21 հոկտեմբերի 2010 թվականի N 1492-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2008 ԹՎԱԿԱՆԻ ՍԵՊՏԵՄԲԵՐԻ 25-Ի N 1196-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2008 թվականի սեպտեմբերի 25-ի «Կենդանական ծագում ունեցող մթերքներում անասնաբուժական դեղամիջոցների մնացորդային առավելագույն քանակները սահմանելու մասին» N 1196-Ն որոշման մեջ կատարել հետևյալ լրացումները և փոփոխությունը՝

1) որոշումը լրացնել հետևյալ բովանդակությամբ նոր՝ 4.1-ին կետով.

«4.1. Հաստատել անասնաբուժական դեղամիջոցների մնացորդային քանակների հսկողության իրականացման համար անհրաժեշտ կենդանական ծագում ունեցող մթերքների նմուշառման կարգը` համաձայն N 1 հավելվածի։».

2) որոշման հավելվածում կատարել լրացումներ և փոփոխություններ՝ համաձայն N 1 հավելվածի.

3) որոշումը լրացնել նոր՝ N 1 հավելվածով՝ համաձայն N 2 հավելվածի:

2. Կենդանական ծագում ունեցող մթերքներում անասնաբուժական դեղամիջոցների մնացորդային քանակների հսկողության արդյունքների գրանցման ձևաթղթի լրացման իրավասու մարմին նշանակել Հայաստանի Հանրապետության գյուղատնտեսության նախարարությունը:

3. Սահմանել, որ կենդանական ծագում ունեցող սննդամթերքում անասնաբուժական դեղամիջոցների մնացորդային առավելագույն քանակների գերազանցման դեպքում տնտեսավարողները պատասխանատվություն են կրում Հայաստանի Հանրապետության օրենքով սահմանված կարգով և չափով:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2008 ԹՎԱԿԱՆԻ ՍԵՊՏԵՄԲԵՐԻ 25-Ի N 1196-Ն ՈՐՈՇՄԱՆ ՀԱՎԵԼՎԱԾՈՒՄ ԿԱՏԱՐՎՈՂ ՓՈՓՈԽՈՒԹՅՈՒՆՆԵՐԸ

1. «Քլորֆենիկոլ և վերջինիս հետ կապված միացություններ» բաժնում «Ֆլորֆենիկոլ (ֆլորֆենիկոլի և որպես ֆլորֆենիկոլ-ամին գործող մետաբոլիտների միագումարը)» տողը շարադրել հետևյալ բովանդակությամբ նոր տողով.

Կ Ա Ր Գ

ՎՏԱՆԳԱՎՈՐ ՆՅՈՒԹԵՐԻ ՄՆԱՑՈՐԴԱՅԻՆ ՔԱՆԱԿՆԵՐԻ ՀՍԿՈՂՈՒԹՅԱՆ ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ՝ ԿԵՆԴԱՆԱԿԱՆ ԾԱԳՈՒՄ ՈՒՆԵՑՈՂ ՄԹԵՐՔՆԵՐԻ ՆՄՈՒՇԱՌՄԱՆ

1. Սույն կարգով սահմանվում են անասնաբուժական դեղամիջոցների մնացորդային առավելագույն քանակների (այսուհետ` մնացորդային նյութեր) հսկողության իրականացման համար անհրաժեշտ՝ կենդանական ծագում ունեցող մթերքների նմուշառման ընթացակարգը և դրա իրականացման պայմանները:

2. Նմուշառումը կատարում է Հայաստանի Հանրապետության գյուղատնտեսության նախարարության սննդամթերքի անվտանգության և անասնաբուժական պետական տեսչությունը (այսուհետ` տեսչություն)` պետական վերահսկողության իրականացման շրջանակներում:

3. Տեսչությունն ապահովում է կենդանական ծագում ունեցող մթերքում մնացորդային նյութերի հսկողության արդյունքների գրանցման ձևաթղթի լրացումը` Եվրոպական միությունում ընդունված ծրագրային համակարգի համաձայն:

4. Մնացորդային նյութերի հսկողության արդյունքների գրանցման ձևաթուղթը պարունակում է հետազոտված նմուշների և դրական արդյունքների մասին քանակական տեղեկատվություն՝ ըստ նմուշների տեսակների` համաձայն ձևի:

