ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

23 մարտի 2000 թվականի N 121
քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆԸ, ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ԵՎ ԱՇԽԱՏՈՂՆԵՐԻ ԹԻՎԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության Նախագահի 2000 թվականի փետրվարի 28-ի «Հայաստանի Հանրապետության կառավարության կառուցվածքում փոփոխություններ կատարելու մասին» հրամանագրին և Հայաստանի Հանրապետության վարչապետի մարտի 2-ի «Հայաստանի Հանրապետության կառավարության կառուցվածքում փոփոխություններ կատարելու մասին» N 84 որոշմանը համապատասխան`

1. Հաստատել Հայաստանի Հանրապետության տրանսպորտի և կապի նախարարության կանոնադրությունը և կենտրոնական ապարատի կառուցվածքը (կցվում են):

2. Հայաստանի Հանրապետության վարչապետի 1998 թվականի նոյեմբերի 6-ի «Պետական կառավարման մարմինների աշխատողների առավելագույն թվաքանակ և ղեկավարների տեղակալների թվաքանակ սահմանելու մասին» N 620 որոշման մեջ կատարել հետևյալ փոփոխությունները`

որոշման հավելվածում`

17-րդ տողը շարադրել հետևյալ խմբագրությամբ.

ուժը կորցրած ճանաչել 28-րդ տողը:

3. Հայաստանի Հանրապետության ֆինանսների և էկոնոմիկայի նախարարությանը` 15-օրյա ժամկետում` սահմանված կարգով Հայաստանի Հանրապետության կառավարություն ներկայացնել առաջարկություն Հայաստանի Հանրապետության 2000 թվականի պետական բյուջեում համապատասխան փոփոխություններ կատարելու վերաբերյալ:

4. Ուժը կորցրած ճանաչել Հայաստանի Հանրապետության վարչապետի 1999 թվականի նոյեմբերի 8-ի «Հայաստանի Հանրապետության տրանսպորտի նախարարության կանոնադրության և կենտրոնական ապարատի կառուցվածքը հաստատելու մասին» N 678 որոշման 1-ին կետը, 1999 թվականի օգոստոսի 20-ի «Հայաստանի Հանրապետության փոստի և հեռահաղորդակցության նախարարության կանոնադրությունն ու կենտրոնական ապարատի կառուցվածքը հաստատելու մասին» N 497 որոշման 1-ին, 2-րդ և 3-րդ կետերը:

Կ Ա Ն Ո Ն Ա Դ Ր ՈՒ Թ Յ ՈՒ Ն

Հայաստանի Հանրապետության տրանսպորտի ԵՎ կապի նախարարության

I. Ընդհանուր դրույթներ

1. Հայաստանի Հանրապետության տրանսպորտի և կապի նախարարությունը (այսուհետև` նախարարություն) Հայաստանի Հանրապետության գործադիր իշխանության հանրապետական մարմին է:

2. Նախարարությունը գործում է Հայաստանի Հանրապետության օրենսդրությանը համապատասխան և իր խնդիրները լուծելու նպատակով իրականացնում է Հայաստանի Հանրապետության օրենսդրությամբ և սույն կանոնադրությամբ իրեն վերապահված լիազորությունները:

Նախարարությունն իր իրավասությունների սահմաններում Հայաստանի Հանրապետության անունից իր գործողություններով կարող է ձեռք բերել ու իրականացնել գույքային և անձնական ոչ գույքային իրավունքներ ու պարտականություններ, ինչպես նաև հանդես գալ դատարանում:

3. Նախարարությունն իր իրավասությունների սահմաններում ընդունում է գերատեսչական նորմատիվ ակտեր:

4. Նախարարությունն ունի Հայաստանի Հանրապետության զինանշանի պատկերով և իր անվամբ կնիք, դրոշմակնիք, ձևաթուղթ:

5. Նախարարության կենտրոնական ապարատի պահպանման և գործունեության համար անհրաժեշտ ծախսերի ֆինանսավորումն իրականացվում է Հայաստանի Հանրապետության պետական բյուջեի միջոցների հաշվին:

II. Նախարարության հիմնական խնդիրներն ու գործառույթները

6. Նախարարության հիմնական խնդիրներն են`

ա) իր իրավասությունների սահմաններում տրանսպորտի, կապի և տեղեկատվայնացման բնագավառների գործունեության կառավարումը, պետական քաղաքականության մշակումը և իրականացումը.

բ) տրանսպորտի և կապի բնագավառներին առնչվող օրենսդրական ակտերի նախագծերի մշակումն ու դրանք սահմանված կարգով ներկայացնելը.

գ) տրանսպորտի, կապի և տեղեկատվայնացման բնագավառներում օրենքով նախատեսված տնտեսական գործունեության առանձին տեսակների լիցենզավորումը.

դ) իր իրավասությունների սահմաններում տրանսպորտի, կապի և տեղեկատվայնացման բնագավառներում գործող ու նոր ստեղծվող հեռահաղորդակցության ցանցերի, տրանսպորտային միջոցների և այդ բնագավառներում օգտագործվող այլ սարքավորումների ու մատուցվող ծառայությունների սերտիֆիկացման աշխատանքների կազմակերպումը.

ե) տրանսպորտի, փոստի և հեռահաղորդակցության կանոնների, փոստի և հեռահաղորդակցության ցանցերի և այդ բնագավառներում տեխնիկական միջոցների ու կառույցների օգտագործման և շահագործման կարգի սահմանումը.

զ) տրանսպորտի և կապի բնագավառներում մոբիլիզացիոն ծրագրերի մշակումն ու արտակարգ իրավիճակներում գործող տրանսպորտային միջոցների, հեռահաղորդակցության գործող ցանցերի և այլ միջոցների գործունեության համակարգումը.

է) տրանսպորտի և կապի բնագավառներում գիտատեխնիկական առաջընթացի ապահովումը.

ը) տրանսպորտի, կապի և տեղեկատվայնացման բնագավառներում աշխատողների սոցիալական պաշտպանվածության ու աշխատանքի անվտանգության պայմանների ապահովումը.

թ) միջազգային կազմակերպություններում տրանսպորտի, կապի և տեղեկատվայնացման բնագավառների շահերը ներկայացնելն ու դրանց պաշտպանությունը իր իրավասությունների սահմաններում.

ժ) իր իրավասությունների սահմաններում երթևեկության կազմակերպման բարելավման, երթևեկության մասնակիցների անվտանգության ապահովումը և կենսոլորտի վրա տրանսպորտի վնասակար ազդեցության նվազեցումը.

ժա) իր իրավասությունների սահմաններում բեռների փոխադրումների և օբյեկտների անվտանգության ու պահպանության կազմակերպման ապահովումը.

ժբ) մասնավորեցման գործընթացի ապահովման համար անհրաժեշտ միջոցառումների իրականացումը.

ժգ) տրանսպորտի և կապի համակարգում զարգացման ու ներդրումների ծրագրերի, ձեռնարկատիրական գործունեության զարգացման, տարածքային, տրանսպորտային և կապի սակագնային քաղաքականության մշակումը.

ժդ) նախարարության համակարգում կառուցվածքային բարեփոխումների իրականացումը, աշխատանքի և կառավարման արդյունավետ համակարգերի ներդրումը.

ժե) հեռահաղորդակցության հանրային համակցված ցանցին այլ ցանցերի լծորդման տեխնիկական պայմանների սահմանումը.

ժզ) հեռահաղորդակցության ծառայությունների համար հատկացված ռադիոհաճախականությունների տիրույթի բաշխման և կարգավորման, ինչպես նաև օգտագործման նորմերի կարգի ու պայմանների հաստատման գծով Հայաստանի Հանրապետության կառավարության կողմից լիազորված մարմնի պարտականությունների իրականացումը.

ժէ) բացառիկ իրավունքով մատուցվող հեռահաղորդակցության ծառայությունների սակագների հաստատումը.

ժը) պետական կառավարման և տեղական ինքնակառավարման մարմինների համար միասնական տեղեկատվական ցանցերի ու համակարգերի ստեղծման և զարգացման աշխատանքների համակարգումը` ապահովելով դրանց համատեղելիությունն ու փոխգործակցությունը միջպետական և այլ տեղեկատվական ցանցերի հետ:

ժթ) պետական տեղեկատվական ռեսուրսների հիման վրա քաղաքացիների, պետական կառավարման և տեղական ինքնակառավարման մարմինների ու կազմակերպությունների համար տեղեկատվության ապահովման պայմանների ստեղծումը.

ի) տրանսպորտային փոխադրումների, տեղեկատվական ռեսուրսների և ծառայությունների շուկայի ձևավորմանն աջակցությունը.

իա) տրանսպորտի, կապի և տեղեկատվայնացման բնագավառներում ընթացիկ և հեռանկարային ծրագրերի մշակումը և իրականացումը:

7. Իր հիմնական խնդիրներին համապատասխան նախարարությունը`

ա) մշակում և իրականացնում է Հայաստանի Հանրապետության տրանսպորտի, կապի և տեղեկատվայնացման ենթակառուցվածքների զարգացման ծրագիրը.

բ) շահագրգիռ պետական կառավարման մարմինների մասնակցությամբ մշակում է Հայաստանի Հանրապետության տրանսպորտի, կապի և տեղեկատվայնացման ցանցերի զարգացման ու դրանց կառավարման սխեմաները.

գ) իրականացնում է հեռահաղորդակցության ծառայությունների համար հատկացված ռադիոհաճախության տիրույթի բաշխումն ու օգտագործման նկատմամբ վերահսկողությունը.

դ) Հայաստանի Հանրապետության պետական գույքի մասնավորեցման ծրագրին համապատասխան` ապահովում է սեփականաշնորհման և ապապետականացման գործընթացը.

ե) տրանսպորտի, կապի և տեղեկատվայնացման բնագավառներում իրականացնում է ներդրումային քաղաքականությունը.

զ) իրականացնում է իր կողմից տրված լիցենզիաների հաշվառումը և դրանց պայմանների կատարման նկատմամբ վերահսկողությունը.

է) սահմանում է Հայաստանի Հանրապետության փոստային նամականիշների պատկերի թեման, անվանագները, տպաքանակը, գործողության ժամկետները, կազմակերպում դրանց հրապարակումն ու տարածումը, ինչպես նաև իրականացնում է փոստային ունիվերսալ ծառայություններ մատուցող փոստային օբյեկտների ինդեքսավորումը.

ը) հաստատում է փոստային վճարումների, փոստային ծրարների և բացիկների նմուշները, սահմանում անվանագներն ու տպաքանակը, կազմակերպում դրանց հրապարակումը և տարածումը.

թ) կազմակերպում է նախարարության համակարգի կազմակերպությունների և հիմնարկների հաշվապահական հաշվառման ու հաշվետվության կատարելագործման աշխատանքները և դրանց հիման վրա կազմում ամփոփ հաշվապահական հաշվետվություն.

ժ) կազմակերպում է տրանսպորտի, կապի և տեղեկատվայնացման բնագավառում մասնագետների պատրաստման աշխատանքները.

ժա) կազմակերպում է նախարարության համակարգի աշխատողների սոցիալ-կենցաղային պայմանների բարելավման աշխատանքները.

ժբ) Հայաստանի Հանրապետության օրենսդրությամբ սահմանված այլ գործառույթների իրականացումը.

III. Նախարարության աշխատանքի կազմակերպումը

8. Նախարարության համակարգը ներառում է քաղաքացիական ավիացիայի գլխավոր վարչությունը (այսուհետև` վարչություն), Հայկական երկաթուղու դեպարտամենտ (այսուհետև` դեպարտամենտ), Հայաստանի Հանրապետության օդային, ավտոմոբիլային, ջրային, երկաթուղային տրանսպորտի, էլեկտրատրանսպորտի, մետրոպոլիտենի, ավտոմոբիլային ճանապարհների շինարարության ու շահագործման, փոստի, հեռահաղորդակցության, տեղեկատվայնացման հիմնարկները և կազմակերպությունները:

9. Նախարարությունը`

ա) սույն կանոնադրությամբ սահմանված խնդիրներն ու գործառույթներն իրականացնում է իրեն վերապահված լիազորությունների սահմաններում` չխախտելով համակարգի հիմնարկների և կազմակերպությունների` Հայաստանի Հանրապետության օրենսդրությամբ սահմանված ինքնուրույնությունը.

բ) պետական կառավարման մյուս մարմինների հետ իրականացնում է գործարար կապեր ու համագործակցություն` միջճյուղային հարցերի ուսումնասիրման և դրանց լուծման համար.

գ) ընդհանրացնում է բնագավառի օրենսդրական ակտերի կիրառման պրակտիկան, մշակում Հայաստանի Հանրապետության օրենսդրության կատարելագործման վերաբերյալ առաջարկություններ և դրանք սահմանված կարգով ներկայացնում Հայաստանի Հանրապետության կառավարություն.

դ) Հայաստանի Հանրապետության օրենսդրությամբ սահմանված կարգով մասնակցում է նախարարության իրավասությունների մեջ մտնող հարցերի վերաբերյալ միջազգային պայմանագրերի (համաձայնագրերի) նախագծերի մշակմանն ու քննարկմանը, կնքում միջազգային պայմանագրեր.

ե) կազմակերպում է կենտրոնական ապարատի և համակարգի աշխատողների մասնագիտական որակավորման բարձրացումը, նրանց վերապատրաստումը, անցկացնում կենտրոնական ապարատի աշխատողների ատեստավորում, համակարգում ղեկավար կադրերի ընտրության, վերապատրաստման և տեղաբաշխման աշխատանքները.

զ) անհրաժեշտության դեպքում Հայաստանի Հանրապետության նախարարությունների և գերատեսչությունների հետ համատեղ արձակում է հրամաններ, համագործակցում պետական կառավարման տարածքային մարմինների հետ.

է) կազմակերպում է քաղաքացիների և իրավաբանական անձանց նամակների (դիմումներ, բողոքներ) ժամանակին քննարկումը հասնելով դրանցում բարձրացված հարցերի ճիշտ և արդարացի լուծմանը, ինչպես նաև միջոցներ է ձեռնարկում նամակներում հաղորդվող նախարարության համակարգի գործունեության մեջ տեղ գտած թերությունների վերացման համար:

10. Նախարարությունը գլխավորում է նախարարը, որին պաշտոնի նշանակում և պաշտոնից ազատում է Հայաստանի Հանրապետության Նախագահը` Հայաստանի Հանրապետության վարչապետի առաջարկությամբ: Նախարարի տեղակալներին, ինչպես նաև դեպարտամենտի և վարչության պետերին ու նրանց տեղակալներին պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով նախարարի հետ:

11. Նախարարը`

ա) պատասխանատվություն է կրում նախարարության առջև դրված խնդիրների ու գործառույթների կատարման համար.

բ) կատարում է նախարարի տեղակալների պարտականությունների բաշխում, սահմանում նախարարության կենտրոնական ապարատի կառուցվածքային ստորաբաժանումների ղեկավարների իրավասությունների սահմանները.

գ) արձակում է հրամաններ, որոնց կատարումը պարտադիր է նախարարության համակարգի հիմնարկների և կազմակերպությունների համար.

դ) կասեցնում կամ ուժը կորցրած է ճանաչում վարչության, դեպարտամենտի, հիմնարկների և կազմակերպությունների` Հայաստանի Հանրապետության օրենսդրությանը հակասող հրամաններն ու կարգադրությունները.

ե) հաստատում է նախարարության կենտրոնական ապարատի կառուցվածքային ստորաբաժանումների, վարչության, համակարգի հիմնարկների, ինչպես նաև 100 տոկոս պետական մասնակցությամբ կազմակերպությունների կանոնադրությունները.

զ) Հայաստանի Հանրապետության վարչապետի հաստատմանն է ներկայացնում նախարարության և դեպարտամենտի կանոնադրությունները, դրանց կենտրոնական ապարատների կառուցվածքը, աշխատողների թիվը, կոլեգիայի կազմը.

է) ղեկավարում է նախարարության կոլեգիայի նիստերը.

ը) աշխատանքի նշանակում և աշխատանքից ազատում է նախարարության կենտրոնական ապարատի աշխատողներին.

թ) Հայաստանի Հանրապետության օրենսդրությամբ սահմանված կարգով տալիս է լիազորագրեր.

ժ) կազմակերպում է կադրերի պատրաստման, վերապատրաստման ու մասնագիտական որակավորման բարձրացման գործը, սահմանված կարգով խրախուսում կամ կարգապահական պատասխանատվության է ենթարկում նախարարության աշխատողներին.

ժա) անհրաժեշտության դեպքում վարում է դեպարտամենտի խորհրդի նիստերը և հրավիրում արտահերթ նիստեր.

ժբ) իրականացնում է Հայաստանի Հանրապետության օրենսդրությամբ սահմանված այլ լիազորություններ:

12. Նախարարի բացակայության ժամանակ, նրա հանձնարարությամբ, նախարարի պարտականությունները կատարում է նախարարի առաջին տեղակալը կամ տեղակալներից մեկը:

13. Նախարարությունում ստեղծվում է կոլեգիա, որի կազմի մեջ մտնում են նախարարը (նախագահ), նախարարի տեղակալները` ի պաշտոնե, դեպարտամենտի և վարչության ղեկավարները, նախարարության կենտրոնական ապարատի ու համակարգի այլ ղեկավար աշխատողներ:

14. Նախարարության կոլեգիան իր նիստերում, որոնք հրավիրվում են առնվազն յուրաքանչյուր ամիսը մեկ անգամ, քննության է առնում ոլորտի գործունեության ու զարգացման հիմնական հարցերը, քննարկում դեպարտամենտի, վարչության, համակարգի հիմնարկների ու կազմակերպությունների գործնական ղեկավարման, կատարողական կարգապահության ստուգման, ղեկավար կադրերի ընտրության ու տեղաբաշխման հարցերը, կարևորագույն հրամանների նախագծերը և նախարարության կենտրոնական ապարատի կառուցվածքային ստորաբաժանումների, դեպարտամենտի, վարչության, համակարգի հիմնարկների և կազմակերպությունների հաշվետվությունները:

Կոլեգիայի որոշումները, որպես կանոն, կենսագործվում են նախարարի հրամաններով: Նախարարի և կոլեգիայի անդամների միջև ծագած տարաձայնությունների դեպքում նախարարը կենսագործում է իր որոշումը` այդ տարաձայնությունների մասին զեկուցելով Հայաստանի Հանրապետության կառավարությանը կամ Հայաստանի Հանրապետության վարչապետին, իսկ կոլեգիայի անդամներն իրենց հերթին կարող են իրենց կարծիքը հայտնել Հայաստանի Հանրապետության կառավարությանը կամ Հայաստանի Հանրապետության վարչապետին:

15. Կոլեգիայի նիստերին մասնակցելու համար հրավիրվում է Հայաստանի Հանրապետության կառավարության աշխատակազմի համապատասխան ստորաբաժանման պատասխանատու աշխատողը, ինչպես նաև կարող են հրավիրվել Հայաստանի Հանրապետության նախարարությունների, գերատեսչությունների, պետական կառավարման տարածքային մարմինների, մամուլի և զանգվածային լրատվության մյուս միջոցների ու այլ կազմակերպությունների ներկայացուցիչներ:

Կ Ա Ռ ՈՒ Ց Վ Ա Ծ Ք

Հայաստանի Հանրապետության տրանսպորտի ԵՎ կապի նախարարության կենտրոնական ապարատի

Նախարարի աշխատակազմ

Ֆինանսատնտեսագիտական վարչություն

Ավտոտրանսպորտի վարչություն

Կապի վարչություն

Տեխնիկական քաղաքականության և ծրագրերի վարչություն

Ներդրումների և շինարարական ծրագրերի վարչություն

Իրավաբանական վարչություն

Արտաքին կապերի վարչություն

Հակամենաշնորհային քաղաքականության և լիցենզիաների վարչություն

Տեղեկատվական համակարգերի, տեխնոլոգիաների և ռեսուրսների վարչություն

Փոխադրումների վարչություն

Հաշվապահություն

Կադրերի բաժին

Առաջին բաժին

Ռազմամոբիլիզացիոն բաժին

Գործերի կառավարչություն