որոշումն ուժի մեջ է մտնում դրա պաշտոնական հրապարակման ամսաթվից։

Մաքսային միության հանձնաժողովի անդամներ՝

Նախաբան

1. Սույն Տեխնիկական կանոնակարգը մշակվել է «Բելառուսի Հանրապետությունում, Ղազախստանի Հանրապետությունում և Ռուսաստանի Դաշնությունում տեխնիկական կարգավորման միասնական սկզբունքների և կանոնների մասին» 2010 թվականի նոյեմբերի 18-ի համաձայնագրին համապատասխան։

2. Սույն Տեխնիկական կանոնակարգով սահմանվում են Մաքսային միության միասնական մաքսային տարածքում կիրառման և կատարման համար պարտադիր միասնական պահանջներ գազանման վառելիքով աշխատող ապարատների (այսուհետ՝ գազօգտագործող սարքավորումներ) նկատմամբ՝ Մաքսային միության միասնական մաքսային տարածքում շրջանառության մեջ բաց թողնվող գազօգտագործող սարքավորումների ազատ տեղաշարժն ապահովելու նպատակով։

3. Եթե գազօգտագործող սարքավորումների վերաբերյալ ընդունվեն Մաքսային միության այլ տեխնիկական կանոնակարգեր, որոնցով գազօգտագործող սարքավորումների նկատմամբ սահմանվում են սույն Տեխնիկական կանոնակարգի պահանջներից տարբերվող պահանջներ, ապա գազօգտագործող սարքավորումները պետք է համապատասխանեն Մաքսային միության այդ տեխնիկական կանոնակարգերի պահանջներին, որոնց գործողությունը տարածվում է դրա վրա։

Հոդված 1. Կիրառության ոլորտը

1. Սույն Տեխնիկական կանոնակարգը տարածվում է Մաքսային միության միասնական մաքսային տարածքում շրջանառության մեջ բաց թողնվող գազօգտագործող սարքավորումների վրա։

2. Սույն Տեխնիկական կանոնակարգում գազօգտագործող սարքավորում ասելով պետք է հասկանալ՝

ա) սննդի պատրաստման համար, ջեռուցման և տաք ջրամատակարարման համար նախատեսված սարքավորումները՝ ներառյալ համակցված ապարատների կազմում ընդգրկված սարքավորումները,

բ) բլոկային ավտոմատ հրածորանները և սույն կետի «ա» ենթակետում նշված՝ բլոկային ավտոմատ հրածորաններով գազօգտագործող սարքավորումները,

գ) սարքավորումների մեջ ներկառուցման համար նախատեսված և սույն կետի «ա» և «բ» ենթակետերում նշված սարքավորումներից առանձին շրջանառության մեջ գտնվող սարքվածքները, այդ թվում՝ կառավարման, կարգավորիչ և անվտանգության սարքվածքները։

3. Սույն Տեխնիկական կանոնակարգի պահանջները սահմանվում են 1-ին հավելվածի համաձայն ցանկով նախատեսված գազօգտագործող սարքավորումների նկատմամբ։

4. Սույն Տեխնիկական կանոնակարգը չի տարածվում հետևյալ տեսակի գազօգտագործող սարքավորումների վրա՝

ա) շոգեկաթսաներ՝ 0,07 ՄՊա-ից ավելի գոլորշու ճնշմամբ և ջրատաքացուցիչ կաթսաներ՝ 115°С-ից ավելի ջրի ջերմաստիճանով,

բ) սարքավորումներ, որոնք նախատեսված են արդյունաբերական ձեռնարկությունների տեխնոլոգիական գործընթացներում օգտագործման համար՝ բացառությամբ 1-ին հավելվածում բերված ցանկում ներառված գազօգտագործող սարքավորումների,

գ) սարքավորումներ, որոնցում գազն օգտագործվում է որպես շարժիչային վառելիք։

5. Գազօգտագործող սարքավորումը բնութագրող էական հատկանիշներն են՝

ա) գազօգտագործող սարքավորման անվանումը, մոդելը (տիպը) և նշանակությունը,

բ) օգտագործվող գազի տեսակը և անվանական ճնշումը,

գ) անվանական ջերմային հզորությունը,

դ) էլեկտրական հոսանքի լարումն ու հաճախականությունը (էլեկտրական ցանցին միացվող գազօգտագործող սարքավորման համար)։

6. Գազօգտագործող սարքավորումների նույնականացումն իրականացվում է՝ հաշվի առնելով սույն Տեխնիկական կանոնակարգի 1-ին հոդվածի 5-րդ կետում նշված հատկանիշները գազօգտագործող սարքավորումների՝ փաթեթվածքում, մականշվածքում և շահագործման փաստաթղթերում նշված բնութագրերը դրանց հետ համեմատելու միջոցով։

7. Սույն Տեխնիկական կանոնակարգով սահմանվում են գազօգտագործող սարքավորումների նկատմամբ պահանջները՝ մարդու կյանքը և (կամ) առողջությունը, գույքը, շրջակա միջավայրը, կենդանիների ու բույսերի կյանքը և (կամ) առողջությունը պաշտպանելու, դրանց նշանակության և անվտանգության վերաբերյալ սպառողներին (օգտագործողներին) մոլորեցնող գործողությունները կանխելու, ինչպես նաև էներգետիկ արդյունավետությունն ու ռեսուրսախնայողությունն ապահովելու նպատակներով։

Հոդված 2. Սահմանումները

Սույն Տեխնիկական կանոնակարգում օգտագործվում են հետևյալ եզրույթներն ու սահմանումները՝

«այրման խցի օդափոխություն»՝ գազօգտագործող սարքավորման այրման խցում և ծխանցքերում օդի միջոցով չայրված գազի արտամղման գործընթաց՝ հրածորանի մեջ գազի մատուցման բացակայության դեպքում․

«գազահրածորանային սարքվածքի վառման ժամանակ»՝ գազը հրածորան մատուցելու պահից մինչև բոցավառումն ու գազահրածորանային սարքվածքի ամբողջ մակերևույթով տարածումն ընկած ժամանակահատվածը․

«գազային տրակտ»՝ հիմնական փակիչ օրգանի և հրածորանի (հրածորանների) միջև գտնվող սարքավորումների մասերը, որոնցով մատուցվում է կամ որոնցում գտնվում է գազը.

«գազանման վառելիք»՝ 15 С ջերմաստիճանի և 101,325 կՊա մթնոլորտային ճնշման պայմաններում գազանման վիճակում գտնվող վառելիք․

«ամբողջական նախնական խառնումով հրածորան»՝ հրածորան, որում գազը հրածորանի ելքային անցքերի մոտ խառնվում է այրման համար անհրաժեշտ օդի հետ կամ ուր մատուցվում է պատրաստի դյուրավառ խառնուրդը․

«վառք»՝ գործընթաց, որի ընթացքում տեղի է ունենում բռնկման և (կամ) հիմնական հրածորանի գազաօդային խառնուրդի բոցավառումը՝ բոցի առկայության գրանցմամբ․

«համակցված հրածորան»՝ վառելիքի գազանման կամ հեղուկ տեսակների առանձին այրման համար նախատեսված հրածորան․

«գազի հոսակորուստի նորմ»՝ գազային տրակտի միջով գազի հոսակորուստի թույլատրելի մեծությունը՝ մուտքի խողովակաոստ գազի մատուցման և կառավարման, կարգավորիչ և անվտանգության սարքվածքների փակ վիճակում լինելու դեպքում․

«շուկայում գազօգտագործող սարքավորումների շրջանառություն»՝ գազօգտագործող սարքավորումները արտադրողից սպառողին (օգտագործողին) փոխանցվելու գործընթացներ, որոնք գազօգտագործող սարքավորումներն անցնում են արտադրության ավարտից հետո․

«գազօգտագործող սարքավորումների խմբաքանակ»՝ տեխնոլոգիական գործընթացի միևնույն պայմաններում արտադրված գազօգտագործող սարքավորումների՝ որոշակի կերպով նույնականացված միավորների քանակ․

«կրկնակի վառք»՝ վառք, որի դեպքում սարքավորման կառուցվածքով նախատեսված է, որ սարքավորման աշխատանքի ընթացքում բոցի մարումից հետո դադարում է գազի մատուցումը հրածորան և սկսվում է հրածորանի ավտոմատ գործարկման՝ տրված ծրագրի կատարումը․

«գործարկման հզորություն»՝ գազօգտագործող սարքավորման միջին հզորությունը՝ հրածորան գազի մատուցման պահից մինչև բոցի առկայությունը գրանցելու պահն ընկած ժամանակի միջակայքում․

«տեխնիկական փաստաթղթեր»՝ գրաֆիկական և տեքստային փաստաթղթերի համակարգ, որոնք օգտագործվում են գազօգտագործող սարքավորման (դետալների, հավաքման միավորների, համալիրների և լրակազմերի) նախագծման, արտադրման և շահագործման ժամանակ․

«տիպային նմուշ»՝ ըստ ֆունկցիոնալ նշանակության և կառուցվածքային կատարման նույնականացված՝ տեխնոլոգիական գործընթացի միևնույն պայմաններում արտադրված գազօգտագործող սարքավորման նմուշ, որն ընտրվել է համապատասխանության գնահատման համար․

«անվտանգության սարքվածք»՝ սարքվածք, որն ապահովում է հիմնական հրածորան գազի մատուցման ավտոմատ անջատումը՝ թույլատրելի սահմաններից հսկվող պարամետրերի շեղվելու դեպքում։

Հոդված 3. Շուկայում շրջանառության կանոնները

1. Գազօգտագործող սարքավորումները շուկայում շրջանառության մեջ բաց են թողնվում սույն Տեխնիկական կանոնակարգին, ինչպես նաև Մաքսային միության այլ տեխնիկական կանոնակարգերին դրանց համապատասխանության դեպքում, որոնց գործողությունը տարածվում է դրանց վրա, և պայմանով, որ այդ սարքավորումներն անցել են համապատասխանության հավաստումը սույն Տեխնիկական կանոնակարգի 6-րդ հոդվածի, ինչպես նաև Մաքսային միության այլ տեխնիկական կանոնակարգերի համաձայն, որոնց գործողությունը տարածվում է դրանց վրա։

Հոդված 4. Անվտանգությանը ներկայացվող պահանջները

1. Գազօգտագործող սարքավորումը պետք է բացառի վառքի արտաքին աղբյուրից պայթյունի վտանգը։

2. Ամբողջական նախնական խառնումով հրածորանը պետք է բացառի պայթյունի վտանգը գազանման վառելիքի այրման՝ արտադրողի կողմից նախատեսված բոլոր ռեժիմներում։

3. Համակցված հրածորանը պետք է ապահովի գազօգտագործող սարքավորման անվտանգությունը գազանման և հեղուկ վառելիքի առանձին այրման դեպքում։

4. Գազօգտագործող սարքավորման գազային տրակտի կառուցվածքը պետք է բացառի արտադրողի կողմից սահմանված գազի հոսակորուստի առավելագույն թույլատրելի նորմի գերազանցումը։

5. Գազային տրակտի միացքները պետք է լինեն հերմետիկ։

6. Գազօգտագործող սարքավորումը պետք է ապահովի այրման խցի օդափոխումը բնական քարշուժի կամ մինչ հրածորանի վառքը և կրկնակի վառքը օդի հարկադրական մատուցման հաշվին։

7. Վառքի և կրկնակի վառքի դեպքում գազօգտագործող սարքավորման հրածորանի գործարկման հզորությունը և վառման ժամանակը, կրկնակի վառքի փորձերի քանակը, բոցի մարման դեպքում գազի մատուցումը անջատելու ժամանակը պետք է սահմանափակվեն՝ չայրված գազի վտանգավոր կուտակումը կանխարգելելու նպատակով։

8. Հրածորանը պետք է ապահովի իր ամբողջ մակերևույթով հավասարաչափ բոցավառմամբ ուղեկցվող սահուն վառում։

9. Գազօգտագործող սարքավորումը, որը նախատեսված է ներքին տարածքներում և շինություններում կիրառության համար, պետք է ունենա չայրված գազի կուտակման կանխարգելումն ապահովող սարքվածք։ Թույլատրվում է գազօգտագործող սարքավորման կիրառումը շինություններում առանց նման սարքվածքի՝ գազօգտագործող սարքավորումների մոնտաժման, տեխնիկական սպասարկման և վերանորոգման հրահանգում սահմանված շինության օդափոխմանը ներկայացվող պահանջներին համապատասխան։

10. Գազօգտագործող սարքավորման կառուցվածքը չպետք է ստեղծի գազօգտագործող սարքավորման հենարանային և դրանց հարող մակերևույթների բռնկման վտանգ։

11. Գազօգտագործող սարքավորումը պետք է ապահովի բոցի կայունությունը և այրման արգասիքներում ածխածնի ու ազոտի օքսիդների անթույլատրելի կոնցենտրացիաների բացակայությունը։

12. Ծխանցքին միացված գազօգտագործող սարքավորումը պետք է բացառի այրման արգասիքների պատահական արտանետումը շինություն։

13. Ծխանցքին միացված գազօգտագործող սարքավորումը պետք է ապահովի գազի՝ դեպի հրածորան մատուցման դադարեցումը այրման արգասիքների հեռացման համակարգում խախտումների դեպքում։

14. Ծխանցքին չմիացված և այրման արգասիքների հեռացման համար օդաքաշ սարքվածքով չհամալրված ջեռուցիչ և ջրատաքացուցիչ գազօգտագործող սարքավորման անվտանգության սարքվածքը պետք է ապահովի մթնոլորտային օդի վիճակի հսկումը և գազի՝ հրածորաններ մատուցման դադարեցումը շինության օդում ածխածնի օքսիդի սահմանային թույլատրելի կոնցենտրացիան գերազանցող կոնցենտրացիայի դեպքում։

15. Գործարկելիս առաջացող կոնդենսատը [խտուցք] չպետք է ազդի գազօգտագործող սարքավորման անվտանգության վրա։

16. Գազօգտագործող սարքավորումը պետք է բացառի գազանման վառելիքի այրման ժամանակ կոնդենսատի առաջացումը (բացի կոնդենսացման ռեժիմում աշխատող գազօգտագործող սարքավորումից)։

17. Գազօգտագործող սարքավորման արտադրության ժամանակ օգտագործվող այն նյութերը, որոնք կարող են շփվել սննդամթերքի կամ սանիտարական նպատակներով օգտագործվող ջրի հետ, չպետք է հանգեցնեն դրանց որակի վատթարացմանը։

18. Գազօգտագործող սարքավորմամբ պետք է բացառվի վերջինիս համար անկայուն վիճակների, դեֆորմացիաների, կոտրվածքների կամ մաշվածության առաջացումը, որոնք ծառայության ժամկետի ընթացքում կարող են նվազեցնել դրա անվտանգությունը։

19. Ճնշման տակ գտնվող բոլոր դետալները պետք է դիմակայեն շահագործման ժամանակ մեխանիկական և ջերմաստիճանի բեռնվածքներին՝ գազօգտագործող սարքավորումների անվտանգության վրա ազդող դեֆորմացիաների առաջացումից խուսափելու համար։

20. Գազօգտագործող սարքավորման արտադրման ժամանակ կիրառվող նյութերը պետք է համապատասխանեն իրենց նշանակությանը և լինեն կայուն մեխանիկական, ջերմային և քիմիական ներգործությունների նկատմամբ, որոնց դրանք կենթարկվեն սարքավորման ծառայության ժամկետի ընթացքում։

21. Ձեռքով կառավարման սարքվածքների մակերևույթի և գազօգտագործող սարքավորման արտաքին մակերևույթների տաքացումը, որոնց հետ կարող է շփվել օգտագործողը՝ բացառությամբ ջերմափոխանցման գործառույթ կատարող կամ բաց բոցով տաքացվող մակերևույթների, չպետք է հանգեցնի ջերմային այրվածքների։

22. Տաք ջրամատակարարման համար նախատեսված գազօգտագործող սարքավորման կառուցվածքով պետք է նախատեսվի այնպիսի սարքվածք, որը բացառում է ջրամատակարարման տվյալ համակարգում կիրառվող ջրով՝ ջրօգտագործողի կողմից ջերմային այրվածք ստանալը։

23. Էլեկտրական լարման տատանումները կամ օժանդակ էներգիայի բնութագրերի փոփոխությունները, ինչպես նաև էներգիայի անջատումը և դրա հետագա վերականգնումը չպետք է խախտեն գազօգտագործող սարքավորման անվտանգությունը։

24. Էլեկտրական ցանցին միացված գազօգտագործող սարքավորումը պետք է ապահովի էլեկտրական հոսանքահարումից պաշտպանությունը։

25. Եթե գազօգտագործող սարքավորումը համալրված է կառավարման սարքվածքներով, ապա դրանց աշխատանքը չպետք է խաթարի անվտանգության սարքվածքների աշխատանքը։

26. Գազօգտագործող սարքավորումը պետք է կարգավորիչ, կառավարման կամ անվտանգության ցանկացած սարքվածքի խափանման դեպքում ապահովի անվտանգությունը։

27. Գազօգտագործող սարքավորման կառավարման, կարգավորիչ սարքվածքները և փակիչ ամրանը պետք է ունենան օգտագործողի սխալ գործողությունները կանխող նշաններ և համապատասխան ցուցումներ։

28. Գազօգտագործող սարքավորման՝ արտադրողի կողմից տեղակայվող ու կարգավորվող և մոնտաժողի կամ օգտագործողի կողմից կարգավորում չպահանջող անվտանգության, կառավարման և կարգավորիչ սարքվածքները պետք է համապատասխան ձևով պաշտպանված լինեն։

29. Շահագործման փաստաթղթերում նշվում է գազօգտագործող սարքավորման կիրառման պայմանները սահմանափակող կամ անվտանգության ապահովման համար միջոցների ընդունման անհրաժեշտության մասին նախազգուշացնող տեղեկատվություն։ Շահագործման փաստաթղթերում պարունակվող տեղեկատվության նկատմամբ պահանջները սահմանված են սույն Տեխնիկական կանոնակարգի 2-րդ հավելվածում։

30. Գազօգտագործող սարքավորման մականշվածքի մեջ պարունակվող տեղեկատվության նկատմամբ պահանջները սահմանված են սույն Տեխնիկական կանոնակարգի 3-րդ հավելվածում։

Հոդված 5. Անվտանգությանը ներկայացվող պահանջներին համապատասխանության ապահովումը

1. Գազօգտագործող սարքավորումների համապատասխանությունը սույն Տեխնիկական կանոնակարգով սահմանված պահանջներին ապահովվում է այդ պահանջների անմիջական կատարմամբ, կամ միջպետական ստանդարտների, իսկ դրանց բացակայության դեպքում (նախքան միջպետական ստանդարտների ընդունումը)՝ Մաքսային միության անդամ պետությունների ազգային (պետական) ստանդարտների այն պահանջների կատարմամբ, որոնց կիրառման արդյունքում կամավոր հիմունքով ապահովվում է Մաքսային միության տեխնիկական կանոնակարգի պահանջների պահպանումը և այն ստանդարտների պահանջների պահպանումը, որոնք պարունակում են հետազոտությունների (փորձարկումների) և չափումների կանոններ ու մեթոդներ, այդ թվում՝ Մաքսային միության տեխնիկական կանոնակարգի պահանջները կիրառելու և կատարելու և արտադրանքի համապատասխանության գնահատում (հավաստում) իրականացնելու համար անհրաժեշտ նմուշառման կանոններ (այսուհետ՝ ստանդարտներ)։

Տվյալ ստանդարտների պահանջները կամավոր հիմունքով կատարելը վկայում է սույն Տեխնիկական կանոնակարգի անվտանգության պահանջներին համապատասխանության մասին։

2. Սույն հոդվածի 1-ին կետում նշված ստանդարտների ցանկերը հաստատում է Մաքսային միության հանձնաժողովը (այսուհետ՝ Հանձնաժողով)։

Հոդված 6. Համապատասխանության հավաստումը

1. Սույն Տեխնիկական կանոնակարգի պահանջներին գազօգտագործող սարքավորման համապատասխանության հավաստումը պարտադիր բնույթ է կրում և իրականացվում է համապատասխանության հայտարարագրման կամ սերտիֆիկացման ձևերով։

2. Գազօգտագործող սարքավորումների որոշակի տեսակների (տիպերի) համար նախատեսված համապատասխանության հավաստման ձևերը նշված են սույն Տեխնիկական կանոնակարգի 1-ին հավելվածում։

3. Գազօգտագործող սարքավորման համապատասխանության սերտիֆիկացումն իրականացվում է Տեխնիկական կանոնակարգում սահմանված ընթացակարգերով՝ Հանձնաժողովի կողմից հաստատված՝ «Մաքսային միության տեխնիկական կանոնակարգերի պահանջներին համապատասխանության գնահատման (հավաստման) տիպային ընթացակարգերի կիրառման կարգի մասին» հիմնադրույթին համապատասխան։

4. Հայտատուի ցանկությամբ համապատասխանության հայտարարագրումը կարող է փոխարինվել սույն Տեխնիկական կանոնակարգով գազօգտագործող սարքավորումների համար նախատեսված՝ ըստ համապատասխանության հայտարարագրման ընթացակարգերին համարժեք սերտիֆիկացման ընթացակարգերի սերտիֆիկացմամբ, այդ թվում՝ սույն Տեխնիկական կանոնակարգի պահանջներին համապատասխանության հավաստման համար հայտատուի սեփական ապացույցների բացակայության կամ անբավարարության դեպքում։

5. Գազօգտագործող սարքավորման համապատասխանության հայտարարագրումն իրականացվում է հետևյալ ընթացակարգերից որևէ մեկի համաձայն՝

ընթացակարգ 1Հ՝ սերիական թողարկման գազօգտագործող սարքավորման համապատասխանության հայտարարագրում՝ արտադրողի կողմից անցկացված գազօգտագործող սարքավորման տիպային նմուշների փորձարկումների և արտադրողի կողմից իրականացվող արտադրական հսկողության արդյունքների հիման վրա.

ընթացակարգ 2Հ՝ գազօգտագործող սարքավորումների խմբաքանակի (եզակի արտադրատեսակի) համապատասխանության հայտարարագրում՝ հայտատուի կողմից անցկացված՝ գազօգտագործող սարքավորման տիպային նմուշների (եզակի արտադրատեսակի)` փորձարկումների արդյունքների հիման վրա.

ընթացակարգ 3Հ՝ սերիական թողարկման գազօգտագործող սարքավորման համապատասխանության հայտարարագրում՝ Մաքսային միության սերտիֆիկացման մարմինների և փորձարկման լաբորատորիաների (կենտրոնների) միասնական ռեեստրում ընդգրկված՝ հավատարմագրված փորձարկման լաբորատորիայի (կենտրոնի) (այսուհետ՝ հավատարմագրված փորձարկման լաբորատորիա) կողմից անցկացված՝ գազօգտագործող սարքավորման տիպային նմուշների փորձարկումների և արտադրողի կողմից իրականացվող արտադրական հսկողության արդյունքների հիման վրա.

ընթացակարգ 4Հ՝ գազօգտագործող սարքավորումների խմբաքանակի (եզակի արտադրատեսակի) համապատասխանության հայտարարագրումը՝ հավատարմագրված փորձարկման լաբորատորիայի (կենտրոնի) կողմից անցկացված՝ գազօգտագործող սարքավորման տիպային նմուշների (եզակի արտադրատեսակի) փորձարկումների արդյունքների հիման վրա։

Գազօգտագործող սարքավորման համապատասխանության հայտարարագրման ընթացակարգի ընտրությունն իրականացվում է արտադրողի (արտադրողի կողմից լիազորված անձի), ներմուծողի կողմից։

2Հ, 4Հ ընթացակարգերով գազօգտագործող սարքավորումների խմբաքանակի համապատասխանությունը հայտարարագրելիս հայտատու կարող է լինել Մաքսային միության անդամ պետության օրենսդրությանը համապատասխան դրա տարածքում որպես անհատ ձեռնարկատեր գրանցված, արտադրող կամ վաճառող հանդիսացող, կամ սույն Տեխնիկական կանոնակարգի պահանջներին մատակարարվող արտադրանքի համապատասխանության ապահովման և Մաքսային միության սույն Տեխնիկական կանոնակարգի պահանջներին մատակարարվող արտադրանքի անհամապատասխանության համար պատասխանատվության մասով օտարերկրյա արտադրողի հետ ունեցած պայմանագրի հիման վրա վերջինիս գործառույթներն իրականացնող (օտարերկրյա արտադրողի գործառույթներն իրականացնող անձ) իրավաբանական կամ ֆիզիկական անձը։

1Հ, 3Հ ընթացակարգերով սերիական թողարկման գազօգտագործող սարքավորման համապատասխանությունը հայտարարագրելիս հայտատու կարող է լինել Մաքսային միության անդամ պետության օրենսդրությանը համապատասխան դրա տարածքում որպես անհատ ձեռնարկատեր գրանցված, կամ արտադրող հանդիսացող, կամ սույն Տեխնիկական կանոնակարգի պահանջներին մատակարարվող արտադրանքի համապատասխանության ապահովման և Մաքսային միության սույն Տեխնիկական կանոնակարգի պահանջներին մատակարարվող արտադրանքի անհամապատասխանության համար պատասխանատվության մասով օտարերկրյա արտադրողի հետ ունեցած պայմանագրի հիման վրա վերջինիս գործառույթներն իրականացնող (օտարերկրյա արտադրողի գործառույթներն իրականացնող անձ) իրավաբանական կամ ֆիզիկական անձը։

6. 1Հ, 2Հ ընթացակարգերով համապատասխանությունը հայտարարագրելիս հայտատուն ինքնուրույն կազմում է ապացուցողական նյութերը՝ սույն Տեխնիկական կանոնակարգի պահանջներին գազօգտագործող սարքավորման համապատասխանությունը հավաստելու նպատակով։ Որպես ապացուցողական նյութեր օգտագործվում են տեխնիկական փաստաթղթերը, սեփական հետազոտությունների (փորձարկումների) և չափումների արդյունքները:

7. 1Հ, 2Հ ընթացակարգերով համապատասխանությունը հայտարարագրելիս ապացուցողական նյութերը պետք է ներառեն՝

ա) համապատասխանության հավաստման օբյեկտի տեխնիկական նկարագրությունը (շահագործման ձեռնարկի բացակայության դեպքում),

բ) սույն Տեխնիկական կանոնակարգի պահանջներին հայտարարագրվող գազօգտագործող սարքավորման համապատասխանության մասին հայտարարության համար հիմք ծառայած տեխնիկական փաստաթղթերը,

գ) հայտատուի և (կամ) հավատարմագրված փորձարկման լաբորատորիայի կողմից անցկացված՝ գազօգտագործող սարքավորման փորձարկումների արձանագրությունը (արձանագրությունները),

դ) շահագործման փաստաթղթերը,

ե) 5-րդ հոդվածի 1-ին կետում նշված ստանդարտների ցանկը, որոնց պահանջներին պետք է համապատասխանի տվյալ գազօգտագործող սարքավորումը (արտադրողի կողմից դրանք կիրառելու դեպքում),

զ) բացատրական գրություն, որը պարունակում է սույն Տեխնիկական կանոնակարգի անվտանգության պահանջների կատարումը հաստատող ընդունված տեխնիկական որոշումների նկարագիրը, եթե 5-րդ հոդվածի 1-ին կետում նշված ստանդարտները բացակայում են կամ չեն կիրառվել,

է) ապրանքաուղեկցող փաստաթղթերը (խմբաքանակի, եզակի արտադրատեսակի համար),

ը) արտադրողի կառավարման համակարգի սերտիֆիկատը (առկայության դեպքում),

թ) անցկացված հետազոտությունների վերաբերյալ տեղեկություններ (առկայության դեպքում),

ժ) այլ փաստաթղթեր, որոնցով ուղղակիորեն կամ անուղղակիորեն հավաստվում է սույն Տեխնիկական կանոնակարգի անվտանգության պահանջներին գազօգտագործող սարքավորման համապատասխանությունը (առկայության դեպքում)։

8. 3Հ, 4Հ ընթացակարգերով համապատասխանությունը հայտարարագրելիս հայտատուն սեփական ապացուցողական նյութերի հետ մեկտեղ օգտագործում է Մաքսային միության սերտիֆիկացման մարմինների և փորձարկման լաբորատորիաների (կենտրոնների) միասնական ռեեստրում ընդգրկված սերտիֆիկացման (համապատասխանության գնահատման (հավաստման)) մարմնի (այսուհետ՝ սերտիֆիկացման (համապատասխանության գնահատման (հավաստման) մարմին) և (կամ) հավատարմագրված փորձարկման լաբորատորիայի մասնակցությամբ ստացված ապացույցները։

Ի լրումն սույն Տեխնիկական կանոնակարգի 6-րդ հոդվածի 7-րդ կետի «ա-թ» ենթակետերով նախատեսված ապացուցողական նյութերի՝ ներառվում են հավատարմագրված փորձարկման լաբորատորիայի (կենտրոնի) կողմից անցկացված՝ գազօգտագործող սարքավորման տիպային նմուշների փորձարկումների արձանագրությունը (այսուհետ՝ փորձարկումների արձանագրություն) և արտադրողի կողմից կատարված արտադրական հսկողության արդյունքները (3Հ ընթացակարգով համապատասխանությունը հայտարարագրելիս)։

9. Համապատասխանության հայտարարագրումը ներառում է հայտատուի կողմից կատարվող հետևյալ ընթացակարգերը՝

ա) տեխնիկական փաստաթղթերի կազմում և վերլուծություն,

բ) 1Հ, 3Հ ընթացակարգերով համապատասխանությունը հայտարարագրելիս արտադրական հսկողության իրականացում,

գ) հայտատուի (1Հ, 2Հ ընթացակարգեր) և (կամ) հավատարմագրված փորձարկման լաբորատորիայի կողմից գազօգտագործող սարքավորման (եզակի արտադրատեսակի) տիպային նմուշների փորձարկումների անցկացում (ընթացակարգեր 3Հ, 4Հ),

դ) համապատասխանության մասին հայտարարագրի ձևակերպում և գրանցում՝ Մաքսային միության հանձնաժողովի կողմից հաստատված կարգին համապատասխան,

ե) Մաքսային միության անդամ պետությունների շուկայում արտադրանքի շրջանառության միասնական նշանով մակնշում։

Համապատասխանության մասին հայտարարագիրը ձևակերպվում է Մաքսային միության հանձնաժողովի որոշմամբ հաստատված միասնական ձևի համաձայն։

10. Սերիական թողարկման գազօգտագործող սարքավորման համար համապատասխանության մասին հայտարարագրի գործողության ժամկետը սահմանվում է 3 տարուց ոչ ավելի. գազօգտագործող սարքավորումների խմբաքանակի (եզակի արտադրատեսակի) համապատասխանության մասին հայտարարագրի գործողության ժամկետ չի սահմանվում։

Սույն Տեխնիկական կանոնակարգի պահանջներին գազօգտագործող սարքավորումների խմբաքանակի համապատասխանության մասին հայտարարագիրը գործում է միայն որոշակի խմբաքանակի դասվող սարքավորումների առնչությամբ։

11. Գազօգտագործող սարքավորման սերտիֆիկացումն իրականացվում է հայտատուի և սերտիֆիկացման (համապատասխանության գնահատման (հավաստման)) մարմնի միջև կնքված պայմանագրի հիման վրա՝ սույն Տեխնիկական կանոնակարգի 6-րդ հոդվածի 12-րդ կետով սահմանված ընթացակարգերով։

12. Սույն Տեխնիկական կանոնակարգի պահանջներին գազօգտագործող սարքավորման համապատասխանության հավաստման համար սահմանվում են սերտիֆիկացման հետևյալ ընթացակարգերը՝

ա) ընթացակարգ 1Ս՝ սերիական թողարկման գազօգտագործող սարքավորման սերտիֆիկացում՝ հավատարմագրված փորձարկման լաբորատորիայի (կենտրոնի) կողմից անցկացված՝ տիպային նմուշների փորձարկումների արդյունքների հիման վրա՝ իրականացնելով այդ գազօգտագործող սարքավորման արտադրության վիճակի վերլուծություն և սերտիֆիկացման (համապատասխանության գնահատման (հավաստման)) մարմնի կողմից սերտիֆիկացված գազօգտագործող սարքավորման հետագա վերահսկողություն,

բ) ընթացակարգ 3Ս՝ գազօգտագործող սարքավորումների խմբաքանակի սերտիֆիկացում՝ հավատարմագրված փորձարկման լաբորատորիայի (կենտրոնի) կողմից անցկացված՝ գազօգտագործող սարքավորման տիպային նմուշների փորձարկումների արդյունքների հիման վրա,

գ) ընթացակարգ 4Ս՝ գազօգտագործող սարքավորման եզակի նմուշների սերտիֆիկացում՝ հավատարմագրված փորձարկման լաբորատորիայի (կենտրոնի) կողմից անցկացված դրանց փորձարկումների արդյունքների հիման վրա։

13. 1Ս ընթացակարգով գազօգտագործող սարքավորման սերտիֆիկացման դեպքում հայտատու կարող է լինել Մաքսային միության անդամ պետության օրենսդրությանը համապատասխան դրա տարածքում որպես անհատ ձեռնարկատեր գրանցված, կամ արտադրող հանդիսացող, կամ սույն Տեխնիկական կանոնակարգի պահանջներին մատակարարվող արտադրանքի համապատասխանության ապահովման և Մաքսային միության սույն Տեխնիկական կանոնակարգի պահանջներին մատակարարվող արտադրանքի անհամապատասխանության համար պատասխանատվության մասով օտարերկրյա արտադրողի հետ ունեցած պայմանագրի հիման վրա վերջինիս գործառույթներն իրականացնող (օտարերկրյա արտադրողի գործառույթներն իրականացնող անձ) իրավաբանական կամ ֆիզիկական անձը։

3Ս և 4Ս ընթացակարգերով գազօգտագործող սարքավորման սերտիֆիկացման դեպքում հայտատու կարող է լինել Մաքսային միության անդամ պետության օրենսդրությանը համապատասխան դրա տարածքում որպես անհատ ձեռնարկատեր գրանցված, արտադրող կամ վաճառող հանդիսացող, կամ սույն Տեխնիկական կանոնակարգի պահանջներին մատակարարվող արտադրանքի համապատասխանության ապահովման և Մաքսային միության սույն Տեխնիկական կանոնակարգի պահանջներին մատակարարվող արտադրանքի անհամապատասխանության համար պատասխանատվության մասով օտարերկրյա արտադրողի հետ ունեցած պայմանագրի հիման վրա վերջինիս գործառույթներն իրականացնող (օտարերկրյա արտադրողի գործառույթներն իրականացնող անձ) իրավաբանական կամ ֆիզիկական անձը։

14. Գազօգտագործող սարքավորման սերտիֆիկացումն իրականացնելու համար հայտատուն ձևավորում է փաստաթղթերի լրակազմ, որը պետք է ներառի՝

ա) գազօգտագործող սարքավորման տեխնիկական փաստաթղթերը,

բ) 5-րդ հոդվածի 1-ին կետում նշված ստանդարտների ցանկը, որոնց պահանջներին պետք է համապատասխանի տվյալ գազօգտագործող սարքավորումը (եթե կիրառվել են), ծանոթագրություն՝

Ենթակետերի համարակալումը տրված է փաստաթղթի պաշտոնական տեքստին համապատասխան։

զ) բացատրական գրություն, որը պարունակում է սույն Տեխնիկական կանոնակարգի անվտանգության պահանջների կատարումը հաստատող ընդունված տեխնիկական որոշումների նկարագիրը, եթե 5-րդ հոդվածի 1-ին կետում նշված ստանդարտները բացակայում են կամ չեն կիրառվել,

դ) արտադրողի կամ հավատարմագրված փորձարկման լաբորատորիայի կողմից (առկայության դեպքում) անցկացված տիպային (եզակի) նմուշի փորձարկումների արձանագրությունը (արձանագրությունները),

ե) գազօգտագործող սարքավորումից առանձին շրջանառության մեջ գտնվող այն սարքվածքների համար համապատասխանության սերտիֆիկատները (համապատասխանության մասին հայտարարագրերը), որոնք նախատեսված են գազօգտագործող սարքավորման մեջ ներկառուցման համար (սարքավորման մեջ ներկառուցված նման սարքվածքների առկայության դեպքում),

զ) որակի կառավարման համակարգի սերտիֆիկատը (սերտիֆիկատի պատճենը) (առկայության դեպքում),

է) հայտատուի ընտրությամբ այլ փաստաթղթեր, որոնք ուղղակիորեն կամ անուղղակիորեն հավաստում են գազօգտագործող սարքավորման համապատասխանությունը սույն Տեխնիկական կանոնակարգով սահմանված պահանջներին։

15. Գազօգտագործող սարքավորման սերտիֆիկացումը ներառում է հետևյալ ընթացակարգերը՝

ա) հայտատուի կողմից սերտիֆիկացման (համապատասխանության գնահատման (հավաստման)) մարմնին գազօգտագործող սարքավորման սերտիֆիկացում անցկացնելու հայտ (այսուհետ՝ հայտ) ներկայացնելը՝ դրան կցվող փաստաթղթերի՝ սույն հոդվածի 14-րդ կետում նշված լրակազմով,

բ) հայտի ուսումնասիրում և սերտիֆիկացման (համապատասխանության գնահատման (հավաստման)) մարմնի կողմից դրա վերաբերյալ որոշման ընդունում,

գ) սերտիֆիկացման (համապատասխանության գնահատման (հավաստման)) մարմնի կողմից գազօգտագործող սարքավորման տիպային նմուշների ընտրություն՝ հավատարմագրված փորձարկման լաբորատորիայի (կենտրոնի)) կողմից փորձարկումների անցկացման համար,

դ) հավատարմագրված փորձարկման լաբորատորիայի (կենտրոնի)) կողմից գազօգտագործող սարքավորման նմուշի (նմուշների) փորձարկումների անցկացում,

ե) սերտիֆիկացման (համապատասխանության գնահատման (հավաստման)) մարմնի կողմից հայտատուի ներկայացրած փաստաթղթերի լրակազմի վերլուծության անցկացում,

զ) սերտիֆիկացման (համապատասխանության գնահատման (հավաստման)) մարմնի կողմից գազօգտագործող սարքավորման արտադրության վիճակի վերլուծության անցկացում, եթե նման վերլուծություն նախատեսված է սերտիֆիկացման համապատասխան ընթացակարգով։

Եթե արտադրողի մոտ առկա է գազօգտագործող սարքավորման արտադրության կամ մշակման ու արտադրության որակի կառավարման սերտիֆիկացված համակարգ, սերտիֆիկացման (համապատասխանության գնահատման (հավաստման)) մարմինը գնահատում է տվյալ համակարգի՝ սույն Տեխնիկական կանոնակարգի պահանջներին համապատասխանող սերտիֆիկացվող գազօգտագործող սարքավորման կայուն թողարկումն ապահովելու հնարավորությունը,

է) գազօգտագործող սարքավորման փորձարկումների արդյունքների, տեխնիկական փաստաթղթերի և արտադրության վիճակի վերլուծության կամ որակի կառավարման համակարգի գնահատման ամփոփում և դրական արդյունքի դեպքում՝ հայտատուին համապատասխանության սերտիֆիկատի տրամադրում,

ը) Մաքսային միության անդամ պետությունների շուկայում արտադրանքի՝ շրջանառության միասնական նշանով մակնշում,

թ) սերտիֆիկացված գազօգտագործող սարքավորման նկատմամբ տեսչական հսկողություն, եթե նման հսկողությունը նախատեսված է սերտիֆիկացման ընթացակարգով։

16. Հայտատուն իր ընտրությամբ հայտ է ներկայացնում սերտիֆիկացման (համապատասխանության գնահատման (հավաստման)) ցանկացած մարմին։

17. Եթե սերտիֆիկացման ընթացակարգով նախատեսվում է փորձարկումների անցկացում, ապա հայտատուն պետք է սերտիֆիկացման (համապատասխանության գնահատման (հավաստման)) մարմնին տրամադրի գազօգտագործող սարքավորման՝ տվյալ արտադրությունը ներկայացնող տիպային նմուշը։ Փորձարկումների արձանագրությունը կարող է ընդգրկել գազօգտագործող սարքավորման մի քանի մոդել (տիպ)՝ պայմանով, որ մոդելների (տիպերի) միջև տարբերությունը չի ազդում գազօգտագործող սարքավորման անվտանգության մակարդակի և դրա օգտագործմանն առնչվող այլ պահանջների վրա։ Այնպիսի լրացուցիչ փորձարկումներ անցկացնելու անհրաժեշտության դեպքում, որոնք չեն կարող անցկացվել արդեն ընտրված տիպային նմուշի վրա, սերտիֆիկացման (համապատասխանության գնահատման (հավաստման)) մարմնի կողմից կարող են ընտրվել լրացուցիչ տիպային նմուշներ։

18. Տիպային նմուշի փորձարկումներն անցկացնում է հավատարմագրված փորձարկման լաբորատորիան (կենտրոնը)՝ հայտատուի կամ սերտիֆիկացման (համապատասխանության գնահատման (հավաստման)) մարմնի հետ ունեցած պայմանագրի հիման վրա, որին տրվում է փորձարկումների արձանագրությունը։ Թույլատրվում է տիպային նմուշի փորձարկումները հավատարմագրված փորձարկման լաբորատորիայի (կենտրոնի) կողմից անցկացնել արտադրողի մոտ կամ շահագործման վայրում, եթե տիպային նմուշը համապատասխանում է սույն Տեխնիկական կանոնակարգի 1-ին հոդվածի 6-րդ կետով սահմանված նշաններին։

19. Հայտատուի կողմից ներկայացված տեխնիկական փաստաթղթերի վերլուծության, տիպային նմուշի փորձարկումների և գազօգտագործող սարքավորման արտադրության վիճակի վերլուծության դրական արդյունքների դեպքում սերտիֆիկացման (համապատասխանության գնահատման (հավաստման)) մարմինը կազմում է համապատասխանության սերտիֆիկատ, գրանցում է այն և տրամադրում հայտատուին։

Սերտիֆիկացման բացասական արդյունքի դեպքում սերտիֆիկացման մարմինը հայտատուին է ուղարկում պատճառաբանված որոշում՝ համապատասխանության սերտիֆիկատի տրամադրումը մերժելու վերաբերյալ։

Համապատասխանության սերտիֆիկատը ձևակերպվում է Մաքսային միության հանձնաժողովի որոշմամբ հաստատված միասնական ձևի համաձայն։

Սերիական թողարկման գազօգտագործող սարքավորման համար համապատասխանության սերտիֆիկատի գործողության ժամկետը՝ 5 տարուց ոչ ավելի. գազօգտագործող սարքավորումների խմբաքանակի (եզակի արտադրատեսակի) համար համապատասխանության սերտիֆիկատի գործողության ժամկետ չի սահմանվում։ Գազօգտագործող սարքավորումների խմբաքանակի մասով համապատասխանության սերտիֆիկատը գործում է միայն որոշակի խմբաքանակի դասվող սարքավորումների առնչությամբ։

20. Հայտատուն, այդ թվում՝ գազօգտագործող սարքավորման վաճառող (մատակարար) հանդիսացող հայտատուն, ստացված համապատասխանության սերտիֆիկատի հիման վրա գազօգտագործող սարքավորումը մակնշում է Մաքսային միության անդամ պետությունների շուկայում արտադրանքի շրջանառության միասնական նշանով։

21. Սերտիֆիկացման (համապատասխանության գնահատման (հավաստման)) մարմինը, երկու տարին առնվազն մեկ անգամ՝ համապատասխանության սերտիֆիկատի գործողության ամբողջ ժամկետի ընթացքում անցկացնում է սերիական թողարկման՝ սերտիֆիկացված գազօգտագործող սարքավորման տեսչական հսկողություն՝ հավատարմագրված փորձարկման լաբորատորիայում (կենտրոնում) նմուշների փորձարկումների և (կամ) գազօգտագործող սարքավորման արտադրության վիճակի վերլուծության միջոցով, եթե նման վերլուծություն նախատեսվում է սերտիֆիկացման համապատասխան ընթացակարգով։ Փորձարկումների համար ստանդարտ նմուշ վերցնելը սերտիֆիկացման (համապատասխանության գնահատման (հավաստման)) մարմնի հայեցողությամբ անցկացվում է արտադրողի կամ վաճառողի մոտ։

22. Տեխնիկական փաստաթղթերի պահպանումը։

Տեխնիկական փաստաթղթերը, այդ թվում՝ Մաքսային միության անդամ պետությունների տարածքում համապատասխանության հավաստման փաստաթղթերը պետք է պահպանել՝

գազօգտագործող սարքավորման վերաբերյալ՝ արտադրողի (օտարերկրյա արտադրողի գործառույթներ իրականացնող անձի) մոտ՝ այդ սարքավորումը արտադրությունից հանելու (սարքավորման արտադրությունը դադարեցնելու) օրվանից առնվազն 10 տարվա ընթացքում,

գազօգտագործող սարքավորումների խմբաքանակի (եզակի արտադրատեսակի) վերաբերյալ՝ վաճառողի (մատակարարի), արտադրողի (օտարերկրյա արտադրողի գործառույթներ իրականացնող անձի) մոտ՝ խմբաքանակի վերջին արտադրատեսակի իրացման օրվանից առնվազն 10 տարվա ընթացքում։

Սերտիֆիկացման արդյունքները հավաստող փաստաթղթերն ու նյութերը պահվում են համապատասխանության սերտիֆիկատ տրամադրած սերտիֆիկացման մարմնում՝ համապատասխանության սերտիֆիկատի գործողության ժամկետի ավարտից հետո առնվազն 5 տարվա ընթացքում։

Վերը նշված փաստաթղթերը պետք է տրամադրվեն պետական հսկողություն (վերահսկողություն) իրականացնող մարմիններին՝ նրանց պահանջով։

1. Սույն Տեխնիկական կանոնակարգի պահանջներին համապատասխանող և սույն Տեխնիկական կանոնակարգով սահմանված համապատասխանության հավաստման ընթացակարգեր անցած գազօգտագործող սարքավորումը պետք է ունենա Մաքսային միության անդամ պետությունների շուկայում արտադրանքի՝ շրջանառության միասնական նշանով մականշվածք։

2. Մաքսային միության անդամ պետությունների շուկայում արտադրանքի շրջանառության միասնական նշանը զետեղվում է գազօգտագործող սարքավորման յուրաքանչյուր միավորի վրա։ Մաքսային միության անդամ պետությունների շուկայում արտադրանքի շրջանառության միասնական նշանը զետեղվում է անմիջապես արտադրատեսակի վրա, ինչպես նաև նշվում է դրան կից ներկայացված շահագործման փաստաթղթերում։ Թույլատրվում է Մաքսային միության անդամ պետությունների շուկայում արտադրանքի շրջանառության միասնական նշանը զետեղել միայն փաթեթվածքի վրա և նշել դրան կից ներկայացվող շահագործման փաստաթղթերում, եթե այն անհնար է զետեղել անմիջապես գազօգտագործող սարքավորման վրա։

3. Մաքսային միության անդամ պետությունների շուկայում արտադրանքի շրջանառության միասնական նշանն արտադրատեսակի վրա զետեղվում է ցանկացած եղանակով, որն ապահովում է պարզ և հստակ պատկեր գազօգտագործող սարքավորման ծառայության ժամկետի ամբողջ ընթացքում։

4. Մաքսային միության անդամ պետությունների շուկայում արտադրանքի շրջանառության միասնական նշանով մակնշումը կատարվում է՝ նախքան գազօգտագործող սարքավորումը շուկայում շրջանառության մեջ բաց թողելը։

5. Գազօգտագործող սարքավորումը Մաքսային միության անդամ պետությունների շուկայում արտադրանքի շրջանառության միասնական նշանով մակնշվում է Մաքսային միության այն բոլոր տեխնիկական կանոնակարգերի պահանջներին դրա համապատասխանության դեպքում, որոնք տարածվում են դրա վրա, և որոնցով նախատեսվում է Մաքսային միության անդամ պետությունների շուկայում արտադրանքի շրջանառության միասնական նշանի զետեղում։

Հոդված 8. Պաշտպանության մասով վերապահումը

1. Մաքսային միության անդամ պետությունները պարտավոր են ձեռնարկել բոլոր միջոցները՝ Մաքսային միության միասնական մաքսային տարածքում գազօգտագործող սարքավորումների՝ շրջանառության մեջ բացթողումը սահմանափակելու, արգելելու համար, ինչպես նաև սույն Տեխնիկական կանոնակարգի պահանջներին չհամապատասխանող գազօգտագործող սարքավորումները շուկայից դուրս բերելու համար։

Շահագործման փաստաթղթերին ներկայացվող պահանջները

1. Գազօգտագործող սարքավորման մատակարարման լրակազմի մեջ պետք է ներառվեն հետևյալ շահագործման փաստաթղթերը՝ գազօգտագործող սարքավորման մոնտաժման, տեխնիկական սպասարկման և վերանորոգման հրահանգն ու դրա շահագործման ձեռնարկը։ Նշված փաստաթղթերը կազմվում են ռուսերենով և Մաքսային միության անդամ պետության պետական լեզվով (լեզուներով)` Մաքսային միության անդամ պետության (պետությունների) օրենսդրության (օրենսդրությունների) մեջ համապատասխան պահանջների առկայության դեպքում։

Շահագործման փաստաթղթերը կազմվում են թղթային կրիչներով։ Դրանց կարող է կցվել շահագործման փաստաթղթերի լրակազմը՝ էլեկտրոնային կրիչների վրա։

Անհրաժեշտության դեպքում թույլատրվում է մեկտեղել նշված փաստաթղթերը։

2. Գազօգտագործող սարքավորման մոնտաժման, տեխնիկական սպասարկման և վերանորոգման հրահանգը պետք է պարունակի հետևյալ տեղեկատվությունը՝

ա) գազօգտագործող սարքավորման և դրա աշխատանքի կարգի ընդհանուր նկարագրությունը․

բ) գազօգտագործող սարքավորման անվանական ջերմային հզորությունը և (կամ) անվանական ջերմային արտադրողականությունը․

գ) օգտագործվող գազերի տեսակները և անվանական ճնշումները․

դ) գազօգտագործող սարքավորման՝ մեկ տեսակի գազից մյուսին փոխարկման կարգը․

ե) այն սենքի օդափոխությանը ներկայացվող պահանջները, որտեղ տեղակայված է գազօգտագործող սարքավորումը՝ այրման գործընթացն ապահովելու, վնասակար չայրված գազերի կուտակումը բացառելու և այրման արգասիքների հեռացումն ապահովող պայմաններ ստեղծելու համար․

զ) բլոկային գազային հրածորաններին և այն գազօգտագործող սարքավորումներին ներկայացվող պահանջները, որոնց համար նախատեսված են այդ հրածորանները, իսկ անհրաժեշտության դեպքում՝ արտադրողի կողմից առաջարկված համակցությունների ցանկը` շահագործման ընթացքում գազօգտագործող սարքավորման պատշաճ կերպով հավաքումը և կարգաբերումը երաշխավորելու, դրա հավաքված նմուշի հայտագրված տեխնիկական բնութագրերն ու անվտանգությունն ապահովելու համար․

է) ջեռուցման սարքավորման համար նախատեսված ջրի քիմիական բաղադրությանը ներկայացվող պահանջները (ջրի՝ ջերմակիր լինելու դեպքում)․

ը) գազօգտագործող սարքավորումների համար էլեկտրական ցանցի անվանական լարումը՝ ավտոմատիկայի համակարգերի էլեկտրական սնուցմամբ․

թ) այն տեխնիկական սպասարկման տեսակներն ու պարբերականությունը, որին պետք է ենթարկվի գազօգտագործող սարքավորումը շահագործման ընթացքում․

ժ) գազօգտագործող սարքավորմանը բնորոշ անսարքինությունները և դրանք վերացնելու մեթոդները․

ժա) օդափոխանակությանը ներկայացվող պահանջներն այն սենքում, որտեղ թույլատրվում է ծխանցքին չմիացված և այրման արգասիքների հեռացման համար օդաքաշ սարքվածքով չհամալրված ջեռուցիչ և ջրատաքացուցիչ գազօգտագործող սարքավորման տեղակայումը․

ժբ) արտադրողի (օտարերկրյա արտադրողի գործառույթներ կատարող անձի) անվանումն ու գտնվելու վայրը, նրանց հետ կապ հաստատելու համար տեղեկատվությունը․

ժգ) գազօգտագործող սարքավորման արտադրման ամիսն ու տարին և (կամ) արտադրության տարին զետեղելու տեղի և որոշելու եղանակի մասին տեղեկատվությունը։

3. Գազօգտագործող սարքավորման շահագործման ձեռնարկը պետք է պարունակի բոլոր այն տեղեկությունները, որոնք անհրաժեշտ են ծառայության ժամկետի ընթացքում դրա անվտանգ շահագործման համար, և օգտագործողի համար մատնանշի դրա հնարավորությունների սահմանափակումները։

4. Շահագործման ձեռնարկում պետք է սահմանվեն առաջարկություններ գազօգտագործող սարքավորման անվտանգ ուտիլիզացման համար։

5. Գազօգտագործող սարքավորման մոնտաժման համար նախատեսված ամրանը և գազօգտագործող սարքավորման մեջ ներկառուցման համար նախատեսված սարքվածքները պետք է մատակարարվեն գազօգտագործող սարքավորման մոնտաժման, տեխնիկական սպասարկման և վերանորոգման հրահանգի լրակազմի հետ։

Մակնշմանն ու փաթեթավորմանը ներկայացվող պահանջները

1. Մաքսային միության անդամ պետությունների շուկայում շրջանառության մեջ բաց թողնվող գազօգտագործող սարքավորման յուրաքանչյուր միավոր պետք է ունենա պարզ, դյուրընթեռնելի մականշվածք՝ զետեղված առանց գործիքի կիրառմամբ կազմատելու զննման համար հասանելի տեղում, և պահպանվող գազօգտագործող սարքավորման ծառայության ժամկետի ընթացքում։

2. Գազօգտագործող սարքավորման մականշվածքի մեջ պարունակվող տեղեկատվությունը շարադրվում է ռուսերենով և Մաքսային միության անդամ պետությունների պետական լեզվով (լեզուներով)` Մաքսային միության անդամ պետության (պետությունների) օրենսդրության (օրենսդրությունների) մեջ համապատասխան պահանջների առկայության դեպքում։

3. Մականշվածքը պետք է պարունակի հետևյալ տեղեկատվությունը՝

ա) արտադրողի անվանումը և (կամ) ապրանքային նշանը, արտադրող երկրի անվանումը,

բ) սարքավորման մոդելը (տիպը),

գ) սերիական համարը (խմբաքանակի համարը),

դ) սարքավորման արտադրման ամսաթիվը (ամիսը, տարին),

ե) գազօգտագործող սարքավորման անվանական ջերմային հզորությունը և (կամ) անվանական ջերմային արտադրողականությունը,

զ) օգտագործվող գազի տեսակը և անվանական ճնշումը,

է) էլեկտրական հոսանքի լարումը, հաճախականությունը և օգտագործվող էլեկտրական հզորությունը (էլեկտրական ցանցին միացվող գազօգտագործող սարքավորումների համար)։

4. Գազօգտագործող սարքավորումների վրա զետեղված նախազգուշական գրառումները օգտագործողին պետք է տեղեկացնեն՝

ա) պայթյունի, հրդեհի, շմոլ գազից թունավորման, վնասակար ջերմային ազդեցության, էլեկտրահարման վտանգի մասին (էլեկտրական ցանցին միացված գազօգտագործող սարքավորման մասով)․

բ) գազօգտագործող սարքավորումը լավ օդափոխվող սենքերում տեղակայելու անհրաժեշտության մասին (սենքի ներսում այրման արգասիքները հեռացնող գազօգտագործող սարքավորման մասով)։

5. Խողովակաշարերի միացման բոլոր անցքերը պետք է փակված լինեն փոխադրման խցափակիչներով։

6. Գազօգտագործող սարքավորման յուրաքանչյուր միավոր պետք է փաթեթավորված լինի այնպես, որ պահման և փոխադրման ժամանակ ապահովվի դրա պահպանվածությունը։

7. Փաթեթվածքը պետք է ապահովի գազօգտագործող սարքավորման փոխադրման, բեռնման և բեռնաթափման համար պայմանները։

8. Փաթեթվածքի վրա արտաքին կողմից պետք է զետեղված լինի մականշվածք։

9. Մականշվածքը պետք է լինի հստակ և տարբերակելի, զետեղված՝ փաթեթվածքի գույնին հակադիր՝ չմաքրվող կամ ջրամերժ ներկով։

10. Փաթեթվածքի մականշվածքը պետք է պարունակի հետևյալ տեղեկատվությունը՝

ա) սարքավորման մոդելը (տիպը),

բ) օգտագործվող գազի տեսակը և անվանական ճնշումը,

գ) մանիպուլյացիոն նշանները,

դ) արտադրողի անվանումը և (կամ) ապրանքային նշանը, արտադրող երկրի անվանումը։

11. Մանիպուլյացիոն նշանները պետք է կրկնվեն փաթեթվածքի տարբեր տեղերում։

12. Թույլատրվում է մակնշել միայն փաթեթվածքը, եթե կառուցվածքի առանձնահատկություններից ելնելով՝ մականշվածքը հնարավոր չէ զետեղել անմիջապես գազօգտագործող սարքավորման վրա։

ՑԱՆԿ

ստանդարտների, որոնց կամավոր հիմունքով կիրառման արդյունքում ապահովվում է «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգի (ՄՄ ՏԿ 016/2011) պահանջների պահպանումը

Փոփոփող փաստաթղթերի ցանկ

(Եվրասիական տնտեսական հանձնաժողովի կոլեգիայի 2015 թվականի փետրվարի 3-ի N 9 որոշման խմբագրությամբ)

ՑԱՆԿ

ստանդարտների, որոնք պարունակում են «Գազանման վառելիքով աշխատող ապարատների անվտանգության մասին» Մաքսային միության տեխնիկական կանոնակարգի (ՄՄ ՏԿ 016/2011) պահանջները կիրառելու և կատարելու ու արտադրանքի համապատասխանության գնահատում (հավաստում) իրականացնելու համար անհրաժեշտ՝ հետազոտությունների (փորձարկումների) և չափումների կանոններ և մեթոդներ, այդ թվում՝ նմուշառման կանոններ

Փոփոփող փաստաթղթերի ցանկ

(Եվրասիական տնտեսական հանձնաժողովի կոլեգիայի 2015 թվականի փետրվարի 3-ի N 9 որոշման խմբագրությամբ)

(ցանկում ԵՏՀԿ 16.08.12 թիվ 125 որոշման 8-րդ կետի փոփոխությունը հնարավոր չէ կատարել ՄՄ ԱՏԳ ԱԱ «8416 20 900 0» ծածկագիրի բացակայության պատճառով, ԵՏՀԿ 25.06.13 թիվ 140 որոշման ՄՄ ԱՏԳ ԱԱ «7322 90 000 0» ծածկագրի բացակայության պատճառով)

Պաշտոնական հրապարակման օրը՝ 6 դեկտեմբերի 2021 թվական: