ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
8 սեպտեմբերի 2022 թվականի N 1396-Լ
«ՊԵՏԱԿԱՆ ՏՈՒՐՔԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅԱՆ ՄԱՍԻՆ
Հիմք ընդունելով «Ազգային ժողովի կանոնակարգ» սահմանադրական օրենքի 77-րդ հոդվածի 1-ին մասը՝ Հայաստանի Հանրապետության կառավարությունը որոշում է.
1. Հավանություն տալ «Պետական տուրքի մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքի նախագծի (Պ-260-11.05.2022-ՏՀ-011/0) վերաբերյալ Հայաստանի Հանրապետության կառավարության առաջարկությանը:
2. Հայաստանի Հանրապետության կառավարության առաջարկությունը սահմանված կարգով ներկայացնել Հայաստանի Հանրապետության Ազգային ժողովի աշխատակազմ:
|
Հայաստանի Հանրապետության |
Հ. Մաթևոսյան |
|
Երևան |
|
08.09.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
«ՊԵՏԱԿԱՆ ՏՈՒՐՔԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ (Պ-260-11.05.2022-ՏՀ-011/0) ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅՈՒՆԸ
Հայաստանի Հանրապետության կառավարությունը «Պետական տուրքի մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքի նախագծի վերաբերյալ հայտնում է հետևյալը.
2019 թվականին տրված օրենսդրական կարգավորումները նպատակ ունեին մեղմելու իրանական ցեմենտի ցածր գներով ներմուծման արդյունքում ցեմենտի տեղական շուկայում առաջացած խնդիրները և ստեղծելու որոշակի հավասար պայմաններ ներմուծվող և տեղում արտադրվող ցեմենտի համար։
Կարգավորումները մշակելիս Հայաստանի Հանրապետության կառավարությունն առաջնորդվել էր նաև այն տրամաբանությամբ, որ Իրանում սուբսիդավորվող և Հայաստան արտահանվող ցեմենտը կարող էր հանգեցնել Հայաստանի ցեմենտ արտադրող ընկերությունների գործունեության խաթարմանը (ընդհուպ՝ մինչև դադարեցմանը), որից հետո իրանական ցեմենտը գրավելով մենաշնորհային դիրք` կարող էր հանգեցնել ցեմենտի տեղական շուկայում գների անցանկալի աճին։
Ուստի, տնտեսության համար ռազմավարական ապրանք համարվող ցեմենտի ներմուծումը որպես լիցենզավորվող գործունեություն սահմանելով՝ Հայաստանի Հանրապետության կառավարությունն առաջնորդվել է հավասար մրցակցություն ապահովելու, տեղական ցեմենտի շուկայում ամբողջությամբ ներմուծման կախվածությունը բացառելու և հայկական ցեմենտի արտադրության ոլորտը պահպանելու անհրաժեշտությամբ։
Հաշվի առնելով վերը նշված նկատառումները՝ Հայաստանի Հանրապետության կառավարությունը չի առարկում Հայաստան ներմուծվող իրանական ցեմենտի և կլինկերի պետական տուրքի վերանայման առաջարկությանը, պայմանով, որ առաջարկվող պետական տուրքի նոր դրույքաչափերը կապահովեն տեղական արտադրողների և ներմուծողների համար մրցակցային հավասար պայմաններ:
Այդ իսկ նպատակով, Հայաստանի Հանրապետության կառավարությունն առաջարկում է մինչև Հայաստանի Հանրապետության Ազգային ժողովում նախագծի քննարկումը ևս մեկ անգամ ուսումնասիրել ներկայիս դրությամբ (սահմանին ցեմենտի և կլինկերի ներկայումս ձևավորված գների, ինչպես նաև տեղի ունեցող դրամի արժևորման պարագայում) տեղական շուկայում առկա գործոնների ազդեցությունը ներմուծվող ցեմենտի և կլինկերի գնագոյացման վրա, որի արդյունքների հիման վրա ձևավորել վերջնական դիրքորոշում նախագծով առաջարկվող դրույքաչափերի վերաբերյալ։
Պաշտոնական հրապարակման օրը՝ 8 սեպտեմբերի 2022 թվական:
