040.0237.19.04.99

«Վավերացնում եմ»

Հայաստանի Հանրապետության

Նախագահ Ռ. Քոչարյան

19 ապրիլի 1999 թ.

Հայաստանի Հանրապետության կառավարություն

ո ր ո շ ու մ

19 ապրիլի 1999 թվականի N 237

քաղ. Երևան

ՆԱԽԿԻՆՈՒՄ ԿԵՆՍԱԹՈՇԱԿԻ ԱՆՑԱԾ ԶԻՆԾԱՌԱՅՈՂՆԵՐԻ ԿԵՆՍԱԹՈՇԱԿՆԵՐԸ ՎԵՐԱՀԱՇՎԱՐԿԵԼՈՒ ԿԱՐԳԻ ԵՎ ԺԱՄԿԵՏՆԵՐԻ ՄԱՍԻՆ

«Զինծառայողների և նրանց ընտանիքների անդամների սոցիալական ապահովության մասին» Հայաստանի Հանրապետության օրենքի 38 հոդվածին համապատասխան Հայաստանի Հանրապետության կառավարությունը որոշում է.

1. Մինչև 1999 թվականի հունվարի 1-ը կենսաթոշակի անցած զինծառայողների կենսաթոշակները վերահաշվարկել` ելնելով 1999 թվականի հունվարի 1-ի դրությամբ զինվորական ծառայության մեջ գտնվող` համապատասխան պաշտոններ զբաղեցնող զինծառայողների դրամական բավարարման չափերից:

2. Զինծառայողների ամսական դրամական բավարարման մեջ մտնում են պաշտոնային դրույքը, զինվորական կոչման դրույքը և երկարամյա ծառայության համար նշված դրույքաչափերից հաշվարկվող տոկոսային հավելավճարները, որոնք սահմանված են Հայաստանի Հանրապետության վարչապետի 1998 թվականի հուլիսի 27-ի «Հայաստանի Հանրապետության բյուջետային հիմնարկների աշխատողների պաշտոնային դրույքաչափերը սահմանելու մասին» N 454 որոշմամբ:

3. Սահմանել, որ մինչև 1999 թվականի հունվարի 1-ը կենսաթոշակի անցած զինծառայողների կենսաթոշակների վերահաշվարկման ժամանակ հաշվի չեն առնվում սննդի փոխհատուցման գումարները:

4. Զինծառայողների կենսաթոշակների վերահաշվարկումը կատարում են Հայաստանի Հանրապետության պաշտպանության նախարարության, Հայաստանի Հանրապետության ներքին գործերի ու ազգային անվտանգության նախարարության, Հայաստանի Հանրապետության կառավարությանն առընթեր արտակարգ իրավիճակների վարչության և Հայաստանի Հանրապետության սոցիալական ապահովագրության պետական հիմնադրամի կենսաթոշակներ նշանակող ստորաբաժանումները:

5. Նախկինում կենսաթոշակի անցած զինծառայողների վերահաշվարկված կենսաթոշակների վճարումը կատարել հետևյալ ժամկետներում`

ա) մինչև 1995 թվականի հունվարի 1-ը կենսաթոշակի անցած զինծառայողներին 1999 թվականի հոկտեմբերի 1-ից.

բ) 1995-1998 թվականների ընթացքում կենսաթոշակի անցած զինծառայողներին` 2000 թվականի հունվարի 1-ից:

6. Հայաստանի Հանրապետության ֆինանսների և էկոնոմիկայի նախարարությանը շահագրգիռ նախարարությունների հետ համատեղ, Հայաստանի Հանրապետության 1999 թվականի պետական բյուջեի առաջին կիսամյակի արդյունքներով, սահմանված կարգով Հայաստանի Հանրապետության կառավարություն ներկայացնել առաջարկություններ մինչև 1995 թվականի հունվարի 1-ը կենսաթոշակի անցած զինծառայողների վերահաշվարկված կենսաթոշակները 1999 թվականի հոկտեմբերի 1-ից վճարելու համար պահանջվող գումարների ֆինանսական աղբյուրների մասին:

Հայաստանի Հանրապետության վարչապետ

Ա. Դարբինյան