ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

 

Ո Ր Ո Շ ՈՒ Մ

 

20 օգոստոսի 1999 թվականի N 497
քաղ. Երևան

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՓՈՍՏԻ ԵՎ ՀԵՌԱՀԱՂՈՐԴԱԿՑՈՒԹՅԱՆ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆՆ ՈՒ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

 

1. Հաստատել Հայաստանի Հանրապետության փոստի և հեռահաղորդակցության նախարարության կանոնադրությունն ու կենտրոնական ապարատի կառուցվածքը (կցվում են):

2. Հայաստանի Հանրապետության վարչապետի 1998 թվականի նոյեմբերի 6-ի «Պետական կառավարման մարմինների աշխատողների առավելագույն թվաքանակի և ղեկավարների տեղակալների թվաքանակ սահմանելու մասին» N 620 որոշման մեջ կատարել հետևյալ փոփոխությունը`

որոշման հավելվածի «17. ՀՀ փոստի և հեռահաղորդակցության նախարարություն» տողը շարադրել հետևյալ խմբագրությամբ.

«17. ՀՀ փոստի և հեռահաղորդակցության նախարարություն

72

2

-»:

 3. Հայաստանի Հանրապետության փոստի և հեռահաղորդակցության նախարարության ապարատի աշխատողների թվի ավելացման հետ կապված ծախսերն իրականացնել Հայաստանի Հանրապետության 1999 թվականի պետական բյուջեով նախարարության ապարատի պահպանման համար նախատեսված միջոցների սահմաններում:

4. Ուժը կորցրած ճանաչել Հայաստանի Հանրապետության վարչապետի 1998 թվականի դեկտեմբերի 21-ի «Հայաստանի Հանրապետության փոստի և հեռահաղորդակցության նախարարության կանոնադրությունն ու կենտրոնական ապարատի կառուցվածքը հաստատելու մասին» N 740 որոշման 1-ին կետը:

 

Հայաստանի Հանրապետության վարչապետ

Վ. Սարգսյան

 

Հաստատված է ՀՀ վարչապետի 1999 թ. օգոստոսի 20-ի N 497 որոշմամբ

 

Կ Ա Ն Ո Ն Ա Դ Ր ՈՒ Թ Յ ՈՒ Ն

 

Հայաստանի Հանրապետության փոստի ԵՎ հեռահաղորդակցության նախարարության

 

I. Ընդհանուր դրույթներ

 

1. Հայաստանի Հանրապետության փոստի և հեռահաղորդակցության նախարարությունը (այսուհետև` նախարարություն) Հայաստանի Հանրապետության գործադիր իշխանության հանրապետական մարմին է:

2. Նախարարությունը գործում է Հայաստանի Հանրապետության օրենսդրությանը համապատասխան և իր խնդիրները լուծելու նպատակով իրականացնում է Հայաստանի Հանրապետության օրենսդրությամբ և սույն կանոնադրությամբ իրեն վերապահված լիազորությունները:

Նախարարությունն իր իրավասությունների սահմաններում Հայաստանի Հանրապետության անունից կարող է գույքային և անձնական ոչ գույքային իրավունքներ ու պարտականություններ ձեռք բերել և իրականացնել, ինչպես նաև հանդես գալ դատարանում:

3. Նախարարությունն իր իրավասությունների սահմաններում ընդունում է գերատեսչական նորմատիվ ակտեր:

4. Նախարարությունն ունի Հայաստանի Հանրապետության զինանշանի պատկերով և իր անվամբ կնիք, դրոշմակնիք, ձևաթուղթ:

5. Նախարարության ապարատի պահպանման և գործունեության համար անհրաժեշտ ֆինանսավորումն իրականացվում է Հայաստանի Հանրապետության պետական բյուջեի միջոցների հաշվին:

 

II. Նախարարության խնդիրներն ու գործառույթները

 

6. Նախարարության հիմնական խնդիրներն են`

ա) փոստի, հեռահաղորդակցության և տեղեկատվայնացման բնագավառների գործունեության կարգավորումը` ուղղված քաղաքացիների ու իրավաբանական անձանց, փոստի, հեռահաղորդակցության և տեղեկատվական ծառայությունների մատուցման կարիքների բավարարմանը.

բ) փոստի, հեռահաղորդակցության և տեղեկատվայնացման բնագավառներում պետական քաղաքականության մշակումն ու իրականացումը.

գ) փոստի և հեռահաղորդակցության բնագավառներին առնչվող օրենսդրական ակտերի նախագծերի մշակումն ու գերատեսչական նորմատիվ ակտերի ընդունումը.

դ) փոստի, հեռահաղորդակցության և տեղեկատվայնացման բնագավառներում տնտեսական գործունեության առանձին տեսակների լիցենզավորումը.

ե) փոստի, հեռահաղորդակցության և տեղեկատվայնացման բնագավառներում գործող ու նոր ստեղծվող հեռահաղորդակցության ցանցերի և տվյալ բնագավառի այլ սարքավորումների ու ծառայությունների սերտիֆիկացման աշխատանքների կազմակերպումը.

զ) փոստի և հեռահաղորդակցության կանոնների, հեռահաղորդակցության ցանցերի տեխնիկական միջոցների, տվյալ բնագավառի այլ միջոցների ու կառույցների օգտագործման և շահագործման կարգի սահմանումը.

է) փոստի և հեռահաղորդակցության բնագավառում մոբիլիզացման ծրագրի մշակումն ու արտակարգ իրավիճակներում հեռահաղորդակցության գործող ցանցերի և այլ միջոցների համակարգումը.

ը) փոստի, հեռահաղորդակցության և տեղեկատվայնացման բնագավառներում գործող լիցենզիաների ու նորմատիվ փաստաթղթերի պայմանների և պահանջների կատարման, ինչպես նաև փոստի, հեռահաղորդակցության և տեղեկատվայնացման կանոնների և նորմերի պահպանման պետական վերահսկողության իրականացումը.

թ) հեռահաղորդակցության հանրային համակցված ցանցին այլ ցանցերի լծորդման տեխնիկական պայմանների սահմանումը.

ժ) հեռահաղորդակցության ծառայությունների համար հատկացված ռադիոհաճախությունների տիրույթի բաշխման և կարգավորման, ինչպես նաև օգտագործման նորմերի կարգի ու պայմանների հաստատման ուղղությամբ Հայաստանի Հանրապետության կառավարության կողմից լիազորված մարմնի պարտականությունների իրականացումը.

ժա) բացառիկ իրավունքով մատուցվող հեռահաղորդակցության ծառայությունների սակագների հաստատումն ու հրապարակումը.

ժբ) փոստի և հեռահաղորդակցության բնագավառում գիտատեխնիկական առաջընթացի ապահովումը.

ժգ) պետական կառավարման և տեղական ինքնակառավարման մարմինների համար հանրապետական միասնական տեղեկատվական ցանցերի ու համակարգերի ստեղծման և զարգացման աշխատանքների համակարգումը` ապահովելով դրանց համատեղելիությունն ու փոխգործակցությունը միջպետական, ԱՊՀ անդամ պետությունների և այլ տեղեկատվական ցանցերի հետ.

ժդ) պետական տեղեկատվական ռեսուրսների հիման վրա քաղաքացիների, պետական կառավարման ու տեղական ինքնակառավարման մարմինների և կազմակերպությունների համար տեղեկատվության ապահովման պայմանների ստեղծումը.

ժե) տեղեկատվական ռեսուրսների և ծառայությունների, տեղեկատվական համակարգերի, տեխնոլոգիաների ու դրանց ապահովման միջոցների շուկայի ձևավորմանն աջակցությունը.

ժզ) տեղեկատվայնացման բնագավառի ընթացիկ և հեռանկարային պլանավորումը.

ժէ) փոստի, հեռահաղորդակցության և տեղեկատվայնացման բնագավառների աշխատողների սոցիալական պաշտպանվածության ու աշխատանքի անվտանգ պայմանների ապահովումը.

ժը) միջազգային կազմակերպություններում փոստի, հեռահաղորդակցության և տեղեկատվայնացման բնագավառների շահերը ներկայացնելն ու դրանց պաշտպանությունը.

ժթ) տեղեկատվայնացման բնագավառում Հայաստանի Հանրապետության նախարարությունների և գերատեսչությունների իրավասությունների սահմաններում տարվող աշխատանքների համաձայնեցումն ու համակարգումը:

7. Իր հիմնական խնդիրներին համապատասխան նախարարությունը`

ա) մշակում և իրականացնում է Հայաստանի Հանրապետության փոստի, հեռահաղորդակցության և տեղեկատվայնացման ենթակառուցվածքի զարգացման ծրագրի նախագիծը.

բ) շահագրգիռ պետական կառավարման մարմինների մասնակցությամբ մշակում է Հայաստանի Հանրապետության փոստի, հեռահաղորդակցության և տեղեկատվայնացման ցանցերի զարգացման ու դրանց կառավարման սխեմաները.

գ) իրականացնում է հեռահաղորդակցության ծառայությունների համար հատկացված ռադիոհաճախության տիրույթի բաշխումն ու օգտագործման վերահսկումը.

դ) Հայաստանի Հանրապետության կառավարություն է ներկայացնում առաջարկություններ համակարգի կազմակերպությունների սեփականաշնորհման և ապապետականացման վերաբերյալ.

ե) Հայաստանի Հանրապետության պետական գույքի մասնավորեցման ծրագրին համապատասխան ապահովում է սեփականաշնորհման և ապապետականացման գործընթացը.

զ) իրականացնում է մենաշնորհային գործունեության սահմանափակմանն ուղղված քաղաքականությունը և օժանդակ հեռահաղորդակցության բնագավառում նոր տնտեսական կառույցների ստեղծմանը,

է) փոստի, հեռահաղորդակցության և տեղեկատվայնացման բնագավառներում իրականացնում է ներդրումների քաղաքականությունը.

ը) իրականացնում է իր կողմից տրված լիցենզիաների հաշվառումը և դրանց պայմանների կատարման նկատմամբ վերահսկողությունը.

թ) սահմանում է Հայաստանի Հանրապետության փոստային նամականիշերի պատկերի թեման, անվանագները, տպաքանակը, գործողության ժամկետները, կազմակերպում դրանց հրապարակումն ու տարածումը, ինչպես նաև իրականացնում է փոստային ունիվերսալ ծառայություններ մատուցող փոստային օբյեկտների ինդեքսավորումը.

ժ) հաստատում է փոստային վճարումների, փոստային ծրարների և բացիկների նմուշները, սահմանում անվանագներն ու տպաքանակները, կազմակերպում դրանց հրապարակումը և տարածումը.

ժա) կազմակերպում և քննարկում է համակարգի կազմակերպությունների հաշվապահական հաշվառման ու հաշվետվության կատարելագործման աշխատանքները և դրանց հիման վրա կազմում ընդհանրացված հաշվապահական հաշվետվություն.

ժբ) կազմակերպում է փոստի, հեռահաղորդակցության և տեղեկատվայնացման բնագավառներում մասնագետների պատրաստման աշխատանքները.

ժգ) իրականացնում է Հայաստանի Հանրապետության օրենսդրությամբ իրեն վերապահված այլ խնդիրներ ու գործառույթներ:

 

III. Նախարարության աշխատանքի կազմակերպումը

 

8. Նախարարությունը սույն կանոնադրությամբ սահմանված խնդիրներն ու գործառույթներն իրականացնում է իրեն վերապահված լիազորությունների սահմաններում` չխախտելով համակարգի հիմնարկների Հայաստանի Հանրապետության օրենսդրությամբ սահմանված ինքնուրույնությունը:

9. Նախարարությունը մյուս պետական մարմինների հետ իրականացնում է գործարար կապեր ու համագործակցություն` միջճյուղային հարցերի մշակման և լուծման համար:

10. Նախարարությունն ընդհանրացնում է բնագավառի օրենսդրական ակտերի կիրառման պրակտիկան, Հայաստանի Հանրապետության օրենսդրության կատարելագործման վերաբերյալ մշակում առաջարկություններ և դրանք սահմանված կարգով ներկայացնում Հայաստանի Հանրապետության կառավարություն:

11. Նախարարությունը սահմանված կարգով մասնակցում է իր իրավասության մեջ մտնող հարցերի վերաբերյալ միջազգային պայմանագրերի (համաձայնագրերի) նախագծերի մշակմանն ու քննարկմանը:

12. Նախարարությունը կազմակերպում է կենտրոնական ապարատի և համակարգի աշխատողների մասնագիտական որակավորման բարձրացումը, նրանց վերապատրաստումը, անցկացնում կենտրոնական ապարատի աշխատողների ատեստավորում, համակարգում ղեկավար կադրերի ընտրության, վերապատրաստման և տեղաբաշխման աշխատանքները:

13,. Նախարարությունը գլխավորում է նախարարը, որին պաշտոնի նշանակում և պաշտոնից ազատում է Հայաստանի Հանրապետության Նախագահը` Հայաստանի Հանրապետության վարչապետի առաջարկությամբ:

14. Նախարարն ունի տեղակալներ, որոնց պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով նախարարի հետ:

15. Նախարարը`

ա) ղեկավարում է նախարարության և համակարգի ընթացիկ գործունեությունը և պատասխանատու է նախարարության սույն կանոնադրությամբ սահմանված խնդիրների ու գործառույթների իրականացման համար.

բ) սահմանում է իր տեղակալների, կառուցվածքային ստորաբաժանումների ղեկավարների իրավասության սահմանները, հաստատում նախարարության կենտրոնական ապարատի կառուցվածքային ստորաբաժանումների և համակարգի 100 տոկոս պետական մասնակցությամբ առևտրային կազմակերպությունների կանոնադրությունները.

գ) իր իրավասության սահմաններում արձակում է հրամաններ և հրահանգներ, տալիս ցուցումներ, որոնց կատարումը պարտադիր է նախարարության համակարգի հիմնարկների, կազմակերպությունների, ինչպես նաև քաղաքացիների համար` Հայաստանի Հանրապետության օրենսդրությամբ սահմանված կարգով.

դ) կասեցնում կամ ուժը կորցրած է ճանաչում նախարարության համակարգի հիմնարկների և կազմակերպությունների այն հրամաններն ու հրահանգները, որոնք հակասում են Հայաստանի Հանրապետության օրենսդրությանը.

ե) Հայաստանի Հանրապետության վարչապետի հաստատմանն է ներկայացնում նախարարության կանոնադրությունը, կենտրոնական ապարատի կառուցվածքը, կոլեգիայի կազմը և կենտրոնական ապարատի աշխատողների թիվը.

ը) հաստատում է նախարարության կոլեգիայի նիստերի նախապատրաստման, հրավիրման, անցկացման և որոշումների ընդունման կարգը.

թ) աշխատանքային պայմանագրեր է կնքում նախարարության համակարգի կազմակերպությունների ղեկավարների հետ.

ժ) իրականացնում է Հայաստանի Հանրապետության օրենսդրությամբ և սույն կանոնադրությամբ իրեն վերապահված այլ լիազորություններ:

16. Նախարարի բացակայության կամ պաշտոնական պարտականությունները կատարելու անհնարինության դեպքում նրան փոխարինում է տեղակալներից մեկը:

17. Նախարարությունը բնագավառի կառավարման բոլոր հարցերի քննարկումն ու լուծումը կազմակերպում է կոլեգիալության և միանձնյա ղեկավարման զուգակցման հիման վրա` աշխատանքի հանձնարարված տեղամասում գործերի վիճակի ու որոշակի առաջադրանքների կատարման համար պաշտոնատար անձանց պատասխանատվության ճշտորոշ սահմանմամբ:

18. Նախարարությունում ստեղծվում է կոլեգիա, որի կազմի մեջ մտնում են նախարարը (նախագահ), նախարարի տեղակալներն ի պաշտոնե, նախարարության ղեկավար աշխատողներ:

19. Նախարարության կոլեգիան իր պարբերաբար անցկացվող նիստերում (առնվազն երկու ամիսը մեկ անգամ) քննության է առնում բնագավառի զարգացման հարցերը, քննարկում համակարգի կազմակերպությունների գործնական ղեկավարման, կատարման ստուգման, ղեկավար կադրերի ընտրության և տեղաբաշխման հարցերը, կարևորագույն հրամանների ու հրահանգների նախագծերը, լսում նախարարության վարչությունների, բաժինների և համակարգի կազմակերպությունների հաշվետվությունները:

20. Կոլեգիայի որոշումները, որպես կանոն, կենսագործվում են նախարարի հրամաններով:

21. Նախարարի և կոլեգիայի անդամների միջև քննարկվող հարցերի վերաբերյալ տարաձայնությունների առկայության դեպքում նախարարը կենսագործում է իր որոշումը` ծագած տարաձայնությունների մասին զեկուցելով Հայաստանի Հանրապետության վարչապետին, իսկ կոլեգիայի անդամներն իրենց հերթին կարող են իրենց կարծիքը հայտնել Հայաստանի Հանրապետության վարչապետին:

22. Նախարարությունը բնագավառում կազմակերպում է գիտական հետազոտությունների անցկացում, տեղեկատվության հավաքում, մշակում ու տարածում և զարգացնում ու համակարգում է համագործակցությունն այլ երկրների հետ:

23. Նախարարությունն իր առջև դրված խնդիրների և նպատակների իրականացման համար կարող է ստեղծել խորհուրդներ, հանձնաժողովներ, խմբեր:

24. Նախարարությունը կազմակերպում է քաղաքացիների նամակների, դիմումների ու գանգատների ժամանակին քննարկումը, միջոցներ է ձեռնարկում քաղաքացիների նամակներում հաղորդվող նախարարության համակարգի հիմնարկների և կազմակերպությունների գործունեության մեջ տեղ գտած խախտումների ու թերությունների վերացման համար:

 

Հաստատված է ՀՀ վարչապետի 1999 թ. օգոստոսի 20-ի N 497 որոշմամբ

 

Կ Ա Ռ ՈՒ Ց Վ Ա Ծ Ք

 

Հայաստանի Հանրապետության փոստի ԵՎ հեռահաղորդակցության նախարարության կենտրոնական ապարատի

 

Նախարարի աշխատակազմ

 

Հեռահաղորդակցության վարչություն

 

Փոստի վարչություն

 

Տեղեկատվական համակարգերի, տեխնոլոգիաների և ռեսուրսների վարչություն

 

Ֆինանսատնտեսագիտական վարչություն

 

Իրավաբանական և կադրերի վարչություն

 

Միջազգային հարաբերությունների վարչություն

 

Հակամենաշնորհային քաղաքականության և լիցենզիաների վարչություն

 

Ռազմամոբիլիզացիոն վարչություն

 

Առաջին բաժին

 

Ընդհանուր բաժին