ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

Ո Ր Ո Շ ՈՒ Մ

12 ապրիլի 2000 թվականի թիվ 80

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՐԱՄԻ ՀԱՇՎԱՐԿԱՅԻՆ ՓՈԽԱՐԺԵՔԻ ՍԱՀՄԱՆՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

Ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 49-րդ հոդվածով և հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի դրույթները` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Հայաստանի Հանրապետության կենտրոնական բանկի կողմից Հայաստանի Հանրապետության դրամի հաշվարկային փոխարժեքի սահմանման կարգը» (կցվում է):

2. Սույն որոշումն ուժի մեջ է մտնում ընդունման պահից:

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՐԱՄԻ ՀԱՇՎԱՐԿԱՅԻՆ ՓՈԽԱՐԺԵՔԻ ՍԱՀՄԱՆՄԱՆ

1. Սույն կարգը սահմանում է արտարժույթների նկատմամբ ՀՀ կենտրոնական բանկի կողմից ՀՀ դրամի հաշվարկային փոխարժեքի սահմանման մեխանիզմը:

2. ՀՀ կենտրոնական բանկը, համաձայն «ՀՀ տարածքում արժութային կարգավորումը և վերահսկողությունը» կանոնակարգ 8-ի (նոր խմբագրությամբ), ամեն օր հայտարարում է արտարժույթների նկատմամբ ՀՀ դրամի հաշվարկային, առք ու վաճառքի փոխարժեքները, որոնք սահմանվում են ուղիղ գնանշման եղանակով` արտարժույթի 1, 10 կամ 10-ապատիկ միավորի գինը` արտահայտված ՀՀ դրամով:

3. Արտարժույթների նկատմամբ ՀՀ դրամի հաշվարկային, առք ու վաճառքի փոխարժեքները հաստատվում են Հայաստանի Հանրապետության կենտրոնական բանկի նախագահի կողմից:

4. ԱՄՆ դոլարի և ՌԴ ռուբլու (այլ արժույթների շրջանառությունները ՀՀ արժութային շուկայում էական ծավալ չեն կազմում) նկատմամբ ՀՀ դրամի հաշվարկային փոխարժեքները սահմանվում են համաձայն «ՀՀ տարածքում արժութային կարգավորումը և վերահսկողությունը» կանոնակարգ 8-ի (նոր խմբագրությամբ), նախորդ օրը ֆինանսական շուկայում ձևավորված միջին կշռված փոխարժեքների հիման վրա, որոնք հաշվարկվում են ՀՀ տարածքում գործող բանկերի կողմից ՀՀ կենտրոնական բանկ ներկայացված արտարժութային գործառնությունների վերաբերյալ ձև թիվ 19 հաշվետվությունների հիման վրա:

5. Այլ արտարժույթների նկատմամբ ՀՀ դրամի տվյալ օրվա հաշվարկային փոխարժեքները սահմանվում են քրոս-փոխարժեքի միջոցով` հիմք ընդունելով նախորդ օրվա Reuters ինֆորմացիոն համակարգից վերցված ԱՄՆ դոլարի նկատմամբ համապատասխան արտարժույթների փոխարժեքները և ԱՄՆ դոլարի նկատմամբ ՀՀ կենտրոնական բանկի կողմից սահմանված տվյալ օրվա հաշվարկային փոխարժեքը: Ընդ որում, այն երկրներից, որտեղ գործում է պաշտոնական փոխարժեքի ինստիտուտը, վերցվում են այդ երկրների կենտրոնական բանկերի սահմանած պաշտոնական փոխարժեքները, իսկ այն երկրներից, որտեղ գործում է ընթացիկ փոխարժեքի հաստատագրումը (ֆիքսինգ)` բորսայական փոխարժեքը ժամը 16:00-ի դրությամբ:

6. ԵՎՐՈ-ի կազմում ընդգրկված 11 եվրոպական արտարժույթների նկատմամբ ՀՀ դրամի հաշվարկային փոխարժեքները հաշվարկվում են EUR/AMD և Եվրոպական կենտրոնական բանկի կողմից հաստատված EUR/ATS, BEF, DEM, ESP, FRF, IEP, ITL, LUF, NLG, PTE, FIM քրոս-փոխարժեքների միջոցով:

7. ՀՀ կենտրոնական բանկի տվյալ օրվա հաշվարկային փոխարժեքները սահմանվում և տրամադրվում են զանգվածային լրատվության միջոցներին նախորդ օրը, մինչև ժամը 17:55-ը:

8. ՀՀ կենտրոնական բանկը, ելնելով դրամավարկային քաղաքականության խնդիրներից և շուկայում ձևավորված իրավիճակից, կարող է նույն օրվա ընթացքում սահմանել նոր հաշվարկային, առք ու վաճառքի փոխարժեքներ, որոնք ուժի մեջ են մտնում հրապարակման պահից:

9. ՀՀ կենտրոնական բանկի կողմից տեղեկատվական գործակալություններին և մամուլին տրամադրված հաշվարկային փոխարժեքների վերաբերյալ տեղեկատվությունը պաշտոնական է և ունի իրավաբանական ուժ: