ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 հունվարի 2008 թվականի N 115-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԱՆՑԱՆԿԱԼԻ ՀԱՄԱՐՎՈՂ ՕՏԱՐԵՐԿՐԱՑԻՆԵՐԻ ՏՎՅԱԼՆԵՐԻ ԲԱՆԿՈՒՄ ՏԵՂԵԿՈՒԹՅՈՒՆՆԵՐ ՄՏՑՆԵԼՈՒ ԵՎ ԴՐԱՆԻՑ ՕԳՏՎԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Օտարերկրացիների մասին» օրենքի 8-րդ հոդվածի 6-րդ մասի` Հայաստանի Հանրապետության կառավարությունը որոշում է.

(նախաբանը փոփ. 16.05.24 N 714-Ն)

1. Սահմանել Հայաստանի Հանրապետության տարածքում անցանկալի համարվող օտարերկրացիների տվյալների բանկում տեղեկություններ մտցնելու և դրանից օգտվելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԱՆՑԱՆԿԱԼԻ ՀԱՄԱՐՎՈՂ ՕՏԱՐԵՐԿՐԱՑԻՆԵՐԻ ՏՎՅԱԼՆԵՐԻ ԲԱՆԿՈՒՄ ՏԵՂԵԿՈՒԹՅՈՒՆՆԵՐ ՄՏՑՆԵԼՈՒ ԵՎ ԴՐԱՆԻՑ ՕԳՏՎԵԼՈՒ

1. Սույն կարգով սահմանվում է Հայաստանի Հանրապետության տարածքում անցանկալի համարվող օտարերկրացիների տվյալների բանկում (այսուհետ` տվյալների բանկ) տեղեկություններ մտցնելու և դրանից օգտվելու կարգը:

2. Տվյալների բանկի ստեղծման նպատակն է Հայաստանի Հանրապետության տարածքում անցանկալի համարվող օտարերկրացիների հաշվառումը՝ կենտրոնացված տեղեկատվական համակարգի կիրառմամբ, տեղեկատվության ստացման, կուտակման և մշակման ապահովումը, ինչպես նաև համապատասխան շահագրգիռ մարմիններին անհրաժեշտ տվյալների տրամադրումը:

(2-րդ կետը փոփ. 16.05.24 N 714-Ն)

3. Հայաստանի Հանրապետության տարածքում օտարերկրացին համարվում է անցանկալի, և նրա մասին տեղեկությունները մուտքագրվում են տվյալների բանկ, եթե`

1) նա արտաքսվել է Հայաստանի Հանրապետության տարածքից կամ զրկվել է կացության կարգավիճակից, և արտաքսման կամ կացության կարգավիճակից զրկվելու մասին որոշումն ուժի մեջ մտնելու պահից չի անցել 3 տարի.

2) նա «Օտարերկրացիների մասին» օրենքը խախտելու համար ենթարկվել է վարչական պատասխանատվության, չի կատարել վարչական ակտով իր վրա դրված պարտականությունը, և վարչական պատասխանատվության ենթարկվելու պահից չի անցել մեկ տարի.

3) գոյություն ունեն հավաստի տվյալներ, որ նա իրականացնում է այնպիսի գործունեություն, մասնակցում, կազմակերպում կամ հանդիսանում է այնպիսի կազմակերպության անդամ, որի նպատակն է`

ա. Հայաստանի Հանրապետության պետական անվտանգությանը վնաս պատճառելը, սահմանադրական կարգը տապալելը, պաշտպանունակությունը թուլացնելը,

բ. ահաբեկչական գործունեություն իրականացնելը,

գ. սահմանով ապօրինաբար (առանց համապատասխան թույլտվության) զենք, ռազմամթերք, պայթուցիկ նյութեր, ռադիոակտիվ նյութեր, թմրանյութեր, հոգեներգործուն նյութեր տեղափոխելը կամ

դ. մարդու թրաֆիքինգը կամ շահագործումը, պետական սահմանի ապօրինի հատում կամ անօրինական միգրացիայի կազմակերպում իրականացնելը.

4) նա տառապում է վարակիչ հիվանդությամբ, որն սպառնում է բնակչության առողջությանը` բացառությամբ այն դեպքերի, երբ նա մուտք է գործում Հայաստանի Հանրապետություն՝ նման հիվանդությունը բուժելու նպատակով՝ Հայաստանի Հանրապետության կառավարության 2008 թվականի հունվարի 25-ի N 49-Ն որոշմամբ սահմանված վարակիչ հիվանդությունների ցանկին համապատասխան.

5) նա մուտքի թույլտվություն հայցելիս ներկայացրել է իր մասին կեղծ տեղեկություններ կամ չի ներկայացրել անհրաժեշտ փաստաթղթեր (դրանք ներկայացնելու մասին կրկնակի պահանջից հետո), կամ գոյություն ունեն տվյալներ, որ նրա մուտքը կամ Հայաստանի Հանրապետությունում գտնվելն ունի այլ նպատակ, քան հայտարարվածը, կամ գոյություն ունեն նրա կողմից Հայաստանի Հանրապետության պետական անվտանգությանը կամ հասարակական կարգին այլ լուրջ և հիմնավոր սպառնալիքներ.

6) նա օրինական ուժի մեջ մտած դատավճռով դատապարտվել է ազատազրկման Հայաստանի Հանրապետությունում հանցագործություն կատարելու համար և օրինական ուժի մեջ մտած արտաքսման մասին որոշումն ի կատար ածելուց հետո ոչ մեծ կամ միջին ծանրության հանցագործություն կատարելու դեպքում չի անցել երեք տարի, ծանր հանցագործություն կատարելու դեպքում՝ հինգ տարի, իսկ առանձնապես ծանր հանցագործություն կատարելու դեպքում՝ ութ տարի.

7) նա աշխատանքի է անցել Հայաստանի Հանրապետությունում` առանց աշխատանքի թույլտվության՝ բացառությամբ «Օտարերկրացիների մասին» օրենքով նախատեսված դեպքերի.

8) նա ճանապարհային երթևեկության անվտանգության ապահովման բնագավառի օրենսդրությունը խախտելու համար ենթարկվել է վարչական պատասխանատվության, չի կատարել վարչական ակտով իր վրա դրված պարտականությունը, և վարչական ակտն անբողոքարկելի դառնալու օրվանից չի անցել մեկ տարի:

(3-րդ կետը խմբ. 26.03.20 N 405-Ն, փոփ., լրաց., խմբ. 16.05.24 N 714-Ն)

4. Տվյալների բանկը վարում է Հայաստանի Հանրապետության ազգային անվտանգության բնագավառում լիազորված պետական կառավարման մարմինը, որն էլ անհրաժեշտ տեղեկություններ է մուտքագրում տվյալների բանկ: Տվյալների բանկում տեղեկություններ մուտքագրելու նպատակով ազգային անվտանգության բնագավառում լիազորված պետական կառավարման մարմին տեղեկություններ են ներկայացնում Հայաստանի Հանրապետության Նախագահի աշխատակազմը, Հայաստանի Հանրապետության ազգային անվտանգության բնագավառում լիազորված պետական կառավարման մարմինը, ոստիկանության բնագավառում լիազորված պետական կառավարման մարմինը, միգրացիայի և քաղաքացիության բնագավառում պետական կառավարման լիազոր մարմինը, արտաքին գործերի բնագավառում լիազորված պետական կառավարման մարմինը:

(4-րդ կետը լրաց. 24.08.23 N 1427-Ն)

5. Սույն կարգի 3-րդ կետում նշված հիմքերի առկայության դեպքում` սույն կարգի 4-րդ կետում նշված մարմիններն անհապաղ տեղեկացնում են Հայաստանի Հանրապետության ազգային անվտանգության բնագավառում լիազորված պետական կառավարման մարմնին` անհրաժեշտ տեղեկությունները տվյալների բանկ մուտքագրելու համար` նշելով օտարերկրացու անունը, ազգանունը (առկայության դեպքում` նաև երկրորդ կամ փոխված անունը, հայրանունը, օրիորդական կամ փոխված ազգանունը), ծննդյան օրը, ամիսը, տարեթիվը, վայրը, քաղաքացիությունը, սեռը, բնակության երկիրը, զբաղմունքը և այն հիմքը, որով օտարերկրացին համարվում է Հայաստանի Հանրապետության տարածքում անցանկալի, ինչպես նաև կցվում է օտարերկրացու անձնագրի (առկայության դեպքում) պատճենը: Սույն կետով նախատեսված տեղեկությունները ներկայացվում են Հայաստանի Հանրապետության ազգային անվտանգության բնագավառում լիազորված պետական կառավարման մարմնի կողմից սահմանված ձևին համապատասխան՝ թղթային կամ էլեկտրոնային եղանակով:

(5-րդ կետը լրաց. 16.05.24 N 714-Ն)

5.1. Սույն կարգի 3-րդ կետի 2-րդ և 8-րդ ենթակետերով նախատեսված դեպքերում անհրաժեշտ տեղեկությունները Հայաստանի Հանրապետության ազգային անվտանգության բնագավառում լիազորված պետական կառավարման մարմնի կողմից տվյալների բանկ են մուտքագրվում համապատասխանաբար միգրացիայի և քաղաքացիության բնագավառում պետական կառավարման լիազոր մարմնի և ոստիկանության բնագավառում լիազորված պետական կառավարման մարմնի կողմից վարվող էլեկտրոնային շտեմարաններից ինքնաշխատ եղանակով Հայաստանի Հանրապետության սահմանային էլեկտրոնային կառավարման տեղեկատվական համակարգում ստացվող տվյալների հիման վրա։ Անհնարինության դեպքում տվյալների բանկ մուտքագրելու նպատակով տեղեկություններն ստացվում են սույն կարգով սահմանված ընթացակարգով:

(5.1-ին կետը լրաց. 16.05.24 N 714-Ն)

6. Տվյալների բանկից օգտվելու իրավունք ունեն`

1) Հայաստանի Հանրապետության Նախագահի աշխատակազմը, Հայաստանի Հանրապետության ազգային անվտանգության բնագավառում լիազորված պետական կառավարման մարմինը, ոստիկանության բնագավառում լիազորված պետական կառավարման մարմինը, միգրացիայի և քաղաքացիության բնագավառում պետական կառավարման լիազոր մարմինը, արտաքին գործերի բնագավառում լիազորված պետական կառավարման մարմինը, սահմանային հսկողություն իրականացնող լիազոր մարմինը, Հայաստանի Հանրապետության արդարադատության բնագավառում լիազորված պետական մարմինը.

2) օրենքով նախատեսված դեպքերում` Հայաստանի Հանրապետության դատարանները, Հայաստանի Հանրապետության քրեական հետապնդում իրականացնող մարմինները:

(6-րդ կետը լրաց. 26.03.20 N 405-Ն, 24.08.23 N 1427-Ն, 16.05.24 N 714-Ն)

7. Տվյալների բանկից օգտվելու համար` սույն կարգի 6-րդ կետում նշված մարմինները գրավոր հարցումներ են ներկայացնում Հայաստանի Հանրապետության ազգային անվտանգության բնագավառում լիազորված պետական կառավարման մարմին, որը ոչ ուշ, քան 5 աշխատանքային օրվա ընթացքում պատասխանում է դրանց:

8. Անցանկալի համարվող օտարերկրացիների մասին տեղեկությունները տվյալների բանկից հանվում են սույն կարգի 3-րդ կետում նշված հիմքերը վերանալուց հետո անհապաղ` դրանք ներկայացրած մարմինների գրավոր միջնորդությունների հիման վրա, իսկ սույն կարգի 3-րդ կետով նախատեսված ժամկետները լրանալու կամ սույն կարգի 3-րդ կետի 2-րդ կամ 8-րդ ենթակետերով նախատեսված պարտականությունը կատարելու մասին տեղեկատվությունը տվյալների բանկ մուտքագրված լինելու դեպքերում՝ նաև ինքնաշխատ եղանակով, եթե առկա չեն օտարերկրացուն անցանկալի համարելու այլ հիմքեր:

(8-րդ կետը լրաց. 16.05.24 N 714-Ն)

9. Սույն կարգի 6-րդ կետի 1-ին ենթակետում նշված պետական մարմինների ղեկավարները հրամանով սահմանում են այն պաշտոնների ցանկը, որոնք զբաղեցնող անձինք իրավունք ունեն ստորագրելու գրավոր հարցումները: Հրամանի մեկ օրինակն ուղարկվում է Հայաստանի Հանրապետության ազգային անվտանգության բնագավառում լիազորված պետական կառավարման մարմին:

(հավելվածը խմբ., լրաց. 26.03.20 N 405-Ն, լրաց. 24.08.23 N 1427-Ն, փոփ., լրաց., խմբ. 16.05.24 N 714-Ն)