ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

24 հուլիսի 1992 թվականի N 416

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱՍԱՀՄԱՆ ՄԵԿՆՈՂ ՔԱՂԱՔԱՑԻՆԵՐԻ ՀԱՄԱՔԱՂԱՔԱՑԻԱԿԱՆ ԱՐՏԱՍԱՀՄԱՆՅԱՆ ԱՆՁՆԱԳՐԵՐԻ ՁԵՎԱԿԵՐՊՄԱՆ ԺԱՄԱՆԱԿԱՎՈՐ ԿԱՐԳԻ ՄԱՍԻՆ

Հայաստանի Հանրապետության կառավարությունը որոշում է`

1. Մինչև Հայաստանի Հանրապետության քաղաքացիության մասին օրենսդրական ակտերի ընդունումը և Հայաստանի Հանրապետությունում անձնագրային նոր համակարգի անցնելը սահմանել Հայաստանի Հանրապետությունում համաքաղաքացիական արտասահմանյան անձնագրերի ձևակերպման հետևյալ ժամանակավոր կարգը`

ա) Հայաստանի Հանրապետության արտաքին գործերի նախարարությունը ստացված հրավերների և հիմնարկությունների ու ձեռնարկությունների գրավոր դիմումների հիման վրա գործուղումներ ձևակերպելիս համաքաղաքացիական արտասահմանյան անձնագրերում կատարում է «բազմակի» ելքի թույլտվության նշում` մինչև 1993 թվականի հուլիսի 1-ը, չգրանցելով երկրի անունը, այցելության նպատակը և ժամկետը.

բ) Հայաստանի Հանրապետության ներքին գործերի նախարարությունը զբոսաշրջության (տուրիստական) և անհատական այցերի ձևակերպման ժամանակ համաքաղաքացիական արտասահմանյան անձնագրերում կատարում է «բազմակի» ելքի թույլտվության նշում` մինչև 1993 թվականի հուլիսի 1-ը, չգրանցելով երկրի անունը, այցելության նպատակը և ժամկետը:

2. Հայաստանի Հանրապետության արտաքին գործերի նախարարությանը` սույն որոշման մասին տեղյակ պահել նախկին ԽՍՀՄ հանրապետություններում գտնվող օտարերկրյա պետությունների դիվանագիտական և հյուպատոսական ներկայացուցչություններին, սահմանային ծառայություններին:

3. Հաստատել արտասահմանյան գործուղման մեկնող քաղաքացիների համաքաղաքացիական արտասահմանյան անձնագրերի և այլ փաստաթղթերի ձևակերպման հետ կապված ծառայությունների սակագները, կամաձայն հավելվածի:

Որակավորման բարձրացման, վերապատրաստման և փոխանակման կարգով արտասահման մեկնող ուսանողների և ասպիրանտների նկատմամբ նշված սակագները կիրառվում են 50 տոկոս զեղչով:

4. Համաքաղաքացիական արտասահմանյան անձնագրերի և այլ փաստաթղթերի ձևակերպման հետ կապված ծառայությունների համար վճարվող գումարները գանձվում են Հայաստանի Հանրապետության բյուջե:

5. Ուժը կորցրած ճանաչել Հայաստանի Հանրապետության Նախարարների խորհրդի 1991 թվականի օգոստոսի 20-ի «ԽՍՀՄ Նախարարների խորհրդի 1991 թվականի հունվարի 2-ի «Աշխատողների արտասահմանյան գործուղումների փաստաթղթերի ձևակերպման հետ կապված ծառայությունների վճարման կարգի մասին» N 7 որոշումը» N 524 որոշման 5-րդ կետը: 

Ս Ա Կ Ա Գ Ն Ե Ր

ԱՐՏԱՍԱՀՄԱՆՅԱՆ ԳՈՐԾՈՒՂՄԱՆ ՄԵԿՆՈՂ ՔԱՂԱՔԱՑԻՆԵՐԻ ՀԱՄԱՔԱՂԱՔԱՑԻԱԿԱՆ ԱՐՏԱՍԱՀՄԱՆՅԱՆ ԱՆՁՆԱԳՐԵՐԻ ԵՎ ԱՅԼ ՓԱՍՏԱԹՂԹԵՐԻ ՁԵՎԱԿԵՐՊՄԱՆ ՀԵՏ ԿԱՊՎԱԾ ԾԱՌԱՅՈՒԹՅՈՒՆՆԵՐԻ