«Վավերացնում եմ»

Հայաստանի Հանրապետության

Նախագահ Ռ. Քոչարյան

14 մայիսի 2003 թ. 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ 

Ո Ր Ո Շ ՈՒ Մ 

23 ապրիլի 2003 թվականի N 497-Ն 

ՀԱՐԿԱՅԻՆ ԾԱՌԱՅՈՂՆԵՐԻ ՌՈՏԱՑԻԱՅԻ ՀԵՏ ԿԱՊՎԱԾ ԾԱԽՍԵՐԻ ՓՈԽՀԱՏՈՒՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ 

Հայաստանի Հանրապետության կառավարությունը որոշում է.

1. Հաստատել հարկային ծառայողների ռոտացիայի հետ կապված ծախսերի փոխհատուցման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2003 թ. մայիսի 7 Երևան

Հավելված ՀՀ կառավարության 2003 թվականի ապրիլի 23-ի N 497-Ն որոշման

Կ Ա Ր Գ 

ՀԱՐԿԱՅԻՆ ԾԱՌԱՅՈՂՆԵՐԻ ՌՈՏԱՑԻԱՅԻ ՀԵՏ ԿԱՊՎԱԾ ԾԱԽՍԵՐԻ ՓՈԽՀԱՏՈՒՑՄԱՆ 

1. Սույն կարգով կանոնակարգվում է հարկային ծառայողների ռոտացիայի արդյունքում հիմնական բնակության վայրի փոփոխման հետ կապված ծախսերի փոխհատուցման հարաբերությունները:

2. Հարկային ծառայողներին հիմնական բնակության վայրից (հաշվառման վայրից) 30 և ավելի կմ հեռավորության վրա հարկային մարմնի այլ ստորաբաժանում տեղափոխման ժամանակ այդ վայրում հարկային մարմինների ծառայողական բնակարանի առկայության դեպքում տրամադրվում է (առաջարկվում է) բնակելի համապատասխան տարածք ծառայողների ու նրանց հետ բնակվող ընտանիքի անդամների համար: Տարածքը տրամադրվում է անվճար:

3. Հարկային ծառայողներին հիմնական բնակության վայրից (գրանցման վայրից) 30 և ավելի կմ հեռավորության վրա մշտական բնակելի տարածություն չունենալու ու ծառայողական բնակելի տարածությունների բացակայության դեպքում հարկային ծառայողներին և նրանց ընտանիքի անդամներին բնակելի տարածության վարձակալման համար վճարվում է ամենամսյա դրամական փոխհատուցում՝ փաստացի վճարված գումարի չափով, բայց ոչ ավելի, քան՝

(հազ. դրամ)

Բնակավայրի անվանումը	Ընտանիքի անդամների թիվը
	մինչև 3 անդամ	3 անդամից ավելի
Երևան քաղաքում	25	30
մյուս քաղաքներում	18	24
այլ բնակավայրերում	15	18

4. Հարկային ծառայողների հարկային մարմնի այլ ստորաբաժանում ծառայողական տեղափոխման դեպքում նախկին վայրում ծառայողական բնակարանի ազատումը կատարվում է նոր նշանակումից հետո 15 օրվա ընթացքում, իսկ վարձակալված բնակելի տարածքի համար դրամական փոխհատուցումը կարող է շարունակվել 15 օր՝ մինչև ծառայողների ընտանիքի անդամների տեղափոխվելը նոր բնակավայր:

5. Հարկային ծառայողների հիմնական բնակության վայրից (գրանցման վայրից) 30 և ավելի կմ հեռավորության վրա տեղափոխման դեպքում տրվում է տեղափոխման և անձնական գույքի փոխադրման հետ կապված ծախսերի փոխհատուցում՝ յուրաքանչյուր կիլոմետրի համար 200 դրամի չափով:

6. Սույն որոշման համաձայն հարկային ծառայողների հարկային մարմնի նոր ստորաբաժանում տեղափոխման դեպքում վարձակալված բնակելի տարածքի համար ամենամսյա դրամական փոխհատուցումը և ծառայողների տեղափոխման ու անձնական գույքի փոխադրման հետ կապված ծախսերի փոխհատուցումը կատարվում է մինչև յուրաքանչյուր ամսվան հաջորդող ամսվա 5-ը:

7. Սույն որոշման համաձայն հարկային ծառայողների հարկային մարմնի նոր ստորաբաժանում տեղափոխման դեպքում վարձակալված բնակելի տարածքի համար ամենամսյա դրամական փոխհատուցումը և ծառայողների տեղափոխման ու անձնական գույքի փոխադրման հետ կապված ծախսերի փոխհատուցումը կատարվում է Հայաստանի Հանրապետության պետական բյուջեի միջոցների հաշվին:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան