«Վավերացնում եմ»
Հայաստանի Հանրապետության
Նախագահ Ռ. Քոչարյան
7 հունվարի 2003 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

26 դեկտեմբերի 2002 թվականի N 2121-Ն

ՈՌՈԳՄԱՆ ՋՐԻ ՄԱՏԱԿԱՐԱՐՄԱՆ ԵՎ ՕԳՏԱԳՈՐԾՄԱՆ ԿԱՆՈՆՆԵՐԸ ՀԱՍՏԱՏԵԼՈՒ, ՈՌՈԳՄԱՆ ՋՐԻ ՄԱՏԱԿԱՐԱՐՄԱՆ ՊԱՅՄԱՆԱԳՐԻ ՕՐԻՆԱԿԵԼԻ ՁԵՎԸ ՍԱՀՄԱՆԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2000 ԹՎԱԿԱՆԻ ՀՈՒԼԻՍԻ 27-Ի N 418 ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հայաստանի Հանրապետության ջրային օրենսգրքի 121-րդ հոդվածի հինգերորդ մասի 44-րդ կետին համապատասխան՝ Հայաստանի Հանրապետության կառավարությունը որոշում է.

1. Հաստատել ոռոգման ջրի մատակարարման և օգտագործման կանոնները՝ համաձայն N 1 հավելվածի։

2. Սահմանել ոռոգման ջրի մատակարարման պայմանագրի օրինակելի ձևը՝ համաձայն N 2 հավելվածի։

3. Հայաստանի Հանրապետության գյուղատնտեսության նախարարին և Հայաստանի Հանրապետության կառավարությանն առընթեր ջրային տնտեսության պետական կոմիտեի նախագահին՝ մեկամսյա ժամկետում ջրօգտագործողների ընկերությունների և ջրօգտագործողների ընկերությունների միությունների գործունեությունը կանոնակարգող խորհրդի հաստատմանը ներկայացնել ջրօգտագործողների ընկերություններում ոռոգման ջրի օգտագործման կանոնակարգը։

4. Հայաստանի Հանրապետության գյուղատնտեսության նախարարին՝ եռամսյա ժամկետում՝ սահմանված կարգով Հայաստանի Հանրապետության կառավարություն ներկայացնել առաջարկություն սակավաջրության դեպքերում ոռոգման ջրի առաջնահերթ օգտագործման կարգի վերաբերյալ։

5. Ուժը կորցրած ճանաչել Հայաստանի Հանրապետության կառավարության 2000 թվականի հուլիսի 27-ի «Հայաստանի Հանրապետությունում ոռոգման ջրի մատակարարման, օգտագործման, հաշվառման և հաշվետվության կանոնները հաստատելու մասին» N 418 որոշումը։

6. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրը։

Կ Ա Ն Ո Ն Ն Ե Ր

ՈՌՈԳՄԱՆ ՋՐԻ ՄԱՏԱԿԱՐԱՐՄԱՆ ԵՎ ՕԳՏԱԳՈՐԾՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Ոռոգման ջրի մատակարարման և օգտագործման կանոններում (այսուհետ` կանոններ) օգտագործվող հասկացություններն ունեն հետևյալ իմաստները՝

ջրաղբյուր` երկրի մակերևութային և ստորերկրյա ջրեր (բնական գետեր, լճեր, առուներ, ճահիճներ, ստորերկրյա ջրավազաններ, արհեստական ջրամբարներ և այլն).

ոռոգման ջուր` գյուղատնտեսական մշակաբույսերի ոռոգման համար նախատեսված և ոռոգման ջրի ստանդարտներին համապատասխանող ջուր.

ոռոգման համակարգ՝ ոռոգման և ցամաքուրդային ջրանցքներ, խողովակաշարեր, հիդրոտեխնիկական կառուցվածքներ, հորեր, պոմպակայաններ, ջրամբարներ, լճակներ` ճանապարհներով, շենքերով, էլեկտրահաղորդման գծերով և այլ ենթակառուցվածքներով, այդ թվում` ջրաէկոհամակարգերի պահպանման գոտիներ.

ջրամատակարար՝ ջրառ իրականացնող, ջուրն ամբարող և (կամ) այն ջրօգտագործողներին մատակարարող անձ.

ջրօգտագործող (բաժանորդ)՝ իրավաբանական կամ ֆիզիկական անձ, որը սահմանված կարգով ջրօգտագործման պայմանագիր է կնքել ջրամատակարարի հետ.

ջրտուք` ջրամատակարարի կողմից ջրօգտագործողին (բաժանորդին) մատակարարված ջրի ծավալ.

ջրի հորիզոն` ջրաչափական դիտակետով հոսող ջրի մակարդակ.

ջրաչափական դիտակետ` հիդրոտեխնիկական կառույց, որի միջոցով կատարվում է հոսող ջրի ծավալի որոշում՝ տվյալ պահի համար.

ջուր սպառող` ջրօգտագործողի սպասարկման տարածքում սեփականության կամ վարձակալության օգտագործման իրավունքով ոռոգելի հողատարածք ունեցող ֆիզիկական կամ իրավաբանական անձ, որը հանդիսանում է ոռոգման ջուր սպառող վերջին օղակը և սահմանված կարգով կնքել է ջրօգտագործողի հետ ջրօգտագործման պայմանագիր.

տեխնիկական պայմաններ՝ ջրաղբյուրին կամ ոռոգման համակարգին միանալու, սպառված ջուրը հաշվառելու, ոռոգման համակարգի հետագա անվտանգ և հուսալի շահագործումն ու ջրամատակարարումն ապահովելու նպատակով ջրամատակարարի կողմից առաջադրվող պայմաններ:

2. Կանոնները կարգավորում են ջրամատակարարների, ջրօգտագործողների (բաժանորդների) և ենթաջրօգտագործողների, ենթասպառողների (ենթաբաժանորդների) միջև փոխհարաբերությունները և պարտադիր են բոլոր կողմերի համար՝ անկախ նրանց գերատեսչական ենթակայությունից և կազմակերպական-իրավական տեսակից:

3. Ջրօգտագործողը ջրամատակարարի համար բաժանորդ է հանդիսանում նորմատիվ ակտերով սահմանված կարգով և տեխնիկական պայմաններին (N 1 ձևը կցվում է) համապատասխան ոռոգման համակարգին միանալուց, ոռոգման համակարգերի հաշվեկշռային պատկանելության, սպասարկման և շահագործման սահմանազատման ակտ (N 2 ձևը կցվում է) կնքելուց և ջրամատակարարի հետ ոռոգման ջրի մատակարարման պայմանագիր (այսուհետ՝ պայմանագիր) կնքելուց հետո: Ջրամատակարարի և ջրօգտագործողի (բաժանորդի) միջև պայմանագիրը կնքվում է երեք տարվանից ոչ պակաս ժամկետով:

4. Ջրօգտագործողի (բաժանորդի) հետ նոր ոռոգման շրջանի համար ջրօգտա-գործման պայմանագիր է կնքվում ջրօգտագործման պլան-ժամանակացույցի և ջուր սպառողների հետ կնքված անհատական պայմանագրերի առկայության, պայմանագրի կնքմանը նախորդող տարվա ընթացքում մատակարարված ջրի դիմաց ջրօգտագործողի (բաժանորդի) կողմից ջրի վարձի առնվազն 75 տոկոսի վճարման, ինչպես նաև պայմանագրի կնքման պահի դրությամբ նախորդ տարիներից գոյացած պարտքերի մարման ժամանակացույցի կնքման և ջրամատակարարի կողմից ընդունելի երաշխիքի առկայության դեպքերում:

5. Ջրամատակարարի հաշվեկշռում կամ պայմանագրային հիմունքներով շահագործման տակ գտնվող ոռոգման համակարգերի և չափիչ-հաշվառող սարքերի տեխնիկական վիճակի, անկորուստ և ամբողջական պահպանման, անվտանգության տեխնիկայի ու շահագործման համար պարտավորությունը կրում է ջրամատակարարը:

6. Ջրօգտագործողի (բաժանորդի) հաշվեկշռում կամ պայմանագրային հիմունքներով շահագործման տակ գտնվող ոռոգման համակարգերի և չափիչ-հաշվառող սարքերի տեխնիկական վիճակի, անկորուստ և ամբողջական պահպանման, անվտանգության տեխնիկայի ու շահագործման համար պարտավորությունը կրում է ջրօգտագործողը (բաժանորդը):

Ջրօգտագործողի (բաժանորդի) ոռոգման համակարգի սպասարկումը պայմանագրային հիմունքներով կարող են իրականացնել նաև այլ իրավաբանական կամ ֆիզիկական անձինք։

7. Ջրամատակարարը մատակարարված ջրի ծավալների և դրանց դիմաց վճարումների հաշվառման համար յուրաքանչյուր ջրօգտագործողի (բաժանորդի) անունով բացում է բաժանորդի անձնական հաշվառման քարտ (N 3 ձևը կցվում է):

Ջրօգտագործողին (բաժանորդին) վերաբերող՝ կանոնների բոլոր դրույթները հավասարապես տարածվում են նաև ենթաբաժանորդի վրա, եթե վերջինիս վերաբերյալ առանձին նշում չի կատարվում:

II. ՈՌՈԳՄԱՆ ՀԱՄԱԿԱՐԳԻՆ ՄԻԱՆԱԼՈՒ (ՋՐԱՌԻ) ՏԵԽՆԻԿԱԿԱՆ ՊԱՅՄԱՆՆԵՐԸ

8. Ոռոգման համակարգին միանալու (ջրառի) տեխնիկական պայմանները տրվում են ջրամատակարարի կողմից:

9. Ջրամատակարարը ջրօգտագործողի (բաժանորդի) հաշվեկշռում գտնվող ոռոգման համակարգին միանալու համար մեկ այլ ջրօգտագործողի տեխնիկական պայմաններ կարող է տալ միայն ջրօգտագործողի (բաժանորդի) գրավոր համաձայնության դեպքում:

10. Նոր կառուցվող ոռոգման համակարգերին միանալու (ջրառի) համար տրված տեխնիկական պայմանների գործողության ժամկետը մեկ տարի է: Նշված ժամանակահատվածում կառուցման աշխատանքներ չիրականացվելու դեպքում այն կորցնում է իր ուժը:

11. Տեխնիկական պայմանները տրվում են դիմումն ստացվելուց հետո մեկ ամսվա ընթացքում:

12. Այլ անձի (անձանց) հետ առնչվող տեխնիկական պայմաններով սահմանված աշխատանքների իրականացումը ենթակա է շահագրգիռ կողմերի հետ նախօրոք համաձայնեցման:

13. Ջրօգտագործողի (բաժանորդի) ոռոգման համակարգում միացման տեխնիկական պայմաններից շեղումներ հայտնաբերվելու դեպքում ջրօգտագործողի (բաժանորդի) ջրամատակարարումն անմիջապես դադարեցվում է` մինչև հայտնաբերված խախտումների վերացումը:

III. ՄԱՏԱԿԱՐԱՐՎԱԾ ՋՐԻ ԾԱՎԱԼԻ ՀԱՇՎԱՌՈՒՄԸ, ԴՐԱ ԴԻՄԱՑ ՎՃԱՐՄԱՆ ԵՆԹԱԿԱ ԳՈՒՄԱՐԻ ՀԱՇՎԱՐԿՈՒՄԸ ԵՎ ՎՃԱՐՈՒՄԸ

14. Ոռոգման ջուրը վճարովի է և մատակարարման բոլոր կետերում ենթակա է հաշվառման:

Ջրամատակարարը պարտավոր է հաշվառել ջրաղբյուրից իր կողմից իրականացված ջրառի, յուրաքանչյուր ջրօգտագործողին (բաժանորդին) մատակարարված ջրի ծավալի, դրա դիմաց վճարման ենթակա գումարի, վճարված գումարի և պարտքի չափերը:

15. Մատակարարված ջրի ծավալը և դրա դիմաց վճարման ենթակա գումարը հաշվարկվում են տեխնիկական պայմանների համաձայն տեղադրված չափիչ-հաշվառող սարքերի միջոցով ու գործող սակագներով (եթե պայմանագրով այլ պայման նախատեսված չէ): Ջրօգտագործողների ընկերություններին և ջրօգտագործողների ընկերությունների միություններին ոռոգման ջուր մատակարարելու համար սահմանազատման կետում չափիչ-հաշվառող սարքերը տեղակայվում (կառուցվում) են ջրամատակարարի հաշվին:

Ջրամատակարարի կողմից ջրօգտագործողի (բաժանորդի) ֆինանսավորմամբ չափիչ-հաշվառող սարքերի տեղակայման (կառուցման) աշխատանքների իրականացման դեպքում տվյալ չափիչ-հաշվառող սարքը դառնում է ջրամատակարարի սեփականությունը, իսկ ջրօգտագործողի (բաժանորդի) կատարած ծախսի փոխհատուցումը կատարվելու է 2 տարվա ընթացքում՝ գանձվելիք ոռոգման ջրի վարձի հաշվին։

16. Ջրամատակարարը և ջրօգտագործողը (բաժանորդը) և (կամ) նրանց ներկայացուցիչները, պայմանագրով նախատեսված հաճախականությամբ, տասնօրյակային գրառումների համար նախատեսված ձևաթղթում յուրաքանչյուր օր կատարում են մատակարարված ջրի ծավալի գրառում:

Գրառումներն ամփոփվում են յուրաքանչյուր տասը օրը մեկ անգամ` յուրաքանչյուր տասնօրյակի հաջորդ օրը, և վավերացվում ջրամատակարարի և ջրօգտագործողի (բաժանորդի) կողմից: Ջրամատակարարի կամ ջրօգտագործողի (բաժանորդի) կողմից 2 օրվա ընթացքում այն չվավերացվելու դեպքում հիմք է ընդունվում նրանց ներկայացուցիչների կողմից գրանցված ջրի ծավալը:

17. Ջրօգտագործողը (բաժանորդը) տվյալ ամսվա մատակարարված ջրի դիմաց վճարման ենթակա գումարը փոխանցում է ջրամատակարարի բանկային հաշվին` վճարման փաստաթղթերը (տասնօրյակային ակտ-օրագրերի օրինակները, N 4 ձևը կցվում է) ստացվելուց հետո 10 բանկային օրվա ընթացքում, եթե պայմանագրով այլ բան նախատեսված չէ:

Ջրամատակարարը և ջրօգտագործողը յուրաքանչյուր ամսվան հաջորդող ամսվա մինչև 20-ը կնքում են մատակարարված ոռոգման ջրի դիմաց փոխադարձ հաշվարկների ստուգման ակտ (N 5 ձևը կցվում է):

18. 100 տոկոսից պակաս վճարում կատարած ջրօգտագործողը (բաժանորդը) պարտավոր է ջրամատակարարին ներկայացնել իր ջրօգտագործողների (բաժանորդների) կամ ջուր սպառողների պարտքացուցակը:

19. Վճարման փաստաթղթերում կամ չափիչ-հաշվառող սարքերի ցուցմունքների գրառման սխալի հայտնաբերման դեպքում կատարվում է վերահաշվարկ: Ջրօգտագործողի (բաժանորդի) դիմելու օրվանից 5 օրվա ընթացքում ջրամատակարարը (ջրօգտագործողի (բաժանորդի) ցանկության դեպքում նաև նրա մասնակցությամբ) պարտավոր է ստուգել իր գրառումները, անհրաժեշտության դեպքում՝ նաև չափիչ-հաշվառող սարքերը և ստուգման արդյունքների մասին գրավոր հայտնել ջրօգտագործողին (բաժանորդին):

Վճարման փաստաթղթերում գրառման սխալը հաստատվելու դեպքում ջրամատակարարը պարտավոր է հաջորդ տասնօրյակի ընթացքում ուղղել սխալը և ավելի գանձված գումարը վերադարձնել ջրօգտագործողին (բաժանորդին) կամ նրա համաձայնությամբ այդ գումարը ձևակերպել որպես կանխավճար, իսկ հակառակ դեպքում՝ ջրօգտագործողին (բաժանորդին) ներկայացնել նոր վճարման փաստաթուղթ: Ավելի գանձված գումարը ջրօգտագործողին (բաժանորդին) է վերադարձվում սխալի հաստատման պահից 10 օրվա ընթացքում։ Նոր վճարման փաստաթղթով վճարումը կատարվում է կանոնների 17-րդ կետով սահմանված կարգով:

Չափիչ-հաշվառող սարքերի աշխատանքի սխալի հայտնաբերման դեպքում ջրամատակարարը չափիչ-հաշվառող սարքերի տեխնիկական վիճակի վերջին ստուգման օրվանից հետո ընկած ժամանակահատվածի համար, փաստացի ջրամատակարարման ժամանակացույցի համաձայն, պարտավոր է կատարել ջրաքանակի վերահաշվարկ` բայց ոչ ավելի, քան վերջին մեկ ամսվա համար:

Չափիչ-հաշվառող սարքի ցուցմունքների շեղումները թույլատրելի են և չեն պահանջում մատակարարված ջրի ծավալի ու դրա դիմաց վճարման ենթակա գումարի վերահաշվարկ, եթե շեղումները գտնվում են չափիչ-հաշվառող սարքի ճշտության դասով պայմանավորված տիրույթում:

20. Ջրօգտագործողի (բաժանորդի) կողմից չափիչ-հաշվառող սարքերի ցուցմունքների, հետևաբար և օգտագործված ջրի ծավալի նվազեցման նպատակով չափիչ-հաշվառող սարքերի բնականոն աշխատանքի խախտման, չափիչ-հաշվառող սարքերի կողանցումով ջրընդունման, չափիչ-հաշվառող սարքերի կապարակնիքները վնասվելու (պոկվելու, կեղծվելու) և այլ միտումնավոր խախտումների դեպքում ջրամատակարարը խախտման հայտնաբերման պահին ջրօգտագործողի (բաժանորդի) ներկայացուցչի հետ համատեղ արձանագրում է խախտումը և կազմում կանոնների խախտման ակտ (N 6 ձևը կցվում է): Կանոնների խախտման ակտը հատուկ հաշվառման փաստաթուղթ է և հիմք է հանդիսանում ջրօգտագործողի (բաժանորդի) օգտագործած ջրի ծավալի վերահաշվարկման (ճշգրտման) համար:

Ջրօգտագործողի (բաժանորդի) չհամաձայնելու դեպքում ակտում դրա մասին կատարվում է համապատասխան նշում:

Ջրօգտագործողի (բաժանորդի) մեղքով խափանված չափիչ-հաշվառող սարքերը վերականգնվում են ջրօգտագործողի (բաժանորդի) հաշվին, իսկ մինչև չափիչ-հաշվառող սարքերի վերականգնումը ջրամատակարարումն իրականացվում է ջրաչափական այլ ընդունված մեթոդներով (հաշվարկային` ըստ ջրի հորիզոնի, ջրանցքի կամ խողովակի լայնական կտրվածքի, ջրի արագության և այլն): Կանոնների խախտման մասին ակտի հիման վրա հաշվարկված գումարը ենթակա է վճարման ոչ ուշ, քան 30 օրվա ընթացքում, հակառակ դեպքում ջրօգտագործողի (բաժանորդի) ջրամատակարարումը դադարեցվում է, իսկ ջրամատակարարը հաշվարկված գումարը գանձում է օրենքով սահմանված կարգով:

Ջրամատակարարի մեղքով խափանված չափիչ-հաշվառող սարքերը վերականգնվում են ջրամատակարարի կողմից հնարավորին սեղմ ժամկետում, իսկ մինչև վերականգնումը ջրի հաշվառումն իրականացվում է ջրաչափական այլ մեթոդներով:

Ջրօգտագործողի (բաժանորդի) ջրամատակարարումը վերականգնվում է կանոնների 26-րդ կետով սահմանված կարգով:

21. Ջրամատակարարի և ջրօգտագործողի (բաժանորդի) և կամ նրանց ներկայացուցիչների կողմից ջրաքանակի միտումնավոր սխալ գրառումների հայտնաբերման դեպքն առաջացնում է պատասխանատվություն՝ օրենքով սահմանված կարգով:

IV. ՈՌՈԳՄԱՆ ՋՐԻ ՄԱՏԱԿԱՐԱՐՄԱՆ, ՍԱՀՄԱՆԱՓԱԿՄԱՆ ԵՎ ԴԱԴԱՐԵՑՄԱՆ ՊԱՅՄԱՆՆԵՐԸ

22. Ջրաղբյուրից ջրօգտագործումն իրականացվում է օրենքով սահմանված կարգով տրված ջրօգտագործման թույլտվության առկայության դեպքում:

23. Ջրօգտագործողի (բաժանորդի) ջրի մատակարարումն իրականացվում է ըստ պայմանագրի, դրա անբաժանելի մասը կազմող ջրօգտագործման պլան-ժամանակացույցի և հայտի (N 7 ձևը կցվում է): Ջրօգտագործման պլան-ժամանակացույցը կազմում է ջրօգտագործողը (բաժանորդը) յուրաքանչյուր ոռոգման համակարգի համար առանձին` հիմք ընդունելով հողատարածքի չափը, դրա վրա մշակվող գյուղատնտեսական մշակաբույսերի տեսակներն ըստ զբաղեցրած տարածքների, ջրման նորմաները և ժամկետները, ինչպես նաև իր ոռոգման համակարգերում առկա կորուստները:

24. Ջրօգտագործումը պլանավորվում է` հաշվի առնելով ջրաղբյուրի ջրատվությունը և ոռոգման համակարգերի տեխնիկական հնարավորությունները (գերբեռնվածությունը և թերբեռնվածությունը):

Մեխանիկական եղանակով ջրամատակարարումը պլանավորվում է ըստ ստացված հայտերի` պոմպակայանի կամ պոմպակայանների համալիրի պոմպային ագրեգատների արտադրողականությանը համապատասխան:

Մեխանիկական եղանակով ջրամատակարարման հայտը համապատասխանեցվում է պոմպակայանի կամ պոմպակայանների համալիրի պոմպային ագրեգատների արտադրողականությանը։

Ոչ շուրջօրյա ջրամատակարարման հայտ ներկայացվելու դեպքում ջրամատակարարումն իրականացվում է՝ ելնելով ջրամատակարարի տեխնիկական հնարավորություններից:

Ջրաղբյուրների սակավաջրության դեպքում ոռոգման ջրի մատակարարման պայմանագիր կնքվում է առաջնահերթ ջրօգտագործման մասին կարգի համաձայն, որը հաստատում է Հայաստանի Հանրապետության կառավարությունը` Հայաստանի Հանրապետության գյուղատնտեսության նախարարության ներկայացմամբ:

25. Ջրամատակարարին իրավունք է վերապահվում դադարեցնելու ջրօգտագործողի (բաժանորդի) ջրամատակարարումը` սահմանված կարգով 3 օր առաջ դրա մասին նրան գրավոր նախազգուշացնելուց (N 8 ձևը կցվում է) հետո, եթե նա`

ա) խախտել է կանոնների 17-րդ և 20-րդ կետերի պահանջները.

բ) խախտել է պայմանագրի անբաժանելի մաս հանդիսացող պարտքերի մարման ժամանակացույցը։

Ջրօգտագործողի (բաժանորդի) ջրամատակարարումը կարող է չդադարեցվել նրա կողմից ջրամատակարարի համար ընդունելի վճարման երաշխիքներ ներկայացվելու և պարտքերի մարման նոր ժամանակացույց կազմվելու դեպքերում:

26. Ջրօգտագործողի (բաժանորդի) ջրամատակարարումը վերականգնվում է պարտքերի վճարումը հաստատող փաստաթուղթը ջրամատակարարին ներկայացվելուց հետո՝ մինչև 3 օրվա ընթացքում:

27. Ջրօգտագործողը (բաժանորդը) պարտավոր է ջրօգտագործման պլան-ժամանակացույցով նախատեսված ջուրն ստանալու, ջրից հրաժարվելու կամ նախատեսվածից պակաս ջուր պահանջելու մասին 3 օր առաջ ջրամատակարարին ներկայացնել գրավոր հայտ:

Հայտը հատուկ հաշվառման փաստաթուղթ է, որը կազմվում է երկու օրինակից և ներկայացվելու պահին գրանցվում է ջրամատակարարի կողմից: Ջրօգտագործողի (բաժանորդի) կողմից առանց հայտի ջրից հրաժարվելու կամ նախատեսվածից պակաս ջուր մատակարարվելու պահանջի դեպքում` ջրամատակարարին իրավունք է վերապահվում ջրօգտագործողի (բաժանորդի) հաշվին հաշվարկել այդ ժամանակահատվածում մատակարարված ջրի ծավալը` բայց 3-օրյա ժամկետից ոչ ավելի:

28. Ջրօգտագործողի (բաժանորդի) գրավոր հայտի համաձայն ջրօգտագործման պլան-ժամանակացույցով նախատեսվածից պակաս մատակարարված կամ չմատակարարված ջրաքանակը հետագայում ջրամատակարարի կողմից չի վերականգնվում: Նախատեսվածից ավելի ջուր մատակարարելու համար ջրօգտագործողի (բաժանորդի) ներկայացրած հայտը կարող է բավարարվել միայն ջրամատակարարի հնարավորությունների սահմաններում, ինչի մասին ներկայացված հայտի բավարարման կամ մերժման մասին ջրօգտագործողը (բաժանորդը) տեղեկացվում է` հայտը ջրամատակարարից ստանալուց հետո մեկ օրվա ընթացքում:

29. Ջրամատակարարումն իրականացվում է ջրտուքի կետում` ջրօգտագործողի (բաժանորդի) կամ նրա ներկայացուցչի ներկայության դեպքում:

Եթե օրվա ընթացքում փաստացի ջրամատակարարման տևողության կեսից ավելի ժամանակահատվածում մատակարարվելիք ջրի հորիզոնը նվազում է 20 տոկոսից ավելի չափով, ապա տվյալ օրվա մատակարարված ջրի ծավալը հաշվարկվում է նվազագույն հորիզոնին համապատասխան:

30. Եթե ջրամատակարարման սահմանափակումը և (կամ) դադարեցումը կապված է ֆորս-մաժորային դեպքերի, ինչպես նաև ջրաղբյուրներում ու ոռոգման համակարգերում վթարների կանխման կամ դրանց վերացման անհետաձգելի տեխնիկական միջոցառումների իրականացման հետ, ապա այն կատարվում է առանց նախազգուշացման: Ջրամատակարարման սահմանափակումների պատճառների մասին ջրամատակարարն անմիջապես տեղեկացնում է ջրօգտագործողին (բաժանորդին):

31. Ոռոգման ջրի ապօրինի մատակարարում և օգտագործում է համարվում՝

ա) մատակարարումը և օգտագործումն առանց պայմանագրի.

բ) մատակարարումը և օգտագործումն առանց չափիչ-հաշվառող սարքի կամ ջրաչափական այլ մեթոդների կիրառման տեխնիկական պայմանների խախտումներով (եթե պայմանագրով այլ պայմաններ նախատեսված չեն).

գ) ինքնակամ ջրամատակարարումը և ջրօգտագործումը (առանց հայտի կամ հայտի խախտմամբ)։

Ապօրինի ջրամատակարարման և ջրօգտագործման նկատմամբ վերահսկողություն է իրականացնում Հայաստանի Հանրապետության կառավարությանն առընթեր ջրային տնտեսության պետական կոմիտեն։

Բոլոր ջրաղբյուրներից և ոռոգման համակարգերից ապօրինի միացված ոռոգման համակարգերը ենթակա են անհապաղ անջատման: Ապօրինի ջրօգտագործումն արձանագրվում է և կանոնների խախտման ակտով կատարվում է ջրաքանակի հաշվարկ` ջրաղբյուրում կամ ոռոգման համակարգում ջրի առկայության փաստացի ժամանակահատվածի համար և ապօրինի միացման թողունակությամբ, բայց ոչ ավելի, քան մինչև ոռոգման շրջանի սկիզբը: Իսկ ապօրինի ջրօգտագործում իրականացնողները պատասխանատվության են ենթարկվում օրենքով սահմանված կարգով:

Ձև N 1

Ձև N 2

Ձև N 3

Ձև N 4

Ձև N 5

* Տույժերը չեն ընդգրկվում պարտքերի մեջ:

Ձև N 6

Ձև N 7

Հ Ա Յ Տ

ոռոգման ջրի մատակարարման

_______________ ամսվա ____________ տասնօրյակի համար

Ձև N 8

Ձև

I. Պայմանագրի առարկան

1. Մատակարարը ոռոգման ջրի մատակարարման և օգտագործման կանոնների (այսուհետ՝ կանոններ) և պայմանագրի անքակտելի մասը կազմող պլան-ժամանակացույցի (N 1 հավելված) համաձայն ջրօգտագործողին մատակարարում է ոռոգման ջուր, որի մեկ խոր. մետրի համար որպես հաշվարկային միավոր ընդունվում է Հայաստանի Հանրապետության կառավարության կողմից սահմանված սակագինը, իսկ բաժանորդը կանոններին և պայմանագրին համապատասխան ընդունում է ոռոգման ջուրը, օգտագործում այն և հաշվարկված ջրի վարձը վճարում մատակարարին՝ սահմանված կարգով:

2. Բաժանորդն ընդունում է պայմանագիրն ստորագրվելու օրվա դրությամբ մատակարարին՝ նախորդ տարիներին մատակարարված ոռոգման ջրի դիմաց իր պարտքը, որը պարտավորվում է վճարել պայմանագրի անքակտելի մասը կազմող պարտքերի մարման ժամանակացույցի համաձայն (N 2 հավելված):

3. Կողմերի միջև փոխհարաբերությունները կարգավորվում են կանոններով և պայմանագրով:

II. Ջրամատակարարման կետերը ԵՎ կարգը

4. Պայմանագրի կողմերի միջև ջրաչափական կետեր են հանդիսանում՝

_____________________________________________________________

(բաժանարարների անվանումները և չափիչ-հաշվառող սարքի տեսակը)

_____________________________________________________________

_____________________________________________________________

_____________________________________________________________

5. Հանձնված և ընդունված ոռոգման ջուրը չափվում է օրական առնվազն երկու անգամ և գրանցվում ոռոգման ջրի հանձնման-ընդունման ակտ-օրագրում: Դիտարկման ժամերն են՝ _________________: Սահմանված ժամին (0,5 ժամվա ընթացքում) կողմերից որևէ մեկի ներկայացուցչի չներկայանալու դեպքում հիմք է ընդունվում ներկայացած կողմի գրանցումը:

6. Ոռոգման ջրի հանձնում-ընդունումը գրանցվում է ոռոգման ջրի հանձնման-ընդունման տասնօրյակային ակտ-օրագրում՝ երեք օրինակից:

7. Յուրաքանչյուր ամսվա վերջին օրվա դրությամբ կազմվում է փոխադարձ հաշվարկների ակտ։

III. Կողմերի իրավունքներն ու պարտականությունները

8. Մատակարարը պարտավորվում է՝

ա) պայմանագրի 4-րդ կետում նշված չափիչ-հաշվառող սարքերով կահավորված (կամ պայմանագրի 17-րդ կետով նախատեսված ջրաչափական մեթոդի կիրառմամբ) ջրի տրման կետում, պայմանագրի N 1 հավելվածին համապատասխան, հայտի առկայության դեպքում բաժանորդին մատակարարել ոռոգման ջուր.

բ) համաձայն բաժանորդի հայտի՝ պակասեցնել պլան-ժամանակացույցով նախատեսված ոռոգման ջրի ծավալը, իսկ հայտով նախատեսվածից պակաս տրված (իր մեղքով թերմատակարարված) ջրի ծավալը լրացնել հաջորդ 3 օրվա ընթացքում.

գ) տվյալ տասնօրյակի ավարտից հետո երկու օրվա ընթացքում լրացնել և ստորագրել ոռոգման ջրի հանձնման-ընդունման տասնօրյակային ակտ-օրագրի երեք օրինակը.

դ) բաժանորդին ներկայացնել յուրաքանչյուր տասնօրյակում փաստացի մատակարարված ոռոգման ջրի ծավալին համապատասխան կազմված վճարման փաստաթուղթ (տասնօրյակային ակտ-օրագրերը)՝ մատակարարված ոռոգման ջրի վարձը վճարելու համար.

ե) կանոնների 30-րդ կետում նախատեսված պայմանների դեպքում ոռոգման ջրի մատակարարումը սահմանափակելու կամ դադարեցնելու մասին անմիջապես տեղեկացնել բաժանորդին։

9. Մատակարարն իրավունք ունի՝

ա) բաժանորդի կողմից պայմանագրի 10-րդ կետի «դ» ենթակետում նշված վճարները սահմանված ժամկետներում չվճարվելու դեպքում, սահմանված կարգով 3 օր առաջ զգուշացնելուց հետո, դադարեցնելու բաժանորդի ջրամատակարարումը՝ մինչև պարտքի մարումը.

բ) պայմանագրի 1-ին կետում նշված ծավալով ոռոգման ջրի մատակարարումից հետո բաժանորդին ոռոգման ջուր մատակարարելու նրա հետ կնքված նոր (լրացուցիչ) պայմանագրի հիման վրա՝ մինչև այդ մատակարարված ոռոգման ջրի վարձավճարը բաժանորդի կողմից ամբողջությամբ վճարվելու դեպքում՝ մատակարարի տնօրինման ներքո գտնվող համակարգի տեխնիկական հնարավորության սահմաններում.

գ) հայտը սահմանված ժամկետի խախտմամբ ներկայացվելու, առանց հայտի ջրից հրաժարվելու կամ նախատեսվածից պակաս մատակարարման պահանջի դեպքում՝ բաժանորդի հաշվին հաշվարկելու այդ ժամանակահատվածում մատակարարված ջրաքանակը, բայց 3-օրյա ժամկետից ոչ ավելի։

10. Բաժանորդը պարտավորվում է՝

ա) իր ներկայացուցչի միջոցով, պայմանագրի II բաժնին համապատասխան, ջրի տրման կետում ստանալ ոռոգման ջուրը.

բ) պայմանագրի N 1 հավելվածում նշված ջրաքանակի ստացման, դրանից հրաժարվելու կամ այն նվազեցնելու մասին 3 օր առաջ հայտ ներկայացնել մատակարարին.

գ) տվյալ տասնօրյակի ավարտից հետո, պայմանագրի 8-րդ կետի «գ» ենթակետով սահմանված ժամկետում, ստորագրել ոռոգման ջրի հանձնման-ընդունման տասնօրյակային ակտ-օրագրի 3 օրինակը.

դ) կանոններով և պայմանագրով սահմանված կարգով վճարել նախորդ ամսվա ընթացքում մատակարարված ոռոգման ջրի վարձը՝ վճարման փաստաթղթերը (տասնօրյակային ակտ-օրագրերը) մատակարարից ստանալուց հետո 10 օրվա ընթացքում կամ լրացուցիչ պայմաններով նախատեսված ժամկետներում, ինչպես նաև մարել պարտքը՝ պայմանագրին կից պարտքերի մարման ժամանակացույցի համաձայն (N 2 հավելված).

ե) մատակարարված ջրի դիմաց վարձավճարը 100 տոկոսից պակաս վճարելու դեպքում ջրամատակարարին ներկայացնել իր սպառողների (բաժանորդների) պարտքացուցակը.

զ) ջրամատակարարման խախտման մասին անհապաղ տեղեկացնել ջրամատակարարին։

11. Բաժանորդն իրավունք ունի՝

ա) ջրաչափական դիտակետերում ստուգիչ չափումների անհրաժեշտության դեպքում մասնակցելու այդ չափումներին.

բ) եթե օրվա ընթացքում փաստացի ջրամատակարարման տևողության կեսից ավելի ժամանակահատվածում ջրի հորիզոնը նվազում է պահանջվող ծավալի համապատասխան հորիզոնի 20 տոկոսից ավելի չափով, ապա տվյալ օրվա մատակարարված ջրի ծավալը հաշվարկելու նվազագույն հորիզոնին համապատասխան և ջրամատակարարից պահանջելու չտրված ջուրը լրացնել հաջորդ 3 օրվա ընթացքում։

IV. Կողմերի պատասխանատվությունը

12. Մատակարարը, բացառությամբ կանոնների 30-րդ կետում նշված դեպքերի, իր մեղքով բաժանորդին թերմատակարարված ջրաքանակը 3-օրյա ժամկետում չապահովելու դեպքում, եթե բաժանորդը ապահովել է պայմանագրի 10-րդ կետի «դ» ենթակետով նախատեսված պահանջը, փոխհատուցում է բաժանորդի կրած վնասը՝ հայտով նախատեսված ջրի ծավալի 50 տոկոսից պակաս ջուր մատակարարելու հետևանքով առաջացած վնասի չափով, որը հաշվարկվում է մեկ հեկտարի հաշվով՝ հողային կադաստրով նախատեսված գյուղատնտեսական հողատեսքերի զուտ եկամտի և կատարված հաշվարկային ծախսի չափով, հանած պահպանված բերքի արժեքը։

13. Ֆորս-մաժորային պայմանների դեպքում ջրամատակարարման դադարեցումից կամ բաժանորդի մեղքով կրած վնասի համար մատակարարը պատասխանատվություն չի կրում:

V. Վեճերի լուծման կարգը

14. Կողմերի միջև ծագած վեճերը լուծվում են բանակցությունների միջոցով։ Անհամաձայնության դեպքում վեճը լուծվում է դատական կարգով։

VI. Լրացուցիչ պայմաններ

15. Պայմանագրից բխող և պայմանագրով չկարգավորված մյուս բոլոր հարցերը կարգավորվում են Հայաստանի Հանրապետության օրենսդրությամբ սահմանված կարգով:

16. Ջրօգտագործողի (բաժանորդի) մեղքով թերմատակարարված ջրաքանակի ապահովումն իրականացվում է ջրամատակարարի հնարավորությունների սահմաններում։

17. Ջրաչափի առկայության դեպքում մատակարարված ջրի ծավալը որոշվում է ըստ ջրաչափի ցուցմունքի։ Չափիչ-հաշվառիչ սարքերի բացակայության դեպքում, կողմերի համաձայնությամբ, հիմք ընդունելով կանոնների 15-րդ և 20-րդ կետերը, մատակարարված ջրի ծավալը չափվում և հաշվարկվում է հետևյալ ձևով՝

_______________________________________________________________

_______________________________________________________________

_______________________________________________________________

_______________________________________________________________

_______________________________________________________________

_______________________________________________________________

_______________________________________________________________

VII. Պայմանագրի գործողության ժամկետը

18. Պայմանագիրն ուժի մեջ է մտնում կողմերի ստորագրումից հետո և գործում է մինչև կողմերի պարտավորությունների կատարման ավարտը:

19. Պայմանագիրը կնքվում է ____ տարի ժամկետով:

20. Պայմանագիրը կազմված է երկու հավասարազոր օրինակից:

VIII. Կողմերի գտնվելու վայրերը ԵՎ բանկային վավերապայմանները

ըստ ստորև նշված պահանջվող ոռոգման ջրի քանակի, կազմեցին ջրօգտագործման  հետևյալ պլան-ժամանակացույցը.

Ըստ գյուղատնտեսական մշակաբույսերի հողատարածքները եվ պահանջվող ոռոգման ջրի քանակը*

* Ներառյալ բաժանորդի ոռոգման համակարգերի կորուստները:

Ջրօգտագործման պլան-ժամանակացույց*

* Ներառյալ բաժանորդի ոռոգման համակարգերի կորուստները:

Պարտքերի մարման ժամանակացույց

Բաժանորդը` ___________, ի դեմս ___________, ստացված ոռոգման ջրի դիմաց

(անվանումը)             (պաշտոնը Ա.Ա.Հ.)                       

պարտքը ___________________________________ դրամի չափով պարտավորվում է

(թվերով, տառերով)       

Մատակարարին` ___________________________ վճարել ստորև նշված ժամկետներում.

(անվանումը)