5. Հսկողության ենթակա մնացորդային նյութերը պատկանում են Ա և Բ խմբերի`

1) Ա խումբը ներառում է անաբոլիկ ազդեցությամբ և օգտագործման համար չերաշխավորված նյութերը`

ա. ստիլբեններ, դրանց աղեր և եթերներ` Ա1 (A1),

բ. անտիթիրոիդներ (վահանաձև գեղձի) ագենտներ` Ա1 (A2),

գ. ստերոիդներ` Ա3 (A3),

դ. ռեզորցիկլիկ թթվային լակտոններ` ներառյալ զերանոլ Ա4 (A4),

ե. բետա-ագոնիստներ Ա5 (A5),

զ. նյութեր, որոնց համար մնացորդային առավելագույն քանակ սահմանված չէ Ա6 (A6).

2) Բ խումբը ներառում է Բ1` անասնաբուժական դեղամիջոցների` ներառյալ գրանցում չստացած, բայց գործնականում օգտագործվող նյութերը, Բ2` այլ անասնաբուժական դեղամիջոցների և Բ3` աղտոտիչների խմբերը՝

ա. Բ1 խմբի անասնաբուժական դեղամիջոցներն են հակամանրէային նյութերը` ներառյալ սուլֆանիլամիդային պատրաստուկները և խինոլոնները,

բ. Բ2 խմբի այլ անասնաբուժական դեղամիջոցներն են`

Բ2ա (B2a)` հակահելմինթոզային միջոցները,

Բ2բ (B2b)` հակակոկցիդիոզային միջոցները, այդ թվում՝ նիտրոիմիդազոլները,

Բ2գ (B2c)` կարբամատները և պիրեթրոիդները,

Բ2դ (B2d)` սեդատիվները,

Բ2ե (B2e)` ոչ ստերոիդային, հակաբորբոքային դեղամիջոցները,

Բ2զ (B2f)` դեղաբանական ակտիվ այլ նյութերը,

գ. Բ3 աղտոտիչներն են`

Բ3ա (B3a)՝ քլորի օրգանական միացությունները (PcBs),

Բ3բ (B3b)՝ ֆոսֆորի օրգանական միացությունները,

Բ3գ (B3c)՝ քիմիական տարրերը,

Բ3դ (B3d)՝ միկոտոքսինները,

Բ3ե (B3e)՝ ներկանյութերը (դեղաբանական ազդեցությամբ օժտված),

Բ3զ (B3f)՝ այլ նյութեր:

6. Մսի նմուշառում կատարվում է կենդանիների պահման վայրերից` տնտեսություններից և սպանդանոցներից: Ֆերմայից նմուշառման դեպքում նմուշներ կարելի է վերցնել նաև կերից, խմելու ջրից և այլն` չթույլատրված նյութերի օգտագործումը հայտնաբերելու նպատակով՝

1) տավարի մսի դեպքում նմուշառումը կատարվում է այնպես, որ կենդանիների նվազագույն քանակությունը, որը տարեկան ենթարկվում է ստուգման՝ մնացորդային նյութերի բոլոր խմբերի նկատմամբ, պետք է լինի առնվազն նախորդ տարում կենդանիների սպանդից ստացված զանգվածի 0.4 տոկոսը, որից 0.25 տոկոսը՝ Ա խմբի նյութերի և 0.15 տոկոսը՝ Բ խմբի նյութերի համար: Ա խմբի հսկողության համար նմուշների կեսը վերցվում է տնտեսություններից, որտեղ կենդանի կենդանիներն են պահվում, մյուս կեսը` սպանդանոցներից.

2) նմուշների 25 տոկոսը պետք է ստուգվի Ա խմբի 5 բաղադրիչների նկատմամբ, ընդ որում, այդ նպատակով նմուշներ կարող են վերցվել նաև խմելու ջրից, կերից.

3) Ա խմբի նյութերի նկատմամբ հսկողություն և նմուշառում կատարվում է յուրաքանչյուր տարի` օգտագործելով Ա խմբի ստուգման համար հավաքված ընդհանուր նմուշների նվազագույնը 5 տոկոսը.

4) Բ խմբի նյութերի հսկողության համար վերցված նմուշների 30 տոկոսը պետք է ստուգվի Բ1, 30 տոկոսը` Բ2, 10 տոկոսը՝ Բ3 խմբի նյութերի նկատմամբ:

7. Խոզի մսի դեպքում հսկողությունը և նմուշառումը կատարվում են այնպես, որ կենդանիների քանակը լինի առնվազն նախորդ տարում սպանդի ենթարկված խոզերի ընդհանուր զանգվածի 0.05 տոկոսը, որից 0.02 տոկոսը՝ Ա խմբի, 0.03 տոկոսը՝ Բ խմբի նյութերի նկատմամբ`

1) նմուշառումը կատարվում է յուրաքանչյուր տարի՝ մնացորդային նյութերի բոլոր նյութերի նկատմամբ.

2) սպանդանոցում նմուշառում կատարելու դեպքում նմուշառման և փորձաքննության ենթակա են նաև կերը, խմելու ջուրը, գոմաղբը, որոնք վերցվում են ֆերմայից, որտեղ այդ կենդանիները պահվել են.

3) ֆերմաներից նմուշառման համար անհրաժեշտ է նվազագույնը մեկ ֆերմա` սպանդի ենթարկված 100000 գլուխ խոզով.

4) Ա խմբի նյութերը հսկողության ենթակա են յուրաքանչյուր տարի, ընդ որում, այդ նպատակով օգտագործվում է Ա խմբի համար նախատեսված նմուշների 5 տոկոսը.

5) Բ խմբի նյութերի հսկողության համար վերցված նմուշների 30 տոկոսը պետք է ստուգվի Բ1, 30 տոկոսը` Բ2, 10 տոկոսը՝ Բ3 խմբի նյութերի նկատմամբ:

8. Այծի և ոչխարի մսի դեպքում հսկողություն և նմուշառում կատարվում է այնպես, որպեսզի կենդանիների նվազագույն քանակությունը, որը ենթակա է տարեկան ստուգման՝ մնացորդային նյութերի բոլոր խմբերի նկատմամբ, լինի նախորդ տարում սպանդի ենթարկված՝ 3 ամսականից բարձր հասակի կենդանիներից ստացված մսեղիքի զանգվածի 0.05 տոկոսը, որից 0.01 տոկոսը՝ Ա խմբի, 0.04 տոկոսը՝ Բ խմբի նյութերի համար`

1) Ա խմբի նյութերի նկատմամբ հսկողություն և նմուշառում կատարվում է յուրաքանչյուր տարի` օգտագործելով Ա խմբի ստուգման համար հավաքված ընդհանուր նմուշների նվազագույնը 5 տոկոսը.

2) Բ խմբի նյութերի հսկողության համար վերցված նմուշների 30 տոկոսը պետք է ստուգվի Բ1, 30 տոկոսը` Բ2, 10 տոկոսը՝ Բ3 խմբի նյութերի նկատմամբ:

9. Ձիու մսի դեպքում հսկողություն և նմուշառում կատարվում է տվյալ երկրում մսի կիրառման նպատակայնությունից և ծավալներից, նաև ելնելով հայտնաբերված խնդիրներից:

10. Թռչնի` բրոյլերի, հավի, հնդկահավի և ընտանի այլ թռչնի մսի դեպքում հսկողության նպատակով ըստ թռչնատեսակի նմուշառում կատարվում է տարեկան մեկ անգամ, նվազագույնը 200 տոննա տարեկան արտադրության (սպանդային քաշ) հաշվարկով, իսկ 5000 տոննա տարեկան արտադրության ծավալները գերազանցելու դեպքում` նվազագույնը 100 նմուշ` մնացորդային նյութերի յուրաքանչյուր խմբի համար՝

1) Ա խմբի նյութերի նկատմամբ հսկվում է ընդհանուր նմուշների 50 տոկոսը, որի 1/5-րդ մասն անհրաժեշտ է վերցնել ֆերմաներից: Ա խմբի յուրաքանչյուր նյութ ամեն տարի ենթակա է ստուգման` օգտագործելով ընդհանուր Ա խմբի փորձաքննության համար նախատեսված նմուշների 5 տոկոսը.

2) Բ խմբի նյութերի նկատմամբ հսկվում է ընդհանուր նմուշների 50 տոկոսը, որից 30 տոկոսը պետք է ստուգվի Բ1, 30 տոկոսը` Բ2, 10 տոկոսը` Բ3 խմբի նյութերի նկատմամբ:

Հավասարակշռությունը պետք է պահպանել՝ համաձայն տվյալ երկրի փորձառության և հիմնական տեղեկատվության:

11. Ճագարի, բնական ազատ պայմաններում ապրող վայրի նաև ֆերմաներում պահվող վայրի կենդանիների մսի դեպքում նմուշառում կատարվում է երկրում տվյալ կենդանու բուծման արտադրական կառուցվածքից ելնելով՝ ֆերմայի կամ սպանդանոցի մակարդակով:

12. Ֆերմաներում պահվող վայրի կենդանիների դեպքում նմուշառում կատարվում է վերամշակման գործընթացում: Ֆերմայից նմուշառման դեպքում նմուշներ կարելի է վերցնել նաև կերից, խմելու ջրից և այլն` չթույլատրված նյութերի օգտագործումը հայտնաբերելու նպատակով:

13. Մնացորդային նյութերի հսկողության համար նմուշը պետք է բաղկացած լինի միևնույն տնտեսության մեկ կամ ավելի կենդանու նմուշներից` համաձայն անալիտիկ մեթոդի պահանջի:

14. Ճագարի մսի դեպքում յուրաքանչյուր տարի վերցվում է 10 նմուշ` յուրաքանչյուր 300 տոննա տարեկան արտադրության հաշվով (սպանդային քաշ)՝ առաջին 3000 տոննա արտադրության համար, և մեկական նմուշ` լրացուցիչ յուրաքանչյուր 300 տոննայի հաշվով՝

1) Ա խմբի նյութերի նկատմամբ հսկվում է ընդհանուր նմուշների 30 տոկոսը, որից 70 տոկոսը կատարվում է Ա խմբի 6 ենթախմբերի, 30 տոկոսը` Ա խմբի այլ ենթախմբերի սուբստանցիաների ստուգման համար.

2) Բ խմբի նյութերի նկատմամբ հսկվում է ընդհանուր նմուշների 70 տոկոսը, որից 30 տոկոսը՝ Բ1, 30 տոկոսը` Բ2, 10 տոկոսը` Բ3 ենթախմբերի սուբստանցիաների ստուգման համար:

15. Ֆերմայում պահվող վայրի կենդանու մսի դեպքում նմուշառում կատարվում է տարեկան ընդամենը 100 նմուշի հաշվարկով, որից 20 տոկոսը` Ա խմբի, 70 տոկոսը` Բ խմբի նյութերի համար՝

1) Ա խմբի նյութերի հսկողության համար նմուշների մեծամասնությունն ստուգվում է Ա5 և Ա6 խմբերի սուբստանցիաների նկատմամբ.

2) Բ խմբի նյութերի նկատմամբ հսկվում է ընդհանուր նմուշների 70 տոկոսըը, որից 30 տոկոսը՝ Բ1, 30 տոկոսը` Բ2ա և Բ2բ ենթախմբերի, 10 տոկոսը` Բ2գ և Բ2ե ենթախմբերի, 30 տոկոսը Բ3 խմբի ենթախմբերի սուբստանցիաների ստուգման համար: Մնացածը (10 տոկոս) բաշխվում է՝ համաձայն տվյալ երկրի փորձառության և իրավիճակի։

16. Բնական պայմաններում ապրող վայրի կենդանիների մսի դեպքում նմուշառում կատարվում է տարեկան ընդամենը 100 նմուշի հաշվարկով, որի դեպքում՝

1) նյութերի հսկողության համար նմուշառում կատարվում է արտադրող, վերամշակող, իրացնող կազմակերպությունում կամ որսի վայրում.

2) նմուշի չափը կախված է կիրառվող անալիտիկ մեթոդից:

17. Կաթից նմուշառում կատարվում է մթերատու գյուղատնտեսական կենդանիների հում կաթից. նմուշի քանակությունը կախված է հսկման ենթակա նյութերի հայտնաբերման անալիտիկ մեթոդից:

18. Նմուշառում կատարվում է կաթի հավաքման պահեստարանից (ռեզերվուարից) ֆերմայում կամ կաթի վերամշակման արտադրամասում` մինչև կաթի վերամշակումը:

19. Կովի, ոչխարի, այծի, ձիու կաթի նմուշառումն իրականացվում է կենդանիների մթերատվության ծավալների և արձանագրված խնդիրների հիման վրա:

20. Կովի նաև մյուս տեսակների կաթի նմուշառում կատարվում է տարեկան մեկ անգամ՝ 15000 տոննա արտադրանքի հաշվով՝ առնվազն 300 նմուշ հաշվարկով, որից՝

1) նմուշների 70 տոկոսը ստուգվում է մնացորդային նյութերի նկատմամբ, յուրաքանչյուր նմուշ ստուգվում է Ա6, Բ1, Բ2ա և Բ2ե ենթախմբերի սուբստանցիաների նկատմամբ.

2) նմուշների 15 տոկոսն ստուգվում է Բ3 խմբի, իսկ մնացած 15 տոկոսը` ելնելով տվյալ երկրի իրավիճակից` համաչափորեն մյուս սուբստանցիաների նկատմամբ:

21. Ձվի նմուշառում կատարվում է տարեկան մեկ անգամ՝ 1000 տոննա արտադրանքի հաշվով՝ 200-ական ձու հաշվարկով:

22. Նմուշի քանակությունը, կախված հսկման ենթակա նյութերի հայտնաբերման անալիտիկ մեթոդից, կարող է լինել 12 ձու և ավելի:

23. Նմուշառում կատարվում է ֆերմայում կամ ձվի տեսակավորման և փաթեթավորման արտադրամասում, ընդ որում նմուշների 30 տոկոսը վերցվում է ձվի փաթեթավորման արտադրամասերից, որտեղից ստացվում է մարդկանց սպառման համար նախատեսված ձվի մեծ մասը:

24. Կատարված նմուշառման արդյունքում նմուշների 70 տոկոսն ստուգվում է Ա6, Բ1 և Բ2բ ենթախմբերի սուբստանցիաների նկատմամբ, 30 տոկոսը` երկրի վիճակից ելնելով, մյուս սուբստանցիաների նկատմամբ` հավասարակշռությունը պահպանելով, որը կներառի նաև Բ3 խմբի սուբստանցիաները:

25. Այլ տեսակի թռչունների ձվերի նմուշառումը կատարվում է՝ հիմք ընդունելով արտադրական ծավալները և առկա խնդիրները` մյուս տեսակի ձվերը ներառելով հավի ձվերի նմուշառման մեջ:

26. Մեղրի նմուշառում կատարվում է տարեկան մեկ անգամ՝ ըստ արտադրողների, 300 տոննա արտադրանքի հաշվով՝ 10 նմուշ՝ մինչև 3000 տոննա արտադրական ծավալների դեպքում, և լրացուցիչ մեկական նմուշ` յուրաքանչյուր լրացուցիչ 300 տոննայի դեպքում:

27. Մեղրի նմուշների 50 տոկոսն ստուգվում է Բ1 և Բ2գ, 40 տոկոսը` Բ3ա, Բ3բ, Բ3գ խմբերի սուբստանցիաների նկատմամբ, 10 տոկոսը` համաչափորեն մյուս սուբստանցիաների նկատմամբ` նախընտրելով միկոտոքսինների հսկողությունը:

28. Սույն կարգով չկարգավորված նմուշառության ընթացակարգերն իրականացվում են Հայաստանի Հանրապետության կառավարության 2007 թվականի ապրիլի 19-ի «Սննդամթերքի, անասնակերի և կերային հավելումների փորձաքննության նմուշառման կարգը հաստատելու մասին» N 598-Ն որոշմամբ հաստատված կարգի համաձայն:

Ձև

Ա խմբի արգելված նյութերը