Ա Ր Ձ Ա Ն Ա Գ Ր ՈՒ Թ Յ ՈՒ Ն

Ներքոստորագրյալ լիազորված ներկայացուցիչները, իրենց համապատասխան կառավարությունների անունից,

նկատի ունենալով, որ պատերազմի ժամանակ հեղձուցիչ, թունավորող կամ այլ գազերի և բոլոր համանման հեղուկների, նյութերի կամ սարքերի օգտագործումը արդարացիորեն դատապարտվել է քաղաքակիրթ աշխարհի ընդհանուր կարծիքով, և

նկատի ունենալով, որ այդպիսի օգտագործման արգելումը հայտարարվել է այն պայմանագրերում, որոնց անդամ է հանդիսանում աշխարհի տերությունների մեծ մասը, և

նպատակ ունենալով, որ այդ արգելքը պետք է համընդհանուր ընդունվի՝ որպես միջազգային իրավունքի մաս, հավասարապես պարտադիր դառնալով ազգերի խղճի և սովորույթի համար,

հայտարարում են՝

Բարձր Պայմանավորվող կողմերը, այնքանով, որքանով դեռևս չեն հանդիսանում նման օգտագործումն արգելող պայմանագրերի կողմեր, ընդունում են այս արգելքը, համաձայնում են տարածել այս արգելքը մանրէաբանական պատերազմի միջոցների վրա և համաձայնում են միմյանց նկատմամբ պարտավորված լինել սույն hռչակագրի պայմանների համաձայն:

Բարձր Պայմանավորվող կողմերը կձեռնարկեն բոլոր ջանքերը որպեսզի հորդորեն այլ պետություններին միանալու սույն Արձանագրությանը: Նման միանալու մասին կտեղեկացվի Ֆրանսիայի Հանրապետության կառավարությանը, իսկ վերջինիս կողմից՝ բոլոր ստորագրած և միացած պետություններին, և ուժի մեջ կմտնի Ֆրանսիայի Հանրապետության կառավարության կողմից ծանուցման օրվանից:

Սույն Արձանագրությունը, որի ֆրանսերեն և անգլերեն տեքստերը հավասարազոր են, պետք է վավերացվի հնարավորինս շուտ: Այն կկրի այսօրվա ամսաթիվը:

Սույն Արձանագրության վավերագրերը պետք է հասցեագրվեն Ֆրանսիայի Հանրապետության կառավարությանը, որն այդպիսի վավերագրերն ի պահ ընդունելու մասին կծանուցի ստորագրած և միացած պետություններին:

Սույն Արձանագրության վավերացնելու կամ միանալու մասին փաստաթղթերը կպահվեն Ֆրանսիայի Հանրապետության կառավարության արխիվներում:

Սույն Արձանագրությունն ստորագրած յուրաքանչյուր պետության համար ուժի մեջ կմտնի իր վավերագիրն ի պահ հանձնելու օրվանից, և այդ պահից սկսած՝ յուրաքանչյուր պետություն պարտավորված կլինի վավերագրերն արդեն ի պահ հանձնած պետությունների նկատմամբ:

Ի վկայություն որի՝ լիազոր ներկայացուցիչներն ստորագրեցին սույն Արձանագրությունը:

Կատարված է Ժնևում, մեկ օրինակով, հազար ինը հարյուր քսանհինգ թվականի հունիսի տասնյոթին: