ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

23 փետրվարի 2017 թվականի N 210-Ա

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՒ ՎԵՐԱԿԱՌՈՒՑՄԱՆ ԵՎ ԶԱՐԳԱՑՄԱՆ ԵՎՐՈՊԱԿԱՆ ԲԱՆԿԻ ՄԻՋԵՎ 2016 ԹՎԱԿԱՆԻ ԱՊՐԻԼԻ 5-ԻՆ ՍՏՈՐԱԳՐՎԱԾ «ԿՈՏԱՅՔԻ ԵՎ ԳԵՂԱՐՔՈՒՆԻՔԻ ՄԱՐԶԵՐԻ ԿՈՇՏ ԹԱՓՈՆՆԵՐԻ ԿԱՌԱՎԱՐՄԱՆ ԾՐԱԳԻՐ» ՎԱՐԿԱՅԻՆ ԵՎ ԴՐԱՄԱՇՆՈՐՀԱՅԻՆ ՀԱՄԱՁԱՅՆԱԳՐԵՐԻ ՇՐՋԱՆԱԿՆԵՐՈՒՄ ԱՇԽԱՏԱՆՔՆԵՐԻ ԿԱԶՄԱԿԵՐՊՄԱՆ ՄԱՍԻՆ

(վերնագիրը փոփ. 21.11.24 N 1813-Ա)

Ղեկավարվելով «Հայաստանի Հանրապետության միջազգային պայմանագրերի մասին» Հայաստանի Հանրապետության օրենքի 51-րդ հոդվածի 2-րդ և 3-րդ մասերի ու 52-րդ հոդվածի դրույթներով և հիմք ընդունելով «Գնումների մասին» Հայաստանի Հանրապետության օրենքի 2-րդ հոդվածի 1-ին և 3-րդ մասերի դրույթները՝ Հայաստանի Հանրապետության կառավարությունը որոշում է.

1. Առաջարկել Հայաստանի տարածքային զարգացման հիմնադրամին`

1) Հայաստանի տարածքային զարգացման հիմնադրամի և «Կոտայքի և Գեղարքունիքի ԿԿԹԿ» սահմանափակ պատասխանատվությամբ ընկերության (այսուհետ՝ ընկերություն) միջև կնքված տեխնիկական աջակցության պայմանագրի հիման վրա Հայաստանի Հանրապետության ու Վերակառուցման և զարգացման եվրոպական բանկի միջև 2016 թվականի ապրիլի 5-ին ստորագրված Կոտայքի և Գեղարքունիքի մարզերի կոշտ թափոնների կառավարման ծրագրի շրջանակներում ընկերությանը վերապահված գնումների կազմակերպման ու անցկացման, այդ թվում՝ մրցութային առաջարկությունների գնահատման և պայմանագրերի կազմման շինարարական աշխատանքների տեխնիկական վերահսկողության, միջանկյալ կատարողական և ավարտական ակտերի ստուգման, ծրագրի շրջանակներում աշխատանքների, ծառայությունների ու ապրանքների համար վճարման կազմակերպման, նախագծերի շրջակա միջավայրի վրա ազդեցության փորձաքննության և հանրային քննարկումների կազմակերպման, ինչպես նաև ծրագրի մոնիթորինգի իրականացման և ծրագրի իրականացման վերաբերյալ հաշվետվությունների կազմման գործընթացներում ստանձնել պատվիրատուի լիազորությունները (այսուհետ` լիազորություններ).

2) լիազորություններն ստանձնել անվճար հիմունքներով:

2. Թույլատրել Հայաստանի Հանրապետության տարածքային կառավարման և ենթակառուցվածքների նախարարությանը Հայաստանի Հանրապետության պետական բյուջեով «Կոտայքի և Գեղարքունիքի մարզերի կոշտ թափոնների կառավարման ծրագրի» մասով նախատեսված համաֆինանսավորման գումարներից փոխանցել Հայաստանի տարածքային զարգացման հիմնադրամին՝ ծրագրի շրջանակներում աղբահանության համար մասնագիտացված մեքենաների ու այլ սարքավորումների ձեռքբերման և աղբամանների հարթակների կառուցման համար Հայաստանի Հանրապետության օրենսդրությամբ սահմանված կարգով իր կողմից իրականացված գնումների գործընթացի արդյունքներով համապատասխան պայմանագրերի հիման վրա մատակարարող և կապալառու ընկերություններին վճարումներ կատարելու նպատակով։

(2-րդ կետը լրաց. 21.11.24 N 1813-Ա)