«Վավերացնում եմ»
Հայաստանի Հանրապետության
Նախագահ Ռ. Քոչարյան
9 փետրվարի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

22 հունվարի 2004 թվականի N 48-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2000 ԹՎԱԿԱՆԻ ՀՈՒԼԻՍԻ 3-Ի N 350 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2000 թվականի հուլիսի 3-ի «Հայաստանի Հանրապետությունում աղքատության ընտանեկան նպաստի և միանվագ դրամական օգնության նշանակման և վճարման կարգի մասին» N 350 որոշման մեջ կատարել հետևյալ փոփոխությունները և լրացումները`

ա) որոշման 2-րդ կետում «ներքին գործերի» բառերը փոխարինել «ՀՀ ոստիկանության» բառերով.

բ) որոշման 3-րդ կետը շարադրել հետևյալ խմբագրությամբ.

«Հայաստանի Հանրապետության պետական բյուջեում ընտանեկան նպաստների համար նախատեսված գումարների 97 տոկոսը նպատակաուղղել աղքատության ընտանեկան նպաստի, իսկ 3 տոկոսը` միանվագ դրամական օգնության վճարմանը,».

գ) որոշման 5-րդ կետի «ա», «բ», «գ» և «դ» ենթակետերը շարադրել հետևյալ խմբագրությամբ.

«ա) աղքատության ընտանեկան նպաստի և միանվագ դրամական օգնության վճարման համար նախատեսված ֆինանսական միջոցների չափերն ըստ սոցիալական ծառայությունների տարածքային կենտրոնների` հաշվի առնելով Հայաստանի Հանրապետության 2004 թվականի պետական բյուջեով աղքատության ընտանեկան նպաստի համար հատկացված ֆինանսական միջոցները` համաձայն հավելվածի.

բ) ընտանիքի անապահովության սահմանային մեծությունը` 35.00 միավոր.

գ) աղքատության ընտանեկան նպաստի բազային մասը` 4500 դրամ.

դ) 35.01-ից մինչև 38.00 անապահովության միավոր ունեցող ընտանիքների յուրաքանչյուր` մինչև 18 տարին չլրացած անդամին տրվող հավելումը` 2500 դրամ.

38.01 և ավելի անապահովության միավոր ունեցող ընտանիքների յուրաքանչյուր` մինչև 18 տարին չլրացած անդամին տրվող հավելումը` 3000 դրամ.».

դ) որոշման 5-րդ կետի «ե» ենթակետում «95» թիվը փոխարինել «97» թվով.

ե) որոշման 7-րդ կետում «Հայաստանի Հանրապետության ներքին գործերի նախարարությանը» բառերը փոխարինել «Հայաստանի Հանրապետության կառավարությանն առընթեր Հայաստանի Հանրապետության ոստիկանությանը» բառերով.

զ) որոշումը լրացնել հետևյալ բովանդակությամբ նոր` 7⁴-րդ կետով.

«7⁴. Սահմանել, որ «Իրավական ակտերի մասին» Հայաստանի Հանրապետության օրենքի 87-րդ հոդվածի պահանջներին համապատասխան` սույն որոշմանը պաշտոնական պարզաբանում տվող Հայաստանի Հանրապետության կառավարության լիազորած գործադիր իշխանության հանրապետական մարմինը Հայաստանի Հանրապետության աշխատանքի և սոցիալական հարցերի նախարարությունն է».

է) որոշմամբ հաստատված կարգի 3-րդ կետը «միջոցների» բառից հետո լրացնել «միջին» բառով.

ը) հանել որոշմամբ հաստատված կարգի`

4-րդ կետի երկրորդ պարբերության «(տվյալ հասցեում հաշվառված)» բառերը,

27-րդ կետի «դ» ենթակետի «ու միանվագ դրամական օգնության համար դիմած» բառերը.

թ) որոշմամբ հաստատված ձևի`

2-րդ կետում «ՀՀ ներքին գործերի նախարարություն» բառերը փոխարինել «ՀՀ կառավարությանն առընթեր ՀՀ ոստիկանություն» բառերով,

«անհրաժեշտ տվյալները» սյունակի բոլոր կետերը լրացնել «սոցիալական ապահովության քարտի համարը» բառերով.

ժ) որոշման մեջ և որոշմամբ հաստատված կարգում ու ձևում «Հայաստանի Հանրապետության սոցիալական ապահովության նախարարություն» բառերը և դրա բոլոր հոլովաձևերը փոխարինել «Հայաստանի Հանրապետության աշխատանքի և սոցիալական հարցերի նախարարություն» բառերով և դրա համապատասխան հոլովաձևերով:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և տարածվում է 2004 թվականի հունվարի 1-ից հետո ծագած հարաբերությունների վրա:

Աղքատության ընտանեկան նպաստի եվ միանվագ դրամական օգնության վճարման համար նախատեսված ֆինանսական միջոցների չափերն ըստ սոցիալական ծառայության տարածքային գործակալությունների