ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

2 փետրվարի 2017 թվականի N 68-Ն

ՋՐԱՅԻՆ ՌԵՍՈՒՐՍՆԵՐԻ ՊԵՏԱԿԱՆ ԿԱԴԱՍՏՐԻ ՎԱՐՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2003 ԹՎԱԿԱՆԻ ՀՈՒԼԻՍԻ 23-Ի N 1060-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Համաձայն Հայաստանի Հանրապետության ջրային օրենսգրքի 19.2-րդ և «Իրավական ակտերի մասին» Հայաստանի Հանրապետության օրենքի 72-րդ հոդվածի 1-ին մասի 1-ին կետի «բ» ենթակետի՝ Հայաստանի Հանրապետության կառավարությունը որոշում է.

1. Հաստատել ջրային ռեսուրսների պետական կադաստրի վարման կարգը՝ համաձայն հավելվածի:

2. Ջրային ռեսուրսների պետական կադաստրի վարման լիազորությունները վերապահել Հայաստանի Հանրապետության բնապահպանության նախարարությանը:

3. Հայաստանի Հանրապետության արտակարգ իրավիճակների նախարարին, Հայաստանի Հանրապետության էներգետիկ ենթակառուցվածքների և բնական պաշարների նախարարին, Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահին` ապահովել սույն որոշման հավելվածի 5-րդ կետում նշված տվյալները Հայաստանի Հանրապետության բնապահպանության նախարարին ներկայացնելը:

4. Առաջարկել Հայաստանի Հանրապետության հանրային ծառայությունները կարգավորող հանձնաժողովին եռամսյակային պարբերականությամբ մինչև տվյալ եռամսյակին հաջորդող ամսվա 15-ը Հայաստանի Հանրապետության բնապահպանության նախարարություն ներկայացնել տեղեկատվություն տրամադրված հիդրոէլեկտրակայաններում էլեկտրական էներգիայի (հզորության) արտադրության լիցենզիաների վերաբերյալ:

5. Ուժը կորցրած ճանաչել Հայաստանի Հանրապետության կառավարության 2003 թվականի հուլիսի 23-ի «Ջրային պետական կադաստրում փաստաթղթերի գրանցման և տեղեկատվության տրամադրման կարգը հաստատելու մասին» N 1060-Ն որոշումը:

6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

ՋՐԱՅԻՆ ՌԵՍՈՒՐՍՆԵՐԻ ՊԵՏԱԿԱՆ ԿԱԴԱՍՏՐԻ ՎԱՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են ջրային ռեսուրսների պետական կադաստրի կառուցվածքն ու բովանդակությունը, ինչպես նաև կանոնակարգվում են տվյալների հավաքման ու պետական կադաստրում դրանց գրանցման և պետական կադաստրից տեղեկատվության տրամադրման գործընթացների հետ կապված հարաբերությունները:

2. Ջրային ռեսուրսների պետական կադաստրը տեղեկատվական համակարգ է, որի հիմնական նպատակը ջրային ռեսուրսների տեղեկատվական հենքի ստեղծումն է` ջրի ազգային քաղաքականության շրջանակներում միասնական պետական ռազմավարություն և արդյունավետ կառավարում իրականացնելու համար:

II. ՋՐԱՅԻՆ ՌԵՍՈՒՐՍՆԵՐԻ ՊԵՏԱԿԱՆ ԿԱԴԱՍՏՐԻ

ԿԱՌՈՒՑՎԱԾՔՆ ՈՒ ԲՈՎԱՆԴԱԿՈՒԹՅՈՒՆԸ

3. Ջրային ռեսուրսների պետական կադաստրը կազմված է աղյուսակային և տարածական բաղադրիչներից: Աղյուսակային բաղադրիչը կազմված է թվային կամ տեքստային, իսկ տարածական բաղադրիչը` վեկտորային կամ ռաստերային (տիեզերական պատկերներ) տվյալներից:

4. Ջրային ռեսուրսների պետական կադաստրը ներառում է`

1) ջրավազանային կառավարման պլաններով հաստատված ցուցանիշները.

2) ջրային ռեսուրսների քանակական ու որակական ցուցանիշները.

3) հանրապետության 6 ջրավազանային կառավարման տարածքների և 14 խոշոր գետավազանների (մակերևութային և ստորերկրյա) ջրային հաշվեկշռի ցուցանիշները.

4) հանրապետության 6 ջրավազանային կառավարման տարածքների և 14 խոշոր գետավազանների ջրատնտեսական հաշվեկշռի ցուցանիշները.

5) ջրամբարների հաշվառման ցուցանիշները.

6) Հայաստանի Հանրապետության գործող ջրատարերի, ջրագծերի և դրենաժային համակարգերի վերաբերյալ ցուցանիշները.

7) հիդրոտեխնիկական կառուցվածքների ջրակորուստները.

8) ջրօգտագործման թույլտվությունները և ջրօգտագործման իրավունքների փոխանցման պայմանագրերն ու դրանցում կատարված փոփոխությունները.

9) փաստացի ջրօգտագործման ցուցանիշները.

10) հիդրոէլեկտրակայաններում էլեկտրական էներգիայի (հզորության) արտադրության լիցենզիաներով ամրագրված ցուցանիշները կամ պայմանները.

11) հիդրոէլեկտրակայանների կողմից արտադրված էլեկտրաէներգիայի վերաբերյալ ցուցանիշները.

12) ջրօգտագործման և ջրահեռացման, ինչպես նաև ջրային համակարգերի կորուստների նորմատիվները.

13) ազգային սեյսմիկ դիտացանցի հորատանցքերի մոնիթորինգային ցուցանիշները.

14) գետերի հնարավոր ջրածածկման գոտում գտնվող համայնքների վերաբերյալ ցուցանիշները.

15) հանրապետության հողային ֆոնդի առկայության և բաշխման (հողային հաշվեկշռի) վերաբերյալ ցուցանիշները` ըստ մարզերի և համայնքների, այդ թվում` ջրային նպատակային նշանակության հողերն ըստ գործառնական նշանակությունների, ոռոգվող հողերն ըստ նպատակային նշանակության, հողատեսքերի և սեփականության ձևերի` հեկտարներով և վեկտորային քարտեզներով.

16) մայր ջրանցքների ամսական կամ եռամսյակային ելքերը.

17) ջրօգտագործողների ընկերությունների ցանկի, սպասարկման գոտիների և դրանց կողմից ոռոգելի հողատարածքների վերաբերյալ ցուցանիշները.

18) ջրօգտագործման նկատմամբ ավտոմատ հսկողական կառավարման համակարգի առկա տվյալները.

19) Սևանա լճի ջրի մակարդակի, ոռոգման նպատակով Սևանա լճից ջրի բացթողումների և Արփա-Սևան թունելով լիճ մուտք գործող ջրածավալների վերաբերյալ ցուցանիշները, ինչպես նաև ըստ տարիների Սևանա լճից ջրի մակարդակի տատանումների դինամիկան.

20) էկոլոգիական թողքի մեծությունները.

21) Հայաստանի Հանրապետության տարածքում առկա հիդրոտեխնիկական կառուցվածքների ամբարտակների խաթարման հետևանքով հնարավոր ջրածածկման գոտում գտնվող տարածքների վեկտորային քարտեզները.

22) գետի վրա ծանրաբեռնվածության աստիճանը:

III. ՏՎՅԱԼՆԵՐԻ ՀԱՎԱՔՈՒՄԸ

5. Տվյալների հավաքումը կատարվում է հետևյալ կարգով`

1) Հայաստանի Հանրապետության արտակարգ իրավիճակների նախարարությունը Հայաստանի Հանրապետության բնապահպանության նախարարություն է ներկայացնում՝

ա. Սևանա լճի ջրի մակարդակի, ոռոգման նպատակով Սևանա լճից ջրի բացթողումների և Արփա-Սևան թունելով լիճ մուտք գործող ջրածավալների վերաբերյալ՝ աշխատանքային օրերին մինչև ժամը 10:00-ն,

բ. ազգային սեյսմիկ դիտացանցի հորատանցքերի մոնիթորինգային ցուցանիշների վերաբերյալ` եռամսյակային պարբերականությամբ հաշվետու եռամսյակի վերջին աշխատանքային օրը,

գ. մակերևութային ջրային ռեսուրսների քանակական ցուցանիշների վերաբերյալ` տարեկան պարբերականությամբ մինչև հաշվետու տարվան հաջորդող տարվա հուլիսի 15-ը,

դ. գետերի հնարավոր ջրածածկման գոտում գտնվող համայնքների վերաբերյալ,

ե. Հայաստանի Հանրապետության տարածքում առկա հիդրոտեխնիկական կառուցվածքների ամբարտակների խաթարման հետևանքով հնարավոր ջրածածկման գոտիների ցուցանիշների վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

զ. հնարավոր գարնանային վարարումների և սելավների ռիսկերից Հայաստանի Հանրապետության բնակավայրերի, տնտեսական արժեք ներկայացնող տարածքների, գյուղատնտեսական հողատեսքերն ու բնակչության գույքը պաշտպանելու նպատակով անհրաժեշտ կանխարգելիչ միջոցառումների իրականացման վերաբերյալ առաջարկություններ` տարեկան պարբերականությամբ մինչև հաշվետու տարվա մարտի 1-ը,

է. Ախուրյանի, Արփա լճի, Ապարանի, Ազատի և Մարմարիկի ջրամբարների ընդհանուր լցվածության առավելագույն ծավալի վերաբերյալ ամենօրյա տվյալներ` շաբաթական պարբերականությամբ հաշվետու շաբաթվա վերջին աշխատանքային օրը,

ը. ջրամբարների հաշվառման վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը.

2) Հայաստանի Հանրապետության էներգետիկ ենթակառուցվածքների և բնական պաշարների նախարարությունը Հայաստանի Հանրապետության բնապահպանության նախարարություն է ներկայացնում՝

ա. Սպանդարյանի և Տոլորսի ջրամբարների ընդհանուր լցվածության առավելագույն ծավալի, ամենօրյա մուտքի և ելքի ջրածավալների վերաբերյալ` շաբաթական պարբերականությամբ հաշվետու շաբաթվա վերջին աշխատանքային օրը,

բ. հիդրոէլեկտրակայանների կողմից արտադրված էլեկտրաէներգիայի վերաբերյալ` ամսական պարբերականությամբ հաշվետու ամսվան հաջորդող ամսի 10-ը,

գ. Հայաստանի Հանրապետության տարածքի ստորերկրյա քաղցրահամ ջրերի հանքավայրերի շահագործական պաշարների վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

դ. Սպանդարյանի և Տոլորսի ջրամբարների հաշվառման վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը.

3) Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեն Հայաստանի Հանրապետության բնապահպանության նախարարություն է ներկայացնում՝

ա. ջրամբարների ընդհանուր լցվածության առավելագույն ծավալի, ամենօրյա մուտքի և ելքի ջրածավալների վերաբերյալ` շաբաթական պարբերականությամբ հաշվետու շաբաթվա վերջին աշխատանքային օրը,

բ. Հայաստանի Հանրապետության մայր ջրանցքների ամսական կամ եռամսյակային ելքերի վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

գ. Հայաստանի Հանրապետության ջրօգտագործողների ընկերությունների ցանկի, սպասարկման գոտիների և դրանց կողմից ոռոգելի հողատարածքների վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

դ. Հայաստանի Հանրապետության գործող ջրատարերի, ջրագծերի և դրենաժային համակարգերի վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

ե. հիդրոտեխնիկական կառուցվածքների ջրակորուստների վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը,

զ. ջրամբարների հաշվառման վերաբերյալ` տարեկան պարբերականությամբ մինչև հաշվետու տարվան հաջորդող տարվա ապրիլի 15-ը.

4) Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեն Հայաստանի Հանրապետության բնապահպանության նախարարություն է ներկայացնում՝

ա. հանրապետության հողային ֆոնդի առկայության և բաշխման մասին հաշվետվության (հողային հաշվեկշռի) վերաբերյալ` ըստ մարզերի և համայնքների, այդ թվում` ջրային նպատակային նշանակության հողերն ըստ գործառնական նշանակությունների, ոռոգվող հողերն ըստ նպատակային նշանակության, հողատեսքերի և սեփականության ձևերի` հեկտարներով, ներառյալ վեկտորային քարտեզները, յուրաքանչյուր տարի` Հայաստանի Հանրապետության կառավարության կողմից Հայաստանի Հանրապետության հողային ֆոնդի առկայության և բաշխման մասին հաշվետվության (հողային հաշվեկշռի) հաստատումից հետո:

6. Սույն կարգի 5-րդ կետով նախատեսված տվյալները Հայաստանի Հանրապետության բնապահպանության նախարարություն ներկայացվում են սույն կարգի NN 1, 2, 3, 4, 5, 6, 7, 8, 9, 10, 11 և 12 ձևերով (ձևերը կցվում են):

IV. ՋՐԱՅԻՆ ՌԵՍՈՒՐՍՆԵՐԻ ՊԵՏԱԿԱՆ ԿԱԴԱՍՏՐՈՒՄ ԳՐԱՆՑՈՒՄԸ

7. Ջրային ռեսուրսների պետական կադաստրում փաստաթղթերի գրանցումը Հայաստանի Հանրապետության ջրային օրենսգրքի պահանջներին համապատասխան տվյալների գրառումն է տեղեկատվական համակարգերում:

8. Ջրային ռեսուրսների պետական կադաստրի տվյալները գրանցվում են տեղեկատվական համակարգում` ջրային ռեսուրսների պետական կադաստրում գրանցման համար տվյալներ ներկայացնող լիազոր մարմինների կողմից ներկայացված տեղեկատվության հիման վրա:

9. Տեղեկատվական համակարգը ներառում է սույն կարգի 4-րդ կետում նշված տվյալների գրանցումը, տեղեկատվության հավաքագրումը և տրամադրումը:

10. Ջրային ռեսուրսների պետական կադաստրում գրանցման համար տվյալներ ներկայացնող լիազոր մարմինները պատասխանատվություն են կրում իրենց տրամադրած տվյալների ամբողջականության և հավաստիության համար:

11. Ջրային ռեսուրսների պետական կադաստրում գրանցման ենթակա տվյալները պետք է հիմնվեն միասնական, մեթոդական տեղեկատվական հենքի վրա, որով կապահովվի տեղեկատվական համակարգում փաստաթղթերի գրանցման միջոցով ջրային ռեսուրսների պետական կադաստր մուտք գործող տվյալների համատեղելիությունը, կոդավորման և ցուցանիշների չափման միավորների միասնականությունը:

12. Սույն կարգի 4-րդ կետում նշված ցուցանիշների ամփոփված տվյալները համարվում են պաշտոնական և կարող են հիմք հանդիսանալ ինչպես պետական կառավարման և տեղական ինքնակառավարման մարմինների, այնպես էլ շահագրգիռ հայտատուների համար` որոշումներ ընդունելիս:

13. Ջրային ռեսուրսների արդյունավետ կառավարման ծրագրերի իրականացման համար անհրաժեշտ տվյալների գրանցումը, հավաքագրումը և ամփոփումը պետության կողմից պարտադիր իրականացվող գործառույթ է:

V. ՏԵՂԵԿԱՏՎՈՒԹՅԱՆ ՏՐԱՄԱԴՐՈՒՄԸ

14. Ջրային ռեսուրսների պետական կադաստրի տվյալները, բացառությամբ ծառայողական, առևտրային և օրենքով պահպանվող այլ գաղտնիք պարունակող տեղեկությունների, տեղադրվում են համապատասխան ինտերնետային կայքում, որից կարող են անվճար օգտվել բոլոր շահագրգիռ իրավաբանական և ֆիզիկական անձինք:

Ձև N 1