ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

20 սեպտեմբերի 2012 թվականի N 1190-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՀՈՒՆԻՍԻ 9-Ի N 947-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

«Զինծառայողների և նրանց ընտանիքների անդամների սոցիալական ապահովության մասին» Հայաստանի Հանրապետության օրենքի 34-րդ հոդվածի պահանջներին համապատասխան` Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2005 թվականի հունիսի 9-ի «Անհատույց պետական ֆինանսական աջակցություն տրամադրելու մասին» N 947-Ն որոշման մեջ կատարել հետևյալ լրացումները և փոփոխությունները`

1) որոշման 1-ին կետը «կարիքավոր» բառից առաջ լրացնել «օրենքով սահմանված» բառերով.

2) որոշման 2-րդ կետից հանել «և էկոնոմիկայի» բառերը.

3) որոշման 1-ին կետով հաստատված կարգի (այսուհետ` կարգ) վերնագիրը «կարիքավոր» բառից առաջ լրացնել «օրենքով սահմանված» բառերով.

4) կարգի 1-ին կետը`

ա. «ունեցող» բառից հետո լրացնել «օրենքով սահմանված» բառերով,

բ. լրացնել հետևյալ բովանդակությամբ նոր նախադասությամբ.

«Սույն կարգով նախատեսված` զոհված (մահացած) կամ հաշմանդամ դարձած զինծառայողների` օրենքով սահմանված ընտանիքների անդամների բնակարանային ապահովության նպատակով անհատույց պետական ֆինանսական աջակցություն տրամադրելու պայմանները տարածվում են նաև Հայաստանի Հանրապետության պաշտպանության նախարարության համակարգի զոհված (մահացած) կամ հաշմանդամ դարձած քաղաքացիական ծառայողների` օրենքով սահմանված ընտանիքների անդամների վրա:».

5) կարգի 3-րդ կետում`

ա. «վարձով կամ պետական բնակարանային ֆոնդի տներում» բառերը փոխարինել «վարձակալությամբ» բառով,

բ. «հաշվառված» բառից հետո կետը լրացնել «օրենքով սահմանված» բառերով.

6) ուժը կորցրած ճանաչել կարգի 5-րդ կետի երրորդ պարբերությունը.

7) կարգի 9-րդ կետի երկրորդ նախադասությունը շարադրել հետևյալ խմբագրությամբ.

«Աջակցությունը վճարվում է անկանխիկ` օրենքով սահմանված կարիքավոր ընտանիքի՝ չափահաս անդամների համաձայնությամբ` ընտանիքի անդամներից որևէ մեկի անվամբ բացված հաշվարկային հաշվին փոխանցում կատարելու միջոցով:».

8) կարգը լրացնել հետևյալ բովանդակությամբ նոր` 9.1-ին կետով.

«9.1. Աջակցություն ստացած կարիքավոր ընտանիքը չի կարող կրկին բնակարանային հաշվառման վերցվել` անկախ հետագայում բնակարանային պայմանները վատթարանալու կամ տրամադրված աջակցության գումարով բնակելի տարածություն ձեռք չբերելու հանգամանքից:».

 9) կարգի 11-րդ կետից հանել «և էկոնոմիկայի» բառերը:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: