ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

Ո Ր Ո Շ ՈՒ Մ

Եվրասիական տնտեսական միության մասին 2014 թվականի մայիսի 29-ի պայմանագրի 95-րդ հոդվածի 1-ին կետի 4-րդ ենթակետի իրագործման նպատակներով և «Եվրասիական տնտեսական միության շրջանակներում գյուղատնտեսական կենդանիների հետ սելեկցիոն տոհմային աշխատանքի կատարման միասնականացմանն ուղղված միջոցների մասին» 2019 թվականի հոկտեմբերի 25-ի համաձայնագրի (այսուհետ՝ Համաձայնագիր) 5-րդ հոդվածին համապատասխան` Եվրասիական տնտեսական հանձնաժողովի կոլեգիան որոշեց.

1. Հաստատել կից ներկայացվող՝ Եվրասիական տնտեսական միության անդամ պետությունների միջև փոխանակման ենթակա՝ տոհմային կենդանիների և սելեկցիոն նվաճումների մասին տեղեկությունների կազմը։

2. Սահմանել, որ՝

ա) Եվրասիական տնտեսական միության անդամ պետությունների (այսուհետ՝ անդամ պետություններ) միջև տոհմային կենդանիների և սելեկցիոն նվաճումների մասին տեղեկությունների փոխանակումն իրականացվում է «Տոհմային անասնաբուծության ոլորտում տոհմային կենդանիների և սելեկցիոն նվաճումների մասին տվյալների բազայի ձևավորում, վարում և օգտագործում» ընդհանուր գործընթացի շրջանակներում տեղեկատվական փոխգործակցության միջոցով.

բ) մինչ սույն կետի «ա» ենթակետում նշված ընդհանուր գործընթացը գործողության մեջ դնելը` անդամ պետությունների լիազորված մարմինները, որոնց իրավասությանն են վերապահված տոհմային անասնաբուծության հարցերը, փոխանակվում են (թղթային կրիչի վրա և (կամ) էլեկտրոնային տեսքով) հետևյալ տեղեկություններով՝

անդամ պետությունների միջև տեղափոխվող տոհմային արտադրանքի մասին՝ տոհմային արտադրանքի տոհմային վկայականների (հավաստագրերի, անձնագրերի) տրամադրման օրվանից 5 աշխատանքային օրվա ընթացքում.

սելեկցիոն նվաճումների մասին՝ դրանք գրանցելու օրվանից 5 աշխատանքային օրվա ընթացքում։

3. Սույն որոշումն ուժի մեջ է մտնում դրա պաշտոնական հրապարակման օրվանից 30 օրացուցային օրը լրանալուց հետո, սակայն Համաձայնագիրն ուժի մեջ մտնելու օրվանից ոչ շուտ։

Պաշտոնական հրապարակման օրը՝ 22 հունիսի 2022 թվական: