ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 դեկտեմբերի 1994 թվականի N 559

քաղ. Երևան

ԱՐԺԵԹՂԹԵՐԻ ՇՈՒԿԱՅԻ ԿԱՐԳԱՎՈՐՈՒՄՆ ՈՒ ՎԵՐԱՀՍԿՈՒՄՆ ԻՐԱԿԱՆԱՑՆՈՂ ՊԵՏԱԿԱՆ ԼԻԱԶՈՐՎԱԾ ՄԱՐՄՆԻ ՄԱՍԻՆ

Ի կատարումն Հայաստանի Հանրապետության Գերագույն խորհրդի «Արժեթղթերի շրջանառության մասին» Հայաստանի Հանրապետության օրենքը կիրարկելու մասին» որոշման, Հայաստանի Հանրապետության կառավարությունը որոշում է`

1. Սահմանել, որ արժեթղթերի շուկայի կարգավորումն ու վերահսկումն իրականացնող պետական լիազորված մարմինը Հայաստանի Հանրապետության ֆինանսների նախարարությունն է:

2. Հայաստանի Հանրապետության ֆինանսների նախարարությանը`

ա) մինչև 1994 թվականի դեկտեմբերի 15-ը Հայաստանի Հանրապետության կառավարություն ներկայացնել առաջարկություններ`

արժեթղթերի թողարկման ազդագրի կառուցվածքին ու բովանդակությանը ներկայացվող պահանջների.

թողարկողի (էմիտենտի) կամ նրա լիազորած անձի կողմից արժեթղթերի բաժանորդագրման կարգի.

աճուրդային վաճառքի ձևով արժեթղթերի տեղաբաշխման կարգի.

արժեթղթերով կատարվող գործարքների ձևակերպման և անվանական արժեթղթերի գրանցման կարգի մասին.

բ) Հայաստանի Հանրապետության արդարադատության նախարարության հետ համատեղ մինչև 1994 թվականի դեկտեմբերի 15-ը Հայաստանի Հանրապետության կառավարություն ներկայացնել առաջարկություններ`

վարչական իրավախախտումների վերաբերյալ Հայաստանի Հանրապետության օրենսգրքում և Հայաստանի Հանրապետության քրեական օրենսգրքում թողարկողի կողմից թողարկման ազդագրում բերված տեղեկությունների ճշտության համար պատասխանատվություն սահմանելու.

արժեթղթերի շրջանառության օրենսդրությամբ սահմանված պայմանները խախտող սուբյեկտների նկատմամբ կիրառվող պատժամիջոցներ սահմանելու մասին: