ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Օ Ր Ե Ն Ք Ը
Ընդունված է 2025 թվականի ապրիլի 18-ին
ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳՐՔՈՒՄ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հոդված 1. 1985 թվականի դեկտեմբերի 6-ի Վարչական իրավախախտումների վերաբերյալ Հայաստանի Հանրապետության օրենսգիրքը (այսուհետ՝ Օրենսգիրք) լրացնել հետևյալ բովանդակությամբ 213.3-րդ հոդվածով.
| «Հոդված 213.3. |
Աղետների ռիսկի կառավարման և բնակչության պաշտպանության մասին օրենսդրության պահանջները խախտելը |
1. Տեղական ինքնակառավարման մարմինների, կազմակերպությունների կամ անհատ ձեռնարկատերերի կողմից պաշտպանական կառույցների (բացառությամբ բնակելի ֆոնդի) պահպանության, սպասարկման, շահագործման, հիմնանորոգման, վերանորոգման, կահավորման, նախապատրաստման, պատրաստվածության բերման ապահովման պարտականությունը չկատարելը՝
առաջացնում է տուգանքի նշանակում անհատ ձեռնարկատերերի նկատմամբ` սահմանված նվազագույն աշխատավարձի հիսնապատիկի չափով, կազմակերպության պատասխանատու անձանց նկատմամբ՝ սահմանված նվազագույն աշխատավարձի հարյուրապատիկի չափով, իսկ տեղական ինքնակառավարման մարմինների պատասխանատու անձանց նկատմամբ՝ սահմանված նվազագույն աշխատավարձի հարյուրապատիկից մինչև հարյուրհիսնապատիկի չափով:
2. Տեղական ինքնակառավարման մարմինների կամ կազմակերպությունների կողմից արտակարգ իրավիճակներում իրենց գործելու կամ աղետների ռիսկի կառավարման պլանը չմշակելը, լիազոր մարմնի հետ չհամաձայնեցնելը, չհաստատելը կամ հանրապետական արձագանքման պլաններով իրենց վերապահված գործողությունները պլանում չներառելը, ինչպես նաև դրա կիրարկումը չապահովելը՝
առաջացնում է նախազգուշացում տեղական ինքնակառավարման մարմինների կամ կազմակերպությունների պատասխանատու անձանց նկատմամբ:
3. Սույն հոդվածի 2-րդ մասով նախատեսված վարչական տույժի միջոցը կիրառելուց հետո` վեց ամսվա ընթացքում, խախտումը չվերացնելը`
առաջացնում է տուգանքի նշանակում կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հարյուրհիսնապատիկի չափով, իսկ տեղական ինքնակառավարման մարմինների պատասխանատու անձանց նկատմամբ՝ սահմանված նվազագույն աշխատավարձի երկուհարյուրապատիկի չափով:
4. Տեղական ինքնակառավարման մարմինների կամ կազմակերպությունների կողմից Հայաստանի Հանրապետության կառավարության սահմանած կարգով ազդարարման համակարգեր չստեղծելը, դրանց անխափան աշխատանքը կամ աշխատողների ազդարարումը չապահովելը՝
առաջացնում է տուգանքի նշանակում տեղական ինքնակառավարման մարմինների կամ կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հարյուրապատիկից մինչև երկուհարյուրապատիկի չափով:
5. Կազմակերպությունների կողմից, իրենց գործունեության առանձնահատկություններից ելնելով, ռիսկային գոտում գտնվող համայնքների ազդակիր բնակավայրերում ազդարարման համակարգեր չստեղծելը կամ դրանց անխափան աշխատանքը չապահովելը՝
առաջացնում է տուգանքի նշանակում կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հարյուրհիսնապատիկից մինչև չորսհարյուրապատիկի չափով:
6. Տեղական ինքնակառավարման մարմինների կամ կազմակերպությունների կողմից աղետների ռիսկի կառավարման կամ բնակչության պաշտպանության ուղղությամբ իրենց աշխատողների կամ համայնքի բնակչության կամ կազմակերպության աշխատողների ուսուցումը կամ իրազեկումը չիրականացնելը, ինչպես նաև ուսումնավարժություններ չանցկացնելը՝
առաջացնում է նախազգուշացում տեղական ինքնակառավարման մարմինների կամ կազմակերպությունների պատասխանատու անձանց նկատմամբ:
7. Սույն հոդվածի 6-րդ մասով սահմանված վարչական տույժի միջոցը կիրառելուց հետո` մեկ ամսվա ընթացքում, խախտումը չվերացնելը՝
առաջացնում է տուգանքի նշանակում կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հարյուրհիսնապատիկի չափով, իսկ տեղական ինքնակառավարման մարմինների պատասխանատու անձանց նկատմամբ՝ սահմանված նվազագույն աշխատավարձի երկուհարյուրապատիկի չափով:
8. Տեղական ինքնակառավարման մարմինների, կազմակերպությունների կամ ֆիզիկական անձանց, այդ թվում՝ անհատ ձեռնարկատերերի կողմից արտակարգ իրավիճակի սպառնալիքի կամ առաջացման մասին լիազոր մարմնին չտեղեկացնելը՝
1) առաջացնում է տուգանքի նշանակում ֆիզիկական անձանց, այդ թվում՝ անհատ ձեռնարկատերերի նկատմամբ՝ սահմանված նվազագույն աշխատավարձի տասնապատիկի չափով.
2) առաջացնում է տուգանքի նշանակում կազմակերպությունների պատասխանատու անձանց նկատմամբ՝ սահմանված նվազագույն աշխատավարձի քսանապատիկի չափով.
3) առաջացնում է տուգանքի նշանակում տեղական ինքնակառավարման մարմինների պատասխանատու անձանց նկատմամբ՝ սահմանված նվազագույն աշխատավարձի հիսնապատիկի չափով:
9. Կազմակերպությունների կողմից անվտանգության անձնագիրը (արտադրական վտանգավոր օբյեկտները), անվտանգության վկայագիրը (վտանգավոր արդյունաբերական օբյեկտը), անվտանգության հայտարարագիրը (հիդրոտեխնիկական կառուցվածքները) կամ դրանցում կատարված փոփոխությունները սահմանված ժամկետում լիազոր մարմնի համապատասխան տարածքային ստորաբաժանում չներկայացնելը՝
առաջացնում է տուգանքի նշանակում կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հինգհարյուրապատիկի չափով:
10. Տեղական ինքնակառավարման մարմինների, կազմակերպությունների կամ ֆիզիկական անձանց, այդ թվում՝ անհատ ձեռնարկատերերի կողմից օրենքով սահմանված կարգով լիազոր մարմնի կողմից իրականացվող աղետների ռիսկի կառավարման և բնակչության պաշտպանության վիճակի պլանավորված համալիր գնահատման և ոչ պլանավորված ուսումնասիրության գործընթացը խոչընդոտելը՝
առաջացնում է տուգանքի նշանակում ֆիզիկական անձանց, այդ թվում՝ անհատ ձեռնարկատերերի նկատմամբ՝ սահմանված նվազագույն աշխատավարձի քսանապատիկից մինչև հիսնապատիկի չափով, տեղական ինքնակառավարման մարմինների պատասխանատու անձանց նկատմամբ՝ սահմանված նվազագույն աշխատավարձի երեսնապատիկից մինչև հարյուրապատիկի չափով, իսկ կազմակերպությունների պատասխանատու անձանց նկատմամբ՝ սահմանված նվազագույն աշխատավարձի հարյուրապատիկից մինչև հինգհարյուրապատիկի չափով:»:
Հոդված 2. Օրենսգրքի 224.3-րդ հոդվածի 1-ին մասը «մասով» բառից հետո լրացնել «, 213.3-րդ հոդվածի 2-10-րդ մասերով» բառերով:
Հոդված 3. Օրենսգիրքը լրացնել հետևյալ բովանդակությամբ 244.24-րդ հոդվածով.
| «Հոդված 244.24. |
Քաղաքաշինության, տեխնիկական և հրդեհային անվտանգության բնագավառներում վերահսկողություն իրականացնող տեսչական մարմինը |
1. Քաղաքաշինության, տեխնիկական և հրդեհային անվտանգության բնագավառներում վերահսկողություն իրականացնող տեսչական մարմինը քննում և վարչական տույժեր է նշանակում նաև սույն օրենսգրքի 213.3-րդ հոդվածի 1-ին մասով նախատեսված վարչական իրավախախտումների վերաբերյալ գործերով:
2. Քաղաքաշինության, տեխնիկական և հրդեհային անվտանգության բնագավառներում վերահսկողություն իրականացնող տեսչական մարմնի անունից վարչական իրավախախտումների վերաբերյալ գործեր քննելու և վարչական տույժեր նշանակելու իրավունք ունեն տեսչական մարմնի ղեկավարը, ղեկավարի տեղակալները և տարածքային բաժինների պետերը:»:
Հոդված 4. Սույն օրենքն ուժի մեջ է մտնում 2027 թվականի հունվարի 1-ից:
|
Հանրապետության նախագահ |
Վ. Խաչատուրյան |
|
2025 թ. մայիսի 13 Երևան ՀՕ-90-Ն |
Պաշտոնական հրապարակման օրը՝ 14 մայիսի 2025 թվական:
