Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՔՍԱՅԻՆ ՍԱՀՄԱՆՈՎ ՏԵՂԱՓՈԽՎՈՂ ԱՎՏՈՏՐԱՆՍՊՈՐՏԱՅԻՆ ՄԻՋՈՑՆԵՐԻ ՆԿԱՏՄԱՄԲ ՄԱՔՍԱՅԻՆ ՀՍԿՈՂՈՒԹՅԱՆ ԵՎ ՁԵՎԱԿԵՐՊՈՒՄՆԵՐԻ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ի կատարումն Հայաստանի Հանրապետության կառավարության 2002 թվականի դեկտեմբերի 13-ի N 2144-Ն որոշման 3-րդ կետի «գ» ենթակետի, ելնելով Հայաստանի Հանրապետության մաքսային սահմանով տեղափոխվող ավտոտրանսպորտային միջոցների նկատմամբ մաքսային և պետավտոտեսչության մարմինների կողմից իրականացվող հսկողության արդյունավետության բարձրացման անհրաժեշտությունից

Հրամայում ենք՝

Հաստատել Հայաստանի Հանրապետության մաքսային սահմանով տեղափոխվող ավտոտրանսպորտային միջոցների նկատմամբ մաքսային հսկողության և ձևակերպումների իրականացման կարգը (համաձայն հավելվածի):

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՔՍԱՅԻՆ ՍԱՀՄԱՆՈՎ ՏԵՂԱՓՈԽՎՈՂ ԱՎՏՈՏՐԱՆՍՊՈՐՏԱՅԻՆ ՄԻՋՈՑՆԵՐԻ ՆԿԱՏՄԱՄԲ ՄԱՔՍԱՅԻՆ ՀՍԿՈՂՈՒԹՅԱՆ ԵՎ ՁԵՎԱԿԵՐՊՈՒՄՆԵՐԻ ԻՐԱԿԱՆԱՑՄԱՆ

1. «Ներմուծում՝ ազատ շրջանառության համար», «Վերաներմուծում» և «Սեփականության իրավունքից հրաժարում՝ հօգուտ պետության» մաքսային ռեժիմներով Հայաստանի Հանրապետություն կարող են ներմուծվել միայն այլ պետություններում հաշվառման չկանգնած կամ հաշվառումից հանված ավտոտրանսպորտային միջոցներ:

2. Ըստ Արտաքին Տնտեսական Գործունեության Ապրանքային Անվանացանկի 8702, 8703, 8704, 8705 ապրանքային դիրքերի ավտոտրանսպորտային միջոցների «Ներմուծում՝ ազատ շրջանառության համար», «Վերաներմուծում» (միայն «Արտահանում՝ ազատ շրջանառության համար» ռեժիմին հաջորդող), «Սեփականության իրավունքից հրաժարում՝ հօգուտ պետության» և «Արտահանում՝ ազատ շրջանառության համար» մաքսային ռեժիմներով մաքսային ձևակերպումներն իրականացվում են Հայաստանի Հանրապետության կառավարությանն առընթեր մաքսային պետական կոմիտեի ավտոտրանսպորտային միջոցների մաքսային ձևակերպումների մասնագիտացված մաքսային կետում:

Սույն կետի առաջին պարբերությունում չնշված մաքսային ռեժիմներով ավտոտրանսպորտային միջոցների մաքսային ձևակերպումներն իրականացվում են Հայաստանի Հանրապետության օրենսդրությամբ սահմանված վայրերում:

3. Մաքսատներում և մաքսային կետերում Հայաստանի Հանրապետության մաքսային սահմանով տեղափոխվող ավտոտրանսպորտային միջոցի բոլոր փաստաթղթերը հանձնվում են մաքսային մարմիններին՝ եթե տվյալ ավտոտրանսպորտային միջոցի համար ընտրվում է «Ներմուծում՝ ազատ շրջանառության համար», «Վերաներմուծում», «Սեփականության իրավունքից հրաժարում՝ հօգուտ պետության» մաքսային ռեժիմները: Փաստաթղթերը ծրարվում և կնքվում են մաքսատան կամ մաքսային կետի պաշտոնատար անձի կողմից և հետագա մաքսային ձևակերպումների համար, փոխադրման ամփոփագրի ավտոտրանսպորտային միջոցների մաքսային ձևակերպումների մասնագիտացված մաքսային կետի համար նախատեսված օրինակի հետ մեկտեղ, ուղարկվում են Հայաստանի Հանրապետության կառավարությանն առընթեր մաքսային պետական կոմիտե, որը հաշվառելով այդ փաստաթղթերը, դրանք ուղարկում է ավտոտրանսպորտային միջոցների մաքսային ձևակերպումների մասնագիտացված մաքսային կետ մաքսային ձևակերպումներ իրականացնելու համար: Ավտոտրանսպորտային միջոցներ տեղափոխող անձին տրվում է փոխադրման ամփոփագիր, որը հանդիսանում է տվյալ ավտոտրանսպորտային միջոցի տեխնիկական անձնագրին փոխարինող հիմնական փաստաթուղթ, որը գործում է տվյալ ավտոտրանսպորտային միջոցի ներմուծման օրվանից մինչև 10 օր ժամկետով:

Փոխադրման ամփոփագրի ձևը փոփոխվելուց առնվազն 10 օր առաջ Հայաստանի Հանրապետության կառավարությանն առընթեր ՄՊԿ-ի կողմից Հայաստանի Հանրապետության ոստիկանության պետավտոտեսչության վարչությանը տրամադրվում է նոր ձևի նմուշը:

4. Հայաստանի Հանրապետության կառավարությանն առընթեր Հայաստանի Հանրապետության ոստիկանության պետավտոտեսչության վարչության համապատասխան ստորաբաժանումներում ավտոտրանսպորտային միջոցները գրանցելու և հաշվառելու համար հիմք է հանդիսանում մաքսային մարմինների կողմից վավերացված մաքսային հայտարարագիրը՝ լրացված «Ներմուծում՝ ազատ շրջանառության համար», «Վերաներմուծում» կամ «Սեփականության իրավունքից հրաժարում՝ հօգուտ պետության» մաքսային ռեժիմներով, բացառությամբ՝ ժամանակավոր հաշվառման դեպքերի, երբ հաշվառման համար հիմք է հանդիսանում «ժամանակավոր ներմուծում» կամ «ժամանակավոր ներմուծում՝ վերամշակման համար» մաքսային ռեժիմներով լրացված և մաքսային մարմինների կողմից վավերացված մաքսային հայտարարագիրը:

5. «Ներմուծում՝ ազատ շրջանառության համար», «Վերաներմուծում» և «Սեփականության իրավունքից հրաժարում՝ հօգուտ պետության» մաքսային ռեժիմներով ավտոտրանսպորտային միջոցների համար լրացվող մաքսային հայտարարագրերի դարձերեսին հայտարարագիրը վավերացնող մաքսային մարմինը ստորև նշված հաջորդականությամբ նշում է հետևյալ տեղեկատվությունը.

ա) ավտոտրանսպորտային միջոցի մակնիշը, մոդելը, թափքի տեսակը, գույնը, թողարկման տարեթիվը, նույնականացման համարը, շարժիչի հզորությունը, շարժիչի, թափքի և ամրաշրջանակի համարները, տարանցիկ համարանիշը, մաքսային սահմանին ներմուծման ժամանակ հանձնված տեխնիկական անձնագրի (կտրոնի) համարը և այլ անհրաժեշտ տվյալներ, որոնք նշված են ուղեկցող փաստաթղթերում,

բ) ավտոտրանսպորտային միջոցի սեփականատիրոջ (եթե ներմուծվում է սեփականատեր չհանդիսացող անձի կողմից՝ նաև ներմուծողի) անունը, ազգանունը, բնակության վայրը և անձնագրային տվյալները (համարը, ում կողմից և երբ է տրված):

6. «Ժամանակավոր ներմուծում» և «ժամանակավոր ներմուծում՝ վերամշակման համար» մաքսային ռեժիմներով լրացվող մաքսային հայտարարագրերի դարձերեսին հայտարարագիը վավերացնող մաքսային մարմինը ստորև նշված հաջորդականությամբ նշում է հետևյալ տեղեկատվությունը (եթե նմանատիպ տեղեկատվություն պարունակվում է ավտոտրանսպորտային միջոցի ուղեկցող փաստաթղթերում).

ա) ավտոտրանսպորտային միջոցի մակնիշը, մոդելը, թափքի տեսակը, գույնը, թողարկման տարեթիվը, նույնականացման համարը, շարժիչի հզորությունը, շարժիչի, թափքի և ամրաշրջանակի համարները, տարանցիկ համարանիշը, մաքսային սահմանին ներմուծման ժամանակ հանձնված տեխնիկական անձնագրի (կտրոնի) համարը և այլ անհրաժեշտ տվյալներ, որոնք նշված են ուղեկցող փաստաթղթերում,

բ) ավտոտրանսպորտային միջոցի սեփականատիրոջ (եթե ներմուծվում է սեփականատեր չհանդիսացող անձի կողմից՝ նաև ներմուծողի) անունը, ազգանունը, բնակության վայրը և անձնագրային տվյալները (համարը, ում կողմից և երբ է տրված):

7. Մաքսային հայտարարագրի դարձերեսին սույն կարգի 5-րդ և 6-րդ կետերի համաձայն արված նշումները մաքսային մարմնի պաշտոնատար անձի կողմից սահմանագծվում են և հաստատվում անձնական կնիքով:

Եթե մաքսային հայտարարագիրը վավերացնող մաքսային մարմինն ամբողջությամբ չի տիրապետում սույն կարգի 5-րդ և 6-րդ կետերում նշված տեղեկատվությանը, հայտարարագրի դարձերեսին նշվող տեղեկատվության տվյալ տեսակի դիմաց արվում է «անհայտ» գրառումը:

8. Հայաստանի Հանրապետության կառավարությանն առընթեր ոստիկանության պետավտոտեսչության մարմինները միջոցառումներ են ձեռնարկում Հայաստանի Հանրապետություն ներմուծված, բայց որևէ մաքսային ռեժիմով չձևակերպված, ինչպես նաև «տարանցիկ փոխադրում», «ժամանակավոր ներմուծում» կամ «ժամանակավոր ներմուծում՝ վերամշակման համար» մաքսային ռեժիմներով ձևակերպված և սահմանված ժամկետում չարտահանված ավտոտրանսպորտային միջոցների հայտնաբերման նպատակով: Նշված ավտոտրանսպորտային միջոցների հայտնաբերման դեպքում ՀՀ մաքսային օրենսգրքի 28-րդ, 36-րդ, 37-րդ, 40-րդ և 199-րդ հոդվածների պահանջների կատարումն ապահովելուն աջակցելու նպատակով, պետավտոտեսչության մարմինները տեղեկատվություն են հաղորդում մաքսային մարմիններին այդ ավտոտրանսպորտային միջոցների վերաբերյալ:

9. Հայաստանի Հանրապետությունից արտահանվող (արտահանված) ավտոտրանսպորտային միջոցները Հայաստանի Հանրապետության կառավարությանն առընթեր ոստիկանության պեավտոտեսչության վարչության գրանցման-քննական ստորաբաժանումները հաշվառումից հանում են միայն մաքսային մարմինների կողմից վավերացված «արտահանում՝ ազատ շրջանառության համար» մաքսային ռեժիմով լրացված մաքսային հայտարարագրի հիման վրա: