ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ՎԱՐՉՈՒԹՅՈՒՆ
Ո Ր Ո Շ ՈՒ Մ
16 դեկտեմբերի 1994 թվականի թիվ 136
Հայաստանի Հանրապետության ձեռնարկությունների կողմից ապրանքների (ծառայությունների, աշխատանքների) արտահանումից ստացված արտարժութային հասույթի պարտադիր վաճառքի մասին
Ելնելով Հայաստանի Հանրապետության կառավարության և Հայաստանի Հանրապետության կենտրոնական բանկի «Տնտեսական քաղաքականության մասին» հայտարարությունից բխող դրամավարկային և արժութային կարգավորման խնդիրներից` Հայաստանի Հանրապետության կենտրոնական բանկի վարչությունը որոշում է.
1. Դիմել Հայաստանի Հանրապետության կառավարությանը` Հայաստանի Հանրապետության կառավարության և Հայաստանի Հանրապետության կենտրոնական բանկի 1993 թվականի հուլիսի 30-ի «Հանրապետությունից դուրս անկանխիկ հաշվարկների իրականացման և տարադրամի պարտադիր վաճառքի ժամանակավոր կարգի մասին» թիվ 402 որոշման 5-րդ կետում «50 տոկոսը» բառերը «30 տոկոսը» բառերով փոխարինելու և այդ փոփոխությունը 1995 թվականի հունվարի 1-ից կիրարկելու առաջարկությամբ:
2. Առաջարկել Հայաստանի Հանրապետության կառավարությանը` 1995 թվականի ապրիլի 1-ից ուժը կորցրած ճանաչել Հայաստանի Հանրապետության կառավարության և Հայաստանի Հանրապետության կենտրոնական բանկի 1993 թվականի հուլիսի 30-ի թիվ 402 և 1993 թվականի դեկտեմբերի 27-ի թիվ 647 որոշումները:
3. Սահմանել, որ 1993 թվականի դեկտեմբերի 27-ի թիվ 647 որոշմամբ ստեղծված հանձնաժողովի կողմից ձեռնարկություններին մինչև այժմ տրված արտոնությունները մնում են ուժի մեջ, եթե Հայաստանի Հանրապետության կենտրոնական բանկի կողմից առավել արտոնյալ կարգ չի նախատեսված:
4. Հանձնարարել Հայաստանի Հանրապետության կենտրոնական բանկի հաշվապահական հաշվառման և վերլուծության ու միջազգային և արտարժութային գործառնությունների վարչություններին` մինչև 1995 թվականի հունվարի 15-ը պատրաստել և Հայաստանի Հանրապետության կենտրոնական բանկի վարչության հաստատմանը ներկայացնել ձեռնարկությունների կողմից արտարժույթի պարտադիր վաճառքը անմիջապես միջբանկային սակարկությունների միջոցով իրականացնելու կարգի և դրա հետ կապված հրահանգի նախագծերը` համաձայնեցնելով դրանք Հայաստանի Հանրապետության ֆինանսների նախարարության հետ:
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|