ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

29 դեկտեմբերի 2011 թվականի N 1864-Ն

ՊԵՏԱԿԱՆ ՆՊԱՍՏՆԵՐԻ ՆՇԱՆԱԿՄԱՆ ԵՎ ՎՃԱՐՄԱՆ ԿԱՐԳԵՐԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՀՈՒՆՎԱՐԻ 12-Ի N 110-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Համաձայն «Պետական նպաստների մասին» Հայաստանի Հանրապետության օրենքի 20-րդ, 22-րդ և 24-րդ հոդվածների` Հայաստանի Հանրապետության կառավարությունը որոշում է.

1. Հաստատել`

1) ընտանեկան նպաստի և միանվագ դրամական օգնության նշանակման և վճարման կարգը` համաձայն N 1 հավելվածի.

2) երեխայի ծննդյան միանվագ նպաստի նշանակման և վճարման կարգը` համաձայն N 2 հավելվածի.

3) մինչև երկու տարեկան երեխայի խնամքի նպաստի նշանակման և վճարման կարգը` համաձայն N 3 հավելվածի.

4) երեխայի ծննդյան միանվագ նպաստի, ինչպես նաև մինչև երկու տարեկան երեխայի խնամքի նպաստի անկանխիկ վճարման կարգը` համաձայն N 4 հավելվածի:

2. Հայաստանի Հանրապետության աշխատանքի և սոցիալական հարցերի նախարարին` ապահովել երեխայի ծննդյան միանվագ նպաստի, ինչպես նաև մինչև երկու տարեկան երեխայի խնամքի նպաստի վճարման ծառայությունների մատուցման պայմանագիր կնքած բանկերի վերաբերյալ տեղեկատվությունը Հայաստանի Հանրապետության աշխատանքի և սոցիալական հարցերի նախարարության կայքէջում հրապարակելը:

3. Ուժը կորցրած ճանաչել Հայաստանի Հանրապետության կառավարության 2006 թվականի հունվարի 12-ի «Ընտանեկան նպաստի և միանվագ դրամական օգնության նշանակման և վճարման կարգը հաստատելու մասին» N 110-Ն որոշումը:

4. Սույն որոշումն ուժի մեջ է մտնում 2012 թվականի հունվարի 1-ից:

Կ Ա Ր Գ

ԸՆՏԱՆԵԿԱՆ ՆՊԱՍՏԻ ԵՎ ՄԻԱՆՎԱԳ ԴՐԱՄԱԿԱՆ ՕԳՆՈՒԹՅԱՆ ՆՇԱՆԱԿՄԱՆ ԵՎ ՎՃԱՐՄԱՆ

1. Սույն կարգով սահմանվում է ընտանեկան նպաստի (այսուհետ` նպաստ) և միանվագ դրամական օգնության (այսուհետ` միանվագ օգնություն) նշանակման և վճարման կարգը:

2. Նպաստի և միանվագ օգնության վճարումը կատարվում է Հայաստանի Հանրապետության պետական բյուջեից` համապատասխան սոցիալական ծառայություններ տրամադրող տարածքային մարմնին (այսուհետ` գործակալություն) այդ նպատակով հատկացված ֆինանսական միջոցների սահմանում:

3. Նպաստի և միանվագ օգնության համար ֆինանսական միջոցների չափերն ըստ գործակալությունների, հաշվի առած ընտանիքների անապահովության գնահատման կարգով որոշված աղքատ ընտանիքների թիվը, ընտանիքի անապահովության սահմանային մեծության միավորը, ընտանեկան նպաստի բազային մասը և ընտանիքի յուրաքանչյուր անչափահաս (մինչև 18 տարեկան) անդամին
տրվող հավելման չափերը, սահմանում է Հայաստանի Հանրապետության կառավարությունը:

4. Նպաստը նշանակվում է ընտանիքների անապահովության գնահատման համակարգում (այսուհետ՝ գնահատման համակարգ) հաշվառված` (փաստագրված) ընտանիքի անապահովության սահմանային մեծության միավորից բարձր միավոր ունեցող ընտանիքին` դիմելու ամսվան հաջորդող ամսվանից` մինչև նպաստի վճարման դադարեցման հիմքերի առաջացումը:

5. Նպաստ ստանալու համար ընտանիքի չափահաս անդամներից մեկը (այսուհետ` դիմող), ընտանիքի մյուս չափահաս անդամների համաձայնությամբ, դիմում է իր բնակության վայրի գործակալություն` ներկայացնելով դիմում-հայտարարագիր` համաձայն N 1 ձևի, և ընտանիքի անապահովության գնահատման համար անհրաժեշտ փաստաթղթերը: Դիմում-հայտարարագիրը լրացվում է 1 օրինակից` ինքնապատճենահանվող թղթի վրա:

6. Դիմում-հայտարարագիրը` անհրաժեշտ փաստաթղթերով, հաշվառվում է դիմում-հայտարարագրերի հաշվառման մատյանում` համաձայն N 2 ձևի:

7. Գործակալության աշխատողը տվյալ ընտանիքի համար կազմում է նպաստի և միանվագ օգնության նշանակման գործ (այսուհետ` նպաստի գործ)` համաձայն N 3 ձևի, որը պահպանում է գործակալությունը` Հայաստանի Հանրապետության օրենսդրությամբ սահմանված կարգով:

8. Նպաստի գործում պահպանվում են վերջին 5 տարիներին դիմողի ներկայացրած բոլոր փաստաթղթերը, իսկ դրանից հետո դիմելիս ներկայացրած փաստաթղթերի հիման վրա կազմվում է նպաստի նոր գործ:

9. Նպաստի նախորդ գործը պահպանվում է գործակալությունում` 5 տարի ժամկետով:

10. Գործակալության պետը, դիմում-հայտարարագիրը և անհրաժեշտ փաստաթղթերն ընդունելուց հետո 3 աշխատանքային օրվա ընթացքում առցանց հարցում է կատարում Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի տեղեկատվական բազա ընտանիքին (ըստ ընտանիքի անդամների) պատկանող (ամբողջ հանրապետությունում) հողամասի հողատեսքի, դրա կադաստրային զուտ եկամտի և հողատարածքի մակերեսի մասին տեղեկատվություն ստանալու նպատակով: Առցանց հարցման օրը համարվում է ընտանիքին (ըստ ընտանիքի անդամների) պատկանող (ամբողջ հանրապետությունում) հողամասի հողատեսքի, դրա կադաստրային զուտ եկամտի և հողատարածքի մակերեսի մասին տեղեկանքը ներկայացնելու օր:

11. Գործակալության պետը դիմում-հայտարարագիրը և անհրաժեշտ փաստաթղթերն ընդունելուց հետո 3 աշխատանքային օրվա ընթացքում առցանց հարցում է կատարում բնակչության պետական ռեգիստրի տեղեկատվական բազա դիմողի անունով` ընտանիքի գտնվելու վայրում (հասցեում, կացարանում) բնակչության պետական ռեգիստրում հաշվառված և (կամ) փաստացի բնակվող բոլոր անձանց մասին, իսկ համապատասխան հանգամանքների առկայության դեպքում` ժամկետային զինվորական ծառայության մեջ գտնվելու կամ քրեակատարողական հիմնարկում գտնվելու մասին տեղեկատվություն ստանալու նպատակով: Առցանց հարցման օրը համարվում է ընտանիքի կազմի որոշման համար տեղեկանքը ներկայացնելու օր:

12. Գործակալության աշխատողը ներկայացված փաստաթղթերը համեմատում է դիմում-հայտարարագրում նշված փաստաթղթերի ցանկի, ինչպես նաև բնօրինակների հետ, պատճենների վրա կատարում է գրառում «իսկականի հետ ճիշտ է» ու ստորագրում, դիմում-հայտարարագրի վրա նշում ստացման ամսաթիվը, ստորագրում և ընդունում է` դիմողին վերադարձնելով դիմում-հայտարարագրի ինքնապատճենահանվող օրինակը: Ջնջումներով, ուղղումներով կամ թերի լրացված փաստաթղթերը վերադարձվում են:

13. Գործակալության աշխատողները չեն կարող ներկայացված փաստաթղթերում ուղղում կատարել:

14. Եթե դիմում-հայտարարագրի հետ ներկայացվում են ոչ բոլոր անհրաժեշտ փաստաթղթերը, ապա գործակալության աշխատողը դիմում-հայտարարագրում կատարում է համապատասխան նշումներ և դիմում-հայտարարագրի ինքնապատճենահանվող օրինակը 3 օրվա ընթացքում վերադարձնում է դիմողին` տեղեկացնելով պակասող փաստաթղթերի ցանկի և դրանք սահմանված ժամկետում ներկայացնելու անհրաժեշտության մասին:

15. Գործակալության աշխատողը դիմում-հայտարարագիրն ընդունելիս` դիմողին ծանոթացնում է նպաստի և միանվագ օգնության նշանակման ու վճարման կարգին, ինչպես նաև դիմողի հետ ճշտում է ընտանիքի փաստացի կազմի ու բնակչության տեղական ռեգիստրում հաշվառված անձանց տվյալների համապատասխանությունը և դրանց անհամապատասխանության դեպքում դիմողին ուղղորդում է բնակչության տեղական ռեգիստր` նրան տրամադրելով խորհրդատվություն Հայաստանի Հանրապետության օրենսդրությամբ սահմանված` բնակչության պետական ռեգիստրում հաշվառման կարգի մասին:

16. Գործակալության աշխատողը տեղեկատվական բազա է մուտքագրում ներկայացված փաստաթղթերում առկա տեղեկատվությունը (այդ թվում` դիմում-հայտարարագրում լրացված ընտանիքի կազմի, ինչպես նաև հաշվարկված` ընտանիքի հողօգտագործումից ստացվող եկամտի մասին տվյալները)` մեկօրյա ժամկետում:

17. Գործակալության աշխատողը սույն կարգի 10-րդ կետով սահմանված կարգով ստացած տեղեկատվությունը համեմատում է դիմողի դիմում-հայտարարագրում ներառված տեղեկատվության հետ, անհամապատասխանության դեպքում դրանք մուտքագրում է տեղեկատվական բազա, իսկ տեղեկանքը եռօրյա ժամկետում տպում և ներկայացնում է գործակալության պետին` հաստատման, որը հաստատվելուց հետո տեղադրվում է նպաստի գործի մեջ:

18. Գործակալության տվյալ տարածքը սպասարկող աշխատողը դիմում-հայտարարագրում լրացված և սույն կարգի 10-րդ կետով սահմանված կարգով ստացված տեղեկանքում առկա տվյալների անհամապատասխանության հայտնաբերման դեպքում գրավոր տեղեկացնում է գործակալության պետին: Գործակալության պետը եռօրյա ժամկետում տվյալ ընտանիքի ընտանեկան նպաստի իրավունքը դիտարկում է «Պետական նպաստների մասին» Հայաստանի Հանրապետության օրենքի 19-րդ և 25-րդ հոդվածների համաձայն:

19. Գործակալության աշխատողը սույն կարգի 11-րդ կետով սահմանված կարգով ստացած տեղեկատվությունը համեմատում է դիմողի դիմում-հայտարարագրում ներառված տեղեկատվության հետ և եռօրյա ժամկետում`

1) դրանց համապատասխանության դեպքում տեղեկանքը տպում և ներկայացնում է գործակալության պետին` հաստատման, որը հաստատվելուց հետո տեղադրվում է նպաստի գործի մեջ.

2) դրանց անհամապատասխանության դեպքում դիմողին ուղղորդում է Հայաստանի Հանրապետության կառավարությանն առընթեր Հայաստանի Հանրապետության ոստիկանության բնակչության տեղական ռեգիստրը վարող տարածքային մարմին (այսուհետ` բնակչության տեղական ռեգիստր)` նրան տրամադրելով խորհրդատվություն Հայաստանի Հանրապետության օրենսդրությամբ սահմանված` բնակչության պետական ռեգիստրում հաշվառման կարգի մասին: Բնակչության տեղական ռեգիստրի տրամադրած տեղեկանքը համարվում է տրված սույն կարգի 11-րդ կետով սահմանված օրը, եթե այն գործակալություն է ներկայացվել առցանց հարցման օրվան հաջորդող 30 օրվա ընթացքում:

20. Ընտանիքը գնահատման համակարգում հաշվառելու (փաստագրելու), ինչպես նաև դրանից հետո ընտանիքի անապահովության միավորի փոփոխության դեպքերում, որը հանգեցնում է տվյալ ընտանիքի նպաստի իրավունք ձեռք բերելուն կամ իրավունքը կորցնելուն, կամ նպաստի չափի փոփոխության, գործակալության տվյալ տարածքն սպասարկող աշխատողը տպում է տեղեկատվական բազայում ձևավորված` տվյալ ընտանիքի սոցիալական անձնագրի առաջին էջը, որը պահպանվում է նպաստի գործում:

21. Գործակալության տվյալ տարածքը սպասարկող աշխատողն ընտանիքի դիմելուց հետո 25 օրվա ընթացքում կատարում է տնային այցելություն` անապահովության սահմանային մեծության միավորից բարձր անապահովության միավոր ունեցող ընտանիքի սոցիալ-տնտեսական պայմաններն ուսումնասիրելու նպատակով:

22. Գործակալության տվյալ տարածքը սպասարկող աշխատողը, տնային այցելության ժամանակ, դիմողի ներկայացրած փաստաթղթերում առկա տվյալների (ընտանիքի կազմ, անասնագլխաքանակ և անասնատեսակ) հետ անհամապատասխանությունների հայտնաբերման դեպքում գրավոր տեղեկացնում է գործակալության պետին: Գործակալության պետը եռօրյա ժամկետում դիմում է համապատասխան մարմին (պաշտոնատար անձին)` ճշտված տեղեկություն ստանալու համար:

23. Գործակալության տվյալ տարածքն սպասարկող աշխատողը տնային այցելության արձանագրությունը` եզրակացության ու նպաստ նշանակելու վերաբերյալ առաջարկության հետ միասին ներկայացնում է գործակալության պետին, որը բաժնի պետի կամ գլխավոր մասնագետի առաջարկության հիման վրա ընդունում է որոշում տվյալ ընտանիքին նպաստ նշանակելու մասին:

24. Տնային այցելության արձանագրությունը` նշված գրառումների հետ միասին պահպանվում է տվյալ ընտանիքի նպաստի գործում:

25. Ընտանեկան նպաստ նշանակելը մերժելու մասին որոշում ընդունելու դեպքում գործակալությունը 3 օրվա ընթացքում դրա մասին գրավոր տեղեկացնում է դիմողին` նշելով մերժելու պատճառը, բողոքարկելու կարգը:

26. Ընտանիքի` նպաստի իրավունքի ձեռքբերման դեպքում գործակալության տվյալ տարածքը սպասարկող աշխատողը տեղեկատվական բազայում դիմումների էլեկտրոնային մատյանում մուտքագրում է դիմումը, ստանում և տպում է նպաստի նշանակման մասին կարգադրությունը` համաձայն N 4 ձևի:

27. Եթե ընտանիքի կազմում կա որոշակի ժամկետով սոցիալական խումբ ունեցող մի քանի անդամ, ապա նպաստը վճարվում է մինչև սոցիալական խմբերի ամենավաղ ժամկետը լրանալու ամիսը ներառյալ: Տվյալ ընտանիքի նպաստի իրավունքը տվյալ սոցիալական խմբի ժամկետը լրանալու ամսվա վերջին օրվա դրությամբ վերանայվում է գնահատման համակարգի տեղեկատվական բազայում` ծրագրային եղանակով, և նպաստի իրավունքի պահպանման դեպքում նպաստի վճարումը շարունակվում է մինչև հաջորդ ժամկետը լրանալը` ընտանիքի անապահովության միավորի տվյալ տիրույթի համար սահմանված չափով:

28. Եթե լրանում է ընտանիքի հաշմանդամ անդամի հաշմանդամության ժամկետը, և այդ պահին չի ներկայացվում համապատասխան փաստաթուղթ, ու չի պահպանվում նպաստի իրավունքը, ապա այդ ընտանիքին նպաստի վճարումը կասեցվում է 3 ամսով:

29. Եթե լրանում է ընտանիքի հղի անդամի հղիության ժամկետը, և այդ պահին չի ներկայացվում երեխայի ծննդյան վկայականը, և չի պահպանվում նպաստի իրավունքը, ապա նպաստի վճարումը կասեցվում է 2 ամսով:

30. Եթե լրանում է ընտանիքի հաշմանդամ անդամի հաշմանդամության ժամկետը, և այդ ընտանիքը 3 ամսվա ընթացքում ներկայացնում է համապատասխան փաստաթուղթ հաշմանդամ ճանաչվելու մասին, անկախ հաշմանդամության խմբի փոփոխությունից, և դրա արդյունքում ձեռք է բերում անապահովության սահմանային մեծության միավորից բարձր միավոր, ապա նպաստի վճարումը շարունակվում է կասեցված ամսվանից` ընտանիքի անապահովության միավորի տվյալ տիրույթի համար սահմանված չափով:

31. Եթե լրանում է ընտանիքի հղի անդամի հղիության ժամկետը, և 2 ամսվա ընթացքում ներկայացվում է երեխայի ծննդյան վկայականը, և ընտանիքն արդյունքում ձեռք է բերում ընտանիքի անապահովության սահմանային մեծության միավորից բարձր միավոր, ապա նպաստի վճարումը շարունակվում է կասեցված ամսվանից` ընտանիքի անապահովության միավորի տվյալ տիրույթի համար սահմանված չափով:

32. Ընտանիքի անապահովության միավորի փոփոխության դեպքում, որը հանգեցնում է նպաստի չափի փոփոխությանը, գործակալության տվյալ տարածքն սպասարկող աշխատողը տեղեկատվական բազայում ստանում և տպում է նպաստի նշանակման մասին կարգադրությունը (N 4 ձև):

33. Նպաստը կամ միանվագ օգնությունը նշանակվում և վճարվում է դիմողին: Նպաստի կամ միանվագ օգնության վճարման պահին դիմողի բացակայության դեպքում նպաստը կամ միանվագ օգնությունը կարող է վճարվել ընտանիքի այլ չափահաս անդամի:

34. Նպաստը կամ միանվագ օգնությունը Հայաստանի Հանրապետության օրենսդրությամբ սահմանված կարգով կարող է վճարվել նաև քաղաքացու օրինական ներկայացուցչին (խնամակալ, հոգաբարձու):

35. Գործակալությունը գնահատման համակարգում հաշվառված (փաստագրված) ընտանիքների մասին Հայաստանի Հանրապետության նախարարություններից և պետական այլ մարմիններից, ինչպես նաև կազմակերպություններից ստացված տեղեկատվությունն ուսումնասիրում և կիրառում է մեկամսյա ժամկետում, որից հետո մեկ ամսվա ընթացքում Հայաստանի Հանրապետության աշխատանքի և սոցիալական հարցերի նախարարություն (այսուհետ` նախարարություն) է ներկայացնում արդյունքների մասին ամփոփ տվյալները` համաձայն N 5 ձևի` կցելով ընտանիքների ցուցակը:

36. Միայնակ բնակվող կենսաթոշակառուին նշանակված, բայց նրա մահվան պատճառով չվճարված նպաստը կամ միանվագ օգնությունը` ներառյալ մահվան ամիսը, վճարվում է հուղարկավորությունը կազմակերպած անձին` տեղական ինքնակառավարման մարմնի տված տեղեկանքի հիման վրա, եթե նա դիմել է միայնակ բնակվող կենսաթոշակառուի մահվան ամսվան հաջորդող երկու ամիսների ընթացքում:

37. Նպաստ ստանալու համար դիմողը` փաստագրման նպատակով դիմելու (հաշվառման կամ նախորդ փաստագրման) ամսվան հաջորդող 12-րդ ամսվա ընթացքում գործակալություն է ներկայացնում սույն կարգի 5-րդ կետով նախատեսված փաստաթղթերը:

38. Եթե հաշվառվելուց կամ փաստագրվելուց հետո 12 ամսվա ընթացքում ընտանիքի կազմում, ընտանիքին, ընտանիքի որևէ անդամին վերաբերող տվյալներում կատարվել են փոփոխություններ, ապա դիմողը 30 օրվա ընթացքում ներկայացնում է դրանք հավաստող փաստաթղթերը:

39. Ընտանիքի նպաստի վճարումը դադարեցվում է նպաստի իրավունքը կորցնելու հաջորդ ամսվանից:

40. Դիմողի կողմից` նպաստի իրավունք տվող կամ նպաստի չափի փոփոխություն առաջացնող ոչ հավաստի տեղեկություններով փաստաթղթեր ներկայացվելու կամ նպաստի իրավունք տվող կամ նպաստի չափի փոփոխություն առաջացնող ընտանիքի եկամուտներում կամ ընտանիքի կազմում ու պայմաններում տեղի ունեցած փոփոխությունների վերաբերյալ հավաստի տեղեկություններով փաստաթղթեր չներկայացվելու դեպքում նպաստի վճարումը դադարեցվում է դրանց հայտնաբերման ամսվանից:

41. Ընտանիքի` նպաստի իրավունքը կորցնելու դեպքում գործակալության տվյալ տարածքը սպասարկող աշխատողը տեղեկատվական բազայում ստանում և տպում է նպաստի վճարման դադարեցման մասին կարգադրությունը` համաձայն N 6 ձևի, որը հաշվառվում է դիմում-հայտարարագրերի հաշվառման մատյանում:

42. Նպաստի վճարման դադարեցման կարգադրության մեկ օրինակը տրամադրվում է դիմողին: Այս դեպքում նպաստի գործերի հաշվառման էլեկտրոնային մատյանի «Ծանոթագրություն» սյունակում նշվում են նպաստի վճարման դադարեցման մասին որոշումը և ամսաթիվը:

43. Նպաստի վճարման ընթացքում գործակալության կողմից տվյալ ընտանիքի կազմի փոփոխության հայտնաբերման, ինչպես նաև ընտանիքի անապահովության միավորի փոփոխության դեպքում, որը հանգեցնում է նպաստի չափի նվազման, կատարվում է նպաստի չափի վերահաշվարկ և կազմվում է վերահաշվարկի մասին կարգադրություն` համաձայն N 7 ձևի:

44. Վերահաշվարկի մասին կարգադրությանը տրվում է հերթական համար, որը գրանցվում է վերահաշվարկի մասին կարգադրությունների հաշվառման մատյանում` նշելով կարգադրության համարը, ամսաթիվը, սոցիալական անձնագրի համարը, դիմողի անունը, ազգանունը, բնակության վայրը, վճարման ենթակա գումարը, վճարումից հետո` տեղեկատվություն դրա մասին:

45. Վերահաշվարկի մասին կարգադրությունը բաղկացած է 3 մասից: Առաջին 2 մասը լրացնում է գործակալությունը: Նպաստի գործում մնում է կարգադրության առաջին մասը, երկրորդ մասը մնում է «Գնումների մասին» Հայաստանի Հանրապետության օրենքով սահմանված կարգով ընտրված վճարող կազմակերպությունում (այսուհետ` վճարող մարմին), իսկ երրորդ մասը` լրացված` վճարող մարմնի կողմից, վերադարձվում է գործակալություն՝ վճարման ռեեստրների հետ միասին:

46. Վերահաշվարկի մասին կարգադրության երկրորդ և երրորդ մասերն ուղարկվում են վճարող մարմին, որը վերահաշվարկի մասին կարգադրության երկրորդ մասն ամրացնում է վճարման ցուցակի, իսկ երրորդ մասը` ռեեստրի համապատասխան էջերին:

47. Վճարման ցուցակի և ռեեստրի նույն էջի դարձերեսին ձեռագրով լրացվում է չվճարված գումարի չափը, նշվում է կարգադրության համարը, ստորագրվում և կնքվում է վճարող մարմնի պետի կողմից:

48. Չվճարված գումարի չափն արտացոլվում է վճարումն ավարտվելուց հետո` վճարման ցուցակի և ռեեստրի ամփոփ տվյալներում` առանձին տողով:

49. Գործակալությունը մինչև յուրաքանչյուր ամսվա 8-ը նախարարություն է ներկայացնում տեղեկատվություն` համաձայն N 8 ձևի, այն ընտանիքների մասին, որոնց`

1) ընտանիքի անապահովության գնահատման միավորը վերականգնվել է,

2) ոչ նպաստառուի մեղքով չստացած նպաստի գումարները վերականգնվել են,

3) նշանակվել է ընտանիքում երեխայի ծննդյան միանվագ, երեխայի առաջին դասարան ընդունվելու, ինչպես նաև հուղարկավորության միանվագ օգնություն:

50. Նախարարության աշխատակազմի սոցիալական աջակցության վարչությունում տեղեկատվության ուսումնասիրությունից հետո համապատասխան փոփոխություններ են կատարվում գնահատման համակարգի տեղեկատվական բազայում:

51. Ընտանիքի բնակության վայրը փոխվելու դեպքում` դիմումի համաձայն դիմողին է տրամադրվում տվյալ ընտանիքի ստացած նպաստի կամ միանվագ օգնության մասին տեղեկանք` համաձայն N 9 ձևի:

52. Ընտանիքի բնակության վայրը փոխվելու մասին դիմումը և տրված տեղեկանքի պատճենը պահվում են նպաստի գործում:

53. Նոր բնակության վայրում գործակալության տվյալ տարածքը սպասարկող աշխատողը տեղեկանքի (N 9 ձև) հիման վրա նույն կազմով տեղափոխված ընտանիքի համար սոցիալական անձնագրի նույն համարով կազմում է նպաստի նոր գործ՝ պահանջելով գնահատման համակարգում հաշվառվելու համար անհրաժեշտ փաստաթղթերը:

54. Ընտանիքի մեկ անդամի (կամ մի քանի անդամի) տեղափոխման և նոր բնակության վայրի գործակալությունում առանձին հաշվառման դեպքում նոր բնակության վայրի գործակալությունում տրվում է սոցիալական անձնագիր` նոր համարով, կազմվում է նպաստի նոր գործ՝ պահանջելով գնահատման համակարգում հաշվառվելու համար անհրաժեշտ փաստաթղթերը:

55. Ընտանիքին վճարվում է նախկին բնակության վայրի գործակալության նշանակած և չվճարված նպաստի կամ միանվագ օգնության գումարը, եթե մի բնակության վայրից մեկ այլ բնակության վայր տեղափոխվելուց հետո նոր բնակության վայրի գործակալությունում այդ ընտանիքը հաշվառվել է 21-օրյա ժամկետում:

56. Միանվագ օգնության համար դիմողը սահմանված ժամկետում գործակալություն է ներկայացնում դիմում համաձայն N 10 ձևի և`

1) ընտանիքում երեխայի (երեխաների) ծննդյան դեպքում տվյալ երեխայի (երեխաների) ծննդյան վկայականը (վկայականները), իսկ կյանքի 4 շաբաթվա ընթացքում մահացած երեխայի (երեխաների) համար` երեխայի ծննդի պետական գրանցման փաստը հաստատելու մասին փաստաթուղթ` տրված քաղաքացիական կացության ակտերի գրանցման մարմնի կողմից,

2) երեխայի առաջին դասարան ընդունվելու դեպքում` տվյալ երեխայի հանրակրթական ուսումնական հաստատության առաջին դասարան ընդունվելու մասին տեղեկանք,

3) ընտանիքի անդամի մահվան դեպքում` մահվան վկայականը և տեղական ինքնակառավարման մարմնի կողմից տրված տեղեկանք` հուղարկավորության կազմակերպման մասին:

57. Միանվագ օգնության նշանակման մասին կարգադրությունը` համաձայն N 11 ձևի, լրացվում և կարվում է նպաստի գործում:

58. Հրատապ օգնությունը նշանակվում է նպաստի իրավունք չունեցող և «0»-ից բարձր անապահովության միավոր ունեցող ընտանիքին` անհետաձգելի լուծում պահանջող` կյանքի դժվարին իրավիճակում հայտնվելու դեպքում` սոցիալական աջակցության խորհրդի առաջարկությամբ` հաշվի առնելով հետևյալ հանգամանքները`

1) միայն կենսաթոշակառուներից բաղկացած ընտանիքի (միայնակ բնակվող կենսաթոշակառուի) նպաստի իրավունքը կորցնելը` կենսաթոշակի բարձրացման հետևանքով,

2) ընտանիքի նպաստի իրավունքը կորցնելը` ընտանիքի անդամ կենսաթոշակառուի կենսաթոշակի բարձրացման հետևանքով,

3) ընտանիքի անապահովության միավորի` սահմանային միավորից քիչ ցածր լինելը (1-2 միավոր),

4) նախորդ եռամսյակում ընտանիքի` նպաստի իրավունքը կորցնելը,

5) ընտանիքում մեկից ավելի երեխայի` առավելապես այլ սոցիալական խումբ ունեցող, առկայությունը,

6) ընտանիքի անդամներից մեկի կամ մի քանիսի երկարատև հիվանդությունը,

7) բնակարանի հրդեհը, բնակարանի մի մասի փլուզումը, ներտնային հաղորդակցուղիների վթարները և նմանատիպ այլ հանգամանքներ,

8) ընտանիքի անդամի մահը, ինչպես նաև այլ պատճառներով կարճատև ֆինանսական խնդիրների առկայությունը:

59. Ընտանիքին հրատապ օգնություն նշանակելու համար գործակալության տվյալ տարածքն սպասարկող աշխատողը կատարում է տնային այցելություն` սոցիալ-տնտեսական պայմանների ուսումնասիրման նպատակով: Տնային այցելության մասին եզրակացությունն ու առաջարկությունն արձանագրվում են սույն կարգի 23-րդ և 24-րդ կետերով սահմանված կարգով:

60. Գործակալությունն ընթացիկ եռամսյակի վերջին ամսվա վերջին 10 աշխատանքային օրվա ընթացքում սոցիալական աջակցության խորհուրդ է ներկայացնում այն ընտանիքների ցուցակը` համաձայն N 12 ձևի, որոնց հրատապ օգնություն նշանակելու մասին դիմումներն ուսումնասիրվել են սույն կարգի 59-րդ կետով սահմանված կարգով:

61. Գործակալության պետը սոցիալական աջակցության խորհուրդ է ներկայացնում տեղեկատվություն հաջորդ եռամսյակում հրատապ օգնության նշանակման համար ունեցած ֆինանսական միջոցների չափի մասին:

62. Սոցիալական աջակցության խորհուրդը քննարկում է հրատապ օգնություն նշանակելու համար ներկայացված դիմումները և 7-օրյա ժամկետում նախապատրաստում հիմնավորված առաջարկություն այն ընտանիքների վերաբերյալ, որոնց նախատեսվում է հաջորդ եռամսյակում նշանակել հրատապ օգնություն: Գործակալությունը սոցիալական աջակցության խորհրդից ստացված ցուցակները կարում է առանձին թղթապանակում և պահում ֆինանսական փաստաթղթերին համահավասար:

63. Հրատապ օգնությունը նշանակում է գործակալությունը` Հայաստանի Հանրապետության տվյալ տարվա պետական բյուջեով ընտանեկան նպաստի և միանվագ դրամական օգնության համար հատկացված միջոցների շրջանակներում, որը մշտադիտարկվում է նախարարության աշխատակազմի սոցիալական աջակցության վարչության կողմից:

64. Հրատապ օգնությունը նշանակվում է 3 ամիս ժամկետով:

65. Հրատապ օգնության նշանակման մասին կարգադրությունը` համաձայն N 13 ձևի, լրացվում և կարվում է նպաստի գործում:

66. Հրատապ օգնության վճարումը դադարեցվում է տվյալ եռամսյակի ընթացքում, եթե`

1) տվյալ ընտանիքի փաստագրման ժամկետը լրացել է այդ եռամսյակի ընթացքում, և չեն ներկայացվել անհրաժեշտ փաստաթղթերը,

2) տվյալ ընտանիքը կամ ընտանիքի անդամներից մեկը կրկնակի է հաշվառված,

3) ընտանիքի անապահովության միավորն այդ եռամսյակի ընթացքում դարձել է «0» կամ ընտանիքը ձեռք է բերել նպաստի իրավունք:

67. Նպաստի և հրատապ օգնության ցուցակները կազմում և տպում է գնահատման համակարգի կենտրոնական տեղեկատվական բազան շահագործող կազմակերպությունը (այսուհետ` կազմակերպություն)` գործակալությունների տրամադրած ամենամսյա տեղեկատվության հիման վրա:

68. Նպաստը և հրատապ օգնությունը վճարվում են յուրաքանչյուր ամիս (անհրաժեշտության դեպքում` 2 ամսվանը միասին) վճարման ցուցակներով` համաձայն NN 14 և 15 ձևերի: Բնակչությանը` ընտանեկան նպաստ կամ հրատապ օգնություն ստացող ընտանիքների մասին իրազեկվում է վճարման ցուցակների երկրորդ օրինակը տեսանելի վայրերում փակցնելու միջոցով:

69. Գործակալությունը վճարման ցուցակները և տիտղոսաթերթերը կազմակերպությունից ստանալուց հետո մեկ աշխատանքային օրվա ընթացքում վճարման ցուցակի յուրաքանչյուր էջն ստուգում է, ստորագրում, կնքում և հանձնում համապատասխան վճարող մարմին` համաձայն N 16 ձևի:

70. Գործակալությունում գործակալության պետի կողմից վճարման ցուցակները հանձնվում են վճարող մարմնի լիազորած անձին: Գործակալության պետը և վճարող մարմնի լիազորած անձն ստորագրում են տիտղոսաթերթի 2 օրինակները, որոնցից մեկը մնում է գործակալությունում, մյուսը՝ վճարող մարմնում:

71. Վճարման ցուցակների էջերը համարակալվում են:

72. Վճարման ցուցակի յուրաքանչյուր էջի գլխամասում նշվում են տարեթիվը, ամիսը, գործակալության, վճարող մարմնի, բնակավայրի անվանումները և վճարող մարմնի համարը:

73. Վճարման ցուցակի ամեն տողում նշվում են մեկ նպաստառու կամ հրատապ օգնություն ստացող ընտանիքի մասին տվյալները:

74. Յուրաքանչյուր էջի վերջում նշվում են այդ էջում գրանցված նպաստառու կամ հրատապ օգնություն ստացող ընտանիքների թիվը, վճարման ենթակա նպաստի կամ հրատապ օգնության, վերահաշվարկի կարգադրությամբ չվճարված և փաստացի վճարված գումարների չափերը, կնիքի և գործակալության պետի ու տեղեկատվական բազայի վարչական պատասխանատու աշխատողի ստորագրությունների տեղերը:

75. Վճարման ցուցակի վերջում նշվում են սույն կարգի 74-րդ կետով սահմանված տեղեկությունների ամփոփ տվյալները:

76. Ընտանիքի չափահաս անդամներից մեկի պահանջով նպաստը կամ հրատապ օգնությունը նրան վճարվում է իր մասով, որն ստացվում է նպաստի կամ հրատապ օգնության գումարն ընտանիքի անդամների թվի վրա բաժանելով:

77. Վճարման ցուցակում մեկ պարզ գծով ջնջվում է ընտանիքին վերաբերող ամբողջ տողը (ներառյալ ռեեստրը) և նույն էջի հակառակ երեսին ձեռագրով լրացվում են ընտանիքի այն չափահաս անդամների անունները, ազգանունները` ընտանիքի սոցիալական անձնագրում նշված կազմին համապատասխան, որոնց նպաստը կամ հրատապ օգնությունը վճարվում է իրենց մասով:

78. Եթե պահանջվում է նպաստը վճարել ընտանիքի մի քանի անդամի համար, ապա մեկ անձին հասանելիք մասին համապատասխանող գումարը բազմապատկվում է այդ անձանց թվով և նշվում որպես վճարման ենթակա գումար:

79. Վճարող մարմինը վճարման ավարտից հետո 3 օրացուցային օրվա ընթացքում գործակալությանն է հանձնում լրացված ռեեստրները, փոխադարձ հաշվետվության ակտի (համաձայն N 17 ձևի)
5 օրինակ: Հաշվետվության ակտի 2 օրինակը 2 օրվա ընթացքում վերադարձվում են վճարող մարմին:

80. Գործակալությունը յուրաքանչյուր ամսվա վճարման ավարտից հետո 6 օրվա ընթացքում նախարարություն, համապատասխան մարզպետարան կամ Երևանի քաղաքապետարանի աշխատակազմ կամ Գյումրու կամ Վանաձորի կամ Արարատի կամ Ջերմուկի քաղաքային համայնքների ղեկավարների աշխատակազմ է ներկայացնում փոխադարձ հաշվետվության ակտի մեկ օրինակը:

Ձև N 1

Խնդրում ենք դիմում-հայտարարագիրը լրացնել ընթեռնելի ձեռագրով

Դ Ի Մ ՈՒ Մ – Հ Ա Յ Տ Ա Ր Ա Ր Ա Գ Ի Ր _____________

ԸՆՏԱՆԻՔՆԵՐԻ ԱՆԱՊԱՀՈՎՈՒԹՅԱՆ ԳՆԱՀԱՏՄԱՆ ՀԱՄԱԿԱՐԳՈՒՄ ՀԱՇՎԱՌՎԵԼՈՒ

(ՓԱՍՏԱԳՐՎԵԼՈՒ) ԵՎ ԸՆՏԱՆԵԿԱՆ ՆՊԱՍՏ ՆՇԱՆԱԿԵԼՈՒ ՀԱՄԱՐ

_________________________________ սոցիալական ծառայությունների տարածքային գործակալության պետ

Պարոն(տիկին) __________________________________________________________________________________

(դիմողի ազգանունը, անունը, հայրանունը) (սոցիալական անձնագրի համարը)

Ներկայացնելով սույն դիմում – հայտարարագիրը՝ խնդրում եմ նշանակել ընտանեկան նպաստ կամ հրատապ օգնություն: Լրացնելով այն` պատասխանատու եմ ներկայացրածս տեղեկությունների հավաստիության համար:

Ես՝ _________________________________________________ ,

1. Երաշխավորում եմ, որ ընտանեկան նպաստ նշանակելու ընթացքում սոցիալական ծառայություններ տրամադրող տարածքային մարմնի աշխատողն իմ ընտանիքի կազմի և պայմանների ուսումնասիրման ժամանակ առանց խոչընդոտների կարող է կատարել սույնով հայտարարագրված տեղեկությունների հավաստիության ուսումնասիրություն:

2. Պարտավորվում եմ ընտանիքիս կազմի, եկամուտների և այլ փոփոխությունների դեպքում մեկամսյա ժամկետում տեղյակ պահել սոցիալական ծառայություններ տրամադրող տարածքային մարմնին` ներկայացնելով համապատասխան փաստաթղթեր, ինչպես նաև տեղյակ եմ, որ յուրաքանչյուր 12 ամիսը մեկ անգամ պետք է ներկայացնեմ դիմում-հայտարարագիր և անհրաժեշտ փաստաթղթերը:

3. Համաձայն եմ, որ իմ ընտանիքի անդամների աշխատանքի վարձատրությանն ու դրան հավասարեցված միջոցների մասին իմ ներկայացրած տվյալներն ստուգվեն պետական կենսաթոշակային սոցիալական ապահովագրության համակարգում ընդգրկված անձանց տվյալների անհատական (անձնավորված) հաշվառման բազայում առկա տվյալներով, իսկ մյուս տվյալները` Հայաստանի Հանրապետության կառավարության կողմից սահմանված կարգով ստացված տեղեկատվությամբ:

4. Տեղեկացված եմ, որ ընտանիքիս մասին ոչ ճիշտ տեղեկություններ ներկայացնելու կամ տեղեկությունները թաքցնելու դեպքում նպաստի վճարումը դադարեցվում է, և իմ ընտանիքը վեց ամսով զրկվում է նպաստ ստանալու իրավունքից, իսկ ավելի վճարված գումարը Հայաստանի Հանրապետության օրենսդրությամբ սահմանված կարգով հետ է գանձվում:

Տեղեկություններ սեփականության, բնակարանային և կենցաղային պայմանների մասին

Տեղեկացված եմ, որ անհրաժեշտ, սակայն չներկայացված փաստաթղթերը դիմում-հայտարարագիրը լրացնելուց ոչ ուշ, քան 5 աշխատանքային օրվա ընթացքում ներկայացնելու դեպքում դիմելու օր կհամարվի դիմում-հայտարարագիրը լրացնելու օրը: Նշված ժամկետից հետո ներկայացնելու դեպքում դիմելու օր կհամարվի բոլոր անհրաժեշտ փաստաթղթերը ներկայացնելու օրը:

Սույն դիմում-հայտարարագրի առաջին օրինակը պահվում է սոցիալական ծառայություններ տրամադրող տարածքային մարմնում, իսկ ինքնապատճենահանված օրինակը` քաղաքացու մոտ:

Ընտանիքի չափահաս անդամների համաձայնությունը

Ձև N 2

Մ Ա Տ Յ Ա Ն

ԴԻՄՈՒՄ-ՀԱՅՏԱՐԱՐԱԳՐԵՐԻ ՀԱՇՎԱՌՄԱՆ

Ձև N 3

ՀՀ __________________ մարզ

____________________ սոցիալական ծառայությունների

տարածքային գործակալություն

Նպաստի գործ

Սոցիալական անձնագրի համարը ________________________________________

Բնակության վայրը _____________________________________________________

Վճարող մարմնի բաժանմունքի ինդեքսը __________________________________

Հեռախոսահամարը _____________________________________________________

Նպաստը նշանակված է`

1. _____________________________ _____ ____________________20 թ-ից