ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

5 փետրվարի 2004 թվականի N 46-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՎՏԱՆԳԱՎՈՐ ԹԱՓՈՆՆԵՐԻ ՎԵՐԱՄՇԱԿՄԱՆ, ՎՆԱՍԱԶԵՐԾՄԱՆ, ՊԱՀՊԱՆՄԱՆ, ՓՈԽԱԴՐՄԱՆ ԵՎ ՏԵՂԱԴՐՄԱՆ ԳՈՐԾՈՒՆԵՈՒԹՅԱՆ ԼԻՑԵՆԶԱՎՈՐՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ ԿԱԶՄԸ ԵՎ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարության 2003 թվականի հունվարի 30-ի N 121-Ն որոշմամբ հաստատված կարգի 6-րդ կետի երրորդ պարբերության համաձայն`

1. Հաստատել`

ա) Հայաստանի Հանրապետությունում վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման միջգերատեսչական հանձնաժողովի աշխատակարգը` համաձայն N 1 հավելվածի.

բ) Հայաստանի Հանրապետությունում վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման միջգերատեսչական հանձնաժողովի կազմը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2004թ. փետրվարի 5    Երևան

Հավելված N 1 ՀՀ վարչապետի 2004 թ. փետրվարի 5-ի N 46-Ն որոշման

Ա Շ Խ Ա Տ Ա Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՎՏԱՆԳԱՎՈՐ ԹԱՓՈՆՆԵՐԻ ՎԵՐԱՄՇԱԿՄԱՆ, ՎՆԱՍԱԶԵՐԾՄԱՆ, ՊԱՀՊԱՆՄԱՆ, ՓՈԽԱԴՐՄԱՆ ԵՎ ՏԵՂԱԴՐՄԱՆ ԳՈՐԾՈՒՆԵՈՒԹՅԱՆ ԼԻՑԵՆԶԱՎՈՐՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն աշխատակարգով սահմանվում է Հայաստանի Հանրապետության կառավարության 2003 թվականի հունվարի 30-ի «Հայաստանի Հանրապետությունում վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման կարգը հաստատելու մասին» N 121-Ն որոշմամբ սահմանված կարգով (այսուհետ՝ կարգ) լիցենզավորող մարմին տվյալ հայտատուի` վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեությամբ զբաղվելու նպատակահարմարության վերաբերյալ միջգերատեսչական հանձնաժողովի (այսուհետ՝ հանձնաժողով) փորձաքննական եզրակացություն ներկայացնելու հետ կապված գործառույթներն ու գործունեության կազմակերպման ընթացակարգը:

2. Հանձնաժողովն իր գործունեության ընթացքում ղեկավարվում է Հայաստանի Հանրապետության Սահմանադրությամբ, «Լիցենզավորման մասին» Հայաստանի Հանրապետության օրենքով, Հայաստանի Հանրապետության կառավարության 2003 թվականի հունվարի 30-ի N 121- Ն որոշմամբ, սույն աշխատակարգով և այլ իրավական ակտերով:

3. Հանձնաժողովի անհատական կազմը հաստատում է Հայաստանի Հանրապետության բնապահպանության նախարարը:

II. ՀԱՆՁՆԱԺՈՂՈՎԻ ՆՊԱՏԱԿՆ ՈՒ ԽՆԴԻՐՆԵՐԸ

4. Հանձնաժողովի նպատակը լիցենզավորող մարմնին տվյալ հայտատուի` վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեությամբ զբաղվելու նպատակահարմարության վերաբերյալ փորձաքննական եզրակացություն տալն է:

5. Հանձնաժողովի խնդիրներն են՝

ա) Հայաստանի Հանրապետությունում վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման համար մասնագիտորեն հիմնավորված փորձաքննական եզրակացության ապահովումը.

բ) տվյալ հայտատուի վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեությամբ զբաղվելու նպատակահարմարության վերաբերյալ լիցենզավորող մարմնին փորձաքննական եզրակացության, հայտին կից փաստաթղթերի և գործունեության իրականացման մասին կիսամյակային հաշվետվությունների ընդունման, դրանց քննարկման, լիցենզիայի ձևակերպման, տրված լիցենզիայի մասին բնապահպանական, սանիտարահամաճարակային և հակահրդեհային մարմիններին տեղեկացնելու գործընթացի ապահովումը:

III. ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐԸ

6. Հանձնաժողովի գործառույթներն են`

ա) վտանգավոր թափոնների վերամշակման, վնասազերծման, պահպանման, փոխադրման և տեղադրման համար լիցենզավորվող գործունեության իրականացմանն անհրաժեշտ նորմատիվամեթոդական փաստաթղթերի առկայության ու դրանց տիրապետման, նյութատեխնիկական հագեցվածության փորձաարտադրական տեղակայանքների, սարքավորումների ու անալիտիկ գործիքների, գործունեության իրականացման վայրի, վտանգավոր թափոնների տեղադրման վայրի ընտրության և անհրաժեշտ պայմաններով ապահովվածությանը վերաբերող, ինչպես նաև կարգով պահանջվող այլ փաստաթղթերի (այսուհետ՝ փաստաթղթեր) լիակազմության ու արժանահավատության ստուգումը.

բ) վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեությամբ զբաղվելու նպատակով տվյալ հայտատուի կողմից ներկայացված փաստաթղթերի ուսումնասիրությունն ու գնահատումը, լիցենզավորվող գործունեության նպատակահարմարության վերաբերյալ փորձաքննական եզրակացության կազմումն ու այն լիցենզավորող մարմին ներկայացնելը.

գ) լիցենզավորվող գործունեության` էկոլոգիապես անվտանգ եղանակների ու պայմանների վերաբերյալ առաջարկություններ տալը.

դ) լիցենզիա ստանալու մասին հայտը բավարարելու վերաբերյալ ընդունված որոշման հիման վրա հայտատուի անունով լիցենզիայի ձևակերպումը.

ե) լիցենզավորող մարմնից ստացված հայտի ու դրան կից փաստաթղթերի և գործունեության իրականացման մասին կիսամյակային հաշվետվություններ ստանալը.

զ) տրված լիցենզիայի մասին Հայաստանի Հանրապետության օրենսդրությամբ սահմանված կարգով բնապահպանական, սանիտարահամաճարակային և հակահրդեհային մարմիններին տեղյակ պահելը:

IV. ՀԱՆՁՆԱԺՈՂՈՎԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

7. Հանձնաժողովի աշխատանքները կազմակերպվում են նիստերի միջոցով:

8. Հանձնաժողովի նիստերը հրավիրվում են լիցենզավորող մարմնից հայտն ու փաստաթղթերն ստանալուց հետո՝ 5 օրվա ընթացքում:

9. Հանձնաժողովի նիստերն իրավազոր են, եթե դրանց մասնակցում է հանձնաժողովի անդամների թվի կեսից ավելին: Հանձնաժողովի որոշումներն ընդունվում են քվեարկությամբ` հանձնաժողովի անդամների ընդհանուր թվի ձայների պարզ մեծամասնությամբ: Քվեարկության արդյունքում հանձնաժողովի անդամների ձայների հավասարության դեպքում հանձնաժողովի նախագահի ձայնը վճռորոշ է:

10. Հանձնաժողովի նիստերը վարում է հանձնաժողովի նախագահը, իսկ նրա բացակայության դեպքում՝ հանձնաժողովի նախագահի տեղակալը:

11. Հանձնաժողովի նախագահը՝

ա) լիցենզավորվող գործունեության վերաբերյալ փորձաքննական եզրակացություն կազմելու նպատակով, տվյալ գործունեության շրջանակներում, հայտատուից կարող է պահանջել լրացուցիչ տվյալներ և հանձնաժողովի աշխատանքներում ներգրավել համապատասխան մասնագետների:

12. Հանձնաժողովի նախագահի տեղակալը՝

ա) հանձնաժողովի նախագահի բացակայության դեպքում փոխարինում է նրան.

բ) ուսումնասիրում է լիցենզավորող մարմնից ստացված հայտն ու դրան կից փաստաթղթերի լիակազմությունը.

գ) կազմակերպում է հանձնաժողովի նիստերի հրավիրման աշխատանքները.

դ) ապահովում է լիցենզիայի ձևակերպումը:

13. Հանձնաժողովի քարտուղարը՝

ա) հանձնաժողովի անդամներին տեղեկացնում է նիստի անցկացման օրվա, ժամի և տեղի մասին.

բ) նախապատրաստում է հանձնաժողովի նիստում քննարկվելիք նյութերը.

գ) կազմում է հանձնաժողովի նիստի արձանագրությունները և ապահովում հանձնաժողովի անդամների ստորագրությունները.

դ) քննարկման արդյունքների հիման վրա կազմում է վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման վերաբերյալ փորձաքննական եզրակացությունը և հանձնաժողովի նիստում քվեարկությանը մասնակցած անդամների ստորագրություններով այն ներկայացնում հանձնաժողովի նախագահին՝ ստորագրության.

ե) գրանցում է լիցենզավորող մարմնից ստացված հայտն ու դրան կից փաստաթղթերը, հանձնաժողովի նիստերի արձանագրությունները, փորձաքննական եզրակացությունները և գործունեության իրականացման մասին կիսամյակային հաշվետվությունները:

V. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

14. Հանձնաժողովի գործունեությունը դադարում է Հայաստանի Հանրապետության օրենսդրությամբ սահմանված կարգով:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ վարչապետի 2004 թ. փետրվարի 5-ի N 46-Ն որոշման

Կ Ա Զ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՎՏԱՆԳԱՎՈՐ ԹԱՓՈՆՆԵՐԻ ՎԵՐԱՄՇԱԿՄԱՆ, ՎՆԱՍԱԶԵՐԾՄԱՆ, ՊԱՀՊԱՆՄԱՆ, ՓՈԽԱԴՐՄԱՆ ԵՎ ՏԵՂԱԴՐՄԱՆ ԳՈՐԾՈՒՆԵՈՒԹՅԱՆ ԼԻՑԵՆԶԱՎՈՐՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

Հայաստանի Հանրապետության բնապահպանության նախարար	հանձնաժողովի նախագահ
Հայաստանի Հանրապետության բնապահպանության նախարարության աշխատակազմի վտանգավոր նյութերի և թափոնների կառավարման բաժնի պետ	նախագահի տեղակալ
Հայաստանի Հանրապետության առևտրի և տնտեսական զարգացման նախարարության ներկայացուցիչ
Հայաստանի Հանրապետության ֆինանսների և էկոնոմիկայի նախարարության ներկայացուցիչ
Հայաստանի Հանրապետության առողջապահության նախարարության ներկայացուցիչ
Հայաստանի Հանրապետության գյուղատնտեսության նախարարության ներկայացուցիչ
Հայաստանի Հանրապետության տրանսպորտի և կապի նախարարության ներկայացուցիչ
Հայաստանի Հանրապետության բնապահպանության նախարարության ներկայացուցիչ
Հայաստանի Հանրապետության կառավարությանն առընթեր ազգային անվտանգության ծառայության ներկայացուցիչ
Հայաստանի Հանրապետության կառավարությանն առընթեր Հայաստանի Հանրապետության ոստիկանության ներկայացուցիչ
Հայաստանի Հանրապետության կառավարությանն առընթեր արտակարգ իրավիճակների վարչության ներկայացուցիչ
Հայաստանի Հանրապետության գիտությունների ազգային ակադեմիայի ներկայացուցիչ
Երևանի քաղաքապետարանի ներկայացուցիչ
Հայաստանի Հանրապետության բնապահպանության նախարարության աշխատակազմի վտանգավոր նյութերի և թափոնների կառավարման բաժնի գլխավոր մասնագետ	հանձնաժողովի քարտուղար

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան