040.0544.29.11.97

«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ Լ. ՏԵՐ-ՊԵՏՐՈՍՅԱՆ

29 ՆՈՅԵՄԲԵՐԻ 1997 Թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

29 նոյեմբերի 1997 թ. N 544

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅԱՆ ԵՎ ՔԱՆԴՄԱՆ ԹՈՒՅԼՏՎՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

Հաստատել Հայաստանի Հանրապետությունում շինարարության թույլտվության և քանդման թույլտվության կարգը (կցվում է):

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅԱՆ եվ ՔԱՆԴՄԱՆ ԹՈՒՅԼՏՎՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են Հայաստանի Հանրապետությունում շինարարության թույլտվություն և քանդման թույլտվություն (այսուհետև` թույլտվություն) ստանալու պայմանները, թույլտվության տեսակները և կարգը:

2. Շինարարության թույլտվությունը փաստաթուղթ է, որը հաստատում է կառուցապատողի` ինչպես նոր կառուցապատվող տարածքում, այնպես էլ գոյություն ունեցող շենքերում և շինություններում որևէ շինարարական գործունեություն իրականացնելու իրավունքը:

3. Քանդման թույլտվությունը փաստաթուղթ է, որը հաստատում է սեփականատիրոջ շենքերի և շինությունների քանդումն իրականացնելու իրավունքը:

4. Առանց թույլտվության կարող են կատարվել միայն ընթացիկ նորոգման աշխատանքներ, որոնց հետևանքով չի փոփոխվում շենքերի և շինությունների արտաքին տեսքը, ինչպես նաև բարեկարգման աշխատանքներ, եթե դրանք չեն խոչընդոտում անշարժ գույքի նպատակային օգտագործմանը և (կամ) չեն հակասում սահմանված օգտակալություններին (սերվիտուտներ):

5. Թույլտվության հիման վրա ցանկացած շինարարական և համընթաց աշխատանք կարող է իրականացվել բացառապես նախագծով որոշված տարածքի սահմաններում:

6. Կառուցապատողը պարտավոր է նախքան շինարարություն սկսելը, ինչպես նաև դրա ընթացքում համաձայնության գալ կառուցապատման կամ քանդման հետևանքով վնասներ կրող սուբյեկտների հետ` հասցվելիք վնասների փոխհատուցման վերաբերյալ:

Փոխհատուցման ձևերի և չափի մասին անհամաձայնության դեպքում վեճը լուծվում է դատական կարգով:

7. Թույլտվությունը համայնքներում տալիս է համայնքի ղեկավարը, համայնքի վարչական սահմաններից դուրս գտնվող տարածքներում մարզպետը, Երևանում` թաղային համայնքի ղեկավարը` Երևանի խորհրդի սահմանած կարգով` օրենքով և սույն կարգի պահանջներին համապատասխան:

Համայնքների ղեկավարները թույլտվության մասին եռօրյա ժամկետում իրազեկում են մարզպետներին, Երևանում` Երևանի քաղաքապետին, Հայաստանի Հանրապետության քաղաքաշինության նախարարության քաղաքաշինական պետական տեսչությանը և համապատասխան հարկային մարմնին` ներկայացնելով թույլտվության պատճենը:

(7-րդ կետը խմբ., լրաց. 29.10.98 N 666, խմբ. 25.07.01 N 682)

II. ԹՈՒՅԼՏՎՈՒԹՅԱՆ ՏԵՍԱԿՆԵՐԸ

8. Թույլտվության տեսակներն են`

ա) նոր կառուցվող օբյեկտների` շենքերի, շինությունների (ներառյալ ժամանակավոր) շինարարական-մոնտաժային աշխատանքների կատարման թույլտվությունը.

բ) գոյություն ունեցող օբյեկտների վերակառուցման, ուժեղացման, արդիականացման, վերականգնման աշխատանքների կատարման թույլտվությունը.

գ) գոյություն ունեցող օբյեկտների քանդման թույլտվությունը:

III. ԹՈՒՅԼՏՎՈՒԹՅՈՒՆ ՏԱԼՈՒ ԿԱՐԳԸ

9. Շինարարության թույլտվություն ստանալու համար կառուցապատողը թույլտվություն տվող իրավասու մարմին է ներկայացնում հետևյալ փաստաթղթերը`

ա) դիմում (N 1 ձևը կցվում է).

բ) նախագծային փաստաթղթերի մշակման համար` իրավասու մարմնի կողմից հաստատված ճարտարապետահատակագծային առաջադրանքը, որտեղ նշվում են օբյեկտի համար անհրաժեշտ տեխնիկական, քաղաքաշինական և այլ պայմաններ.

գ) օբյեկտի շինարարության համար սահմանված կարգով հաստատված նախագծային փաստաթղթեր:

Դիմումում նշվում են`

ա) օբյեկտի նշանակությունը (բնույթը) և հասցեն.

բ) օբյեկտի նախագծային փաստաթղթերը մշակած և փորձաքննություն անցկացրած տնտեսավարող սուբյեկտները` համապատասխան գործունեության իրականացման լիցենզիաների համարներով.

գ) կառուցապատողի հետ կնքված պայմանագրի համաձայն օբյեկտի շինարարությունն իրականացնող կապալառուն, տեխնիկական և հեղինակային հսկողություն իրականացնող տնտեսավարող սուբյեկտները` համապատասխան գործունեության իրականացման լիցենզիաների համարներով:

(9-րդ կետը փոփ. 25.07.01 N 682)

10. Քանդման թույլտվություն ստանալու համար սեփականատերը թույլտվություն տվող իրավասու մարմին է ներկայացնում հետևյալ փաստաթղթերը`

ա) դիմում (N 2 ձևը կցվում է).

բ) անշարժ գույքը փոփոխության ենթարկելու իրավազորությունը հաստատող փաստաթղթի պատճենը:

Դիմումում նշվում են`

ա) քանդվող օբյեկտի նշանակությունը (բնույթը) և հասցեն.

բ) քանդման նպատակը.

գ) քանդվող օբյեկտի հիմնական ցուցանիշները:

11. Թույլտվություն տվող իրավասու մարմինը կառուցապատողի (սեփականատիրոջ) ներկայացրած փաստաթղթերը քննարկում է և ընդունում որոշում թույլտվության կամ մերժման մասին` դիմում տալու օրվանից ոչ ավելի, քան երկու շաբաթվա ընթացքում:

12. Շինարարության թույլտվությունը ձևակերպվում է համաձայն N 3 ձևի (կցվում է), քանդման թույլտվությունը` համաձայն N 4 ձևի (կցվում է):

Շինարարության թույլտվության հետ մեկտեղ կառուցապատողին է տրվում շինարարության վարման մատյան, որը դրոշմակնքում է թույլտվություն տվող իրավասու մարմինը:

 Շինարարության վարման մատյանի ձևը հաստատում է Հայաստանի Հանրապետության քաղաքաշինության նախարարությունը:

(12-րդ կետը լրաց. 21.10.99 թիվ 658)

13. Եթե նոր կառուցվող օբյեկտի շինարարության իրականացումը հնարավոր չէ առանց գոյություն ունեցող օբյեկտի (օբյեկտների) քանդման, ապա սեփականատիրոջը տրված ճարտարապետահատակագծային առաջադրանքը` համապատասխան նշումով, հանդիսանում է նաև քանդման թույլտվություն:

Օբյեկտի փաստացի քանդումը և նոր շինարարությունն իրականացվում են շինարարության թույլտվություն ստանալուց հետո` ճարտարապետահատակագծային առաջադրանքով սահմանված հերթականությամբ:

Այն դեպքում, երբ տեղանքի ճարտարագիտական ուսումնասիրություններն առանց քանդման անհնարին են, օբյեկտի քանդումը կարող է իրականացվել ճարտարապետահատակագծային առաջադրանքի համաձայն` մինչև շինարարության թույլտվություն ստանալը:

14. Եթե օբյեկտի քանդումը չի նախատեսում նոր օբյեկտի կառուցում և (կամ) հաջորդող աշխատանքների իրականացման համար չի պահանջվում շինարարության թույլտվություն` համաձայն սույն կարգի 4-րդ կետի, ապա սեփականատիրոջը տրվում է քանդման թույլտվություն:

15. Թույլտվության մերժման դեպքում իրավասու մարմինը կառուցապատողին (սեփականատիրոջը) գրավոր իրազեկում է մերժման շարժառիթների մասին:

Կրկնակի դիմելու և իրավասու մարմնի ներկայացրած պահանջները դիմողի կողմից կատարման դեպքում թույլտվության կամ մերժման մասին հարցը քննարկվում է ոչ ավելի, քան յոթ օրվա ընթացքում:

16. Թույլտվության ձևակերպման օրվանից մեկ տարվա ընթացքում թույլտվությամբ նախատեսված աշխատանքները չսկսելու դեպքում կառուցապատողը պարտավոր է դիմել թույլտվություն տվող իրավասու մարմին կառուցապատման տեխնիկական պայմանների հնարավոր փոփոխությունների մասին լրացուցիչ տվյալներ և սույն կարգի համաձայն նոր թույլտվություն ստանալու համար:

17. Կառուցապատողը շինարարության ընթացքում պարտավոր է 7-օրյա ժամկետում իրավասու մարմնին տեղեկացնել թույլտվության պայմանների փոփոխման մասին (աշխատանքները կատարողների, տեխնիկական և հեղինակային հսկողություն իրականացնող տնտեսավարող սուբյեկտների փոխարինման, նախագծային լուծումների փոփոխման դեպքերում):

18. Նախագծային լուծումների սահմանված կարգով փոփոխման դեպքում շինարարության թույլտվությունը ենթակա է վերաձևակերպման` համաձայն սույն կարգի դրույթների:

IV. ՀԱՏՈՒԿ ՊԱՅՄԱՆՆԵՐ

19. Պատմության և մշակույթի անշարժ հուշարձանների պահպանության գոտիներում, շրջակա միջավայրի վրա ազդեցության փորձաքննության անհրաժեշտություն առաջանալիս, բնապահպանական, քաղաքաշինական և այլ հատուկ կարգավորման օբյեկտներում թույլտվությունները ձևակերպվում են Հայաստանի Հանրապետության օրենսդրության համապատասխան ակտերով սահմանված պահանջների պահպանմամբ:

V. ԿՈՂՄԵՐԻ ՊԱՏԱՍԽԱՆԱՏՎՈՒԹՅՈՒՆԸ

20. Թույլտվություն տվող իրավասու մարմնի գործողությունները կարող են գանգատարկվել դատական կարգով:

21. Եթե կառուցապատողը շինարարության ընթացքում թույլտվության պայմանների փոփոխման մասին իրավասու մարմնին չի իրազեկում և (կամ) կեղծ տեղեկություններ է տրամադրում, ապա խախտումը բացահայտելու պահից թույլտվության գործողությունը համարվում է կասեցված` մինչև կասեցման պատճառների վերացումը:

22. Առանց թույլտվության օբյեկտի քանդումը և շինարարական-մոնտաժային աշխատանքների կատարումը (բացի սույն կարգի 4-րդ կետում նշվածներից) հանդիսանում է ինքնակամ և առաջ է բերում գործող օրենսդրությամբ սահմանված պատասխանատվություն:

VI. ԱՆՑՈՒՄԱՅԻՆ ԴՐՈՒՅԹ

23. Սույն կարգին կից NN 1 և 3 ձևերում տնտեսավարող սուբյեկտների լիցենզիաների համարները պարտադիր նշվում են 1998 թվականի հունվարի 1-ից:

Ձև N 1

ԿԱՌՈՒՑԱՊԱՏՈՂ`

Դ Ի Մ ՈՒ Մ

հասցեով հողամասի վրա:

Հայտնում եմ`

1. Օբյեկտի նախագծային փաստաթղթերը`

1.2. ընդունված կարգով համաձայնեցվել են շահագրգիռ կազմակերպությունների, ճարտարապետության և քաղաքաշինության մարմինների հետ.

Օբյեկտի հիմնական ցուցանիշներն են`

Պարտավորվում են շինմոնտաժային աշխատանքներն իրականացնել գործող կարգին խիստ համապատասխան և ներկա դիմումում նշված տեղեկությունների հետ կապված բոլոր փոփոխությունների մասին

ԿԱՌՈՒՑԱՊԱՏՈՂ`

Կ.Տ.

(ԻՐԱՎԱԲԱՆԱԿԱՆ ԱՆՁԻ)

Ձև N 2

ՍԵՓԱԿԱՆԱՏԵՐ`

Դ Ի Մ ՈՒ Մ

Հայտնում եմ.

1. Անշարժ գույքը փոփոխության ենթարկելու իրավազորությունն ամրագրված է N __________

«____» _______________________ թ. վկայականով` գրանցված ՀՀ անշարժ գույքի պետական միասնական կադաստրի վարչության տարածքային մարմնի կողմից:

2. Քանդվող օբյեկտների հիմնական ցուցանիշները`

Պարտավորվում են օբյեկտի քանդման աշխատանքները կատարել գործող կարգին համապատասխան:

ՍԵՓԱԿԱՆԱՏԵՐ`

Կ.Տ.

(ԻՐԱՎԱԲԱՆԱԿԱՆ ԱՆՁԻ)

Ձև N 3

Հ Ա Յ Ա Ս Տ Ա Ն Ի  Հ Ա Ն Ր Ա Պ Ե Տ ՈՒ Թ Յ ՈՒ Ն

ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅՈՒՆ

Հատուկ պայմաններ.

1. Կառուցապատողը նախքան շինարարությունն սկսելը պարտավոր է փոխհատուցել այն անձանց հասցված վնասները, որոնց իրավունքները սահմանափակվում են շինարարության ընթացքում:

Կ.Տ.

Ձև N 4

Հ Ա Յ Ա Ս Տ Ա Ն Ի  Հ Ա Ն Ր Ա Պ Ե Տ ՈՒ Թ Յ ՈՒ Ն

ՔԱՆԴՄԱՆ ԹՈՒՅԼՏՎՈՒԹՅՈՒՆ

գլխավոր հատակագծի վրա հետևյալ համարների տակ նշված շենքերի, շինությունների և կառույցների քանդումն իրականացնելու համար.

Քանդման ենթակա են միայն թույլտվության մեջ նշված օբյեկտները:

Քանդման աշխատանքները կատարվում են սույն թույլտվության հիման վրա:

Կ.Տ.

(կարգը խմբ., լրաց. 29.10.98 N 666, լրաց. 21.10.99 թիվ 658, խմբ., փոփ. 25.07.01 N 682)