ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐ

ԿԵՆՍԱԹՈՇԱԿԱՅԻՆ ԽՆԱՅՈՂՈՒԹՅՈՒՆՆԵՐԻ ՏԵՂԱՓՈԽՄԱՆ ՀԵՏ ԿԱՊՎԱԾ ԸՆԹԱՑԱԿԱՐԳԵՐԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Կենսաթոշակային համակարգի կուտակային բաղադրիչի մասնակիցների իրավունքների և օրինական շահերի պաշտպանության լրացուցիչ երաշխիքների մասին» օրենքի 8.1-ին հոդվածի 1-ին մասը.

ՀՐԱՄԱՅՈՒՄ ԵՄ՝

1. Սահմանել՝ կենսաթոշակային խնայողությունների տեղափոխման հետ կապված ընթացակարգերը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

ԸՆԹԱՑԱԿԱՐԳԵՐ

ԿԵՆՍԱԹՈՇԱԿԱՅԻՆ ԽՆԱՅՈՂՈՒԹՅՈՒՆՆԵՐԻ ՏԵՂԱՓՈԽՄԱՆ ՀԵՏ ԿԱՊՎԱԾ

1. Սույն հավելվածով կարգավորվում են «Կենսաթոշակային համակարգի կուտակային բաղադրիչի մասնակիցների իրավունքների և օրինական շահերի պաշտպանության լրացուցիչ երաշխիքների մասին» օրենքի (այսուհետ՝ Օրենք) 8.1-ին հոդվածով նախատեսված՝ կենսաթոշակային խնայողությունների՝ Հայաստանի Հանրապետության կուտակային կենսաթոշակային համակարգ տեղափոխելու հետ կապված հարաբերությունները։

2. Անձը (այդ թվում՝ ժամանակավոր պաշտպանության տակ վերցված՝ փախստական ճանաչված անձը) Օրենքի 8.1-ին հոդվածով նախատեսված ներդրումային ֆոնդում (այսուհետ՝ այլ ներդրումային ֆոնդ) առկա՝ իր կուտակային խնայողությունները Հայաստանի Հանրապետության կուտակային կենսաթոշակային համակարգ տեղափոխելու (այլ ներդրումային ֆոնդի՝ անձին պատկանող փայերը մարելու և դրա արդյունքում ձևավորված գումարը իր ընտրած պարտադիր կենսաթոշակային ֆոնդին փոխանցելու) համար գրավոր դիմում է այլ ներդրումային ֆոնդի մասնակիցների ռեեստրը վարողին։ Այս դեպքում սույն հավելվածով սահմանված ձևի դիմումը ներկայացվում է Հայաստանի Հանրապետության կուտակային համակարգում գործող հաշվի օպերատորների միջոցով, թղթային եղանակով։

3. Սույն հավելվածի 2-րդ կետով նախատեսված դիմումին (այսուհետ՝ դիմում) կից անձը կարող է ներկայացնել Հայաստանի Հանրապետության կենտրոնական բանկի խորհրդի 2011 թվականի հունիսի 21-ի թիվ 171-Ն որոշման NN 1, 2 հավելվածներով սահմանված ձևերի ֆոնդի ընտրության դիմում, եթե նա չունի Հայաստանի Հանրապետության կուտակային համակարգում բացված կենսաթոշակային հաշիվ կամ իր կողմից (համար) ընտրված կենսաթոշակային ֆոնդ կամ ցանկանում է սույն հավելվածի 2-րդ կետով նախատեսված իր կենսաթոշակային խնայողությունների տեղափոխման համար ընտրել նախկինում իր կողմից (համար) ընտրված ֆոնդից տարբեր այլ կենսաթոշակային ֆոնդ։

4. Դիմումը ներկայացվում է սույն հրամանն ուժի մեջ մտնելու օրվանից հետո՝ երեք ամսվա ընթացքում։ Սույն ժամկետից հետո ներկայացված դիմումներին ընթացք չի տրվում, իսկ անձը համարվում է դիմում չներկայացրած։

5. Դիմումը ստանալուց հետո դիմող անձի համար 3 աշխատանքային օրվա ընթացքում, իսկ դիմում չներկայացրած՝ այլ ներդրումային ֆոնդում կուտակային խնայողություններ ունեցող անձանց (այսուհետ՝ դիմում չներկայացրած անձ) համար՝ սույն հավելվածի 4-րդ կետով նախատեսված ժամկետի ավարտից հետո՝ 10 աշխատանքային օրվա ընթացքում մասնակիցների ռեեստրը վարողը բացում է կենսաթոշակային հաշիվներ։

6. Սույն հավելվածի 5-րդ կետի համաձայն անձանց համար կենսաթոշակային հաշիվներ բացելուց հետո 10 աշխատանքային օրվա ընթացքում այլ ներդրումային ֆոնդի մասնակիցների ռեեստրը վարողը կազմակերպում է յուրաքանչյուր անձի (այդ թվում՝ Հայաստանի Հանրապետության կուտակային համակարգում կենսաթոշակային հաշիվ ունեցող անձի)՝ այլ ներդրումային ֆոնդի փայերի մարումը և դրա արդյունքում ձևավորված միջոցների փոխանցումը անձի կողմից (համար) ընտրված` Հայաստանի Հանրապետության կուտակային կենսաթոշակային համակարգում գործող կենսաթոշակային ֆոնդին։ Այս նպատակով այլ ներդրումային ֆոնդի կառավարիչը համագործակցում է տվյալ ֆոնդի մասնակիցների ռեեստր վարողի հետ՝ ապահովելով գործընթացը կազմակերպելու համար անհրաժեշտ քայլերի կատարումը։ Մասնակիցների ռեեստրը վարողը յուրաքանչյուր անձի համար կատարված փոխանցման դիմաց տվյալ անձի անվամբ բացված (գործող) կենսաթոշակային հաշվին է փոխանցում համապատասխան կենսաթոշակային ֆոնդի՝ փոխանցված գումարին համարժեք քանակով փայեր։ Դիմումը չներկայացրած անձի դեպքում միջոցները փոխանցվում են այն պարտադիր կենսաթոշակային ֆոնդին, որն իր ակտիվների կառուցվածքով ամենամոտն է տվյալ ներդրումային ֆոնդի ակտիվների կառուցվածքին։

7. Այլ ներդրումային ֆոնդի փայերի մարման և Հայաստանի Հանրապետության կուտակային կենսաթոշակային համակարգում գործող կենսաթոշակային ֆոնդի փայերի թողարկման համար հիմք է ընդունվում համապատասխան ֆոնդերի փայերի վերջին հայտնի (մասնակիցների ռեեստրը վարողին տրամադրված և հրապարակված)՝ համապատասխանաբար մարման և տեղաբաշխման գները:

8. Սույն հավելվածի 6-րդ կետի համաձայն փայերի մարման դեպքում փայերի մարման վճար չի գանձվում։

9. Մահացած անձի կենսաթոշակային խնայողությունները Հայաստանի Հանրապետության կուտակային կենսաթոշակային համակարգ տեղափոխվում են դիմում չներկայացրած անձի համար սույն հավելվածով սահմանված կարգով:

10. Այլ ներդրումային ֆոնդի մասնակիցների ռեեստրը վարողը սույն հավելվածի 4‑րդ կետով նախատեսված ժամկետը լրանալուց հետո սահմանափակում է, իսկ այդ ժամկետին հաջորդող ամսվա 1-ից դադարեցնում է այլ ներդրումային ֆոնդի փայերի հետ կապված անձանց կենսաթոշակային հաշիվների սպասարկումը։

11. Սույն ընթացակարգով սահմանված գործընթացի ապահովման նպատակով կարող են բացվել տեխնիկական հաշիվներ։

(11-րդ կետը լրաց. 06.03.25 N 20-Ն)

Կենսաթոշակային խնայողությունները տեղափոխելու դիմումի լրացման ուղեցույց

1. «1. հանրային ծառայությունների համարանիշ կամ հանրային ծառայությունների համարանիշ չստանալու վերաբերյալ տեղեկանքի համար» վանդակում պարտադիր լրացվում է մասնակցի հանրային ծառայությունների համարանիշը, իսկ հանրային ծառայությունների համարանիշի բացակայության դեպքում լրացվում է հանրային ծառայությունների համարանիշ չստանալու վերաբերյալ տեղեկանքի համարը,

2. «2. անուն» վանդակում պարտադիր լրացվում է մասնակցի անունը, ինչպես որ նշված է անձը հաստատող փաստաթղթում,

3. «3. ազգանուն» վանդակում պարտադիր լրացվում է մասնակցի ազգանունը, ինչպես որ նշված է անձը հաստատող փաստաթղթում,

4. «4. ծննդյան ամսաթիվ» վանդակում պարտադիր լրացվում է մասնակցի ծննդյան ամսաթիվը (օր/ամիս/տարի ֆորմատով), ինչպես որ նշված է անձը հաստատող փաստաթղթում,

5. «5. անձը հաստատող փաստաթղթի տեսակ» վանդակում պարտադիր լրացվում է մասնակցի անձը հաստատող վավեր փաստաթղթի տեսակը,

6. «6. անձը հաստատող փաստաթղթի նույնականացման համար» վանդակում պարտադիր լրացվում է մասնակցի վավեր անձնագրի սերիան և համարը կամ անձը հաստատող այլ վավեր փաստաթղթի նույնականացման համարը,

7. «7. երկիր» վանդակում պարտադիր լրացվում է մասնակցի բնակության երկրի անվանումը,

8. «8. վարչատարածքային միավոր» վանդակում պարտադիր լրացվում է մարզի անվանումը, որտեղ բնակվում է մասնակիցը, իսկ Երևան համայնքի դեպքում` «Երևան» (օտարերկրյա հասցեի դեպքում՝ տվյալ երկրի վարչատարածքային միավորի անվանումը),

9. «9. համայնք (վարչական շրջան)» վանդակում պարտադիր լրացվում է մարզի համայնքի (քաղաքային, գյուղական), իսկ Երևան համայնքի դեպքում՝ վարչական շրջանի (օտարերկրյա հասցեի դեպքում՝ տվյալ երկրի համայնքային միավորի) անվանումը, որտեղ բնակվում է մասնակիցը,

10. «10. բնակավայր, փողոց, տուն (շենք), բնակարան» վանդակում հաջորդաբար պարտադիր լրացվում են բնակավայրի անվանումը (առկայության դեպքում), փողոցի անվանումը, տան (շենքի), բնակարանի համարները, որտեղ բնակվում է մասնակիցը,

11. «11. բջջային հեռախոսի համար» վանդակում լրացվում են այն բջջային հեռախոսների միջազգային կոդերը և համարները, որոնցով հնարավոր է կապ հաստատել մասնակցի հետ,

12. «12. էլեկտրոնային փոստի հասցե» վանդակում լրացվում է մասնակցի էլեկտրոնային փոստի հասցեն,

13. «13. ամսաթիվ» վանդակում պարտադիր լրացվում է դիմումը ներկայացնելու ամսաթիվը (օր/ամիս/տարի),

14. «14. մասնակցի ստորագրություն» վանդակում պարտադիր դրվում է մասնակցի ստորագրությունը, իսկ եթե դիմումը ներկայացվել է մասնակցի լիազորված անձի կողմից, ապա վանդակը չի լրացվում,

15. «15. լիազորված անձի անուն, ազգանուն» վանդակում պարտադիր լրացվում է մասնակցի լիազորված անձի անունը և ազգանունը, իսկ եթե դիմումը ներկայացվել է մասնակցի կողմից, ապա վանդակը չի լրացվում

16. «16. լիազորված անձի ստորագրություն» վանդակում պարտադիր դրվում է մասնակցի լիազորված անձի ստորագրությունը, իսկ եթե դիմումը ներկայացվել է մասնակցի կողմից, ապա վանդակը չի լրացվում:

(հավելվածը լրաց. 06.03.25 N 20-Ն)

Պաշտոնական հրապարակման օրը՝ 1 հոկտեմբերի 2024 թվական: