ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

20 հոկտեմբերի 2022 թվականի N 1624-Ն

Հիմք ընդունելով «Բնակչության բժշկական օգնության և սպասարկման մասին» օրենքի 44-րդ հոդվածի 2-րդ մասը` Հայաստանի Հանրապետության կառավարությունը որոշում է.

1. Հաստատել բժշկական սարքավորումների և գործիքների կենտրոնացված կարգով ձեռքբերման ու բաշխման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

1. Սույն կարգով կարգավորվում են պետության կողմից կենտրոնացված կարգով բժշկական սարքավորումների և գործիքների (այսուհետ` բժշկական սարքավորումներ) ձեռքբերման ու բաշխման հետ կապված հարաբերությունները:

2. Սույն կարգի իմաստով բժշկական սարքավորումների և գործիքների կենտրոնացված կարգով ձեռքբերումը` բժշկական կազմակերպությունների (անկախ դրանց կազմակերպական-իրավական և սեփականության ձևից) միջև բաշխման նպատակով, բնակչության առողջության պահպանման և բարելավման ծրագրերի շրջանակում պետական բյուջեի «Առողջապահություն» բաժնի համապատասխան միջոցառումների հատկացումների հաշվին Հայաստանի Հանրապետության առողջապահության նախարարության գնումների պլանի համաձայն բժշկական սարքավորումների և գործիքների գնումն է:

3. Բժշկական սարքավորումների ձեռքբերումն իրականացվում է Հայաստանի Հանրապետության առողջապահության նախարարության կողմից` «Գնումների մասին» Հայաստանի Հանրապետության օրենսդրությամբ սահմանված կարգով:

4. Բժշկական սարքավորումների բաշխումը բժշկական կազմակերպությունների միջև իրականացվում է Հայաստանի Հանրապետության առողջապահության նախարարի հրամանով` Հայաստանի Հանրապետության առողջապահության նախարարություն գրավոր ներկայացված հիմնավորված առաջարկությունների հիման վրա, ինչպես նաև հաշվի առնելով տվյալ բժշկական կազմակերպությունում համանման բժշկական սարքավորման առկայությունը:

5. Բժշկական սարքավորումների բաշխումը մասնավոր բժշկական կազմակերպություններին իրականացվում է միայն ըստ անհրաժեշտության արտակարգ իրավիճակի, արտակարգ կամ ռազմական դրության ժամանակ:

6. Բժշկական սարքավորումները հանձնվում են բժշկական կազմակերպություններին Հայաստանի Հանրապետության առողջապահության նախարարության և տվյալ բժշկական կազմակերպության միջև կնքված պայմանագրի հիման վրա, որում նշվում են հատկացման իրավական ձևը և ժամկետը:

Պաշտոնական հրապարակման օրը՝ 20 հոկտեմբերի 2022 թվական: