ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

«ԷՔՍՏԵՌՆ ՓՈԽԱԴՐԱԿԱՆ ԵՎ ԱՎԱՐՏԱԿԱՆ ՔՆՆՈՒԹՅՈՒՆՆԵՐ ԿԱԶՄԱԿԵՐՊԵԼՈՒ» ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով ՀՀ «Կրթության մասին» օրենքի 3-րդ հոդվածի 26-րդ, 12-րդ հոդվածի 1-ին և 14-րդ հոդվածի 7-րդ կետը

Հրամայում եմ`

1. Հաստատել «Էքստեռն փոխադրական և ավարտական քննություններ կազմակերպելու» կարգը:

2. Նախարարության իրավաբանական բաժնին (պետ` Վ. Սարգսյան), միջնակարգ կրթության վարչությանը (պետ` Ա. Ավետիսյան).

հաստատված փաստաթուղթը 10-օրյա ժամկետում սահմանված կարգով պետական գրանցման ներկայացնել ՀՀ արդարադատության նախարարություն:

3. Հրամանի կատարման վերահսկողությունը հանձնարարել նախարարի տեղակալ Ա. Թոփուզյանին:

Է. Ղազարյան

Կ Ա Ր Գ

Էքստեռն փոխադրական եվ ավարտական քննություններ կազմակերպելու

Սույն կարգը մշակվել է ՀՀ «Կրթության մասին» օրենքի 3-րդ հոդվածի 26-րդ, 12-րդ հոդվածի 1-ին և 14-րդ հոդվածի 7-րդ կետերին համապատասխան

● Էքստեռն փոխադրական քննությունները եվ դրանց կազմակերպումը

1. Հանրակրթական դպրոցի աշակերտների համար Էքստեռն փոխադրական քննություններ (հանրակրթական ծրագրի յուրացման նորմատիվ ժամկետների փոփոխություն) կազմակերպվում են` ելնելով աշակերտի կողմից հանրակրթական ծրագրերի յուրացման փաստացի մակարդակից:

2. Էքստեռն փոխադրական քննություններ կազմակերպվում են բացառապես դպրոցների այն աշակերտների համար, ովքեր նախորդ դասարաններում ունեցել են գերազանց առաջադիմություն և ցուցաբերել են հատուկ օժտվածություն որևէ առարկայից:

3. Հանրակրթական դպրոցների 8-րդ դասարանի աշակերտների համար Էքստեռն փոխադրական քննությունների կազմակերպում չի թույլատրվում:

4. Հանրակրթական դպրոցի առաջինից յոթերորդ և իններորդ դասարանների աշակերտների համար Էքստեռն փոխադրական քննություններ կազմակերպվում են դպրոցի մանկավարժական խորհրդի ներկայացմամբ, ՀՀ կրթության և գիտության նախարարության հանձնաժողովի թույլտվությամբ:

(4-րդ կետի գործողությունը մասնակի կասեցված է 21.12.01 N 556-Մ)

5. Աշակերտների համար Էքստեռն փոխադրական քննությունները կազմակերպվում են դպրոցում` հետևյալ ընթացակարգով.

5.1 Երկրորդից յոթերորդ դասարանների աշակերտների համար` մինչև տվյալ ուսումնական տարվա հունիսի 10-ը, իսկ առաջին և իններորդ դասարանների աշակերտների համար` մինչև տվյալ ուսումնական տարվա հունվարի 10-ը, աշակերտի ծնողը, դասղեկը և երեքից ոչ պակաս դասարանից դասարան վաղաժամկետ փոխադրելու խնդրանքով:

(5.1-ին կետի գործողությունը մասնակի կասեցված է 21.12.01 N 556-Մ)

5.2 Երկրորդից յոթերորդ դասարանների աշակերտի համար` մինչև տվյալ ուսումնական տարվա հունիսի 20-ը, իսկ առաջին և իններորդ դասարանների աշակերտների համար` մինչև տվյալ ուսումնական տարվա ուսումնական տարվա հունվարի 15-ը դիմումը քննարկվում է դպրոցի մանկավարժական խորհրդի նիստում:

Մանկավարժական խորհուրդը քննարկման հիման վրա ընդունում է որոշում երաշխավորելու ու կրթության և գիտության նախարարությանը միջնորդելու աշակերտին դասարանից դասարան վաղաժամկետ փոխադրելու վերաբերյալ:

Մանկավարժական խորհրդի որոշումը դպրոցի տնօրենի կից գրությամբ, աշակերտի առաջադիմության վերաբերյալ փաստաթղթերի հետ միասին ներկայացնում է ՀՀ կրթության և գիտության նախարարություն և մարզպետարանի (Երևանի քաղաքապետարանի) կրթության վարչություն:

(5.2-րդ կետի գործողությունը մասնակի կասեցված է 21.12.01 N 556-Մ)

5.3 Երկրորդից յոթերորդ դասարանների աշակերտների համար` մինչև տվյալ ուսումնական տարվա հունիսի 30-ը, իսկ առաջին և իններորդ դասարանների աշակերտների համար` մինչև տվյալ ուսումնական տարվա հունվարի 20-ը.

- դպրոցի մանկավարժական խորհրդի կողմից երաշխավորված աշակերտների դասարանից դասարան վաղաժամկետ փոխադրելու հարցը քննարկվում է ՀՀ կրթության և գիտության նախարարությունում` նախարարի հրամանով ստեղծված հանձնաժողովի կողմից` աշակերտի հետ վարվող հարցազրույցի միջոցով:

- Որպես կանոն հանձնաժողովը նախագահում է ՀՀ կրթության և գիտության նախարարը: Հարցազրույցին ներկա է գտնվում համապատասխան դպրոցի տնօրենը:

(5.3-րդ կետի գործողությունը մասնակի կասեցված է 21.12.01 N 556-Մ) 

5.4 Հանձնաժողովի դրական եզրակացության դեպքում աշակերտը իրավունք է ստանում մասնակցելու էքստեռն փոխադրական քննություններին, որոնք անցկացվում են դպրոցում` ըստ դպրոցի տնօրենի կողմից նախօրոք հաստատված ժամանակացույցի և քննական հանձնաժողովների. երկրորդից յոթերորդ դասարանների աշակերտների համար` տվյալ ուսումնական տարվա օգոստոսի 15-ից 30-ը ժամանակահատվածում, հաջորդ դասարանի բոլոր ուսումնական առարկաների ծրագրային նյութից, իսկ առաջին և իններորդ դասարանների աշակերտների համար` տվյալ ուսումնական տարվա հունվարի 25-ից փետրվարի 15-ը ժամանակահատվածում, տվյալ դասարանի երկրորդ կիսամյակի և հաջորդ դասարանի առաջին կիսամյակի բոլոր ուսումնական առարկաների ծրագրային նյութից:

Հայոց լեզու, մաթեմատիկա, ֆիզիկա, քիմիա, ռուսաց լեզու առարկաների քննությունները անց են կացվում գրավոր, իսկ մնացած առարկաների քննությունները` ըստ դպրոցի մանկավարժական խորհրդի որոշման:

(5.4-րդ կետի գործողությունը մասնակի կասեցված է 21.12.01 N 556-Մ) 

5.5 Քննություններին մասնակցում է մարզային կրթության վարչության ներկայացուցիչը:

6. Փոխադրական բոլոր քննություններից միայն «լավ» և «գերազանց» գնահատականներ ստանալու դեպքում դպրոցի մանկավարժական խորհուրդը որոշում է կայացնում աշակերտին դասարանից դասարան վաղաժամկետ փոխադրելու մասին:

7. Դպրոցի տնօրենը մանկավարժական խորհրդի որոշման հիման վրա աշակերտին հրամանով փոխադրում է հաջորդ դասարան և պաշտոնապես տեղեկացնում նախարարությանը և մարզպետարանի (Երևանի քաղաքապետարանի) կրթության վարչությանը:

8. Դասարանից դասարան վաղաժամկետ փոխադրված աշակերտների գնահատականները համարվում են կիսամյակային (տարեկան) ամփոփիչ գնահատականներ:

● Էքստեռն ավարտական քննությունները եվ դրանց կազմակերպումը

9. Էքստեռն ավարտական քննությունները կազմակերպվում են հիմնական (ութամյա) և միջնակարգ կրթական ծրագրերին համապատասխան:

10. Էքստեռն ավարտական քննություններին կարող են մասնակցել և Էքստեռն կարգով հիմնական և միջնակարգ կրթության ավարտական վկայական (ատեստատ) ստանալ հանրակրթության համակարգից դուրս, ինքնակրթությամբ զբաղված անձինք:

11. Էքստեռն ավարտական քննությունները կազմակերպվում են ՀՀ մարզպետարաններում (Երևան քաղաքում), էքստեռն ավարտական քննություններ կազմակերպելու իրավունք վերապահված դպրոցներում: Դպրոցները ընտրվում են ՀՀ կրթության և գիտության նախարարության կողմից, մարզպետարանների (Երևանի քաղաքապետարան) կրթության վարչությունների ներկայացմամբ:

12. Հատուկ կրթության ենթակա երեխաների համար էքստեռն ավարտական քննություններ կազմակերպվում են նախարարության թույլտվությամբ, համապատասխան դպրոցում:

13. Էքստեռն քննություններ հանձնել ցանկացողները մինչև տվյալ ուսումնական տարվա մայիսի 5-ը ներառյալ դիմում են մարզկենտրոններում էքստեռն քննություններ ընդունելու իրավունք վերապահված դպրոցների տնօրեններին: Դիմումի հետ ներկայացվում են հետևյալ փաստաթղթերը`

● 8-ամյա (հիմնական) կրթության վկայական ստանալու համար.

ա) անձը հաստատող փաստաթուղթ

բ) տեղեկանք նախնական կրթության մասին

● միջնակարգ կրթության վկայական ստանալու համար.

ա) 8-ամյա կրթության վկայական (բնօրինակը)

բ) անձը հաստատող փաստաթուղթ:

Դիմորդների ցուցակները և ներկայացված փաստաթղթերը մինչև մայիսի 10-ը ներկայացվում են նախարարություն, փաստաթղթերի ուսումնասիրության և սահմանված կարգին համապատասխան քննություններին թույլատրելու համար:

14. Էքստեռն քննություններ անց են կացվում մայիսի 20-ից հունիսի 15-ը` ըստ նախարարության կողմից հաստատված ժամանակացույցերի:

Ժամանակացույցով հայոց լեզու և մաթեմատիկա առարկաների պետական քննություններն անցկացվում են հանրակրթական հաստատությունների տվյալ ուսումնական տարվա ավարտական քննությունների միասնական օրերին` ՀՀ կրթության և գիտության նախարարության կողմից կազմած քննական առաջադրանքներով և կարգով:

10-րդ դասարանում հայոց պատմություն, բնագիտություն (ֆիզիկա, քիմիա, կենսաբանություն), հայ. գրականություն, ռուսաց կամ օտար լեզուներ քննություններն անցկացվում են նախարարության կողմից հաստատված հարցատոմսերով: Մնացած առարկաների քննական տոմսերը կազմում են դպրոցների առարկայական մեթոդմիավորումները, առարկայական ծրագրերին համապատասխան:

15. Նախորդ տարում կրթության համակարգից դուրս մնացած դրսեկների տարեկան և քննական դրական գնահատականները պահպանվում են: Այդ դրսեկները էքստեռն ավարտական քննություններ են հանձնում միայն այն առարկաներից, որոնցից չեն գնահատվել կամ ունեցել են անբավարար գնահատականներ:

16. Նախորդ տարում էքստեռն կարգով ավարտական քննություններ հանձնած դրսեկների ստացած քննական դրական գնահատականները պահպանվում են և նրանք քննություններ են հանձնում միայն այն առարկաներից, որոնցից քննություններ չեն հանձնել կամ ստացել են քննական անբավարար գնահատականներ:

17. Քննությունների հանձնաժողովները կազմում են դպրոցների տնօրենները` հետևյալ սկզբունքով.

ա) ութերորդ դասարանի համար` նախագահ և հանձնաժողովի երկու անդամ,

բ) տասներորդ դասարանի համար` նախագահ և հանձնաժողովի երեք անդամ,

գ) յուրաքանչյուր հանձնաժողովի կազմում առնվազն մեկ անդամ ընդգրկվում է մարզի այլ դպրոցներից, մարզպետարանի (Երևանի քաղաքապետարանի) կրթության վարչության ներկայացմամբ:

18. Բոլոր քննություններից դրական գնահատականներ ստացողներին քննությունները կազմակերպող դպրոցը սահմանված կարգով տալիս է 8-ամյա կամ միջնակարգ կրթության ավարտական վկայական` «Էքստեռն» նշումով:

19. Էքստեռն կարգով ավարտողները գովասանագրով կամ մեդալով չեն պարգևատրվում:

20. Էքստեռն կարգով ավարտողներին տրված ավարտական վկայականները գրանցվում են սահմանված ձևի մատյաններում «Էքստեռն» նշումով:

21. Գրանցման մատյանը, քննությունների ամփոփագրերը և քննական գրավոր աշխատանքները պահվում են քննությունները կազմակերպող դպրոցում:

(կարգը փոփ. 21.12.01 N 556-Մ) 

Գրանցված է
Հայաստանի Հանրապետության
արդարադատության նախարարության կողմից
19 հունվարի 2000 թ.
Պետական գրանցման թիվ 11000004