ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
16 փետրվարի 1993 թվականի N 44
քաղ. Երևան
ԳՅՈՒՂՄԵՔԵՆԱՆԵՐԻ ՇԱՀԱԳՈՐԾՄԱՆ ԿԱՅԱՆՆԵՐ ՍՏԵՂԾԵԼՈՒ ՄԱՍԻՆ
Հանրապետությունում գյուղացիական և գյուղացիական կոլեկտիվ տնտեսությունների սպասարկման, նյութատեխնիկական մատակարարման բարելավման, գյուղատնտեսության մեքենատրակտորային շարժակազմի օգտագործման արդյունավետության բարձրացման նպատակով Հայաստանի Հանրապետության կառավարությունը որոշում է`
1. Թույլատրել Հայաստանի Հանրապետության գյուղատնտեսության նախարարությանը, պատգամավորների շրջանային, քաղաքային խորհուրդների գործադիր կոմիտեների հետ համաձայնեցնելով, ստեղծել գյուղմեքենաների շահագործման կայաններ (ԳՇԿ)` պետական ձեռնարկության կարգավիճակով, «Հայագրոսպասարկում» ՀԱԱՄ-ի կամ «Հայբերրիություն» ՀԱՄ-ի շրջանային միավորումների կազմում կամ որպես վերջիններիս առանձնացված ստորաբաժանումներ, նրանց վրա դնելով`
ա) գյուղատնտեսական աշխատանքների պայմանագրային հիմունքներով կազմակերպումը և իրականացումը.
բ) գյուղացիական և գյուղացիական կոլեկտիվ տնտեսություններին նյութատեխնիկական ռեսուրսների մատակարարումը և նրանց տեխնիկական սպասարկումը:
2. Սահմանել, որ նախկին կոլտնտեսությունների և գյուղատնտեսական տնտհաշվարկային ձեռնարկությունների սեփական միջոցների հաշվին գնված հիմնական և շրջանառու միջոցները վաճառվում են ԳՇԿ-ներին, իսկ մյուս գյուղատնտեսական պետական ձեռնարկությունների և պատգամավորների ավանային և գյուղական խորհուրդների գործադիր կոմիտեների հաշվեկշռում եղած հիմնական և շրջանառու միջոցները հանձնվում են ԳՇԿ-ների հաշվեկշիռներին:
3. Պատգամավորների շրջանային, քաղաքային խորհուրդների գործադիր կոմիտեներին` գյուղմեքենաների շահագործման կայաններ ստեղծելու ուղղությամբ միջոցառումներ մշակելու և իրականացնելու նպատակով ստեղծել շրջանային, քաղաքային հանձնաժողովներ` շրջանային և քաղաքային խորհուրդների գործադիր կոմիտեների նախագահների գլխավորությամբ, դրանց կազմում ընդգրկելով Հայաստանի Հանրապետության գյուղատնտեսության նախարարության ներկայացուցիչների, «Հայագրոսպասարկում» ՀԱԱՄ-ի և «Հայբերրիություն» ՀԱՄ-ի շրջանային միավորումների տնօրեններին, գյուղացիական և գյուղացիական կոլեկտիվ տնտեսությունների ներկայացուցիչների, հաշվի առնելով շրջանների առանձնահատկությունները և գյուղատնտեսական արտադրության ծավալները:
4. Հանձնարարել Հայաստանի Հանրապետության գյուղատնտեսության նախարարությանը` մեկամսյա ժամկետում հաստատել ԳՇԿ-ների կանոնադրությունները:
5. Հանձնարարել Հայաստանի Հանրապետության էկոնոմիկայի նախարարությանը և գյուղատնտեսության նախարարությանը` մշակել և առաջարկություն ներկայացնել Հայաստանի Հանրապետության կառավարություն գյուղացիական և գյուղացիական կոլեկտիվ տնտեսությունների ու այլ գյուղատնտեսական կազմակերպությունների նյութատեխնիկական մատակարարման մասին:
6. Հանձնարարել Հայաստանի Հանրապետության էկոնոմիկայի նախարարությանը, արդյունաբերության նախարարությանը և գյուղատնտեսության նախարարությանը` մեկամսյա ժամկետում քննության առնել և լուծել հանրապետությունում տրակտորների և մյուս գյուղմեքենաների պահեստամասերի արտադրության կազմակերպման հարցը:
Հայաստանի Հանրապետության վարչապետ |
Հ. ԲԱԳՐԱՏյան |
Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ |
Ա. ԽԱՉԱՏՐՅԱՆ |
![loading...](/static/img/loader.gif)