ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2000 թվականի դեկտեմբերի 30-ին

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 2001 ԹՎԱԿԱՆԻ ՊԵՏԱԿԱՆ ԲՅՈՒՋԵԻ ՄԱՍԻՆ

Հոդված 1. Ընդունել ի գիտություն, որ`

1. Հայաստանի Հանրապետության 2001 թվականի համախմբված բյուջեն կկազմի`

ա) եկամուտների (առանց միջբյուջետային փոխանցումներից ստացվող մուտքերի) գծով` 232.5 մլրդ դրամ.

բ) ծախսերի (առանց միջբյուջետային փոխանցումների) գծով` 286.3 մլրդ դրամ.

գ) դեֆիցիտը` 53.8 մլրդ դրամ:

2. Հայաստանի Հանրապետության սոցիալական ապահովագրության պետական հիմնադրամի 2001 թվականի բյուջեն կկազմի`

ա) եկամուտների (ներառյալ` անմիջապես պետական բյուջեից տրանսֆերտների տեսքով, ինչպես նաև պետական բյուջեով և համայնքների բյուջեներով պահպանվող հիմնարկներից պարտադիր սոցիալական ապահովագրության վճարների տեսքով ստացվող մուտքերը) գծով` 45.1 մլրդ դրամ.

բ) ծախսերի գծով` 45.1 մլրդ դրամ:

3. Հայաստանի Հանրապետության համայնքների 2001 թվականի բյուջեները կկազմեն`

ա) եկամուտների (ներառյալ` պետական բյուջեից ստացվող պաշտոնական տրանսֆերտները) գծով` 18.1 մլրդ դրամ.

բ) ծախսերի գծով` 18.1 մլրդ դրամ:

Հոդված 2. Հաստատել Հայաստանի Հանրապետության 2001 թվականի պետական բյուջեն`

հազար դրամով

Հոդված 3. Հայաստանի Հանրապետության 2001 թվականի պետական բյուջեի դեֆիցիտի ծածկմանն ուղղել հետևյալ միջոցները`

հազար դրամով

Հոդված 4. Հայաստանի Հանրապետության կենտրոնական բանկին` օրենքով վերապահված իրավասության սահմաններում ձեռնարկել միջոցներ 2001 թվականի դեկտեմբերի 31-ի դրությամբ սղաճի չափը 2000 թվականի նույն ժամանակաշրջանի համեմատ մինչև 3.5 տոկոս պահելու ուղղությամբ:

Հոդված 5. Սահմանել, որ`

ա) 2002 թվականի հունվարի 1-ի դրությամբ Հայաստանի Հանրապետության կենտրոնական բանկի և Հայաստանի Հանրապետության կառավարության փոխադարձ զուտ պարտավորությունների տարեկան չափաքանակը կազմելու է մինչև 8,350.0 մլն դրամ: Պարտավորությունների նշված սահմանաքանակը կարող է գերազանցվել միայն եռամսյակների ընթացքում` եռամսյակի վերջում պահպանելով 8,350.0 մլն դրամի մակարդակը: Ընդ որում` Հայաստանի Հանրապետության կենտրոնական բանկի նկատմամբ Հայաստանի Հանրապետության կառավարության պարտավորությունների գերազանցումը եռամսյակի ընթացքում չի կարող լինել ավելի, քան եռամսյակի սկզբից մինչև տվյալ պահը հավաքագրված աճողական հարկային եկամուտների 10 տոկոսը.

բ) Հայաստանի Հանրապետության կենտրոնական բանկի նկատմամբ Հայաստանի Հանրապետության կառավարության պարտավորությունները որոշվում են Հայաստանի Հանրապետության կենտրոնական բանկի հաշվեկշռի ստորև ներկայացվող պահանջների և պարտավորությունների տարբերությամբ`

բա) Հայաստանի Հանրապետության կենտրոնական բանկի պահանջները Հայաստանի Հանրապետության կառավարության նկատմամբ.

- Հայաստանի Հանրապետության կառավարությանը տրված վարկեր,

- Հայաստանի Հանրապետության պետական արժեթղթեր.

բբ) Հայաստանի Հանրապետության կենտրոնական բանկի պարտավորությունները Հայաստանի Հանրապետության կառավարության նկատմամբ`

- Հայաստանի Հանրապետության կառավարության հաշիվներ,

- Հայաստանի Հանրապետության կառավարության մարդասիրական օգնության հաշիվներ,

- ծրագրերի իրագործման գրասենյակների հաշիվներ,

- Հայաստանի Հանրապետությանը կառավարության ցպահանջ ավանդներ,

- Հայաստանի Հանրապետության կառավարության ժամկետային ավանդներ,

- Հայաստանի Հանրապետության սոցիալական ապահովագրության պետական հիմնադրամի հաշիվ.

գ) միջազգային ֆինանսական կազմակերպությունների աջակցությամբ նպատակային վարկային ծրագրերի իրականացման գրասենյակների բոլոր հաշիվները, Հայաստանի Հանրապետության կողմից կնքված միջազգային պայմանագրերի շրջանակներում, տեղափոխվում են առևտրային բանկերից կենտրոնական գանձապետարան և սպասարկվում են մեկ հաշվով:

Հոդված 6. Հաստատել Հայաստանի Հանրապետության 2001 թվականի պետական բյուջեի եկամուտները, ըստ առանձին եկամտատեսակների, հետևյալ չափերով`

հազար դրամով

Հոդված 7. Հաստատել Հայաստանի Հանրապետության 2001 թվականի պետական բյուջեից հատկացումները, բացառությամբ պետական ձեռնարկությունների և անավարտ շինարարության օբյեկտների սեփականաշնորհումից ստացված միջոցների հաշվին իրականացվող հատկացումների, ըստ բյուջետային ծախսերի գործառական դասակարգման, հետևյալ չափերով`

հազար դրամով

Հոդված 8. Հաստատել սույն օրենքի 7 հոդվածով սահմանված բյուջետային հատկացումների հաշվին ֆինանսավորվող ծախսատեսակները, ըստ բյուջետային ծախսերի տնտեսագիտական դասակարգման, հետևյալ չափերով`

հազար դրամով

Հոդված 9. Հաստատել`

ա) սույն օրենքի 7 հոդվածով սահմանված բյուջետային հատկացումների բաշխումը, ըստ Հայաստանի Հանրապետության օրենսդիր, գործադիր և դատական իշխանության մարմինների` սույն օրենքի N 1 հավելվածի համաձայն.

բ) Հայաստանի Հանրապետության 2001 թվականի պետական բյուջեից համայնքների բյուջեներին «Ֆինանսական համահարթեցման մասին» Հայաստանի Հանրապետության օրենքով տրամադրվող հատկացումների` ըստ գործոնների բաշխման ենթակա հետևյալ ընդհանուր ծավալները`

- «ա» գործոնով և 300-ից ոչ ավելի բնակիչ ունեցող համայնքներին տրամադրվող դոտացիայի ընդհանուր գումարը` 5,757,146.3 հազար դրամ, որից 300-ից ոչ ավելի բնակիչ ունեցող յուրաքանչյուր համայնքին տրամադրվող դոտացիայի տարեկան գումարը` 1500.0 հազար դրամ,

- «բ» գործոնով տրամադրվող դոտացիայի ընդհանուր գումարը` 1,884,659.9 հազար դրամ:

Սահմանել, որ համայնքների բյուջեներին տրամադրվող ֆինանսական համահարթեցման դոտացիաների գծով սույն օրենքով նախատեսված հատկացումների ընդհանուր գումարի` ըստ համայնքների բյուջեների բաշխման նպատակով «Ֆինանսական համահարթեցման մասին» Հայաստանի Հանրապետության օրենքի 6 հոդվածի 5-րդ կետով սահմանված կարգով իրականացվող հաշվարկներում օգտագործվում են համայնքների բյուջեներին 2000 թվականին տրամադրվող ֆինանսական համահարթեցման դոտացիաների հաշվարկներում կիրառված գույքահարկի տվյալները.

գ) Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի 2001 թվականի ծախսերի նախահաշիվը` 1,561,833.7 հազար դրամ գումարով (սույն օրենքի N 2 հավելվածի համաձայն).

դ) Հայաստանի Հանրապետության կենտրոնական բանկի 2001 թվականի`

- ծախսերի նախահաշիվը` 9,992,090.0 հազար դրամ գումարով (սույն օրենքի N 3 հավելվածի համաձայն), որից վարչական ծախսերը` 1,732,075.0 հազար դրամ,

- կապիտալ ներդրումների առավելագույն սահմանաքանակը` 1,266,881.0 հազար դրամ.

ե) Հայաստանի Հանրապետության 2001 թվականի պետական բյուջեից համայնքների բյուջեներին «Ֆինանսական համահարթեցման մասին» Հայաստանի Հանրապետության օրենքով դոտացիաներ տրամադրելու համար նախատեսված հատկացումների ընդհանուր ծավալի բաշխումն ըստ առանձին համայնքների` սույն օրենքի N 4 հավելվածի համաձայն.

զ) պետական ձեռնարկությունների և անավարտ շինարարության օբյեկտների սեփականաշնորհումից առաջացած միջոցների հաշվին 2001 թվականին ֆինանսավորման ենթակա ծախսերի ցանկը` սույն օրենքի N 5 հավելվածի համաձայն.

է) կառավարության երաշխիքներով 2001 թվականի բյուջետային տարում էլեկտրաէներգիայի անընդհատ և անխափան մատակարարում պահանջող առավել կարևոր նշանակության սպառողների ցանկը` սույն օրենքի N 6 հավելվածի համաձայն.

ը) պետական ձեռնարկությունների և անավարտ շինարարության օբյեկտների սեփականաշնորհումից առաջացած, ինչպես նաև Հայաստանի Հանրապետության 2001 թվականի պետական բյուջեի միջոցների հաշվին 2001 թվականին աղետի գոտում ֆինանսավորման ենթակա ծախսերի ծրագիր` սույն օրենքի N 7 հավելվածի համաձայն.

թ) սույն օրենքի 7 հոդվածով և սույն հոդվածի «զ» կետով սահմանված բյուջետային հատկացումների հաշվին պետության կարիքների համար իրականացվող գնումների անվանացանկը, ըստ բյուջետային ծախսերի գերատեսչական դասակարգման` սույն օրենքի N 8 հավելվածի համաձայն:

Հոդված 10. Սահմանել, որ

 ա) Հայաստանի Հանրապետության 2001 թվականի պետական բյուջեից ծախսերի ֆինանսավորումը, սույն օրենքով նախատեսված մուտքերի թերակատարման պայմաններում, կատարվում է փաստացի ստացված մուտքերի սահմաններում` պահպանելով ծախսերի` սույն օրենքի 7 և 8 հոդվածներում նախատեսված համամասնությունները և հաշվի առնելով սույն հոդվածի «բ» կետում և 12 հոդվածում ամրագրված դրույթները.

բ) բյուջետային ծախսերի տնտեսագիտական դասակարգմամբ նախատեսված հոդվածների միջև «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 23 հոդվածի 2-րդ կետի համապատասխան կատարվող վերաբաշխումները յուրաքանչյուր ծրագրի համար չեն կարող գերազանցել վերջինիս գծով սույն օրենքով հաստատված հատկացումների ընդհանուր ծավալի 15 տոկոսը.

գ) «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 28 հոդվածի 3-րդ կետի առաջին մասի 1.1 կետի «ե» և «զ» ենթակետերով թվարկված Երևան քաղաքի տարածքում գոյացող եկամտատեսակները 2001 թվականին (մինչև Երևան քաղաքի կարգավիճակի մասին օրենքի ընդունումը) 100 տոկոսով ուղղվում են Երևան քաղաքի համաքաղաքային նշանակության ծախսերի ֆինանսավորմանը.

դ) 2002 թվականի հունվար ամսվա ընթացքում Հայաստանի Հանրապետության կառավարությունը չի շարունակի 2001 թվականի բյուջետային տարվա պարտավորությունների գծով գործառնությունների ձևակերպումների իրականացումը.

ե) 2001 թվականի ընթացքում պետական ձեռնարկությունների և անավարտ շինարարության օբյեկտների սեփականաշնորհումից ստացված միջոցները կուտակվում են Հայաստանի Հանրապետության կենտրոնական բանկում` գանձապետական հատուկ հաշվում.

զ) Հայաստանի Հանրապետության կառավարությունը սույն օրենքի ուժի մեջ մտնելուց հետո 30 օրացուցային օրվա ընթացքում սահմանում է 2001 թվականի պետական բյուջեի կատարման եռամսյակային համամասնությունները, իսկ 60 օրացուցային օրվա ընթացքում` սույն օրենքի 7 հոդվածով և 9 հոդվածի «զ» կետով սահմանված բյուջետային հատկացումների հաշվին, «Գնումների մասին» Հայաստանի Հանրապետության օրենքի համաձայն, բաց մրցույթով` կենտրոնացված գնման ենթակա ապրանքների, աշխատանքների և ծառայությունների անվանացանկը` ըստ այդ գնումներն իրականացնելու նպատակով կնքվելիք պայմանագրերի առարկաների:

Սույն օրենքով սահմանված բյուջետային հատկացումների հաշվին կենտրոնացված գնումներ իրականացվում են սույն կետով նախատեսված անվանացանկի հաստատման օրվան հաջորդող 10-րդ օրվանից սկսած.

է) կրթական, սոցիալ-մշակութային կամ այլ ոչ առևտրային` բացառությամբ կառավարչական բնույթի գործունեություն իրականացնելու նպատակով Հայաստանի Հանրապետության և համայնքների ստեղծած պետական հիմնարկները, մինչև 2001 թվականի հուլիսի 1-ը լուծարվում են և դրանց գործառույթները կատարելու նպատակով օրենսդրությամբ սահմանված կարգով ստեղծվում են իրավաբանական անձի կարգավիճակ ունեցող առևտրային և ոչ առևտրային կազմակերպություններ: Սույն կետում նշված պետական հիմնարկների լուծարման և նոր ստեղծվող իրավաբանական անձանց գրանցման հետ կապված ծախսերը ֆինանսավորվում են այդ հիմնարկների պահպանման ծախսերը ֆինանսավորելու նպատակով նախատեսված հատկացումների հաշվին.

ը) սույն հոդվածի համաձայն ստեղծվող անձանց սեփականության կամ այլ օգտագործման (անհատույց կամ հատուցելի) իրավունքով հանձնվող պետական գույքի տեսակները հաստատում է Հայաստանի Հանրապետության կառավարությունը, իսկ համայնքի սեփականություն հանդիսացող գույքի տեսակները` համայնքի ավագանին.

թ) սույն հոդվածի համաձայն ստեղծված իրավաբանական անձանց 2001 թվականի հուլիսի 1-ից Հայաստանի Հանրապետության համապատասխան բյուջեներից ֆինանսավորում հատկացվում է պայմանագրային հիմունքներով` որպես սուբսիդիա, օգտագործման հանձնված գույքի պահպանության ծախս և (կամ) այդ անձանցից կատարված գնումների դիմաց ֆինանսավորում: Սույն կետում նշված կազմակերպություններին հատկացվող սուբսիդիաների հաշվարկման կարգը, ըստ բնագավառների, սահմանում է Հայաստանի Հանրապետության կառավարությունը.

ժ) մինչև 2001 թվականի ապրիլի 1-ը Հայաստանի Հանրապետության կառավարությունը ներկայացնում է «Կրթության մասին» Հայաստանի Հանրապետության օրենքում փոփոխություն կատարելու վերաբերյալ առաջարկություն` պետական ուսումնական հաստատության կազմակերպական իրավական տեսակը սույն օրենքին համապատասխանեցնելու վերաբերյալ.

ժա) Լեռնային Ղարաբաղի Հանրապետությանը սույն օրենքով նախատեսված բյուջետային վարկը տրամադրվում է մինչև 2005 թվականի հունվարի 1-ը մարման ժամկետով` տարեկան 0.01 տոկոս տոկոսադրույքով.

ժբ) դեղամիջոցներից և դեղանյութերից գանձվող ավելացված արժեքի հարկի գումարները կուտակվում են գանձապետական առանձին հաշվում, և մինչև 2001 թվականի ապրիլի 1-ը Հայաստանի Հանրապետության կառավարությունը Հայաստանի Հանրապետության Ազգային ժողով է ներկայացնում առաջարկություն` դեղամիջոցներից և դեղանյութերից գանձվող ավելացված արժեքի հարկի գումարների ծախսման ուղղությունների վերաբերյալ:

Հոդված 11. Սահմանել, որ Հայաստանի Հանրապետության պետական եկամուտների նախարարության նյութական խրախուսման և սոցիալական զարգացման ֆոնդը ձևավորվում է`
 

ա) Հայաստանի Հանրապետության պետական եկամուտների նախարարության կողմից ձեռնարկություններում, կազմակերպություններում, անհատ ձեռնարկատերերի (ձեռներեցների) մոտ Հայաստանի Հանրապետության օրենսդրությամբ սահմանված կարգով իրականացված ստուգումներով և վերստուգումներով` հարկերը և պարտադիր այլ վճարները թաքցնելու համար գանձված գումարներից 10 տոկոս մասհանումների հաշվին.

բ) Հայաստանի Հանրապետության մաքսային օրենսդրությունը կարգավորող իրավական ակտերով սահմանված կարգով գանձված մաքսավճարի հաշվին:

Ֆոնդի գումարների օգտագործման ուղղությունները հաստատում է Հայաստանի Հանրապետության ֆինանսների և էկոնոմիկայի նախարարությունը` տարեկան ծախսերի նախահաշվի ձևով:

Ֆոնդի միջոցները` Հայաստանի Հանրապետության ֆինանսների և էկոնոմիկայի նախարարություն ներկայացվող ամենամսյա հաշվետվության հիման վրա, ձևակերպվում են որպես պետական բյուջեի համապատասխան եկամուտ և Հայաստանի Հանրապետության պետական եկամուտների նախարարության ընթացիկ ու կապիտալ ծախսերի հոդվածներում` որպես պետական բյուջեի համապատասխան ծախս:

Հոդված 12. Թույլատրել Հայաստանի Հանրապետության կառավարությանը 2001 թվականին, անհրաժեշտության դեպքում`
 

ա) սույն օրենքի 2 հոդվածով հաստատված հատկացումների ընդհանուր գումարի 3 տոկոսի սահմաններում վերաբաշխել դրանք` ըստ սույն օրենքի 7 հոդվածով և 9 հոդվածի «զ» կետով հաստատված բյուջետային ծախսերի գործառական դասակարգման առանձին խմբերի և ենթախմբերի, ինչպես նաև ենթախմբերի ներսում` այն պայմանով, որ թույլ չտրվի սույն օրենքով յուրաքանչյուր ենթախմբի գծով նախատեսված հատկացումների ծավալի կրճատում` 15 տոկոսի, կամ ավելացում` 30 տոկոսի չափով.

բ) նախորդ բյուջետային տարիների արդյունքներով առաջացած բյուջետային պարտքերի մարմանը, սույն օրենքով նախատեսվածի դիմաց, առաջնահերթ կարգով լրացուցիչ ուղղել Հայաստանի Հանրապետության 2001 թվականի պետական բյուջեի կատարման ընթացքում` սույն օրենքով սահմանված.

բա) բյուջետային մուտքերի ընդհանուր գումարը գերազանցած` փաստացի ստացված մուտքերի գումարը (բացառությամբ համապատասխան ծախսային ծրագրերի իրականացման նպատակով ստացված նպատակային մուտքերի).

բբ) բյուջետային ծախսերի (ներառյալ պետական պարտքի մարման) բնագավառում առաջացած խնայողությունները (բացառությամբ սույն օրենքի N 5 հավելվածով սահմանված ծախսերի և սույն հոդվածի «ա» կետում նշված դեպքերի).

գ) փոխել սույն օրենքի N 1 հավելվածով սահմանված ծախսային ծրագրեր իրականացնող Հայաստանի Հանրապետության գործադիր իշխանության մարմինները.

դ) Հայաստանի Հանրապետության պետական կառավարման մարմինների կողմից օրենսդրությամբ սահմանված հիմքերով հայցադիմումներ, դատարանի վճիռների և որոշումների դեմ վերաքննիչ և վճռաբեկ բողոքներ ներկայացնելիս` «Պետական տուրքի մասին» Հայաստանի Հանրապետության օրենքով սահմանված վճարումներն իրականացնել Հայաստանի Հանրապետության պետական բյուջեից` առանց սահմանափակման, դրանց գծով կատարված ծախսերը և ստացված եկամուտներն առանձնացված արտահայտելով Հայաստանի Հանրապետության 2001 թվականի պետական բյուջեի կատարման մասին հաշվետվություններում.

ե) «Հայաստանի Հանրապետության 2000 թվականի պետական բյուջեի մասին» Հայաստանի Հանրապետության օրենքի N 5 հավելվածով սահմանված` պետական ձեռնարկությունների և անավարտ շինարարության օբյեկտների սեփականաշնորհումից ստացված միջոցների հաշվին ֆինանսավորվող ծրագրերի գծով հիշյալ օրենքով նախատեսված հատկացումների` 2001 թվականի հունվարի 1-ի դրությամբ չիրացված մնացորդի սահմաններում 2001 թվականի բյուջետային տարում շարունակել դրանց ֆինանսավորումը նույն աղբյուրից և նշված միջոցների հաշվին կատարված ծախսերն առանձնացված արտահայտել Հայաստանի Հանրապետության 2001 թվականի պետական բյուջեի կատարման մասին հաշվետվություններում.

զ) մինչև սույն օրենքի 10 հոդվածի «զ» կետով սահմանված անվանացանկի հաստատումը փոփոխել սույն օրենքի N 8 հավելվածով հաստատված անվանացանկը, պահպանելով սույն օրենքի 10 հոդվածի «բ» և 12 հոդվածի «ա» կետերի պահանջները:

Հոդված 13. Թույլատրել Հայաստանի Հանրապետության կենտրոնական բանկին`
 

ա) անհրաժեշտության դեպքում, վերաբաշխել սույն օրենքի 9 հոդվածի «դ» կետով հաստատված ծախսերի նախահաշվով սահմանված գործառնական և վարչական ծախսերն ըստ ենթահոդվածների, այն պայմանով, որ թույլ չտրվի գործառնական և վարչական ծախսերի գծով սույն օրենքով հաստատված սահմանաչափերի գերազանցում, ինչպես նաև գործառնական և վարչական ծախսերի յուրաքանչյուր ենթահոդվածի գծով նախատեսված ծախսերի կրճատում` 15 տոկոսի, կամ ավելացում` 30 տոկոսի չափով.

բ) բյուջետային վարկերի գծով առկա պարտավորությունների դիմաց սույն օրենքի համաձայն «Նաիրիտ» ԳԱ ՓԲԸ-ի լրացուցիչ տեղաբաշխված բաժնետոմսերի պետական բաժնեմասի ձեռքբերման գործարքի իրականացմանն աջակցելու նպատակով Հայաստանի Հանրապետության կառավարությանը մեկ օրով տրամադրել 12.5 մլրդ դրամ անտոկոս վարկ, այն հաշվի չառնելով կենտրոնական բանկի նկատմամբ կառավարության պարտավորությունների հաշվարկներում:

Հոդված 14. Հայաստանի Հանրապետության կառավարությանը և Հայաստանի Հանրապետության կենտրոնական բանկին` Հայաստանի Հանրապետության կենտրոնական բանկի կողմից բյուջետային տարվա ընթացքում ուղղակի վարկավորմամբ Հայաստանի Հանրապետության պետական բյուջեի դեֆիցիտի ֆինանսավորում չի իրականացվում: Սույն օրենքի 5 հոդվածի «ա» կետով նախատեսված չափաքանակով Հայաստանի Հանրապետության բանկի կողմից Հայաստանի Հանրապետության պետական բյուջեի դեֆիցիտի ֆինանսավորումը բյուջետային տարվա ընթացքում կարող է իրականացվել բացառապես «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 10 հոդվածով սահմանված` ֆինանսական շուկայում պետական արժեթղթերի ձեռքբերման և օտարման միջոցով:

Հոդված 15. Սույն օրենքի NN 1-8 հավելվածները համարվում են օրենքի անբաժանելի մասերը:

Հոդված 16. Սույն օրենքն ուժի մեջ է մտնում հրապարակման պահից: