ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

17 հունվարի 2000 թվականի N 17
քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 1997 ԹՎԱԿԱՆԻ ՆՈՅԵՄԲԵՐԻ 14-Ի N 532 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հայաստանի Հանրապետության վարչապետի 1997 թվականի նոյեմբերի 14-ի «Հայաստանի Հանրապետության արդարադատության նախարարության կանոնադրությունը և կենտրոնական ապարատի կառուցվածքը հաստատելու մասին» N 532 որոշման մեջ (Հայաստանի Հանրապետության վարչապետի 1998 թվականի օգոստոսի 3-ի N 468 և սեպտեմբերի 18-ի N 556, 1998 թվականի նոյեմբերի 6-ի N 616 որոշումների խմբագրությամբ) կատարել հետևյալ փոփոխությունը`

որոշմամբ հաստատված կանոնադրության IV բաժինը շարադրել հետևյալ խմբագրությամբ.

«IV. Դատավորների պաշտոնեական պիտանիության եվ ծառայողական առաջխաղացման ցուցակների նախապատրաստումը

17. Դատավորների պաշտոնեական պիտանիության և ծառայողական առաջխաղացման ցուցակների վերաբերյալ առաջարկի ձևավորման նպատակով նախարարության կենտրոնական ապարատում իրականացվում են ցուցակներում ընդգրկվելու ցանկություն հայտնած այն անձանց (այսուհետև` հավակնորդներ) նախնական հաշվառման աշխատանքներ, ովքեր բավարարում են «Արդարադատության խորհրդի մասին» Հայաստանի Հանրապետության օրենքով դատավորների պաշտոնեական պիտանիության և ծառայողական առաջխաղացման ցուցակներում ընդգրկվելու համար սահմանված պահանջները:

18. Հավակնորդները նախարարի սահմանած ժամկետում նախարարություն են ներկայացնում համապատասխան փաստաթղթեր, որոնց ցանկը հաստատում է նախարարը: Փաստաթղթերը ներկայացնելու ժամկետի մասին հաղորդագրությունը նախապես հրապարակվում է զանգվածային լրատվության միջոցներով:

Նշված փաստաթղթերից կազմված գործերը նախարարի մակագրությամբ վերցվում են հաշվառման և պահվում են նախարարությունում:

19. Սահմանված փաստաթղթերը հանձնած բոլոր հավակնորդներին տրամադրվում են քննական վկայականներ` հավակնորդների մասնագիտական կարողությունների ստուգմանը (այսուհետև` ստուգում) մասնակցելու նպատակով:

20. Ստուգումը կազմակերպելու նպատակով նախարարն ստեղծում է 5 անդամից կազմված հանձնաժողով (այսուհետև` հանձնաժողով):

Արդարադատության խորհրդի անդամները չեն կարող լինել հանձնաժողովի անդամ:

21. Հանձնաժողովը`

ա) կազմակերպում է ընդհանուր և հատուկ ծրագրերով ստուգման աշխատանքները.

բ) հաստատում է ընդհանուր ծրագրով ստուգման համար կիրառելի հարցերը.

գ) որոշում է ստուգման վայրը, ժամանակը, տևողությունը և դրա մասին հրապարակում տեղեկատվություն.

դ) հաստատում և հրապարակում է ստուգման կանոնները.

ե) հաստատում է ստուգման պահանջները բավարարելու պայմանները.

զ) որոշում է հանձնաժողովի աշխատանքների կազմակերպման և ստուգող ու բողոքարկման հանձնաժողովների գործունեության կարգերը.

է) քննում է հավակնորդների բողոքները` կապված ստուգման կազմակերպման հետ.

ը) ընդունում է ստուգման կազմակերպման հետ կապված որոշումներ:

Հանձնաժողովն իրականացնում է սույն կանոնադրությամբ սահմանված այլ լիազորություններ:

22. Հանձնաժողովի նախագահը, ի պաշտոնե, Հայաստանի Հանրապետության արդարադատության նախարարն է:

Հանձնաժողովի նախագահը`

ա) ղեկավարում է հանձնաժողովի աշխատանքները, հրավիրում և վարում հանձնաժողովի նիստերը.

բ) կազմակերպում է ընդհանուր ծրագրով ստուգման առաջադրանքների խնդիրների և հատուկ ծրագրով ստուգման առաջադրանքների մշակման աշխատանքները.

գ) կազմակերպում է բողոքարկման և ստուգող հանձնաժողովներ.

դ) իրականացնում է հսկողություն ստուգման ընթացքի նկատմամբ:

Հանձնաժողովի նախագահը նաև իրականացնում է սույն կանոնադրությամբ նախատեսված այլ լիազորություններ:

23. Ընդհանուր և հատուկ ծրագրերով ստուգումներն անցկացվում են տարեկան մեկ անգամ:

Ընդհանուր ծրագրով ստուգումն անցկացվում է դեկտեմբերին, իսկ հատուկ ծրագրով ստուգումը հունվարին:

24. Փաստաթղթերը սահմանված ժամկետում չներկայացրած կամ սահմանված ժամկետում ստուգմանը չներկայացած հավակնորդները զրկվում են տվյալ ստուգմանը մասնակցելու իրավունքից: Նրանք իրավունք ունեն դիմելու և մասնակցելու հաջորդ ստուգմանը:

25. Ընդհանուր ծրագրով ստուգման առաջադրանքների հարցերը նախապատրաստում է հանձնաժողովը, որը պարտավոր է ապահովել դրանց գաղտնիությունը:

26. Ընդհանուր ծրագրով ստուգման պահանջները մշակվում են` նկատի ունենալով հավակնորդների մասնագիտական կարողություններն իրավունքի հետևյալ բնագավառներում`

ա) քրեական և քրեական դատավարություն.

բ) քաղաքացիական և քաղաքացիական դատավարություն:

Հատուկ ծրագրով ստուգման պահանջները մշակվում են` նկատի ունենալով հավակնորդների մասնագիտական կարողություններն իրավունքի հետևյալ բնագավառներում`

ա) քաղաքացիական իրավունք.

բ) քրեական իրավունք.

գ) քաղաքացիական դատավարության իրավունք.

դ) սահմանադրական իրավունք:

27. Ընդհանուր ծրագրով ստուգման ժամանակ գնահատումն իրականացնում է հանձնաժողովը: Ընդհանուր և հատուկ ծրագրով ստուգման առաջադրանքների գնահատումն իրականացվում է 20 միավորանոց համակարգով: Ստուգումն ու գնահատումն իրականացնում են ստուգող հանձնաժողովները, որոնցում ընդգրկվում են համապատասխան բնագավառի ճանաչված մասնագետներ:

28. Ընդհանուր ծրագրով ստուգման արդյունքները բողոքարկվում են բողոքարկման հանձնաժողովին:

Եթե բողոքարկման հանձնաժողովը որոշում է բավարարել հավակնորդի բողոքը, ապա այդ որոշման հիման վրա հավակնորդների միավորներն ավելացվում են:

Բողոքարկման հանձնաժողովի որոշումները վերջնական են:

Հատուկ ծրագրով ստուգման արդյունքները բողոքարկման ենթակա չեն:

29. Բողոքարկման հանձնաժողովը կազմվում է իրավագիտության բնագավառում ճանաչված մասնագետներից: Բողոքարկման հանձնաժողովի կազմում չեն կարող ընդգրկվել արդարադատության խորհրդի անդամները:

30. Ստուգման աշխատանքների ժամանակ ներկա գտնվելու իրավունք ունեն զանգվածային լրատվության միջոցների ներկայացուցիչներ` նախապես համաձայնեցնելով հանձնաժողովի հետ, ինչպես նաև հանձնաժողովի որոշմամբ հրավիրված դիտորդներ:

Ստուգման աշխատանքների ժամանակ ներկա գտնվելու իրավունք ունեն արդարադատության խորհրդի անդամները:

31. Դատավորների պաշտոնեական պիտանիության ցուցակների վերաբերյալ առաջարկում ընդգրկվում են ընդհանուր ծրագրով ստուգման պահանջները բավարարած հավակնորդները:

Դատավորների ծառայողական առաջխաղացման ցուցակների վերաբերյալ առաջարկում ընդգրկվում են հատուկ ծրագրով ստուգման պահանջները բավարարած հավակնորդները:

Դատավորների պաշտոնեական պիտանիության և ծառայողական առաջխաղացման ցուցակների վերաբերյալ առաջարկի կազմման նպատակով նախարարը կարող է ստուգման պահանջները բավարարած հավակնորդներին հրավիրել հարցազրույցի:

32. Նախորդ տարվա դատավորների պաշտոնեական պիտանիության և ծառայողական առաջխաղացման ցուցակներում ընդգրկվածները մնում են հաջորդ տարվա ցուցակներում:

33. «Արդարադատության խորհրդի մասին» Հայաստանի Հանրապետության օրենքով նախատեսված իրավաբանի մասնագիտական աշխատանքի ստաժի հաշվառման կարգը հաստատում է Հայաստանի Հանրապետության արդարադատության նախարարը»: