ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԵՆԹԱԿԱՌՈՒՑՎԱԾՔՆԵՐԻ

ՆԱԽԱՐԱՐ

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐԻ 2015 ԹՎԱԿԱՆԻ ՄԱՅԻՍԻ 6-Ի N 140-Ն ՀՐԱՄԱՆԻ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Ղեկավարվելով «Նորմատիվ իրավական ակտերի մասին» օրենքի 34-րդ հոդվածով՝

1. «Հայաստանի Հանրապետության էներգետիկայի և բնական պաշարների նախարարի 2015 թվականի մայիսի 6-ի «Հայաստանի Հանրապետության կողմից արտաքին առևտրի դեպքում սահմանափակումների ենթակա ընդերքի մասին տեղեկատվության արտահանման լիցենզիաների տրամադրման կարգը, Հայաստանի Հանրապետության կողմից արտաքին առևտրի դեպքում սահմանափակումների ենթակա ընդերքի մասին տեղեկատվության ցանկը, ընդերքի մասին տեղեկատվության արտահանման նպատակով լիցենզիայի հայտի և լիցենզիայի ձևակերպման հրահանգը, ընդերքի մասին տեղեկատվության արտահանման նպատակով լիցենզիայի հայտի և լիցենզիայի ձևերը հաստատելու մասին» N 140-Ն հրամանի.

1) նախաբանում «Ղեկավարվելով» բառից հետո լրացնել «Առևտրի և ծառայությունների մասին» օրենքի 2.1.-ին հոդվածի 4-րդ մասով,» բառերը:

2) ամբողջ տեքստում` «էներգետիկայի և բնական պաշարների» բառերը փոխարինել «տարածքային կառավարման և ենթակառուցվածքների» բառերով, իսկ «ԱՏԳ ՄԱԱ ԵՏՄ» հապավումը փոխարինել «ԵՏՄ ԱՏԳ ԱԱ» հապավումով:

3) 3-րդ կետում «նախարարության աշխատակազմի ղեկավարին» բառերը փոխարինել «նախարարության ընդերքօգտագործման ոլորտը համակարգող նախարարի տեղակալին» բառերով:

4) 1-ին կետի 1-ին ենթակետով հաստատված N 1 հավելվածում կատարել հետևյալ փոփոխություններն ու լրացումները.

ա. 3-րդ կետում «լիցենզիայի կրկնօրինակ» բառերը փոխարինել «սույն կարգի 17․1-ին, 17․2-րդ կետերով սահմանված դեպքերում տրամադրված լիցենզիաների կրկնօրինակը» բառերով,

բ. 13-րդ կետի 1-ին ենթակետում «կարող է ներկայացվել նաև էլեկտրոնային եղանակով / (http://swis.trade.gov.am/) համացանցային կայքէջում հասանելի «Միասնական հայտ» համակարգում (այսուհետ՝ «Միասնական հայտ» համակարգ) ենթահայտի տեսքով» բառերը փոխարինել «ներկայացվում է էլեկտրոնային եղանակով՝ Հայաստանի Հանրապետության արտաքին առևտրի ազգային մեկ պատուհան էլեկտրոնային հարթակում (www.trade.gov.am) հասանելի «Թույլատվական փաստաթղթեր» (sw.gov.am) էլեկտրոնային համակարգի միջոցով» բառերով,

գ․ ուժը կորցրած ճանաչել 13-րդ կետի 2-րդ ենթակետը,

դ․ 17-րդ կետում «լիցենզիայի բնօրինակը» բառերը փոխարինել «լիցենզիան» բառով, իսկ «հայտատուին» բառից հետո լրացնել «էլեկտրոնային եղանակով Հայաստանի Հանրապետության արտաքին առևտրի ազգային մեկ պատուհան էլեկտրոնային հարթակում (www.trade.gov.am) հասանելի «Թույլատվական փաստաթղթեր (sw.gov.am)» էլեկտրոնային համակարգի միջոցով» բառերը: Նույն կետից հանել «Նախքան Տեղեկատվության մաքսային հայտարարագրումը` հայտատուն լիցենզիայի բնօրինակը ներկայացնում է համապատասխան մաքսային մարմին, որը, լիցենզիան հսկողության տակ վերցնելով, հայտատուին է տալիս դրա պատճենը՝ այն հսկողության տակ վերցնելու մասին մաքսային մարմնի կողմից կատարված նշումով:» նախադասությունը,

ե․ hավելվածը լրացնել հետևյալ բովանդակությամբ, նոր՝ 17․1-ին և 17․2-րդ կետերով․ «17․1 անհաղթահարելի ուժի առկայության դեպքերում լիցենզիա ստանալու համար հայտատուի կողմից լիազոր մարմին ներկայացվող տեղեկությունները և փաստաթղթերը, իսկ լիազոր մարմնի կողմից համապատասխան լիցենզիայի տրամադրումը կարող են իրականացվել նաև թղթային եղանակով:

17․2 Լիցենզիաները այլ երկրներ ներկայացնելու անհրաժեշտության դեպքում լիազոր մարմնի կողմից լիցենզիան կարող է տրամադրվել նաև թղթային տեսքով:»,

զ. 19-րդ կետի 1-ին ենթակետում «եթե» բառից հետո լրացնել «սույն հավելվածի 13-րդ կետի 1-ին ենթակետում նշված էլեկտրոնային հարթակում» բառերը, իսկ «գրավոր» բառը հանել,

է. 22-րդ կետում «Լիցենզիայի» բառը փոխարինել «Սույն կարգի 17․1-ին, 17․2-րդ կետերով սահմանված դեպքերում տրամադրված լիցենզիաների» բառերով,

ը․ 23-րդ կետն ուժը կորցրած ճանաչել:

5) 1-ին կետի 3-րդ ենթակետով հաստատված N 3 հավելվածի.

ա. 4-րդ կետում «թղթային կրիչի վրա և այն լրացվում է տպագրիչ սարքի միջոցով» բառերը փոխարինել «էլեկտրոնային եղանակով՝» բառերով և կետադրական նշանով,

բ. 5-րդ կետում «Վավերապայման 14. «Չափման միավորը»» ենթակետում «Եվրասիական Տնտեսական Միության Արտաքին Տնտեսական Գործունեության Ապրանքների միասնական Նոմենկլատուրայի» բառերը փոխարինել «Եվրասիական տնտեսական միության արտաքին տնտեսական գործունեության միասնական ապրանքային անվանացանկի» բառերով, իսկ «Վավերապայման 15. «Ընդերքի մասին տեղեկատվության ծածկագիրը ըստ ԱՏԳ ՄԱԱ ԵՏՄ-ի և նրա նկարագրությունը» ենթակետի վերջին պարբերությունում «թերթ» բառը փոխարինել «էջ» բառով,

գ. 6-րդ կետում «կեղծումից պաշտպանված հատուկ թղթի վրա» բառերը փոխարինել «էլեկտրոնային եղանակով՝» բառերով և կետադրական նշանով, իսկ Վավերապայման 15. «Ընդերքի մասին տեղեկատվություն ըստ ԱՏԳ ՄԱԱ ԵՏՄ-ի և նրա նկարագրությունը» ենթակետի վերջին պարբերությունում «թերթ» բառը փոխարինել «էջ» բառով:

6) N 2 և N 4 Ձևերի վերջին տողի առաջին սյունակում «թերթեր» բառը փոխարինել «էջեր» բառով, իսկ «Թերթ» բառը՝ «Էջ» բառով:

 2. Սույն հրամանն ուժի մեջ է մտնում Հայաստանի Հանրապետության արտաքին առևտրի ազգային մեկ պատուհան էլեկտրոնային հարթակում (www.trade.gov.am) հասանելի «Թույլատվական փաստաթղթեր» (sw.gov.am) էլեկտրոնային համակարգի գործարկման օրվանից:

Պաշտոնական հրապարակման օրը՝ 5 դեկտեմբերի 2022 թվական: