ՀՀ ԿԱՌԱՎԱՐՈՒԹՅԱՆ ՈՐՈՇՈՒՄԸ ԲՆՕԳՏԱԳՈՐԾՄԱՆ ՎՃԱՐԻ ԴՐՈՒՅՔԱՉԱՓԵՐԻ ՄԱՍԻՆ

Պաշտոնական ինկորպորացիա

040.0864.30.12.98

«Վավերացնում եմ»

Հայաստանի Հանրապետության

Նախագահ Ռ. Քոչարյան

30 դեկտեմբերի 1998 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

30 դեկտեմբերի 1998 թվականի N 864

քաղ. Երևան

ԲՆՕԳՏԱԳՈՐԾՄԱՆ ՎՃԱՐԻ ԴՐՈՒՅՔԱՉԱՓԵՐԻ ՄԱՍԻՆ

«Բնապահպանական և բնօգտագործման վճարների մասին» Հայաստանի Հանրապետության օրենքի 7 հոդվածին համապատասխան Հայաստանի Հանրապետության կառավարությունը որոշում է.

1. Հաստատել բնօգտագործման վճարի դրույքաչափերը (կցվում են):

2. Սահմանել, որ

ա) պինդ օգտակար հանածոների (բացառությամբ աղի) մարված պաշարների համար վճարը հաշվարկվում է ելնելով հաշվետու ժամանակաշրջանում դրանց մարված պաշարների ծավալից, դրույքաչափից և տվյալ օգտակար հանածոյի իրացման գնից (առանց ավելացված արժեքի հարկի)` բացառությամբ սույն կետի «դ» ենթակետով նախատեսված դեպքի, ընդ որում`

հաշվետու ժամանակաշրջանում մարված և իրացված մասի համար վճարը հաշվարկվում է ելնելով տվյալ օգտակար հանածոյի մարված պաշարների ծավալից, դրույքաչափից և իրացման փաստացի գնից,

հաշվետու ժամանակաշրջանում մարված և չիրացված մասի համար վճարը հաշվարկվում է ելնելով տվյալ օգտակար հանածոյի մարված պաշարների ծավալից, դրույքաչափից և վերջին իրացման փաստացի գնից, դրա բացակայության դեպքում` տվյալ կամ նույնանման օգտակար հանածոյի իրացման համար հաշվետու ժամանակաշրջանին նախորդող եռամսյակին վերաբերող` հրապարակված վիճակագրական միջին գնից, իսկ դրա բացակայության դեպքում` այդ եռամսյակին նախորդող հաջորդական առաջին ամսվան վերաբերող` հրապարակված վիճակագրական միջին գնից, ընդ որում, վճարված վճարները պաշարների փաստացի իրացման ժամանակաշրջանում վերահաշվարկվում են ելնելով դրանց իրացման փաստացի գնից,

այն դեպքերում, երբ իրացվում է ոչ թե օգտակար հանածոն, այլ դրա օգտագործման արդյունքում ստացված արտադրանքը կամ այն օգտագործվում է արդյունահանողի ներտնտեսական կարիքների համար, ապա հաշվետու ժամանակաշրջանում մարված պաշարների համար վճարը հաշվարկվում է ելնելով տվյալ օգտակար հանածոյի մարված պաշարների ծավալից, դրույքաչափից և որպես օգտակար հանածո վերջին իրացման փաստացի գնից, դրա բացակայության դեպքում` տվյալ կամ նույնանման օգտակար հանածոյի իրացման համար հաշվետու ժամանակաշրջանին նախորդող եռամսյակին վերաբերող` հրապարակված վիճակագրական միջին գնից, իսկ դրա բացակայության դեպքում` այդ եռամսյակին նախորդող հաջորդական առաջին ամսվան վերաբերող` հրապարակված վիճակագրական միջին գնից.

բ) (Ենթակետն ուժը կորցրել է 18.06.01 N 543)

գ) (Ենթակետն ուժը կորցրել է 18.06.01 N 543)

դ) ազնիվ, գունավոր, հազվագյուտ մետաղների և գունագեղ քարերի (բացառությամբ` օնիքսանման մարմարի և լիստվենիտի) համար վճարը հաշվարկվում է ելնելով հաշվետու ժամանակաշրջանում արդյունահանված ծավալից, դրույքաչափից և տվյալ մետաղի կամ քարի միջազգային շուկայական միջին գնից` հիմք ընդունելով Հայաստանի Հանրապետության թանկարժեք մետաղների և քարերի պետական գանձարանի կողմից հաշվետու ժամանակաշրջանի համար հայտարարված գինը.

ե) համաձայն Հայաստանի Հանրապետության կառավարության սահմանած կարգով իրականացվող մրցույթների` շահագործման հանձնվող հանքավայրերի համար կարող են Հայաստանի Հանրապետության կառավարության որոշմամբ սահմանվել սույն որոշմամբ սահմանված դրույքաչափերից տարբերվող դրույքաչափեր.

զ) ստորերկրյա քաղցրահամ և հանքային ջրերի ու աղի արդյունահանված պաշարների համար վճարը հաշվարկվում է ելնելով հաշվետու ժամանակաշրջանում արդյունահանված ջրի և աղի ծավալից ու սույն որոշմամբ հաստատված դրույքաչափերից:

Հայաստանի Հանրապետության օրենսդրությամբ սահմանված կարգով ջրօգտագործողների կողմից անմիջապես հորատանցքի (աղբյուրի) վրա հաշվիչ (չափիչ) սարքեր տեղադրված լինելու դեպքում՝ ստորերկրյա քաղցրահամ և հանքային ջրերի արդյունահանված պաշարների համար վճարը հաշվարկվում է՝ ելնելով հաշվետու ժամանակաշրջանում հաշվիչ (չափիչ) սարքերով հաշվառված ջրի ծավալներից և հաստատված դրույքաչափերից:

(2-րդ կետը խմբ., փոփ., լրաց. 18.06.01 N 543, լրաց. 03.07.03 N 826-Ն)

3. Հայաստանի Հանրապետության բնապահպանության նախարարությանը` երկամսյա ժամկետում բնական պաշարների արդյունավետ օգտագործման համար Հայաստանի Հանրապետության կառավարություն ներկայացնել առաջարկություն բնօգտագործման վճարի գանձման օբյեկտի տարր հանդիսացող փաստացի ծավալների նկատմամբ չափաքանակներ և սահմանափակումներ սահմանելու վերաբերյալ:

4. Լիազորել Հայաստանի Հանրապետության թանկարժեք մետաղների և քարերի պետական գանձարանին հրապարակելու ազնիվ, գունավոր, հազվագյուտ մետաղների և գունագեղ քարերի միջազգային շուկայական միջին գինը եռամսյակի վերջին ամսվա դրությամբ, մինչև եռամսյակին հաջորդող առաջին ամսվա 10-րդ օրը:

5. Ուժը կորցրած ճանաչել Հայաստանի Հանրապետության կառավարության 1997 թվականի հունիսի 25-ի «Բնական ռեսուրսների օգտագործման, շրջակա միջավայր վնասակար նյութերի արտանետման համար վճարաչափեր սահմանելու և վճարումների կարգը հաստատելու մասին» թիվ 221 որոշման թիվ թիվ 1 և 2 հավելվածները, որոշմամբ հաստատված կարգի 3-րդ, 4-րդ, 5-րդ, 10-րդ, 14-րդ և 16-րդ կետերը:

6. Սույն որոշումն ուժի մեջ է մտնում «Բնապահպանական և բնօգտագործման վճարների մասին» Հայաստանի Հանրապետության օրենքն ուժի մեջ մտնելու պահից:

Հայաստանի Հանրապետության
վարչապետ

Ա. Դարբինյան

Հաստատված է
ՀՀ կառավարության 1998 թվականի
դեկտեմբերի 30-ի N 864 որոշմամբ

Դ Ր ՈՒ Յ Ք Ա Չ Ա Փ Ե Ր

ԲՆՕԳՏԱԳՈՐԾՄԱՆ ՎՃԱՐԻ

I. Ջրօգտագործման համար վճարի դրույքաչափերը

1. Մակերևութային (բացառությամբ Սևանա լճից) ջրերի յուրաքանչյուր խորանարդ մետրի օգտագործման համար`

ձկնաբուծության նպատակով	1 դրամ
արդյունաբերական նպատակներով	0,5 դրամ,
խմելու և կենցաղային նպատակներով բացառությամբ Հայաստանի Հանրապետության կառավարությանն առընթեր ջրային տնտեսության պետական կոմիտեի և Երևանի քաղաքապետարանի կողմից 50 տոկոս և ավելի պետական սեփականություն հանդիսացող բաժնետոմսեր տնօրինվող ջրամատա- կարարման և ջրահեռացման գործունեություն	0,5 դրամ,
իրականացնող ընկերությունների, որոնց համար՝	0,025 դրամ
ոռոգման նպատակով	0,0 դրամ:

(1-ին կետը խմբ. 29.08.01 N 789)

2. Սևանա լճից ջրերի յուրաքանչյուր խորանարդ մետրի օգտագործման համար

ոռոգման նպատակով	0,2 դրամ
այլ նպատակներով	1,5 դրամ:

3. Խմելու համար պիտանի ստորերկրյա քաղցրահամ ջրերի յուրաքանչյուր խորանարդ մետրի օգտագործման համար՝ 1.0 դրամ, բացառությամբ Հայաստանի Հանրապետության կառավարությանն առընթեր ջրային տնտեսության պետական կոմիտեի և Երևանի քաղաքապետարանի կողմից 50 տոկոս և ավելի պետական սեփականություն հանդիսացող բաժնետոմսեր տնօրինվող ջրամատակարարման և ջրահեռացման գործունեություն իրականացնող ընկերությունների, որոնց համար՝ 0.05 դրամ:

(3-րդ կետը փոփ. 18.06.01 N 543, խմբ. 29.08.01 N 789)

4. Խմելու համար ոչ պիտանի ստորերկրյա քաղցրահամ ջրերի յուրաքանչյուր խորանարդ մետրի արդյունահանման համար`

ոռոգման նպատակով	0,0 դրամ
այլ նպատակներով	1,0 դրամ:

(4-րդ կետը փոփ. 18.06.01 N 543)

II. Օգտակար հանածոների արդյունահանված պաշարների համար վճարի դրույքաչափերը

1. Ազնիվ մետաղների մարված պաշարների յուրաքանչյուր գրամի համար`

ոսկի	1,5 տոկոս
արծաթ	1,5 տոկոս
պլատին	1,5 տոկոս

(1-ին կետը խմբ. 12.04.99 N 215, փոփ. 18.06.01 N 543)

2. Գունավոր և հազվագյուտ մետաղների մարված պաշարների յուրաքանչյուր տոննայի համար`

պղինձ	1,3 տոկոս
մոլիբդեն	1,3 տոկոս
կապար	1,0 տոկոս
ցինկ	1,0 տոկոս
ալյումին	1,3 տոկոս
ռենիում	1,3 տոկոս
կադմիում	1,3 տոկոս
սելեն	1,4 տոկոս
թելուր	1,3 տոկոս

(2-րդ կետը խմբ. 12.04.99 N 215, փոփ. 18.06.01 N 543)

3. Վառելիքաէներգետիկ հումքիմարված պաշարների յուրաքանչյուր տոննայի համար`

ածուխ	5 տոկոս
տորֆ	3 տոկոս
այրվող թերթաքարեր	3 տոկոս

(3-րդ կետը փոփ. 18.06.01 N 543)

4. Երեսապատման քարերի մարված պաշարների յուրաքանչյուր խորանարդ մետրի համար`

տուֆ	5 տոկոս
ֆելզիտային տուֆ (այդ թվում` դեկորատիվ)	6 տոկոս
գրանիտ (գրանոդիորիտ, գրանոսիենիտ)	7 տոկոս
մարմար, մարմարացված կրաքարեր	5 տոկոս
դեկորատիվ մարմար	6 տոկոս
կոնգլոմերատներ և կոնգլոբրեկչիաներ	7 տոկոս
տրավերտին	6 տոկոս
բազալտ	4,5 տոկոս
հիալոբազալտ	6 տոկոս

(4-րդ կետը փոփ. 18.06.01 N 543)

5. Շինարարական քարերի մարված պաշարների յուրաքանչյուր խորանարդ մետրի համար`

տուֆ	4 տոկոս
տուֆաավազաքարեր	3,5 տոկոս
բազալտ	3,5 տոկոս
անդեզիտ, անդեզիտաբազալտ և այլն	3,5 տոկոս
պրոֆիրիտ	3 տոկոս
կրաքար	3,5 տոկոս

(5-րդ կետը փոփ. 18.06.01 N 543)

6. Լցանյութերի և բալաստային հումքի մարված պաշարների յուրաքանչյուր խորանարդ մետրի համար`

հրաբխային խարամ	3 տոկոս
պեմզա	4 տոկոս
ավազախճաքարային խառնուրդ (ավազ, խիճ և այլն)	3 տոկոս
բալաստային հումք (պորֆիրիտ, բազալտ, անդեզիտաբազալտ, լիպարիտ և այլն)	3 տոկոս

(6-րդ կետը փոփ. 18.06.01 N 543)

7. Շինանյութերի արտադրության հումքի մարված պաշարների յուրաքանչյուր խորանարդ մետրի համար`

ցեմենտի հումք (կավեր, կրաքարեր)	6 տոկոս
կրաքար (կիր ստանալու համար)	3 տոկոս
կավեր	4 տոկոս
բնական հանքային ներկեր	4 տոկոս
գիպսատար կավեր	4 տոկոս

(7-րդ կետը փոփ. 18.06.01 N 543)

8. Գունագեղ քարերի մարված պաշարների յուրաքանչյուր կիլոգրամի համար`

ագաթ	6 տոկոս
փիրուզ	6 տոկոս
վանակատ (ծիածանվող օբսիդիան)	6 տոկոս
հասպիս	6 տոկոս
օնիքսանման մարմար	5 տոկոս
լիստվենիտ	5 տոկոս

(8-րդ կետը փոփ. 18.06.01 N 543)

9. Մետաղագործական, քիմիական, թեթև և արդյունաբերության այլ ճյուղերի հումքի մարված պաշարների յուրաքանչյուր միավորի համար`

ցելոիտ (խոր.մ)	5 տոկոս
պեռլիտ (խոր.մ)	6 տոկոս
դիատոմիտ (խոր.մ)	6 տոկոս
բենտոնիտ (տոննա)	6 տոկոս
դունիտ և պերիդոտիտ (տոննա)	4 տոկոս
հրակայուն կավեր (տոննա)	4 տոկոս
անդեզիտ, անդեզիտաբազալտ (թթվակայուն հումք) (տոննա)	4 տոկոս
*(Տողը հանվ. 18.06.01 N 543)*
ծծումբ	3 տոկոս
կվարցիտ (ապակու հումք, ֆլյուս) (տոննա)	3 տոկոս
դոլոմիտ (տոննա)	3,5 տոկոս
բարիտ (տոննա)	5 տոկոս
*(Տողը հանվ. 18.06.01 N 543)*

(9-րդ կետը փոփ. 18.06.01 N 543)

10. Աղի և հանքային ջրերի արդյունահանված պաշարների համար`

ա) աղի յուրաքանչյուր տոննայի արդյունահանման համար` ԱՄՆ-ի դոլարին համարժեք դրամով`

քարաղի տեսքով`	0,88
աղաջրի տեսքով`	0,09

բ) հանքային ջրերի յուրաքանչյուր խորանարդ մետրի արդյունահանման համար` ԱՄՆ-ի դոլարին համարժեք դրամով`

արդյունաբերական նպատակով	7,50
բուժական նպատակով	0,40

Սույն բաժնում ներառված օգտակար հանածոների համար վճարի դրույքաչափը հայկական դրամով հաշվարկելիս որպես համարժեք կիրառվում է հաշվետու ժամանակաշրջանին նախորդող ամսվա 20-րդ օրվա համար Հայաստանի Հանրապետության կենտրոնական բանկի սահմանած արժութային փոխարժեքը:

(10-րդ կետը խմբ. 18.06.01 N 543)

III. Կենսապաշարների օգտագործման համար վճարի դրույքաչափերը

1. Ծառի տեսակի յուրաքանչյուր խորանարդ մետրի օգտագործման համար`

Անտառային ծառատեսակները	Հեռավորու- թյունը (կմ)	Դրույքաչափը (դրամով)
		Շինափայտ առանց կեղևի, ըստ ծառի բնի կտրվածքի (սմ)			Վառելափայտ կեղևով
		25-ից ավելի	13-24	3-12
Հաճարենի	մինչև 10	3,640	3,220	2,800	700
	10-25	2,800	2,520	2,240	630
	25-40	2,520	2,240	1,680	560
	40-ից ավելի	2,240	1,960	1,680	420
Կաղնի, Հացենի	մինչև 10	3,920	3,640	2,800	700
	10-25	3,080	2,800	2,240	630
	25-40	2,520	2,240	1,680	560
	40-ից ավելի	1,960	1,680	1,400	420
Բոխի, թխկի, թեղի	մինչև 10	1,260	1,120	840	700
	10-25	1,120	980	840	630
	25-40	980	840	700	560
	40-ից ավելի	840	700	420	420
Ցանկում չնշված այլ ծառատեսակներ	մինչև 10	980	840	700	420
	10-25	700	700	560	350
	25-40	560	560	420	280
	40-ից ավելի	420	420	280	210

Նշված կետում հեռավորությունն անտառի սկզբից ծառահատումն ընկած տարածությունն է:

2. Արդյունագործական նպատակով բույսերի յուրաքանչյուր միավորի օգտագործման համար`

	վերգետնյա մասեր	արմատներ
դեղաբույսեր (կգ)	150 դրամ	500 դրամ
տեխնիկական բույսեր (կգ)	100 դրամ	300 դրամ
սննդային բույսեր (կգ)	20 դրամ	100 դրամ
գեղազարդային բույսեր (հատ)	5 դրամ

3. Արդյունագործական նպատակով օգտագործվող պտուղների, հատապտուղների և ընկույզավորների յուրաքանչյուր կիլոգրամի օգտագործման համար`

պտուղներ, հատապտուղներ	30 դրամ
տխիլ (տկողին), ընկույզ	60 դրամ

4. Կենդանիների տեսակների յուրաքանչյուր գլխի օգտագործման (որսի) համար`

լոր	100 դրամ
կտցար	100 դրամ
քարակաքավ	500 դրամ
նապաստակ	800 դրամ
վայրի աղավնի	100 դրամ
ջրլող թռչուններ (կռնչան բադ, փոքր բադ, սուզաբադ, ջրահավ)	500 դրամ

5. Ձկների տեսակների և խեցգետնի յուրաքանչյուր կիլոգրամի արդյունագործական և սիրողական որսի համար`

սիգ	20 դրամ
լոքո	50 դրամ
ծածանազգիներ	25 դրամ
խեցգետին	200 դրամ
կարմրախայտ	1,500 դրամ
ցանկում չնշված այլ ձկնատեսակներ	25 դրամ

6. Խոտհունձի նպատակով անտառային ֆոնդի տարածքների յուրաքանչյուր հեկտարի օգտագործման համար`

բարելավված խոտհարքներում և անտառային բացատներում	2,000 x Գ դրամ
խոտհարքներում	1,000 x Գ դրամ,

որտեղ հողային կադաստրային արժեքի Գ գործակիցը հավասար է մարզի համար հողի տվյալ տարվա կադաստրային արժեքի և հողի կադաստրային արժեքի տվյալ տարվա միջին հանրապետական ցուցանիշի հարաբերությանը:

7. Անասունների յուրաքանչյուր գլխի արածեցման նպատակով անտառային ֆոնդի տարածքների օգտագործման համար`

խոշոր եղջերավոր անասուններ, ձիեր`
- բարելավված արոտավայրերում	500 դրամ
- բնական արոտավայրերում	450 դրամ: