ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԴԱՏԱՐԱՆՆԵՐԻ ՆԱԽԱԳԱՀՆԵՐԻ ԽՈՐՀՈՒՐԴ

29 օգոստոսի 2014 թ. ք. Երևան

N 04-Ն

Ո Ր Ո Շ ՈՒ Մ

ԴԱՏԱՎՈՐՆԵՐԻ ԹԵԿՆԱԾՈՒՆԵՐԻ ՄԻՋԵՎ ՍԵՌԱՅԻՆ (ԳԵՆԴԵՐԱՅԻՆ) ՀԱՎԱՍԱՐԱԿՇՌՈՒԹՅԱՆԸ ՆՊԱՍՏԵԼՈՒ ՄԱՍԻՆ

2014 թվականի օգոստոսի 20-ի դրությամբ Հայաստանի Հանրապետությունում կին դատավորների թիվը կազմել է դատավորների ընդհանուր թվի 24 %-ը, մինչդեռ ՀՀ դատական օրենսգրքի 117-րդ հոդվածի 3-րդ մասի համաձայն` դատավորների թեկնածությունների ցուցակը կազմելու ընթացքում հաշվի է առնվում սեռային (գենդերային) հավասարակշռությունը, և եթե որևէ սեռի դատավորների թիվը պակասի դատավորների ընդհանուր թվի քսանհինգ տոկոսից, ապա այդ սեռի թեկնածուներին ցուցակում կերաշխավորվի առնվազն հինգ տեղ:

2014 թվականի հունվարի 21-ին ՀՀ Նախագահի կողմից ստորագրված թիվ ՆՀ-3-Ա հրամանագրով դատավորների թեկնածությունների ցուցակում ընդգրկված 20 անձից 7-ը կին է, սակայն Հայաստանի Հանրապետության դատարանների նախագահների խորհուրդը գտնում է, որ շարունակում է արդիական լինել կին իրավաբանների կողմից դատավորների թեկնածությունների ցուցակում ընդգրկվելու հնարավորություններն ամրապնդելուն և ընդլայնելուն ուղղված շարունակական միջոցառումների իրականացման անհրաժեշտությունը:

Նշված միջոցառումների շարքում Հայաստանի Հանրապետության դատարանների նախագահների խորհուրդը կարևորում է իրավաբանական կրթություն իրականացնող բարձրագույն ուսումնական հաստատություններում գենդերային հարցերի քննարկումը` ուսանողների շրջանում սեռային (գենդերային) հավասարության ընկալումը խրախուսելու նպատակով: Այս կապակցությամբ Հայաստանի Հանրապետության դատարանների նախագահների խորհուրդը կարևորում և անհրաժեշտ է համարում կին դատավորների և ուսանողների հանդիպումները, ինչպես նաև Հայաստանի Հանրապետության վճռաբեկ դատարանի կամ Հայաստանի Հանրապետության դատական դեպարտամենտի կամ Հայաստանի Հանրապետության դատավորների միության և իրավաբանական կրթություն իրականացնող բարձրագույն ուսումնական հաստատությունների կողմից համատեղ կազմակերպվող գիտաժողովներին, սեմինարներին, կլոր սեղաններին, դասընթացներին, իրազեկման տարբեր ծրագրերին կին դատավորների մասնակցությունը:

Ուստի, հիմք ընդունելով ՀՀ դատական օրենսգրքի 117-րդ հոդվածի 3-րդ մասը, ինչպես նաև Հայաստանի Հանրապետության վճռաբեկ դատարանի և Երևանի պետական համալսարանի միջև 2013 թվականի մարտի 30-ին կնքված համագործակցության հուշագրի 2.4-րդ կետը` Հայաստանի Հանրապետության դատարանների նախագահների խորհուրդը որոշում է.

Հաստատել 2014 թվականի սեպտեմբերից կատարման ենթակա` հետևյալ միջոցառումների ցանկը`

- Խրախուսել պետական և ոչ պետական մարմինների ու կազմակերպությունների կողմից իրականացվող` գենդերային հարցերի վերաբերյալ գիտաժողովներին, սեմինարներին, կլոր սեղաններին, դասընթացներին, իրազեկման տարբեր ծրագրերին կին դատավորների մասնակցությունը,

- Խրախուսել Հայաստանի Հանրապետությունում գործող բարձրագույն ուսումնական հաստատությունների կողմից իրականացվող` գենդերային հարցերի վերաբերյալ գիտաժողովներին, սեմինարներին, կլոր սեղաններին, դասընթացներին, իրազեկման տարբեր ծրագրերին կին դատավորների մասնակցությունը,

- Աջակցել գենդերային հարցերի վերաբերյալ միջազգային լավագույն փորձի ուսումնասիրությանը,

- Աջակցել գենդերային հավասարության նպաստմանն ուղղված ուսումնական նյութերի, վերլուծությունների, ուսումնական թեմատիկ ծրագրերի և այլն մշակմանը:

Հաստատել սույն որոշման կատարմանն ուղղված գործողությունների 2015-2017թթ. ծրագիրը` համաձայն հավելվածի:

(որոշումը լրաց. 16.07.15 N 02-Ն)

ՀՀ վճռաբեկ դատարանի նախագահ

Ա. Մկրտումյան

ՀՀ դատարանների նախագահների խորհրդի 2014 թ. օգոստոսի 29-ի «Դատավորների թեկնածուների միջև սեռային (գենդերային) հավասարությանը նպաստելու մասին» թիվ 04-Ն որոշման կատարմանն ուղղված գործողությունների 2015-2017 թթ. ծրագիր

N	Միջոցառումներ	Իրականացնող մարմիններ	Ժամկետներ	Արդյունք
1.	Մոնիթորինգի իրականացում՝ պարզելու համար դատական համակարգում գենդերային (սեռային) հավասարության վերաբերյալ տարբեր հասարակական խմբերում առկա մոտեցումները և կարծիքները	ՀՀ արդարադատության նախարարություն ՀՀ դատական դեպարտամենտ	2015թ. սեպտեմբեր - 2016թ. փետրվար	Մոնիթորինգի արդյունքների վերաբերյալ համապարփակ զեկույցի հրապարակում
2.	Մոնիթորինգի արդյունքների ամփոփման, ինչպես նաև միջազգային փորձի վերլուծության և դրա արդյունքում ուսումնական նյութերի և ուսումնական թեմատիկ ծրագրերի մշակման նպատակով աշխատանքային խմբի ստեղծում	ՀՀ արդարադատության նախարարություն ՀՀ դատական դեպարտամենտ Համաձայնության դեպքում նաև՝ Արդարադատության ակադեմիա Փաստաբանների պալատ/Փաստաբանների դպրոց Բարձրագույն ուսումնական հաստատություններ/ԵՊՀ իրավաբանական կլինիկա Հասարակական կազմակերպություններ Միջազգային կազմակերպություններ	2016թ. մարտ- 2016թ. հունիս	Ուսումնական նյութեր, ուսումնական թեմատիկ ծրագրեր
3.	Ամառային դպրոցի կազմակերպում, որի ուսումնական ծրագիրը կներառի նաև նախորդ երկու միջոցառումների արդյունքների լուսաբանումը	ՀՀ արդարադատության նախարարություն ՀՀ դատական դեպարտամենտ Համաձայնության դեպքում նաև՝ Արդարադատության ակադեմիա Փաստաբանների պալատ/Փաստաբանների դպրոց Բարձրագույն ուսումնական հաստատություններ/ԵՊՀ իրավաբանական կլինիկա Հասարակական կազմակերպություններ Միջազգային կազմակերպություններ	2016թ. հուլիս- 2016թ. օգոստոս	Ամառային դպրոցում ներառված խմբերում գենդերային հարցերի վերաբերյալ իրավագիտակցության բարձրացում
4.	Արդարադատության ակադեմիայի, Փաստաբանների պալատի/Փաստաբանների դպրոցի, Բարձրագույն ուսումնական հաստատությունների, ՀԿ-ների և միջազգային կազմակերպությունների հետ համագործակցության նախաձեռնում, տվյալ գործողությունների ծրագրի իրականացման նպատակով	ՀՀ արդարադատության նախարարություն ՀՀ դատական դեպարտամենտ	2015թ. սեպտեմբեր - 2017թ. դեկտեմբեր	Հասարակական լայն շրջանների մասնակցության ապահովում և գործողությունների ծրագրի համատեղ իրականացում
5.	Ավագ դպրոցների աշակերտների հետ հանդիպում (այց դատարան, քննարկում, դատախաղ և այլն)	ՀՀ արդարադատության նախարարություն ՀՀ դատական դեպարտամենտ Համաձայնության դեպքում նաև՝ Արդարադատության ակադեմիա ՀՀ կրթության և գիտության նախարարություն Հասարակական կազմակերպություններ	2016 թ. սեպտեմբեր - 2016 թ. հոկտեմբեր	Աշակերտների շրջանում գենդերային հարցերի վերաբերյալ իրավագիտակցության բարձրացում
6.	Պետական և ոչ պետական մարմինների ու կազմակերպությունների մասնակցությամբ 3 կամ ավելի սեմինար (քննարկում, կլոր սեղան, վերապատրաստում և այլն)	ՀՀ արդարադատության նախարարություն ՀՀ դատական դեպարտամենտ Համաձայնության դեպքում նաև՝ Արդարադատության ակադեմիա ՀՀ կրթության և գիտության նախարարություն Հասարակական կազմակերպություններ	2016թ. նոյեմբեր - 2017թ. հունիս	Սեռային (գենդերային) հավասարության ընկալման խրախուսում
7.	Միջոցառումների իրականացման վերաբերյալ համապարփակ տեղեկատվության պարբերաբար հրապարակում	ՀՀ արդարադատության նախարարություն ՀՀ դատական դեպարտամենտ	2015թ. սեպտեմբեր - 2017թ. դեկտեմբեր	Ծրագրի իրականացման վերաբերյալ հանրային իրազեկման բարձրացում
8.	Ծրագրի արդյունավետության գնահատում (զեկույց) առ այն, որ դատարաններում սեռային հավասարության դրական փոփոխության աճը կազմում է 50%, իսկ հասարակության շրջանում իրազեկվածությունը բարձրացել է	ՀՀ արդարադատության նախարարություն ՀՀ դատական դեպարտամենտ	2017թ. հուլիս- 2017թ. դեկտեմբեր	Դատարաններում սեռային հավասարության աճ Հասարակության իրազեկվածության բարձրացում

(հավելվածը լրաց. 16.07.15 N 02-Ն)