«Վավերացնում եմ»
Հայաստանի Հանրապետության
Նախագահ Ռ. Քոչարյան
 20 մարտի 2007 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

1 մարտի 2007 թվականի N 267-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԷՐՈՏԻԿ ԲՆՈՒՅԹԻ ՀԵՌՈՒՍՏԱՌԱԴԻՈՀԱՂՈՐԴՈՒՄՆԵՐԻ ԵՎ ՍԱՐՍԱՓ ՖԻԼՄԵՐԻ ՈՐՈՇՄԱՆ ՉԱՓՈՐՈՇԻՉՆԵՐԸ ՍԱՀՄԱՆԵԼՈՒ ՄԱՍԻՆ

«Հեռուստատեսության և ռադիոյի մասին» Հայաստանի Հանրապետության օրենքի 24-րդ հոդվածի 3-րդ մասին համապատասխան` Հայաստանի Հանրապետության կառավարությունը որոշում է.

1. Սահմանել Հայաստանի Հանրապետությունում էրոտիկ բնույթի հեռուստառադիոհաղորդումների և սարսափ ֆիլմերի որոշման չափորոշիչները` համաձայն հավելվածի։

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Չ Ա Փ Ո Ր Ո Շ Ի Չ Ն Ե Ր

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԷՐՈՏԻԿ ԲՆՈՒՅԹԻ ՀԵՌՈՒՍՏԱՌԱԴԻՈՀԱՂՈՐԴՈՒՄՆԵՐԻ ԵՎ ՍԱՐՍԱՓ ՖԻԼՄԵՐԻ ՈՐՈՇՄԱՆ

Հայաստանի Հանրապետությունում էրոտիկ բնույթի հեռուստառադիոհաղորդումների և սարսափ ֆիլմերի չափորոշիչներն են`

1) էրոտիկ բնույթի հեռուստառադիոհաղորդումները. դրանք սեռական ուղղվածությամբ սյուժեի վրա կառուցված գեղագիտական, ճանաչողական բնույթի գեղարվեստական կամ գիտական արժեք ներկայացնող հաղորդումներ են, որոնք`

ա. խոշոր պլանով չեն ցուցադրում տղամարդու և կնոջ սեռական օրգաններ, մարդակազմության և ֆիզիոլոգիական մանրամասներ` սեռական հարաբերության ժամանակ,

բ. ձայնի և պատկերի մեջ չեն պարունակում սեռական բռնության, անձը նվաստացնող սեռական գործողությունների անմիջական տեղեկույթ,

գ. չեն պարունակում անչափահասների մասնակցությամբ սեռական գործողությունների տեսարաններ,

դ. չեն ներկայացնում սեռահոգեբանական շեղումներ, մարդու կողմից սեռական այլասերումներ` դիակների կամ կենդանիների նկատմամբ.

2) սարսափ ֆիլմերը. դրանք կենդանի մեռյալներ, մարդակերներ կամ հրեշներ, սատանայական և միստիկական դևեր կամ դժոխային արարածներ, ամեն տեսակի մահաբեր աղանդներ, ինչպես նաև ծայրահեղացված գերբնական երևույթներ, մոլագարներ, առասպելական արնախումների, դարձվորների պատկերներ կամ կերպարներ ներկայացնող կինոնկարներ են, որոնց հիմնական նպատակն է վախի, տագնապի, անելանելիության զգացում հարուցելը կամ սոսկում առաջացնելը:

Այդ ֆիլմերը սովորաբար ֆիլմեր արտադրող կամ վաճառող կազմակերպությունների պաշտոնական կատալոգներում (ֆիլմացանկերում) դասակարգված են որպես սարսափ ֆիլմեր: