ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

24 նոյեմբերի 2016 թվականի N 1228-Ն

«Ավելացված արժեքի հարկի մասին» Հայաստանի Հանրապետության օրենքի 7-րդ հոդվածի 2-րդ կետին, «Հայաստանի Հանրապետության 2016 թվականի պետական բյուջեի մասին» Հայաստանի Հանրապետության օրենքի 11-րդ հոդվածի 16-րդ մասին համապատասխան` Հայաստանի Հանրապետության կառավարությունը որոշում է.

1. «Հայաստանի Հանրապետության 2016 թվականի պետական բյուջեի մասին» Հայաստանի Հանրապետության օրենքում և Հայաստանի Հանրապետության կառավարության 2015 թվականի դեկտեմբերի 24-ի «Հայաստանի Հանրապետության 2016 թվականի պետական բյուջեի կատարումն ապահովող միջոցառումների մասին» N 1555-Ն որոշման մեջ կատարել փոփոխություններ և լրացումներ՝ համաձայն NN 1, 2 և 3 հավելվածների:

2. Թույլատրել Հայաստանի Հանրապետության կառավարությանն առընթեր պետական գույքի կառավարման վարչությանը կնքել սույն որոշման N 4 հավելվածում ներառված ընկերությունների (այսուհետ՝ ընկերություններ) 100 տոկոս բաժնեմասերի առուվաճառքի պայմանագրեր՝ հետևյալ հիմնական պայմաններով՝

1) բաժնեմասերի նկատմամբ սեփականության իրավունքը փոխանցվում է Հայաստանի Հանրապետությանը պայմանագրի կնքումից և ռեգիստրում մասնակիցների գրանցամատյանում փոփոխությունների կատարման պահից.

2) բաժնեմասերի 100 տոկոսի ընդհանուր գինը կազմում է 3.356.000 ԱՄՆ-ի դոլարին համարժեք դրամ (ըստ վճարումների կատարման օրվա դրությամբ Հայաստանի Հանրապետության կենտրոնական բանկի հայտարարած ԱՄՆ-ի դոլարի վաճառքի փոխարժեքի), նվազեցրած ընկերությունների վճարային պարտավորությունները, եթե այդպիսիք լինեն.

3) վաճառքի գինը վճարվում է պայմանագրի կնքումից և բաժնեմասերի հանձնում-ընդունումից հետո 10 բանկային օրվա ընթացքում.

4) պայմանագրի կնքման օրվան հաջորդող օրվա դրությամբ ընկերության ակտիվների կազմում պետք է առկա լինի առնվազն 300.000 դրամ դրամական միջոցներ բանկային հաշվում, դադարեցված և վերջնահաշվարկը ավարտված պետք է լինեն ընկերությունների գովազդային, հաշվապահական, իրավաբանական և այլ խորհրդատվական ծառայությունների, ջրամատակարարման, էլեկտրաէներգիայի, գազի, հեռախոսակապի, ինտերնետի և ապագայում ֆինանսական պարտավորություն առաջացնող ցանկացած երրորդ անձի հետ ընկերությունների առկա բոլոր պայմանագրերը.

5) ընկերությունների բաժնեմասերի սեփականատերերը պատասխանատվություն են կրում ընկերության բաժնեմասի վաճառքից հետո ի հայտ եկած՝ ընկերությունների ցանկացած վճարային պարտավորության համար, որը մինչև բաժնեմասի փոխանցումն առաջացել է ընկերությունների գործունեությունից.

6) բաժնեմասերի առուվաճառքի պայմանագրից ծագող իրավունքի գրանցման ծախսերը կրում է վաճառող կողմը:

 3. Հայաստանի Հանրապետությունը հավաստիացնում է վաճառողներին, որ ընկերությունների կանոնադրական կապիտալների 100 տոկոսի սեփականատեր ֆիզիկական անձ մասնակիցների կողմից բաժնեմասերի օտարումն ավելացված արժեքի հարկով հարկվող օբյեկտ չէ՝ համաձայն «Ավելացված արժեքի հարկի մասին» Հայաստանի Հանրապետության օրենքի 7-րդ հոդվածի 4-րդ կետի, իսկ բաժնեմասերի օտարումից մասնակիցների ստացված եկամուտներն ազատված են եկամտային հարկից՝ համաձայն «Եկամտային հարկի մասին» Հայաստանի Հանրապետության օրենքի 7-րդ հոդվածի, ըստ այդմ, գնորդ Հայաստանի Հանրապետության մոտ առկա չէ գնի վճարումներից եկամտային հարկի պահման հարկային գործակալի պարտավորություն:

4. Հայաստանի Հանրապետության կառավարությանն առընթեր պետական գույքի կառավարման վարչության պետին՝ ընկերությունների կանոնադրական կապիտալների 100 տոկոսի նկատմամբ պետության սեփականության իրավունքի գրանցումից հետո ապահովել յուրաքանչյուր ընկերության և 100 տոկոս պետական մասնակցությամբ «Սալսա Դիվելոփմենթ» փակ բաժնետիրական ընկերության միջև կնքված անշարժ գույքի առուվաճառքի նախնական պայմանագրի լուծումը և Հայաստանի Հանրապետության օրենսդրությամբ սահմանված կարգով լուծարել այդ ընկերությունները:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: