ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԵՐԵՎԱՆ ՔԱՂԱՔԻ ԱՎԱԳԱՆՈՒ 2009 ԹՎԱԿԱՆԻ ՀՈՒՆԻՍԻ 18-Ի N 1-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Ղեկավարվելով «Իրավական ակտերի մասին» Հայաստանի Հանրապետության օրենքի 70-րդ հոդվածի 2-րդ և 3-րդ մասերով՝

Երևան քաղաքի ավագանին որոշում է.

1. Երևան քաղաքի ավագանու 2009 թվականի հունիսի 18-ի «Երևան քաղաքի ավագանու կանոնակարգը ընդունելու մասին» N 1-Ն որոշման հավելվածում կատարել հետևյալ փոփոխությունները և լրացումները՝

1) 3-րդ կետը շարադրել հետևյալ խմբագրությամբ.

«3. Ավագանու մարմիններն են՝ Քաղաքապետը, նրա առաջին տեղակալը, Ավագանու անդամները և Ավագանու հանձնաժողովները:»:

2) 4-րդ կետը «Ավագանիում ստեղծվում են խմբակցություններ» բառերից հետո լրացնել (այսուհետ՝ Խմբակցություններ) բառերը:

3) 7-րդ կետը «ինչպես նաև իր մարմինների» բառերից հետո լրացնել «և Խմբակցությունների» բառերը:

4) 13-րդ կետը լրացնել հետևյալ բովանդակությամբ՝ 5.1-րդ, 12.1-րդ 14.1-րդ, 22.1-րդ, 42.1-րդ, 51.1-րդ և 51.2-րդ ենթակետերով.

«5.1) Քաղաքապետի ներկայացմամբ սահմանում է քաղաքապետի խորհրդականների և օգնականների թվաքանակը.».

«12.1) քննարկում և որոշում է կայացնում Քաղաքապետին կից, Երևանի տարածքում հասարակական կարգով գործող խորհրդակցական մարմինների քանակի, անվանումների ու ձևավորման կարգը հաստատելու մասին.».

«14.1) սահմանում է Երևանի խորհրդանիշերի՝ զինանշանի և դրոշի նկարագրությունը, Երևանի օրհներգը, ինչպես նաև Ավագանու, Քաղաքապետի, Երևանի ենթակայության կազմակերպությունների կողմից Երևանի խորհրդանիշերի պարտադիր օգտագործման այլ դեպքերը և կարգը.».

«22.1) Վերահսկողություն է իրականացնում Քաղաքապետի գործունեության, ինչպես նաև իր որոշումների կատարման նկատմամբ.».

«42.1) Որոշում է ընդունում նշանավոր մարդկանց հիշատակը հավերժացնող հուշարձանների իրականացմանը համաձայնություն տալու վերաբերյալ.».

«51.1) քննարկում է Հայաստանի Հանրապետության վերահսկիչ պալատի իրականացրած վերահսկողության և այլ իրավասու պետական մարմինների իրականացրած ստուգումների արդյունքները և իր իրավասության շրջանակում դրանց վերաբերյալ ընդունում է որոշում.».

«51.2) քննարկում և որոշում է կայացնում Երևանում տեղական ինքնակառավարմանը բնակիչների մասնակցության կարգը հաստատելու վերաբերյալ.»:

5) 13-րդ կետի 6-րդ ենթակետը «Քաղաքապետի տեղակալների» բառերից հետո լրացնել «Երևանի գլխավոր ճարտարապետի» բառերով:

6) 40-րդ ենթակետը շարադրել հետևյալ խմբագրությամբ.

«40) Ավագանու հերթական նիստում՝ Ավագանու անդամների առնվազն մեկ երրորդի պահանջով, կարող են անցկացվել հասարակական հետաքրքրություն ներկայացնող հրատապ թեմայով քննարկումներ.»։

7) 20-րդ կետի երկրորդ նախադասությունը շարադրել հետևյալ խմբագրությամբ.

«Քաղաքապետը ներկայացված Իրավական ակտի նախագիծը կարող է չընդգրկել Ավագանու նիստի օրակարգ, եթե Հանձնաժողովներից ստացված կարծիքներով կամ Ավագանու անդամների առաջարկներով հիմնավորվում է, որ նշված Իրավական ակտի ընդունումը դուրս է Ավագանու իրավասությունից։ Այդ մասին Քաղաքապետը եռօրյա ժամկետում տեղեկացնում է նախաձեռնության հեղինակին։»։

8) 21-րդ կետը շարադրել հետևյալ խմբագրությամբ.

«21. Քաղաքապետարանի աշխատակազմի քարտուղարը՝ նախաձեռնությունները ստանալուց հետո ոչ ուշ, քան հաջորդ օրը, քննարկման նպատակով դրանք տրամադրում է Քաղաքապետին, Խմբակցություններին, Ավագանու անդամներին, Ավագանու մշտական հանձնաժողովների կազմից Քաղաքապետի նշանակած գլխադասային և մյուս հանձնաժողովներին: Գլխադասային հանձնաժողով նշանակվում է Ավագանու այն մշտական հանձնաժողովը, որի իրավասության մեջ է մտնում Իրավական ակտի նախագծով ներկայացված հարցի քննարկումը: Գլխադասային հանձնաժողովը և Քաղաքապետը՝ նախաձեռնությունը ստանալուց հետո ոչ ուշ, քան Ավագանու հերթական նիստից առնվազն տասն օր առաջ Քաղաքապետարանի աշխատակազմի քարտուղարին են ներկայացնում նախաձեռնության վերաբերյալ իրենց եզրակացությունները: Նույն ժամկետում նախաձեռնությունների վերաբերյալ առաջարկություններ և կարծիքներ կարող են ներկայացնել նաև Ավագանու անդամները և Ավագանու մյուս հանձնաժողովները:»:

9) Լրացնել 22.1 կետով՝ շարադրելով հետևյալ բովանդակությամբ.

«22.1. Նախաձեռնության հեղինակի կողմից ստացված Իրավական ակտի նախագիծը, կից փաստաթղթերը, գլխադասային հանձնաժողովի եզրակացությունը և տեղեկանք-ամփոփաթերթը Քաղաքապետարանի աշխատակազմի քարտուղարը, մեկ օրվա ընթացքում ներկայացնում է Քաղաքապետին՝ հերթական նիստի օրակարգում ընդգրկելու համար։»։

10) 23-րդ կետում «նույն օրն» բառերը փոխարինել «մեկ օրվա ընթացքում» բառերով, իսկ «երկու օր» բառերը»՝ «երեք օր» բառերով։»։

11) Լրացնել հետևյալ բովանդակությամբ՝ 23.1-րդ կետով.

«23.1. Նիստի օրակարգի նախագիծը, դրանում ընդգրկված Իրավական ակտերի նախագծերը, դրանց կցված փաստաթղթերը, տեղեկանք-ամփոփաթերթերը և գլխադասային հանձնաժողովների եզրակացությունները՝ հերթական նիստը սկսվելուց առնվազն մեկ շաբաթ առաջ տրամադրվում է Ավագանու անդամներին:»:

12) Լրացնել հետևյալ բովանդակությամբ՝ 24.1-րդ կետով.

«24.1. Կանոնակարգի 21-րդ, 22-րդ, 23-րդ և 24-րդ կետերում նշված Իրավական ակտի նախագիծը և կից փաստաթղթերը, Խմբակցություններին, Ավագանու անդամներին և Հանձնաժողովներին տրամադրվում են Ավագանու նստավայրում՝ թղթային տարբերակով առձեռն կամ էլեկտրոնային փոստի հասցեներին ուղարկելու միջոցով:»:

13) Լրացնել հետևյալ բովանդակությամբ՝ 24.2-րդ կետով.

«24.2. Իրավական ակտի նախագիծը քննարկման ցանկացած փուլում, սակայն մինչ Ավագանու նիստում քվեարկության անցկացումը, հեղինակի պահանջով հանվում է շրջանառությունից։»։

14) 26-րդ կետը «համացանցային կայքում» բառերից հետո լրացնել «, ինչպես նաև հttp://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում:»:

15) 35-րդ կետը լրացնել հետևյալ բովանդակությամբ 4.1-րդ, 4.2-րդ և 4.3-րդ ենթակետերով.

«4.1. պարբերաբար հանդիպել համայնքի բնակչության հետ, համայնքի ընտրողներին տեղեկացնել համայնքի ավագանու աշխատանքների մասին.».

«4.2. օժանդակել համայնքում տեղական ինքնակառավարմանը բնակիչների մասնակցությանը.».

«4.3. ստորագրել իր մասնակցությամբ ընդունված փաստաթղթերը»:

16) 35-րդ կետի 4-րդ ենթակետը լրացնել «հակառակ դեպքում՝ նրա քվեարկությունը ճանաչվում է անվավեր։» բառերով։

17) Լրացնել հետևյալ բովանդակությամբ՝ 36.1-րդ կետով.

«36.1. Ավագանու անդամին իր լիազորությունների ժամկետով տրվում է Ավագանու անդամի վկայական:»:

18) 40-րդ կետը ճանաչել ուժը կորցրած:

19) 41-րդ կետը շարադրել հետևյալ խմբագրությամբ.

«41. Կանոնակարգի 39-րդ կետում նախատեսված դեպքերում Ավագանու անդամի լիազորությունները վաղաժամկետ դադարեցվում են Ավագանու որոշմամբ: Նիստ գումարելու անհնարինության դեպքում Ավագանու անդամները կազմում են Ավագանու անդամի լիազորությունների դադարեցման մասին արձանագրություն, բացառությամբ Կանոնակարգի 39-րդ կետի 7-րդ ենթակետով նախատեսված դեպքի:»:

20) 49-րդ կետը «առանձին աշխատասենյակներով» բառերից հետո լրացնել «Երևանի իրավական ակտերի տեղեկագրով և օրաթերթերով:» բառերով:

21) 53-րդ կետը «անունից» բառից հետո լրացնել «իրենց իրավասություններին վերապահված հարցերով, Քաղաքապետի գործունեության և Ավագանու որոշումների կատարման նկատմամբ» բառերով։

22) 55-րդ կետում «անդամներ չեն հանդիսանում» բառերը փոխարինել «կազմում չեն ընդգրկվում» բառերով։

23) 56-րդ կետը «բացման օրը» բառերից հետո լրացնել «Օրենքով սահմանված կարգով» բառերով, իսկ շարունակությունը, ինչպես նաև 57-58 կետերը հանել։

24) 62-րդ կետը «կանոնակարգը» բառից հետո լրացնել «և իր անվամբ՝ սահմանված նմուշի ձևաթուղթ» բառերով։

25) 64-րդ կետը լրացնել «իսկ նստաշրջանների միջակայքում՝ ըստ անհրաժեշտության» բառերով։

26) 69-րդ և 70-րդ կետերը «Հանձնաժողովի» բառից հետո լրացնել «հերթական» բառերը:

27) 77-րդ կետը լրացնել.

ա. «գումարվում է» բառից հետո «անհետաձգելի քննարկում և որոշման ընդունում պահանջող հարցերի առկայության դեպքում» բառերով,

բ. «ժամկետում» բառից հետո «և օրակարգով, ինչպես նստաշրջանների ընթացքում, այնպես էլ՝ նստաշրջաններից դուրս» բառերով,

գ. հետևյալ բովանդակությամբ նոր նախադասությամբ.

«Արտահերթ նիստի հրավիրման և անցկացման կարգը սահմանվում է Հանձնաժողովի կանոնակարգով, իսկ հարցերը քննարկվում են սույն կանոնակարգի 70-74 կետերով նախատեսված ընթացակարգով, սակայն նախաձեռնողի սահմանած օրակարգով։»։

28) 81-րդ կետի 3-րդ ենթակետը «նիստի» բառից առաջ լրացնել «հերթական» բառով, իսկ 4-րդ ենթակետում «կարծիքը և /կամ/ եզրակացությունը» բառերը փոխարինել «որոշումները և գրությունները» բառերով:

29) 83-րդ կետում «Հանձնաժողովների նախագահները» բառերը փոխարինել «Քաղաքապետարանի աշխատակազմի քարտուղարը» բառերով։

30) 87-րդ կետի երկրորդ նախադասությունը շարադրել հետևյալ խմբագրությամբ.

«Ավագանին ժամանակավոր հանձնաժողով ստեղծելիս սահմանում է նրա խնդիրները, լիազորությունները, գործունեության կարգը և ժամկետները, նշանակում հանձնաժողովի նախագահ և անդամներ: Ժամանակավոր հանձնաժողովը կազմված է Խմբակցությունների հավասար թվով ներկայացուցիչներից: Ավագանու որոշմամբ ժամանակավոր հանձնաժողովի աշխատանքներին կարող են ներգրավվել փորձագետներ:»:

31) Լրացնել հետևյալ բովանդակությամբ՝ 89.1-րդ կետով.

«89.1. Քննող հանձնաժողովը ստեղծվում է Ավագանու որոշմամբ, որով սահմանվում է հանձնաժողովի կազմը, այդ թվում՝ խնդիրները, լիազորությունները և գործունեության ժամկետը:»։

32) 103-րդ կետը «առնվազն մեկ» բառերից հետո լրացնել «հերթական» բառով։

33) 104-րդ կետում.

ա. «այդ մասին կայացնելով համապատասխան որոշում» բառերը հանել.

բ. լրացնել հետևյալ բովանդակությամբ՝ նոր նախադասությամբ.

«Օրենքով ոչ աշխատանքային՝ տոնական և հիշատակի օրերին, ինչպես նաև տոների և հիշատակի օրերի հետ կապված՝ Հայաստանի Հանրապետության կառավարության կողմից տեղափոխված ոչ աշխատանքային օրերին հերթական նիստեր չեն անցկացվում:»:

34) 114-րդ կետի 4-րդ և 5-րդ ենթակետերը «օրակարգի» բառից առաջ լրացնել «հերթական նիստի» բառերով:

35) 114-րդ կետի 6-րդ ենթակետի առաջին նախադասությունում «գլխադասային հանձնաժողովի և Քաղաքապետարանի աշխատակազմի ներկայացուցիչներ» բառերը փոխարինել «, գլխադասային հանձնաժողովի ներկայացուցիչը, Քաղաքապետը կամ նրա ներկայացուցիչը:» բառերով:

36) 114-րդ կետի 8-րդ ենթակետի երկրորդ նախադասությունը «երկուական րոպե» բառերից հետո լրացնել «, իսկ պատասխանի համար՝ մինչև 5 րոպե.» բառերով:

37) Ուժը կորցրած ճանաչել 114-րդ կետի 15-րդ ենթակետը:

38) 114-րդ կետը լրացնել 18.1 ենթակետով՝ հետևյալ բովանդակությամբ.

«18.1) Մինչև քվեարկության անցկացումը, Խմբակցությունը կամ Ավագանու անդամը կարող են հանդես գալ հարցի քվեարկությանը մասնակցելուց հրաժարվելու մասին հայտարարությամբ։»։

39) 115-րդ կետում «Եթե ձևաթուղթը ստացման պահից երկու օրվա ընթացքում» բառերը փոխարինել «Եթե ձևաթուղթը ստացման պահից 48 ժամվա ընթացքում» բառերով:

40) 116-րդ կետը շարադրել հետևյալ խմբագրությամբ.

«116. Ավագանու արտահերթ նիստը անցկացվում է նախաձեռնողի սահմանած օրակարգով և ժամկետում, սակայն նախաձեռնությունից ոչ շուտ, քան երեք օրից: Արտահերթ նիստեր կարող են գումարվել նաև հերթական նստաշրջաններից դուրս:»:

41) 117-րդ կետը շարադրել հետևյալ խմբագրությամբ.

«117. Արտահերթ նիստի օրակարգը, դրանում ընդգրկված Իրավական ակտերի նախագծերը և դրանց կցված փաստաթղթերը Խմբակցություններին, Ավագանու անդամներին, Քաղաքապետի նշանակած գլխադասային հանձնաժողովին և մյուս հանձնաժողովներին տրամադրվում են արտահերթ նիստը նախաձեռնելուց հետո ոչ ուշ, քան 24 ժամվա ընթացքում: Նույն ժամկետում այդ նյութերը պետք է տեղադրվեն Երևանի պաշտոնական համացանցային կայքում:

Գլխադասային հանձնաժողովը արտահերթ նիստը սկսելուց ոչ ուշ, քան 1 ժամ առաջ ներկայացնում է Իրավական ակտի նախագծի վերաբերյալ իր եզրակացությունը:»:

42) 141-րդ կետը «մյուս Հանձնաժողովների» բառերից հետո լրացնել «և Խմբակցությունների» բառերով։

43) Լրացնել հետևյալ բովանդակությամբ՝ 157-րդ կետով.

«157. Երևանի զարգացման քառամյա ծրագրի և /կամ/ տարեկան բյուջեի կառավարման /կազմման, հանրային քննարկման, իրականացման /կատարման/ և վերահսկման/ գործընթացներում Երևանի բնակիչների մասնակցությունն ապահովելու համար, Քաղաքապետի առաջարկությամբ և Ավագանու որոշմամբ ձևավորվում է Քաղաքապետին կից խորհրդակցական մարմին՝ Քաղաքապետարանի աշխատակազմի և համայնքային կազմակերպությունների համապատասխան մասնագետների ընդգրկմամբ, ինչպես նաև Ավագանու մեկից մինչև երեք անդամների, բնակիչների, փորձագետների և այլ շահագրգիռ անձանց ներգրավմամբ /վերջիններիս համաձայնությամբ/:

44) Լրացնել հետևյալ բովանդակությամբ՝ 158-րդ կետով.

«158. Քաղաքապետը մինչև Երևանի զարգացման քառամյա, տարեկան ծրագրի և /կամ/ տարեկան բյուջեի նախագծերը Ավագանու հաստատմանը ներկայացնելը կազմակերպում և անցկացնում է հանրային բաց լսումներ և /կամ/ քննարկումներ «Իրավական ակտերի մասին» Հայաստանի Հանրապետության օրենքի 27.1-րդ հոդվածով սահմանված ժամկետում: Հանրային բաց լսումներում կամ քննարկումներում ստացված և ընդունված դիտողությունների և առաջարկությունների վերաբերյալ Քաղաքապետը տրամադրում է տեղեկատվություն Ավագանուն:»: