«Վավերացնում եմ»
Հայաստանի Հանրապետության
Նախագահ Ռ. Քոչարյան
 13 հունվարի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 դեկտեմբերի 2004 թվականի N 1861-Ն

ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՎԹԱՐՆԵՐԻ ՀԵՏԵՎԱՆՔՆԵՐԻ ՎԵՐԱՑՄԱՆ ՄԻՋՈՑԱՌՈՒՄՆԵՐԻ ԻՐԱԿԱՆԱՑՄԱՆ ԵՎ ՎՆԱՍՆԵՐԻ ՀԱՏՈՒՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ 

Համաձայն Հայաստանի Հանրապետության ջրային օրենսգրքի 89-րդ հոդվածի և 121-րդ հոդվածի 5-րդ մասի 28-րդ կետի պահանջների` Հայաստանի Հանրապետության կառավարությունը որոշում է.

Հաստատել հիդրոտեխնիկական կառուցվածքների վթարների հետևանքների վերացման միջոցառումների իրականացման և վնասների հատուցման կարգը` համաձայն հավելվածի:

Կ Ա Ր Գ

ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՎԹԱՐՆԵՐԻ ՀԵՏԵՎԱՆՔՆԵՐԻ ՎԵՐԱՑՄԱՆ ՄԻՋՈՑԱՌՈՒՄՆԵՐԻ ԻՐԱԿԱՆԱՑՄԱՆ ԵՎ ՎՆԱՍՆԵՐԻ ՀԱՏՈՒՑՄԱՆ

I. ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՎԹԱՐՆԵՐԻ ՀԵՏԵՎԱՆՔՆԵՐԻ ՎԵՐԱՑՄԱՆ ՄԻՋՈՑԱՌՈՒՄՆԵՐԸ

1. Սույն կարգով սահմանվում են ջրամատակարարման և ջրահեռացման, ոռոգման, կոլեկտորադրենաժային, ափապաշտպան ու էլեկտրաէներգիայի արտադրման համակարգերում հիդրոտեխնիկական կառուցվածքների վթարների և դրանց հետևանքների վերացման միջոցառումների իրականացման գործընթացները:

2. Վթարներ են համարվում հիդրոտեխնիկական կառուցվածքներում առաջացած չնախատեսված երևույթները, որոնց պատճառով մասնակիորեն կամ ամբողջությամբ խախտվում է համակարգի բնականոն աշխատանքը:

3. Հիդրոտեխնիկական կառուցվածքներում տեղի ունեցած վթարների հետևանքները վերացվում են օպերատիվ կարգով` անկախ օրվա ժամից և բնակլիմայական պայմաններից:

ՎԹԱՐՆԵՐԻ ՎԵՐԱՑՄԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐԸ
 

4. Հիդրոտեխնիկական կառուցվածքները շահագործող կազմակերպության համապատասխան ստորաբաժանման ղեկավարը վթարի մասին բոլոր ահազանգերը գրանցում է հատուկ մատյանում` նշելով վթարի տեղը, բնույթը, օրը, ժամը, և անհապաղ տեղյակ պահում հիդրոտեխնիկական կառուցվածքները շահագործող կազմակերպության ղեկավարին:

5. Հիդրոտեխնիկական կառուցվածքների վթարների վերացման միջոցառումների իրականացման համար հիդրոտեխնիկական կառուցվածքները շահագործող կազմակերպության ղեկավարի հրամանով ստեղծվում է հանձնաժողով և նշանակվում հանձնաժողովի ղեկավար:

6. Ելնելով վթարի բնույթից` հիդրոտեխնիկական կառուցվածքները շահագործող կազմակերպության համապատասխան ստորաբաժանման ղեկավարը Հայաստանի Հանրապետության արտակարգ իրավիճակների նախարարության, Հայաստանի Հանրապետության առողջապահության նախարարության պետական հիգիենիկ հակահամաճարակային ու Հայաստանի Հանրապետության շրջակա միջավայրի նախարարության ջրային ռեսուրսների կառավարման և պահպանության գործակալության պետական տեսչության տարածքային մարմիններին և բոլոր, առաջին հերթին` խոշոր սպառողներին անհապաղ հայտնում է վթարի և ջրամատակարարման դադարեցման մասին` նշելով վթարի ու դրա հետևանքների վերացման կանխատեսվող ժամկետը:

(6-րդ կետը փոփ. 25.09.14 N 1039-Ն, 10.10.19 N 1442-Ն)

7. Հանձնաժողովը տեղում պարզում է վթարի բնույթը և հետևանքները, դրանց առաջացման պատճառները և գրանցում կատարում համապատասխան մատյանում:

8. Հանձնաժողովը որոշում է վթարի վերացման համար անհետաձգելի աշխատանքների ծավալները:

9. Հիդրոտեխնիկական կառուցվածքները շահագործող կազմակերպությունը վթարի վերացման աշխատանքների կատարումը համաձայնեցնում է բոլոր շահագրգիռ կազմակերպությունների հետ:

10. Վթարի վերացման աշխատանքներն իրականացնելու համար հիդրոտեխնիկական կառուցվածքները շահագործող կազմակերպության ղեկավարի կողմից գրավոր հանձնարարական է տրվում վթարը վերացնող մասնագիտացված խմբի ղեկավարին` նշելով վթարի վերացման ժամկետները և վայրը:

11. Վթարը վերացնող մասնագիտացված խմբի անդամները, անվտանգության տեխնիկայի կանոնների համաձայն, հիդրոտեխնիկական կառուցվածքները շահագործող կազմակերպության պատասխանատու անձի կողմից պարբերաբար հրահանգավորվում են աշխատանքի պաշտպանության և անվտանգության տեխնիկայի կանոնների ապահովման պահանջների մասին:

12. Վթարը վերացնող մասնագիտացված խմբի ղեկավարը վթարի վերացման աշխատանքների ավարտի մասին գրավոր զեկուցում է հիդրոտեխնիկական կառուցվածքները շահագործող կազմակերպության ղեկավարին և տեղյակ պահում Հայաստանի Հանրապետության առողջապահության նախարարության պետական հիգիենիկ հակահամաճարակային տեսչության տարածքային մարմնին:

ՎԹԱՐՆԵՐԻ ՀԵՏԵՎԱՆՔՆԵՐԻ ՎԵՐԱՑՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՈՒՄԸ

13. Վթարի վերացման աշխատանքները կազմակերպվում են վթարը վերացնող մասնագիտացված խմբի ղեկավարի անմիջական ղեկավարությամբ:

14. Վթարների վերացման աշխատանքների ավարտից հետո վթարային հանգույցը փորձարկվում է, անհրաժեշտության դեպքում ախտահանվում, և հետազոտվում է ջրի որակը: Խմելու ջրի համակարգում տեղի ունեցած վթարի վերացումից հետո շահագործումը վերսկսվում է Հայաստանի Հանրապետության առողջապահության նախարարության պետական հիգիենիկ հակահամաճարակային տեսչության համաձայնությամբ:

15. Ջրամատակարարման համակարգերում հիդրոտեխնիկական կառուցվածքների վթարների վերացման աշխատանքների ավարտից հետո շահագործումը թույլատրվում է միայն վթարային հանգույցի փորձարկումից, ախտահանումից և ջրի որակի հետազոտումից հետո:

16. Վթարված ջրային համակարգի վերականգնումից և վերագործարկումից հետո կազմվում է վթարի վերացման մասին ակտ` նշելով օրը, ժամը, կատարված ծախսերը, և համապատասխան մատյանում կատարվում է գրանցում:

17. Հիդրոտեխնիկական կառուցվածքներում տեղի ունեցած վթարների և դրանց վերացման միջոցառումների մասին հաշվետվություն է ներկայացվում ջրային համակարգերի կառավարման մարմին:

18. Ելնելով վթարի բարդությունից` հիդրոտեխնիկական կառուցվածքները շահագործող կազմակերպությունը կարող է դիմել Հայաստանի Հանրապետության կառավարության 2003 թվականի մայիսի 8-ի N 686 որոշման պահանջների համաձայն ձևավորված ջրային համակարգերի օգտագործման և պահպանության տեխնիկական միջգերատեսչական հանձնաժողովին` տեխնիկական առաջադրանքի կազմման, աշխատանքների իրականացման և վթարի վերացումից հետո հիդրոտեխնիկական կառուցվածքների շահագործման գործընթացների վերաբերյալ խորհրդատվություն ստանալու նպատակով:

II. ՀԻԴՐՈՏԵԽՆԻԿԱԿԱՆ ԿԱՌՈՒՑՎԱԾՔՆԵՐԻ ՎԹԱՐՆԵՐԻ ՀԵՏԵՎԱՆՔՈՎ ՊԱՏՃԱՌՎԱԾ ՎՆԱՍՆԵՐԻ ՀԱՏՈՒՑՈՒՄԸ
 

19. Հիդրոտեխնիկական կառուցվածքների վթարի հետևանքով ֆիզիկական և իրավաբանական անձանց գույքին, ֆիզիկական անձանց կյանքին և առողջությանը հասցված վնասը ենթակա է հատուցման` օրենքով սահմանված կարգով:

20. Վթարի պատճառով առաջացած վնասի չափը որոշվում է շահագրգիռ անձանց փոխադարձ համաձայնությամբ, իսկ տարաձայնությունների դեպքում` Հայաստանի Հանրապետության օրենսդրությամբ սահմանված կարգով:

(հավելվածը փոփ. 25.09.14 N 1039-Ն, 10.10.19 N 1442-Ն)