112.0101.15.03.02

«Գրանցված է»

ՀՀ արդարադատության

նախարարության կողմից

20 մարտի 2002 թ.

Պետական գրանցման թիվ 11202055

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

«ՆԵՐՔԻՆ ԳՈՐԾԵՐԻ ՄԱՐՄԻՆՆԵՐԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՔԱՂԱՔԱՑԻԱԿԱՆ ՈՒ ԾԱՌԱՅՈՂԱԿԱՆ ԶԵՆՔԻ ԵՎ ԴՐԱ ՓԱՄՓՈՒՇՏՆԵՐԻ ՇՐՋԱՆԱՌՈՒԹՅԱՆ ՆԿԱՏՄԱՄԲ ԻՐԱԿԱՆԱՑՎՈՂ ՎԵՐԱՀՍԿՈՂՈՒԹՅԱՆ ԿԱՐԳԻ ՄԱՍԻՆ»

«Զենքի մասին» Հայաստանի Հանրապետության օրենքի 29 հոդվածի համաձայն և ի կատարումն Հայաստանի Հանրապետության կառավարության 1999 թ. հոկտեմբերի 26-ի «Հայաստանի Հանրապետության տարածքում քաղաքացիական ու ծառայողական զենքի և դրա փամփուշտների շրջանառությունը կարգավորելու մասին» թիվ 673 որոշման 7-րդ կետի «ա» և «գ» ենթակետերի պահանջների՝ ներքին գործերի մարմինների կողմից Հայաստանի Հանրապետության տարածքում քաղաքացիական ու ծառայողական զենքի և դրա փամփուշտների շրջանառության նկատմամբ վերահսկողություն իրականացնելու նպատակով.

Հրամայում եմ`

1. Հաստատել «Ներքին գործերի մարմինների կողմից Հայաստանի Հանրապետության տարածքում քաղաքացիական ու ծառայողական զենքի և դրա փամփուշտների շրջանառության նկատմամբ իրականացվող վերահսկողության կարգի մասին» հրահանգը:

2. ՀԿԱ, մարզային, Երևան քաղաքի և Տրանսպորտային ՆԳ վարչությունների պետերին.

Սույն հրամանը իրազեկել ողջ անձնակազմին և թույլտվության համակարգի աշխատանքները կազմակերպել հրամանի պահանջներին համապատասխան:

3. ՆԳՆ ՀԿԱ վարչությանը (պետ`  Տ.Բաղդասարյան).

3.1 ՆԳ մարմինների թույլտվության համակարգի աշխատակիցների համար ՀԿԱ վարչությունում կազմակերպել սեմինար պարապմունքներ:

3.2 2002 թ. առաջին կիսամյակում զենքի հետ առնչվող թույլտվության համակարգի օբյեկտներում կատարել համալիր գույքագրումներ, նրանց ապահովել անհրաժեշտ քանակությամբ մատյաններով և ձևաթղթերով:

4. ՆԳՆ տնտեսական վարչությանը (պետ` Ա. Պողոսյան).

Տպագրել անհրաժեշտ քանակությամբ հրահանգներ և հրահանգով նախատեսվող մատյաններ և ձևաթղթեր:

5. ՈՒժը կորցրած ճանաչել ՀՀ ՆԳ և ԱԱ նախարարի 1999 թ. ապրիլի 13-ի թիվ 149 ՆԳ հրամանը:

6. Սույն հրամանի կատարման հսկողությունը դնել ՆԳ նախարարի տեղակալ, միլ. գեներալ-մայոր` Հ. Վարյանի վրա:

Հ Ր Ա Հ Ա Ն Գ

Ներքին գործերի մարմինների կողմից Հայաստանի Հանրապետության տարածքում քաղաքացիական ու ծառայողական զենքի եվ դրա փամփուշտների շրջանառության նկատմամբ իրականացվող վերահսկողության կարգի մասին

I. Ընդհանուր դրույթներ

1. Սույն հրահանգը՝ մշակված է համաձայն «Զենքի մասին» ՀՀ  օրենքի և ՀՀ կառավարության 1999 թ. հոկտեմբերի 26-ի «Հայաստանի Հանրապետության տարածքում քաղաքացիական ու ծառայողական զենքի և դրա փամփուշտների շրջանառությունը կարգավորելու մասին» N 673 որոշման 7-րդ կետի «ա» և «գ» ենթակետերի կանոնակարգում է քաղաքացիական ու ծառայողական զենքի և դրանց փամփուշտների առևտրի, ձեռք բերելու, հավաքածուներ կազմելու կամ ցուցադրելու համար նախատեսվող լիցենզիաները ձևակերպելու և տալու, դրանց գործողության ժամկետները երկարաձգելու կամ անվավեր ճանաչելու կարգը, ինչպես նաև՝ զենք և փամփուշտներ պահելու, պահելու և օգտագործելու, պահելու և կրելու, Հայաստանի Հանրապետության տարածք զենք և փամփուշտներ ներկրելու և Հայաստանի Հանրապետությունից դրանք արտահանելու, զենք և փամփուշտներ փոխադրելու նախատեսվող թույլտվություններ տալու կարգը:

Սույն հրահանգը սահմանում է զենքի և փամփուշտների շրջանառության վերահսկողության ոլորտում գործառույթներ իրականացնող ՆԳ մարմինների պետական լիազոր պաշտոնատար անձանց իրավասությունները, որոշում է զենքի օգտագործման հետ կապված իրավաբանական անձանց ու քաղաքացիների պարտավորությունները, զենքի հետ անվտանգ վարվելու միջոցառումները, ինչպես նաև՝ զենքի և փամփուշտների հաշվառման պարտադիր պահանջները։

II. Լիցենզիաներ ԵՎ թույլտվություններ տալու ՆԳ մարմինների լիազորությունները

2. Համաձայն «Զենքի մասին» ՀՀ օրենքի 9-րդ հոդվածի, տարածքային ՆԳ բաժինները (բաժանմունքները) իրենց կողմից սպասարկվող վարչական տարածքում տալիս են՝

2.1. Հայաստանի Հանրապետության քաղաքացիներին՝ ողորկ-երկարափող հրազեն կամ 7,5 ջոուլից ավելի փողային էներգիայով օդաճնշիչ զենք ձեռքբերելու լիցենզիաներ՝ 6 ամիս գործողության ժամկետով:

2.2. Հայաստանի Հանրապետության քաղաքացիներին՝ ինքնապաշտպանական ողորկափող հրազեն պահելու (առանց կրելու իրավունքի) թույլտվություն 5 տարի գործողության ժամկետով կամ նույն ժամկետով երկարաձգելու համար:

2.3. Հայաստանի Հանրապետության քաղաքացիներին՝ ողորկափող հրազեն, 7,5 ջոուլից ավելի փողային էներգիայով օդաճնշիչ զենք, սպորտային ողորկափող հրազեն պահելու և կրելու թույլտվություններ 5 տարի գործողության ժամկետով կամ նույն ժամկետով երկարաձգելու համար:

Լիցենզիաների և թույլտվությունների ստորագրման իրավունքը  վերապահվում է այն ձևակերպած ՆԳ բաժնի (բաժանմունքի) պետական լիազոր պաշտոնատար անձանց:

3. Երևան քաղաքի և մարզային ՆԳ վարչությունները իրենց կողմից սպասարկվող վարչական տարածքում տալիս են 2.1 և 2.2 կետերում նշված լիցենզիաներ և թույլտվություններ, հետագայում տարածքային ՆԳ մարմնին պարտադիր տեղեկացման պայմանով:

Լիցենզիաների և թույլտվությունների ստորագրման իրավունքը  վերապահվում է ՆԳ վարչության պետին կամ նրա տեղեկալին:

4. ՀՀ ՆԳ նախարարության  հասարակական կարգի ապահովման (այսուհետև՝ ՀԿԱ) վարչությունը ՀՀ տարածքում, ամբողջ ծավալով հսկողություն է իրականացնում զենքի շրջանառության նկատմամբ և տալիս է «Զենքի մասին» ՀՀ օրենքով նախատեսված հետևյալ լիցենզիաներն ու թույլտվությունները.

4.1. Քաղաքացիական և ծառայողական զենքի առևտուր իրականացնելու լիցենզիա՝

ա) 3 տարի գործողության ժամկետով

բ) 5 տարով երկարաձգելու համար

4.2. Զենքի առևտրի լիցենզիա ունեցող իրավաբանական անձանց՝ Հայաստանի Հանրապետությունից դուրս քաղաքացիական և ծառայողական զենք ձեռք բերելու լիցենզիա (6 ամիս գործողության ժամկետով)՝

ա) յուրաքանչյուր միավոր գազային զենքի (ատրճանակ կամ թմբուկավոր ռևոլվեր), 7,5 ջոուլից ոչ ավելի փողային էներգիայով օդաճնշիչ, ազդանշանային, անփող կամ նետողական ու սառը շեղբավոր զենքի համար

բ) յուրաքանչյուր միավոր ողորկ-երկարափող հրազենի կամ 7,5 ջոուլից ավելի փողային էներգիայով օդաճնշիչ զենքի համար

գ) յուրաքանչյուր միավոր ծառայողական կարճափող, քաղաքացիական ակոսափող կամ համակցված հրազենի համար

դ) հրազենի և գազային զենքի 100-ական փամփուշտներից և ռազմամթերքից բաղկացած յուրաքանչյուր խմբաքանակի համար:

4.3. Զենքի առևտրի լիցենզիա ունեցող իրավաբանական անձանց՝ Հայաստանի Հանրապետության տարածքում քաղաքացիական և ծառայողական զենք ձեռք բերելու լիցենզիա (6 ամիս գործողության ժամկետով)՝

ա) յուրաքանչյուր միավոր գազային զենքի (ատրճանակ կամ թմբուկավոր ռևոլվեր), 7,5 ջոուլից ոչ ավելի փողային էներգիայով օդաճնշիչ, ազդանշանային, անփող կամ նետողական ու սառը շեղբավոր զենքի համար

բ) յուրաքանչյուր միավոր ողորկ-երկարափող հրազենի կամ 7,5 ջոուլից ավելի փողային էներգիայով օդաճնշիչ զենքի համար

գ) յուրաքանչյուր միավոր ծառայողական կարճափող, քաղաքացիական ակոսափող կամ համակցված հրազենի համար:

4.4. Քաղաքացիական կամ ծառայողական զենք ձեռք բերելու իրավունք ունեցող իրավաբանական անձանց՝ զենք ձեռք բերելու լիցենզիա՝

ա) յուրաքանչյուր միավոր նետողական կամ սառը շեղբավոր զենքի համար

բ) յուրաքանչյուր միավոր գազային զենքի (ատրճանակ կամ թմբուկավոր ռևոլվեր), ազդանշանային, անփող, ողորկ-երկարափող, 7,5 ջոուլից ավելի փողային էներգիայով օդաճնշիչ զենքի համար

գ) յուրաքանչյուր միավոր ակոսափող, համակցված կամ կարճ ակոսափող զենքի համար:

4.5. Զենքի հավաքածու կազմելու լիցենզիա՝

ա) 3 տարի գործողության ժամկետով

բ) 5 տարի երկարաձգելու համար:

4.6. Զենքի հավաքածու ցուցադրելու լիցենզիա՝

ա) 3 տարի գործողության ժամկետով

բ) 5 տարի երկարաձգելու համար:

4.7. Քաղաքացիական և ծառայողական կամ մարտական զենքի առանձին տեսակներ պահելու և օգտագործելու թույլտվություն՝

ա) 3 տարի գործողության ժամկետով

բ) 5 տարի երկարաձգելու համար:

4.8. Քաղաքացիական և ծառայողական զենք և դրանց փամփուշտներ ներկրելու (արտահանելու) թույլտվություն (6 ամիս գործողության ժամկետով կամ նույն ժամկետով երկարաձգելու համար):

4.9. Հայաստանի Հանրապետության քաղաքացիներին՝ յուրաքանչյուր միավոր քաղաքացիական զենք ձեռք բերելու լիցենզիա՝

ա) գազային զենքի (ատրճանակ կամ թմբուկավոր ռևոլվեր), անփող հրազենի, ազդանշանային զենքի համար (5 տարի գործողության ժամկետով կամ 5 տարով երկարաձգելու համար)

բ) ողորկ-երկարափող հրազենի կամ 7,5 ջոուլից ավելի փողային էներգիայով օդաճնշիչ զենքի համար (6 ամիս գործողության ժամկետով)

գ) որսորդական ակոսափող կամ համակցված հրազենի համար (6 ամիս գործողության ժամկետով):

4.10. Օտարերկրյա քաղաքացիներին՝ Հայաստանի Հանրապետությունում քաղաքացիական զենք ձեռք բերելու լիցենզիա (5 օր գործողության ժամկետով)՝

ա) մեկ միավոր նետողական կամ սառը շեղբավոր զենքի համար

բ) մեկ միավոր գազային զենքի (ատրճանակ կամ թմբուկավոր ռևոլվեր), անփող հրազենի ազդանշանային զենքի համար

գ) մեկ միավոր ողորկ-երկարափող հրազենի կամ 7,5 ջոուլից ավելի փողային էներգիայով օդաճնշիչ զենքի համար

դ) մեկ միավոր ակոսափող կամ համակցված հրազենի համար:

4.11. Հայաստանի Հանրապետության քաղաքացիներին՝ զենքի հավաքածու կազմելու լիցենզիա՝

ա) 3 տարի գործողության ժամկետով

բ) 5 տարի երկարաձգելու համար:

4.13. Հայաստանի Հանրապետության քաղաքացիներին՝ զենքի հավաքածու ցուցադրելու լիցենզիա՝

ա) 3 տարի գործողության ժամկետով

բ) 5 տարի երկարաձգելու համար:

4.14. Հայաստանի Հանրապետության քաղաքացիներին՝ ինքնապաշտպանական ողորկ-երկարափող հրազեն պահելու (առանց կրելու իրավունքի) թույլտվություն (5 տարի գործողության ժամկետով կամ նույն ժամկետով երկարաձգելու համար):

4.15. Հայաստանի Հանրապետության քաղաքացիներին՝ հրազեն, օդաճնշիչ զենք, սպորտային ողորկափող հրազեն պահելու և կրելու թույլտվություն (5 տարի գործողության ժամկետով կամ 5 տարով երկարաձգելու համար):

4.16. Ծառայողական պարտականությունների կատարման ժամանակ ծառայողական, այդ թվում նաև՝ մարտական զենքի առանձին տեսակներ պահելու և կրելու թույլտվություն (մինչև 3 տարի գործողության ժամկետով կամ մինչև 5 տարով երկարաձգելու համար):

4.17. Քաղաքացիական և պարգևատրական զենք և դրանց փամփուշտներ ներկրելու (արտահանելու) թույլտվություն (մինչև 2 ամիս գործողության ժամկետով կամ մինչև 2 ամիս երկարաձգելու համար):

4.18. Օտարերկրյա քաղաքացիներին՝ քաղաքացիական զենք և դրանց փամփուշտներ արտահանելու թույլտվություն (5 օր գործողության ժամկետով):

5. ՀԿԱ վարչության կողմից 4.9 կետի «բ» ենթակետում նշված լիցենզիան, ինչպես նաև՝ 4.14 և 4.15 կետերում նշված թույլտվությունները տալու դեպքում, հետագա հաշվառման համար նյութերն ուղարկվում են զենքի սեփականատիրոջ բնակության վայրի կամ իրավաբանական անձի գտնվելու վայրի տարածքային ՆԳ մարմին:

Լիցենզիաների (բացառությամբ քաղաքացիական և ծառայողական զենքի առևտրի)  և թույլտվությունների ստորագրման իրավունքը վերապահվում է վարչության պետին կամ նրա տեղակալին:

6. Սույն հրահանգով նախատեսված լիցենզիաների, թույլտվությունների և այլ ձևաթղթերը (հավելված 1-23) կենտրոնացված պատվիրում են ՀՀ ՆԳՆ ՀԿԱ վարչության կողմից:

III. Լիցենզիաներ եվ թույլտվություններ տալու համար անհրաժեշտ փաստաթղթերը ընդունելու, ուսումնասիրելու ու ձեվակերպելու կարգը

7. լիցենզիաներ տալու համար ներկայացվող փաստաթղթերը ուսումնասիրվում, ձևակերպվում և հանձնվում են դիմումատուին դիմում ներկայացնելու օրվանից` մեկամսյա ժամկետում, իսկ թույլտվություններինը` մեկ շաբաթյա ժամկետում։

(7-րդ կետը խմբ. 10.10.06 N 7-Ն)

8. Լիցենզիաներն ու թույլտվությունները տրվում, կամ գործողության ժամկետները երկարաձգվում են «Պետական տուրքի մասին» ՀՀ օրենքով սահմանված պետական տուրքը վճարելուց հետո:

9. ՆԳ մարմիններն ազատվում են զենք ձեռք բերելու լիցենզիաների, ինչպես նաև  զենք պահելու և օգտագործելու թույլտվությունների համար նախատեսված պետական տուրքի վճարումներից:

10. Զենքով պարգևատրված անձինք, ՀՀ Ազգային ժողովի պատգամավորները, ՀՀ սահմանադրական դատարանի անդամները, ՀՀ կառավարության անդամները, դատավորները, դատախազները, քննիչները, գլխավոր դատախազի որոշմամբ՝ դատախազության մյուս աշխատողները, ինչպես նաև՝ պետական ռազմականացված կազմակերպությունների զինծառայողները և կենսաթոշակի անցած աշխատակիցներն ազատվում են իրենց ժամանակավորապես հատկացված զենքը պահելու և կրելու թույլտվության համար նախատեսված պետական տուրքի վճարումից:

11. Օտարերկրյա քաղաքացիների կողմից մարզական միջոցառումներին մասնակցելու, որսորդությամբ զբաղվելու, ցուցադրելու նպատակով իրենց պատկանող զենքն ու փամփուշտները ՀՀ տարածք ներկրելու մասին դիմումները ներկայացնում են նրանց հետ պայմանագիր կնքած, կամ սահմանված կարգով հրավերք ուղարկած իրավաբանական անձի միջոցով։

ՀՀ տարածքում քաղաքացիական զենք և փամփուշտներ ձեռք բերելու լիցենզիա, ինչպես նաև՝ Հայաստանի Հանրապետությունից դրանք արտահանելու թույլտվություն ստանալու համար օտարերկրյա քաղաքացիները ՀՀ ՆԳՆ ՀԿԱ վարչություն ներկայացնում են իրենց երկրի դիվանագիտական ներկայացուցչության կամ հյուպատոսության միջնորդությունը։

12. Քաղաքացիների և իրավաբանական անձանց կողմից ներկայացված դիմումները, նրանց մասին տեղեկությունները գրանցվում են «դիմումները գրանցելու և տրված լիցենզիաներն ու թույլտվությունները հաշվառելու» մատյանում (հավելված 24)։ Մատյանում գրանցվում են նաև ներկայացված փաստաթղթերի անվանումներն ու նրանց ուսումնասիրությունների արդյունքները, նշում է կատարվում լիցենզիա կամ թույլտվություն տալու վերաբերյալ, իսկ մերժելու դեպքում՝ նշվում են պատճառները (հավելված 25)։

Գրանցման ժամանակ ստուգվում են քաղաքացիների դիմումներում նշված անձնագրային տվյալները, իսկ իրավաբանական անձանցից ստացված նյութերում ստուգվում են կանոնադրական դրույթների, հիմնադիր և գրանցման փաստաթղթերի համապատասխանությունը սույն հրահանգի պահանջներին։

13. Անհրաժեշտ փաստաթղթերը  սահմանված կարգի խախտումներով ներկայացնելու դեպքում դիմումը ենթակա է մերժման դիմումը ստանալուց հետո 5-օրյա ժամկետում` հիմնավոր պատճառաբանությամբ։

(13-րդ կետը լրաց. 10.10.06 N 7-Ն)

14. Օտար լեզվով կազմված փաստաթղթերին կցվում են դիվանագիտական ներկայացուցչությունների, հյուպատոսությունների, ՀՀ նոտարների, կամ ՀՀ օրենսդրությամբ սահմանված կարգով, այն հաստատելու իրավունք ունեցող այլ մարմինների կողմից վավերացված թարգմանությունները:

15. Իրավաբանական և ֆիզիկական անձանց կողմից ներկայացված փաստաթղթերը ուսումնասիրելուց ու լիցենզիա տալու մասին դրական որոշում կայացնելուց հետո ՆԳ մարմինների կողմից տրվում են հետևյալ լիցենզիաները.

ԻՐԱՎԱԲԱՆԱԿԱՆ ԱՆՁԱՆՑ

15.1.  Քաղաքացիական և ծառայողական զենքի, դրանց փամփուշտների առևտրի լիցենզիա (հավելված 1)

ա) զենքի առևտրով զբաղվող իրավաբանական անձանց:

15.2. Հայաստանի Հանրապետությունից դուրս զենք (փամփուշտներ) ձեռք բերելու լիցենզիա (հավելված 2)

ա) զենքի առևտրի լիցենզիա ունեցող իրավաբանական անձանց

բ) զենքի հավաքածու ունեցող և (կամ) հավաքածու կազմող իրավաբանական անձանց:

15.3. Հայաստանի Հանրապետության տարածքում զենք (փամփուշտներ) ձեռք բերելու լիցենզիա (հավելված 3)

ա) զենքի առևտրի լիցենզիա ունեցող իրավաբանական անձանց

բ) քաղաքացիական կամ ծառայողական զենք ձեռք բերելու իրավունք ունեցող իրավաբանական անձանց:

15.4. Զենքի (փամփուշտների) հավաքածու կազմելու լիցենզիա (հավելված 7)

ա) զենքի հավաքածու կազմող իրավաբանական անձանց:

15.5. Զենք (փամփուշտներ) ցուցադրելու լիցենզիա (հավելված 8)

ա) զենքի ցուցադրությամբ զբաղվող կազմակերպություններին:

ՖԻԶԻԿԱԿԱՆ  ԱՆՁԱՆՑ

15.6. Հայաստանի Հանրապետության քաղաքացիներին՝ մեկ միավոր որսորդական, սպորտային ողորկ երկարափող հրազեն կամ որսորդական օդաճնշիչ զենք ձեռք բերելու լիցենզիա (հավելված 12):

15.7. Հայաստանի Հանրապետության քաղաքացիներին՝ մեկ միավոր ակոսափող կամ համակցված որսորդական զենք ձեռք բերելու լիցենզիա (հավելված 13):

15.8. Հայաստանի Հանրապետության քաղաքացիներին՝ ինքնապաշտպանական զենք ձեռք բերելու, պահելու և կրելու լիցենզիա (հավելված11):

15.9. Օտարերկրյա քաղաքացիներին՝ Հայաստանի Հանրապետությունում քաղաքացիական  զենք ձեռք բերելու լիցենզիա (հավելված 9):

15.10. Հայաստանի Հանրապետության քաղաքացիներին՝ զենքի (փամփուշտների) հավաքածու կազմելու լիցենզիա (հավելված 21):

15.11. Հայաստանի Հանրապետության քաղաքացիներին՝ զենք (փամփուշտներ) ցուցադրելու լիցենզիա (հավելված 22):

16. Զենքի ու փամփուշտների առևտրի կամ հավաքածու կազմելու լիցենզիա ստանալու համար իրավաբանական անձի ղեկավարը ՀՀ ՆԳՆ լիցեզավորող հանձնաժողովին պարտավոր է ներկայացնել՝

ա) դիմում (հավելված 26)

բ) իրավաբանական անձի կանոնադրությունը և պետական գրանցման փաստաթղթերի պատճենները

գ) զենք ու փամփուշտներ պահելու համար նախատեսված շինությունների, զետեղարանների, պահեստների վարձակալության պայմանագիրը կամ դրանց սեփականության իրավունքը հաստատող փաստաթղթեր

դ) ՀՀ ՆԳՆ թույլտվության համակարգի, հրշեջ ու պետական պահպանության մարմինների աշխատակիցներից կազմված հանձնաժողովի՝ զենք ու  փամփուշտներ պահելու համար նախատեսված շինությունների և զետեղարանների ուսումնասիրության ակտը

ե) ՀՀ ՆԳՆ պետական պահպանության վարչության հետ կնքված պայմանագրի պատճենը՝ շինությունների պահպանության և պահնորդաազդանշանային կենտրոնացված պահպանության դիտակետին դրանք միացնելու մասին

զ) իրավաբանական անձի ղեկավարի հրամանների պատճենները՝

- իրավաբանական անձի ղեկավարի տեղակալի կամ այլ աշխատողի վրա զենքի ու փամփուշտների պահպանության պատասխանատվությունը դնելու մասին

- զետեղարանում զենքն ու փամփուշտները պահելու և հանձնելու պատասխանատու անձ նշանակելու մասին

- զենքի ու փամփուշտների հետ առնչվող աշխատանքներին թույլատրված անձանց ցուցակները։

Սույն կետում նշված փաստաթղթերը ներկայացվում են նաև լիցենզիաների գործողության ժամկետները երկարաձգելու դեպքում։ Լիցենզիայում փոփոխություններ կատարելիս ներկայացվում են միայն փոփոխությունների պատճառ հանդիսացող փաստաթղթեր, որոնք կոնկրետ իրավաբանական փաստի մասին պարունակում են տեղեկություններ և դրա հետ առնչվող լրացուցիչ այլ նյութեր։

17. Զենքի ու փամփուշտների հավաքածու կազմելու լիցենզիա ստանալու համար իրավաբանական անձի ղեկավարը, բացի 16 կետում նշված փաստաթղթերից, պատմամշակութային հավաքածուներ ստեղծելու դեպքում պարտավոր է ՆԳՆ ՀԿԱ վարչություն ներկայացնել նաև ՀՀ մշակույթի, երիտասարդության հարցերի և սպորտի նախարարության համաձայնությունը:

ՀՀ քաղաքացիները հավաքածու կազմելու  լիցենզիա ստանալու համար պարտավոր են ներկայացնել՝

ա) դիմում (հավելված 27)

բ) ՀՀ քաղաքացիությունը կամ անձը հաստատող փաստաթուղթ

գ) 3x4 սմ չափի երկու լուսանկար։

Հրազենի և հաշվառված այլ զենքի հավաքածու կազմելիս հայցվորը պարտավոր է լրացուցիչ ներկայացնել առկա զենքի համարային հաշվառման ցուցակը (հավելված 28), իսկ պարգևատրական զենքը հավաքածուի մեջ ընդգրկելիս նշվում է դրա տվյալները։ Ցուցակի հետ պարտադիր ներկայացվում են նաև զենք պահելու և կրելու թույլտվությունները, իսկ գազային, ազդանշանային և անփող զենքերի դեպքում՝ լիցենզիաների բնագրերը, որոնք կցվում են հաշվառման գործին։

18. Առաջին անգամ զենք ձեռք բերելու լիցենզիա ստանալիս, իրավաբանական անձի ղեկավարը (բացառությամբ զենքի ու փամփուշտների առևտրով և հավաքածու ունեցող իրավաբանական անձանց) պարտավոր են ՀՀ ՆԳ ՀԿԱ վարչություն ներկայացնել՝

ա) դիմում (հավելված 29)

բ) իրավաբանական անձի կանոնադրության և պետական գրանցման փաստաթղթերի պատճենները

գ) զենք ու փամփուշտներ պահելու համար նախատեսված շինությունների, զետեղարանների, պահեստների  վարձակալության պայմանագիրը կամ դրանց սեփականության իրավունքը հաստատող փաստաթղթեր

դ)  ՆԳՆ թույլտվության համակարգի, հրշեջ ու պետական պահպանության մարմինների աշխատակիցներից կազմված հանձնախմբի՝ զենք ու փամփուշտներ պահելու համար նախատեսված շինությունների և զետեղարանների ուսումնասիրության ակտը

ե)  ՆԳՆ պետական պահպանության վարչության հետ կնքված պայմանագրի պատճենը՝ շինությունների պահպանության և պահնորդաազդանշանային կենտրոնացված պահպանության դիտակետին դրանց  միացնելու մասին

զ) զենքի ու փամփուշտների պահպանության համար պատասխանատու նշանակելու մասին իրավաբանական անձի ղեկավարի հրամանի պատճենը

է) զենքի և փամփուշտների հետ առնչվող աշխատանքներին թույլատրված անձանց ցուցակը

ը) զենքի անհրաժեշտ քանակության հաշվարկը (հավելված 30), համաձայն ՀՀ կառավարության 1999 թ. հոկտեմբերի 26-ի թիվ 673 որոշման 20 կետի։

Իրավաբանական անձանց զենք ձեռք բերելու լիցենզիա տրվում է դիմումի և առկա զենքի մասին տեղեկություններ ներկայացնելու պայմանով։

19. Զենքի առևտրի լիցենզիա ունեցող կազմակերպությունների և զենքի ու փամփուշտների հավաքածուներ կազմելով զբաղվող իրավաբանական անձանց ղեկավարները զենք ու փամփուշտներ ձեռք բերելու լիցենզիա ստանալու համար պարտավոր են ներկայացնել դիմում (հավելված 31)։

(19-րդ կետը փոփ. 10.10.06 N 7-Ն)

20. Պետական և համայնքի սեփականություն հանդիսացող թանգարանները  ՀՀ թանգարանային հավաքածուի պետական մասի մեջ ընդգրկելու համար զենք և փամփուշտներ ձեռք են բերում լիցենզիայով, իսկ զենքի առանձին տեսակների նվիրատվության կամ փոխանցման դեպքում թանգարանի ղեկավարը դիմումի հետ մեկտեղ ՆԳՆ ՀԿԱ վարչություն պարտավոր է ներկայացնել՝

ա) ՀՀ մշակույթի, երիտասարդության հարցերի և սպորտի նախարարության կողմից վավերացված պայմանագրի պատճենը՝ զենքի  առանձին տեսակների (հավաքածուների) նվիրատվության (փոխանցման) մասին

բ) փոխանցվող ցուցանմուշ-զենքի նկատմամբ նվիրատուի սեփականության իրավունքը հաստատող փաստաթուղթ

գ) ՀՀ մշակույթի, երիտասարդության հարցերի և սպորտի նախարարության միջնորդագիրը զենքի կոնկրետ տեսակներ ձեռք բերելու վերաբերյալ՝ նշելով տեղեկություններ դրանց մասին։

21. Իրավաբանական անձանց կողմից փամփուշտներ ձեռք բերելու լիցենզիաների ձևակերպումը իրականացվում է զենք ձեռք բերելու լիցենզիաների համար սահմանված կարգով: Օգտագործված, կորած կամ ոչնչացման հանձնված փամփուշտների փոխարեն նորերը ձեռք բերելու համար դիմումատուն լրացուցիչ ներկայացնում է.

ա) իրավաբանական անձի ղեկավարի կողմից հաստատված փամփուշտների դուրսգրման ակտը (հավելված 32)

բ) ուսումնական և այլ նպատակներով իրականացված հրաձգությունների ժամանակ օգտագործված փամփուշտների բաշխման-հանձնման ամփոփագրերը (հավելվածներ 33, 34) կամ փամփուշտների դուրսգրման օրինականությունը հաստատող այլ փաստաթղթեր

գ) ոչնչացման նպատակով ՆԳ մարմիններին փոխանցված փամփուշտների ընդունման (հանձնման) ակտերը։

22. Իրավաբանական անձանց առևտրի, հավաքածուներ կազմելու լիցենզիաներ, զենք պահելու, պահելու և օգտագործելու, ինչպես նաև տիրերի, հրաձգաստենդային համալիրների և հրաձգարանների գործունեության թույլտվություններ տալու, կամ դրանց գործողության ժամկետները երկարաձգելու ժամանակ ուսումնասիրվում են զենք պահելու պայմանները, օբյեկտների տեխնիկական հագեցվածությունը և հաշվառման փաստաթղթերը: Արդյունքում կազմվում է ակտ (հավելված 35), որում նշվում է զենք ու փամփուշտներ պահելու թույլատրելի քանակությունը, ինչպես նաև՝ դրանք պահելու պայմաններն ապահովող չհրկիզվող կամ մետաղյա պահարանների, դարակաշարերի և հրշեջ-պահպանական ահազանգման միջոցների առկայությունը։

23. ՀՀ քաղաքացիները քաղաքացիական զենք ձեռք բերելու լիցենզիա կամ զենք պահելու, պահելու և կրելու թույլտվություն ստանալու համար համապատասխան ՆԳ մարմին պարտավոր են ներկայացնել.

ա) դիմում (հավելված 36), որում նշվում են անձնագրային տվյալներ, բնակության վայրը, առկա զենքի և զենք պահելու պայմանների մասին տեղեկություններ

բ) ՀՀ քաղաքացիությունը կամ անձը հաստատող փաստաթղթի պատճենը

գ) 3x4 սմ չափի երկու լուսանկար

դ) դիմողի մոտ զենքի տիրապետմանը խոչընդոտող հիվանդությունների և ֆիզիկական թերությունների բացակայության մասին բժշկական եզրակացություն:

Թվարկված փաստաթղթերը ՆԳ մարմին ներկայացվում են նաև լիցենզիաների ու թույլտվությունների ժամկետները երկարաձգելու համար։

Պետական ռազմականացված կազմակերպությունների աշխատակիցները բժշկական եզրակացության փոխարեն կադրային ստորաբաժանումից ներկայացնում են տեղեկանք ծառայության մեջ գտնվելու մասին, իսկ հատուկ կանոնադրական խնդիրներ իրականացնող  իրավաբանական անձանց աշխատողները վերոնշյալ բժշկական եզրակացության փոխարեն ներկայացնում են ծառայողական (մարտական) զենք պահելու, պահելու և կրելու թույլտվությունը։

Նշված փաստաթղթերի բացակայության դեպքում վերը նշված անձինք ներկայացնում են փաստաթղթեր՝ ընդհանուր հիմունքներով։

24. Ազդանշանային զենք ձեռք բերելու իրավունք ունեն Հայաստանի Հանրապետության այն քաղաքացիները, որոնց մասնագիտական գործունեությունը (երկրաբանություն, բնապահպանություն, անասնապահություն, ալպինիզմ, օդերևութաբանություն) նախատեսում է տվյալ զենք ձեռք բերելու անհրաժեշտություն:

23-րդ կետում նշված փաստաթղթերը ներկայացնելու հետ մեկտեղ տվյալ կատեգորիայի քաղաքացիները պարտավոր են դիմումում նշել նաև ազդանշանային զենք ձեռք բերելու նպատակը և պետական կառավարման կամ տեղական ինքնակառավարման մարմիններից տեղեկանք՝ մասնագիտական գործունեության վերաբերյալ:

25. Որսորդական կամ սպորտային ողորկ-երկարափող հրազեն,  որսորդական օդաճնշիչ զենք ձեռք բերելու լիցենզիա ստանալու համար ՀՀ քաղաքացիները 23-րդ կետում նշված փաստաթղթերի հետ մեկտեղ պարտավոր են ներկայացնել որսորդության իրավունք վերապահող փաստաթուղթ՝ «Հայորսմիությունում» կամ նրա տարածքային ստորաբաժանումներում զենքի հետ անվտանգ վարվելու կանոնների իմացության ստուգման մասին նշումով։

Որսորդական ակոսափող կամ համակցված հրազեն ձեռք բերելու լիցենզիա ստանալու դիմումում նշվում է որսորդական ողորկափող հրազենի սեփականության իրավունքով տիրապետման ժամկետը (5 տարուց ոչ պակաս) կամ տվյալներ որսորդական մասնագիտական գործունեությամբ զբաղվելու մասին։ Փաստաթղթերին կցվում է քաղաքացուն տվյալ պաշտոնին նշանակելու մասին կազմակերպության ղեկավարի հրամանի պատճենը:

26. Նոր լիցենզիա ստանալու համար ՆԳ մարմիններին 5 տարվա ընթացքում կրկին դիմելու դեպքում ՀՀ քաղաքացին ներկայացնում է դիմում, զենքի տիրապետմանը խոչընդոտող հիվանդությունների և ֆիզիկական թերությունների բացակայության մասին բժշկական եզրակացություն և նախորդ տվյալների փոփոխության մասին փաստաթղթեր։

27. Երկարափող հրազենի փոփոխվող (ներդրվող) սերտիֆիկացված փողեր ձեռք բերելու համար, զենքի սեփականատերը պարտավոր է ստանալ դրանք ձեռք բերելու լիցենզիա՝ սույն հրահանգով նախատեսված ողորկափող կամ ակոսափող զենք ձեռք բերելու լիցենզիա ստանալու համար նախատեսված կարգով։

28. Հավաքածուի մեջ ընդգրկելու նպատակով զենք ձեռք բերելու լիցենզիա ստանալու համար ՀՀ քաղաքացին պարտավոր է դիմում ներկայացնել համապատասխան ՆԳ մարմին (հավելված 37), որում նշվում են զենքի պահման պայմանները և կից ներկայացվում է հավաքածու կազմելու լիցենզիայի պատճենը։

Սառը շեղբավոր և հնաոճ զենք կամ դրանց կրկնօրինակներ ու պատճեններ ՀՀ քաղաքացիները ձեռք են բերում հավաքածու կազմելու լիցենզիա ներկայացնելու դեպքում:

29. Նվիրատվության կամ ժառանգության կարգով զենք ստանալու դեպքում  նվիրառու իրավաբանական և ֆիզիկական անձինք համապատասխան ՆԳ մարմին ներկայացնում են տվյալ զենքը ձեռք բերելու լիցենզիան, ինչպես նաև՝ ժառանգման իրավունքը հավաստող փաստաթղթեր:

30. Լիցենզիա տալուց առաջ ՆԳ մարմինների կողմից ՀՀ քաղաքացիների բնակության վայրում ստուգվում են զենք պահելու սահմանված պայմանները (փականով փակվող անկիզելի կամ մետաղյա պահարաններ, գերամուր նյութերից պատրաստված կամ երկաթով պատված փայտյա արկղեր):

Ստուգման վերաբերյալ արձանագրությունը կցվում է քաղաքացու հսկողական գործին:

31. Դիմումի, ստացված նյութերի, իրականացված ստուգումների արդյունքում և լիցենզավորման պայմանների բավարարման դեպքում թույլտվության համակարգի աշխատակիցը, կամ այդ պարտականությունները կատարող պաշտոնատար անձը կայացնում է լիցենզիա տալու եզրակացություն և դիմումի վրա կատարում է հետևյալ բնույթի գրառում՝ «Հնարավոր եմ համարում տալ լիցենզիա», որը վավերացնում է իր ստորագրությամբ, իսկ առևտրի լիցենզիայի դեպքում եզրակացությունը տալիս է լիցենզավորող հանձնաժողովը:

Սույն եզրակացությունը համաձայնեցվում է ՆԳ մարմնի ղեկավարի կամ ծառայության գծով տեղակալի կամ նրա պարտականությունները կատարող անձի հետ։ Եզրակացությունների և համաձայնեցված որոշումների ձևակերպման համար կարող են կիրառվել համապատասխան դրոշմակնիքներ, որոնց տեքստային մասը վավերացվում է լիազոր պաշտոնատար անձի ստորագրությամբ։

Միաժամանակ լիցենզիայի հայցվորը ծանուցվում է (հավելված 38)  պետական տուրք վճարելու մասին, որտեղ նշվում են պետական տուրքի գումարի չափը և բանկային ռեկվիզիտները:

32. Լիցենզիա տալու կամ դրա գործողության ժամկետը երկարաձգելու վերաբերյալ դիմումը մերժելու դեպքում դիմումը ստացող և նյութերն ուսումնասիրող պաշտոնատար անձի կամ լիցենզավորող հանձնաժողովի ստորագրությամբ հիմնավորված եզրակացություն է ներկայացվում, որը հաստատում է լիցենզիան ստորագրելու իրավունք ունեցող ՆԳ մարմնի ղեկավարներից մեկը։

Հիմնավորված եզրակացության հիման վրա դիմողին ուղարկվում է լիցենզիա տալը մերժելու մասին ծանուցագիր, որում նշվում է ՀՀ օրենսդրական կամ նորմատիվ իրավական ակտի կոնկրետ դրույթը, որը հիմք է հանդիսացել դիմումը մերժելու համար (հավելված 25):

33. Զենքի և փամփուշտների հավաքածու կազմելու և ցուցադրելու լիցենզիա  ստանալու նպատակով ներկայացված նյութերը, գրանցման օրվանից երկշաբաթյա ժամկետում, հանձնաժողովի կողմից իրավաբանական անձի օբյեկտի ուսումնասիրության կամ քաղաքացու բնակության վայրի ուսումնասիրության ակտի հետ միասին ուղարկվում են ՀՀ մշակույթի, երիտասարդության հարցերի և սպորտի նախարարություն կամ նրա իրավասու ստորաբաժանում՝ համաձայնեցման։

IV. Ձեռք բերված, նվեր ստացված, ժառանգված, պարգեվատրված զենքի ու դրա փամփուշտների գրանցման կարգը

34. Պարգևատրման, նվիրատվության, ժառանգման կարգով ստացված, այդ թվում՝ ՀՀ թանգարանային հավաքածուի մեջ գրանցված կամ հատուկ հավաքածուի մեջ ընդգրկված զենքերը, երկշաբաթյա ժամկետում ենթակա են գրանցման ՆԳ մարմիններում։

Հատուկ կանոնադրական խնդիրներ իրականացնող իրավաբանական անձանց աշխատողներին և պետական մարմինների պաշտոնատար անձանց ժամանակավոր հատկացված, ինչպես նաև՝ որոշակի կարգի զինծառայողներին և կենսաթոշակի անցած պետական ռազմականացված կազմակերպությունների աշխատակիցներին փոխանցված զենքը ենթակա է գրանցման  ՆԳՆ ՀԿԱ վարչությունում։

35. Ողորկ-երկարափող ինքնապաշտպանական և սպորտային հրազեն, որսորդական օդաճնշիչ զենք և որսորդական հրազեն ՆԳ մարմիններում գրանցելու համար ՀՀ քաղաքացիները պարտավոր են ներկայացնել զենքի անձնագիրը, ձեռք բերելու լիցենզիայի կրկնօրինակը՝ վաճառելու մասին մատակարար կազմակերպության նշումով, իսկ սեփականատիրոջից անմիջապես գնելու, նվեր կամ ժառանգություն ստանալու դեպքում՝ ձեռք բերելու լիցենզիայի կրկնօրինակը։

Գազային ատրճանակներ (թմբուկավոր ռևոլվերներ), անփող ինքնապաշտպանական հրազեն կամ ազդանշանային զենք գրանցելիս, ՀՀ քաղաքացիները ներկայացնում են զենքի անձնագիրը և լիցենզիան՝ զենքը վաճառելու մասին մատակարար կազմակերպության նշումով, կամ նվիրատվությունը, ժառանգությունը, պարգևատրումը հաստատող փաստաթղթեր:

Պարգևատրված զենքը գրանցվում է  ՆԳՆ ՀԿԱ վարչությունում՝ պարգևատրվողի կողմից դիմումը, պարգևատրումը հաստատող փաստաթուղթը՝ ՀՀ Նախագահի հրամանագրի կամ ՀՀ վարչապետի որոշման պատճենները, ՀՀ պետական ռազմականացված կազմակերպության ղեկավարի հրամանի պատճենը, օտարերկրյա պետությունների կամ կառավարությունների ղեկավարների պարգևատրման փաստաթղթերը և դրանց թարգմանությունների վավերացված պատճենները, ինչպես նաև՝ 3x4 սմ չափի երկու լուսանկար ներկայացնելու դեպքում։

ՀՀ տարածքից դուրս ձեռք բերված զենքը, բացառությամբ հավաքչարարության նպատակով ձեռքբերվածների, ՆԳ մարմիններում հաշվառման է վերցվում այդ զենքի սեփականատիրոջ կողմից ձեռք բերված զենքը, դիմումը, ՀՀ ՆԳ նախարարության կողմից տրված և ՀՀ մաքսային մարմնի նշումով ՀՀ տարածք զենք ներկրելու թույլտվությունը և համապատասխանության մասին սերտիֆիկատը ներկայացնելու դեպքում։

36. Պետական մարմինների պաշտոնատար անձանց ժամանակավոր հատկացված, ինչպես նաև՝ որոշակի կարգի զինծառայողներին և կենսաթոշակի անցած պետական ռազմականացված կազմակերպությունների աշխատակիցներին փոխանցված կարճափող հրազենը գրանցվում է  ՆԳՆ ՀԿԱ վարչությունում հետևյալ փաստաթղթերը ներկայացնելու դեպքում՝

ա) դիմում (հավելված 39)

բ) պետական ռազմականացված կազմակերպության ղեկավարի հրամանի վավերացված պատճենը

գ) պետական ռազմականացված կազմակերպության սպառազինության ծառայության ելքի-մուտքի փաստաթղթերը

դ) ակոսափող հրազենը ստուգման նպատակով կրակելու արձանագրությունը

ե) զենք կրելուն խոչընդոտող հիվանդությունների ու ֆիզիկական թերությունների բացակայության մասին բժշկական եզրակացությունը, բացառությամբ պետական ռազմականացված կազմակերպությունների աշխատակիցների

զ) 3x4 սմ չափի երկու լուսանկար։

37. Ձեռք բերված (ստացված) զենքի ու փամփուշտների գրանցման համար իրավաբանական անձինք (բացառությամբ մատակարար կազմակերպությունների) պարտավոր են  ՆԳՆ ՀԿԱ վարչություն ներկայացնել՝

ա) զենքերի անձնագրերը և լիցենզիաների կրկնօրինակները՝ զենք ու փամփուշտներ ձեռք բերելու մասին մատակարար կազմակերպության նշումով

բ) ժամանակավոր օգտագործման համար ստացված զենքի ու փամփուշտների ելքի-մուտքի փաստաթղթերը (կարգագիր, հաշիվ-կարգագիր,  ապրանքագիր, ընդունման-փոխանցման ակտ)

գ) ՆԳՆ պետական պահպանության վարչության հետ կնքված զենք ու փամփուշտներ փոխադրելու պայմանագրի պատճենը (եթե փոխադրումը իրականացվել է պայմանագրային կարգով)

դ) մատակարար իրավաբանական անձի կամ զենքը փոխանցող կազմակերպության կողմից հանձնված զենքերի համարային  հաշվառման ցուցակը և փամփուշտների քանակի վերաբերյալ տվյալներ, նշելով տեղեկություններ դրանց տեսակի և արտադրության խմբաքանակի մասին (հավելված 40)։

Զենք ու փամփուշտներ պահելու, պահելու և օգտագործելու նախկինում տրված թույլտվությունները վերաձևակերպելու ժամանակ ենթակա են հանձնման՝ առանց գործողության ժամկետի փոփոխման։

38. ՀՀ թանգարանային հավաքածուի պետական մասին, ինչպես նաև՝ համապատասխան կազմակերպություններին զենքի հատուկ հավաքածուներ կազմելու նպատակով փոխանցված զենքի ու փամփուշտների գրանցման համար թանգարաններն ու նշված իրավաբանական անձինք ներկայացնում են հավաքածուի մեջ ընդգրկելու ենթակա զենքի առանձին տեսակների, փամփուշտների (հավաքածուների) փոխանցման ակտերը և ՀՀ մշակույթի, երիտասարդության հարցերի և սպորտի նախարարության հատուկ լիազորված մարմնի՝ մշակութային արժեքների պահպանության վարչությունում գրանցված պատմամշակութային և արվեստաբանական փորձաքննության ակտերը։

Որպես նվեր թանգարանին փոխանցվող զենքի ու փամփուշտների հավաքածուների համար լրացուցիչ ներկայացվում են նաև նոտարի կողմից վավերացված նվիրատվության պայմանագրի պատճենը կամ նվիրատուի դիմումը:

39. Հատուկ կանոնադրական խնդիրներ իրականացնող  իրավաբանական անձինք իրենց հաստիքային աշխատողների համար ծառայողական պարտականությունների կատարման ժամանակ զենք պահելու և կրելու թույլտվություն ստանալու համար ՆԳՆ ՀԿԱ վարչություն պարտավոր են ներկայացնել՝

ա) կազմակերպության ղեկավարի գրավոր դիմումը, զենք պահելու և կրելու թույլտվություն հատկացնելու ենթակա աշխատողների անուն, ազգանուն, հայրանունները և նրանց անձնագրերի պատճենները

բ) զենքի ու փամփուշտների պահպանության ապահովման համար պատասխանատու անձ նշանակելու, ինչպես նաև՝ զենքը պահելու և կրելու իրավունք ունեցող աշխատողներին առկա զենքի անձնական ամրագրման մասին հրամանների վավերացված պատճենները

գ) հատուկ պատրաստականության դասընթացներ անցնելու վերաբերյալ տեղեկանք

դ) յուրաքանչյուր աշխատողի համար զենքի տիրապետմանը խոչընդոտող  հիվանդությունների և ֆիզիկական թերությունների բացակայության մասին բժշկական եզրակացություն

ե) յուրաքանչյուր անձի համար 3x4 սմ չափի երկու լուսանկար, պետական տուրքի վճարման անդորրագիր, ինչպես նաև՝ մեկական լրացուցիչ լուսանկար, եթե աշխատողին սահմանված նորմերին համապատասխան մեկից ավելի զենք է ամրագրվում։

40. Գրանցման փաստաթղթերի հետ մեկտեղ ՀՀ քաղաքացիները ձեռք բերված զենքը ՆԳ մարմնի թույլտվության համակարգի աշխատակցին են ներկայացնում օգտագործման անվտանգությունն ապահովելու նպատակով տեխնիկական վիճակը զննելու համար: Ընդ որում՝ ստուգվում է զենքի համարային տվյալների համապատասխանությունը լիցենզիայի կրկնօրինակներում, ելքի-մուտքի, տրանսպորտային և այլ փաստաթղթերում նշված համարային տվյալների հետ:

Իրավաբանական անձանց զենքի ու փամփուշտների զննումը իրականացվում է դրանց պահելու վայրում։

Զենքի զննում իրականացվում է նաև իրավաբանական անձանց և  քաղաքացիներին տրված լիցենզիաների ու թույլտվությունների ժամկետների երկարաձգման դեպքում։

Ակոսափող հրազենի անձնագրում ստուգվում է ստուգման նպատակով կրակված լինելը, որի բացակայության դեպքում զենքը ուղարկվում է ստուգման նպատակով կրակելու։

41. Անսարքություններ ունեցող զենքն ու փամփուշտները, ինչպես նաև առգրավված, կամավոր հանձնած կամ գտնված զենքը ստուգման նպատակով սահմանված կարգով ուղարկվում է  ՆԳՆ փորձաքրեագիտական վարչություն:

42. Տեխնիկապես պիտանի, ստուգելու նպատակով կրակված և ձեռք բերելու (ստանալու) օրինականությունը ուսումնասիրելուց հետո ՆԳ մարմինների կողմից տրվում են հետևյալ թույլտվությունները.

ԻՐԱՎԱԲԱՆԱԿԱՆ  ԱՆՁԱՆՑ

42.1. Զենք և փամփուշտներ պահելու և օգտագործելու թույլտվություն (հավելված 5)

ա) հատուկ կանոնադրական խնդիրներ իրականացնող իրավաբանական անձանց

բ) ուսումնական հիմնարկներին

գ) մարզական և որսորդական տնտեսություն վարող կազմակերպություններին

դ) հրաձգարաններին

ե) մասնագիտացված հատուկ լաբորատորիաներին:

42.2. Զենք և փամփուշտներ պահելու թույլտվություն (հավելված 4)

ա) զենքի առևտրով զբաղվող իրավաբանական անձանց

բ) արտադրանքի գնդակակայունության փորձարկումներ իրականացնող իրավաբանական անձանց

գ) ՀՀ մշակույթի, երիտասարդության հարցերի և սպորտի նախարարությունում հավատարմագրված զենքի պատմամշակութային և արվեստաբանական փորձաքննություն իրականացնող իրավաբանական անձանց: Սույն թույլտվությունը ստանալիս ներկայացվում է նաև ՀՀ մշակույթի, երիտասարդության հարցերի և սպորտի նախարարության  հավատարմագիրը՝ նշված գործունեությամբ զբաղվելու վերաբերյալ

դ) պահեստային գործառույթ իրականացնող իրավաբանական անձանց

ե) զենքի հավաքածու ունեցող իրավաբանական անձանց

զ) զենքի ցուցադրությամբ զբաղվող իրավաբանական անձանց:

«ե», «զ» ենթակետերում նշված իրավաբանական անձանց տրվող թույլտվություններն ուժի մեջ են պահման թույլատրված զենքերի համարային հաշվառման ցուցակների առկայության դեպքում, որոնցում նշվում է յուրաքանչյուր միավորի տեսակը, մոդելը, տրամաչափը, սերիան, համարը և արտադրման տարեթիվը:

42.3. Զենք և փամփուշտներ ներկրելու (արտահանելու) թույլտվություն (հավելված 6)

ա) քաղաքացիական ու ծառայողական զենք և փամփուշտներ ներկրելու (արտահանելու) իրավունք ունեցող իրավաբանական անձանց:

42.4. Հրաձգարան գործարկելու թույլտվություն (հավելված 23)

ա) հրաձգարան գործարկող իրավաբանական անձանց:

ՖԻԶԻԿԱԿԱՆ  ԱՆՁԱՆՑ

42.5. Հայաստանի Հանրապետության քաղաքացիներին՝ ինքնապաշտպանական ողորկ-երկարափող հրազեն պահելու (առանց կրելու իրավունքի) թույլտվություն (հավելված 15)

42.6. Հայաստանի Հանրապետության քաղաքացիներին՝ որսորդական և սպորտային ողորկ-երկարափող հրազեն կամ օդաճնշիչ զենք պահելու և կրելու թույլտվություն (հավելված 17)

42.7. Հայաստանի Հանրապետության քաղաքացիներին՝ որսորդական ակոսափող կամ համակցված հրազեն պահելու և կրելու թույլտվություն (հավելված 16)

42.8. Հատուկ կանոնադրական խնդիրներ իրականացնող իրավաբանական անձանց աշխատողներին՝ ծառայողական պարտականությունների կատարման ժամանակ ծառայողական զենք (այդ թվում նաև մարտական զենքի առանձին տեսակներ) պահելու և կրելու թույլտվություն (հավելված 18)

42.9. Հայաստանի Հանրապետության քաղաքացիներին՝ պարգևատրական զենք պահելու և կրելու թույլտվություն (հավելված 19)

42.10. Կարճափող հրազեն պահելու և կրելու թույլտվություն (հավելված 20) 

ա) պետական ռազմականացված կազմակերպությունների որոշակի կարգի զին. ծառայողներին և կենսաթոշակի անցած աշխատակիցներին

բ) պետական մարմինների պաշտոնատար անձանց

գ) հատուկ պետական պաշտպանության ենթակա անձանց

42.11. Հայաստանի Հանրապետության քաղաքացիներին՝ զենք (փամփուշտներ) արտահանելու (ներկրելու) թույլտվություն (հավելված 14)

42.12. Օտարերկրյա քաղաքացիներին՝ զենք (փամփուշտներ) արտահանելու թույլտվություն (հավելված 10):

43. Իրավաբանական անձանց տրվող զենք ու փամփուշտներ պահելու, պահելու և օգտագործելու թույլտվություններում զենքի ու փամփուշտների քանակը չի նշվում:

Իրավաբանական անձանց աշխատողներին և ՀՀ քաղաքացիներին յուրաքանչյուր միավոր զենք պահելու, պահելու և կրելու համար տրվում է առանձին թույլտվություն:

Վերոհիշյալ թույլտվությունների ձևակերպումը և հանձնումը իրականացվում է լիցենզիաներ տալու համար սահմանված կարգով:

44. Զենքի հավաքածու կազմող իրավաբանական անձանց ու քաղաքացիներին զենք պահելու թույլտվության հետ միասին հանձնվում է լիցենզիա ստորագրելու իրավունք ունեցող ՆԳ մարմնի ղեկավարի կողմից հաստատված և այդ մարմնի կնիքով վավերացված զենքի համարային հաշվառման ցուցակը (հավելված 28):

45. Հատուկ կանոնադրական խնդիրներ իրականացնող իրավաբանական  անձանց և որսորդական տնտեսություն վարող իրավաբանական անձանց աշխատողներին զենք պահելու և կրելու թույլտվությունները հանձնվում են դիմումները և տրված լիցենզիաներն ու թույլտվությունները հաշվառելու մատյանում (հավելված 24) ստորագրելուց հետո:

ՀՀ քաղաքացիներին զենք  պահելու, պահելու և կրելու թույլտվություն տրվում է վերոհիշյալ մատյանում ստորագրելուց հետո, իսկ իրավաբանական անձանց զենք ու փամփուշտներ պահելու, պահելու և օգտագործելու թույլտվություն տրվում է իրավաբանական անձի ղեկավարի կամ զենքի պահպանության պատասխանատու անձի նշված մատյանում ստորագրելուց հետո:

46. Զենքի ու փամփուշտների սերտիֆիկացմամբ զբաղվող մարմինները, ինչպես նաև՝ փորձագիտական լաբորատորիաները իրենց փոխանցվող զենքն ու փամփուշտները պահում են ՆԳՆ ՀԿԱ վարչությունից զենք ու փամփուշտներ պահելու և օգտագործելու թույլտվություն ստանալուց հետո։

47. Օտարերկրյա քաղաքացիներին հրավիրող մարզական և որսորդական կազմակերպությունները ՆԳՆ ՀԿԱ վարչությունից զենք ու փամփուշտներ ներկրելու թույլտվություն ստանալուց հետո տվյալ անձանց պատկանող  զենքն ու փամփուշտները պահում են սույն հրահանգի պահանջներին համապատասխան` հատուկ սարքավորված զետեղարաններում:

Նշված իրավաբանական անձինք պարտավոր են ունենալ կամ ՆԳ մարմիններից ստանալ նման զենք ու փամփուշտներ պահելու թույլտվություն:

48. Մարզական կազմակերպությունները (ակումբները) իրենց անդամ ՀՀ քաղաքացիներին պատկանող զենքը պահելու համար պարտավոր են իրենց զետեղարանում հատկացնել հատուկ տեղ՝ անկիզելի, մետաղյա պահարան կամ բուրգ:

49. Զենքի և փամփուշտների հավաքածու կազմելու լիցենզիա ունեցող իրավաբանական անձինք փոխանցված զենքի և փամփուշտների հավաքածուների (եզակի նմուշների) պատասխանատու պահպանությունն իրականացնում են հավաքածու կազմելու լիցենզիայի և ՆԳ մարմինների կողմից տրված զենք պահելու թույլտվության հիման վրա։ Նման զենքը պատասխանատու պահպանության ընդունելու մասին կազմվում է ակտ երեք օրինակից: Առաջինը հանձնվում է  սեփականատիրոջը, երկրորդը՝ զենքի պահպանության  պատասխանատու անձին, իսկ երրորդը ուղարկվում է ՆԳՆ ՀԿԱ վարչություն։

50. Մաքսային հսկողության տակ գտնվող զենքի ու փամփուշտների պահպանության գործառույթ իրականացնող իրավաբանական անձինք պարտավոր են ՆԳՆ ՀԿԱ վարչությունից ստանալ զենք ու փամփուշտներ պահելու թույլտվություն։ Այդ նպատակով տվյալ կազմակերպությունները ՆԳՆ  ՀԿԱ վարչություն  պարտավոր են ներկայացնել.

ա) իրավաբանական անձի կանոնադրության և պետական գրանցման փաստաթղթերի պատճենները կամ տվյալ գործունեությամբ զբաղվելու լիցենզիան

բ) ՆԳՆ թույլտվության համակարգի, հրշեջ ու պետական պահպանության ներկայացուցիչների կողմից կազմված զենք և փամփուշտներ պահելու համար նախատեսված շինությունների և զետեղարանների հանձնաժողովային ուսումնասիրության ակտը

գ) զենքի և փամփուշտների պահպանության պատասխանատու անձ  նշանակելու մասին իրավաբանական անձի ղեկավարի հրամանի պատճենը

դ) ՆԳՆ պետական պահպանության վարչության հետ կնքված պայմանագրի պատճենը՝ շինությունների պահպանության և պահնորդաազդանշանային կենտրոնացված պահպանության դիտակետին դրանց միացման մասին

ե) զենքի և փամփուշտների հետ առնչվող աշխատանքներին թույլատրված անձանց ցուցակը:

51. Զենք ու փամփուշտներ պահելու, պահելու և օգտագործելու, պահելու և կրելու թույլտվություններ տալը մերժելու հիմքերն են.

ա) օրենսդրությամբ սահմանված զենքի ու փամփուշտների շրջանառության սահմանափակումների բացահայտումը կամ զենքի ու փամփուշտների ոչ պիտանիությունը հետագա օգտագործման համար

բ) զենքի համարների կամ հաշվառման տվյալների անհամապատասխանությունը լիցենզիայի կրկնօրինակին, զենքի անձնագրին (անձնագրի կրկնօրինակին), ելքի-մուտքի փաստաթղթերին

գ) սույն հրահանգի 51 կետի բ) ենթակետում նշված փաստաթղթերի կամ զենքի ձեռքբերման (սեփականության) օրինականությունը հավաստող այլ փաստաթղթերի բացակայությունը։

V. Զենք եվ փամփուշտներ ցուցադրելու լիցենզիաներ եվ թույլտվություններ ձեվակերպելու առանձնահատկությունները

52. Զենք ու փամփուշտներ ցուցադրելու լիցենզիա ստանալու համար իրավաբանական անձինք ՆԳՆ ՀԿԱ վարչություն պարտավոր են ներկայացնել՝

ա) դիմում (հավելված 41)

բ) իրավաբանական անձի կանոնադրության և պետական գրանցման փաստաթղթերի  պատճենները, կամ զենքի ու փամփուշտների հավաքածուներ կազմելու լիցենզիան

գ) ցուցահանդեսներ կազմակերպելու և զենքի ու փամփուշտների պահպանության պատասխանատու անձանց նշանակելու մասին իրավաբանական անձի ղեկավարի հրամանների պատճենները

դ) զենք և փամփուշտներ ցուցադրելու, պահելու, հանձնելու և դրանց հետ կապված աշխատանքներին թույլատրված աշխատողների ցուցակները։

Պետական ու համայնքային սեփականություն հանդիսացող թանգարանները նշված փաստաթղթերի հետ մեկտեղ ներկայացնում են նաև թանգարանային գործունեություն իրականացնելու իրավունք վերապահող փաստաթղթի պատճենը:

Թվարկված փաստաթղթերը  ներկայացվում են նաև տրված լիցենզիաների գործողության ժամկետները երկարաձգելու համար։ Լիցենզիայում փոփոխություններ կատարելու անհրաժեշտության  դեպքում դիմումին կցվում են այդ փոփոխություններն առաջացրած իրավաբանական փաստերի մասին տեղեկություններ, ինչպես նաև՝ դրանց հետ կապված լրացուցիչ փաստաթղթեր։

53. Զենք և փամփուշտներ ցուցադրելու լիցենզիա ստանալու համար ՀՀ քաղաքացիները ՆԳՆ ՀԿԱ վարչություն պարտավոր են ներկայացնել՝

ա) դիմում (հավելված 42)

բ) անձը կամ ՀՀ քաղաքացիությունը հաստատող այլ փաստաթղթի պատճենը

գ) 3x4 սմ չափի երկու լուսանկար

դ) առկա զենքի համարային հաշվառման ցուցակը կամ զենքի և փամփուշտների հավաքածու կազմելու լիցենզիան:

54. Զենքի և փամփուշտների ցուցահանդեսները, ցուցահանդես-վաճառքները և աճուրդները (այսուհետև՝ ցուցահանդես) անցկացվում են ՆԳՆ ՀԿԱ վարչության կողմից տրված զենք և փամփուշտներ ցուցադրելու լիցենզիա ունեցող մասնակիցների միջև կնքված պայմանագրի առկայության դեպքում:

Զենքի և փամփուշտների ցուցահանդես անցկացնելու համար պատասխանատու անձը պարտավոր է ցուցադրումից առնվազն երեք օր առաջ ՆԳՆ ՀԿԱ վարչությունից ստանալ զենք ու փամփուշտներ պահելու թույլտվություն, նշելով տվյալ միջոցառման անցկացման ժամկետները, ինչպես նաև՝

54.1. Սույն հրահանգի պահանջներին համապատասխան ապահովել ցուցասրահների, զենքի զետեղարանների սարքավորումը, ցուցանմուշների ցուցադրումն ու ժամանակավոր պահպանումը։

54.2. Կազմակերպել անհրաժեշտ անցագրային և ներօբյեկտային ռեժիմ, ապահովել զենքի անվտանգության և ցուցանմուշների հաշվառման սահմանված պայմանները։

54.3. Ցուցադրվող զենքն ու փամփուշտները պահելու թույլտվություն ստանալու համար դիմումի հետ մեկտեղ ՆԳՆ ՀԿԱ վարչություն ներկայացնել հետևյալ փաստաթղթերը՝

ա) ցուցահանդեսի մասնակիցների միջև կնքված պայմանագիրը՝ զենք և փամփուշտներ ցուցադրելու կարգի ու պայմանների, ցուցահանդես անցկացնելու և ցուցադրվող զենքի անվտանգությունը ապահովող պատասխանատուի ընտրության (որոշման) մասին

բ) ցուցահանդեսի մասնակիցների կողմից ցուցադրման համար հայտարարագրված զենքի և փամփուշտների ցուցադրման լիցենզիաների հաստատված պատճենները

գ) զենք ցուցադրելու և պահելու համար նախատեսված տարածքների օգտագործման իրավունքը հավաստող փաստաթղթերը, այդ տարածքների հանձնաժողովային ուսումնասիրման ակտերը՝ կազմված ՆԳՆ թույլտվության համակարգի, հրշեջ ու պետական պահպանության ներկայացուցիչների կողմից

դ) ցուցահանդեսի անցկացման ծրագիրը, ինչպես նաև՝ էքսպոզիցիայի նախագիծը (հավելված 43)

ե) ՀՀ ՆԳՆ պետական պահպանության վարչության հետ կնքված պայմանագրի պատճենը՝ շինությունների պահպանության և պահնորդաազդանշանային կենտրոնացված պահպանության դիտակետին դրանց միացման մասին

զ) մասնակից իրավաբանական և ֆիզիկական անձանց ցուցակները, ցուցահանդեսի կազմակերպման պատասխանատու իրավաբանական անձի կողմից պահպանության  և ցուցադրվող զենքերի համար պատասխանատուների ցուցակը, նրանց անձնագրային տվյալները, արտակարգ կապի հեռախոսների տեղակայման վայրերը, ինչպես նաև՝ պահպանության պատասխանատու անձանց նշանակելու հրամանների պատճենները

է) ցուցադրման ենթակա զենքերի համարային հաշվառման ցուցակները, որտեղ նշվում են զենքերի տեսակները,  մոդելները, տրամաչափերը և համարները, ինչպես նաև՝ ցուցադրման ենթակա փամփուշտների քանակը, տեսակը, տրամաչափերը և տեղեկություններ արտադրման խմբաքանակի մասին:

55. Գործադիր իշխանության մարմինների որոշմամբ ցուցահանդես կազմակերպելու դեպքում ձևակերպվում է զենք պահելու թույլտվություն, որի համար ցուցահանդես անցկացնելու պատասխանատու անձը ՆԳՆ ՀԿԱ վարչություն պարտավոր է ներկայացնել՝

ա) գործադիր իշխանության մարմնի որոշման պատճենը՝ ցուցահանդես անցկացնելու և   ցուցադրվող զենքի ու փամփուշտների պահպանության  պատասխանատու անձ նշանակելու մասին

բ) ՆԳՆ թույլտվության համակարգի, հրշեջ և պետական պահպանության ներկայացուցիչների կողմից կազմված ցուցասրահների և զենք պահելու վայրերի հանձնաժողովային ուսումնասիրության ակտերը

գ) զենքի ցուցադրման ծրագիրը և էքսպոզիցիայի տեղադրման նախագիծը, ցուցահանդեսը պահնորդաազդանշանային կենտրոնացված պահպանության դիտակետին միացնելու պայմանագիրը, միջոցառման մասնակից իրավաբանական և ֆիզիկական անձանց ու մասնակից կազմակերպությունների պատասխանատու անձանց ցուցակները, ինչպես նաև՝ տեղեկություններ զենքի և փամփուշտների համարային հաշվառման մասին։

56. Ցուցադրման համար նախատեսվող զենքի ու փամփուշտների հավաքածուները ցուցադրման վայրում ներկայացվում են  թույլտվության համակարգի  աշխատակցին՝ զննելու, հաշվառելու և ուղեկցող փաստաթղթերի համապատասխանությունը ստուգելու նպատակով։

Ցուցահանդեսի ավարտից հետո զենքն ու փամփուշտները ենթակա են կրկնակի զննության ու ստուգման:

VI. Հայաստանի Հանրապետության տարածք քաղաքացիական եվ ծառայողական զենք ու փամփուշտներ ներկրելու եվ Հայաստանի Հանրապետությունից դրանք արտահանելու թույլտվություններ տալու կարգը

57. ՀՀ մաքսային սահմանով քաղաքացիական և ծառայողական զենք ու փամփուշտներ տեղափոխելու համար զենքի արտադրության լիցենզիա ունեցող իրավաբանական անձինք, մատակարար իրավաբանական անձինք, զենքի ու փամփուշտների հավաքածուներ կազմելու կամ ցուցադրելու լիցենզիա ունեցող կազմակերպությունները, մարզական և որսորդական տնտեսություն վարող կազմակերպությունները, ինչպես նաև՝ ՀՀ քաղաքացիները զենք և փամփուշտներ ներկրելու կամ արտահանելու թույլտվություն ստանալու համար ՆԳՆ ՀԿԱ վարչություն պարտավոր են ներկայացնել՝

57.1. Զենքի տեսակների,  մոդելների, տրամաչափերի, սերիաների, համարների նշումով, ինչպես նաև՝ փամփուշտների տեսակների, տրամաչափերի, պատրաստման խմբաքանակի և քանակության մասին տեղեկություններ պարունակող դիմում:

57.2. ՀՀ մշակույթի, երիտասարդության հարցերի և սպորտի նախարարության հատուկ լիազորված մշակութային արժեքների պահպանության մարմնի թույլտվությունը ՆԳ մարմիններում գրանցված մշակութային արժեք հանդիսացող զենքը ՀՀ-ից արտահանելու համար:

57.3. Զենք ու փամփուշտներ ներկրելու (արտահանելու) ընթացքում տեղափոխման ան-վտանգության պատասխանատու անձ նշանակելու հրամանի պատճենը և տեղեկություններ նրա անձնագրային տվյալների մասին:

57.4. Զենքի և փամփուշտների համապատասխանության մասին սերտիֆիկատները կամ դրանց վավերացված պատճենները բացառությամբ՝

ա) պետական կադաստրում ընդգրկված քաղաքացիական և ծառայողական զենքի ու դրա փամփուշտների

բ) հավաքածուների համար նախատեսված զենքերի և փամփուշտների

գ) ցուցահանդեսի  օտարերկրյա մասնակցի կողմից ցուցադրման նպատակով ներկրվողների, եթե առկա են ցուցահանդեսի անցկացման և զենքի ու փամփուշտների պահպանության անվտանգությունն ապահովող պատասխանատու իրավաբանական անձի հրավերը և նրա հետ կնքված պայմանագիրը, ինչպես նաև՝ մարզական միջոցառումներին կամ որսի մասնակցելու նպատակով օտարերկրյա  քաղաքացիների կողմից ներկրվող զենքերի՝ համապատասխան հրավերների և պայմանագրերի առկայության դեպքում

դ) արտասահմանյան ցուցահանդեսների, մարզական միջոցառումների կամ որսի մասնակցելու նպատակով արտահանվողների՝ համապատասխան հրավերների և կնքված պայմանագրերի առկայության դեպքում։

Լիազորված հանրապետական գործադիր իշխանության մարմնի որոշմամբ ցուցադրելու, մարզական միջոցառումներին մասնակցելու նպատակով զենք և փամփուշտներ   արտահանելու դեպքում պայմանագրի փոխարեն ներկայացվում է համապատասխան գործադիր իշխանության մարմնի ղեկավարի որոշման պատճենը

ե) զենք ու փամփուշտներ արտադրող իրավաբանական անձանց արտադրական (տեխնոլոգիական) նպատակներով ներկրվողների՝ արտադրության լիցենզիայի վավերացված պատճենի առկայության դեպքում։

58. Կադաստրում չընդգրկված, մաքսային հսկողության տակ գտնվող զենքի ու փամփուշտների խմբաքանակը սերտիֆիկացնելու նպատակով, ՆԳՆ ՀԿԱ վարչության կողմից տրվում է յուրաքանչյուր խմբաքանակից երկու միավոր զենք և տասը հատ փամփուշտ ներկրելու թույլտվություն՝ «Սերտիֆիկացման համար» նշումով:

Ներկրվող զենքի և փամփուշտների սեփականատերը «Սերտիֆիկացման համար» նշումով ներկրելու թույլտվություն ստանալու համար պարտավոր է ներկայացնել սույն հրահանգի 57.1-57.3 կետերում նշված փաստաթղթերը:

Հավատարմագրված սերտիֆիկացման մարմնի կողմից տրված համապատասխանության մասին սերտիֆիկատի պատճենը ՆԳՆ ՀԿԱ վարչություն ներկայացնելուց հետո տրվում է զենքի ու փամփուշտների ամբողջ խմբաքանակը ՀՀ տարածք ներկրելու թույլտվություն:

59. Սերտիֆիկացված զենք ու փամփուշտներ (խմբաքանակներ) ներկրելու թույլտվություն տալը կամ դրա մերժելը կատարվում է լիցենզիաներ և թույլտվություններ տալու համար սահմանված կարգով։

60. Կառուցվածքով զենքի նմանվող իրերի սեփականատերը դրանք ՀՀ տարածք ներկրելու կամ ՀՀ-ից արտահանելու համաձայնություն ստանալու համար պարտավոր է ՆԳՆ ՀԿԱ վարչություն ներկայացնել՝

ա) դիմում՝ նշված իրերի ցուցակը համաձայնեցնելու մասին

բ) կառուցվածքով զենքի նմանվող իրերի ցուցակի երկու օրինակ՝ սերտիֆիկացման մասին տվյալներով։ Մշակութային արժեք հանդիսացող, կառուցվածքով զենքի նմանվող իրերի ցուցակում նշվում են պատմամշակութային և արվեստաբանական փորձաքննության արդյունքները

գ) համապատասխանության սերտիֆիկատների վավերացված պատճենները, ՆԳՆ փորձաքրեագիտական վարչության եզրակացությունները կամ պատմամշակութային արվեստաբանական փորձաքննության ակտերը:

Ներկայացված փաստաթղթերի իսկությունը, նրանցում նշված տվյալների հավաստիությունը թույլտվության համակարգի աշխատակցի կողմից ստուգելուց հետո, կառուցվածքով զենքի նմանվող իրերի ցուցակի վրա կատարվում է «Համաձայնեցված է» նշումը, որը վավերացվում է լիցենզիաների ստորագրման իրավունք ունեցող ՆԳ մարմնի  ղեկավարի կողմից, նշելով պաշտոնատար անձի ազգանունը և ստորագրման ամիս-ամսաթիվը։ Գրառման տվյալները հաստատվում են ՆԳ մարմնի կնիքով։

Ձևակերպված ցուցակը ներկայացվում է մաքսային մարմին՝  նշված իրերը ՀՀ մաքսային սահմանով փոխադրելու համար։

61. ՀՀ տարածքով զենքի և փամփուշտների տարանցիկ փոխադրման դեպքում, զենքի և փամփուշտների սեփականատերը ՆԳՆ ՀԿԱ վարչություն նախօրոք պարտավոր է ներկայացնել՝

ա) դիմում՝ ներկրման և արտահանման թույլտվություն ստանալու համար

բ) ՆԳՆ պետական պահպանության վարչության հետ կնքված պայմանագրի պատճենը

գ) մաքսային հայտարարագրի երրորդ օրինակը՝ մաքսային մարմնի կողմից «տարանցիկ» նշումով

դ) մաքսային մարմնի կողմից վավերացված փոխադրվող զենքի համարային հաշվառման ցուցակը, որում նշվում են զենքի տեսակները, մոդելները, տրամաչափերը, սերիաները և համարները, ինչպես նաև՝ տեղեկություններ փամփուշտների տեսակների, տրամաչափերի և պատրաստման խմբաքանակի մասին:

62. Զենքի և փամփուշտների յուրաքանչյուր խմբաքանակի արտահանման դեպքում զենք և փամփուշտներ արտադրող կազմակերպությունը ՆԳՆ ՀԿԱ վարչություն պարտավոր է ներկայացնել՝

ա) ՀՀ -ից զենք և փամփուշտներ արտահանելու թույլտվություն ստանալու մասին դիմում, որտեղ նշվում է դրանց տեսակը, մոդելը և քանակը:

ԱՊՀ երկրներ զենք և փամփուշտներ առաքելու դեպքում դիմումին կցվում է Հայաստանի Հանրապետությունում տվյալ պետության դիվանագիտական ներկայացուցչության հավաստումը՝ պատվիրատուի կողմից տվյալ զենքերի ձեռքբերման օրինականության մասին

բ) օտարերկրյա պատվիրատուի հետ կնքված պայմանագրի պատճենը

գ) զենքի և փամփուշտների մոդելների համապատասխանության սերտիֆիկատները կամ դրանց պատճենները (կադաստրում չընդգրկվածների համար)

դ) արտահանվող զենքի համարային հաշվառման ցուցակը երեք օրինակից, որում նշվում են զենքերի տեսակները, մոդելները, սերիաներն ու  համարները, ինչպես նաև տեղեկություններ փամփուշտների տեսակների, տրամաչափերի և պատրաստման խմբաքանակի մասին:

Ձևակերպված թույլտվության վրա դրվում է դրոշմակնիք՝ «Թույլտվությունը ուժի մեջ է արտահանվող զենքի (փամփուշտների) համարային հաշվառման ցուցակի առկայության դեպքում» գրառմամբ:

Ցուցակում կատարվում է հետևյալ բովանդակությամբ պարտադիր նշում՝

Արտահանման թույլտվության _____ թերթից և հաստատվում է լիցենզիաներ ստորագրելու իրավունք ունեցող պաշտոնատար անձի ստորագրությամբ և կնիքով:

Զենքի և փամփուշտների արտահանումը ձևակերպելուց հետո ցուցակի առաջին օրինակը մաքսային մարմինների նշումով մնում է արտահանող կազմակերպության մոտ, երկրորդը՝ մաքսային մարմնում, երրորդը՝ զենքի և փամփուշտների արտահանման թույլտվության կրկնօրինակի հետ մնում է ՆԳՆ ՀԿԱ վարչությունում:

VII. Լիցենզիաների եվ թույլտվությունների գործողության ժամկետների երկարաձգման, ինչպես նաեվ դրանց վերաձեվակերպման կարգը

63. Լիցենզիաների (բացառությամբ զենք և փամփուշտներ ձեռք բերելու լիցենզիաների, որոնց գործողության ժամկետի երկարաձգում չի նախատեսվում), ինչպես նաև՝ զենք պահելու, պահելու և օգտագործելու, պահելու և կրելու թույլտվությունների գործողության ժամկետները լրանալուց երեք ամիս առաջ զենքի սեփականատերերը պարտավոր են դրանք հաշվառած ՆԳ մարմիններ ներկայացնել դիմում և անհրաժեշտ փաստաթղթեր՝ համապատասխան լիցենզիաների և թույլտվությունների գործողության ժամկետները երկարաձգելու համար: Լիցենզիաների և թույլտվությունների գործողության ժամկետները երկարաձգվում են դրանք տալու համար սահմանված կարգով, իրավաբանական անձի օբյեկտներում, քաղաքացու բնակության վայրում զենքի պահման պայմանների հանձնաժողովային ուսումնասիրությունից, իսկ ակոսափող հրազենը նաև ստուգման նպատակով կրակելուց հետո՝ ձևակերպելով նոր լիցենզիա կամ թույլտվություն: ՆԳ մարմինների կողմից նոր լիցենզիաներ կամ թույլտվություններ տալու ժամանակ գործողության ժամկետները լրացած լիցենզիաները կամ թույլտվությունները պարտադիր վերադարձվում են այն տված ՆԳ մարմիններին։

64. Զենք և փամփուշտներ ներկրելու (արտահանելու) թույլտվությունները կարող են երկարաձգվել ՀՀ օրենսդրությամբ սահմանված ժամկետներում՝ հաշվի առնելով բեռի մաքսային ձևակերպման ժամանակ առաջացած խնդիրները։

65. Լիցենզիաների և թույլտվությունների վերաձևակերպումը կատարվում է լիցենզավորման պայմանների և դրանցում նշված տեղեկությունների փոփոխության, ինչպես նաև՝ ոչ պիտանի դարձած կամ կորցրած լիցենզիաներն ու թույլտվությունները վերականգնելու վերաբերյալ դիմում և այդ հանգամանքները հաստատող փաստաթղթեր ներկայացնելու դեպքում:

66. Լիցենզիաները կամ թույլտվությունները հետագա օգտագործման համար ճանաչվում են ոչ պիտանի եթե՝

66.1. փաստաթղթի ձևաթուղթը չի պահպանել հիմնական ռեկվիզիտներից որևէ մեկը, գրառումները անընթեռնելի են, փաստաթղթի տիրոջ նույնացումը անհնար է

66.2. լիցենզիաները կամ թույլտվությունները չեն պահպանել պաշտպանական տարրերից որևէ մեկը, ունեն բացահայտ տպագրական խոտան, կամ փոխել են երկրաչափական չափերը՝ 3 մմ-ից ավելի մեծացում կամ փոքրացում

66.3. փաստաթղթերն ունեն մեխանիկական կամ քիմիական վնասվածքներ, սոսնձված հատվածներ կամ փոխել են սկզբնական գունավորումը և գունազրկվել են

66.4. դրանց վրա առկա են լիցենզիաները կամ թույլտվությունները ուժը կորցրած ճանաչելը հավաստող դրոշմակնիքներ և կնիքներ

66.5. լիցենզիաները կամ  թույլտվությունները ենթարկվել են քիմիական ռեակտիվների ազդեցության, ինչը հանգեցրել է ուլտրամանուշակագույն ճառագայթներում դրանց լուսարձակմանը

66.6. ՆԳ մարմնի կնիքի դրոշմվածքը աղավաղված է։

Լիցենզիաները կամ թույլտվությունները հետագա օգտագործման համար ճանաչվում են ոչ պիտանի դրանց հանձնաժողովային զննության ակտի հիման վրա, որը հաստատում է լիցենզիաներ ու թույլտվություններ ստորագրելու իրավունք ունեցող ՆԳ մարմնի ղեկավարը:

67. Մատակարար կազմակերպություններից անսարք զենքի փոխարեն նորը ստացած իրավաբանական կամ ֆիզիկական անձը վերաձևակերպելու համար երկշաբաթյա ժամկետում հաշվառման վայրի ՆԳ մարմին  ներկայացնում է զենքը կամ դրա հիմնական մասը փոխելու ակտը և նոր ստացած զենքի անձնագիրը, նախկինում տրված զենք պահելու, պահելու և կրելու թույլտվությունը։

68. Լիցենզավորման պայմանների, դրանցում նշված տեղեկությունների փոփոխության դեպքում ոչ պիտանի դարձած, կորցրած լիցենզիաները կամ թույլտվությունները, ինչպես նաև՝ անսարք զենքը փոխելու դեպքում լիցենզիաների կամ թույլտվությունների  վերաձևակերպումը կատարվում է առանց դրանց գործողության ժամկետները փոփոխելու։

69. Կորցրած լիցենզիաների կամ թույլտվությունների փոխարեն նորերը ձեռք բերելու   համար դրանց սեփականատերերը ՆԳ մարմիններ պարտավոր են ներկայացնել՝

ա) դիմում՝ համապատասխան լիցենզիա կամ թույլտվություն ստանալու մասին

բ) բացատրություն՝ կատարվածի հանգամանքների վերաբերյալ

գ) իրավաբանական անձի ղեկավարի կարգադրությամբ իրականացված  ստուգման նյութերը

դ) ստուգման նյութերի եզրակացության հիման վրա տրված իրավաբանական անձի (ստորաբաժանման) ղեկավարի հրամանի պատճենը

ե) օրենսդրությամբ սահմանված պետական տուրքերի վճարման անդորրագրերը։

VIII. Հատուկ կանոնադրական խնդիրներ իրականացնող իրավաբանական անձանց աշխատողների հատուկ պատրաստության ստուգումներ անցկացնելու կարգը

70. Քաղաքացիական և ծառայողական զենք, ինչպես նաև՝ մարտական զենքի առանձին տեսակներ պահելու և կրելու թույլտվություն ստանալու (երկարաձգելու) համար հատուկ կանոնադրական խնդիրներ իրականացնող իրավաբանական անձանց աշխատողները ՆԳՆ-ի սահմանած կարգով անցնում են հատուկ պատրաստականություն և  ստուգում են անցնում դիմում ներկայացնելու օրվանից մեկ ամսվա ընթացքում:

70.1. Պարբերական ստուգում անցկացնելու համար ՆԳՆ-ում ստեղծվում է հանձնաժողով, որի կազմում ընդգրկվում են ՆԳՆ-ի համապատասխան աշխատակիցներ

70.2. Հատուկ կանոնադրական խնդիրներ իրականացնող իրավաբանական անձանց ղեկավարները գրավոր տեղեկացվում են ստուգումների անցկացման ժամկետների մասին ստուգումից առնվազն 7 օր առաջ (հավելված 44)

70.3. Հատուկ կանոնադրական խնդիրներ իրականացնող իրավաբանական անձանց աշխատողների կողմից զենքի շրջանառության մասին ՀՀ օրենսդրական ակտերի իմացությունը ստուգվում է գրավոր՝ համապատասխան հարցաթերթիկների միջոցով, որին  զուգահեռ ստուգվում է նաև զենքի հետ վարվելու գործնական հմտությունները:

71. Պարբերական ստուգման ժամանակ որոշվում են՝ 

71.1. «Զենքի մասին» ՀՀ օրենքի 24 հոդվածի դրույթների իմացությունը

71.2. «ՀՀ քրեական օրենսգրքի» 13 (Անհրաժեշտ պաշտպանություն), 14 (Ծայրահեղ անհրաժեշտություն), 233 (Հրազենը կամ ռազմամթերքն անփութորեն պահելը) հոդվածների դրույթների իմացությունը

71.3. «Վարչական իրավախախտումների վերաբերյալ ՀՀ օրենսգրքի» 173 (Հրազենից կրակելը բնակավայրերում և դրա համար չնախատեսված տեղերում կամ սահմանված կարգի խախտումով), 190 (Քաղաքացիների կողմից ողորկափող որսորդական հրազեն ձեռք բերելու պահելու, ուրիշին տալու կամ վաճառելու կարգը խախտելը), 191 (Հրազենը և զինամթերքը պահելու կամ փոխադրելու կանոնները խախտելը), 192 (Հրազենի գրանցման (վերագրանցման) ժամկետները կամ հաշվառման վերցնելու կանոնները խախտելը), 193 (Ողորկափող որսորդական հրազենը և ռազմամթերքը իրացնելուց խուսափելը) հոդվածների դրույթների իմացությունը

71.4. Հատուկ միջոցների գործադրման կանոնների իմացությունը

71.5. Հատուկ միջոցների և հրազենի հետ վարվելու գործնական հմտությունները ստուգելիս որոշվում է կարճ ակոսափող, երկար ողորկափող հրազենի, գազային ատրճանակի, մեխանիկական փոշեցրիչների, աէրոզոլային և էլեկտրահարող սարքերի և այլ հատուկ միջոցների տակտիկա-տեխնիկական բնութագրերի, ինչպես նաև՝ հրազենի ու գազային ատրճանակների բաղկացուցիչ մասերի կառուցվածքի և նշանակության իմացությունը

71.6. Հանձնաժողովի անդամների հսկողությամբ ստուգվողները կատարում են 71.5 կետում նշված զենքի տեսակների մասնակի քանդում և հավաքում

71.7. Ուսումնական զենք և ռազմամթերք օգտագործելով կատարվում է զենքի լիցքավորման և լիցքաթափման, կրակ արձակելու, կրակելուց հետո գործողությունների հաջորդականության, ինչպես նաև՝ արցունքաբեր և գրգռիչ նյութերով լիցքավորված մեխանիկական փոշեցրիչներից, էլեկտրահարող և աէրոզոլային սարքերից օգտվելու կանոնների իմացության ստուգում

71.8. Որոշվում է անվտանգության կանոնների իմացությունը դրանք գործադրելիս, պահելիս և տեղափոխելիս

71.9. Ստուգվում է նաև արցունքաբեր և գրգռիչ նյութերից խոցված հրազենային և հատուկ միջոցների կիրառման հետ կապված այլ մարմնական  վնասվածքներ ստացած անձանց առաջին բուժ. օգնություն ցուցաբերելու իմացությունը, տուժածներին բուժ. հիմնարկներ փոխադրելու, դեպքի վայրը պահպանելու և ՆԳ մարմիններին տեղեկացնելու համար անհրաժեշտ անհետաձգելի գործողությունների յուրացումը:

72. Պարբերական ստուգման արդյունքները գրանցվում են հանձնաժողովի նիստի արձանագրության մեջ և վավերացվում են հանձնաժողովի նախագահի և անդամների ստորագրություններով (հավելված 45): Հանձնաժողովի նիստի արձանագրության մեկ օրինակը հանձնվում է իրավաբանական անձի ղեկավարին, իսկ մյուսը պահվում է ՆԳ մարմնում՝ հատուկ կանոնադրական խնդիրներ իրականացնող իրավաբանական անձի հաշվառման գործում:

72.1. Պարբերական ստուգում անցնող անձի գիտելիքների «անբավարար» գնահատման դեպքում հանձնաժողովի նախագահի կողմից 10-օրյա ժամկետում նշանակվում է կրկնակի ստուգում: Ստուգվողի գիտելիքները կրկնակի «անբավարար» գնահատվելու դեպքում նա զրկվում է զենք պահելու և կրելու թույլտվությունից:

72.2. Պարբերական ստուգում անցնող անձը  հանձնաժողովի որոշման հետ անհամաձայնության դեպքում կարող է բողոքարկել ՆԳ վերադաս մարմին:

72.3. Զենքի և հատուկ միջոցների գործադրման գիտելիքների իմացությունից և գործնական հմտությունից անբավարար գնահատական ստացած ստուգվողները մինչև կրկնակի (այդ թվում նաև բողոքարկման դեպքում) ստուգումներ անցնելը զրկվում են զենք պահելու և կրելու թույլտվություն ստանալու (երկարաձգելու) իրավունքից:

IX. Քաղաքացիների կողմից ինքնապաշտպանական զենքի հետ անվտանգ վարվելու կանոնների իմացության ստուգման կարգը

73. Ողորկ երկարափող ինքնապաշտպանական զենքի, անփող ինքնապաշտպանական  հրազենի, գազային ատրճանակների, ինչպես նաև՝ ազդանշանային զենքի հետ անվտանգ վարվելու կանոնների իմացությունը ստուգվում է թույլտվության համակարգի աշխատակիցների կողմից, նման զենք առաջին անգամ ձեռք բերող ՀՀ քաղաքացիների դիմումները ուսումնասիրելու ընթացքում։

Ստուգման ենթակա չեն քաղաքացիական կամ ծառայողական զենք պահելու, պահելու և կրելու թույլտվություն ունեցող անձինք, ինչպես նաև՝ զինծառայողները և պետական ռազմականացված կազմակերպությունների աշխատակիցները:

74. Ստուգման ընթացքում որոշվում է՝

74.1. «Զենքի մասին» ՀՀ օրենքի 17 հոդվածի 2 և 5 մասերի, 22 և 24 հոդվածների, ՀՀ քրեական օրենսգրքի 13-14, 232 և 233 հոդվածների, վարչական իրավախախտումների վերաբերյալ ՀՀ օրենսգրքի 173, 190, 191, 192 և 193 հոդվածների, ինչպես նաև՝ ՀՀ տարածքում քաղաքացիական և ծառայողական զենքի և դրա փամփուշտների շրջանառության կանոնների (26.10.99 թ. ՀՀ կառավարության 673 որոշում) և սույն հրահանգի ինքնապաշտպանական զենք պահելու անվտանգությունն ապահովելու մասին դրույթների իմացությունը։

74.2. Ինքնապաշտպանական զենքի հետ անվտանգ վարվելու (հավելված 46) և հրազեն ու գազային  զենք գործադրելուց տուժածներին առաջին բժշկական օգնություն ցույց տալու գործողությունների գործնական հմտությունների իմացությունը։

Քաղաքացիներին նշված ստուգումն իրականացնելու ժամանակ թույլատրվում է օգտագործել համակարգչային տեխնիկա և հատուկ ավտոմատացված միջոցներ, ինչպես նաև՝ առաջնորդվել հատուկ կանոնադրական խնդիրներ իրականացնող իրավաբանական անձանց աշխատողներին ստուգելու համար նախատեսված կարգով։

75. Ստուգման դրական արդյունքի դեպքում  թույլտվության համակարգի աշխատակիցը քաղաքացու թույլտվություն ստանալու դիմումի վրա գրառում է կատարում ստուգման արդյունքների մասին, նշելով ամիս ամսաթիվը և վավերացնում է իր ստորագրությամբ։

76. Ստուգման բացասական արդյունքի հետ անհամաձայնության դեպքում քաղաքացին կարող է բողոքարկել ՆԳ վերադաս մարմին, որը սույն հրահանգով նախատեսված կարգով կրկնակի ստուգում է իրականացնում: Կրկնակի ստուգման արդյունքների հետ անհամաձայնության դեպքում քաղաքացին կարող է բողոքարկել:

X. Զենքի եվ դրանց փամփուշտների շրջանառության նկատմամբ վերահսկողության իրականացումը ՆԳ մարմինների կողմից

77. Զենքի և փամփուշտների շրջանառության նկատմամբ վերահսկողությունն իրականացվում է ՆԳ մարմինների կողմից լիցենզիաներ և թույլտվություններ  ձևակերպելու, տալու, գործողության ժամկետները երկարաձգելու և վերաձևակերպելու, քաղաքացիների և իրավաբանական անձանց կողմից զենքի պահպանության անվտանգությունն ապահովող պայմանները ստուգելու, ինչպես նաև՝ քաղաքացիների դիմումներն ու տեղեկությունները, կազմակերպությունների հաղորդումները ուսումնասիրելու միջոցով։

Ստուգումներն իրականացվում են աշխատանքային պլանների համաձայն՝ կանխարգելիչ և հատուկ միջոցառումներ իրականացնելիս, ինչպես նաև՝ ՆԳՆ ղեկավարության որոշմամբ։

78. Զենքի և փամփուշտների շրջանառության նկատմամբ վերահսկողություն իրականացնող ՆԳ մարմինների աշխատակիցները իրավունք ունեն.

78.1. կատարել զենքի զննում դրա արտադրության, առևտրի, ցուցադրելու, պահելու և ոչնչացնելու վայրերում, ինչպես նաև՝ փոխադրելու ժամանակ

78.2. անհատույց վերցնել և ոչնչացնել ՀՀ տարածքում շրջանառությունն արգելված զենքն ու փամփուշտները, ինչպես նաև՝ վերցնել զենքը այն դեպքում, եթե՝

ա) բացակայում են զենք և փամփուշտներ արտադրելու, առևտրի, ձեռք բերելու, հավաքածուներ կազմելու կամ ցուցադրելու լիցենզիաները, ինչպես նաև՝ զենք պահելու, պահելու և օգտագործելու, պահելու և կրելու թույլտվությունները

բ) վերոնշյալ լիցենզիաներն ու թույլտվությունները ուժը կորցրած են ճանաչվել

գ) իրավաբանական անձանց և քաղաքացիների կողմից խախտվել են զենքը փոխանցելու, ձեռք բերելու, հավաքածուներ կազմելու, ցուցադրելու, գրանցելու, հաշվառելու, պահելու, կրելու, փոխադրելու, տեղափոխելու և գործադրելու կանոնները՝ մինչև ՀՀ օրենսդրությամբ սահմանված կարգով վերջնական որոշում կայացնելը

դ) հայտնաբերվել են ինքնաշեն կամ ձևափոխված զենքեր ու դրանց փամփուշտներ

ե) մահացել է քաղաքացիական զենքի  սեփականատերը կամ օրինական հիմքերով մարտական կամ ծառայողական զենք ստացած քաղաքացին՝ մինչև ժառանգության և զենքը պահելու թույլտվության հարցը լուծելը

զ) մեկ տարվա ընթացքում ՆԳ մարմիններում որպես անհաշտ ընտանիք հաշվառման մեջ գտնվող ընտանիքի անդամներից երկուսից ավելի դիմում-գանգատ է ստացվել

է) իրավաբանական անձը լուծարվել է

78.3. Վերահսկողական գործառույթ իրականացնելու նպատակով իրավաբանական անձանցից և քաղաքացիներից պահանջել բանավոր կամ գրավոր տեղեկություններ, իսկ գրավոր հարցման դեպքում՝ փաստաթղթեր կամ դրանց պատճեններ։

78.4. Սահմանված կանոնների խախտումներ բացահայտելու դեպքում ՀՀ քաղաքացիներին և իրավաբանական անձանց ղեկավարներին  տալ պարտադիր կատարման ենթակա գրավոր հանձնարարականներ՝ նշելով խախտված կամ չկատարված իրավական նորմերն ու կանոնները և դրանց վերացման ժամկետը:

Տվյալ հանձնարարականները շարադրվում են ստուգման ակտերում (հավելված 47):

78.5. Զենքի կորստի, հափշտակման կամ ապօրինի օգտագործման հանգեցնող կոպիտ խախտումներ հայտնաբերելու դեպքում կնքել զենքի և փամփուշտների առևտրի, ցուցադրման (ցուցահանդես-վաճառքների կամ աճուրդների) վայրերը, ժամանակավորապես սահմանափակելով աշխատակիցների մուտքը կամ արգելելով առևտրային գործունեությունը՝ մինչև հայտնաբերված թերությունները վերացնելը:

Զենքի պահպանության անվտանգությունը չապահովող պայմանների հայտնաբերման դեպքում վերցնել այն և փոխանցել պատասխանատու պահպանության ՆԳ մարմիններին։

78.6. Զենքի պահպանության և անվտանգ օգտագործման պատասխանատու անձանց կամ քաղաքացիների կողմից զենքի շրջանառության սահմանված կանոնները խախտելու դեպքում գրավոր նախազգուշացնել (հավելված 48) կամ կազմել վարչական իրավախախտման արձանագրություն:

78.7. Կիրառել ՀՀ օրենսդրությամբ նախատեսված այլ միջոցներ:

79. ՆԳ մարմինների իրավասու աշխատակիցները զենք և փամփուշտներ պահելու օբյեկտները, ինչպես նաև՝ առևտրային կազմակերպությունները ստուգում են եռամսյակը մեկ անգամ, կազմում են ակտ, որի պատճենը՝ ստորագրությամբ, հանձնում են իրավաբանական անձի ղեկավարին։

80. «Զենքի մասին» ՀՀ օրենքի 19-րդ հոդվածի համաձայն, ժամանակավոր օգտագործման համար զենք ստացած պաշտոնատար անձանց և զենքի սեփականատեր-քաղաքացիների բնակության վայրում զենք պահելու պայմանների ստուգումները իրականացվում են ՆԳ մարմինների աշխատակիցների (տեղամասային տեսուչներ կամ  թույլտվության համակարգի աշխատակիցներ) կողմից՝ տարին մեկ անգամ։

81. Զենքը և փամփուշտները վերցնելու ժամանակ կազմվում է արձանագրություն (հավելված 49), որը մեկ օրվա ընթացքում օբյեկտի ստուգման ակտի կամ զենքի սեփականատեր-քաղաքացու ստուգման մասին զեկուցագրի հետ միասին զեկուցվում է ՆԳ մարմնի ղեկավարին՝ սահմանված կարգով որոշում ընդունելու համար։

Վերցված զենքն ու փամփուշտները հանձնվում են ՆԳ մարմինների հերթապահ մաս։

82. Իրավաբանական անձի խախտում թույլ տված աշխատողի զենքն ու փամփուշտները վերցնելուց հետո իրավաբանական անձի ղեկավարին տրվում է գրավոր հանձնարարական, իսկ կրկնակի խախտման դեպքում իրավաբանական անձի աշխատողը զրկվում է զենք պահելու և  կրելու թույլտվությունից։ Աշխատողից վերցված զենքն ու փամփուշտները վերադարձվում են իրավաբանական անձի ղեկավարին կամ զենքի պահպանության պատասխանատու անձին:

83. Արտադրանքի գնդակակայունության փորձարկումներով զբաղվող կազմակերպություններին կամ «Զենքի մասին» ՀՀ օրենքի 19-րդ հոդվածի համաձայն ժամանակավոր օգտագործման փոխանցված զենքը պահելու, պահելու և կրելու, պահելու և օգտագործելու թույլտվությունները ուժը կորցրած ճանաչելու դեպքում վերադարձվում են այդ զենքերը տնօրինող պետական ռազմականացված կազմակերպությանը։

XI. Ներքին գործերի մարմինների կողմից տրված լիցենզիաների եվ թույլտվությունների ուժը կորցրած ճանաչելը

84. Զենքի և դրա փամփուշտների առևտրի, հավաքածու կազմելու, ցուցադրելու և ձեռքբերելու լիցենզիաները, ինչպես նաև՝ պահելու, պահելու և օգտագործելու, պահելու և կրելու թույլտվությունները ուժը կորցրած են ճանաչում դրանք տված ՆԳ մարմինները կամ ՆԳ վերադաս մարմինները:

85. Լիցենզիաների և թույլտվությունների ուժը կորցրած ճանաչելու մասին կազմվում է եզրակացություն (հավելված 50), նշելով նման որոշում կայացնելու հիմքերը, ինչպես նաև՝ տեղեկություններ լիցենզիայի, թույլտվության մեջ նշված զենքի և նրա սեփականատիրոջ մասին։

86. Լիցենզիաներն ու թույլտվությունները ուժը կորցրած ճանաչելու հիմքերն են՝

ա) իրավաբանական կամ ֆիզիկական անձը կամովին հրաժարվել է լիցենզիայից կամ թույլտվությունից, լրացել է լիցենզիայի գործողության ժամկետը, լուծարվել է իրավաբանական անձը կամ մահացել է զենքի սեփականատերը

բ) ֆիզիկական կամ իրավաբանական անձը բազմիցս (մեկ տարվա ընթացքում ոչ պակաս, քան երկու անգամ) գրավոր նախազգուշացումից հետո խախտել է կամ չի կատարել ՀՀ օրենսդրական կամ զենքի շրջանառությունը կանոնակարգող նորմատիվ-իրավական ակտերի պահանջները

գ) առաջացել են «Զենքի մասին» ՀՀ օրենքով նախատեսված լիցենզիաներ կամ թույլտվություններ ստանալու հնարավորությունը բացառող հանգամանքներ

դ) ֆիզիկական կամ իրավաբանական անձը կատարել է իր տնօրինության տակ գտնվող զենքի և դրանց փամփուշտների այնպիսի կառուցվածքային փոփոխություններ, որոնց հետևանքով փոխվել են դրանց  ձգաբանական կամ մյուս տեխնիկական բնութագրերը:

XII. Զենքի եվ փամփուշտների առեվտրով զբաղվող իրավաբանական անձանց գործունեության նկատմամբ վերահսկողությունը

87. Զենքի և փամփուշտների առևտրով զբաղվող իրավաբանական անձանց  ստուգման ընթացքում պարզվում են՝

ա) նրանց գործունեության համապատասխանությունը օրենսդրական և այլ նորմատիվ իրավական ակտերի պահանջներին, կանոնադրական, հիմնադիր և գրանցման փաստաթղթերի դրույթներին

բ) զենքի և փամփուշտների առևտրի լիցենզիայում նշված վայրից դուրս այլ վայրում զենք և փամփուշտներ պահելու թույլտվության առկայությունը

գ) զենքի և փամփուշտների առևտրի, ցուցադրման և պահման վայրի տեխնիկական ամրացվածության համապատասխանությունը սույն հրահանգի պահանջներին

դ) վաճառասրահներում, ցուցափեղկերում, անկիզելի կամ մետաղյա պահարաններում, արկղերում, դարակաշարերում, բուրգերում  զենքի և փամփուշտների պահպանության հուսալիությունը, ինչպես նաև՝ անվտանգության միջոցառումների ապահովումը զենքի հետ առնչվելու ընթացքում

ե) զենքի և փամփուշտների, կառուցվածքով զենքին նմանվող իրերի վաճառքի օրինականությունը, առևտրի վարման սահմանված կանոնների պահպանումը, ինչպես նաև՝ զենքի և փամփուշտների փոխարինման (վերադարձման) կարգի պահպանումը

զ) ակոսափող հրազենը ստուգման նպատակով կրակված լինելու հանգամանքը և կրակված գնդակներն ու պարկուճները հանրապետական գնդակապարկուճային հաշվառման քարտադարան ներկայացնելու փաստը

է) զենքի հաշվառման և գործավարության համապատասխանությունը սույն հրահանգի պահանջներին

ը) մատակարար իրավաբանական անձանցից ստացված կամ ՀՀ տարածք ներկրված վաճառքի ենթակա զենքի, փամփուշտների, կառուցվածքով զենքին նմանվող իրերի (արտադրանքի) սերտիֆիկատների առկայությունը, ինչպես նաև՝ գեղարվեստական հարդարված կամ ՀՀ թանգարանային հավաքածուից հանված զենքերի (անձնագրերի) պատմամշակութային և արվեստաբանական փորձաքննության ակտերի առկայությունը

թ) ՀՀ տարածքում շրջանառությունն արգելված զենքերի, փամփուշտների և կառուցվածքով զենքի նմանվող իրերի վաճառքի փաստերը

ժ) հետևյալ փաստաթղթերի առկայությունը և վարման կարգը

- զենքի առևտրով զբաղվող իրավաբանական անձանց համար սույն հրահանգով նախատեսված հաշվառման և գույքագրման փաստաթղթեր

- իրավաբանական և ֆիզիկական անձանց վաճառված զենքի և փամփուշտների լիցենզիաների կրկնօրինակներ

- ձեռք բերված, վաճառված կամ ՆԳ մարմինների կողմից կոմիսիոն վաճառքի համար փոխանցված զենքի մասին համահավաք տեղեկություններ

ժա) զենք և փամփուշտներ ձեռք բերելու լիցենզիաների, վաճառված գազային ատրճանակների (թմբուկավոր ռևոլվերների) ինքնապաշտպանական անփող հրազենի, ազդանշանային զենքի վերաբերյալ համահավաք տեղեկությունները, փոխարինված (վերադարձված) զենքերի ակտերը, ինչպես նաև՝  իրավասու մարմինների կողմից վերցված զենքերի մասին նյութերը ժամանակին ՆԳ մարմիններ ուղարկելը (ներկայացնելը)

ժբ) զենքն ու փամփուշտները պահելու, հաշվառելու իրավունք ունեցող պատասխանատու անձանց՝ վաճառողների, նյութական պատասխանատուների, տեղափոխման ժամանակ ուղեկցողների զենքի հետ կապված աշխատանքներին թույլատրված աշխատողների ներքին հսկողության կարգը, ինչպես նաև՝ զենքի և փամփուշտների կորստի,  փչացման, պակասորդի փաստերով ստուգման նյութերի առկայությունը

ժգ) իրավաբանական անձի աշխատողներին զենքի և փամփուշտների հետ կապված աշխատանքներին՝ այդ թվում ուղեկցման և ցուցադրման ժամանակ առնչվելու թույլտվության առկայությունը

ժդ) ՆԳ մարմինների աշխատակիցների կողմից հայտնաբերված խախտումները ժամանակին ու լիարժեք վերացնելը և գործադիր իշխանության  մարմինների հրահանգները կատարելը։

88. Ստուգումների ժամանակ սույն հրահանգի 87 կետում նշված հարցերը հետագայում պարզաբանելու նպատակով ՆԳ մարմնի իրավասու ղեկավարի որոշմամբ կարող են պահանջվել անհրաժեշտ փաստաթղթեր և պատճեններ, գրավոր կամ բանավոր տեղեկություններ:

89. Զինված պահպանություն ունեցող, զենքի առևտրով զբաղվող կազմակերպությունների շինությունների և առևտրային սրահների ստուգման ընթացքում պարզվում են կողմերի իրավահարաբերությունների  պայմանագրային պարտավորությունները և կոնկրետ աշխատողների կողմից պահպանություն իրականացնելու օրինականությունը։

XIII. Զենքի եվ փամփուշտների փոխանցման նկատմամբ վերահսկողությունը

90. Իրավաբանական և ֆիզիկական անձինք իրենց պատկանող զենքերը քրեագիտական պահանջների համապատասխանության, տեխնիկական բնութագրի  ստուգման, իսկ ակոսափող զենքը ստուգման նպատակով կրակելու համար փորձաքրեագիտական ստորաբաժանումներին փոխանցելիս պետք է ՆԳ թույլտվության համակարգի ստորաբաժանումներում ստանան սահմանած նմուշի ուղեգիր (հավելված 51)։

91. ՀՀ թանգարանային հավաքածուին սեփականատիրոջ կողմից զենք և փամփուշտներ փոխանցելը իրականացվում է նվիրատվության պայմանագրի կամ ժառանգության իրավունքը հաստատող փաստաթղթի, պատմամշակութային կամ արվեստաբանական փորձաքննության ակտի,  կոնկրետ իրերը թանգարանի հավաքածուի մեջ ընդգրկելու մասին թանգարանի ղեկավարի հրամանի առկայության դեպքում։

92. Զենք և փամփուշտներ ցուցադրելու համար սեփականատերերը զենքը փոխանցում են  միջոցառման  կազմակերպչին՝ կազմելով պատասխանատու պահպանության ընդունելու մասին ակտ։

93. Փոխադրման նպատակով զենքը և փամփուշտները փոխանցվում են փոխադրողին՝ համապատասխան պայմանագիր կնքելուց և ընդունման-հանձնման ակտ կազմելուց հետո՝ դրանց մեկ օրինակը կցելով զենքի փոխադրման թույլտվություն ստանալու համար ՆԳՆ ՀԿԱ վարչություն ներկայացվող նյութերին։

Օդային տրանսպորտով զենք փոխադրելու դեպքում, դրանք ամբողջ չվերթի ընթացքում, պատասխանատու պահպանության են հանձնվում։

94. Համաձայն կնքված պայմանագրի կամ հրավերքի, սպորտային միջոցառումների, որսի կամ ցուցահանդեսների մասնակցելու նպատակով, օտարերկրյա քաղաքացու կողմից ՀՀ ներկրվող զենքը մաքսային ձևակերպումները կատարելուց հետո մաքսային հայտարարագրում ստորագրության դիմաց փոխանցում է միջոցառումը նախաձեռնած կազմակերպության զենքի պահպանության պատասխանատու անձին:

Ներկրված զենքը օտարերկրյա քաղաքացուն  հանձնվում է միջոցառումը սկսվելուց անմիջապես առաջ, իսկ ավարտից հետո վերադարձվում է պատասխանատու պահպանության։ Հայաստանի Հանրապետությունից մեկնելու ժամանակ զենքը և փամփուշտները օտարերկրյա քաղաքացուն  փոխանցվում են մաքսային ձևակերպումից առաջ։

95. Որսորդական տնտեսություն վարող կազմակերպության զենքի և փամփուշտների պահպանության պատասխանատու անձը, որսորդության ժամանած Հայաստանի Հանրապետության քաղաքացիներից ընդունում և հանձնում է զենքը՝ ընդունման-հանձնման մատյանում նշելով տեսակը, մոդելը, տրամաչափը և համարը:

96. Զենք պահելու հատուկ պայմաններ ունեցող և ՆԳ մարմիններից զենք պահելու թույլտվություն ստացած հրաձգային մարզական կազմակերպություններին ՀՀ քաղաքացիները իրենց պատկանող զենքը փոխանցում են պայմանագիր կնքելուց հետո՝ ընդունման-հանձնման մատյանում նշելով զենքի տեսակը, մոդելը, տրամաչափը և համարը:

97. Հատուկ պետական պաշտպանության ենթակա անձինք, որոշակի կարգի զին. ծառայողները և պետական ռազմականացված կազմակերպությունների կենսաթոշակի անցած աշխատակիցները, ինչպես նաև՝ զենքով պարգևատրված անձինք ստացիոնար բուժման կամ Հայաստանի Հանրապետությունից երկարատև բացակայելու ժամանակ պարտավոր են իրենց մոտ գտնվող զենքի պահպանությունն ապահովելու նպատակով, այն ի պահ հանձնել զենքը տված գերատեսչության պատասխանատու պաշտոնատար անձին կամ բնակության վայրի ՆԳ մարմիններին՝ ընդունման-հանձնման մատյանում նշելով փոխանցվող զենքի տեսակը, մոդելը, տրամաչափը և համարը:

98. Զենքի կամ փամփուշտների փոխանցումը մի կազմակերպությունից մյուսին իրականացվում է ՆԳՆ ՀԿԱ վարչության հետ համաձայնեցված՝ փոխանցման պայմանագրի հիման վրա:

Զենքի և փամփուշտների փոխանցման ժամանակ կազմվում է ընդունման-հանձնման ակտ, որի մեկ օրինակը ուղարկվում է ՆԳՆ ՀԿԱ վարչություն, որն իր հերթին տարածքային հաշվառումն ապահովելու նպատակով այդ մասին տեղեկացնում է զենքը փոխանցող և ընդունող կազմակերպությունների գտնվելու վայրի ՆԳ մարմիններին:

99. Գեղարվեստական հարդարված զենքի հավաքածուների և մշակութային արժեք ունեցող այլ զենքերի (այդ թվում իրավասու  մարմինների կողմից վերցվածների) հատուկ պայմաններում պահպանումն ապահովելու նպատակով կարող են սահմանված կարգով փոխանցվել զենքի թանգարաններից որևէ մեկին՝ ՀՀ մշակույթի, երիտասարդության հարցերի և սպորտի նախարարության եզրակացությամբ՝ պատասխանատու պահպանության մասին պայմանագիր կնքելուց հետո։

XIV. Զենքի եվ դրա փամփուշտների ձեռքբերման նկատմամբ վերահսկողությունը

100. Զենք ձեռք բերելու լիցենզիաներն օգտագործելու և վաճառված զենքերը ժամանակին գրանցելու վերահսկողություն իրականացնելու համար մատակարար կազմակերպությունները պարտավոր են՝

ա) եռամսյակը մեկ ՆԳՆ ՀԿԱ վարչություն ներկայացնել տեղեկություններ՝ վաճառված զենքի և փամփուշտների մասին (հավելված 52)

բ) զենք և փամփուշտներ ձեռք բերելու լիցենզիաների կրկնօրինակները եռօրյա ժամկետում ուղարկել այն ՆԳ մարմին, որոնց կողմից դրանք տրվել են:

101. ՀՀ իրավաբանական անձանց և քաղաքացիներին տրված, գործողության ժամկետը լրացած, չօգտագործված լիցենզիաները  ենթակա են վերադարձման դրանք տված ՆԳ մարմին։

102. Օտարերկրյա քաղաքացիները չօգտագործված լիցենզիաներն ու արտահանման թույլտվությունները կարող են հանձնել մաքսային ձևակերպումներ անցնելու վայրի ՆԳ մարմին, որոնք եռօրյա ժամկետում պարտավոր են նշված փաստաթղթերը ուղարկել ՆԳՆ ՀԿԱ վարչություն:

103. Ժառանգությամբ փոխանցված զենքը պահելու, պահելու և կրելու թույլտվություն ստանալուց հետո, պատասխանատու պահպանություն իրականացնող ՆԳ մարմնի կողմից զենքն ու փամփուշտները հանձնվում են ժառանգորդին:

Այն դեպքում, երբ ժառանգորդը զենք ունենալու իրավունք չունի կամ  կամավոր հրաժարվում է ժառանգությունից նրա գրավոր հայտարարության հիման վրա, զենքն ու փամփուշտները կարող են կոմիսիոն վաճառքի համար փոխանցվել առևտրային կազմակերպություն, վաճառվել անձանց, հանրապետության թանգարանային հավաքածուին կամ ոչնչացվել, եթե օգտագործման պիտանի չեն։

XV. Զենքի ու փամփուշտների հավաքածուներ կազմելու եվ ցուցադրելու նկատմամբ վերահսկողությունը

104. Զենքի և փամփուշտների հավաքածու կազմելով կամ դրանց ցուցադրմամբ զբաղվող քաղաքացիների և իրավաբանական անձանց գործունեության  ստուգումներն  իրականացվում են ՆԳ մարմինների թույլտվության համակարգի աշխատակիցների կողմից, անհրաժեշտության դեպքում ընդգրկելով մշակութային արժեքների պահպանության հատուկ հավատարմագրված ներկայացուցիչների՝ ապահովելով զենքերի և դրանց սեփականատերերի վերաբերյալ տեղեկությունների գաղտնիությունը։

105. Հավաքածու ունեցող իրավաբանական անձանց և սեփական հավաքածու ունեցող քաղաքացիների ստուգումներն իրականացվում են եռամսյակը մեկ անգամ:

Զենքի և փամփուշտների ցուցադրմամբ զբաղվող իրավաբանական և ֆիզիկական անձանց ստուգումներն իրականացվում են նրանց կողմից կազմակերպված ցուցահանդեսներից առաջ և դրանց ավարտից հետո։

106. Զենքի և փամփուշտների հավաքածու ունեցող կամ դրանց ցուցադրմամբ զբաղվող իրավաբանական անձանց ստուգումների ընթացքում պարզվում են՝

ա) նրանց գործունեության համապատասխանությունը օրենսդրական և այլ իրավական ակտերին, կանոնադրական և գրանցման փաստաթղթերին, զենքի և փամփուշտների հավաքածու կազմելու կամ ցուցադրելու լիցենզիաների և լիցենզիաներում նշված վայրերից դուրս այլ վայրերում դրանք պահելու թույլտվությունների առկայությունը

բ) զենքի ընդունման-հանձնման ակտերի առկայությունը և զենքի ու փամփուշտների սեփականատերերի հետ կնքված ցուցադրմանը մասնակցելու պայմանագրերը կամ իրավասու մարմինների կողմից վերցված զենքն ու փամփուշտները թանգարաններին պատասխանատու պահպանության փոխանցելու վերաբերյալ ընդունման-հանձնման ակտերը,  ինչպես նաև՝ հավաքածու կազմելու ենթակա զենքի և փամփուշտների պատմամշակութային ու արվեստաբանական փորձաքննության ակտերը

գ) զենք և փամփուշտներ ցուցադրելու, պահելու տեղերի համապատասխանությունը սույն հրահանգի պահանջներին

դ) զենքի և փամփուշտների հավաքածու կազմելու, ցուցադրելու,  պահելու սահմանված կարգի և ցուցափեղկերում ու այլ տեղերում նրանց պահպանության ապահովումը, ինչպես նաև՝ դրանց հետ անվտանգ վարվելու կանոնների իմացությունը

ե) զենքի հաշվառման համակարգի, հաշվառման փաստաթղթերի, գործավարության համապատասխանությունը սույն հրահանգի  պահանջներին

զ) ցուցադրման համար նախատեսված զենքի ընդունման-հանձնման, մշակութային արժեք ունեցող զենքի պատմամշակութային և արվեստաբանական փորձաքննության ակտերի առկայությունը, ինչպես նաև՝ իրավասու մարմինների կողմից վերցված զենքի և փամփուշտների վերաբերյալ նյութերը ՆԳ մարմիններին  ժամանակին հանձնելու փաստերը

է) զենքի և փամփուշտների հետ վարվելու, դրանց պահպանության պատասխանատու անձանց, փորձաքննություն, հետազոտություն իրականացնող  մասնագետներին հանձնելու և զենքի ու փամփուշտների հետ կապված այլ թույլատրելի աշխատանքների փաստաթղթավորումը

ը) իրավաբանական անձի աշխատողներին զենքի և փամփուշտների հետ առնչվող աշխատանքներին թույլատրելու հիմքերը, ինչպես նաև՝ անվտանգության  միջոցառումների ապահովումը տեղափոխման, ուղեկցման և  գնորդներին ու այցելուներին ցուցասրահներ, իսկ այլ կազմակերպությունների մասնագետներին՝ հավաքածուների պահոցներ և զետեղարաններ մուտքը թույլատրելիս

թ) ՆԳ մարմինների աշխատակիցների կողմից նախորդ ստուգումների ժամանակ հայտնաբերված խախտումների ժամանակին և լիարժեք վերացումը:

107. Ցուցահանդես-վաճառքներ և աճուրդներ կազմակերպելուց առաջ իրականացվում է զենք ցուցադրող իրավաբանական անձանց ստուգումներ սույն հրահանգի 87 կետին համապատասխան՝ զենքի առևտրով զբաղվող իրավաբանական անձանց համար նախատեսված կարգով:

108. Գործադիր մարմնի որոշման համաձայն կազմակերպվող զենքի և փամփուշտների ցուցահանդեսի ստուգումները իրականացվում են ՆԳ մարմինների կողմից՝  սույն հրահանգի 106 կետով նախատեսված կարգով:

109. Հայաստանի Հանրապետության քաղաքացին իրեն պատկանող կամ այլ քաղաքացիներից փոխանցված զենքի և փամփուշտների հավաքածուները ցուցադրում է դրանց համար  հատկացված ցուցասրահում, որը ստուգվում է սույն հրահանգով սահմանված իրավաբանական անձանց  ցուցահանդեսներ կազմակերպելու համար նախատեսված կարգով։

Զենքի սեփականատիրոջ բնակության վայրում ցուցադրում կազմակերպելու դեպքում ստուգումներն իրականացվում են ցուցադրելու լիցենզիա տված ՆԳ մարմնի աշխատակիցների կողմից՝ սույն հրահանգով սահմանված քաղաքացիների զենք  պահելու պայմանները ստուգելու համար նախատեսված կարգով:

XVI. Իրավաբանական անձանց մոտ առկա զենքի եվ փամփուշտների հաշվառման կարգը

110. Կազմակերպություններում զենքի և փամփուշտների հաշվառումն իրականացնում է իրավաբանական անձի ղեկավարը կամ այն աշխատողը,  որի վրա իրավաբանական անձի ղեկավարի հրամանով դրվել են զենքի և փամփուշտների պատասխանատու պահպանության պարտականությունները:

Կառուցվածքային, տարածքային ստորաբաժանումներ ունեցող կազմակերպություններում իրավաբանական անձի ղեկավարի հրամանով զենքի և փամփուշտների պատասխանատու պահպանության պարտականությունները դրվում են յուրաքանչյուր տարածքային ստորաբաժանման ղեկավարի վրա:

111. Իրավաբանական անձի մոտ առկա զենքերն ու փամփուշտները ենթակա են հաշվառման։ Զենքի և փամփուշների հաշվառումը կատարվում է ելքի-մուտքի փաստաթղթերով (կարգագրերով, ապրանքագրերով, քարտերով, ամփոփագրերով, ակտերով և այլն), ցուցակագրով, զենքի ու փամփուշտների հաշվառման մատյաններով։

Թույլատրվում է հաշվառում կատարել համակարգիչների միջոցով՝ պարտադիր պայմանով, որ տվյալներն ամեն օր մուտքագրվեն մագնիսային և թղթային կրիչների վրա՝  արտացոլելով  զենքի և փամփուշտների յուրաքանչուր տեղաշարժ:

Այդ նպատակով օգտագործվող փաստաթղթերի ձևաթղթերը պետք է համապատասխանեն սույն հրահանգով սահմանված ձևերին և հաշվառման ցուցակագրերի, մատյանների համար նախատեսված չափերին։

112. Իրավաբանական անձանց հաշվառման փաստաթղթերը կազմվում են  թույլտվության համակարգի ստորաբաժանումներում՝ գործավարության պահանջներին համապատասխան, հաշվառման  ցուցակագրերում, գրանցման մատյաններում գրառումները կատարելով ելքի ու մուտքի իսկական և կատարված փաստաթղթերի հիման վրա՝ նշելով ՆԳ մարմնի կողմից տված լիցենզիաներն ու թույլտվությունները:

Սույն հրահանգով սահմանված զենքի և փամփուշտների հաշվառման ցուցակագրերը, գրանցման մատյանները, ինչպես նաև՝ ավտոմատացված հաշվառման համար նախատեսված  ձևաթղթերն օգտագործելուց առաջ ենթակա են պարտադիր գրանցման՝ թույլտվության համակարգի  ստորաբաժանման կողմից: Մատյանների թերթերը համարակալվում, կարվում և կնքվում են ՆԳ մարմնի կնիքով:

Կազմակերպություններում և դրանց ստորաբաժանումներում զենքի պահպանության վերահսկողություն իրականացնելու նպատակով ներքին հաշվառման փաստաթղթերի վարման կարգը և զենքի պահպանության պատասխանատու անձանց պարտականությունները սահմանվում են իրավաբանական անձանց կողմից, համաձայն սույն հրահանգի պահանջների։

113. Զենքի և փամփուշտների փաստաթղթերը կարվում են հաշվառման գործերում, իսկ համակարգիչներով ձևակերպված փաստաթղթերը՝ հաշվառման գործեր վարելու կանոնների պահանջներին համապատասխան մատյաններում: Ամրակարված փաստաթղթերի մասին տեղեկությունները նախապես մուտքագրվում են գործերի գույքացուցակում և մատյանում:

Զենքի հաշվառման ցուցակագրերը, գրանցման մատյանները, հաշվառման փաստաթղթերով գործերը վարվում են զենքի ու փամփուշտների պահման պատասխանատու անձանց կողմից, իսկ դրանց ավարտից հետո հանձնվում են կազմակերպության արխիվ:

Հաշվառման փաստաթղթերով գործերը, ցուցակագրերը, գրանցման մատյանները ոչնչացվում են 10 տարի պահելուց հետո, կամ տվյալ իրավաբանական անձի գործունեությունը վերահսկող ՆԳ մարմնի գրավոր թույլտվությամբ։ Եթե հաշվառման փաստաթղթերի հետագա պահպանումը  իրավաբանական անձի մոտ անհնար է, դրանք հանձնվում են ՆԳ մարմիններին։

114. Առանձին զետեղարանում զենքի և փամփուշտների տեղաբաշխման ժամանակ դրանց պահպանության համար պատասխանատու անձանց կողմից տարվում են հետևյալ հաշվառման փաստաթղթեր.

ա) զենքի և փամփուշտների հանձնման-ընդունման մատյան (հավելված 53)

բ) զենքի ու փամփուշտների առկայության և տեխնիկական վիճակի ստուգման մատյան (հավելված 54)

գ) շուրջօրյա զինված պահպանության առկայության դեպքում հերթապահության հանձնման-ընդունման մատյան (հավելված 55)

դ) պահպանության տակ գտնվող զենքի և փամփուշտների զինասենյակներում, չհրկիզվող կամ մետաղյա պահարաններում, բուրգերում և արկղերում պահվող զենքի փաթեթավորման թերթիկները (հավելված 56)

ե) չհրկիզվող կամ մետաղյա պահարանում, բուրգում, արկղում տեղավորված զենքի ամրացվածության ցուցակ (հավելված 57)

զ) զենքի և փամփուշտների հետ կապված աշխատանքներին թույլատրված անձանց ցուցակ:

115. Իրավաբանական անձանց պատկանող հավաքածուների կամ ցուցադրման ենթակա զենքի պահոցներում և զետեղարաններում պետք է վարվեն զենքի հանձնման-ընդունման, իսկ ցուցահանդեսների փակ պահոցների համար՝ այցելուների հաշվառման մատյաններ:

Թանգարանային զենքի հաշվառման փաստաթղթերը վարվում են ցուցադրման սրահներում և պահոցներում:

116. Պահեստային շինություններում զենքի և փամփուշտների տեղաբաշխման դեպքում հաշվառման փաստաթղթերը վարվում են սույն հրահանգի 114 կետի «բ», «զ» ենթակետերում նշված ձևով, ինչպես նաև՝

ա) ստացվող, պահվող և փոխանցվող (վաճառվող) զենքի ու փամփուշտների առկայության և շարժի հաշվառման մատյան (հավելված 58)։ Մեծ քանակությամբ զենքերի պահպանության դեպքում թույլատրվում է ունենալ հաշվառման մի քանի մատյաններ՝ ըստ զենքի մոդելի և փամփուշտների տեսակների

բ) դարակաշարերի վրա պահվող զենքի և փամփուշտների դարակաշարային պիտակներ (հավելված 59)

գ) պահպանության ստորաբաժանման համար նախատեսված ծառայողական փաստաթղթեր

դ) զենքի ու փամփուշտների ներկրման և արտահանման հիմնական,  ժամանակավոր և միանգամյա անցագրերի հաշվառման մատյաններ։

117. Բեռների պահպանության, ուղեկցման կամ ինկասացիայի ստորաբաժանումներում ինչպես նաև՝ պահակակետերում վարվում են հետևյալ ծառայողական փաստաթղթեր.

ա) իրավաբանական անձի ղեկավարի կողմից հաստատված ծառայության ժամանակացույց

բ) օբյեկտի (օբյեկտների) պահպանությունը, բեռների ուղեկցումը և արժեքավոր իրերի ինկասացիան իրականացնող վերակարգերի ամենօրյա պահակակետային ամփոփագրեր։ Պահակակետային ամփոփագրերը պետք է հաստատվեն իրավաբանական անձի ծառայությունը կազմակերպող  պատասխանատու անձի կողմից

գ) օբյեկտների պահպանության պահակակետերի ցանկ, ինկասացիայի և բեռների ուղեկցման երթուղիներ՝ նշելով օգտագործվող զենքի և փամփուշտների տեսակները և մոդելները

դ) իրավաբանական անձի աշխատողներին անհատական ամրացված զենքի և փամփուշտների համարային հաշվառման մատյան (հավելված 60)

ե) շարժական պահակախմբերի երթուղիները՝ հաստատված  իրավաբանական անձի ղեկավարի կողմից

զ) ուսումնական հրաձգության, զենքի նշանափորձման և նշանազարկը ստուգելու նպատակով փամփուշտներ բաց թողնելու հայտեր, հաշվառման գործեր և իրավաբանական անձի ղեկավարի հրամանների պատճեններ

է) հրաձգարաններում զենքի և փամփուշտների բաշխման-հանձնման ամփոփագրեր։

Այն դեպքերում, երբ իրավաբանական անձի հաստիքային կառուցվածքում առկա են պահպանության մի քանի ստորաբաժանումներ, բեռների ուղեկցման կամ ինկասացիոն խմբեր, վերը թվարկված փաստաթղթերի գործավարությունը կատարվում է հատուկ ստեղծված ծառայության կողմից, որն ամեն օր պահակակետային ամփոփագրեր է հանձնում ստորաբաժանումներին, ինչպես նաև՝ վերակարգի հերթապահներից, արտագնա պահակախմբերից, բեռներ ուղեկցող և ինկասացիայի խմբերից ընդունում է լրացված ամփոփագրերը։

118. Տիրում, հրաձգաստենդային համալիրում, հրաձգարանում կամ այլ հրաձգային օբյեկտում վարվում են.

ա) հրաձգության հաշվառման մատյան (հավելված 61)

բ) հրաձգության անցկացման պատասխանատու անձ նշանակելու մասին օբյեկտի ղեկավարի հրամանի պատճենը, հաշվառման գործի հետ միասին

գ) սույն հրահանգի 114 կետով սահմանված փաստաթղթեր (հրաձգային օբյեկտի զետեղարանում զենք և փամփուշտներ պահելու դեպքում)

դ) անցագրային ռեժիմ ապահովող ծառայողական փաստաթղթեր։

119. Զենքի և փամփուշտների առևտրով զբաղվող իրավաբանական անձանց կողմից վարվում են.

ա) ստացվող, պահվող և փոխանցվող զենքի ու փամփուշտների առկայության և շարժի հաշվառման մատյաններ, ինչպես նաև՝ կոմիսիոն վաճառքի ընդունված զենքի և փամփուշտների հաշվառման նույնանման  առանձին մատյաններ

բ) վաճառված զենքի և փամփուշտների հաշվառման մատյան (հավելված 62)

գ) փաստաթղթեր՝ սահմանված սույն հրահանգի 114 կետի «ա», «գ», «զ» ենթակետերում, զենքի և փամփուշտների պահման յուրաքանչյուր վայրի համար (զինասենյակի, պահեստի, շինության)

դ)  զենքի և փամփուշտների ընդունման (հավելված 63) ակտ։

120. Հատուկ կանոնադրական խնդիրներ իրականացնող իրավաբանական անձանց կողմից վարվում են.

ա) անհատական ամրացված զենքի և փամփուշտների համարային հաշվառման մատյան

բ) զենքի և փամփուշտների պահման, ինչպես նաև՝ իրավաբանական անձին պատկանող հրաձգային օբյեկտների վերաբերյալ հաշվառման փաստաթղթեր

գ) ուսումնական հրաձգության, ստուգման նպատակով ակոսափող հրազենը կրակելու, զենքի նշանափորձման և նշանազարկը ստուգելու նպատակով, ինչպես նաև՝ ծառայողական պարտականությունների կատարման ժամանակ ծախսված փամփուշտների դուրսգրման ակտեր

դ) զենքի և փամփուշտների ընդունման-փոխանցման ակտ

ե) տարածքային ստորաբաժանումների միջև զենքի և փամփուշտների փոխանցման մասին իրավաբանական անձի ղեկավարի հրամանը՝ գրավոր տեղյակ պահելով վերահսկող ՆԳ մարմնին։

121. Զենքի և փամփուշտների հավաքածու կազմող կազմակերպությունները վարում են.

ա) հավաքածուների մեջ  ընդգրկված զենքի և փամփուշտների համարային հաշվառման մատյան, ինչպես նաև՝ ցուցադրման, պատմամշակութային և արվեստաբանական փորձաքննության կամ պատասխանատու պահպանության փոխանցված զենքի և փամփուշտների (հավաքածուի) հաշվառման առանձին մատյան

բ) զինասենյակներում, պահոցներում և ցուցասրահներում պահվող զենքի հաշվառման փաստաթղթեր, ինչպես նաև՝ թանգարանների և իրավաբանական անձանց համար ՀՀ մշակույթի, երիտասարդության հարցերի և սպորտի նախարարության կողմից սահմանված, ՀՀ թանգարանային հավաքածուում ընդգրկված, զենքի թանգարանային հաշվառման փաստաթղթեր

գ) զենքի և փամփուշտների ընդունման-փոխանցման ակտեր։

122. Գործադիր իշխանության մարմնի որոշումով զենքի և փամփուշտների ցուցադրում իրականացնող կազմակերպությունները հաշվառման փաստաթղթերը վարում են սույն հրահանգի 121 կետի «ա» և «բ» ենթակետերի համաձայն:

123. Արտադրանքի գնդակադիմացկունության փորձարկումներով զբաղվող իրավաբանական անձինք և սերտիֆիկացման մարմինները վարում են.

ա) ստացվող, պահվող և փոխանցվող զենքի և փամփուշտների հաշվառման մատյան, իսկ սերտիֆիկացման մարմիններում՝ նաև մաքսային հսկողության տակ գտնվող  և սերտիֆիկացման համար փոխանցված զենքի և փամփուշտների հաշվառման առանձին մատյան

բ) իրավաբանական անձանց զենք և փամփուշտներ պահելու և օգտագործելու համար նախատեսված հաշվառման փաստաթղթեր

գ) տեխնոլոգիական նպատակներով կամ փորձարկումների համար փոխանցված զենքի և փամփուշտների ընդունման-փոխանցման ակտեր, ինչպես նաև՝ օգտագործված փամփուշտների դուրսգրման ակտեր

դ) իրավաբանական անձի օբյեկտի պահպանությունն ու անցագրային ռեժիմը իրականացնող ստորաբաժանման ծառայողական փաստաթղթեր։

124. Մարզական կազմակերպությունները և ուսումնական հիմնարկները վարում են.

ա) զենքի և փամփուշտների, այդ թվում նաև` պատասխանատու պահպանության փոխանցված զենքի համարային հաշվառման մատյան

բ) պարապմունքներ անցկացնելու համար զենք հատկացնելու և հրաձգություն անցկացնելու մասին մարզական կազմակերպության կամ ուսումնական հիմնարկի ղեկավարի հրամանի պատճենը՝ հաշվառման գործերի հետ միասին

գ) հրաձգության կամ ուսումնական պարապմունքների համար զենք և փամփուշտներ հատկացնելու հայտ-հաշվարկներ (հավելված 64)

դ) հրաձգության ժամանակ զենքի և փամփուշտների բախշման հանձնման ամփոփագրեր

ե) օգտագործված փամփուշտների դուրսգրման ակտեր

զ) զենքի և փամփուշտների ընդունման-փոխանցման ակտ

է) զինասենյակներում տեղավորված զենքի և փամփուշտների հաշվառման փաստաթղթեր, ինչպես նաև՝  հրաձգային օբյեկտների համար նախատեսված փաստաթղթեր՝ դրանց առկայության դեպքում:

125. Որսորդական տնտեսություն վարող կազմակերպությունները վարում են.

ա) կազմակերպության աշխատողներին ամրացված որսորդական հրազենի և զենքի ու փամփուշտների համարային հաշվառման մատյան

բ) քաղաքացիներին աշխատանքի ընդունելու, նրանց որսորդական զենք ամրացնելու մասին իրավաբանական անձի ղեկավարի հրամանների պատճեններ և հաշվառման գործեր

գ) զենքի և փամփուշտների ընդունման-փոխանցման ակտ

դ) օգտագործված փամփուշտների դուրսգրման ակտեր

ե) զենք և փամփուշտներ պահող հրաձգային  օբյեկտի համար նախատեսված հաշվառման փաստաթղթեր՝ դրանց առկայության դեպքում:

126. Զենքի փոխադրում իրականացնող իրավաբանական անձինք վարում են.

ա) զենքի և փամփուշտների փոխադրման հաշվառման մատյաններ, այդ թվում՝ մաքսային հսկողության  տակ գտնվող զենքի և փամփուշտների հաշվառման համար առանձին մատյաններ (հավելված 65)

բ) պետական կառավարման լիազորված մարմնի (ՆԳՆ պետական պահպանության վարչություն) կողմից սահմանված տրանսպորտային հաշվառման ուղեկցող փաստաթղթեր

գ) զենքի և փամփուշտների տեղաբաշխման ու պահման տեղերի համար սույն հրահանգով նախատեսված փաստաթղթեր, ինչպես նաև՝ անցագրային ռեժիմ և փոխադրվող  (տեղափոխվող) բեռի ուղեկցումն իրականացնող ստորաբաժանման ծառայողական փաստաթղթեր:

127. Իրավաբանական անձինք, որոնք մարզական միջոցառումները կամ որսորդությունը անց են կացնում օտարերկրյա քաղաքացիների մասնակցությամբ, նրանց կողմից ներկրված զենքը և փամփուշտները հաշվառում են զենքի ընդունման-հանձնման մատյանի առանձին բաժնում:

128. Իրավաբանական անձանց հաշվեկշռում գտնվող, այդ թվում ՆԳ մարմիններից ժամանակավոր օգտագործման համար ստացված կամ պետական ռազմականացված կազմակերպությունների կողմից փոխանցված զենքերի ընթացիկ հաշվառման հիմնական փաստաթուղթը հանդիսանում է անհատական ամրացված զենքի և փամփուշտների համարային հաշվառման մատյանը:

Նշված մատյանի առանձին բաժնում թույլատրվում է հաշվառել իրավաբանական անձանց օգտագործման համար թույլատրված ինքնապաշտպանական հատուկ միջոցներ, ինչպես նաև՝ զենքի խնամքի համար նախատեսված գործիքներ, նյութեր և հարմարանքներ։

129. Զենքի  հաշվառման փաստաթղթերում նշվում է նրա տեսակը, ձևը, մոդելը, տրամաչափը, իսկ փամփուշտների մասին՝ լրացուցիչ, քանակը և արտադրության խմբաքանակի համարը։

130. Պահպանության պատասխանատու անձի կողմից զենքի և փամփուշտների հանձնումը կազմակերպության աշխատողներին, իրականացվում է ընդունման-հանձնման մատյանում համապատասխան գրանցում կատարելուց հետո՝ այն անձի ստորագրությամբ, ում ամրացված է զենքը։

Իրավաբանական անձին պատկանող զենքի և փամփուշտների հափշտակման կամ կորստի դեպքում անհապաղ տեղեկացվում է ՆԳ մարմիններին՝ ըստ դրանց հաշվառման վայրի։ Իրավաբանական անձի ղեկավարի կողմից ՆԳ մարմինների հետ համատեղ կատարվում է ստուգում, որի արդյունքներով որոշում է կայացվում զենքը և փամփուշտները հաշվառումից հանելու մասին՝ կազմելով դուրսգրման ակտ։

131. Զենքի և փամփուշտների ավելցուկ կամ պակասորդ հայտնաբերելու դեպքում իրավաբանական անձի ղեկավարը այդ մասին տեղեկացնում է ՆԳ մարմիններին և նշանակվում է գույքագրում, որի ընթացքում բացահայտվում են  զենքի հաշվառման տվյալների անհամապատասխանության պատճառներն ու պայմանները և դրանց հաշվառման կարգը խախտող մեղավոր անձինք։

Հաշվառումից դուրս մնացած զենքը և փամփուշտները մեկ օրվա ընթացքում ենթակա են հանձնման ՆԳ մարմիններին։

132. ՆԳՆ փորձաքրեագիտական վարչության եզրակացությամբ զենքն ու փամփուշտները հետագա օգտագործման համար ոչ պիտանի ճանաչվելու դեպքում կազմվում է դուրսգրման ակտ և ոչնչացվում են:

133. Յուրաքանչյուր եռամսյակ իրավաբանական անձանց մոտ անց է կացվում փաստացի առկա զենքի և փամփուշտների համեմատում ցուցակագրերի, մատյանների և այլ հաշվառման փաստաթղթերի հաշվառման տվյալների հետ։ Զենքի համեմատումը կատարվում է  իրավաբանական անձի ղեկավարի հրամանով ստեղծված հանձնաժողովի կողմից, անհրաժեշտության դեպքում՝ զենքի հաշվառման վայրի ՆԳ թույլտվության համակարգի աշխատակիցների մասնակցությամբ։

Համեմատական ստուգում անցկացնելուց առաջ զենքի ու փամփուշտների ցուցակագրերում և հաշվառման մատյաններում կատարվում է ամփոփում, որը հաստատվում է զենքի ու փամփուշտների պահպանության համար պատասխանատու անձի ստորագրությամբ։

Համեմատական ստուգման ժամանակ տարբերության բացակայության դեպքում, զենքի և փամփուշտների հաշվառման մատյանում կատարվում է հետևյալ բովանդակությամբ գրառում. «Անց է կացվել համեմատական ստուգում, տարբերություններ չեն հայտնաբերվել», նշվում է անցկացման ամիս - ամսաթիվը և հաստատվում է ստուգում կատարած անձանց ստորագրություններով։

XVII. Իրավաբանական անձանց կողմից զենքի եվ փամփուշտների գույքագրման կարգը

134. Գույքագրումը առկա զենքի և փամփուշտների լիակատար ստուգումն է՝ համաձայն հաշվառման տվյալների և  հաշվառման ու պահպանության ապահովման կարգի: Կազմակերպություններում գույքագրում իրականացվում է հիմք ընդունելով տվյալ իրավաբանական անձի ղեկավարի հրամանը կամ ՆԳ  համապատասխան մարմնի ղեկավարի ցուցումը։

Գույքագրումն իրականացնում է իրավաբանական անձի ղեկավարի հրամանով ստեղծված հանձնաժողովը:

Ներքին գործերի մարմինների կողմից ժամանակավոր օգտագործման համար հատկացված զենքի և փամփուշտների գույքագրումը անց է կացվում այն ձևակերպած ՆԳ մարմնի աշխատակիցների կողմից:

135.  Գույքագրում կատարվում է՝

ա) ամեն տարի (հունվարի 15-ի դրությամբ)

բ) զենքի և փամփուշտների պահպանության պատասխանատու անձի կամ իրավաբանական անձի ղեկավարի փոփոխության դեպքում (գործերը հանձնել-ընդունելու օրը)

գ) բնական և տեխնածին աղետի, հրդեհի, վթարի կամ այլ արտակարգ իրավիճակների դեպքում, որոնց հետևանքով կատարվել է զենքի և փամփուշտների տեղափոխություն

դ) իրավաբանական անձի լուծարման կամ վերակազմավորման դեպքում (այդ թվում` պետական, համայնքային կազմակերպության վերակազմավորման դեպքում) լուծարման կամ բաժանման հաշվեկշիռներ կազմելուց առաջ։

136. Գույքագրման հանձնաժողովում ընդգրկվում են երեքից ոչ պակաս անձինք՝ իրավաբանական անձի ղեկավարներից մեկը, հաշվապահական ծառայության աշխատողներ և այլ իրավասու մասնագետներ, որոնք տիրապետում են զենքի հետ անվտանգ վարվելու կանոններին։

Կազմակերպության ղեկավարը պարտավոր է պայմաններ ստեղծել զենքի և փամփուշտների գույքագրման համար, հանձնաժողովի անդամներին այդ աշխատանքները կատարելու ժամանակահատվածում ազատել այլ պարտականություններից, ինչպես նաև՝ առանձնացնել անհրաժեշտ տեխնիկական աշխատողներ, որոնք ունեն զենքի և փամփուշտների հետ առնչվող աշխատանքներին մասնակցելու թույլտվություն։

137. Զենքի և փամփուշտների պահպանության պատասխանատու անձինք գույքագրման օրը իրականացնում են զենքի և փամփուշտների տեղաշարժի հետ կապված բոլոր վերջնական գործողությունները և դրանց մնացորդները անց են կացնում հաշվառման մատյաններում՝ հաստատելով անձնական ստորագրությամբ։

138. Գույքագրումից առաջ հանձնաժողովի անդամները պարտավոր  են՝

ա) ուսումնասիրել Հայաստանի Հանրապետության օրենսդրական, ՀՀ ՆԳՆ նորմատիվ իրավական և այլ ակտերի պահանջները, որոնք կարգավորում են զենքի և փամփուշտների շրջանառությունն ու գույքագրման ընթացքը

բ) նախապատրաստել գույքացուցակների ձևաթղթերը (հավելված 66), համարային հաշվառման ցուցակները (հավելված 67),  զենքի ու փամփուշտների գույքագրման արդյունքների համեմատական ամփոփագրերը (հավելված 68)՝ գրանցելով դրանք սահմանված կարգով: Ընդ որում` նշված փաստաթղթերում չի թույլատրվում նախապես նշել զենքի և փամփուշտների ավելցուկը

գ) ստուգել կապարակնքման միջոցների և կապարակնքման նյութերի առկայությունը, որոնց ռեկվիզիտները պետք է տարբերվեն զենքի պահպանության համար պատասխանատու անձանց կապարակնքման միջոցների ռեկվիզիտներից։

139. Զենքի և փամփուշտների փաստացի առկայության ստուգումը հանձնաժողովը պետք է սկսի զենքի և փամփուշտների պահման զետեղարաններից, կնքելով այնտեղ գտնվող անկիզելի կամ մետաղյա պահարանները, բուրգերը, զենքի և փամփուշտների արկղերը։

Ընդուման - հանձնման նպատակով զենքերի պահման ստուգված զետեղարանները բացելու և նորից կնքելու իրավունք ունի միայն գույքագրման հանձնաժողովը։

140. Զենքի առկայությունը հաստատվում է միայն նրա պահպանության պատասխանատու անձի ներկայությամբ, կատարելով պարտադիր հատային, համալիր և ըստ համարների հաշվում, ինչպես նաև՝ ստուգվում է զենքի համապատասխանությունը տեխնիկական փաստաթղթերին (անձնագիր, ֆորմուլյար կամ նրանց կրկնօրինակը)։

Հերմետիկ փաթեթավորված, կամ մետաղյա ցինկե արկղերով փամփուշտները ստուգվում են դրոշմանշանի համաձայն՝ տարայի ամբողջականության արտաքին զննման միջոցով, որի մասին գույքագրման ցուցակում կատարվում է համապատասխան նշում։

Նշված տարաների վրա դրոշմանշանի բացակայության դեպքում (այդ թվում նաև մասնակի) դրանք ենթակա են բացման, իսկ փամփուշտները՝ մեկ առ մեկ հաշվման։

Ստուգված չհրկիզվող և մետաղյա պահարաններում, բուրգերում, արկղերում հանձնաժողովի կողմից փակցվում են պիտակներ՝ հաստատված հանձնաժողովի նախագահի կողմից, որոնցում նշվում է ստուգման ամսաթիվը։

141. Հայաստանի Հանրապետության թանգարանային հավաքածուի մեջ ընդգրկված զենքն ու փամփուշտները գրանցվում են գույքագրման ցուցակներում, հաշվի առնելով ՀՀ մշակույթի, երիտասարդության հարցերի և սպորտի նախարարության սահմանած պահանջները։

142. Գույքագրման և համարային հաշվառման ցուցակները լրացվում են հիմք ընդունելով ՆԳ մարմիններում գույքագրում իրականացնելու համար սահմանած պահանջները։

Լրացումները և ուղղումները հաստատվում են գույքագրման հանձնաժողովի և զենքի ու փամփուշտների պահպանության համար պատասխանատու անձանց կողմից։

Ցուցակները գույքագրման առաջնային փաստաթղթեր են, որոնք անմիջապես լրացվում են ստուգման ընթացքում զենք ու փամփուշտներ պահելու զետեղարաններում (օբյեկտներում)։

Ստուգումներն ավարտելուց հետո լրացված ցուցակների յուրաքանչուր էջը ստորագրում են հանձնաժողովի անդամները և զենքի ու փամփուշտների պահպանության պատասխանատու անձը։

143. Գույքագրման ընթացքում նոր ստացված զենքը և փամփուշտները մուտքագրվում են առանձին ցուցակներով։ Այս դեպքում զենքի նպատակային օգտագործման տողում կատարվում է «Զենքը (փամփուշտները) ստացվել են գույքագրման ժամանակ» նշումը, իսկ «ծանոթություններ» սյունակում նշվում է, թե ումից է այն ստացվել, ստացման ամսաթիվը և առաքման փաստաթղթերի (ուղեկցող, տրանսպորտային) համարները։

144. Այն զենքն ու փամփուշտները, որոնք գույքագրման պահին գտնվում են կազմակերպության գործուղման մեջ գտնվող աշխատողների մոտ, հաշվի են առնվում ըստ հաշվառման փաստաթղթերի։ Ընդ որում՝ «ծանոթություններ» սյունակում նշվում է զենքը տալու հիմքը, ամսաթիվը, ստացողի անուն- ազգանունը, հայրանունը:

145. Զենքի և փամփուշտների գույքագրման արդյունքները արտացոլվում են համեմատական ցուցակներում, որը լրացվում է երեք օրինակից։ Ցուցակի յուրաքանչյուր օրինակ ստուգվում է հանձնաժողովի նախագահի, անդամների և  զենքի ու փամփուշտների պահպանության պատասխանատու անձի կողմից։

146. Զենքի և փամփուշտների պակասորդի կամ ավելցուկի փաստ հայտնաբերելու դեպքում գույքագրման հանձնաժողովը պարտավոր է այդ մասին անհապաղ հայտնել  իրավաբանական անձի ղեկավարին։

147. Ելնելով գույքագրման արդյունքներից, հանձնաժողովը կազմում է ակտ երկու օրինակից, իսկ ՆԳ մարմինների կողմից ժամանակավոր օգտագործման համար փոխանցված զենքի և փամփուշտների վերաբերյալ՝ երեք օրինակից։

Ակտի մեջ արտացոլվում է զենքի և փամփուշտների պահպանման ու հաշվառման վիճակը, պակասորդի և ավելցուկի, փչացման և կորստի փաստերը, ինչպես նաև՝ հայտնաբերված թերությունների վերացման վերաբերյալ առաջարկությունները։

Հանձնաժողովի կողմից ստորագրված և իրավաբանական անձի ղեկավարին հանձնված ակտը ուսումնասիրվում և հաստատվում է նրա կողմից՝ եռօրյա ժամկետում:

148. Գույքագրման գրառումների, համարային հաշվառումների, համեմատական ցուցակների և այլ նյութերի առաջին օրինակները պահվում են առանձին հաշվառման գործում՝ կազմակերպության զենքի պահպանության պատասխանատու անձի մոտ, երկրորդ օրինակները հանձնվում են տարածքային ՆԳ մարմին, երրորդ օրինակները՝ ՆԳՆ ՀԿԱ վարչություն:

XVIII. Զենքի զետեղարանների, պահոցների, պահեստների առեվտրի եվ ցուցադրման սրահների, տիրերի ու հրաձգարանների սարքավորմանը եվ դրանցում զենքի պահմանը ներկայացվող պահանջները

149. ՀՀ քաղաքացիներն իրենց պատկանող զենքը և փամփուշտները պետք է պահեն բնակության կամ գտնվելու վայրի անկիզելի կամ մետաղյա պահարաններում, գերկայուն (գերամուր) նյութերից պատրաստված կամ երկաթով պատված փայտյա արկղերում։

Սենյակը, որտեղ զենքի հավաքածուի սեփականատերը պահում է իր հավաքածուն, պետք է կահավորվի հրշեջ-պահպանական ահազանգման համակարգով, իսկ մուտքի դուռը պետք է լինի մետաղյա՝ լրացուցիչ ամրացված: Առաջին և վերջին հարկերում գտնվող սենյակի կամ բնակարանի պատուհաններին տեղադրվում է մետաղյա վանդակաշար, զենքի պահման զետեղարանների համար նախատեսված կարգով։

Եթե տեխնիկական պատճառներով հնարավոր չէ կահավորել ազդանշանային համակարգ, ապա զենքի պահման պահարանները և արկղերը ամրացվում են պատերից մեկին՝ երկուսից ոչ պակաս 16 մմ և ավելի հաստությամբ պողպատյա հեղյուսներով:

150. Զենքը իրավաբանական անձանց կողմից պետք է պահվի հատուկ կահավորված զետեղարաններում՝ չհրկիզվող կամ մետաղյա պահարաններում, բուրգերում, արկղերում՝ լիցքաթափված, իջեցված ձգանով, պահպանակի դրված, մաքրված, յուղված, փամփուշտներից առանձնացված վիճակում։

Զենք պահելու  չհրկիզվող կամ մետաղյա պահարանում, բուրգերում, կամ արկղերում ամրացվում են հաշվեպիտակներ, որոնց վրա նշվում են զենքերի տեսակները, մոդելները, համարները՝ համաձայն համարային հաշվառման ցուցակի ու ամրագրման մատյանի։

151. Հատուկ կանոնադրական խնդիրներ իրականացնող իրավաբանական անձանց զինասենյակներում զենքի հետ համատեղ թույլատրվում է պահել փամփուշտներ՝ տուփերով, պահեստատուփերով կամ պահունակներով։

Գործարանային փաթեթավորմամբ զենքերը (տուփերով, արկղերով) և փամփուշտները (ցինկերով, արկղերով) կարող են պահվել դարակաշարերի վրա։

Չփաթեթավորված (ցրված) փամփուշտները պահվում են միայն տարբեր գաղտնանիշ ունեցող երկու փականներով փակվող մետաղյա արկղերում:

152. Չհրկիզվող կամ մետաղյա պահարաններում, բուրգերում և արկղերում իրարից առանձին պահվում են՝

ա) փամփուշտները և զենքը (բացառությամբ 151 կետում նշված դեպքի), ընդ որում՝ հրագործական կազմ ունեցող, արցունքաբեր կամ գրգռիչ նյութերով լիցքավորված, ինչպես նաև՝ չպայթած խոտան փամփուշտները պահվում են առանձին փաթեթներով

բ) բոլոր տեսակի գեղարվեստական հարդարված զենքերը, որոնք պարունակում են թանկարժեք մետաղներ կամ քարեր

գ) վերցված, քաղաքացիների կամ իրավաբանական անձանց աշխատողների կողմից պահպանության փոխանցված, ինչպես նաև՝ հաշվեկշռում եղած զենքերը

դ) առանձին մետաղյա տարաներում կամ պոլիէթիլենային պարկերում տեսակավորված մանրածախ առևտրի համար նախատեսված վառոդը։

153. Զենքի պահման համար նախատեսված մետաղյա պահարանները և արկղերը պետք է փակվեն փականով և ունենան 2 մմ-ից ոչ պակաս հաստությամբ պատեր, վառոդների, փամփուշտների և հրավառային միջոցների պահման պահարանները և արկղերը՝ 3 մմ-ից ոչ պակաս, իսկ օդային տրանսպորտով փոխադրվող զենքի պահման համար նախատեսվածները՝ 1,6 մմ-ից ոչ պակաս հաստությամբ պատեր:

154. Չհրկիզվող կամ մետաղյա պահարանները, բուրգերը, արկղերը և դարակաշարերը զետեղարաններում տեղադրվում են մուտքի դռնից 1,5 մ և պատուհաններից՝ 0,5 մ, իսկ փամփուշտների արկղերը և աէրոզոլային սարքերը՝ տաքացուցիչ սարքերից 1 մ հեռավորության վրա։ Պահարանների, արկղերի, բուրգերի միջև հեռավորությունը պետք է հնարավորություն տա դրանց դռների ազատ բացվելուն:

155. Յուրաքանչյուր չհրկիզվող կամ մետաղյա պահարանի, բուրգի, արկղի համար ստեղծվում է գույքացուցակ, որտեղ նշվում է պահվող զենքի տեսակը, քանակը և համարները, ինչպես նաև ամրացվում է նշատախտակ, որտեղ շենքի գույքացուցակի համաձայն նշվում է հերթական համարը, անվանումը,  ստորաբաժանման, իրավաբանական անձի անվանումը, ում իրավասության տակ է գտնվում զենքը, ինչպես նաև զենքի պահպանման պատասխանատու անձի անուն-ազգանունը և նրա կապարակնիքի կամ կնիքի համարը։

Վերը նշված ցուցակները ստորագրվում են իրավաբանական անձի ղեկավարի հրամանով նշանակված պատասխանատու անձի կողմից և ճշտվում են, եթե դրանց մեջ փոփոխություններ են կատարվել։

156. Զենք և փամփուշտներ պահելու զետեղարանները պետք է համապատասխանեն տեխնիկական ամրացվածության հետևյալ պահանջներին.

156.1. Շենքերի պատերը, միջնորմները, առաստաղը, հատակը պետք է լինեն կապիտալ կառուցված, քարային շարվածքի հաստությունը պետք է լինի 360 մմ-ից ոչ պակաս, պատերի բետոնային բլոկները՝ 200 մմ-ից ոչ պակաս, երկաթբետոնե ծածկերը՝ 180 մմ-ից ոչ պակաս,  երկու շերտով բետոնային բլոկները՝ յուրաքանչյուրը 90 մմ:

Նշված պահանջներին չհամապատասխանող կառույցի հատվածները պատվում են 16 մմ-ից ոչ պակաս երկաթյա  ձողերից պատրաստված 150x150 մմ-ից ոչ ավելի չափի վանդակաշարով:

Ներքին պատերը կառուցելու ժամանակ թույլատրվում է օգտագործել զուգավորված բետոնե միջնապատային սալեր, յուրաքանչյուրը 80 մմ-ից ոչ պակաս հաստությամբ, նրանց միջև նշված վանդակաշար անցկացնելով:

Պատերի ամրացման համար թույլատրվում է օգտագործել այլ հատուկ նյութեր, որոնք իրենց տեխնիկական բնութագրով չեն զիջում նշված կոնստրուկցիաներին։

Զենք և փամփուշտներ պահելու զետեղարանների տեխնիկական ամրացվածության նշված պահանջների կատարման մասին կազմվում է ակտ։

156.2. Ինժեներական ցանցերի համար նախատեսված, ինչպես նաև օդափոխիչ հորանցքերը, պատերի անցքերը փակվում են 16 մմ-ից ոչ պակաս հաստությամբ երկաթե ձողերից պատրաստված 50x50 մմ չափի վանդակաշարով:

156.3. Դռների խորշերը սարքավորվում են.

ա) 3 մմ-ից ոչ պակաս հաստությամբ երկաթյա դռնով, որը ուժեղացվում է պարագծով և անկյունագծով՝ պատերի 3 մմ-ից ոչ պակաս հաստությամբ և կողերի 50 մմ-ից ոչ պակաս լայնությամբ երկաթյա պրոֆիլով

բ) 16 մմ-ից ոչ պակաս հաստությամբ ձողերով և 150x150 մմ-ից ոչ ավելի վանդակների չափերով պատրաստված վանդակապատ դռնով, որը նույնպես ամրացվում է պարագծով և անկյունագծով: Դռան խորշի շրջանակը պատրաստվում է պատերի 5 մմ-ից ոչ պակաս հաստությամբ և կողերի 100 մմ-ից ոչ պակաս լայնությամբ երկաթյա պրոֆիլից:

156.4. Վերը նշված երկաթյա վանդակապատ դռան ձողերը յուրաքանչյուր հատման և  պրոֆիլների հետ միացման տեղերում եռակցվում են, իսկ դռների խորշի շրջանակները ամրացվում են պատերի մեջ 80 մմ խորությամբ և ցեմենտապատվում են:

156.5. Մուտքի հիմնական և վանդակապատ դռները պետք է ունենան տարբեր գաղտնանիշով ներքին երկու փականներ, ծխնիների հուսալի կառուցվածք և ամրություն։

Փականների փակող մասի լայնակի կտրվածքի մակերեսը պետք է լինի 3 քառ. սմ-ից ոչ պակաս։

Մուտքի դուռը լրացուցիչ սարքավորվում է կնքման համար հարմարանքով, ինչպես նաև 3 մմ-ից ոչ պակաս հաստությամբ երկաթյա ականջիկներով, դրսից կախովի կողպեքով կամ երկրորդ ներքին  փականով փակելու համար։

156.6. Զենքի զետեղարանը պետք է սարքավորվի ՆԳՆ հրշեջ պահպանության վարչության կողմից սահմանված նորմերին համապատասխան, հրդեհաշիջման միջոցներով և ՆԳՆ պետական պահպանության վարչության պահնորդաազդանշանային կենտրոնացված պահպանության դիտակետին միացված ահազանգման համակարգով կամ ինքնաահազանգման համակարգով՝ ձայնային կամ լուսային ազդանշանը մոտակա պահակակետին միացնելով (եթե այն շուրջօրյա ծառայության է) կամ շենքի արտաքին մասին ամրացնելով։

Ազդանշանային սարքավորումների էլեկտրասնուցման համակարգը պետք է ունենա պահեստային էլեկտրասնուցման աղբյուր։

156.7. Զենքի հանձնման և ստացման համար թույլատրվում է զետեղարանի պատի կամ դռան մեջ բացել 300x200 մմ չափի պատուհան՝ ներսից փականով փակվող 3 սմ հաստությամբ ներքին երկաթյա դռնակով։ Պատուհանի շրջանակը  պատրաստվում է 5 մմ-ից ոչ պակաս պատերի հաստությամբ և 100 մմ-ից ոչ պակաս կողերի լայնությամբ երկաթյա պրոֆիլից։

157. Իրավաբանական անձանց կողմից պահվող զենքն ու փամփուշտները, որոնք նախատեսված չեն տվյալ իրավաբանական անձանց օգտագործման համար, ինչպես նաև՝ զինասենյակներում նախատեսված նորմերից ավելի (500 միավորից ավելի զենք և 150000 հատից ավելի փամփուշտ) զենք և փամփուշտներ պահելը իրականացվում է սույն հրահանգի պահանջներին համապատասխան սարքավորված պահեստային շինությունում։

Պահեստային շինությունը տեղակայվում է առանձին կառուցված, ոչ բնակելի շենքում, իսկ փամփուշտների պահման համար պատրաստվում են ստորգետնյա կառույցներ, կամ վերգետնյա շինություններ՝ թմբապատված մինչև տանիքը։ Այդպիսի շինությունների կառուցման հաշվարկները կատարվում են համապատասխան  մասնագիտացված կազմակերպության կողմից:

Պահեստային շենքի պատերը, առաստաղը և հատակը պետք է համապատասխանեն այն պահանջներին, որոնք սահմանված են զենքի և փամփուշտների զետեղարանների համար։

Շենքը սարքավորվում է հիմնական և պահեստային դարպասներով, ինչպես նաև՝ լրացուցիչ փականով փակվող երկաթյա վանդակաշարով։ Դարպասները պետք է լինեն մետաղյա կամ փայտից՝ դրսից և կողերից պատված 2 մմ հաստությամբ երկաթյա թիթեղով, ունենան ծխնիների հուսալի ամրություն և ներքին փականներ՝ իրենց ամրապնդիչներով (վերևից և ներքևից): Երկաթյա վանդակաշարերը պետք է  պատրաստվեն  16 մմ-ից ոչ պակաս հաստությամբ ձողերից։

Մուտքի դարպասները և վանդակաշարերը կարող են ունենալ ներշինված դռնակներ, սարքավորված վերը նշված պահանջներին համապատասխան:

Դարպասները, վանդակաշարերը և մուտքի դռները պարագծով ու անկյունագծով ամրացվում են 5 մմ-ից ոչ պակաս պատերի հաստությամբ և 100 մմ-ից ոչ պակաս կողերի լայնությամբ երկաթյա պրոֆիլով։ Պատուհանախորշերը փակվում են 16 մմ-ից ոչ պակաս հաստությամբ երկաթյա ձողերից պատրաստված և 150x150 մմ-ից ոչ ավելի չափի վանդակաշարով:

Դարպասների և վանդակաշարերի հիմքերը տեղադրվում են 80 մմ-ից ոչ պակաս խորության վրա և ցեմենտապատվում են։

Պահեստային շինություններում զենք և փամփուշտներ ստացողների (հանձնողների), զենքի և փամփուշտների պահպանության համար պատասխանատու անձանց համար, ինչպես նաև՝ հաշվառման փաստաթղթերի և կապարակնքման (կնքման) միջոցների պահման համար պատրաստվում են մեկուսացված տեղեր:

Նշված վայրերում տեղակայվում են ոստիկանության, իրավաբանական անձի պահպանության ծառայության աշխատակիցներին կամ պահակախմբի պետին շտապ կանչելու զանգի կոճակներ:

Պահեստներում պետք է լինեն հրդեհաշիջման միջոցներ, հրշեջապահպանական ահազանգման համակարգ, տարածքի սխեմաներ, զենքի և փամփուշտների պահպանության պատասխանատու անձանց կողմից պարտադիր կատարման համար գրավոր հրահանգներ։

158. Մաքսային մարմիններում զենքի պահման համար նախատեսված պահեստային շինությունները պետք է համապատասխանեն սույն հրահանգով նախատեսված պահանջներին:

159. Հազար միավորից ավելի զենք և 350 հազար հատից ավելի փամփուշտներ պահելը իրականացվում է զենքի և փամփուշտների արտադրության համար սահմանված պահանջներին համապատասխան պահեստներում։

160. Իրավաբանական անձանց կողմից հավաքածու զենքի և փամփուշտների պահելը իրականացվում է զենքի և փամփուշտների զետեղարանների համար սահմանված պահանջներին համապատասխան սարքավորված զինասենյակներում: Նույն պահանջներին համապատասխան պահվում են նաև ՀՀ մշակույթի, երիտասարդության հարցերի և սպորտի նախարարության կողմից ՀՀ թանգարանային հավաքածուի մեջ ընդգրկված զենքերն ու փամփուշտները:

161. Ցուցահանդեսներում և գործադիր իշխանության մարմինների կողմից կազմակերպված միջոցառումների ժամանակ ցուցադրվող զենքերը և փամփուշտները տեղադրվում են ահազանգման համակարգով սարքավորված փակ ցուցափեղկերում։

Ցուցափեղկերը պետք է կնքվեն (կապարակնքվեն) զենքի և փամփուշտների պահպանության համար պատասխանատու անձի կողմից։

Այն դեպքերում, երբ զենք և փամփուշտներ ցուցադրելու շենքը ունի սույն հրահանգով նախատեսված զենք և փամփուշտներ պահելու համար սահմանված տեխնիկական ամրացվածություն, ապա թույլատրվում է դրանց շուրջօրյա պահելը փակ ցուցափեղկերում։

162. Աշխատանքային օրվա ընթացքում վաճառասրահներում և առևտրային ցուցափեղկերում հրազենը, գազային և օդաճնշիչ զենքերը կարող են ցուցադրվել բաց ցուցափեղկերում՝ պայմանով, որ զենքի յուրաքանչյուր միավորը ամրացվի ցուցափեղկին, բացառելով կողմնակի անձանց հասանելիությունը:

163. Ցուցահանդեսը փակվելուց կամ զենքի ցուցադրելն ավարտելուց հետո, բաց ցուցափեղկերում տեղադրված զենքը ամեն օր հանձնվում է զետեղարաններ՝ պահպանության համար։

Յուրաքանչյուր ցուցափեղկի և ցուցավահանակի վրա, համաձայն տարածքի նկարագրի, դրվում է հերթական համար և գույքահամար։

164. Զենք ու փամփուշտներ պահելու յուրաքանչյուր զետեղարանում փակցվում է այնտեղ տեղադրված չհրկիզվող կամ մետաղյա պահարանների, բուրգերի, արկղերի և դարակաշարերի քանակի, դրանց հերթական և գույքագրման համարների ցուցակներ, ինչպես նաև՝ կնիքների, կապարակնիքների և դրոշմակնիքների համարները, որոնցով կնքվում են դրանք։

Չհրկիզվող կամ մետաղյա պահարանների, բուրգերի, արկղերի և դարակաշարերի պիտակները ստորագրվում են զենքի պահպանության համար պատասխանատու անձանց կողմից և ճշտվում են փոփոխությունները մուտքագրելու միջոցով։

Զենքի և փամփուշտների պահման զետեղարանի մուտքի դռան վրա ամրացվում է տվյալ զետեղարանի հրդեհային անվտանգության և պահպանության պատասխանատու անձի անուն-ազգանունով պիտակ։

165. Այն դեպքում, երբ միևնույն զետեղարանում իրավաբանական անձի մի քանի ստորաբաժանումների զենքեր են պահվում, ղեկավարի հրամանով նշանակվում է զետեղարանի պահպանության համար պատասխանատու անձ:

Դրա հետ մեկտեղ յուրաքանչյուր ստորաբաժանման զենքերը պետք է պահվեն առանձին չհրկիզվող կամ մետաղյա պահարաններում, արկղերում, բուրգերում և կնքվեն (կապարակնքվեն) յուրաքանչյուր ստորաբաժանման զենքի պահպանության պատասխանատու անձի կողմից։

166. Հատուկ կանոնադրական խնդիրներ իրականացնող իրավաբանական անձանց զենքի պահման զետեղարանների չհրկիզվող կամ մետաղյա պահարանների, արկղերի, բուրգերի բանալիների առաջին խուրձը պետք է պահվի զենքի պահպանության համար պատասխանատու անձի, իսկ երկրորդը՝ իրավաբանական անձի ղեկավարի մոտ։

Այն դեպքում, երբ կազմակերպության ղեկավարի հրամանով զենքի հանձնման պարտականությունը դրվում է զինված պահակախմբի կամ հերթափոխի պետի վրա, բանալիների երկրորդ խուրձը պահվում է նշված անձանց մոտ և փոխանցվում է հերթափոխի ավարտից հետո՝ ստորագրելով հերթափոխի հանձնման-ընդունման գրքում։ Բանալիների երկրորդ խրձի օգտագործման և պահման կարգը այլ կազմակերպություններում որոշվում է իրավաբանական անձի ղեկավարի հրամանով՝ համաձայնեցնելով ՆԳ մարմինների հետ։

167. Հրաձգային տիրերի, հրաձգաստենդային համալիրների և հրաձգարանների շահագործումը թույլատրվում է  այդ վայրերը սույն հրահանգի պահանջներին  համապատասխան կառուցելուց և դրանք գործարկելու համար ՆԳ մարմիններից թույլտվություն ստանալուց հետո։

168. Իր կազմում հրաձգարան ունեցող զենքի արտադրությամբ զբաղվող իրավաբանական անձը հրաձգարանը շահագործում է սույն հրահանգի պահանջներին համապատասխան՝ զենքի արտադրության լիցենզիայի հիման վրա:

169. Փակ (ծածկած) տիրերը պետք է ունենան գնդակակայուն պատեր և առաստաղ, կիսաբաց տիրերը՝ գնդակակայուն պատեր և վերևից լայնակի գնդակաորսիչներ, իսկ բաց տիրերը՝ գնդակաընդունիչ կողային հողաթմբեր և պարագծով ցանկապատված անվտանգության անհրաժեշտ գոտի։

170. Փակ, կիսաբաց և բաց տիրերը համապատասխան տեսակի ակոսափող հրազենով կրակելու համար սարքավորվում են գնդակաորսիչներով:

Ողորկափող հրազենով կրակելու համար նախատեսված հրաձգաստենդային համալիրները պետք է ունենան պարագծով ցանկապատված անվտանգության գոտի՝ նշված տարածությունից դուրս որևէ օբյեկտի խոցվելը բացառելու համար։

Հրաձգարանները մի քանի բաց տիրերից կազմված համալիրներ են և սարքավորվում են բաց տիրերին ներկայացվող պահանջներին համապատասխան, նախատեսվում են մեծ քանակությամբ հրաձգության մասնակիցների համար և կարող են ունենալ տարբեր կրակային տարածություններ։

171. Արգելվում է փոքր տրամաչափի (ներառյալ 5,6 մմ) զենքով կրակելու համար բաց տիրերը կառուցել բնակավայրերից 2կմ-ից պակաս հեռավորության վրա, իսկ 5,6 մմ-ից ավելի տրամաչափի զենքով կրակելու համար նախատեսված տիրերը՝ բնակավայրերից 5կմ-ից ոչ պակաս:

Արգելվում է  կիսաբաց տիրերը կառուցել հասարակական և բնակելի շենքերից 300 մ-ից պակաս հեռավորության վրա։

172. Հրաձգային սրահը և զինասենյակը, եթե դրանք գտնվում են միևնույն շենքում, անջատվում են օժանդակ տարածություններից (դասասենյակներ, հանգստի սենյակներ, մարզիչների աշխատասենյակներ, տնտեսական սենյակներ) երկաթյա ճաղաշարային միջնորմներով։ Այդ միջնորմներում նախատեսվում են վանդակաշարային դռներ, որոնք պետք է մշտապես փակված լինեն փականով։ Միջնորմները պատրաստվում են 16 մմ ոչ պակաս հաստությամբ երկաթյա ձողերից։ Այդ ձողերը եռակցվում են յուրաքանչյուր հատման կետում ստեղծելով 150x150 մմ չափի վանդակներ: Ձողերի ծայրերը մտցվում են պատի, առաստաղի և հատակի մեջ 80 մմ խորությամբ և ամրացվում են բետոնով (ցեմենտապատվում են)։

173. Կտրականապես արգելվում է հրազենը կրակային ընդմիջումների ժամանակ պահել տիրերի կրակային սրահում, ինչպես նաև՝ զենքը և փամփուշտները առանց հսկողության թողնել կրակագծում։

174. Հաշվի առնելով օբյեկտի առանձնահատկությունները, անցագրային և ներօբյեկտային ռեժիմի կանոնակարգը մշակվում է հրաձգային տիրի, հրաձգաստենդային համալիրի, հրաձգարանի ղեկավարության կողմից և համաձայնեցվում է ՆԳ մարմինների հետ:

Օբյեկտի անցագրային ռեժիմը պետք է նախատեսի մուտքի և ելքի, զենքի, փամփուշտների և նյութական արժեքների ներկրման և հանման խիստ  կարգ ու կանոն։

Ներօբյեկտային ռեժիմը ներառում է այն միջոցառումները, որոնք ապահովում են հրաձգային օբյեկտի ներքին կարգապահությունը՝ աշխատողների աշխատանքային ռեժիմը, զենքի և փամփուշտների հանձնման և փոխանցման կարգը, ժամանակավոր և մշտական անցագրերի ներդրումը։

Անցագրային և ներօբյեկտային ռեժիմի ապահովման նպատակով հրաձգային տիրի (հրաձգային սրահի) դռները սարքավորվում են հուսալի փականներով, էլեկտրական զանգով, դիտանցքով (դիտման միջոցներ)։

Աշխատողների, հրաձիգ մարզիկների և այլ քաղաքացիների մուտքը հրաձգային օբյեկտ կատարվում է հսկիչ անցագրային կետով, որը պետք է համալրված լինի բանալիների և փաստաթղթերի պահման անհրաժեշտ արկղերով, անցագրերի նմուշների վահանակով,  պարապմունքների աշխատաժամերը կանոնակարգող ժամանակացույցով։

175. Հրաձգային տիրի, հրաձգաստենդային համալիրի և հրաձգարանի շահագործման պիտանիությունը որոշվում է ՆԳ մարմինների թույլտվության համակարգի, հրշեջ և պետական պահպանության աշխատակիցներից ստեղծված հանձնաժողովի կողմից կազմված ակտով:

176. Հրաձգային օբյեկտի գործարկման թույլտվությունը ՆԳՆ ՀԿԱ վարչության կողմից տրվում է իրավաբանական անձի ղեկավարի դիմումի հիման վրա, որում նկարագրվում է օբյեկտի տեղակայման վայրը և  տեղեկություններ պատասխանատու անձի մասին (անուն, ազգանուն, հայրանունը, ծննդյան տարեթիվը, ծննդավայրը, բնակության վայրի հասցեն)։ Դիմումին կցվում է  այն մարդկանց ցուցակը, ովքեր պետք է ստանան զենքի ու փամփուշտների հետ առնչվելու թույլտվություն, ինչպես նաև օբյեկտի նախագիծ սխեման:

XIX. Զենքի եվ փամփուշտների պահման անվտանգության եվ պահպանության ապահովման նկատմամբ վերահսկողությունը

177. Քաղաքացիների մոտ առկա զենքի և փամփուշտների պահման պայմանների ստուգման ժամանակ ՆԳ մարմինների աշխատակիցների կողմից պարզվում են.

ա) առկա զենքի համապատասխանությունը տրված լիցենզիաներին և թույլտվություններին, ինչպես նաև՝ քաղաքացիների մոտ գտնվող փամփուշտների համապատասխանությունը՝ գրանցված զենքի տեսակին և մոդելին

բ) փականով փակվող չհրկիզվող կամ մետաղյա պահարանի, գերկայուն (գերամուր) նյութից պատրաստված կամ երկաթով պատված փայտյա արկղերի առկայությունը

գ) զենքին կողմնակի անձանց հասանելիությունը բացառող պայմանները (զենքի պահպանումը մեկուսացված սենյակում, լրացուցիչ փակող հարմարանքներով սարքավորված մետաղյա կամ մետաղապատ դռան առկայությունը, ազդանշանային միջոցները, պահարանների կամ արկղերի բանալիների պահման կարգը)։

178. Իրավաբանական անձի կողմից զենքի և փամփուշտների պահպանության անվտանգության պայմանների ստուգման ժամանակ ՆԳ մարմինների աշխատակիցները պարզում են.

ա) պահման, ցուցադրման, վաճառքի և օգտագործման համար զենքի և փամփուշտների զետեղարանների տեխնիկական ամրացվածության համապատասխանությունը սույն հրահանգի պահանջներին

բ) պահպանության ահազանգման համակարգի էլեկտրասնուցման և էլեկտրական հոսանքի պահեստային աղբյուրի միացման գործունեության հուսալիությունը

գ) զենքի և փամփուշտների տեղավորման պայմանները չհրկիզվող կամ մետաղյա պահարաններում, ցուցափեղկերի  միացումը օբյեկտի ազդանշանային համակարգին, ինչպես նաև՝ զենքի և փամփուշտների գործարանային փաթեթավորմամբ կամ մետաղյա արկղերով դասավորումը դարակաշարերի վրա

դ) զենքի ու փամփուշտների առկայությունը և համապատասխանությունը հաշվառման փաստաթղթերին ու դրանք պահելու թույլտվություններին, գույքացուցակների կազ մման և դրանց քանակի և համարային հաշվառման ճշտությունը

ե) զենքի և փամփուշտների տեխնիկական վիճակը

զ) զետեղարանների, դրանցում պահվող չհրկիզվող կամ մետաղյա պահարանների, ցուցափեղկերի, բուրգերի, արկղերի, վահանակների պահեստային բանալիների պահման կարգը, զենքի պահպանության համար պատասխանատու անձանց տրված կնիքների, կապարակնքման միջոցների հաշվառումը և պահպանումը

է) զենքի և փամփուշտների հետ կապված աշխատանքներին առնչվելու իրավունք ունեցող անձանց թույլտվությունների կազմակերպումը, ներօբյեկտային և անցագրային ռեժիմի պահպանման համալիր միջոցառումները

ը) զենքի  և փամփուշտների հանձնման-ընդունման մատյանում հաշվառման տվյալների և գրանցումների համապատասխանությունը աշխատանքային ժամանակացույցին, ծառայության, պարապմունքների և հրաձգության անցկացման ամփոփագրերին, զենք կրելու և պահելու թույլտվություն ստացած անձանց զենքի ամրագրման մասին հրամաններին, ինչպես նաև՝ հրաձգության, զենքերը նշանափորձելու, նշանազարկը ստուգելու, ակոսափող զենքերը ստուգելու նպատակով կրակելու համար ծախսված փամփուշտների հայտերին

թ) գործուղման մեկնող առանձին աշխատողների զենք և փամփուշտներ ստանալու կարգը

ժ) զենք ցուցադրելու կամ պահելու տարածքները պահպանության հանձնելու (ընդունելու) մասին փաստաթղթերի առկայությունը

ժա) զենք և փամփուշտներ ընդունելու, հանձնելու, զենքը լիցքավորելու և լիցքաթափելու, ինչպես նաև՝ մաքրելու տեղը սարքավորելու և այդտեղ գնդակորսիչների առկայությունը (հատուկ կանոնադրական խնդիրներ իրականացնող իրավաբանական անձանց համար)։

179. Թանգարաններում և զենքի ու փամփուշտների հավաքածու կազմելով զբաղվող կազմակերպություններում ՆԳ մարմինների աշխատակիցները պարզում են.

ա) շինությունների (պահոցների) տեխնիկական ամրացվածության համապատասխանությունը սույն հրահանգի պահանջներին

բ) զենքի և փամփուշտների անվտանգ պահպանության և ցուցադրման համար սարքավորված վահանակների և ցուցափեղկերի առկայությունը

գ) հրշեջ-պահպանական ահազանգման միջոցների սարքինությունը, դրանց  հուսալի սնուցումը էլեկտրացանցից և էլեկտրասնուցման պահեստային աղբյուրից, ինչպես նաև՝ ՆԳ մարմինների և պահպանության աշխատողներին շտապ ցուցասրահ կամ ցուցահանդեսային դահլիճ կանչի ահազանգման համակարգի անխափան աշխատանքը

դ) պահպանության համապատասխանությունը զենքի և փամփուշտների պահպանության ու ցուցադրման կազմակերպման համար սույն հրահանգով սահմանված պահանջներին։

180. Զենք և փամփուշտներ օգտագործելու վայրերում՝ տիրերում, հրաձգաստենդային համալիրներում և հրաձգարաններում լրացուցիչ ստուգվում են.

ա) իրավաբանական անձի մոտ ՆԳ մարմինների կողմից տրված զենք և փամփուշտներ պահելու ու օգտագործելու և հրաձգարանի գործունեության թույլտվության առկայությունը, ինչպես նաև՝ շենքի, շինության, կառույցի օգտագործման իրավունքը հավաստող փաստաթուղթը

բ) հրաձգային շինությունների և սարքավորումների տեխնիկական ամրացվածության համապատասխանությունը սահմանված պահանջներին

գ) զենք և փամփուշտներ պահելու զետեղարանների առկայությունը տիրում, հրաձգաստենդային համալիրում, հրաձգարանում, իսկ մարզահրաձգային ընկերությունների, ակումբների անդամ ՀՀ քաղաքացիներին պատկանող զենքի և փամփուշտների ժամանակավոր պահպանություն իրականացնելու դեպքում՝ չհրկիզվող կամ մետաղյա պահարանների առկայությունը

դ) քաղաքացիների մուտքը հրաձգային օբյեկտ կազմակերպելը, հրաձգության սահմանված կանոնների և կարգի պահպանելը

ե) զենք և փամփուշտներ պահելու և հրաձգություն անցկացնելու վայրերում համալիր պահպանական միջոցառումների համապատասխանությունը անվտանգության ապահովման պահանջներին:

Սերտիֆիկացման մարմիններում պարզվում է նաև փորձարկումների համար փոխանցված զենքի, փամփուշտների և զենքին կառուցվածքով նմանվող իրերի համապատասխանության սերտիֆիկատների կամ զենքի վերաբերյալ եզրակացությունների առկայությունը։

181. Զետեղարանների, կառույցների և շենքերի զննությունը իրականացվում է իրավաբանական անձի ղեկավարի կամ նրա տեղակալի կամ զենքերի և փամփուշտների պահպանության համար պատասխանատու անձանց ներկայությամբ։

Զենքի և փամփուշտների հավաքածու կազմելու կամ ցուցադրության համար նախատեսված իրավաբանական անձանց օբյեկտները և թանգարանները հետազոտվում են ՀՀ մշակույթի, երիտասարդության հարցերի և սպորտի նախարարության մասնագետների մասնակցությամբ։

182. Սերտիֆիկացման մարմիններում (կենտրոններում), ինչպես նաև՝ համապատասխան փորձարկման լաբորատորիաներում (փորձագիտական կենտրոններում) զենք ու փամփուշտներ պահելու և օգտագործելու վայրերը ստուգվում են ՀՀ կառավարությանն առընթեր ստանդարտացման, չափագիտության և սերտիֆիկացման վարչության (Հայպետստանդարտ) ներկայացուցիչների մասնակցությամբ։

Մաքսային փոխադրողների կողմից օգտագործվող, ինչպես նաև՝ մաքսային հսկողության տակ գտնվող զենքի և փամփուշտների պահպանությամբ զբաղվող իրավաբանական անձանց զենք և փամփուշտներ պահելու վայրերի հետազոտումը իրականացվում է մաքսային մարմինների հետ համատեղ։

183. Զետեղարանների, կառույցների և շենքերի հետազոտման աշխատանքներին, անհրաժեշտության դեպքում, ընդգրկվում են ճարտարապետական վերահսկողության մարմինների կամ այլ լիազորված մարմինների իրավասու աշխատողներ:

Այն դեպքում, երբ օբյեկտը նոր տեխնոլոգիաների օգտագործմամբ սարքավորվում է տեխնիկական ամրացվածության հատուկ միջոցներով (այդ թվում գնդակաորսիչներով), որոնք ունեն բարդ կառուցվածք, հանձնաժողովի աշխատանքներին մասնակցելու համար ներգրավվում են համապատասխան մասնագետներ։

184. Պահեստային տարածքներում և զինասենյակներում պահվող զենքի և փամփուշտների ծավալները որոշվում են հանձնաժողովային հետազոտման ընթացքում ՆԳ մարմինների աշխատակիցների կողմից՝ ելնելով սահմանված պահանջներից, պահպանելով՝

ա) հրդեհային անվտանգությունը

բ) զենքը, փամփուշտները չհրկիզվող կամ մետաղյա պահարաններում, բուրգերում, արկղերում, դարակաշարերում տեղավորելը

գ) վառոդ պահելը։

Զենքի և փամփուշտների փոխադրման ծավալները որոշվում են հանձնաժողովի կողմից ՆԳ մարմինների և տրանսպորտային ծառայության (ավիացիոն անվտանգության ծառայության) աշխատողների կողմից համատեղ, ելնելով՝

ա) փոխադրվող զենքի, փամփուշտների և վառոդի թույլատրելի կշռից

բ) զենքի և փամփուշտների ապրանքափաթեթների բարձման չափից՝ հաշվի առնելով փոխադրամիջոցի մեջ դրանք տեղավորելու հնարավորությունը։

Թույլատրված ծավալներով զենք և փամփուշտներ պահելը կամ դրանց փոխադրելը նշվում է հանձնաժողովի կողմից կազմված հետազոտման ակտում։

XX. Զենքի եվ փամփուշտների փոխադրման (բեռնափոխադրման) եվ տեղափոխման նկատմամբ վերահսկողության ապահովումը

185. Զենքի և փամփուշտների տեղափոխման նկատմամբ հսկողություն իրականացնելիս ՆԳ մարմինների աշխատակիցները պարզում են.

ա) զենքեր տեղափոխող կազմակերպության գործունեության համապատասխանությունը ՀՀ օրենսդրության պահանջներին

բ) զենքի և փամփուշտների ընդունման, հանձնման և փոխանցման (վերադարձման) օրինականությունը

գ) զենք և փամփուշտներ պահելու, բարձելու և բեռնաթափելու վայրի շինությունների, կառույցների տեխնիկական ամրացվածությունը,  զենքի և փամփուշտների պահպանության հուսալիությունը, ինչպես նաև՝ դրանց հետ առնչվելիս՝ անվտանգության կանոնների ապահովումը

դ) զենքի հաշվառման համակարգի և գործավարության համապատասխանությունը սույն հրահանգի պահանջներին, հաշվառման փաստաթղթերի առկայությունը, գրանցումների ճշգրտությունը

ե) մաքսային հսկողության տակ գտնվող զենքի և փամփուշտների մաքսային փաստաթղթերը, ինչպես նաև՝ կառուցվածքով զենքի նմանվող արտադրանքի ՀՀ մաքսային սահմանով տեղափոխելու համար ՆԳ մարմինների և ՀՀ մշակույթի, երիտասարդության հարցերի և սպորտի նախարարության կողմից տրված անհրաժեշտ փաստաթղթերը

զ) ՀՀ տարածքում շրջանառությունն արգելված զենքի, փամփուշտների և կառուցվածքով զենքի նմանվող արտադրանքի բացակայությունը

է) զենքի և փամփուշտների հաշվառման ու պահպանության պատասխանատու անձանց կողմից դրանց հետ վարվելու ներքին հսկողության կարգը

ը) իրավաբանական անձի աշխատողների զենքի և փամփուշտների հետ կապված աշխատանքներին առնչվելու թույլտվության առկայությունը

թ) ՆԳ աշխատակիցների կողմից վերջին ստուգման ժամանակ հայտնաբերված խախտումները ժամանակին և լիարժեք վերացնելը, գործադիր իշխանությունների իրավասու մարմինների կողմից հրահանգների (նախազգուշացումների) կատարելը։

186. Զենք և փամփուշտներ փոխադրելու ճանապարհին ստուգվում են.

ա) ապրանքատրանսպորտային, ուղեկցող և այլ փաստաթղթերի առկայությունը, որոնց հիման վրա իրականացվում է զենքի և փամփուշտների տեղափոխումը և փոխադրումը, ինչպես նաև՝ բեռը ուղեկցողների անձը հաստատող փաստաթղթերը, զինված պահպանություն իրականացնող աշխատակիցների զենք պահելու և կրելու իրավունքը

բ)  տրանսպորտային միջոցների սարքավորվածությունը սահմանված պահանջներին համապատասխան

գ) անհրաժեշտ քանակությամբ զինված պահակախմբի առկայությունը

դ)  տրանսպորտային միջոցներում զենքի և փամփուշտների տեղադրման կարգը, օգտագործվող տարաների (արկղեր, փաթեթներ) ամբողջականությունը մատակարար իրավաբանական անձանց, փոխադրողների կամ մաքսային մարմինների կնիքների (կապարակնիքների) առկայությունը։

187. Օդային տրանսպորտով զենք և փամփուշտներ տեղափոխելիս ուղևորների մոտ գտնվող զենքն ու փամփուշտները ավիաընկերության անվտանգության ծառայության և գծային ՆԳ մարմինների կողմից համատեղ զննումից հետո ընդունվում են պատասխանատու պահպանության, ամբողջ չվերթի ընթացքում, բացառությամբ օրենսդրությամբ սահմանված դեպքերի:

Մ Ա Տ Յ Ա Ն

տրված լիցենզիաներն ու թույլտվությունները հաշվառելու

_____________________________________________

(ՆԳ մարմնի անվանումը)

Ծանոթություն.

1. 5-րդ սյունակը լրացվում է իրավաբանական անձանցից դիմումը ստանալու ժամանակ, նշելով կազմակերպության անվանումը ամբողջությամբ

2. 11-րդ սյունակը լրացվում է դիմողին ծանուցագիրը տալու ժամանակ կամ փոստով ուղարկելուց հետո` նշելով ամսաթիվը

3. Մատյանը կարվում, համարակալվում և կնքվում է ՆԳ մարմնի կնիքով

____________
(ստորագրություն)
_______________________________
(Ա. Ա. Հ.) 
 
Կ. Տ.
 
____  ___________ թ.