«Գրանցված է»

ՀՀ արդարադատության

նախարարության կողմից

30 հունիսի 2010 թ.

Պետական գրանցման թիվ 60210242

ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ԱԶԳԱՅԻՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

ԹՎԱՅԻՆ ՀԵՌԱՐՁԱԿՄԱՆ ՑԱՆՑԻ ՄԻՋՈՑՈՎ ՀԵՌՈՒՍՏԱԾՐԱԳՐԵՐԻ ԵԹԵՐԱՅԻՆ ՀԵՌԱՐՁԱԿՈՒՄ ԻՐԱԿԱՆԱՑՆԵԼՈՒ ՀԵՌՈՒՍՏԱԸՆԿԵՐՈՒԹՅՈՒՆՆԵՐԻ ՄՐՑՈՒՅԹԻ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հեռուստատեսության և ռադիոյի մասին» ՀՀ օրենքի 36-րդ հոդվածի 1-ին մասի 3-րդ կետի և 46-րդ հոդվածի 2-րդ մասի դրույթներով` Հեռուստատեսության և ռադիոյի ազգային հանձնաժողովը որոշում է.

Հաստատել թվային հեռարձակման ցանցի միջոցով հեռուստածրագրերի եթերային հեռարձակում իրականացնելու հեռուստաընկերությունների մրցույթի անցկացման կարգը` համաձայն հավելվածի:

ԹՎԱՅԻՆ ՀԵՌԱՐՁԱԿՄԱՆ ՑԱՆՑԻ ՄԻՋՈՑՈՎ ՀԵՌՈՒՍՏԱԾՐԱԳՐԵՐԻ ԵԹԵՐԱՅԻՆ ՀԵՌԱՐՁԱԿՈՒՄ ԻՐԱԿԱՆԱՑՆԵԼՈՒ ՀԵՌՈՒՍՏԱԸՆԿԵՐՈՒԹՅՈՒՆՆԵՐԻ ՄՐՑՈՒՅԹԻ ԱՆՑԿԱՑՄԱՆ ԿԱՐԳ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է թվային հեռարձակման ցանցի միջոցով հեռուստածրագրերի եթերային հեռարձակման, ինչպես նաև օտարերկրյա հեռուստաընկերությունների հաղորդումների ամբողջական վերահեռարձակման լիցենզիաների տրամադրման նպատակով հայտարարվող և անցկացվող մրցույթների իրականացման ընթացակարգը:

2. Մրցույթն անցկացնում է Հեռուստատեսության և ռադիոյի ազգային հանձնաժողովը (այսուհետ` Հանձնաժողով)` Հայաստանի Հանրապետության օրենսդրությանը և սույն կարգին համաձայն:

3. Հեռուստածրագրերի հեռարձակման լիցենզիայի գործողության ժամկետը լրանալուց վեց ամիս առաջ Հանձնաժողովը հայտարարում է լիցենզավորման մրցույթ:

Արտահերթ մրցույթ անց է կացվում օրենքով սահմանված դեպքերում և սույն կարգով:

Նույնական պայմաններով հայտարարված մրցույթները տարբերակման նպատակով համարակալվում են:

Յուրաքանչյուր մրցույթին մասնակցելու համար ներկայացվում է սույն կարգով սահմանված փաստաթղթերի ամբողջական փաթեթ:

4. Մրցույթին մասնակցում են միայն իրավաբանական անձինք:

5. Մրցույթն անցկացվում է հրապարակային կարգով:

II. ՄՐՑՈՒՅԹԻ ՄԱՍԻՆ ՏԵՂԵԿԱՏՎՈՒԹՅԱՆ ՀՐԱՊԱՐԱԿՈՒՄԸ

6. Հանձնաժողովը զանգվածային լրատվության միջոցներով հայտարարում է թվային հեռարձակման ցանցի միջոցով եթերային հեռարձակում իրականացնելու հեռուստահեռարձակողների մրցույթ` հրապարակելով հետևյալ տեղեկատվությունը`

1) լիցենզավորման ենթակա գործունեության տեսակը.

2) հեռուստածրագրի թեմատիկ ուղղվածությունը.

3) հեռուստածրագրի սփռման տարածքը.

4) մրցույթի հերթական համարը (ըստ անհրաժեշտության).

5) մրցույթի կազմակերպման և անցկացման ժամանակացույցը.

6) հայտի (դիմումի) ձևը և անհրաժեշտ փաստաթղթերի ցանկը.

7) լրացուցիչ տեղեկություններ ստանալու աղբյուրը (հեռախոս, ֆաքս, էլեկտրոնային փոստ):

7. Մրցույթի մասնակցության հայտում պետք է նշվեն հետևյալ տեղեկությունները`

1) հայտը ներկայացնողի անվանումը.

2) գտնվելու վայրը.

3) հեռուստածրագրերի թեմատիկ ուղղվածությունը.

4) սփռման տարածքը.

5) տեղեկություններ հայտ ներկայացնողի` այլ հեռուստաընկերությունների հիմնադիր և լիցենզավորված անձ կամ զանգվածային լրատվության այլ միջոցների հիմնադիր լինելու, ինչպես նաև դրանց արտադրությամբ և տարածմամբ զբաղվելու մասին.

6) սեփական և հայրենական արտադրության հաղորդումների ծավալը.

7) հայտի ներկայացման ամիսը, ամսաթիվը, տարեթիվը.

8) հայտին կցվում են` ընկերության հիմնադիր փաստաթղթերի և իրավաբանական անձի կարգավիճակը հաստատող փաստաթղթերի պատճենները, հեռուստաընկերության բիզնես ծրագիրը, տվյալներ օգտագործվելիք տեխնիկական միջոցների և սարքավորումների մասին, ֆինանսական աղբյուրները հիմնավորող փաստաթղթերը, տեղեկություններ աշխատակազմի թվաքանակի, կրթության և մասնագիտական պատրաստվածության մասին, ինչպես նաև լիցենզավորման մրցույթին մասնակցելու համար «Պետական տուրքի մասին» Հայաստանի Հանրապետության օրենքով սահմանված չափով վճարված պետական տուրքի մուծման անդորրագիրը:

III. ՄՐՑՈՒՅԹԻ ԸՆԹԱՑԱԿԱՐԳԸ

8. Հանձնաժողովը մրցույթին մասնակցելու հայտը և անհրաժեշտ փաստաթղթերը ընդունում է մրցույթի մասին տեղեկատվությունը հրապարակելու օրվանից հաշված 83-ից մինչև 93-րդ օրը ներառյալ, առձեռն` ստացականով: Հեռուստաընկերության բիզնես ծրագիրը, տվյալները օգտագործվելիք տեխնիկական միջոցների և սարքավորումների մասին, ֆինանսական աղբյուրները հիմնավորող փաստաթղթերը, տեղեկությունները աշխատակազմի թվաքանակի, կրթության և մասնագիտական պատրաստվածության մասին ներկայացվում է երկու օրինակից` կարված, դիմողի կնիքով կնքված:

9. Հանձնաժողովը մրցույթ հայտարարելուց հետո մինչև 95-րդ օրը իր կայքէջում հրապարակում է մրցույթի մասնակիցների ցանկը:

10. Մրցույթի մասնակիցների հայտերը և կից փաստաթղթերը հրապարակվում են հանձնաժողովի դռնբաց նիստում` ըստ հայտերի գրանցման հերթականության, մրցույթի մասին տեղեկատվությունը հրապարակելու 100-րդ օրվանից սկսված:

11. Հանձնաժողովը մասնակցին է տրամադրում մրցութային հայտի և կից փաստաթղթերի օրինակը: Մասնակիցը հրապարակում է դրա բովանդակությունը:

Հայտը և կից փաստաթղթերը ներկայացնելու համար տրվում է 30 րոպե:

Մրցույթի մասնակիցն իրավունք ունի հանդես գալ միջնորդությամբ: Միջնորդության կապակցությամբ Հանձնաժողովի որոշումը վերջնական է:

Նիստին չներկայացած մասնակցի հայտը քննության չի առնվում:

12. Հայտերի և կից փաստաթղթերի հրապարակումից հետո` դրանց ուսումնասիրման համար, Հանձնաժողովը ընդհատում է նիստը մինչև 50 օր տևողությամբ:

13. Մրցույթում լիցենզավորված անձի ընտրությունը Հանձնաժողովը կատարում է մրցույթի մասին տեղեկատվությունը հրապարակելու օրվանից հաշված 150-րդ օրը, բաց վարկանիշային քվեարկությամբ:

14. Մրցութային հայտերի և կից փաստաթղթերի հրապարակումից և ուսումնասիրությունից հետո Հանձնաժողովը անցկացնում է վարկանիշային քվեարկություն: Մինչև վարկանիշային քվեարկությունը հանձնաժողովի անդամները մրցութային հայտերի և կից փաստաթղթերի քննարկում չեն իրականացնում և չեն հրապարակում իրենց դիրքորոշումները դրանց վերաբերյալ:

Վարկանիշային քվեարկությունը իրականացվում է ըստ մասնակիցների հայտերի գրանցման հերթականության: Քվեարկությունը կազմակերպվում է մասնակիցներից յուրաքանչյուրի համար առանձին, Հանձնաժողովի անդամների համաժամանակյա քվեարկությամբ: Համեմատելով տվյալ մրցույթի մասնակիցների հայտերում և կից փաստաթղթերում ներկայացված տեղեկությունները, Հանձնաժողովի անդամը 0-10 ամբողջ թվերով գնահատում է մրցույթի յուրաքանչյուր մասնակցին:

Մինչև վարկանիշային քվեարկությունը Հանձնաժողովի անդամները կարող են հանդես գալ հայտարարությամբ, միջնորդությամբ:

Հանձնաժողովը լիցենզավորված անձի ընտրության ժամանակ հաշվի է առնում`

1) սեփական արտադրության հաղորդումների գերակայությունը.

2) հայրենական արտադրության հաղորդումների գերակայությունը.

3) հեռուստաընկերության բիզնես ծրագրի հիմնավորվածությունը.

4) բազմակարծությունը խթանելու կարողությունը.

5) հայտատուի տեխնիկական և ֆինանսական հնարավորությունները.

6) աշխատակազմի մասնագիտական պատրաստվածությունը:

Վարկանիշային քվեարկության արդյունքում հաղթող է ճանաչվում գումարային առավելագույն միավոր ստացած մասնակիցը:

15. Լիցենզավորման մրցույթի ժամանակ այլ հավասար պայմանների առկայության դեպքում նախապատվությունը տրվում է`

1) գործող այն հեռուստաընկերություններին, որոնք իրենց գործունեության ընթացքում օրենսդրության խախտումներ թույլ չեն տվել.

2) գործող այն հեռուստաընկերություններին, որոնք հեռուստահաղորդումների արտադրության և հեռարձակման բնագավառում ունեն առնվազն 3 տարվա փորձ:

 16. Քվեարկության արդյունքում առավելագույն հավասար միավորներ ստացած և սույն կարգի 15-րդ կետի 1) և 2) ենթակետերի պահանջները բավարարած մասնակիցների միջև Հանձնաժողովը անց է կացնում վարկանիշային կրկնակի քվեարկություն:

17. Հանձնաժողովը մրցույթում հաղթող ճանաչելու որոշումը կայացնում է վարկանիշային քվեարկության արդյունքների հիման վրա` քվեարկությամբ:

18. Հանձնաժողովի որոշումը` մասնակցին մրցույթում հաղթող ճանաչելու և հեռուստածրագրերի եթերային հեռարձակման լիցենզիա տալու մասին, հրապարակվում է այն ընդունելուց անմիջապես հետո:

19. Հանձնաժողովի պատշաճ հիմնավորված և պատճառաբանված որոշումը այն ընդունելուց 10-օրյա ժամկետում ուղարկվում է մրցույթի մասնակիցներին:

20. Մրցույթի մասին ամբողջական տեղեկատվությունը Հանձնաժողովը հրապարակում է իր կայքէջում մեկամսյա ժամկետում:

IV. ՄՐՑՈՒՅԹԸ ՉԿԱՅԱՑԱԾ ՀԱՅՏԱՐԱՐԵԼԸ

21. Հանձնաժողովն իր որոշմամբ մրցույթը հայտարարում է չկայացած, եթե`

1) սահմանված ժամկետում ոչ մի հայտ չի ներկայացվել.

2) հանձնաժողովը օրենքով սահմանված դեպքերում չեղյալ է ճանաչել լիցենզիա տալու մասին իր որոշումը.

3) մասնակիցներից ոչ մեկը չի ներկայացել Հանձնաժողովի նիստին: