040.0771.25.11.00

«Վավերացնում եմ»
Հայաստանի Հանրապետության
Նախագահ Ռ. Քոչարյան
25 նոյեմբերի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 նոյեմբերի 2000 թվականի N 771
քաղ. Երևան

ՉԱՓՄԱՆ ՄԻՋՈՑՆԵՐԻ ՍՏՈՒԳԱՉԱՓՈՒՄ ԵՎ (ԿԱՄ) ՍՏՈՒԳԱՃՇՏՈՒՄ ԻՐԱԿԱՆԱՑՆՈՂ ԻՐԱՎԱԲԱՆԱԿԱՆ ԱՆՁԱՆՑ ՉԱՓԱԳԻՏԱԿԱՆ ԾԱՌԱՅՈՒԹՅՈՒՆՆԵՐԻ ՀԱՎԱՏԱՐՄԱԳՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Հայաստանի Հանրապետությունում չափումների միասնականության ապահովման մասին» Հայաստանի Հանրապետության օրենքի 13 հոդվածի 2-րդ կետի «ժ» ենթակետին և 18 հոդվածի 4-րդ կետին համապատասխան` Հայաստանի Հանրապետության կառավարությունը որոշում է.

Հաստատել չափման միջոցների ստուգաչափում և (կամ) ստուգաճշտում իրականացնող իրավաբանական անձանց չափագիտական ծառայությունների հավատարմագրման կարգը (կցվում է):

Կ Ա Ր Գ

չափման միջոցների ստուգաչափում ԵՎ (կամ) ստուգաճշտում իրականացնող իրավաբանական անձանց չափագիտական ծառայությունների հավատարմագրման

I. Ընդհանուր դրույթներ

1. Սույն կարգով սահմանվում են իրավաբանական անձանց չափագիտական ծառայություններին ներկայացվող պահանջները և դրանց հավատարմագրման կարգը:

2. Իրավաբանական անձանց չափագիտական ծառայություններին (այսուհետև` չափագիտական ծառայություն) չափման միջոցների ստուգաչափում և (կամ) ստուգաճշտում իրականացնելու իրավունք տրվում է Հայաստանի Հանրապետության կառավարությանն առընթեր ստանդարտացման, չափագիտության և սերտիֆիկացման վարչության (այսուհետև` Հայպետստանդարտ) որոշմամբ, սահմանված կարգով հավատարմագրվելուց հետո:

3. Չափագիտական ծառայության հավատարմագրումից հետո նրան Հայպետստանդարտի կողմից տրվում է հավատարմագրման վկայագիր:

II. Ստուգաչափում ԵՎ (կամ) ստուգաճշտում իրականացնելու համար հավատարմագրման ենթակա չափագիտական ծառայության տեխնիկական իրավասությանը ներկայացվող պահանջները

4. Ստուգաչափում և (կամ) ստուգաճշտում իրականացնելու համար հավատարմագրման ենթակա չափագիտական ծառայության տեխնիկական իրավասությանը ներկայացվող պահանջները սահմանվում են ՀՍՏ ԻՍՕ/ԻԷԿ 17025 ստանդարտով, Հայաստանի Հանրապետությունում չափումների միասնականության ապահովման համակարգի ստանդարտներով և սույն կարգով:

Չափագիտական ծառայությունը պետք է ունենա`

ա) որակի ապահովման համակարգ, որը պետք է համապատասխանի չափագիտական ծառայության գործունեության և կատարվող աշխատանքների ծավալին:

Որակի ապահովման համակարգի տարրերի վերաբերյալ փաստաթղթերը պետք է ներառված լինեն որակի ձեռնարկում` մշակված ԻՍՕ/ԻԷԿ ուղեցույցների համաձայն.

բ) որակի ձեռնարկ, որը պետք է պարունակի չափագիտական ծառայության ու ստուգաչափման և (կամ) ստուգաճշտման աշխատանքների կազմակերպման համալիր նկարագիրը:

Չափագիտական ծառայության որակի ձեռնարկը պետք է պարունակի`

չափագիտական ծառայության կառուցվածքը,

որակի քաղաքականության մասին հայտարարությունը,

գործունեության իրավասության նկարագիրը,

ներքին աուդիտի անցկացման ընթացակարգը,

պաշտոնեական հրահանգները,

աշխատանքների կատարման ընթացակարգերը և հրահանգները (կամ դրանց մասին վկայակոչումները):

Որակի ձեռնարկը վարում է ծառայության ղեկավարի կողմից նշանակված անձը, որի պարտականությունները սահմանվում են պաշտոնեական հրահանգով.

գ) տեխնիկական անձնագիր, որը պետք է պարունակի`

տեղեկատվական տվյալները,

հավատարմագրման ոլորտում նշված չափման միջոցների ստուգաչափման և (կամ) ստուգաճշտման համար անհրաժեշտ չափանմուշներով ապահովվածության (հագեցվածության) մասին տեղեկությունները,

կիրառվող նորմատիվ փաստաթղթերի մասին տեղեկությունները,

ստուգաչափում և (կամ) ստուգաճշտում կատարող անձնակազմի մասին տեղեկությունները,

արտադրական տարածքների վիճակի մասին տեղեկությունները.

դ) չափանմուշներ, նմուշային չափման միջոցներ (այսուհետև` ստուգաչափման և (կամ) ստուգաճշտման միջոցներ), որոնք ժամանակին պետք է ստուգաչափված լինեն և ունենան ստուգաչափման մասին գործող վկայականներ կամ չափման միջոցի վրա դրոշմի արտատիպը:

Ստուգաչափման և (կամ) ստուգաճշտման միջոցները պետք է պահվեն այնպիսի պայմաններում, որոնք ապահովում են դրանց պաշտպանվածությունը ժամանակից շուտ մաշվելուց և վնասվածքներից: Ստուգաչափման և (կամ) ստուգաճշտման միջոցների համար պետք է մշակված և հաստատված լինեն տեխնիկական սպասարկման, ինչպես նաև ստուգաչափման գրաֆիկներ, որոնք պետք է համաձայնեցվեն Հայպետստանդարտի հետ:

Ստուգաչափման և (կամ) ստուգաճշտման անսարք միջոցները պետք է հանվեն շահագործումից և մակնշվեն անսարքության մասին տվյալներով:

Յուրաքանչյուր ստուգաչափման և (կամ) ստուգաճշտման միջոց պետք է գրանցված լինի չափագիտական ծառայությունում:

Յուրաքանչյուր միավորի գրանցման փաստաթուղթը պետք է ներառի`

անվանումը,

արտադրող կազմակերպության անվանումը, տեսակը, գործարանային և գույքային համարը,

չափագիտական բնութագրերը,

արտադրման, ձեռքբերման և շահագործման տարեթվերը,

ձեռքբերման ժամանակ միավորի վիճակը (նոր է, օգտագործված է, նորոգումից հետո է և այլն),

տեղադրման վայրը,

անսարքության, նորոգման և տեխնիկական սպասարկման մասին տվյալները,

ստուգաչափման և (կամ) ստուգաճշտման միջոցների միջստուգաչափական ժամանակահատվածի մասին տվյալները.

ե) անձնակազմ, որի գործառույթները, իրավունքները, պարտականությունները, պատասխանատվությունը, կրթության, մասնագիտական պատրաստվածության, չափման միջոցների ստուգաչափման և (կամ) ստուգաճշտման ոլորտում աշխատանքային փորձի ու տեխնիկական գիտելիքների մասին պահանջները սահմանվում են որակի ձեռնարկում:

Ստուգաչափում իրականացնող անձինք, որպես ստուգաչափող, սահմանված կարգով պետք է վկայագրված լինեն լիազորված մարմնի` Հայպետստանդարտի ղեկավարի կողմից.

զ) շինություններ, որոնք ըստ արտադրական մակերեսի, վիճակի և շինությունում ապահովվող պայմանների (ջերմաստիճան, խոնավություն, օդի մաքրություն, լուսավորվածություն, աղմուկ, ձայնա- և թրթռամեկուսացում, ճառագայթային, մագնիսական, էլեկտրական և այլ ֆիզիկական դաշտերից պաշտպանվածություն, էլեկտրական էներգիայով, օդով, ջերմությամբ ու սառցակիրներով մատակարարում և այլն) պետք է համապատասխանեն ստուգաչափման և (կամ) ստուգաճշտման համար կիրառվող նորմատիվ փաստաթղթերի պահանջներին, սանիտարական կանոններին ու նորմերին, աշխատանքի անվտանգության և շրջակա միջավայրի պահպանության պահանջներին.

է) նորմատիվ փաստաթղթեր, որոնք վերաբերում են հավատարմագրման գործընթացին և սահմանվում միջազգային ու ազգային ստանդարտներով:

Չափագիտական ծառայությունը պետք է ունենա ընթացակարգեր` կապված ստուգաչափման և (կամ) ստուգաճշտման անցկացման, տեխնիկայի անվտանգության և փաստաթղթերի վարման հետ, որոնք ապահովում են նորմատիվ փաստաթղթերի արդիականացումը և դրանց առկայությունը սահմանված տեղերում:

(4-րդ կետը փոփ. 30.05.01 N 478)

III. Չափագիտական ծառայության հավատարմագրման ընթացակարգը

5. Իրավաբանական անձի չափագիտական ծառայությունը Հայպետստանդարտի հավատարմագրման բաժին է ներկայացնում հավատարմագրման հայտը` կից փաստաթղթերով, որոնց ձևերը սահմանվում են չափումների միասնականության ապահովման ազգային համակարգի ստանդարտներով:

Հայտին կից փաստաթղթերը ներառում են`

հավատարմագրման ոլորտը,

չափագիտական ծառայության տեխնիկական անձնագիրը,

որակի ձեռնարկը,

չափագիտական ծառայության մասին դրույթների նախագիծը:

IV. Չափագիտական ծառայության հավատարմագրման գործընթացը

6. Ստուգաչափում իրականացնող իրավաբանական անձանց չափագիտական ծառայության հավատարմագրման գործընթացն իրականացվում է հետևյալ հաջորդականությամբ`

հայտը և հայտին կից փաստաթղթերը փորձաքննության ներկայացնելը.

հայտին կից փաստաթղթերի փորձաքննության արդյունքների հիման վրա չափագիտական ծառայության հավատարմագրման աշխատանքները շարունակելու մասին եզրակացության կազմումը,

փորձագետներից կազմված գնահատման հանձնաժողովի ստեղծումը և կազմի հաստատումը,

չափագիտական ծառայության` հավատարմագրման չափանիշներին համապատասխանության գնահատումը (վկայագրումը)` ըստ ծառայության գտնվելու վայրի` սույն կարգի II բաժնին համապատասխան,

հավատարմագրման փաստաթղթերի փորձաքննության եզրակացության և գնահատման (վկայագրման) արդյունքների մասին Հայպետստանդարտի չափագիտության և չափողական տեխնիկայի գիտատեխնիկական հանձնաժողով (այսուհետև` ԳՏՀ) քննարկման համար հաշվետվություն ներկայացնելը,

ԳՏՀ-ում հավատարմագրման նյութերի քննարկումը,

Հայպետստանդարտի կողմից հավատարմագրման մասին որոշման ընդունումը կամ մերժումը,

հավատարմագրման վկայագրի ձևակերպումը, գրանցումը և հանձնումը,

չափագիտական ծառայության համապատասխանության հսկողությունը:

7. Ստուգաճշտում իրականացնող իրավաբանական անձանց չափագիտական ծառայության հավատարմագրման գործընթացն իրականացվում է հետևյալ հաջորդականությամբ`

հայտը և հայտին կից փաստաթղթերը փորձաքննության ներկայացնելը,

փորձագետներից կազմված գնահատման հանձնաժողովի ստեղծումը և կազմի հաստատումը,

չափագիտական ծառայության` հավատարմագրման չափանիշներին համապատասխանության գնահատումը (վկայագրումը)` ըստ դրա գտնվելու վայրի` սույն կարգի II բաժնին համապատասխան,

Հայպետստանդարտի կողմից հավատարմագրման մասին որոշման ընդունումը կամ մերժումը,

հավատարմագրման վկայագրի ձևակերպումը, գրանցումը և հանձնումը,

չափագիտական ծառայության համապատասխանության հսկողությունը:

8. Հայպետստանդարտը հայտը ներկայացնելու օրվանից մեկ ամսվա ընթացքում կատարում է սույն կարգի 5-րդ կետում նշված փաստաթղթերի փորձաքննություն, որի դրական արդյունքների հիման վրա կազմում է հայտատուի հավատարմագրման գործընթացը շարունակելու հնարավորության մասին եզրակացությունը, հաստատում փորձագետներից բաղկացած հանձնաժողովի կազմը:

Հանձնաժողովի կազմում ընդգրկվում են համապատասխան որակավորում ունեցող մասնագետներ:

Փաստաթղթերի փորձաքննության բացասական արդյունքների դեպքում փաստաթղթերը վերադարձվում են հայտատուին: Լրամշակված փաստաթղթերը կարող են ներկայացվել Հայպետստանդարտ` կրկնակի փորձաքննության: Փաստաթղթերի կրկնակի փորձաքննությունը կարող է տևել մինչև մեկ ամիս:

9. Հանձնաժողովը գնահատման արդյունքների հիման վրա կազմում է հաշվետվություն, որում առաջարկվում է հավատարմագրել կամ հավատարմագրումը մերժել` նշելով մերժման պատճառները:

10. Ստուգաչափում իրականացնող չափագիտական ծառայության հավատարմագրման նյութերը, փաստաթղթերի փորձաքննության մասին եզրակացությունը, գնահատման հաշվետվությունը ներկայացվում են ԳՏՀ` քննարկման համար:

ԳՏՀ-ն (ստեղծվում է Հայպետստանդարտի կոլեգիայի որոշմամբ` չափագիտության ոլորտում գիտատեխնիկական քաղաքականության ձևավորման և չափումների միասնականության ապահովման աշխատանքների համակարգման նպատակով) 15 օրվա ընթացքում, քննարկման արդյունքների հիման վրա, Հայպետստանդարտի հավատարմագրման բաժին է ներկայացնում հավատարմագրման վերաբերյալ իր առաջարկությունը:

11. Հայպետստանդարտը ներկայացված նյութերի, փաստաթղթերի փորձաքննության, գնահատման (վկայագրում) արդյունքների (իսկ ստուգաչափում իրականացնող չափագիտական ծառայության հավատարմագրման դեպքում` նաև ԳՏՀ-ի առաջարկության) հիման վրա մեկ ամսվա ընթացքում ընդունում է որոշում իրավաբանական անձի չափագիտական ծառայությունը հավատարմագրելու կամ հավատարմագրումը մերժելու մասին:

Հավատարմագրման մասին որոշում ընդունվելու դեպքում տրվում է հավատարմագրման վկայագիր (ձևը կցվում է), որը 2 օրվա ընթացքում գրանցվում է հավատարմագրման գրանցամատյանում:

12. Չափագիտական ծառայության, հավատարմագրման վկայագրի գրանցման, ստուգաչափման և (կամ) ստուգաճշտման դրոշմի ծածկագրի շնորհման և չափման միջոցների ստուգաչափում իրականացնելու համար հավատարմագրված չափագիտական ծառայությունների գրանցամատյանի վարման կարգերը սահմանվում են չափումների միասնականության ապահովման ազգային համակարգի ստանդարտներով:

13. Հավատարմագրման վկայագրի գործողության ժամկետի ընթացքում հավատարմագրված իրավաբանական անձի չափագիտական ծառայությունը հավատարմագրման ոլորտի ընդլայնման կամ կրճատման համար կարող է հայտ ներկայացնել Հայպետստանդարտի հավատարմագրման բաժին:

Հավատարմագրման ոլորտն ընդլայնվում է կամ կրճատվում է սույն կարգի 6-րդ կետին համապատասխան:

Հավատարմագրված չափագիտական ծառայության հավատարմագրման ոլորտը կարող է ընդլայնվել կամ կրճատվել նաև համապատասխանության հսկողության արդյունքներով:

V. Ստուգաչափում ԵՎ (կամ) ստուգաճշտում իրականացնող հավատարմագրված չափագիտական ծառայության գործունեության համապատասխանության հսկողությունը

14. Ստուգաչափում և (կամ) ստուգաճշտում իրականացնող հավատարմագրված չափագիտական ծառայության գործունեության համապատասխանության հսկողությունն իրականացնում է Հայպետստանդարտը:

VI. Հավատարմագրված չափագիտական ծառայության հավատարմագրման վկայագրի գործողության կասեցումը կամ հավատարմագրման վկայագրի չեղյալ հայտարարումը

15. Հայպետստանդարտը չափագիտական ծառայության հավատարմագրման վկայագրի գործողությունը կարող է կասեցնել, եթե`

ա) համապատասխանության հսկողության արդյունքներով պարզվել է, որ չափագիտական ծառայությունն իր չափանիշներով չի համապատասխանում հավատարմագրված չափագիտական ծառայությանը ներկայացվող պահանջներին.

բ) հավատարմագրված չափագիտական ծառայությունն ընդունել է որոշում հավատարմագրված գործունեությունը ժամկետից շուտ դադարեցնելու մասին:

16. Հայպետստանդարտը չափագիտական ծառայության հավատարմագրման վկայագիրը կարող է չեղյալ հայտարարել, եթե`

ա) համապատասխանության հսկողության արդյունքներով պարզվել է, որ չափագիտական ծառայությունն իր գործառույթներով չի համապատասխանում հավատարմագրված չափագիտական ծառայությանը ներկայացվող պահանջներին.

բ) հավատարմագրված չափագիտական ծառայությունն ընդունել է որոշում հավատարմագրումից հրաժարվելու մասին.

գ) լուծարվել է իրավաբանական անձը:

VII. Հավատարմագրմանը վերաբերող` ընդունված որոշումների բողոքարկումը

17. Իրավաբանական անձը կարող է հավատարմագրմանը վերաբերող` ընդունված որոշումները բողոքարկել օրենքով սահմանված կարգով:

Ձև

ՀՀ զինանշանը

Հ Ա Վ Ա Տ Ա Ր Մ Ա Գ Ր Մ Ա Ն  Վ Կ Ա Յ Ա Գ Ի Ր

չափագիտական ծառայության չափման միջոցների ստուգաչափում ԵՎ (կամ) ստուգաճշտում իրականացնելու

Գրանցված է հավատարմագրման

գրանցամատյանում

_____ ___________ _____ թ.

N _____________

Ուժի մեջ է մինչև ___ _____ ____ թ.

Սույն վկայագիրը հավաստում է, որ __________________________________

(իրավաբանական անձի անվանումը, գտնվելու վայրը)

_______________________________________________ չափագիտական

ծառայությունը համապատասխանում է ________________________________

ստանդարտի պահանջներին և հավատարմագրված է սույն վկայագրին կից հավելվածով`

կազմված _____ էջից, հավատարմագրման ոլորտի շրջանակներում ստուգաչափում և

(կամ) ստուգաճշտում կատարելու համար:

Հ ա վ ե լ վ ա ծ  N ____

հավատարմագրման վկայագրի

N ___________________

____ _____________ _____ թ.

Չափագիտական ծառայության հավատարմագրման ոլորտը

____________________________________________________________

(իրավաբանական անձի անվանումը, գտնվելու վայրը)

_____________________________________________________________

(ստուգաչափման և (կամ) ստուգաճշտման դրոշմի ծածկագիրը)

(կարգը փոփ. 30.05.01 N 478)