ՀՀ ՕՐԵՆՔԸ ԱՐԴԱՐԱԴԱՏՈՒԹՅԱՆ ԽՈՐՀՐԴԻ ՄԱՍԻՆ

Պաշտոնական ինկորպորացիա

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է Ազգային ժողովի կողմից
«23» հոկտեմբերի 1995 թ. Ն-042-I

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ՄԱՍԻՆ

ԳԼՈՒԽ 1

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ԿԱԶՄԱՎՈՐՈՒՄԸ

Հոդված 1. Հանրապետության Նախագահն արդարադատության խորհրդի նախագահն է:

Արդարադատության նախարարը և գլխավոր դատախազը խորհրդի փոխնախագահներն են:

Խորհրդի կազմի մեջ մտնում են նաև Հանրապետության Նախագահի կողմից հինգ տարի ժամկետով նշանակվող տասնչորս անդամ, որոնցից երկուսը` իրավաբան գիտնական, ինը` դատավոր, երեքը` դատախազ:

Խորհրդի երեքական անդամ նշանակվում են առաջին ատյանի դատարանների, վերաքննիչ դատարանների և վճռաբեկ դատարանի դատավորներից:

Խորհրդի անդամները նշանակվում են հինգ տարի ժամկետով:

Հոդված 2. Մինչև դատական նոր համակարգի կազմավորումը արդարադատության խորհրդի կազմի մեջ մտնում են Հանրապետության Նախագահի կողմից նշանակված տասնմեկ անդամ, որոնցից երկուսը` իրավաբան գիտնականներ, վեցը` դատավորներ, երեքը` դատախազներ: Խորհրդի երեքական անդամ նշանակվում են շրջանային (քաղաքային) ժողովրդական դատարանների և Հայաստանի Հանրապետության գերագույն դատարանի դատավորներից:

Սույն հոդվածով նախատեսված կազմով արդարադատության խորհրդի անդամների լիազորությունները ավարտվում են դատական նոր համակարգի կազմավորմամբ:

Հոդված 3. Խորհրդի դատավոր անդամների թեկնածություններն առաջադրվում են առաջին ատյանի դատարանների, վերաքննիչ դատարանների և վճռաբեկ դատարանի դատավորների ընդհանուր ժողովներում:

Մինչև դատական նոր համակարգի կազմավորումը խորհրդի դատավոր անդամների թեկնածություններն առաջադրվում են շրջանային (քաղաքային) ժողովրդական դատարանների և գերագույն դատարանի դատավորների ընդհանուր ժողովներում:

Առաջին ատյանի դատարանների, վերաքննիչ դատարանների, իսկ մինչև դրանց կազմավորումը` շրջանային (քաղաքային) ժողովրդական դատարանների դատավորների ընդհանուր ժողովները հրավիրում և մինչև ժողովներում նախագահներ ընտրելը դրանք վարում է արդարադատության նախարարը:

Վճռաբեկ դատարանի (մինչև վճռաբեկ դատարանի կազմավորումը` գերագույն դատարանի) դատավորների ժողովը հրավիրում և նիստը վարում է վճռաբեկ դատարանի (մինչև վճռաբեկ դատարանի կազմավորումը` գերագույն դատարանի) նախագահը:

Դատավորների ընդհանուր ժողովն իրավազոր է, եթե ժողովին ներկա է դատավորների կեսից ավելին:

Արդարադատության խորհրդի դատավոր անդամների թափուր տեղերի համար դատավորների ընդհանուր ժողովները յուրաքանչյուր թափուր տեղի համար գաղտնի քվեարկությամբ առաջադրում են երեքական թեկնածու: Յուրաքանչյուր տեղի համար առաջադրված է համարվում առավել շատ ձայներ ստացած երեք թեկնածուն:

Քվեարկություններն անցկացնելու և արդյունքներն ամփոփելու համար ժողովն ընտրում է առնվազն երեք անդամից կազմված հաշվիչ հանձնաժողով: Հաշվիչ հանձնաժողովում չեն կարող ընդգրկվել խորհրդի անդամության համար առաջադրված թեկնածուները:

Քվեարկությունը համարվում է կայացած, եթե քվեարկությանը մասնակցել է դատավորների ընդհանուր թվի կեսից ավելին:

Քվեարկության արդյունքները արձանագրվում և հրապարակվում են ժողովում:

Ընտրությունների արդյունքներն արձանագրվում են: Արձանագրությունը ստորագրում են ժողովի նախագահը և քարտուղարը:

Առաջադրված թեկնածությունները ներկայացվում են Հանրապետության Նախագահին:

Դատավորների ժողովը, բացառությամբ սույն հոդվածի վեցերորդ մասով նախատեսված քվեարկությունների, որոշումներ ընդունում է ներկա դատավորների ձայների մեծամասնությամբ:

Խորհրդի դատավոր անդամի մահվան, լիազորությունների ժամկետն ավարտվելու, լիազորությունների վաղաժամկետ դադարեցման կամ իր դիմումի համաձայն խորհրդի կազմից դուրս գալու դեպքերում թափուր տեղերի համար թեկնածությունների առաջադրումը կատարվում է սույն հոդվածով նախատեսված կարգով` երկամսյա ժամկետում:

Հոդված 4. Խորհրդի դատախազ անդամների թեկնածություններն առաջադրում է գլխավոր դատախազը:

Խորհրդի դատախազ անդամի մահվան, լիազորությունների ժամկետն ավարտվելու, լիազորությունների վաղաժամկետ դադարեցման կամ իր դիմումի համաձայն խորհրդի կազմից դուրս գալու դեպքերում գլխավոր դատախազը երկամսյա ժամկետում առաջադրում է նոր թեկնածու:

Հոդված 5. Հանրապետության Նախագահը խորհրդի իրավաբան գիտնական անդամներ է նշանակում մանկավարժության կամ գիտության ոլորտում աշխատող, իրավաբանական գիտությունների գիտական աստիճան ունեցող իրավաբաններից:

ԳԼՈՒԽ 2

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ԱՆԴԱՄԻ ԼԻԱԶՈՐՈՒԹՅՈՒՆՆԵՐԻ ՎԱՂԱԺԱՄԿԵՏ ԴԱԴԱՐԵՑՄԱՆ ՀԻՄՔԵՐԸ ԵՎ ԹԱՓՈՒՐ ՏԵՂՈՒՄ ՆՇԱՆԱԿՄԱՆ ԿԱՐԳԸ

Հոդված 6. Խորհրդի դատավոր անդամի լիազորությունները համարվում են վաղաժամկետ դադարեցված, եթե`

1) նա կորցրել է Հայաստանի Հանրապետության քաղաքացիությունը.

2) վաղաժամկետ դադարեցվել է նրա` որպես դատավորի լիազորությունները.

3) նա երկու անգամ անընդմեջ անհարգելի պատճառով չի ներկայացել խորհրդի նիստերին: Բացակայությունն անհարգելի է համարվում, եթե չի ներկայացվել անաշխատունակության թերթիկ կամ բացակայությունը չի համաձայնեցված խորհրդի նախագահի հետ.

4) նրա նկատմամբ կա դատարանի օրինական ուժի մեջ մտած մեղադրական դատավճիռ.

5) լրացել է դատավորի պաշտոնավարման համար Սահմանադրությամբ սահմանված տարիքը.

6) դատարանի օրինական ուժի մեջ մտած վճռով նա ճանաչվել է անգործունակ, անհայտ բացակայող կամ մահացած:

Հոդված 7. Խորհրդի դատախազ անդամի լիազորությունները համարվում են վաղաժամկետ դադարեցված, եթե`

1) նա կորցրել է Հայաստանի Հանրապետության քաղաքացիությունը.

2) նա ազատվել է դատախազի պաշտոնից.

4) նրա նկատմամբ կա դատարանի օրինական ուժի մեջ մտած մեղադրական դատավճիռ.

5) լրացել է նրա` օրենքով սահմանված պաշտոնավարման տարիքը.

6) դատարանի օրինական ուժի մեջ մտած վճռով նա ճանաչվել է անգործունակ, անհայտ բացակայող կամ մահացած:

Հոդված 8. Խորհրդի իրավաբան գիտնական անդամի լիազորությունները համարվում են վաղաժամկետ դադարեցված, եթե`

1) նա կորցրել է Հայաստանի Հանրապետության քաղաքացիությունը.

2) փոխվել են սույն օրենքի 5 հոդվածով նախատեսված պահանջները.

4) նրա նկատմամբ կա դատարանի օրինական ուժի մեջ մտած մեղադրական դատավճիռ.

5) դատարանի օրինական ուժի մեջ մտած վճռով նա ճանաչվել է անգործունակ, անհայտ բացակայող կամ մահացած:

Հոդված 9. Խորհրդի անդամի մահվան, լիազորությունների ժամկետն ավարտվելու, լիազորությունների վաղաժամկետ դադարեցման կամ իր դիմումի համաձայն խորհրդի կազմից դուրս գալու դեպքերում խորհրդի նոր անդամի նշանակումը կատարվում է սույն օրենքով սահմանված կարգով` երկամսյա ժամկետում:

Խորհրդի նոր անդամը նշանակվում է հինգ տարի ժամկետով:

ԳԼՈՒԽ 3

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ԱՆԴԱՄԻ ԻՐԱՎՈՒՆՔՆԵՐԸ ԵՎ ՊԱՐՏԱԿԱՆՈՒԹՅՈՒՆՆԵՐԸ

Հոդված 10. Խորհրդի յուրաքանչյուր անդամ քվեարկությունների ժամանակ ունի մեկ ձայն:

Հոդված 11. Խորհրդի դատավոր անդամը չի մասնակցում քվեարկությանը, եթե`

1) խորհրդի կողմից Հանրապետության Նախագահին առաջարկ է ներկայացվել նրա` որպես դատավորի լիազորությունները դադարեցնելու, նրան կալանավորելու, դատական կարգով վարչական կամ քրեական պատասխանատվության ենթարկելու համաձայնություն տալու մասին.

2) նրա նկատմամբ կարգապահական վարույթ է հարուցված:

Խորհրդի դատախազ կամ իրավաբան գիտնական անդամը չի մասնակցում քվեարկություններին նրան մեղադրանք առաջադրելու պահից:

Հոդված 12. Խորհրդի անդամն իրավունք ունի`

1) ծանոթանալ նիստում քննարկվող հարցերին առնչվող նյութերին.

2) հարցեր տալ.

3) իր լիազորությունների շրջանակում անել առաջարկություններ.

4) պարզաբանումներ ստանալ զեկուցողից:

Խորհրդի անդամը պարտավոր է`

1) մասնակցել նիստերին` բացառությամբ սույն օրենքի 20 հոդվածի ութերորդ մասով նախատեսված դեպքերի.

2) կատարել խորհրդի նախագահի կամ խորհրդի փոխնախագահների հանձնարարությունները.

3) անբասիր պահել խորհրդի անդամի պատիվն ու արժանապատվությունը:

ԳԼՈՒԽ 4

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ԼԻԱԶՈՐՈՒԹՅՈՒՆՆԵՐԸ ԵՎ ԴՐԱՆՑ ԻՐԱԿԱՆԱՑՄԱՆ ԿԱՐԳԸ

Հոդված 13. Արդարադատության խորհուրդը արդարադատության նախարարի առաջարկով կազմում և Հանրապետության Նախագահի հաստատմանն է ներկայացնում դատավորների պաշտոնեական պիտանիության և ծառայողական առաջխաղացման ցուցակները:

Դատավորների պաշտոնեական պիտանիության և ծառայողական առաջխաղացման ցուցակները նախապատրաստվում են արդարադատության նախարարության կանոնադրությամբ սահմանված կարգով:

Դատավորների պաշտոնեական պիտանիության և ծառայողական առաջխաղացման ցուցակները կազմվում, Հանրապետության Նախագահին են ներկայացվում յուրաքանչյուր տարվա հունվար ամսին և հաստատվում են մեկամսյա ժամկետում:

Արդարադատության նախարարի առաջարկով, արդարադատության խորհրդի որոշմամբ, դատավորների պաշտոնեական պիտանիության և ծառայողական առաջխաղացման ցուցակները կարող են փոփոխվել և Հանրապետության Նախագահի հաստատմանը ներկայացվել առանց սույն հոդվածի երրորդ մասով նախատեսված ժամկետի պահպանման:

Պաշտոնեական պիտանիության ցուցակներում ընդգրկվում են`

1) դատարանների այն դատավորները, ովքեր մասնագիտական, գործնական և բարոյական հատկանիշներով համապատասխանում են զբաղեցրած պաշտոնին.

2) բարձրագույն իրավաբանական կրթություն ունեցող 25 տարին լրացած Հայաստանի Հանրապետության այն քաղաքացիները, ովքեր ունեն իրավաբանի առնվազն երեք տարվա մասնագիտական ստաժ և կարող են աշխատել որպես դատավոր:

Դատավորների ծառայողական առաջխաղացման ցուցակներում ընդգրկվում են պաշտոնեական պիտանիության ցուցակներում տեղ գտած այն անձինք, ովքեր իրենց մասնագիտական, գործնական և բարոյական հատկանիշներով արժանի են առաջխաղացման:

Դատավորների նշանակումները կատարվում են Հանրապետության Նախագահի կողմից հաստատված պաշտոնեական պիտանիության և ծառայողական առաջխաղացման ցուցակների հիման վրա:

Հոդված 14. Արդարադատության խորհուրդը գլխավոր դատախազի առաջարկով կազմում և Հանրապետության Նախագահի հաստատմանն է ներկայացնում դատախազների պաշտոնեական պիտանիության և ծառայողական առաջխաղացման ցուցակները:

Դատախազների պաշտոնեական պիտանիության և ծառայողական առաջխաղացման ցուցակները կազմվում, Հանրապետության Նախագահին են ներկայացվում յուրաքանչյուր տարվա հունվար ամսին և հաստատվում են մեկամսյա ժամկետում:

Գլխավոր դատախազի առաջարկով, արդարադատության խորհրդի որոշմամբ, դատախազների պաշտոնեական պիտանիության և ծառայողական առաջխաղացման ցուցակները կարող են փոփոխվել և Հանրապետության Նախագահի հաստատմանը ներկայացվել առանց սույն հոդվածի երկրորդ մասով նախատեսված ժամկետի պահպանման:

Պաշտոնեական պիտանիության ցուցակներում ընդգրկվում են`

1) այն դատախազները, ովքեր մասնագիտական, գործնական և բարոյական հատկանիշներով համապատասխանում են զբաղեցրած պաշտոնին.

Դատախազների ծառայողական առաջխաղացման ցուցակներում ընդգրկվում են պաշտոնեական պիտանիության ցուցակներում տեղ գտած այն անձինք, ովքեր իրենց մասնագիտական, գործնական և բարոյական հատկանիշներով արժանի են առաջխաղացման:

Դատախազների նշանակումները կատարվում են Հանրապետության Նախագահի կողմից հաստատված պաշտոնեական պիտանիության և ծառայողական առաջխաղացման ցուցակների հիման վրա:

Հոդված 15. Վճռաբեկ դատարանի, նրա պալատների նախագահների և դատավորների, վերաքննիչ, առաջին ատյանի և այլ դատարանների նախագահների թեկնածությունները խորհրդում կարող է առաջադրել խորհրդի յուրաքանչյուր անդամ:

Եթե դատավորի կամ դատարանի նախագահի թեկնածությունը առաջադրվում է նույն դատարանի կամ նույն դատական ատյանի այլ դատավորի կամ դատարանի նախագահի պաշտոնի համար, ապա բավարար է, որ թեկնածուն ընդգրկված լինի դատավորների պաշտոնեական պիտանիության ցուցակում:

Թեկնածությունն առաջադրելիս ներկայացվում են թեկնածուի մասնագիտական, գործնական և բարոյական հատկանիշները:

Եթե թեկնածուի ներկայացումը թերի է` թեկնածության ներկայացումը նախագահողը հանձնարարում է խորհրդի որևէ անդամի:

Խորհրդի հավանությանն արժանացած թեկնածությունը ներկայացվում է Հանրապետության Նախագահին:

Հոդված 16. Բացի սույն օրենքի 15 հոդվածով նախատեսված թեկնածություններից, այլ դատարանների դատավորների թեկնածությունները խորհրդին ներկայացնում է արդարադատության նախարարը: Դատավորների թեկնածությունների նախնական հաշվառումը և նախնական ընտրությունը կատարվում են արդարադատության նախարարության կանոնադրությամբ սահմանված կարգով:

Եթե դատարանի դատավորի թեկնածությունը առաջադրվում է նույն դատարանի կամ նույն դատական ատյանի այլ դատարանի դատավորի պաշտոնի համար, ապա բավարար է, որ թեկնածությունն ընդգրկված լինի դատավորների պաշտոնեական պիտանիության ցուցակում:

Մեկ թափուր տեղի համար նախարարը ներկայացնում է մեկ թեկնածություն` բնութագրելով թեկնածուի մասնագիտական, գործնական և բարոյական հատկանիշները:

Եթե թեկնածությունը չի արժանանում խորհրդի հավանությանը` արդարադատության նախարարը ներկայացնում է նոր թեկնածություն:

Խորհրդի հավանությանն արժանացած թեկնածությունը ներկայացվում է Հանրապետության Նախագահին:

Հոդված 17. Գլխավոր դատախազի տեղակալների, դատախազության կառուցվածքային ստորաբաժանումները գլխավորող դատախազների թեկնածությունները արդարադատության խորհրդին ներկայացնում է գլխավոր դատախազը:

Եթե դատախազի թեկնածությունը առաջադրվում է նույն պաշտոնի կամ դատախազության կառուցվածքային հավասարազոր ստորաբաժանումը գլխավորող դատախազի պաշտոնի համար` բավարար է, որ թեկնածուն ընդգրկված լինի դատախազների պաշտոնեական պիտանիության ցուցակում:

Յուրաքանչյուր տեղի համար գլխավոր դատախազը ներկայացնում է մեկ թեկնածություն` բնութագրելով թեկնածուի մասնագիտական, գործնական և բարոյական հատկանիշները:

Եթե առաջադրված թեկնածությունը չի արժանանում խորհրդի հավանությանը, գլխավոր դատախազը ներկայացնում է նոր թեկնածություն:

Խորհրդի հավանությանն արժանացած թեկնածությունը ներկայացվում է Հանրապետության Նախագահին:

Հոդված 18. Արդարադատության խորհուրդը Հանրապետության Նախագահին առաջարկներ է ներկայացնում դատավորներին և դատախազներին որակավորման դասեր շնորհելու մասին:

Դատավորների և դատախազների որակավորման դասերը սահմանվում են օրենքով:

Որակավորման դասեր շնորհելիս հաշվի են առնվում դատավորի և դատախազի մասնագիտական պատրաստվածությունը, զբաղեցրած պաշտոնը, աշխատանքային ստաժը:

Դատավորների և դատախազների պաշտոնեական պիտանիության ցուցակներից դատավորին և դատախազին որակավորման դաս շնորհելու առաջարկ կարող է անել խորհրդի յուրաքանչյուր անդամ:

Դատավորին որակավորման դաս շնորհելու առաջարկի վերաբերյալ խորհուրդը լսում է արդարադատության նախարարի կարծիքը:

Դատախազին որակավորման դաս շնորհելու առաջարկի վերաբերյալ խորհուրդը լսում է գլխավոր դատախազի կարծիքը:

Հոդված 19. Դատավորի լիազորությունները վաղաժամկետ դադարեցնելու մասին հարցով խորհրդին դիմում է արդարադատության նախարարը, իսկ դատավորին կալանավորելու, դատական կարգով վարչական կամ քրեական պատասխանատվության ենթարկելու համաձայնություն տալու մասին հարցով` գլխավոր դատախազը:

Խորհրդի եզրակացությամբ դատավորի լիազորությունների վաղաժամկետ դադարեցման հիմքերն են`

1) օրինականության կոպիտ խախտում թույլ տալը.

2) դատավորի կոչմանը անհամատեղելի արարք կատարելը:

Արդարադատության նախարարը կամ գլխավոր դատախազը սույն հոդվածի առաջին մասով նախատեսված դեպքերում խորհրդին է ներկայացնում դատավորի լիազորությունները վաղաժամկետ դադարեցնելու, դատավորին կալանավորելու, դատական կարգով վարչական կամ քրեական պատասխանատվության ենթարկելու առաջարկության համար հիմք հանդիսացող նյութերը:

Երկրորդ անգամ նույն հիմքերով դատավորի լիազորությունները վաղաժամկետ դադարեցնելու, դատական կարգով վարչական կամ քրեական պատասխանատվության ենթարկելու մասին առաջարկություն չի կարող արվել:

Դատավորի լիազորությունները վաղաժամկետ դադարեցնելու հարց քննարկելիս խորհուրդը հրավիրում և լսում է դատավորին:

Խորհրդի երկրորդ կանչին անհարգելի պատճառով դատավորի չներկայանալու դեպքում խորհուրդն իրավունք ունի հարցը քննել նրա բացակայությամբ:

Հոդված 20. Սույն հոդվածով սահմանված հիմքերի առկայության դեպքում խորհուրդը դատավորին ենթարկում է կարգապահական պատասխանատվության:

Վճռաբեկ դատարանի դատավորի նկատմամբ կարգապահական վարույթ հարուցելու իրավունքը պատկանում է վճռաբեկ դատարանի նախագահին:

Վերաքննիչ, տնտեսական և առաջին ատյանի դատարանների դատավորների նկատմամբ կարգապահական վարույթ հարուցելու իրավունքը պատկանում է արդարադատության նախարարին:

Մինչև դատական նոր համակարգի կազմավորումը գերագույն դատարանի դատավորների նկատմամբ կարգապահական վարույթ հարուցում է գերագույն դատարանի նախագահը, շրջանային (քաղաքային) ժողովրդական դատարանների դատավորների նկատմամբ` արդարադատության նախարարը:

Դատավորի կարգապահական պատասխանատվության հիմքերն են`

1) օրինականության խախտում թույլ տալը.

2) անփութության հետևանքով դատական աշխատանքում թերություններ ունենալը.

3) աշխատանքային կարգապահությունը խախտելը.

4) դատավորին անվայել արարք թույլ տալը:

Արդարադատության խորհուրդը դատավորին կարգապահական պատասխանատվության ենթարկելիս կարող է հայտարարել դիտողություն, նկատողություն, խիստ նկատողություն:

Եթե խորհուրդը դատավորին կարգապահական պատասխանատվության ենթարկելու հարցը քննելիս նպատակահարմար չի գտնում նրա նկատմամբ կիրառել կարգապահական տույժի միջոց, ապա կարող է կարճել հարուցված կարգապահական վարույթը և բավարարվել հարցի քննարկմամբ:

Դատավորին պատասխանատվության ենթարկելու հարցերը քննելիս խորհրդի նիստերը վարում է վճռաբեկ դատարանի (մինչև դատական նոր համակարգի կազմավորումը` գերագույն դատարանի) նախագահը: Հանրապետության Նախագահը, արդարադատության նախարարը և գլխավոր դատախազը այդ նիստերին չեն մասնակցում:

Դատավորի կարգապահական պատասխանատվության հարցը քննելիս արդարադատության խորհուրդը հրավիրում և լսում է դատավորին:

(20-րդ հոդվածը լրաց. 11.09.01 ՀՕ-220)

Հոդված 21. Հանրապետության Նախագահի հարցմամբ արդարադատության խորհուրդը կարծիք է հայտնում ներման հարցերի վերաբերյալ:

Ներման հարցերի կապակցությամբ, մինչև եզրակացության ընդունումը, խորհուրդը լսում է արդարադատության նախարարին և գլխավոր դատախազին:

Հոդված 22. Արդարադատության խորհուրդը պետական մարմիններից, հասարակական կազմակերպություններից, պաշտոնատար անձանցից և քաղաքացիներից Սահմանադրությամբ սահմանված իր լիազորությունների իրականացման համար անհրաժեշտ տեղեկություններ, այդ թվում դատական, դատախազական և քննչական մարմիններից նյութեր, վարչական, քրեական, քաղաքացիական գործեր, տեղեկանքներ և այլ փաստաթղթեր ստանալու իրավունք ունի:

ԳԼՈՒԽ 5

ԱՐԴԱՐԱԴԱՏՈՒԹՅԱՆ ԽՈՐՀՐԴԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ, ԽՈՐՀՐԴԻ ԱԿՏԵՐԸ

Հոդված 23. Խորհրդի նիստերը հրավիրում է խորհրդի նախագահը:

Խորհրդի նիստերը վարում է խորհրդի նախագահը կամ նրա հանձնարարությամբ` արդարադատության նախարարը կամ գլխավոր դատախազը:

Եթե խորհրդի նախագահը ներկա չէ խորհրդի նիստին, ապա դատավորներին առնչվող հարցերը քննելիս նիստը վարում է արդարադատության նախարարը, իսկ դատախազներին առնչվող հարցերը քննելիս` գլխավոր դատախազը:

Հոդված 24. Խորհրդի նիստը իրավազոր է, եթե նիստին մասնակցում են խորհրդի անդամների ընդհանուր թվի կեսից ավելին:

Հոդված 25. Խորհուրդը սույն օրենքի 13, 14, 20 հոդվածներով նախատեսված լիազորություններն իրականացնելիս ընդունում է որոշումներ, իսկ սույն օրենքի 15, 16, 17, 18, 19, 21 հոդվածներով նախատեսված լիազորություններն իրականացնելիս` եզրակացություններ:

Հոդված 26. Խորհրդի որոշումներն ու եզրակացություններն ընդունվում են նիստի մասնակիցների ձայների մեծամասնությամբ:

Խորհրդի որոշումները կարող են վերանայվել միայն խորհրդի կողմից:

Խորհրդի եզրակացությունները խորհրդատվական բնույթ ունեն:

Եթե մեկ տեղում առաջադրվելու համար դատավորի մեկից ավելի թեկնածուներ ստացել են հավանության համար անհրաժեշտ թվով ձայներ, ապա առաջադրված է համարվում առավել ձայներ ստացած թեկնածուն: