«Գրանցված է»

ՀՀ արդարադատության

նախարարության կողմից

15 դեկտեմբերի 2010 թ.

Պետական գրանցման թիվ 32610481

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐ

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱՆ ԱՇԽԱՏԱԿԱԶՄԻ ՆԵՐՔԻՆ ԳՈՐԾԱՎԱՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2009 թվականի դեկտեմբերի 24-ի նիստի N 53 արձանագրային որոշմամբ հաստատված Հայաստանի Հանրապետության պետական կառավարման մարմնի աշխատակազմի ներքին գործավարության օրինակելի կարգի 2-րդ կետը և ղեկավարվելով Հայաստանի Հանրապետության արտակարգ իրավիճակների նախարարության (այսուհետ` ՀՀ ԱԻՆ) կանոնադրության 13-րդ կետով.

ՀՐԱՄԱՅՈՒՄ ԵՄ՝

1. Հաստատել ՀՀ ԱԻՆ աշխատակազմի ներքին գործավարության կարգը` (այսուհետ` կարգ) համաձայն հավելվածի:

2. ՀՀ ԱԻՆ աշխատակազմի քարտուղարության պետ Ա. Գրիգորյանին`

1) կարգը ծանոթացնել ՀՀ ԱԻՆ համակարգի աշխատակիցներին,

2) ապահովել հրամանի պետական գրանցումը:

3. Ուժը կորցրած ճանաչել ՀՀ ԱԻ նախարարի 2010 թվականի հունվարի 21-ի «Հայաստանի Հանրապետության արտակարգ իրավիճակների նախարարության գործավարության կարգը հաստատելու մասին» N 03-Ն հրամանը։

4. Սույն հրամանի կատարման հսկողությունը վերապահել ՀՀ ԱԻՆ աշխատակազմի ղեկավար Հ. Հակոբյանին:

5. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱՆ ԱՇԽԱՏԱԿԱԶՄԻ ՆԵՐՔԻՆ ԳՈՐԾԱՎԱՐՈՒԹՅԱՆ

 I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են Հայաստանի Հանրապետության արտակարգ իրավիճակների նախարարության աշխատակազմի (այսուհետ` աշխատակազմ) ներքին գործավարության կազմակերպումն ու իրականացումը:

2. Սույն կարգով սահմանված գործավարության կանոնները պարտադիր են նախարարի աշխատակազմի, նախարարության կառավարման ոլորտում գործող պետական մարմնի, նախարարության աշխատակազմի կառուցվածքային և առանձնացված ստորաբաժանումների աշխատակիցների համար:

3. Աշխատակազմի ներքին գործավարությունը կազմակերպում է աշխատակազմի քարտուղարությունը` աշխատակազմում գործող էլեկտրոնային փաստաթղթաշրջանառության համակարգի (այսուհետ` համակարգ) միջոցով:

4. Աշխատակազմում փաստաթղթաշրջանառությունն իրականացվում է «յունիկոդ «Գրապալատ» կամ «Մարիամ» տառատեսակով:

5. Յուրաքանչյուր աշխատողի աշխատակազմի ղեկավարի կողմից տրվում է համակարգից օգտվողի անուն:

6. Էլեկտրոնային ստորագրության վավերության դեպքում փաստաթղթի էլեկտրոնային տարբերակը համարժեք է թղթային տարբերակին: Օգտվողի անունով համակարգում կատարված ցանկացած մակագրություն (նշագրում, գրառում) համարժեք է փաստաթղթի վրա կատարված մակագրությանը (նշագրմանը, գրառմանը):

7. Արձակուրդ գնալու, գործուղման մեկնելու կամ այլ պատճառներով բացակայելու դեպքում համակարգում համապատասխան փոփոխություններ կատարելու համար աշխատակցին փոխարինող անձի վերաբերյալ տեղեկությունը` (փոխարինողի անունը, ազգանունը և պաշտոնը) ներկայացվում է աշխատակազմի ղեկավարին: Փոխարինող անձի տվյալները նշվում են նաև հրամանում:

8. Աշխատակցի բացակայության ժամանակահատվածում ոչ ոք իրավունք չունի օգտվել տվյալ աշխատողին համակարգից օգտվելու համար տրված օգտվողի անունից:

9. Աշխատակազմի յուրաքանչյուր ստորաբաժանումում գործավարության կազմակերպման և վարման համար պատասխանատու է տվյալ ստորաբաժանման ղեկավարը:

10. Գաղտնի գործավարությունն իրականացվում է «Պետական և ծառայողական գաղտնիքի մասին» Հայաստանի Հանրապետության օրենքի պահանջներին համապատասխան:

II. ՄՏԻՑ ՓԱՍՏԱԹՂԹԵՐԻ ԳՐԱՆՑՈՒՄՆ ԱՇԽԱՏԱԿԱԶՄՈՒՄ ԵՎ ՆԵՐՔԻՆ ՓԱՍՏԱԹՂԹԱՇՐՋԱՆԱՌՈՒԹՅՈՒՆԸ

11. Նախարարությունում ստացված թղթակցությունը, բացի «գաղտնի» մակագրությամբ ծրարներից, ընդունվում է աշխատակազմի քարտուղարության կողմից:

12. Աշխատակազմի քարտուղարությունում բացվում են ստացված բոլոր ծրարները, բացի «Անձամբ» մակագրությամբ ծրարներից: «Անձամբ» մակագրությամբ ծրարների դեպքում նշվում է միայն դրանց ստացման ամսաթիվը, ժամը և ուղարկողի տվյալները: Այդ ծրարները չեն բացվում և փակ վիճակում հանձնվում են հասցեատիրոջը:

13. Քարտուղարության աշխատակիցները ծրարը բացելիս պարտավոր են ստուգել փաստաթղթերի առկայությունը (ներառյալ հավելվածները), առդիր թերթերի քանակը, համեմատել փաստաթղթերի ելից համարները ծրարի վրա նշված համարների հետ: Փաստաթղթի բացակայության կամ վնասման դեպքում կազմվում է ակտ: Էլեկտրոնային տարբերակով ստացված փաստաթղթի վավերության հետ կապված անճշտությունների դեպքում աշխատակազմի քարտուղարության պետը կամ գործավարության կազմակերպման բաժնի պետը չեղարկում է փաստաթուղթը և հանձնարարում գրանցողին ուղարկող մարմնին տեղյակ պահել տվյալ փաստաթուղթը վերստին ուղարկելու անհրաժեշտության մասին:

14. Ծրարները, որոնցով ստացվել է թղթակցությունը, պահպանվում և փաստաթղթերին կցվում, ինչպես նաև պատկերամուտով մուտքագրվում են (սկանավորվում) այն դեպքում, երբ միայն ծրարի միջոցով կարելի է պարզել ուղարկողի հասցեն, կամ եթե ծրարի վրա փոստային դրոշմակնիքի ամսաթիվը նշանակություն ունի տվյալ նյութի ուղարկման ու ստացման ժամանակը որոշելու համար:

15. Յուրաքանչյուր նոր մտից փաստաթուղթ քարտուղարության աշխատակիցը կից նյութերով գրանցում է համակարգում` նշելով համակարգի կողմից պահանջվող անհրաժեշտ տեղեկությունը: Մտից փաստաթուղթը համարակալվում է հերթական մտից համարով (հունվարի 1-ից մինչև դեկտեմբերի 31-ը): Մտից համարը բաղկացած է համակարգի հերթական համարից և տարեթվից:

16. Նախարարի բացակայության դեպքում նախարարին հասցեագրված մեկօրյա ժամկետով շտապ թղթակցությունը հանձնվում է աշխատակազմի ղեկավարին (նախարարի տեղակալին)` փաստաթղթի համապատասխան ընթացքն ապահովելու համար:

17. Գրանցման ենթակա չեն տեղեկատվական բնույթի փաստաթղթերը: Այդպիսի փաստաթղթերի վրա դրվում է դրոշմակնիք, նշվում միայն մուտքի ամսաթիվը, որից հետո դրանք թղթային տարբերակով, գրանցամատյանի գրանցմամբ ու ստորագրությամբ հանձնվում են աշխատակազմի համապատասխան կառուցվածքային ստորաբաժանումներին:

18. Օտար լեզուներով ստացված թղթակցությունը համակարգով հանձնվում է աշխատակազմի արտաքին կապերի վարչություն` թարգմանության, որից հետո ետ է վերադարձվում աշխատակազմի քարտուղարություն` սահմանված կարգով ընթացքն ապահովելու համար:

19. Էլեկտրոնային տարբերակով ստացված մտից փաստաթղթերը պետք է հաստատված լինեն ուղարկողի կամ համապատասխան պաշտոնատար անձի էլեկտրոնային թվային ստորագրությամբ:

20. Աշխատակազմ ստացված փաստաթղթի թղթային տարբերակի 1-ին էջի ներքևի աջ անկյունում դրվում է դրոշմակնիք, որի վրա նշվում է փաստաթղթի գրանցման մտից համարը և ամսաթիվը, որը պետք է համապատասխանի համակարգի համապատասխան մտից համարին և ամսաթվին:

21. Յուրաքանչյուր փաստաթուղթ գրանցվելուց, թղթային տարբերակի դեպքում` դրոշմակնիքը դրվելուց և պատկերամուտով (սկաներով) մուտքագրվելուց հետո համակարգով հանձնվում է աշխատակազմի քարտուղարության պետին:

22. Աշխատակազմի քարտուղարության պետը ստացված փաստաթուղթն ըստ բովանդակության համակարգով ուղարկում է մակագրության փաստաթղթում նշված հասցեատիրոջը` անհրաժեշտության դեպքում համակարգով տեղեկացնելով աշխատակազմի ղեկավարին:

23. Նախարարին ուղղված փաստաթղթերն աշխատակազմի քարտուղարության պետը կամ գործավարության կազմակերպման բաժնի պետը համակարգով հանձնում են աշխատակազմի ղեկավարին` նրա կողմից դրանք նախարարին մակագրության ուղարկելու համար:

24. Եթե մտից փաստաթուղթն ուղարկվել է ի պատասխան նախարարության որևէ ելից փաստաթղթի, որի վրա հստակ նշված են նախարարության ելից փաստաթղթի համարն ու ամսաթիվը, ապա աշխատակազմի քարտուղարության աշխատակիցը համակարգի «ի պատասխան (առնչվող) դաշտում» այն կցում է համապատասխան ելից փաստաթղթին: Նախարարության փաստաթղթի ելից համարի ու ամսաթվի բացակայության դեպքում կցումը կատարում է աշխատակազմի համապատասխան ստորաբաժանումը:

25. Համակարգի միջոցով փաստաթղթի սկզբնական վերջնաժամկետը նշանակվում է տվյալ աշխատանքի կատարման համար Հայաստանի Հանրապետության օրենսդրությամբ սահմանված ժամկետներին համապատասխան: Հասցեատերը փաստաթուղթը համապատասխան մակագրությամբ ուղարկելով կատարող ստորաբաժանման ղեկավարին` անհրաժեշտության դեպքում կարող է սահմանել կատարման առավել սեղմ ժամկետ` ընթացիկ վերջնաժամկետ:

26. Քաղաքացիների դիմումները, առաջարկությունները, բողոքները (այսուհետ` քաղաքացու դիմում) կից նյութերով քարտուղարության աշխատակիցը գրանցում է համակարգում` (բացառությամբ օրենսդրության նախատեսված դեպքերի) նշելով Հայաստանի Հանրապետության օրենսդրությամբ սահմանված և համակարգի կողմից պահանջվող տեղեկությունը: «Էլեկտրոնային տարբերակով» նախարարության «ՎԵԲ» կայքում ստացված քաղաքացիների դիմումները չեն գրանցվում և դրանց ընթացքն ապահովում է աշխատակազմի ներքին աուդիտի վարչությունը:

27. Նախարարության «ՎԵԲ» կայքով ստացված քաղաքացու դիմումին ընթացք տալու նպատակով աշխատակազմի ներքին աուդիտի վարչությունը համապատասխան զեկուցագրով դիմումը ներկայացնում է աշխատակազմի քարտուղարություն: Զեկուցագիրը սույն կարգով սահմանված ընթացակարգով գրանցվում և փոխանցվում է աշխատակազմի ղեկավարին` մակագրությամբ համապատասխան ստորաբաժանմանն ուղարկելու համար:

28. Համապատասխան ստորաբաժանումն ուսումնասիրելով քաղաքացու դիմումում բարձրացված խնդիրը, նախապատրաստում է պատասխանը և համակարգով ուղարկում աշխատակազմի ներքին աուդիտի վարչություն:

29. Աշխատակազմի ներքին աուդիտի վարչությունը թղթային տարբերակով ուղարկելու դեպքում պատասխանը հանձնում է աշխատակազմի քարտուղարություն` առաքման, իսկ էլեկտրոնային տարբերակով ուղարկման դեպքում` պատասխանն ուղարկում է քաղաքացու էլեկտրոնային հասցեով:

30. Քաղաքացու պատասխանն ուղարկելուց հետո աշխատակազմի ներքին աուդիտի վարչությունը համապատասխան հաղորդագրությամբ համակարգով դիմում է քարտուղարություն` գործն ավարտելու համար:

31. Քաղաքացիների դիմումներն ուսումնասիրվում և դրանց ընթացք են տրվում Հայաստանի Հանրապետության օրենսդրությամբ սահմանված կարգով և ժամկետներում:

32. Փաստաթղթերը ստորաբաժանումներին տրամադրվում են միայն էլեկտրոնային տարբերակով, իսկ թղթային տարբերակները պահպանվում են քարտուղարությունում` բացառությամբ սույն կարգով նախատեսված դեպքերի: Այն փաստաթղթերը, որոնք աշխատակազմի ղեկավարի և աշխատակազմի քարտուղարության պետի համաձայնությամբ ենթակա չեն մուտքագրման պատկերամուտով, հասցեատիրոջը և (կամ) աշխատակազմի ստորաբաժանումներին տրամադրվում են ստորագրությամբ` թղթային տարբերակով:

33. Թղթային տարբերակով ստացված Հայաստանի Հանրապետության օրենքների, Հայաստանի Հանրապետության Նախագահի հրամանագրերի ու կարգադրությունների, Հայաստանի Հանրապետության կառավարության, Հայաստանի Հանրապետության վարչապետի որոշումների և Հայաստանի Հանրապետության այլ իրավական ակտերի բնօրինակները գրանցամատյանով և ստորագրությամբ հանձնվում են աշխատակազմի իրավաբանական վարչություն` ի պահ:

34. Հանձնարարական տալու իրավասություն ունեցող պաշտոնատար անձին` նախարարին կամ տվյալ ստորաբաժանման գործունեության ոլորտի համակարգման պատասխանատու համարվող պաշտոնատար անձին` տեղակալին կամ աշխատակազմի ղեկավարին (այսուհետ` համակարգող) ուղղված ներքին շրջանառության (զեկուցագիր, տեղեկանք, դիմում և այլն) փաստաթղթերը, ինչպես նաև հանձնարարական տալու իրավասություն ունեցող պաշտոնատար անձի կողմից տրված հանձնարարականներն ու շրջաբերականները ստորագրությամբ և աշխատակազմի ղեկավարի նշագրումով` թղթային տարբերակով ներկայացվում են աշխատակազմի քարտուղարություն: Աշխատանքից ազատման դիմումը աշխատակազմի ղեկավարի նշագրմանը ներկայացնում է դիմումատուն` անձամբ:

35. Քարտուղարությունը, ներքին շրջանառության փաստաթուղթը սույն կարգով նախատեսված ընթացակարգով գրանցում, ըստ անհրաժեշտության պատկերամուտով մուտքագրում և փաստաթղթի կատարումն ապահովելու նպատակով հանձնում է տվյալ մարմնում համապատասխան հանձնարարական տալու իրավասություն ունեցող պաշտոնատար անձին (բացառությամբ հանձնարարականների և շրջաբերականների): Ստորաբաժանումների ղեկավարներին ուղղված` ստորաբաժանումների միջև կատարվող ներքին փաստաթղթաշրջանառությունն իրականացվում է համակարգով` նոր ելից փաստաթուղթ ձևավորելով:

36. Հանձնարարականներն ու շրջաբերականները սույն կարգով նախատեսված ընթացակարգով գրանցելուց, պատկերամուտով մուտքագրելուց հետո հանձնվում են քարտուղարության պետին: Քարտուղարության պետը «համաձայն կից ներկայացված հանձնարարականի» կոճակով փաստաթուղթն ուղարկում է հասցեատերերին, միաժամանակ տեղեկացնելով աշխատակազմի ղեկավարին, իսկ նախարարի կամ համակարգողի կողմից ստորագրված հանձնարարականների ու շրջաբերականների դեպքում նաև համակարգողին կամ նախարարին:

37. Աշխատակազմ մտից գրությունների, նամակների, հանձնարարականների և մյուս փաստաթղթերի կապակցությամբ նախարարը կարող է համակարգով աշխատակազմի ղեկավարին փոխանցել հանձնարարական` նշված փաստաթղթերի առնչությամբ նախարարի կամ աշխատակազմի ղեկավարի մոտ խորհրդակցություն հրավիրելու մասին:

III. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՔՆՆԱՐԿՄԱՆԸ ՆԵՐԿԱՅԱՑՎՈՂ ՆԱԽԱԳԾԵՐԻ ՆԱԽԱՊԱՏՐԱՍՏՈՒՄՆ ՈՒ ՇԱՐԺԸ

38. Հայաստանի Հանրապետության կառավարության գործունեության միջոցառումների ծրագրից բխող, ինչպես նաև իրավական այլ ակտերի` Հայաստանի Հանրապետության օրենքի, Հայաստանի Հանրապետության Նախագահի հրամանագրի կամ կարգադրության, Հայաստանի Հանրապետության կառավարության և Հայաստանի Հանրապետության վարչապետի որոշումների նախագծերը (այսուհետ` նախագիծ) նախապատրաստած աշխատակիցը դրանք ներկայացնում է կատարող ստորաբաժանման ղեկավարի հաստատմանը:

39. Կատարող ստորաբաժանման ղեկավարը փաստաթուղթը կարող է վերադարձնել աշխատակցին` խմբագրելու, թերությունները վերանայելու կամ լրամշակելու հանձնարարականով:

40. Աշխատակիցը լրամշակված փաստաթուղթը ներկայացնում է կատարող ստորաբաժանման ղեկավարի հաստատմանը:

41. Կատարող ստորաբաժանման ղեկավարը փաստաթուղթը ներկայացնում է շահագրգիռ ստորաբաժանումներին` կարծիք, այնուհետև իրավաբանական վարչություն` եզրակացություն ներկայացնելու համար:

42. Շահագրգիռ և իրավաբանական ստորաբաժանումների կարծիքներն ու եզրակացությունը ստանալուց հետո, կատարող ստորաբաժանման ղեկավարն այն ներկայացնում է համակարգողի համաձայնեցմանը:

43. Նախագծի վերաբերյալ սկզբունքային տարաձայնությունների առկայության դեպքում, շահագրգիռ կողմերի մասնակցությամբ, կատարող ստորաբաժանումում կամ համակարգողի կամ նախարարի մոտ հրավիրվում է խորհրդակցություն:

44. Խորհրդակցության արդյունքում նախագիծը կարող է ենթարկվել լրամշակման:

45. Խորհրդակցության արդյունքում լրամշակված նախագիծը կատարող ստորաբաժանումը ներկայացնում է շահագրգիռ ու իրավաբանական ստորաբաժանումների, այնուհետև համակարգողի համաձայնեցմանը:

46. Հայաստանի Հանրապետության կառավարության քննարկմանը ներկայացվող նախագիծը համակարգողն ուղարկում է նախարարի հաստատմանը:

47. Հայաստանի Հանրապետության կառավարության քննարկանը ներկայացվող նախագիծը և Հայաստանի Հանրապետության օրենսդրությամբ նախատեսված համապատասխան փաստաթղթերն էլեկտրոնային տարբերակով, սույն կարգով նախատեսված ընթացակարգով ներկայացվում է Հայաստանի Հանրապետության կառավարության աշխատակազմ:

IV. ՀԱՆՁՆԱՐԱՐԱԿԱՆՆԵՐԻ ԿԱՏԱՐՄԱՆ ԱՊԱՀՈՎՈՒՄԸ

48. Հայաստանի Հանրապետության կառավարության, Հայաստանի Հանրապետության կառավարության արձանագրային և Հայաստանի Հանրապետության վարչապետի որոշումներում առկա հանձնարարականների, Հայաստանի Հանրապետության նախարարական կոմիտեի նիստի և (կամ) Հայաստանի Հանրապետության վարչապետի մոտ հրավիրվող խորհրդակցությունների, Հայաստանի Հանրապետության վարչապետի մոտ միջազգային կազմակերպությունների ղեկավարների և (կամ) ներկայացուցիչների, ինչպես նաև օտարերկրյա պետությունների բարձրաստիճան պատվիրակությունների, Հայաստանի Հանրապետությունում հավատարմագրված դիվանագիտական առաքելությունների ղեկավարների հետ հանդիպումների արդյունքում տրված հանձնարարականների, Հայաստանի Հանրապետության վարչապետի կամ Հայաստանի Հանրապետության վարչապետի հանձնարարությամբ Հայաստանի Հանրապետության կառավարության աշխատակազմի ղեկավարի փոխանցած հանձնարարականների (այսուհետ` հանձնարարական) կատարման համար պատասխանատվություն կրում է պաշտոնատար այն անձը, ում հասցեագրված է հանձնարարականը:

49. Եթե հանձնարարականի կատարման համար պատասխանատվություն կրող պաշտոնատար անձը նախարարն է, ապա ստացված հանձնարարականը մակագրությամբ ուղարկվում է աշխատակազմի ղեկավարին` նրա կողմից նախարարին ուղարկելու համար: Մնացած դեպքերում, հանձնարարականն ուղարկվում է մակագրության պաշտոնատար այն անձին, ում հասցեագրված է հանձնարարականը:

50. Նախարարը կամ համակարգողը ստացված հանձնարարականը կարող է համակարգով «1-ին, 2-րդ......n-րդ կատարող(ներ)» մակագրությամբ` համապատասխան հանձնարարականներով փոխանցել աշխատակազմի մեկից ավելի ստորաբաժանումներին: Հանձնարարականների հավաքն իրականացնում է 1-ին կատարող նշանակված ստորաբաժանումը:

51. Եթե հանձնարարականի կատարման համար պատասխանատվություն կրող պաշտոնատար անձը նախարարն է, հավաքն իրականացնող ստորաբաժանման ղեկավարը ստորաբաժանումների կատարած աշխատանքի արդյունքում ձևավորված փաստաթուղթը ներկայացնում է համակարգողի համաձայնեցմանը, որից հետո համաձայնեցված փաստաթուղթը համակարգողը սույն կարգի 82-րդ կետով նախատեսված ընթացակարգով ուղարկում է աշխատակազմի ղեկավարին` այն նախարարին հանձնելու համար: Մնացած դեպքերում ձևավորված փաստաթուղթը ներկայացվում է համակարգողի հաստատմանը:

52. Հանձնարարականի հաստատված պատասխանը հանձնարարականների կատարման համար պատասխանատվություն կրող պաշտոնատար անձն ուղարկում է աշխատակազմի քարտուղարության պետին` հանձնարարականում նշված հասցեատիրոջն առաքումն ապահովելու համար:

53. Հանձնարարականում դրա կատարման ժամկետի բացակայության դեպքում, որպես հանձնարարականի կատարման սկզբնական վերջնաժամկետ սահմանվում է 15 աշխատանքային օրը:

54. Հանձնարարականների կատարման համար պատասխանատվություն կրող պաշտոնատար անձը կարող է սահմանել կատարման ընթացիկ վերջնաժամկետ, որը չի կարող գերազանցել հանձնարարականում նշված կամ օրենքով և այլ իրավական ակտերով նախատեսված ժամկետները:

55. Հանձնարարականը սահմանված ժամկետներում հիմնավոր պատճառներով չկատարելու դեպքում, հանձնարարականների կատարման համար պատասխանատվություն կրող պաշտոնատար անձը նախքան հանձնարարականի կատարման սկզբնական վերջնաժամկետը լրանալը կարող է միջանկյալ պատասխանով միջնորդել հանձնարարականը տված պաշտոնատար անձին` հանձնարարականում նախատեսված ժամկետը երկարաձգելու համար` նշելով իր կողմից առաջարկվող վերջնաժամկետը:

56. Հանձնարարականի կատարման ժամկետը երկարաձգելու մասին հանձնարարականը տված պաշտոնատար անձի համաձայնության դեպքում, հանձնարարականի կատարման ժամկետը երկարաձգվում է: Նախորդ հանձնարարականը համարվում է ավարտված ժամկետի փոփոխման վերաբերյալ նոր հանձնարարական ստանալուց և նախորդ հանձնարարականը նոր ստացված փաստաթղթին կցելուց հետո:

57. Հանձնարարականը համարվում է կատարված, եթե լուծված են դրանում բարձրացված բոլոր հարցերը կամ դրա վերաբերյալ տրվել է ըստ էության պատասխան կամ ընդունվել է հանձնարարականը տվողի կողմից:

V. ՆԱԽԱՐԱՐԻ ԵՎ ԱՇԽԱՏԱԿԱԶՄԻ ՂԵԿԱՎԱՐԻ ՀՐԱՄԱՆՆԵՐԻ ՆԱԽԱԳԾԵՐԻ ՆԱԽԱՊԱՏՐԱՍՏՈՒՄՆ ՈՒ ԴՐԱՆՑ ՇԱՐԺԸ

58. Նախարարի կամ աշխատակազմի ղեկավարի հանձնարարությամբ, կատարող ստորաբաժանման ղեկավարը կազմակերպում է նախարարի կամ աշխատակազմի ղեկավարի կողմից ընդունվող հրամանի նախագծի (այսուհետ` նախագիծ) նախապատրաստումը:

59. Կատարող ստորաբաժանման ղեկավարը, կարծիք ստանալու նպատակով նախագիծը համակարգով ուղարկում է շահագրգիռ և իրավաբանական ստորաբաժանումների ղեկավարներին, անհրաժեշտության դեպքում նաև ֆինանսատնտեսագիտական և հաշվապահական հաշվառման ստորաբաժանման ղեկավարին, որից հետո ստացված կարծիքներով նախագիծը ներկայացվում է համակարգողի և աշխատակազմի ղեկավարի համաձայնեցմանը:

60. Քարտուղարությունը, հիմք ընդունելով համակարգով ներկայացված համաձայնեցված տարբերակը, կատարող ստորաբաժանման ղեկավարին տվյալ հրամանի համար տրամադրում է հաշվառված ձևաթուղթ:

61. Աշխատակազմի քարտուղարությունում հաշվառված ձևաթուղթը գրանցվում է գրանցամատյանում և ստորագրությամբ հանձնվում ստորաբաժանման ղեկավարին:

62. Ստորաբաժանման ղեկավարը հաշվառված ձևաթղթի վրա տպված նախագիծը` ստորաբաժանման ղեկավարի, համակարգողի, աշխատակազմի շահագրգիռ, իրավաբանական, իսկ անհրաժեշտության դեպքում նաև ֆինանսատնտեսագիտական և հաշվապահական հաշվառման ստորաբաժանումների ղեկավարների նշագրումներով ներկայացնում է աշխատակազմի ղեկավարին:

63. Նախարարի կողմից ստորագրման ենթակա նախագծերը աշխատակազմի ղեկավարի կողմից` նշագրմամբ ներկայացվում են նախարարին:

64. Հրամանները տպագրվում են ներքոհիշյալ համարակալված ձևաթղթերի վրա`

1) Հայաստանի Հանրապետության արտակարգ իրավիճակների նախարարի հրաման,

2) Հայաստանի Հանրապետության արտակարգ իրավիճակների նախարարության աշխատակազմի ղեկավարի հրաման:

65. Հրամանների ձևաթղթերի կենտրոնացված հաշվառումն իրականացնում է աշխատակազմի քարտուղարությունը:

66. Համապատասխան ստորաբաժանման ղեկավարը, յուրաքանչյուր ամիս տեղեկատվություն է ներկայացնում քարտուղարության պետին` իր կողմից ստացված ձևաթղթերի և ստորագրված հրամանների թվաքանակի վերաբերյալ: Քարտուղարության պետն անհրաժեշտության դեպքում ստացված տեղեկատվության մասին տեղեկացնում է աշխատակազմի ղեկավարին:

67. Խոտանված հաշվառված ձևաթղթերը չեն ոչնչացվում և ետ են վերադարձվում քարտուղարության պետին:

68. Հաշվառված ձևաթղթերի վերջին էջի հակառակ երեսին համապատասխան ստորաբաժանման կողմից նշվում է այն հասցեատերերի ցանկը, որոնց պետք է առաքվի հրամանը, որից հետո ըստ հասցեատերերի քանակի, կից փաստաթղթերով ներկայացվում է քարտուղարություն` առաքման և (կամ) համապատասխան ստորաբաժանման կողմից պատրաստված շրջաբերական նամակով սույն կարգով նախատեսված ընթացակարգով ուղարկվում է հասցեատերերին:

69. Հրամանները ձևակերպվում են աշխատակազմի քարտուղարությունում, բացառությամբ կադրային հրամանների, որոնք ձևակերպվում են աշխատակազմի անձնակազմի կառավարման վարչությունում: Հրամանները գրանցվում են համապատասխան մատյաններում, բնօրինակները կարվում են առանձին գործերում:

70. Նախարարի և աշխատակազմի ղեկավարի հրամանները հաշվառվում են առանձին: Հրամանի համարը ձևավորվում է հերթական հաշվառման համարից, հրամանի բնույթի անվան առաջին տառից, իսկ անհատական հրամանների դեպքում նաև ստորագրողի պայմանանշից:

71. Յուրաքանչյուր տարվա համար հրամանների համարակալումները սկսվում են հունվար ամսվա առաջին հրամանից և ավարտվում տվյալ տարվա դեկտեմբերի վերջին հրամանով:

72. Նորմատիվ բնույթի հրամաններն ընդունվելու օրվան հաջորդող 7 օրվա ընթացքում ուղարկվում են Հայաստանի Հանրապետության արդարադատության նախարարություն` պետական իրավական փորձաքննության և պետական գրանցման: Հրամանները 3 բնօրինակից Հայաստանի Հանրապետության արդարադատության նախարարություն են ուղարկվում կից նամակով: Հրամանի յուրաքանչյուր օրինակը թելակարվում է և կնքվում նախարարության կնիքով:

73. Հրամանները ձևակերպվում են առանձին հաշվառման մատյաններում (այսուհետ` հաշվառման մատյաններ), որտեղ ըստ հերթականության նշվում են.

1) հրամանի հաշվառման հերթական համարը.

2) հրամանի տեսակը.

3) հրամանի վերնագիրը.

4) հրամանի ընդունման տարին, ամիսը, ամսաթիվը.

5) հրամանի ստորագրման տարին, ամիսը, ամսաթիվը.

6) հրամանի գործողության դադարեցման տարին, ամիսը, ամսաթիվը.

7) նորմատիվ բնույթի հրամանների հաշվառման դեպքում նշվում են նաև հրամանը պետական գրանցման ուղարկելու տարին, ամիսը, ամսաթիվը.

8) պետական գրանցումը մերժված հրամանը` փոփոխություններով, նորից պետական գրանցման ուղարկելու տարին, ամիսը, ամսաթիվը.

9) պետական գրանցում ստացած հրամանի հրապարակման տարին, ամիսը, ամսաթիվը:

74. Հաշվառման մատյանները խիստ հաշվառման ենթակա փաստաթղթեր են: Դրանք պետք է լինեն կարված (ժապավենված), իսկ թերթերը համարակալված: Թերթերի թիվը հաստատվում է նախարարի կամ աշխատակազմի ղեկավարի կնիքով:

75. Հաշվառման մատյաններում նշումները կատարվում են առանց կրճատումների, ջնջումների, պարզ ու ընթեռնելի ձեռագրով: Արգելվում է հրամաններում ուղղումներ և ջնջումներ, ինչպես նաև մատիտով գրանցումներ կատարել:

76. Չխախտելով հերթական հաշվառումը, ստորաբաժանումների նախապատրաստած հրամանները հաշվառվում, թղթային տարբերակով պահպանվում` արխիվացվում են քարտուղարությունում, անձնակազմի կառավարման բաժնի նախապատրաստած հրամանները` անձնակազմի կառավարման բաժնում:

VI. ԱՇԽԱՏԱԿԱԶՄԻ ԵԼԻՑ ՓԱՍՏԱԹՂԹԵՐԻ ՇԱՐԺՆ ՈՒ ԱՌԱՔՈՒՄԸ

77. Աշխատակազմի կատարող ստորաբաժանման կողմից ի պատասխան որևէ մտից փաստաթղթի ելից կամ նոր ելից փաստաթղթի նախապատրաստման դեպքում համակարգում աշխատողը լրացնում է անհրաժեշտ տեղեկությունը:

78. Նախարարի տեղակալների, աշխատակազմի ղեկավարի, աշխատակազմի ղեկավարի տեղակալի ստորագրությամբ ելից գրությունները, կատարող ստորաբաժանումն անհրաժեշտության դեպքում համակարգով ուղարկում է շահագրգիռ և իրավաբանական ստորաբաժանումների ղեկավարներին, որոնց կարծիքները ստանալուց հետո փաստաթուղթն ուղարկվում է ստորագրման` միաժամանակ տեղեկացնելով աշխատակազմի ղեկավարին: Նախարարի կողմից ստորագրվելիք ելից փաստաթղթերի դեպքում համապատասխան ստորաբաժանումների կարծիքները ստանալուց հետո այն ուղարկվում է համակարգողի համաձայնեցմանը:

79. Համաձայնեցված փաստաթուղթը համակարգողը էլեկտրոնային ձևաթղթով ուղարկում է նախարարին:

80. Ստորաբաժանման ղեկավարները կարող են ստորագրել քաղաքացիների դիմումների պատասխանները: Փաստաթղթերը նրանց կողմից ստորագրվում են միայն օրենսդրությամբ նախատեսված դեպքերում:

81. Համակարգով և թղթային տարբերակով նախարարի ստորագրությանն ու հաստատմանը ներկայացվող բոլոր փաստաթղթերը «ուղարկել նախարարին» կոճակով ուղարկվում է քարտուղարության պետին: Քարտուղարության պետը աշխատակազմի ղեկավարից ստացված փաստաթուղթն ուղարկում է նախարարի հաստատմանը, մնացած դեպքերում այն նախարարի հաստատմանն է ուղարկում աշխատակազմի ղեկավարի միջոցով: Մինչ նախարարի հաստատմանն ուղարկելը, քարտուղարության պետը փաստաթղթում անճշտություններ նկատելու դեպքում իրավասու է ետ վերադարձնել այն` վերախմբագրման:

82. Փաստաթուղթը համակարգով էլեկտրոնային ձևաթղթով նախարարի հաստատմանը ներկայացնելու հետ միաժամանակ, ըստ անհրաժեշտության, կատարող ստորաբաժանումը թղթային տարբերակով ձևաթուղթը ստորաբաժանման ղեկավարի և համակարգողի նշագրումով ներկայացնում է քարտուղարության պետին` նախարարի հաստատմանը ներկայացնելու համար:

 83. Գրությունը ստորագրած պաշտոնատար անձը` գրության էլեկտրոնային տարբերակն ուղարկում է աշխատակազմի քարտուղարության նամակագրության բաժին` ելքագրումն ու առաքումն ապահովելու համար: Մինչ ելքագրումը ընդհանուր բաժնի պետը անճշտություններ նկատելու դեպքում իրավասու է ետ վերադարձնել փաստաթուղթը` վերախմբագրման: Ելքագրման գործընթացն ավարտելուց հետո փաստաթղթի ելքագրման մասին տեղեկացվում է կատարողին:

84. Պետական այն մարմիններ, որոնց հետ իրականացվում է էլեկտրոնային փաստաթղթաշրջանառություն, փաստաթուղթն ուղարկվում է էլեկտրոնային առաքմամբ: էլեկտրոնային առաքումը կատարվում է աշխատակազմի քարտուղարության ընդհանուր բաժնի կողմից:

85. Էլեկտրոնային տարբերակով Հայաստանի Հանրապետության օրենսդրությամբ հրապարակման ոչ ենթակա փաստաթղթերի ելքագրման ժամանակ, որպես կից նյութ կցվում է միայն պաշտոնական գրությունը, իսկ առդիր թերթերն ու նյութերն ուղարկվում են թղթային տարբերակով, փակ ծրարով` այդ մասին նշում անելով պաշտոնական գրության մեջ:

86. Ելից փաստաթուղթը ստորագրելու իրավասություն ունեցող պաշտոնատար անձի կողմից հաստատված և ստորագրված փաստաթղթի թղթային տարբերակի առաքման համար, կատարող ստորաբաժանումը աշխատակազմի քարտուղարության նամակագրության բաժին է ներկայացնում ստորագրված ձևաթուղթը (կից նյութերով)` համապատասխան ելից համարով ու ամսաթվով: Թղթային տարբերակով առաքման համար վավեր էլեկտրոնային ստորագրություն ունեցող փաստաթղթի թղթային տարբերակը վավերացվում է աշխատակազմի քարտուղարության կնիքով:

87. Եթե ելից փաստաթուղթն ուղարկվում է ի պատասխան նախարարություն ստացված որևէ մտից փաստաթղթի, ապա համակարգի «ի պատասխան դաշտում» այն կցվում է համապատասխան մտից գրությանը:

88. Ելից փաստաթղթի հերթական համարը տրամադրվում է պետական կառավարման մարմնի կողմից սահմանված կարգով: Աշխատակազմի ելից փաստաթղթի համարը պետք է պարունակի առնվազն հետևյալ տեղեկությունները` ստորագրողի, կատարող ստորաբաժանման ղեկավարի և կատարողի պայմանանիշերը, փաստաթղթի հերթական համարը, տարեթիվը:

89. Նախարարության կառավարման ոլորտում գործող մարմնից, աշխատակազմի առանձնացված ստորաբաժանումներից, նախարարության կառավարմանը հանձնված կազմակերպություններից ստացված գրություններին «ի պատասխան» ուղարկվող գրությունների վրա կատարող ստորաբաժանման կողմից ձևաթղթի վերևի ձախ անկյունում նշվում է ստացված գրության համարը և ամսաթիվը:

90. Աշխատակազմում համակարգով մտից և ելից գրությունների, հանձնարարականների կատարման ժամկետների հսկողությունն իրականացնում է աշխատակազմի քարտուղարությունը:

91. Աշխատակազմի կատարող ստորաբաժանումում համակարգով մտից և ելից գրությունների, հանձնարարականների կատարման ժամկետների համար պատասխանատվություն է կրում տվյալ ստորաբաժանման ղեկավարը:

VII. ԱՌՑԱՆՑ ՆԱՄԱԿԱԳՐՈՒԹՅԱՆ ՀԱՄԱԿԱՐԳՈՎ ԴԻՄՈՒՄՆԵՐԻՆ ՏՐՎԱԾ ԸՆԹԱՑՔԻՆ ՀԵՏԵՎԵԼԸ

92. Դիմումներին տրված ընթացքին դիմումատուները կարող են հետևել առցանց նամակագրության համակարգով (այսուհետ` առցանց համակարգ):

93. Առցանց համակարգում դիմումատուի անձնական տվյալները (անունը, ազգանունը) մուտքագրվելուց հետո համակարգը ձևավորում է 12-նիշանոց ծածկագիր-համարը, որը կամ անձամբ տրվում է դիմումատուին կամ դիմումատուի նշած փոստային հասցեով ծանուցվում է նրան:

94. Նշված համարը մուտքագրելով դիմումատուն առցանց համակարգով կարող է տեսնել իր դիմումի կարգավիճակը, տվյալ մարմնում դիմումի ստացման ամսաթիվը, դիմումին պատասխանելու համար նախատեսված ժամկետը, ինչպես նաև այն պաշտոնատար անձի տվյալները, ում կարող է դիմել հարցերի դեպքում:

95. Եթե դիմումատուին պատասխանվել է, ապա առցանց համակարգով դիմումատուն կարող է տեսնել տրված պատասխանի ամսաթիվը, պատասխանի համարը, պատասխանը և այն պաշտոնատար անձի տվյալները, ում կարող է դիմել հարցերի դեպքում:

96. Դիմումների պատկերամուտով մուտքագրումը, դրանց շարժն ու ելքն իրականացվում է սույն գործավարության կարգով նախատեսված ընթացակարգով:

VIII. ՓԱՍՏԱԹՂԹԵՐԻ ԷԼԵԿՏՐՈՆԱՅԻՆ ՊԱՀՊԱՆՈՒՄՆ ՈՒ ԱՐԽԻՎԱՑՈՒՄԸ

97. Համակարգում ներառված ցանկացած փաստաթղթի գործողության ընթացքն ավարտվելուց հետո տվյալ փաստաթուղթը պահպանվում` արխիվացվում է համակարգում` 3 տարի ժամկետով:

98. Ցանկացած ժամանակ ըստ համակարգից օգտվելու հասանելիության` համակարգից օգտվողը կարող է մտից կամ ելից համարներով գտնել տվյալ փաստաթուղթը:

99. 3 տարին լրանալուց հետո նախարարությունն իր համակարգում պահպանված` արխիվացված բոլոր փաստաթղթերը էլեկտրոնային տարբերակով փոխանցում է Հայաստանի Հանրապետության կառավարության աշխատակազմում ստեղծված և վերջինիս կողմից վարվող կենտրոնական արխիվ: