040.0425.06.07.98

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
6 ՀՈՒԼԻՍԻ 1998 Թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 հուլիսի 1998 թվականի N 425
քաղ. Երևան

ԲԺՇԿԱԿԱՆ ԱՄԼԱՑՈՒՄՆ ԻՐԱԿԱՆԱՑՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Մարդու վերարտադրողական առողջության և վերարտադրողական իրավունքների մասին» Հայաստանի Հանրապետության oրենքի 9-րդ հոդվածի 3-րդ մասը՝ Հայաստանի Հանրապետության կառավարությունը որոշում է.

(նախաբանը խմբ. 29.12.22 N 2065-Ն)

1. Հաստատել բժշկական ամլացումն իրականացնելու կարգը (կցվում է):

2. Սույն որոշումն ուժի մեջ է մտնում հրապարակման պահից:

Կ Ա Ր Գ

ԲԺՇԿԱԿԱՆ ԱՄԼԱՑՈՒՄՆ ԻՐԱԿԱՆԱՑՆԵԼՈՒ

I. Ընդհանուր դրույթներ

1. Բժշկական ամլացումը հատուկ միջամտություն է, որը կիրառվում է որպես բեղմնականխման մշտական եղանակ մարդու սերնդի վերարտադրման ընդունակությունից զրկելու նպատակով:

2. Բժշկական ամլացումը սեռական օրգաններում հղիացումը բացառող փոփոխությունների ստեղծումն է, որը հիմնականում իրականացվում է վիրաբուժական եղանակով: Վիրաբուժական ամլացման համար բնորոշ է արդյունքի կայունությունը և անդարձելիությունը:

3. Տղամարդկանց մոտ վիրաբուժական ամլացման միջամտությունը սերմն արտահանող ծորանների կապումը կամ հատումն է, շրջափակումը կամ խցանումը, իսկ կանանց մոտ` ֆալոպյան փողերի կապումը կամ հատումը:

4. Բժշկական ամլացումը կամավոր է, այն իրականացվում է քաղաքացու գրավոր դիմումի (տեղեկացված համաձայնության) առկայության դեպքում:

5. Բժշկական ամլացմանը ենթակա չեն դատարանի կողմից անգործունակ կամ սահմանափակ գործունակ ճանաչված անձինք:

II. Բժշկական ամլացումը վիրաբուժական եղանակով իրականացնելու կարգը

6. Բժշկական ամլացումը թույլատրվում է կատարել միայն ստացիոնար բժշկական հաստատություններում`

ա) կանանց` գինեկոլոգիական բաժանմունքներում.

բ) տղամարդկանց` ուրոլոգիական բաժանմունքներում:

7. Բժշկական ամլացումը նպատակահարմար է, եթե`

ա) քաղաքացին վստահ է, որ այլևս չի ցանկանում երեխաներ ունենալ.

բ) կնոջ մոտ հղիությունն ուղեկցվում է բարձր ռիսկով` տարիքի կամ առողջական բարդությունների առումով (եթե կնոջ մոտ առկա է վիրաբուժական ամլացման հակացուցում, ամլացումը ցուցված է ամուսնուն).

գ) նախընտրելի չեն բեղմնականխման ժամանակավոր եղանակները:

8. Բժշկական ամլացումը կատարվում է, եթե`

ա) ընտանիքն ունի չորս և ավելի երեխա.

բ) կինը 40 տարեկան և ավելի է.

գ) կինը ենթարկվել է եռակի կեսարյան հատման և ունի առողջ երեխաներ.

դ) առկա են բժշկական ցուցումներ:

9. Ամլացման բժշկական ցուցումներ են համարվում այն հիվանդությունները և վիճակները, որոնք ուղեկցվում են ախտաբանական անդարձելի փոփոխություններով և որոնց դեպքում հղիությունն անհամատեղելի է տվյալ հիվանդության հետ ու սպառնում է կնոջ կյանքին:

10. Բժշկական ամլացման հիմնական հակացուցումներն են` սեռական և այլ օրգանների սուր վարակային ու բորբոքային հիվանդությունները և վիճակները:

Հիվանդությունների բուժումից հետո ամլացումը կատարվում է սույն կարգի դրույթներին համապատասխան:

11. Բժշկական ամլացման վերաբերյալ եզրակացությունը տրվում է ամլացումը կատարող բժշկական հաստատության համապատասխան հանձնաժողովի կողմից (տնօրեն, բաժանմունքի վարիչ, բուժող բժիշկ), գրանցվում է հիվանդության պատմության քարտում և վավերացվում հանձնաժողովի անդամների կողմից:

12. Առանձին դեպքերում, երբ բացակայում է բժշկական ամլացման որևէ ցուցում, ամլացման վերաբերյալ որոշումը կայացվում է քաղաքացու դիմումի հիման վրա` հանձնաժողովի որոշմամբ:

13. Առանձին դեպքերում, երբ հանձնաժողով հրավիրել անհնար է (ոչ աշխատանքային ժամ, կեսարյան հատում, կյանքի ցուցումով և այլն) թույլատրվում է ամլացումը կատարել առնվազն 2 բժշկի եզրակացության հիման վրա:

14. Բժշկական ամլացման կապակցությամբ անաշխատունակության թերթիկը տրվում է ժամանակավոր անաշխատունակության ողջ տևողության համար` ընդհանուր հիմունքներով:

15. Բժշկական ամլացման ենթարկված անձանց տրվում է տեղեկանք կատարված միջամտության վերաբերյալ:

III. Նախազգուշական տեղեկատվություն

16. Քանի որ բժշկական ամլացումն անդարձելի միջամտություն է, ապա այն պետք է լինի կամավոր և դիմողները պետք է տեղեկացված լինեն դրա մասին: Նրանց անհրաժեշտ է տրամադրել բավարար ժամանակ (մեկ ամսից ոչ պակաս) վերջնական որոշում կայացնելու համար:

IV. Տեղեկացված համաձայնություն

17. Տեղեկացված համաձայնությունը բժշկական ամլացմանը կամավոր ենթարկվելու` դիմողի համաձայնությունն է, որը տրվում է նախազգուշական տեղեկատվություն ստանալուց հետո:

Տեղեկացված համաձայնությունը լրացվում է գրավոր` դիմողի ստորագրությամբ: