«Գրանցված է»
ՀՀ արդարադատության
նախարարության կողմից
11 հուլիսի 2011 թ.
Պետական գրանցման թիվ 10211311
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐ
|
11 հուլիսի 2011 թ. |
N 96-Ն |
Հ Ր Ա Մ Ա Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ 2000 ԹՎԱԿԱՆԻ ՕԳՈՍՏՈՍԻ 10-Ի N 501 ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Ղեկավարվելով «Իրավական ակտերի մասին» Հայաստանի Հանրապետության օրենքի 70-րդ հոդվածով.
ՀՐԱՄԱՅՈՒՄ ԵՄ՝
1. Հայաստանի Հանրապետության արդարադատության նախարարի 2000 թվականի օգոստոսի 10-ի «Հայաստանի Հանրապետության արդարադատության նախարարության կողմից ապոստիլ դնելու կարգը հաստատելու մասին» N 501 հրամանում (այսուհետ՝ Հրաման) կատարել հետևյալ փոփոխությունները և լրացումները.
1) Հրամանի 2-րդ կետը շարադրել հետևյալ խմբագրությամբ.
«2. Սահմանել, որ ապոստիլ դնելու համար անձանց դիմումներն ընդունվում են և դրանք քաղաքացիներին են հանձնվում ամեն օր Հայաստանի Հանրապետության արդարադատության նախարարության աշխատակազմի քարտուղարության կողմից` ժամը 10.00-ից 17.00-ն:».
2) Հրամանով հաստատված «Հայաստանի Հանրապետության արդարադատության նախարարության կողմից ապոստիլ դնելու կարգի» (այսուհետ՝ Կարգ) 6-րդ կետում «Պետական նոտարիատի» բառերը փոխարինել «Նոտարիատի» բառով.
3) Կարգի 11-րդ կետում «քննարկվում են նախարարության համապատասխան ստորաբաժանումների» բառերը փոխարինել «քննարկվում և ապոստիլ դրվում է նախարարության աշխատակազմի քաղաքացիական կացության ակտերի գրանցման գործակալության (այսուհետ` գործակալություն)» բառերով.
4) Կարգի 12-րդ կետում «Նախարարության համապատասխան ստորաբաժանումը» բառերը փոխարինել «Գործակալությունը)» բառով.
5) Կարգի 14-րդ կետի 3-րդ պարբերությունը ուժը կորցրած ճանաչել.
6) Կարգի 16-րդ կետը շարադրել հետևյալ խմբագրությամբ.
«16. Փաստաթղթի վրա ապոստիլը դրվում է դիմումը նախարարություն մուտք լինելու օրվանից հետո երկու աշխատանքային օրվա ընթացքում, բացառությամբ սույն կարգով նախատեսված դեպքերի: Նշված դեպքում քաղաքացիները ապոստիլ դրված փաստաթղթերը կարող են ստանալ 2-րդ աշխատանքային օրվա ժամը 10.00-ից սկսած:
Առանձին փաստաթղթերի իսկությունը ճշտելու համար գործակալության պետի կողմից ապոստիլ դնելու ժամկետը կարող է երկարաձգվել մինչև 5 օրով, Հայաստանի Հանրապետության արդարադատության նախարարի տեղակալի կողմից` մինչև 10 օրով, իսկ Հայաստանի Հանրապետության արդարադատության նախարարի կողմից` մինչև 15 օրով: Նշված դեպքում դիմողին մեկ օրվա ընթացքում տրվում է գրավոր պատասխան, որում նշվում է ապոստիլ դնելու ժամկետի երկարացման պատճառների մասին` ժամկետը երկարացնող անձի ստորագրությամբ:
Այն դեպքում, երբ դիմողի հետ կնքվում է ապոստիլ դնելու վճարովի ծառայության մատուցման պայմանագիր, փաստաթղթի վրա ապոստիլը դրվում է դիմումը նախարարություն մուտք լինելու օրվանից հետո մեկ աշխատանքային օրվա ընթացքում: Ընդ որում, եթե դիմումը ներկայացվել է աշխատանքային օրվա ժամը 10.00-ից 13.00-ն ընկած ժամանակահատվածում, ապա դիմողը ապոստիլ դրված փաստաթղթերը կարող է ստանալ հաջորդ աշխատանքային օրվա ժամը 10.00-ից սկսած, իսկ եթե դիմումը ներկայացվել է աշխատանքային օրվա ժամը 14.00-ից 17.00-ն ընկած ժամանակահատվածում, ապա` հաջորդ աշխատանքային օրվա ժամը 14.00-ից սկսած.
7) Կարգի 22-րդ կետը շարադրել հետևյալ խմբագրությամբ.
«22. Գործակալությունում ապոստիլ դնելու փաստը գրանցելու համար վարվում են հետևյալ գրանցամատյանները`
ա) քաղաքացիական կացության ակտերի գրանցման մարմինների կողմից տրված փաստաթղթերի իսկական օրինակների վրա ապոստիլ դնելու գրանցամատյան,
բ) այլ փաստաթղթերի վրա ապոստիլ դնելու գրանցամատյան:».
8) Կարգի 24-րդ և 26-րդ կետերը ուժը կորցրած ճանաչել.
9) Կարգի 25-րդ կետի «ընդունարան» բառը փոխարինել «նախարարության աշխատակազմի քարտուղարություն» բառերով.
10) Կարգի 27-րդ կետը շարադրել հետևյալ խմբագրությամբ.
«27. Ապոստիլը ստորագրում և կնքում է գործակալության պետը, իսկ նրա բացակայության դեպքում վերջինիս հանձնարարությամբ գործակալության աշխատակիցներից որևէ մեկը»:
2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:
| Հ. Թովմասյան |
